تازيون خبرون

Monthly Archives: June 2015

ماڊل ٽائون سانحي جي سازش وزيراعظم هائوس ۾ ٿي: ڊاڪٽر طاهر القادري

لاهور (بيورو) پاڪستان عوامي تحريڪ جي سربراهه طاهر القادري لاهور ۾ ڪراچي جهڙو آپريشن جو مطالبو ڪندي چيو آهي ته هو حڪومت پوليس جي جي آءِ ٽي کي رد ڪن ٿا، ماڊل ٽائون سانحي جي سازش وزير اعظم هائوس ۾ ٿي ۽ ٻنهي ڀائرن ماڻهو مارڻ جا حڪم جاري ڪيا. لاهور ۾ ميڊيا سان ڳالهائيندي طاهر القادري چيو ته ڪراچي جيان لاهور ۾ به رينجرز ڏوهارين خلاف آپريشن ڪري. هن چيو ته 17 جون تي لاهور ۾ لاش ڪيرايا ويا ۽ ميڊيا 12 ڪلاڪن تائين جان جوکي ۾وجهي ڪوريج ڪئي. پاڪستان عوامي تحريڪ جي سربراهه جو چوڻ هو ته هو قاتلن جي جي آءِ ٽي کي ڪنهن به صورت ۾ قبول نه ٿا ڪن، سندن ميڊيا ۽ عوام ئي جي آءِ ٽي آهي. هن چيو ته ماڊل ٽائون سانحي جي رٿا بندي وزير اعظم هائوس ۾ ڪئي وئي ۽ ٻنهي ڀائرن پوليس کي گولي هلائڻ جا حڪم پڻ جاري ڪيا. طاهر القادري جو چوڻ هو ته ماڊل ٽائون سانحي تي جي آءِ ٽي جي ضرورت نه هئي، قاتلن جي جي آءِ تي ڪهڙو انصاف فراهم ڪندي

 

ڪرنسي اسمگلنگ ڪيس ۾ ماڊل گرل ايان علي جي جڊيشل رمانڊ ۾ 6 جولاءِ تائين واڌ

راولپنڊي(م.ڊ) راولپنڊي جي ڪسٽم عدالت ڪرنسي اسمگلنگ ڪيس ۾ ماڊل گرل ايان علي جي جڊيشل رمانڊ ۾ 6 جولاءِ تائين واڌ ڪري ڇڏي آهي. سپر ماڊل ايان علي کي اڄ به بڪتربند گاڏي ۾ روالپنڊي جي ڪسٽم جج راڻا آفتاب احمد جي عدالت ۾ پيش ڪيو ويو، ايان علي گرفتاري کانپوءِ 11هون ڀيرو عدالت ۾ آندو ويو. ايان علي جا وڪيل لاهور هاءِ ڪورٽ ۾ سندس ضمانت واري درخواست جي سلسلي ۾ مصروف هئڻ سبب ڪسٽم عدالت ۾ ٻڌڻي دوران پيش نه ٿي سگهيا. عدالت ايان علي جي وڪيلن جي پيش نه ٿيڻ تي ٻڌڻي 6 جولاءِ تائين ملتوي ڪري ڇڏي، جڏهن ته ايندڙ ٻڌڻي تي ايان علي جي وڪيلن کي پيش ٿيڻ جي هدايت ڪئي وئي آهي. امڪان آهن ته ايندڙ ٻڌڻي تي ماڊل گرل ايان علي تي عدالت پاران فرد جرم لاڳو ڪيو وڃي، وڪيلن کي ان سلسلي ۾ دليل ڏيڻ جي هدايت ڪئي وئي آهي.

