تازيون خبرون

Daily Archives: July 2, 2015

وفاقي سرڪار پاران ڪي فور منصوبي لاءِ سنڌ سرڪار کي 10 ارب روپيا ڏيڻ جو اعلان

ڪراچي (اسٽاف رپورٽر) وفاقي سرڪار ڪي فور منصوبي لاءِ سنڌ سرڪار کي 10 ارب روپيا ڏيڻ جو اعلان ڪيو آهي، وزير اعظم جو چوڻ آهي ته ڪراچي ۾ گرمي وگهي ماڻهن جو فوت ٿيڻ ملڪي تاريخ جو غير معمولي واقعو آهي، ذميوارن جو احتساب ٿيڻ گهرجي. سي ايم هائوس ۾ وزير اعظم نواز شريف جي صدارت هيٺ ڪراچي ۾ گرمي سبب ماڻهن جي فوتگين ۽ لوڊشيڊنگ واري معاملي تي اجلاس ٿيو، جنهن ۾ وفاقي گهرو وزير چوڌري نثار، پرويز رشيد، عبداالقادر بلوچ، مشاهد الله ممڪلتيوزير سائره افضل ۽ ٻين شرڪت ڪئي. وڏي وزير سيد قائم علي شاهه، گورنر عشرت العباد، شرجيل ميمڻ، مراد علي شاهه، ڄام مهتاب ڏهر، چيئرمين اين ڊي ايم اي ۽ فلاحي ادارن جي سربراهن پڻ شرڪت ڪئي. وزير اعظم نواز شريف ڪراچي ۾ گرمي وگهي ماڻهن جي فوتگين واري معاملي تي ڏک جو اظهار ڪيو، سندس چوڻ هو ته ڏکي وقت ۾ متاثرن سان پوري قوم گڏ  آهي. وزير اعظم نواز شريف چيو ته ڪراچي ۾ گرمي وگهي ماڻهن جون فوتگيون ملڪي تاريخ جو بدترين واقعو آهي. اجلاس ۾ وزير اعظم کي بريفنگ ڏني وئي ته ڪي اليڪٽرڪ جي غلفت سبب انساني جانيون ضايع ٿيون. وزير اعظم کي ٻڌايو ويو ته  گرمي سبب 1250 انساني جانيون ضايع ٿيون آهي ۽ 60 هزار کان وڌيڪ ماڻهو اسپتال ۾ داخل ڪيا ويا آهن. وزير اعظم وڏي وزير سان مخاطب ٿيندي سوال ڪيو ته اهڙي بدترين صورتحال ۾ سنڌ سرڪار عوام کي رليف ڏيڻ لاءِ ڪهڙا قدم کنيا، جنهن تي سيد قائم علي شاهه چيو ته حڪومت هر ممڪن قدم کنيو آهي. وڏي وزير وزير اعظم کي ٻڌايو ته سموري صورتحال ۾ سند هڪ فون ڪي اليڪٽرڪ ۽ ٻيو فون اسپتالن ڏانهن هوندو هو. وڏي وزير چيو ته صوبائي حڪومت متاثرن خاندانن جي مدد ڪري رهي آهي لوڊشيڊنگ سبب وڌيڪ انساني جانيون ضايع ٿيون. وڏي وزير سيد قائم علي شاهه نواز شريف سان مخاطب ٿيندي چيو ته ڪراچي سميت هر صورتحال تي وفاق جي دلسچپي تي هو ٿورائتا آهن. وزير اعظم کي ڪي فور منصوبي بابت چيف سيڪريٽري بريفنگ ڏيندي چيو ته ڪينجهر ڍنڍ مان 2 سئو 60 ملين گيلن پاڻي ڪراچي واسين کي فراهم ڪيو ويندو، ٽن مرحلن ۾ مڪمل ٿيندڙ ان منصوبي سان شهر جي پاڻي واري ضرورت پوري ٿي ويندي. وزير اعظم منصوبي تي ڪم جلد اڪلائڻ سان گڏ وفاقي ۽ صوبائي حڪومت کي ڪميٽي جوڙڻ جي هدايت ڪئي. وزير اعظم ميان نواز شريف ڪي فور منصوبو ٻن سالن ۾ مڪمل ڪرڻ جي هدايت ڪندي 10 ارب روپيا ڏيڻ جو اعلان پڻ ڪيو. زير اعظم کي گرين لائن منصوبي بابت رپورٽ پيش ڪندي ٻڌايو ويو ته ان سان روزاني ٽي لک ماڻهو سفر ڪري سگهندي جنهن لاءِ وفاقي سرڪار 8 ارب روپيا ڏيڻ جو اعلان ڪيو آهي پر منصوبي تي 16 ارب روپين جي لاڳت ايندي تنهنڪري وڌيڪ فنڊ به ڏناوڃن. اڻي واري وزير مراد علي شاهه پاران ييلو ۽ ريڊ لائن بس منصوبن بابت بريفنگ دوران وزير اعظم چيو ته اوهان کي سڀ خبر هوندي آهي اهو ٻڌايو ته ڪينجهر ڍنڍ جي پکيڙ ڪيتري آهي؟ راد علي شاهه پاران  ڍنڍ جي ايراضي ٻڌائڻ بعد وزير اعظم خوشگوار موڊ ۾ چيو ته اوهان کي واقع ڄاڻ آهي.

