تازيون خبرون

Daily Archives: July 1, 2015

وزير اعظم ۽ آرمي چيف جي ملاقات، ڀارتي مداخلت تي گڏيل قومن کي خط لکڻ تي اتفاق

اسلام آباد(بيورو) وزيراعظم نواز شريف ۽ آرمي چيف جنرل راحيل شريف وچ ۾ ملاقات دوران ڀارتي مداخلت تي گڏيل قومن کي خط لکڻ تي اتفاق ڪيو ويو آهي وزيرعظم محمد نوازشريف سان چيف آف آرمي اسٽاف جنرل راحيل شريف اڱاري تي ايوان ويزراعظم ۾ ملاقات ڪئي ملاقات ۾ آپريشن ضرب عضب ۽ عارضي طور لڏپلاڻ ڪندڙ ماڻهن جي واپسي بحالي ۽ ٻيهر آباد ڪرڻ بابت معاملن تي خيالن جي ڏي وٺ ٿي ذريعن مطابق ٻنهي اڳواڻن ان ڳالهه تي اتفاق ڪيو ته آخري دهشتگرد جي خاتمي تائين آپريشن جاري رهندو ملڪ جي اڀرندي ۽ الهندي سرحدن تي سيڪيورٽيصورتحال تي به ڳالهه ٻولهه ٿي برطانوي نشرياتي اداري جي ڊڪيومينٽري جي حوالي سان خانگي ٽي وي ٻڌايو ته ملاقات ۾ بي بي سي رپورٽ ۽ پاڪستان ۾ ڀارت جي مداخلت بابت انڪشافن تي به خيالن جي ڏي وٺ ڪئي ويئي واضح رهي ته سيڪيورٽي ادارن کي پاڪستان جي اندروني معاملن ۾ ڀارت جي مداخلت دهشتگردي جي معاونت سميت ان جي سنگين ڏوهن ۾ ملوث هئڻ جا ثبوت مليا آهن ڀارتي ڳجهي ايجنسي را جي مداخلت جي ثبوت سان گڏ هاڻي پاڪستان عالمي سطح تي ڀارت کي بي نقاب ڪرڻ جو فيصلو ڪيو آهي. ذريعن موجب وزيراعظم نواز شريف ۽ آرمي چيف جنرل راحيل شريف جي ملاقات ۾ دهشتگردن خلاف سڄي ملڪ ۾ آپريشن آخري دهشتگرد جي خاتمي تائين جاري رکڻ تي به اتفاق ڪيو ويو.

 