 

ڪنگنا رناوت ”جھانسيءَ جي راڻي“ جي روپ ۾نظر ايندي

ممبئي (شوبز نيوز) بالي ووڊ جي فلم ”ڪوئين“ ۾ راڻيءَ جو ڪردار ادا ڪرڻ کان پوءِ بالي ووڊ سپر اسٽار ڪنگنا رناوت هڪ ٻي فلم ۾ ”راڻي“ جو ڪردار ادا ڪندي نظر ايندي. خبرون آهن ته ڪنگنا ”جھانسيءَ جي راڻي“ جي زندگيءَ تي ٺهندڙ فلم ۾ راڻي جو اهم ڪردار ادا ڪرڻ جي لاءِ تيارين ۾ آهي. اين ڊي ٽي ويءَ موجب ان فلم جو هدايتڪار ڪيتن مهتا هالي ووڊ اداڪار هيوج گرانٽ کي به ڪاسٽ ڪرڻ چاهي ٿو. خبرن موجب ان فلم ۾ ڪنگنا راني لڪشمي جڏهن ته گرانٽ جنرل بيوج روز جي ڪردار ۾ نظر ايندو. هيوج گرانٽ جي حامي ڀرڻ جي صورت ۾ فلم جي شوٽنگ جا ايندڙ سال چِٽا امڪان آهن، جتي سال کان پوءِ فلم جي شوٽنگ شروع ڪئي ويندي. ذريعن جو چوڻ هو ته اداڪارا ڪنگنا رناوت پاران اهڙي ڪنهن به خبر جي تصديق يا ترديد نه ڪئي وئي هئي.

 

عيدالفطر تي نئين  اردو فلم ”بن روئي” رليز ٿي رهي آهي

لاهور(شوبز نيوز) هن عيد تي هدايتڪار سيد نور، الطاف حسين، اقبال ڪشميري، پرويز رانا، مسعود بٽ، حسن عسڪري، دائود بٽ ۽ سنگيتا سميت ڪنهن به ڊائريڪٽر جي فلم نمائش لاءِ پيش نه پئي ڪئي وڃي. هڪ خانگي ٽي وي چئنل جي ڄاڻ موجب عيدالفطر تي نئين  اردو فلم ”بن روئي” رليز ٿي رهي آهي، جنهن جي مرڪزي ڪاسٽ ۾ ماهره خان ۽ همايون سعيد آهن.

 

مان اڄ به رنبير ڪپور لاءِ پنهنجي دل ۾ چاهه محسوس ڪندي آهيان: دپيڪا پڊونڪر

ممبئي (شوبز نيوز) بالي ووڊ اداڪارا ۽ اداڪار رنبير ڪپور جي اڳوڻي گرل فرينڊ دپيڪا پڊوڪون هڪ انٽرويوءَ ۾ چيو ته هوءَ رنبير ڪپور جي لاءِ اڄ به پنهنجي دل ۾ چاهه محسوس ڪري ٿي ۽ کيس وساري نه ٿي سگھي. اداڪارا دپيڪا پڊوڪون اڄ ڪلهه فلم ”رام ليلا“ ۾ ساڻس گڏ ڪم ڪندڙ رنوير سنگھه سان ڏٺي پئي وڃي، پر هن چيو ته رنبير منهنجي زندگيءَ جو اهم حصو بڻيل رهندو. هن چيو ته اسان پنهنجي زندگيءَ ۾ ڪيترو ئي اڳتي ڇو نه هليا وڃو ۽ اسان دنيا جي سامهون ڪيترو به پاڻ کي نارمل ڇو نه رکون ۽ اها دعويٰ ڪيون ته اسان کي هڪ ٻئي سان ڪم ۾ به ڪو اعتراض ناهي پر اهو تعلق جيڪو هڪ ڀيرو ٺَهي وري ڊهي وڃي، اهو ڪڏهن به ڊهي يا وساري نه ٿو سگھجي، اداڪارا دپيڪا چيو ته رنبير ۽ مون وچ ۾ هڪ خاص تعلق هو جنهن کي ڪير به سمجھي ناهي سگھيو.