 

ڪراچي ۾ وڌيڪ 8 ماڻهو فوت، ڪي اليڪٽرڪ جو ڪانٽريڪٽ ختم ڪرڻ تي غور

ڪراچي (اسٽاف رپورٽر) ڪراچي جي مختلف اسپتالن ۾ گرمي سٽيل  وڌيڪ 8 مريض فوت ٿي ويا آهن جنهن کان پوءِ انگ 12 سئو 70 کان وڌي ويو آهي. جناح اسپتال ۾ گرمي سٽيل پنجن ماڻهن دم ڏنو جڏهن ته عباسي شهيد اسپتال ۾ ٽن ڄڻا فوت ٿي ويا. ڪراچي جي مختلف اسپتالن ۾ گرمي سٽيل هزارين ماڻهو اڃا تائين داخل آهن. ڊاڪٽرن موجب، ڪيترن ئي مريضن جي حالت اڃا تائين خراب آهي جنهن سبب فوتين جي انگ ۾ وڌا جو خدشو برقرار آهي. بئي طرف وڏي وزير قائم علي شاهه وزيراعظم آڏو ڪي اليڪٽرڪ خلاف شڪايتن جا دفتر کولي ڇڏيا، ذريعن موجب ڪي اليڪٽرڪ جو ڪانٽريڪٽ ختم ڪرڻ تي غور شروع ڪيو ويو آهي، انتظاميا جي بريفنگ بعد حتمي فيصلو ڪيو ويندو. سي ايم هائوس ۾ اجلاس دوران وڏي وزير قائم علي شاهه ڪراچي ۾ فوتگين بابت بريفنگ دوران ڪي اليڪٽرڪ خلاف شڪايت ڪندي چيو ته گرمي دوران لوڊشيڊنگ سبب سوين ماڻهو فوت ٿيا. هن چيو ته جيڪڏهن ڪي اليڪٽرڪ وقت سر فالٽ درست ڪري ها ته ايڏي وڏي پئماني تي فوتگيون نه ٿين ها. ذريعن موجب وفاقي سرڪار اڳواٽ ئي ڪي اليڪٽرڪ جي ڪردار مان مطمئن ناهي، وڏي وزير جي شڪايت بعد ڪي اليڪٽرڪ جو ڪانٽريڪٽ ختم ڪرڻ تي غور شروع ڪيو ويو آهي.