سنڌ حڪومت 37 ٽي ايم اوز ۽ ٽي اوز کي معطل ڪري ڇڏيو

ڪراچي (اسٽاف رپورٽر( سنڌ جي اطلاعات ۽ بلديات کاتي واري صوبائي وزير شرجيل انعام ميمڻ 37  ٽائون ميونسپل آفيسرن ۽ ٽائون آفيسرن کي حڪم نه مڃڻ  ۽  بار بار خرچن جا تفصيل مڪاني کاتي ۾ جمع ڪرائڻ واري هدايت تي عمل نه ڪرڻ جي ڪري آر ايس او 2000 تحت معطل ڪري ڇڏيو آهي . معطل ٿيل آفيسرن جو تعلق ڪراچي، سڪرنڊ، اوٻآوڙو، سنجهورو،ڪنري، پنو عاقل ،جهڏو سميت سنڌ جي ٻين ضلعن سان آهي. انهن سمورن آفيسرن کي 22-6-2014 تي شوڪاز ۽ بعد ۾ 27-6-2015 تي آخري سبب ڄاڻايو نوٽيس جاري ڪيا ويا، ان جي باوجود انهن سمورن آفيسرن پنهنجي پنهنجي ٽائون جيڇهن مهينن جي خرچن جا تفصيل جمع نه ڪيا. صوبائي وزير شرجيل انعام ميمڻ بيهر ڪيو آهي ته هاڻ بلديات کاتي ۾ گهوسٽ ۽ ڪرپٽ ملازمن کي ڪنهن به صورت ۾ قبول نه ڪيو ويندو ۽ جيڪي مالزمن ۽ آفيسر سرڪاري هدايتن جي ابتڙ ڪنهن به سرگرمي ۾ ملوث ٿيا يا ڪنهن به قسم جي ڪرپشن ۾ ملوث هجڻ جا ثبوت مليا ته انهن کي سندن نوڪرين مان فارغ ڪيو ويندو. تفيصل موجب صوبائي وزير شرجيل انعام ميمڻ حڪن جي خلاف ورزي ۽ سرڪاري طور تي ٽائون  کي ملندڙ رقم جي خرچن جا تفصيل مڪاني کاتي ۾ جمع نه ڪرڻ سبب  سنڌ جي 37 ٽي ايم اوز ۽ ٽي اوز کي معطل ڪريڇڏيو آهي. معطل ٿيندڙ ۾ عامر ڀٽو (ايڊمن برانچ)، فيصل حسن ڏاهري(ايڊمن برانچ)، عبدالرسول کوسو ( ٽي او سڪرنڊ)، سيد محمد علي شاهه(ايڊمن برانچ)، ميان عمران (ٽي اوصالح پٽ)، خالد خان خروش، وقار احمد سومرو (ٽي او اوٻاوڙو)، سيد جاويد حسين شاهه (پنو عاقل) آغا خليق احمد خان دراني، سيد احسن علي شاهه( سوڀوديرو)، آغا امجد علي پٺاڻ(ڳڙهي خيرو)، منظور حسين سميجو، گدا حسين زرداري، شفقت حسين منگراڻي( جهڏو)، باغان خان نندواڻي (تنگواڻي)، لياقت علي ڀٽي، عابد ولي کوسو (مانجهند) امر لعل اڪراڻي، علي احمد مگسي (سي ايم او هالا)، اقتدار علي جعفري، محبوب علي بريري( شهيد بينظير آباد) عبدالحميد شيخ (ڏيپلو)، ماجد انور سيهڙ، ابراهمي عمراڻي ( ٽنڊو آدم) وحيد پنهيار، اعجاز احمد ملاح ( ميرو خان) انس الرحمان سيال (ڊي ايم سي ڪورنگي) ، ظهور احمد لکن(نوشهرو فيروز)، سيد اعجاز علي شاهه (ملير)، اياز حميد الله بلوچ (ملير) عالمگير جوڻيجو( سنجهورو)، مهتاب علي خواجه (سامارو)، فياض علي شاهه، سيد علي حيدر شاهه سجاد علي مغيري ، زين العابدين ملڪ (ڪنري)۽ عزيرالرحمان تنيو شامل آهن . انهن سمورن مالازمن کي آخري سبب ڄاڻايو نوتيس جي ذريعي پنهنجي خرچن جا تفصيل جمع ڪرائڻ جي مهلت ڏيڻ باوجود انهن پاران تفيصل جمع نه ڪرائڻ سبب کين معطل ڪيو ويو آهي. شرجيل انعام ميمڻ چيو ته هاڻ مڪاني ادارن واري کاتي سميت سنڌ حڪومت جي سمورن کاتن مان گهوسٽ ۽ ڪرپٽ ملازمن خلاف ڪرڪ ڊائون جي شروعات ڪئي وئي آهي ۽ هاڻي فقط انهن ملازمن کي پگهارون ادا ڪيون وينديون، جيڪي پنهنجا فرض ايمانداري سان مڪمل طور سرانجام ڏيندا. شرجيل انعام ميمڻ هڪ ڀيرو ٻيهر عزم جو اظهار ڪيو آهي ته سنڌ حڪومت ۽ خاص طور بلديا ت کتي مان گهسٽ ملازمن جي خاتمي تائين هن جي اها مهم جاري رهندي ۽ جيستائين هو انهن کاتن مان گهوسٽ ملازمن جو خاتمو نه ٿو ڪري سڪون سان نه ويهندو.