 

بالي ووڊ حسينه دپيڪا پڊوڪون تي دل اچي ويو آهي:رسل برانڊ

نئين دهلي (شوبز نيوز) هالي ووڊ ڪاميڊين رسل برانڊ به بالي ووڊ اداڪارا جو پرستار نڪتو، سندس چوڻ هو ته سندس بالي ووڊ حسينه دپيڪا پڊوڪون تي دل اچي ويو آهي. مشهور هالي ووڊ ڪاميڊين اڄ ڪلهه ڀارت جي دوري تي آيل آهي. نئين دهليءَ جي شو دوران رسل برينڊ جي خاص انداز ۾ جگت بازي جتي شوقينن کي ٽهڪ ڏيڻ تي مجبور ڪيو اتي ئي هن پنهنجا ڪجهه کٽڪا به حاضرين جي سامهون رکي ڇڏيا. سندس سڀ کان وڏو کٽڪو ڀارت ۾ سڪيورٽي يا ٽريفڪ مسئلن جو نه هو، پر بالي ووڊ جي شوخ ۽ چنچل اداڪارا دپيڪا پڊوڪون هو. سندس چوڻ هو ته دپيڪا پڊوڪون تي فِدا ٿي پيو آهي. هن پنهنجي چاهيندڙن سان اهو پڻ اظهار ڪيو ته جيڪڏهن کيس بالي ووڊ اداڪارا جو ساٿ ملي پئي ته سندس زندگي ٺَهي پئي.

 

سريلنڪا پاڪستان کي ٻي ٽيسٽ ميچ ۾ 7 وڪيٽن تان هارائي سيريز برابر ڪري ڇڏي

ڪولمبو(اسپورٽس نيوز) سريلنڪا پاڪستان کي ٻي ڪرڪيٽ ٽيسٽ ميچ ۾ 7 وڪيٽن تان هارائي ٽن ميچن جي سيريز 1-1 تان برابر ڪري ڇڏي. ميزبان ٽيم پاڪستان ٽيم طرفان ڪاميابيءَ لاءِ ملندڙ هدف ميچ جي آخري ڏينهن 3 وڪيٽن جي نقصان تي حاصل ڪري نه صرف ميچ کٽيو بلڪ پهرئين ميچ م شڪست جو بدلو به وٺي ڇڏيو آهي. آخري ڏينهن برسات سبب آئوٽ گرائونڊ سبب ميچ دير سان شروع ٿي ۽ ان جي ڳالهه جي اميد هئي ته ٻيهر بارش ٿيندي پر بارش کان اڳ ميزبان ٽيم 153 رنسن جو هدف 3 وڪيٽن تي نقصان تي حاصل ڪيو. پاڪستان طرفان ياسر شاهه 2 جڏهن ته ذوالفقار بابر هڪ وڪيٽ حاصل ڪئي. سريلنڪا طرفان دهميڪا پرساد کي بهترين بالنگ جو مظاهرو ڪرڻ تي ميچ جو بهترين رانديگر قرار ڏنو ويو. هن ميچ ۾ 7 وڪيٽن حاصل ڪيون. ويٽانگي 34 رنسون ٺاهي ذوالفقار بابر جي بال تي محمد حفيظ هٿان ڪيچ آئوٽ ٿيو. ڪمار سنگاڪارا ٻيو نمبر آئوٽ ٿيندڙ رانديگر هو جيڪو ياسر شاهه جي بالي تي بغير ڪنهن رنس جي اظهر علي هٿان ڪيچ آئوٽ ٿيو. ڪرونارتني سريلنڪا جو ٽيون آئوٽ ٿيندڙ رانديگر هو جيڪو اڌ سينچري مڪمل ڪرڻ کانپوءِ ياسر شاهه جي بال تي ايل بي ڊبليو آئوٽ ٿيو، ان کان پوءِ ڪپتان اينجليو ميٿويز ۽ ٿريما چوٿين وڪيٽ تي ڄاڻايل هدف حاص ڪيو. اينجيلو 43 ۽ تريما 20 رنسن سان ناٽ آئوٽ رهيو.