 

پي ٽي آءِ وڪيل ن ليگ کي مرڪز رکيو آهي ثبوت آهن ته پيش ڪري: چيف جسٽس

اسلام آباد  (بيورو) عام چونڊن ۾ مبينا ڌانڌلين جي جاچ ڪندڙ انڪوائري ڪميشن ۾ پي ٽي آءِ جي وڪيل حفيظ پيرزادي دليل مڪمل ڪري ورتا، ڪميشن پيپلزپارٽي جي اعتزاز احسن کي اڄ 11 هين وڳي تائين دليل مڪمل ڪرڻ جي هدايت ڪئي آهي. 2013 جي عام چونڊن ۾ مبينا ڌانڌلين جي جاچ ڪندڙ انڪوائري ڪميشن جو اجلاس چيف جسٽس ناصر الملڪ جي صدارت هيٺ ٿيو. اجلاس ۾ چيف جسٽس ناصر الملڪ پي ٽي آءِ جي وڪيل ڏانهن مخاطب ٿيندي چيو ته اوهان پنهنجي دليلن ۾ ن ليگ کي مرڪز رکيو آهي، ن ليگ خلاف ڌانڌلين جا ثبوت آهن ته پيش ڪيا وڃن ۽ ڪميشن منظم ڌانڌلين جي جاچ ڪري پئي، ان نقطي تي ن ليگ جي وڪيل آڏو دليل ڏنا وڃن، جنهن جو جواب وڪيل پاڻ ڏيندو. حفيظ پيرزادي چيو ته هن گذريل ڏينهن به ساڳي نقطي تي دليل ڏنا هئا، اڄ به ساڳي نقطي تي دليل ڏيندو. پي ٽي آءِ جي وڪيل چيو ته عام چونڊن ۾ تحريڪ انصاف کي 76 لک ووٽ مليا پر ن ليگ هڪ ڪروڙ 48 لک ووٽ حاصل ڪيا، جيڪي 2008 وارين چونڊن جي ڀيٽ ۾ ٻيڻ تي هئا. حفيظ پيرزادي چيو ته ن ليگ رڳو پنجاب ۾ هڪ ڪروڙ 10 لک ووٽ حاصل ڪيا، عام چونڊن دوران سڀ کان وڌيڪ سيٽون حاصل ڪرڻ لاءِ ٽارگيٽ پنجاب کي ئي بڻايو ويو هو.  جسٽس اعجاز افضل ريمارڪس ۾ چيو ته 2013 جي چونڊن دوران پي ٽي آءِ جي خيبرپختونخواهه ۾ حڪومت هئي، پر 2013 وارين چونڊن ۾ ان کي غير يقيني شڪست ٿي. حفيظ پيرزادي چيو ته ن ليگ ڪي پي ڪي جي نتيجن کي تسليم نه ڪيو پر چيلينج به ناهي ڪيو. حفيظ پيرزادي چيو ته سنڌ ۾ ن ليگ کي 2008  وارين چونڊن جي ڀيٽ ۾ 2013 ۾ گهٽ ووٽ  مليا، جنهن تي چيف جسٽس ريمارڪس ڏنا ته سنڌ ۾ پيپلزپارٽي ٻيهر حڪومت ٺاهي آهي. حفيظ پيرزادي چيو ته پنجاب ۾ چونڊن دوران 50 سيڪڙو تعليم کاتي جو هو، ان وقت سيڪريٽري تعليم کي تبديل نه ڪيو ويو،  پنجاب جي اڳوڻي نگران وڏي وزير نجم سيٺي هڪ بيان ۾ چيو هو ته 26 اپريل بعد سندس اختيار ختم ٿي رهيا هئا، جيڪڏهن نگران حڪومت وٽ اختيار ئي نه هئا ته پوءِ پنجاب کي ڪير ڪنٽرول ڪري رهيو هو؟. حفيظ پيرزادي چيو ته پنجاب جي ان وقت جي اليڪشن ڪمشنر محبوب انور حڪمن جي ڀڃڪڙي ڪئي ۽ ان بيلٽ پيپرز لاءِ ريٽرننگ آفيسرز کي مڪمل طور ڇوٽ ڏني. پ پ جي وڪيل اعتزاز احسن چيو ته اليڪشن ۾ ڌانڌلي ٿي آهي ۽ ووٽن جا ٿيلها کوليا ويا آهن. اعتزاز احسن چيو ته سپريم ڪورٽ اصغر خان ڪيس ۾ بي ضابطي تي چونڊن کي ڌانڌلي واري اليڪشن قرار ڏئي چڪي آهي. اعتزاز احسن جا دليل جاري هئا ته ڪميشن جو اجلاس اڄ تائين ملتوي ڪيو ويو، ڪميشن اعتزاز احسن کي اڄ 11 هين وڳي تائين دليل مڪمل ڪرڻ جي هدايت ڪئي آهي.