 

اميد آهي ته ايندڙ ٻن سالن ۾ ملڪ مان پوليو جو وائرس ختم ٿي ويندو: صدر

اسلام آباد (اين اين آءِ) پاڪستان جي صدر ممنون حسين اميد ظاهر ڪئي آهي ته ايندڙ ٻن سالن ۾ ملڪ مان پوليو جو وائرس ختم ٿي ويندو پوليو کي ڦهلائڻ جو ذميوار پاڪستان نه پر اهي عناصر آهن جيڪي خطي ۾ دهشتگردي کي هوا ڏيڻ جو سبب آهن پاڪستان پوليو وائرس جي خاتمي لاءِ پرعزم آهي بين الاقوامي برادري پاڪستان کي ان ڏس ۾ جوڳو تعاون فراهم ڪري ته جيئن هو مسئلن کي منهن ڏيڻ بنا هن بيماري جي روڪٿام لاءِ بهتر نموني ڪم ڪري سگهي. هن اها ڳالهه انٽرنيشن ل پوليو پلس ڪميٽي جي چيئرمين ۽ روٽري فائونڊيشن جي وائيس چيئرمين مائيڪل جيميڪ گودرن سان ڳالهه ٻولهه ڪندي ڪئي جنهن اڱاري تي هتي ايوان صدر ۾ وفد سان گڏ ان سان ملاقات ڪئي صدر ان ڳالهه تي زور ڀريو ته پاڪستان جو پوليو جي روڪٿام لاءِ ارادو مضبوط آهي هن ان ڳالهه تي زور ڀريو ته پوليو روڪٿام پروگرام اعليٰ ترين سطح تي حڪومت جي تائيد حاصل آهي صدر ان ڳالهه کي اجاگر ڪيو ته سمورن صوبن جا وڏا وزير ان ڳالهه کي يقيني بنائڻ تي خاص توجهه ڏيئي رهيا آهن ته پوليو پروگرام جي هر ٻارڙي تائين پهچ هجي صدر وفد کي يقين ڏياريو ته هو ذاتي طور تي گورنرز سان ڳالهائيندو ۽ انهن تي زور وجهندو ته هو هن وائرس جي مڪمل پاڙ پٽڻ لاءِ انتظامي خامون ختم ڪن. صدر چيو ته بين الاقوامي برادري جي هڪ ذميوار ميمبرن جي حيثيت سان پاڪستان نه صرف پنهنجن ٻارڙن پر پنهنجن سرحدن کان ٻاهر جي ٻارڙن جي حوالي سان پنهنجي ذميواري کان چڱي طرح آگاهه آهي صدر ان ڳالهه جو ذڪر ڪيو ته پاڪستان جي حڪومت جي دهشتگردي خلاف فيصلائتي ڪارروائي جي پوليو روڪٿام مهم جي قدمن تي مثبت اثر پيا آهن صدر نشاندهي ڪئي ته پوليو بابت ٽيڪنيڪي مشاورتي گروپ ۽ پوليو بابت بين الاقوامي مانيٽرنگ بورڊ جي تازن اجلاسن ۾ مشاهدو ڪيو ويو ته پاڪستان ۾ پوليو پروگرام صحيح نموني وڃي رهيو آهي صدر يقين ڏياريو ته پاڪستان کي پوليو کان پاڪ ملڪ بنائڻ تائين پوليو روڪٿام مهم مضبوط سياسي ازم اثرائتي گڏيل رابطي ۽ هصيدارن جي حمايت سان اعليٰ ترين قومي ترجيحي آهي ملاقات ۾ ٻين سمين روٽري انٽرنيشنل ۾ ڊائريڪٽر پوليو پروگرام ڪيرل اي پنڌاڪ نيشنل چيئر پاڪستان پوليو پلس ڪميٽي عزيز ميمڻ ۽ صدارتي سيڪريٽريٽ جا سينيئر عملدار شامل هئا.

 