 

للت مودي جي انڪشافن تي آءِپي ايل جو معاملو آءِ سي سي جي اينٽي ڪرپشن جي حوالي

دبئي (اسپورٽس نيوز) انٽرنيشنل ڪرڪيٽ ڪائونسل آءِ پي ايل جي اڳوڻي چيئرمين للت مودي پاران خط ملڻ جي تصديق ڪري ڇڏي ٽن ٽاپ انٽرنيشنل ڪرڪيٽرز تي ڪرپشن جي الزامن جي جاچ جو معاملو اينٽي ڪرپشن يونٽ جي حوالي ڪيو ويو رانديگرن جو تعلق بين الاقوامي ڪرڪيٽ سان هئڻ جي ڪري ڀارتي بورڊ کي معاملي کان الڳ رکيو ويندو انٽرنيشنل ڪرڪيٽ ڪائونسل تصديق ڪئي ته کيس آءِ پي ايل جي اڳوني چيئرمين للت مودي جو خط مليو آهي جنهن ۾ هن 3 ٽاپ ۽ آءِ پي ايل ۾ باقاعدگي سان شريڪ ٿيندڙ ڪرڪيٽرز تي ڪرپٽ رقم وٺڻ جو الزام عائد ڪيو آهي هي خط هن جون 2013 ۾ اماڻيو هو پر آءِ سي سي پاران ان بابت خاموشي ڪيل هئي گذريل ڏينهن ڪنهن نئين ٽيوٽر اڪائونٽ تي اهو ليٽر شيئر ڪيو ويو ۽ مودي کان پڇا ڪئي ته ان جو ڇا نتيجو نڪتو جنهن تي مودي چيو ته هي اوهان کي آءِ سي سي بي سي سي آءِ آءِ پي ايل کان پڇڻ گهرجي. آءِ سي سي جي ترجمان جو چوڻ آهي ته اسان کي مودي جي ڳجي ميل ملي چڪي ۽ اسان اها جاچ لاءِ اينٽي ڪرپشن يونٽ کي اماڻي ڇڏي ۽ ان پنهنجو ڪم شروع ڪري ڇڏيو آهي.

 

بي بي سي جي رپورٽ کانپوءِ : واحد پارس هيسباڻي

اصل ۾ متحده جي آزمائش جو سلسلو ان ڏينهن کان شروع ٿيو هو، جنهن ڏينهن لنڊن ۾ عمران فاروق قتل ٿيو هو. ان قتل ۾ ملوث جوابدارن شايد ائين سوچيو هوندو ته هي قتل به کين ائين ئي ڦٻي ويندو، جيئن پاڪستان ۾ ڦٻندو رهيو پر اها سندن خوشفهمي ثابت ٿي. برطانيا ۾ قانون سخت هجڻ سبب هن واقعي تي ٻڙڌڪ مچي ويو ۽ اتان جا سيڪيورٽي ادارا حرڪت ۾ اچي ويا. جاچ جو سلسلو اهڙي ته منصوبابندي سان شروع ڪيو ويو جو آهستي آهستي سڀ ڪجهه ظاهر ٿيندو ويو. ان ڪيس جي جاچ جي سلسلي ۾ اسڪاٽ لينڊ يارڊ جي 5 رڪني ٽيم اسلام آباد پهتل آهي، جيڪا پهرين مرحلي ۾ ان معظم نالي جوابدار کان پڇا ڳاڇا ڪندي، جنهن تي اهو الزام آهي ته عمران فاروق قتل ڪيس ۾ الزام هيٺ آيل ٻن جوابدارن ڪاشف ڪامران ۽ محسن کي لنڊن موڪليو هو، جن اتي وڃي عمران فاروق کي قتل ڪيو. اهي ٽئي جوابدار گرفتار ٿيل آهن حڪومت طرفان اسڪاٽ لينڊ يارڊ جي ٽيم سان مڪمل طور تي سهڪار ڪرڻ جو فيصلو ڪيو ويو آهي. اسڪاٽ لينڊ يارڊ پوليس جنهن جي باري ۾ اهو مشهور آهي ته اها زمين ۾ لڪل ڏوهارين کي به هٿ ڪرڻ ۾ مهارت رکي ٿي، جنهن جو وڏو مثال اڳوڻو عراقي صدر صدام حسين آهي، جنهن کي زمين اندر قائم ڳجهي تهه خاني مان گرفتار ڪيو ويو هو، اها عمران فاروق قتل ڪيس ۾ الزام هيٺ آيل جوابدارن کان ڇا ڇا باسرائي ٿي ۽ ڪهڙا نوان انڪشاف سامهون اچن ٿا اهو اڳتي هلي ڏسڻو آهي.