 

وزيراعظم وفاق ۽ سنڌ وچ ۾ رابطي جو نظام بهتر بڻائڻ ۽ مسئلن جي حل لاءِ ٽي رڪني ڪميٽي جوڙي ڇڏي

ڪراچي (اسٽاف رپورٽر) وزيراعظم ميان نوازشريف وفاق ۽ سنڌ حڪومت وچ ۾ مسئلن جي حل ۽ رابطي جو نظام بهتر بڻائڻ لاءِ وفاقي وزيرن تي ٻڌل ٽي رڪني ڪميٽي جوڙي ڇڏي آهي،ڪميٽي ۾ عبدالقادر بلوچ، اسحاق ڊار ۽ خواجه آصف شامل هوندا، اها ڪميٽي سنڌ ۾ لوڊشيڊنگ، بجلي جي رهتن واري تڪرار، مالي معاملن،فنڊ جاري ٿيڻ، وفاقي حڪومت پاران ڪراچي سوڌو سڄي سنڌ ۾ هلندڙ ميگاپروجيڪٽس مڪمل ٿيڻ ۽ ٻين مسئلن جي حوالي سان سنڌ حڪومت سان رابطي ۾ رهندي ۽ گڏيل ڳالهه ٻولهه ذريعي مسئلا حل ڪيا ويندا وزيراعظم وفاقي گهرو وزير چوڌري نثارعلي خان کي هدايت ڪئي آهي ته هو ڪراچي ۾ امن امان جي صورتحال بهتر بنائڻ ۽ ڏوهارين خلاف جاري آپريشن بابت هر مهيني اجلاس ڪوٺائي سنڌ حڪومت ۽ قانون لاڳو ڪندڙ ادارن وچ ۾ رابطي جو نظام بهتر بنائڻ ۾ پنهنجو ڪردار ادا ڪري ته جيئن آپريشن جا نتيجا حاصل ڪري سگهجن، وزيراعظم اهڙن خيالن جو اظهار سي ايم هائوس ڪراي ۾ گورنر ڊاڪٽر عشرت العباد خان ۽ وڏي وزير سيد قائم علي شاهه سان ملاقات ۾ ڪيو ، ان موقعي تي چوڌري نثارعلي خان،مشاهد الله خان ،پرويز رشيد، عبدالقادر بلوچ ۽ سائره افضل تارڙ موجود هئا، ذريعن جو چوڻ آهي ته سنڌ جي وڏي وزير، وزيراعظم کي صوبي ۾ امن امان جي صورتحال، ترقياتي منصوبن ۽ ٻين معاملن بابت ٻڌايو، وڏي وزير ، وزيراعظم کي صوبائي حڪومت جي اعتراضن کان آگاهه ڪندي چيو ته وفاقي حڪومت پاران سنڌ حڪومت کي گهربل مالي وسيلا نه پيا ڏنا وڃن، جنهن ڪري صوبو مالي گهوٽالي جو شڪار ٿي رهيو آهي ،وڏي وزير سنڌ ۾ اڻ اعلانيل لوڊشيڊنگ ۽ عوامي اهنجن کان به وزيراعظم کي آگاهه ڪيو ۽ ٻڌايو ته پاڻي ۽ بجلي جي وزارت کي ٻڌائڻ کانپوءِ به اڃا تائين بجلي فراهم ڪرڻ جا ادارا صوبائي حڪومت سان سهڪار نه پيا ڪن ۽ بجلي جي رهتن جي تڪرار کي به حل نٿو ڪيو وڃي، جڏهن ته ڪراچي ۾ آپريشن لاءِ فنڊ جاري ناهن ڪيا ويا، نه ئي پوليس ۽ قانون لاڳو ڪندڙ ادارن کي جديد اوزار يا وسيلا ڏنا ويا آهن، آپريشن جا خرچ سنڌ حڪومت برداشت ڪري رهي آهي،وفاقي حڪومت جي خاطري کانپوءِ به اسان جا مسئلا حل نٿا ڪيا وڃن، وڏي وزير وزيراعظم کان گهر ڪئي ته سنڌ کي اين ايف سي ايوارڊ هيٺ سندس حصو ڏڻو وڃي، غيرقانوني لوڊشيڊنگ ختم ڪئي وڃي ۽ ترقياتي اسڪيمن ۽ ٻين معاملن ۾ فنڊ جاري ڪيا وڃن، وزيراعظم اهي سمورا مسئلا غور سان ٻڌا ۽ وفاقي حڪومت پاران سهڪار ڪرائڻ جي خاطري ڪرائي، وزيراعظم چيو ته وفاقي حڪومت سنڌ حڪومت جا سمورا مسئلا اوليتي بنيادن تي حل ڪندي ۽ انهيءَ حوالي سان لاڳاپيل وفاقي وزير سنڌ حڪومت سان رابطي ۾ رهندا وزريراعظم چيو ته ڪراچي آپريشن کي آخري انجام تائين پهچايو ويندو، وزيراعظم وڏي وزير کي هدايت ڪئي ته سنڌ حڪومت آپريشنل خرچن جا تفصيل ۽ سيڪيورٽي ادارن کي جديد اوزار ڏيڻ لاءِ گهربل ڄاڻ وفاق کي ڏئي، ان حوالي سان وفاقي حڪومت گهربل فنڊ ۽ جديد اوزار ڏيندي.