وزيراعظم نواز شريف پيٽروليم شين جي اگهن ۾ واڌ واري تجويز رد ڪري ڇڏي

اسلام آباد (بيورو) وزيراعظم نواز شريف پيٽروليم شين جي اگهن ۾ واڌ واري تجويز رد ڪري ڇڏي،سندس چوڻ آهي ته هــُنن ڪڏهن به اهو ناهي چيو ته بجلي جو بحران 6 مهينن يا هڪ سال اندر حل ٿي ويندو. وزيراعظم نواز شريف اسلام آباد هاءِ وي سگنل فري جي واڌ واري منصوبي جي پيڙهه جو پٿر رکي ڇڏيو. منصوبي جي پيڙهه جو پٿر رکڻ واري تقريب کي خطابڪندي نواز شريف چيو ته هاءِ وي سگنل فري منصوبو 24 ڪلوميٽر ڊگهو آهي، هـُو اسلام آباد جا روڊ عالمي سطح جا ڏسڻ چاهين ٿا. وزيراعظم اعلان ڪيو ته ايندڙ مهيني پيٽروليم جي شين جي اگهن ۾ واڌ نه ڪئي ويندي هــُو اوگرا جي سفارش کي رد ڪري ٿو. نواز شريف چيو ته هنن اهو ڪڏهن به ناهي چيو ته هـُو ڇهن مهينن اندر بجليءَ جو مسئلو حل ڪري وٺندا، هِن وقت لوڊشيڊنگ ختم نه ٿي ڪري سگهجي. وزيراعظم قوم کي اپيل ڪئي ته بجلي نه اچي ته صبر مان ڪم ورتو وڃي. هن چيو ته قومي ناڻو لٽيندڙن ۽ قومي منصوبن ۾ دير جي ذميوارن جو احتساب ٿيڻ گهــُرجي، ڪشمير ايڪسپريس هاءِ وي ۾ بدعنواني جي جاچ ڪئي وڃي. سندس چوڻ هو ته ميٽرو بس منصوبي جا مخالف اڄ حمايت ڪري رهيا آهن، قوم جو پئسو ڪٿي خرچ ٿي رهيو آهي ان جو حساب ٿيڻ گهرجي

 

گرفتار جوابدار محسن علي ڊاڪٽر عمران فاروق کي قتل ڪرڻ جو اعتراف ڪري ورتو

ڪراچي (اين اين آءِ) ايم ڪيو ايم جي مقتول اڳواڻ ڊاڪٽر عمران فاروق جي قتل جي الزام ۾ گرفتار جوابدار محسن علي ڊاڪٽر عمران خان جي قتل جو اعتراف ڪري ورتو آهي اعترافي بيان پاڪستاني سيڪيورٽي ادارن کي ڏنو ذريعن مطابق جوابدار محسن علي پنهنجي اعترافي بيان ۾ سيڪيورٽي ادارن کي ٻڌايو ته عمران فاروق کي قتل ڪرڻ جو ٽاسڪ برطانيا کي ڏنو ويو جڏهن ته قتل جي رٿابندي به برطانوي يونيورسٽي جي هاسٽل ۾ ڪئي ويئي محسن علي سيڪيورٽي ادارن کي ٻڌايو ته رٿابندي ۾ محمد ڪاشف ۽ هڪ ٽيون شخص شامل هو محسن علي پنهنجي اعترافي بيان ۾ چيو ته جوابدارن کي اسٽيڊي ويزائن تي برطانيا اماڻيو ويو ڪاشف جعلي برطانوي پاسپورٽ تي سفر ڪيو ملزم ٻڌايو ته واردات کان پوءِ پاڪستان روانو ٿيو واضح رهي ته قانون لاڳو ڪندڙ ادارن ڪجهه ڏينهن اڳ محسن ۽ خالد شميم کي چمن جي افغان بارڊر تان گرفتار ڪرڻ جي دعويٰ ڪئي هئي.

 

سپريم ڪورٽ قومي احتساب بيورو کان 50 ميگا اسڪينڊلز جو تفصيل طلب ڪري ورتو

اسلام آباد (اين اين آءِ) سپريم ڪورٽ آف پاڪستان قومي احتساب بيورو کان 50 ميگا اسڪينڊلز جو تفصيل طلب ڪري ورتو جڏهن ته جسٽس جواد ايس خواجه چيو آهي ته ملڪ ۾ بدعنواني جو واويلا آهي نيب خاموش آهي اڱاري تي احتساب بيورو ۾ بدانتظامين ۽ بي ضابگين بابت ڪيس جي ٻڌڻي جسٽس جواد ايس خواجه جي سربراهي ۾ ٽه رڪني بئنچ ڪئي جسٽس جواد ايس خواجه ريمارڪس ڏنا ته قوم بدعنواني جون ڳالهيون ڪري ٿڪجي پئي آهي ڪراچي ۾ بدعنواني جو واويلا ٿي رهي آهي ۽ نيب خاموش آهي جسٽس شيخ عظمت سعيد چيو ته ڇا نيب کي ڪراچي ۾ چائنا ڪٽنگ جي ڪا شڪايت ناهي ملي نيب ۾ 75 سيڪڙو شڪايتون پلي بارگين جي نتيجي ۾ ختم ٿي وڃن ٿيون نيب پاران جوابدار ڇڏڻ جي شرح سڀ کان وڌيڪ آهي سپريم ڪورٽ نيب کان اسلام آباد ڪراچي ۽ لاهور ۾ بدعنواني جي 50 ميگا اسڪينڊلز جو تفصيل پيش ڪرڻ جو حڪم ڏيندي هدايت ڪئي ته مالياتي بدعنواني قبضا مافيا اختيارن کان وڌيڪ ڪيٽيگريز ۾ ميگا اسڪينڊز جو تفصيل چيئرمين نيب جي صحيحن سان جمع ڪرايو وڃي ڪيس جي وڌيڪ ٻڌڻي 7 جولاءِ تائين ملتوي ڪئي ويئي.