هڪ طرف متحده عمران فاروق قتل ڪيس واري آزمائش کي منهن ڏئي رهي آهي، ٻئي طرف مني لانڊرنگ وارو ڪيس الڳ آهي جيڪو پڻ برطانيا جي قانون موجب انتهائي وڏو ڏوهه آهي ان ڪيس ۾ متحده سربراهه جون ڪجهه پيشيون به ٿي چڪيون آهن ۽ هن وقت ضمانت تي آهي، جيڪا 9 جولاءِ تي ختم ٿي  رهي آهي ان کانپوءِ هي ڪيس ڪهڙو رخ اختيار ڪري ٿو، اهو ڏسڻو آهي، هنن ۾ ٻنهي اهم ڪيسن کانپوءِ تازو متحده جي ڳچي ۾ هڪ نئون ڪيس پيو آهي، جيڪو بي بي سي جي رپورٽ وارو آهي جنهن ۾ اهو انڪشاف ڪيو ويو آهي ته انڊيا متحده جي مالي مدد ڪندو رهيو آهي ۽ ”را“ سندس ماڻهن کي تربيت ڏيندي رهي آهي. بي بي سي جيڪو دنيا جو وڏي ساک رکندڙ نشرياتي ادارو آهي، ان هن انڪشاف سان گڏ ڪيترائي ثبوت به سامهون آندا آهن، جن ۾ متحده جي لنڊن سيڪريٽريٽ سان واسطو رکندڙ ڪجهه اهم اڳواڻن جا اعتراف به شامل آهن، جن چيو آهي ته ها انڊيا اسان جي مالي مدد ڪندو رهيو آهي، ان سلسلي ۾ متحده جي اهم اڳواڻ طارق مير جو ”را“ جي ايجنٽن کان سڌيون رقمون وٺڻ وارو اعتراف اهم آهي، جنهن ۾ هن چيو آهي ته اهي رقمون 1994ع کان ملي رهيون آهن، پهرين ڊالر پوءِ پائونڊ ملندا هئا. هن اهو به اعتراف ڪيو آهي ته اها رقم ملڻ بابت متحده جي قيادت کي مڪمل ڄاڻ هئي.

متحده قائد جي جذباتي قسم جي تقرير جنهن ۾ هن ”را“ کي مدد لاءِ چيو هو ۽ پوءِ ان جون معافيون تلافيون ورتيون هيون، ان کانپوءِ پهريان کان ئي پاڻ وٽ هن جي حوالي سان ماحول گرم ٿيل هو، تازو بي بي سي جي رپورٽ کانپوءِ ان ماحول ۾ وڌيڪ گرمي اچي وئي آهي. وفاقي گهرو وزارت نه رڳو برطانيه سرڪار کي خط لکي بي بي سي رپورٽ جا تفصيل گهريا آهن ۽ اصل حقيقتن تائين پهچڻ لاءِ مدد فراهم ڪرڻ جو چيو آهي پر متحده سربراهه االطاف حسين، محمد انور ۽ طارق مير تائين سڌي پهچ جو به مطالبو ڪيو آهي. ان سان گڏ اها پيشڪيش به ڪئي آهي ته يا ته سڌي پهچ ڏيو يا ڄاڻ جي مٽاسٽا ڪريو، بدلي ۾ اوهان کي عمران فاروق قتل ڪيس جي ٻين جوابدارن تائين پهچ ڏني ويندي. جيتوڻيڪ برطانيا سرڪار طرفان اڃا تائين ان خط جو جواب سامهون نه آيو آهي پر قانوني ۽ سياسي مبصر چئي رهيا آهن ته برطانيا کي هن معاملي ۾ سهڪار ڪرڻو ئي پوندو ڇو ته هي ٻئي اهم معاملا سندس ملڪ سان ئي تعلق رکن ٿا. برطانيا عمران فاروق قتل ڪيس کي پنهنجي انجام تائين پهچائڻ ۾ مڪمل طور تي سنجيده نظر اچي رهيو آهي.