 

بلاول ڀٽو پنجاب جي صورتحال تي اڳواڻن جو اهم اجلاس اڄ طلب ڪري ورتو

لاهور (اين اين آءِ) پاڪستان پيپلز پارٽي جي چيئرمين بلاول ڀٽو زرداري پنجاب جي صورتحال تي اڳواڻن جو اهم اجلاس اڄ خميس تي ڪراچي ۾ طلب ڪري ورتو آهي، ذريعن مطابق اجلاس ۾ پنجاب جو صدر ميان منظور احمد وٽو، /پرويز اشرف، قمر زمان ڪائرا، مخدوم احمد محمود سميت ٻيا اڳواڻ شرڪت ڪندا، اجلاس ۾ پيپلز پارٽي پنجاب سان تعلق رکندڙ اڳواڻن پاران پارٽي ڇڏڻ جي حوالي سان فيصلن تي غور ڪيو ويندو، ذريعن مطابق ان دوران بلاول ڀٽو پاران پنجاب جي دوري جو اعلان به ڪيو ويندو.

 

سعودي حڪومت خلاف تقرير، زيد حامد کي 8 سال قيد ۽ 1000 ڪوڙا هڻڻ جي سزا

رياض(مانيٽرنگ ڊيسڪ)  پاڪستان جي دفاعي تجزيه نگار ۽ ٽي وي ڪمينٽيٽر زيد حامد کي سعودي عرب جي حڪومت تي تنقيد ڪرڻ جي ڏوهه ۾ 8 سال قيد ۽ هڪ هزار ڪوڙا هڻڻ جي سزا ڏني وئي آهي. عالمي ميڊيا مطابق زيد حامد پنهنجي گهرواري سان گڏ نجي دوري تي سعودي عرب ويو هو، جتي کيس گرفتار ڪيو ويو ، سعودي اختيارين جو چوڻ هو ته زيد حامد عوامي ميڙاڪن ۾ سعودي سرڪار خلاف تقريرون ڪيون ۽ کيس عرب شهرين خلاف نفرت جوڳيون تقريرون ڪرڻ تي گرفتار ڪيو ويو. ان ڏس ۾ پاڪستان ۾ پرڏيهي آفيس جي ترجمان قاضي خليل الله رابطو ڪرڻ تي ٻڌايو ته رياض ۾ سندن سفارتخاني پاران ٻڌايو ويو آهي ته زيد حامد کي ٻه هفتا اڳ گرفتار ڪيو ويو هو، جنهن کانپوءِ سفارتخانو ساڻس قونصل جنرل جي سطح تائين پهچ لاءِ سعودي اختيارين سان لاڳيتو رابطي ۾ هو.

 

وزيراعظم گڏيل قومن جي 70هين سالگره تقريبن ۾ شريڪ ٿيندو: مليحه لوڌي