 

ڪراچي ۾ گرمي وڌيڪ 19 ڄڻن کان حياتيون کسي ورتيون، انگ 1247 ٿي ويو

ڪراچي (اسٽاف رپورٽر) ڪراچيءَ ۾ گرميءَ وڌيڪ 19 ڄڻن کان حياتيون کسي ورتيون، 11 ڏينهن دوران فوتين جو انگ وڌي 12 سئو 47 ٿي ويو، سنڌ جي ٻين شهرن ۾ به گرميءَ سبب حياتيون وڃائيندڙن جو انگ هڪ سئو پنج ٿي ويو آهي. سنڌ جَي راڄڌاني واري شهر ڪراچي ۾ گرمي ۽ لوڊشيڊنگ سبب قيمتي جانين جي زيان جو سلسلو جاري آهي. عباسي شهيد ۽ جناح اسپتالن ۾ گرميءَ وڌيڪ 13 ڄڻن کان حياتيون کسي ورتيون، جڏهن ته سول اسپتال ۾ وڌيڪ 3 مريض گرمي جي سٽ نه سهندي فوت ٿي ويا. سنڌ گورنمينٽ اسپتال ڪورنگي ۾ 2 ۽ سنڌ گورنمينٽ اسپتال نارٿ ڪراچي ۾ هڪ مريض فوت ٿيا. وڌيڪ 19 ڄڻن جي فوت ٿيڻ بعد 11 ڏينهن اندر حياتيونوڃائيندڙن جو انگ وڌي 12 سئو 47 ٿي ويو آهي،جڏهن ته مختلف اسپتالن ۾ سوين مريضن جو علاج هلندڙ آهي. صوبي جي ٻين ننڍن وڏن شهرن ۾ به هيٽ اسٽروڪ سبب حياتيون ضايع ٿيڻ جو سلسلو جاري آهي. ٺارو شاهه ڀرسان ڳوٺ مٺو سولنگي ۾ 53 ورهين جي اميران سولنگي ۽ ڳوٺ ڪوڙيجا ڀان ۾ 70 ورهين جو يعقوب سولنگي گرمي جي سٽ سهندي فوت ٿي ويا. موهن جي دڙي جي علائقي جهنڊو سيهڙو جو رهواسي محمد بخش ٻگهيو گرمي جي سٽ نه سهندي فوت ٿي ويو. وڌيڪ ٽن ڄڻن جي فوت ٿيڻ بعد حياتيون وڃائيندڙن جو انگ وڌي هڪ سئو پنج ٿي ويو آهي

 