هي ڪيس هڪڙي حوالي سان عالمي سطح تي سندس لاءِ ٽيسٽ ڪيس به آهي ۽ سندس ساک جو مسئلو به آهي. ملڪ اندر اندروني سطح تي اهڙي قسم جي واقعن کي ڪيئن ڊيل ڪيو وڃي ٿو، اهو برطانيا جو اندروني معاملو آهي ۽ باقي دنيا کي ان سان ڪا گهڻي دلچسپي به ناهي ڇو ته اهو هر ملڪ جو پنهنجو اندروني معاملو هجي ٿو پر عمران فاروق قتل ڪيس وارو معاملو ان ڪري به مختلف آهي، ڇو ته اهو نه صرف مشهور سياسي اڳواڻ هو پر سندس واسطو هڪ ٻئي ملڪ سان هو. جيتوڻيڪ برطانيا هي سموري وٺ پڪڙ عمران فاروق جي اتان جي شهري هجڻ جي حيثيت ۾ ڪري رهيو آهي پر هو ان جي ٻئي پاسي کي به ضرور نظر ۾ رکي رهيو آهي، جنهن جو پاڻ مٿي ذڪر ڪري آيا آهيون. هن ڪيس جو جيڪو به نتيجو سامهون اچي ٿو ان تي پوري دنيا اندر بحث مباحثا ٿيندا ڇو ته ميڊيا جي هن تيز ترين دور ۾ هي معاملو پوري دنيا جي ميڊيا جي اک ۾ آهي ان ڪري ئي اسڪاٽ لينڊ يارڊ جي ٽيم ڏاڍي احتياط سان پوري خبرداري سان ۽ ثبوتن جي بنياد تي اڳڀرائي ڪري رهي آهي. هاڻي جڏهن اهو واضح نظر اچي رهيو آهي ته برطانيا هن واقعي جون سموريون حقيقتون سامهون آڻڻ ۾ سنجيده آهي ته ان لاءِ کيس پاڪستان جي سهڪار جي پوري پوري ضرورت پوندي ۽ پاڪستان سهڪار جي بدلي سهڪار تي زور ڀريندو، جنهن جو اظهار گهرو وزارت طرفان لکيل خط ۾ به ڪيو ويو آهي.