اسلام آباد (اين اين آءِ) گڏيل قومن ۾ پاڪستان جي مستقل مندوب ڊاڪٽر مليحه لوڌي چيو ته وزيراعظم نوازشريف گڏيل قومن جي 70هين سالگرهه جي سلسلي ۾ سربراهه اجلاس ۽ تقريبن ۾ شرڪت ڪندو ڊاڪٽر مليحه لوڌي هڪ بيان ۾ چيو ته وزيراعظم نوازشرف جي گڏيل قومن جي دوري بابت معمول جي مشاورت ۽ انتظامن لاءِ پاڪستان ۾ آهيان هن چيو ته گڏيل قومن جي 70هين سالگرهه جي سلسلي ۾ سربراهه اجلاس ۽ تقريبون منعقد ٿينديون جن ۾ وزيراعظم شرڪت ڪندو.

 

جيڪڏهن حڪمران جماعت وٽ لاهور جو سڀ کان وڏو مينڊيٽ آهي ته مينار پاڪستان ڀري ڏيکاري: عمران خان

اسلام آباد (بيورو) تحريڪ انصاف جي سربراهه عمران خان، ن ليگ کي چيلينج ڪندي چيو آهي ته جيڪڏهن حڪمران جماعت وٽ لاهور جو سڀ کان وڌيڪ مينڊيٽ آهي ته مينار پاڪستان ڀري ڏيکاري، عام چونڊن ۾ منظم ڌانڌلي ڪئي وئي، جنهن ۾ ن ليگ، اليڪشن ڪميشن ۽ آر اوز ملوث آهن. جڊيشل ڪميشن جي ڪارروائي بعد ميڊيا سان ڳالهائيندي تحريڪ انصاف جي سربراهه عمران خان چيو ته چاليهه سيڪڙو تڪن تان فارم 15 غائب آهن، انڪوائري ڪميشن جي حڪم بعد تڪڙ تڪڙ ۾ فارم15 ٿيلهن ۾ ڀريا پيا وڃن، اعتزاز احسن ڪميشن آڏو ٻڌايو ته ن ليگ اڃا به ڌانڌلي ڪري پئي. هن چيو ته پنجاب جي تڪن تي واڌو بيلٽ پيپر پهچائڻ وارو سياسي فيصلو هو، جنهن سان نواز ليگ کي فائدو پهچايو ويو. عمران خان چيو ته خيبرپختونخواهه ۾ ڪيپٽن صفدر جي تڪ لاءِ واڌو بيلٽ پيپر موڪليا ويا، ريٽرننگ آفيسرز پنجاب ۾ ن ليگ جي سڌي ريت مدد ڪئي هئي. هن چيو ته پنجاب جي اڳوڻي نگران وڏي وزير نجم سيٺي جو بيان رڪارڊ تي آهي، جنهن ۾ هن واضح چيو ته کيس اختيار ئي نه هئا. هڪ سوال جي جواب ۾ عمران خان چيو ته ن ليگ عوام جو مينڊيٽ چورايو آهي، جيڪڏهن ان وٽ لاهور جو مينڊيٽ آهي ته هڪ ڀيرو مينار پاڪستان ڀري ڏيکاري.