ڪيئن چئي سگهون ٿا ته انجنيئرڊ چونڊون ٿيون، ثبوت ڏيو: چيف جسٽس

اسلام آباد (اين اين آءِ) 2013 جي عام چونڊن ۾ مبينه ڌانڌلي جي جاچ لاءِ جڊيشل ڪميشن جي ڪارروائي ۾ پي ٽي آءِ جي وڪيل عبدالحفيظ پيرزادو چيو آهي ته بلوچستان ۾ اليڪشن نه پر سليڪشن ٿيندي آهي جڏهن ته چيف جسٽس ناصرالملڪ چيو ته اوهان ڪيئن چئي سگهون ٿا ته بلوچستان ۾ انجنيئرڊ چونڊون ٿيون جيڪڏهن ايئن آهي ته اوهان اسان کي مواد ڏيکاريو اڱاري تي چيف جسٽس ناصرالملڪ جي سربراهي ۾ ٿيل جڊيشل انڪوائري ڪميشن ۾ پي ٽي آءِ جي وڪيل عبدالحفيظ پيرزادو دليل ڏيندي چيو ته بلوچستان ۾ اليڪشن نه پر سليڪشن ٿيندي آهي اتي انجنيئرڊ چونڊون ٿيون ڪيترن ئي پولنگ اسٽيشنز تي نه ووٽر هئا نه چونڊ عملو ڪجهه ووٽ وٺندڙ به عوامي نمائندا چونڊجي ويا جنهن تي چيف جسٽس چيو ته اوهان ڪيئن چئي سگهو ٿا ته بلوچستان ۾ انجنيئرڊ چونڊون ٿيون جيڪڏهن ايئن آهي ته اوهان اسان کي انجنيئرڊ اليڪشن جو مواد ڏيکاريو جسٽس اعجاز افضل چيو ته ماڻهو ووٽ وجهڻ نه آيا ته ڇا هي اليڪشن ڪميشن جي غلطي اهي پي ٽي آءِ جي وڪيل چيو ته اين اي 125 ۾ هڪ لک 20 هزار واڌو بيلٽ پيپرز جا ذميوار آر اوز ۽ لاڳاپيل ڊسٽرڪٽ اليڪشن ڪمشنر آهي هن چيو ته اين اي 125 ۾ فارم 15 جي غائب ٿيڻ جي شرح 75 سيڪڙو آهي.

 

بلوچستان جي ڪوهلي واري علائقي ۾ ٻن ڌرين ۾ جهيڙو، 20 کان وڌيڪ ماڻهو مارجي ويا

ڪوئيٽا (بيورو) بلوچستان جي ڪوهلي واري علائقي   ۾ ٻن ڌرين ۾ جهيڙي جي  نتيجي ۾ 20 کان وڌيڪ ماڻهو مارجي ويا، صوبائي گهرو وزير سرفراز بگٽي دعويٰ  ڪئي آهي دهشتگرد پاڻ ۾ وڙهي رهيا آهن، ڪنهن به معصوم جي زندگي ضايع ناهي ٿي، علائقي ۾ آپريشن ڪيو ويندو . هـُن نالا واري علائقي ۾ مري برادري جي ٻن  ڌرين ۾ جهيڙي دوران هڪ ٻئي تي  راڪيٽن ۽ جديد هٿيارن سان فائرنگ جي نتيجي ۾ 20 کان وڌيڪ ماڻهو مارجي ويا. ذريعن موجب هٿياربندن پاران  علائقي ۾ جديد هٿيارن سان فائرنگ  جو سلسلو جاري هجڻ ڪري ، خوف ۽ ڏهڪاءُ پکڙجي ويو.  بلوچستان جي گهرو وزير سرفراز بگٽي چيو آهي ته ڊِيرا بگٽي ۾ وڙهندڙ ڌريون دهشتگرد ۽ را جا ايجنٽ آهن، ڪنهن به معصوم جي جان ضايع ناهي ٿي. صوبائي وزير جو وڌيڪ چوڻ هو ته جابلو علائقو آهي، سيڪيورٽي فورسز ذريعي علائقي ۾ آپريشن ڪيو ويندو.

 

مشڪي ۾ سيڪيورٽي فورسز سان چڪري ۾ 13 دهشتگرد مارجي ويا هڪ اهلڪار شهيد ٻه زخمي ٿيا

آواران (اين اين آءِ) تعلقي مشڪي ۾ سيڪيورٽي فورسز سان چڪري ۾ 13 دهشتگرد مارجي ويا هڪ اهلڪار شهيد ۽ ٻه زخمي ٿيا ترجمان ايف سي مطابق بلوچستان جي ضلعي آواران جي تعلقي مشڪي ۾ سرچ آپريشن ۾ دهشتگردن ۽ ايف جي اهلڪارن وچ ۾ فائرنگ جي ڏي وٺ ٿي جنهن ۾ 13 دهشتگرد مارجي ويا جن ۾ پابندي پيل تنظيم بلوچستان لبريشن فرنٽ جي سربراهه جو ڀاءُ ۽ ڀاڻيجو به شامل آهي دهشتگرد تربت آواران ۽ مشڪي ۾ سماجي دشمن ڪارروائين ۾ ملوث هئا.