 

پيپلز پارٽي جو اڳوڻو مملڪتي وزير صمصام بخاري، اشرف سوهنا ۽ عارف خان تحريڪ انصاف ۾ شامل

اسلام آباد(بيورو) پنجاب ۾ پيپلز پارٽي جا اڳواڻ منظور وٽو کانسواءِ اوڪاڙا تنظيم جا سمورا عهديدار تحريڪ انصاف ۾ شامل ٿي ويا. اڳوڻي مملڪتي وزير صمصام بخاري، اڳوڻي صوبائي وزير اشرف سوهنا ۽ عارف خان بني گالا ۾ عمران خان سان ملاقات ڪئي. شاهه محمود قريشي ۽ جهانگير ترين به اتي موجود هئا. پيپلز پارٽي ڇڏيندڙ اڳواڻ چيو ته هو وافادار ماڻهو آهن پر پيپلزپارٽي هاڻي اڳ واري پارٽي ناهي رهي. عمران خان تحريڪ انصاف ۾ شامل ٿيندڙ اڳواڻن جي پنهنجي پارٽي ۾ آجيان ڪئي۽ چيو ته نئون پاڪستان جوڙڻ واري تحريڪ ڏينهون ڏينهن تيزي وٺي رهي آهي. هوڏانهن منڊي بهاوالدين مان مسلم ليگ ن جي اڳوڻي اسيمبلي ميمبر اڪرام الله رانجها به تحريڪ انصاف ۾ شامل ٿي ويا.

 

بجلي بلن ۾ 7 کان وڌيڪ ٽيڪسز شامل عوام کان 3 ڀيرا جي ايس ٽي اوڳاڙن جو انڪشاف

ڪراچي (اين اين آءِ) بجلي جي قيمت گهٽائڻ جي دعويدار وفاقي حڪومت پاران بلن ۾ 7 کان وڌيڪ ٽيڪسز شامل صارفن کان 3 ڀيرا جي ايس ٽي وصول ڪرڻ جو انڪشاف ٿيو آهي، بجلي جي قيمت گهٽ،ٽيڪسز وڌيڪ آهن، عوام کي رليف فراهم ڪرڻ جي دعويدار حڪومت صارفن کان جملي طور 17 بدران 51 سيڪڙو جنرل سيلز ٽيڪس اوڳاڙي رهي آهي، حڪومت پهريان 17 سيڪڙو جنرل سيلز ٽيڪس، پوءِ پيداواري لاڳت ۽ فيول ايڊجسمينٽ نالي تي ٽيڪس وٺي ٿي، عوام کي نيپرا پاران ملندڙ رليف تي به ٽيڪس ورتو وڃي، گيس ڊولپمينٽ سرچارج جي نالي تي هر مهيني ساڍا 5 ارب عوام کان ورتا وڃن ٿا، ان کانسواءِ نيلم جهلم سرچاجرز تي 10 پيسا ۽ فنانس ڪاسٽ سرچارجز جي نالي تي 43 پيسا في يونٽ به عوام کي ڏيڻو پوي ٿو، ظلم جي حد اها آهي ته جو بجلي پيدواري ڪمپني کي ادائگي جي دير تي وياج به عوام کان ورتو وڃي ٿو، هي وياج ايڪولائيزيشن سرچارج جي نالي تي صارفن کان 30 پيسا وصول ڪيو وڃي ٿو، انکانسواءِ پي ٽي وي جي مد ۾ 60 رپيا، جڏهن ته ڏيڍ رپيا في يونٽ ايڪسائيز ڊيوٽي به صارفن کان ورتي وڃي ٿي.