ٻيو معاملو بي بي سي جي رپورٽ وارو آهي. ان رپورٽ ۾ جيڪي انڪشاف ٿيل آهن، انهن ۾ به برطانيا پاڻ کي الڳ نه ٿو ڪري سگهي. ڇو ته الزام انهن ماڻهن تي لڳي رهيو آهي، جن کي هن پناهه ڏئي رکي آهي ۽ جن کي هن اتي سياسي سرگرمين جي مڪمل طور تي اجازت ڏئي رکي آهي. هي صورتحال خود برطانيا لاءِ پڻ عجب جي نشاني آهي ته سندس ملڪ ۾ ايڏو ڪجهه غلط ٿيندو رهيو ۽ انفارميشن ٽيڪنالاجي جو مضبوط نظام هجڻ جي دعويٰ باوجود هي ان کان اڻڄاڻ رهيو! هن سلسلي ۾ پاڻ واري وفاقي گهرو وزارت طرفان برطانوي سرڪار کي جيڪي خط لکيا ويا آهن انهن جي مثبت موٽ ڏيڻ خود برطانيا جي ساک لاءِ به بهتر هوندو. هن ايڏي اهم صورتحال ۾ جيڪا شيءِ شدت سان محسوس ڪئي پئي وڃي اها متحده جي خاموشي واري آهي. ماضي ۾ معمولي معمولي اشوز تي به وڏو ري ايڪشن ظاهر ڪندڙ هي جماعت هنن معاملن تي بلڪل ئي ماٺ ۾ آهي. جيتوڻيڪ هڪ اڌ پريس ڪانفرنسون ڪيون ويون آهن. هلڪا ڦلڪا ميڊيا تي بيان ڏنا پيا وڃن پر انهن ۾ اهو وزن نظر نه پيو اچي، جيڪا ڳالهه ڪيترائي سوال اٿاري رهي آهي ۽ متحده جي مخالف سياسي طاقتن کي هن مٿان تنقيد ڪرڻ جا نوان موقعا فراهم ڪري رهي آهي. اهي چئي رهيا آهن ته جيڪڏهن متحده هنن الزامن کي ڪوڙو چئي رهي آهي ته ان لاءِ ڪي مضبوط دليل ڇو نه پئي ڏئي! هن سلسلي ۾ تحريڪ انصاف جو روح روان عمران خان اڳيان اڳيان آهي. عمران خان جيڪو ڊگهي عرصي کان ڪراچي ۾ پنهنجو سياسي پلڙو ڀاري ڪرڻ جي ڪوشش ۾ مصروف آهي. هي صورتحال هن لاءِ ڄڻ ته هڪ ڀرپور موقعي تي آئي آهي، جنهن مان هي ڀرپور فائدو حاصل ڪرڻ چاهي ٿو ۽ ان ذريعي ڪراچي ۾ پنهنجو ووٽ بئنڪ وڌائڻ چاهي ٿو. هن صورتحال جو عمران خان کي سياسي حوالي سان ڪهڙو فائدو ملي ٿو ۽ سندس سياسي پلڙو ڪيترو ڀاري ٿئي ٿو اهو ته اڳتي هلي ڏسڻو آهي، بهرحال متحده جي آزمائش کان انڪار نه ٿو ڪري سگهجي. ائين به ناهي ته متحده تي آيل آزمائش جو هي ڪو پهريون موقعو آهي. ماضي ۾ به اهڙا موقعا ايندا رهيا آهن پر هن ڀيري معاملو مختلف آهي ان ڪري هن ڀيري هن معاملي ۾ ڪجهه به نه ٿو چئي سگهجي. متحده خلاف جيڪي الزام ۽ انڪشاف آهن اهي رڳو ملڪي سطح جا ناهن پر انهن ۾ ٻيا ملڪ به شامل آهن. برطانيا ۾ هن خلاف الڳ جاچ هلي رهي آهي ته ڀارت طرفان مالي مدد جو الزام مٿس الڳ ٿي چڪو آهي. ڪراچي ۾ ٿيندڙ ٽارگيٽ ڪلنگ ۽ ڀتاخوري وارو معاملو الڳ آهي، جنهن جي حوالي سان سندس گرفتار ٿيل اڳواڻ ۽ ڪارڪن ڪيترائي اعتراف ڪري چڪا آهن، جاچ جو هڪ وسيع سلسلو آهي جيڪو شروع ٿي چڪو آهي.

متحده هن صورتحال ۾ سياسي طور تي بلڪل ئي اڪيلي ٿي چڪي آهي، سندس حمايت بس هڪڙو ماڻهو ڪري رهيو آهي، جيڪو آهي پرويز مشرف، جنهن سان ماضي ۾ هن جا تمام گهڻا نياز ۽ راز رهيا آهن پر مشرف جي پنهنجي حالت ڇا آهي ۽ سياسي حوالي سان سندس ڪيترو سياسي قدبت آهي ان کان پاڻ سڀئي واقف آهيون، ان ڪري هن جي حمايت متحده کي ڪو سياسي فائدو پهچائي سگهندي، ان جا آثار نظر نه پيا اچن. هاڻي ڏسڻو اهو آهي ته هن گهڻ طرفي صورتحال جو نتيجو ڪهڙو نڪري ٿو ۽ متحده جي سياسي مستقبل جو ڇا ٿو ٿئي؟

 

سنڌ جو درويش صوفي شاعر صادق فقير رحه : صوفي غلام مصطفيٰ مورائي

حضرت شاهه عنايت شهيد جي شهادت کانپوءِ باطل قوت صوفي ازم کي ختم ڪرڻ جون سر ٽوڙ ڪوششون ڪيون، پر سج به ڪڏهن کاري هيٺيان لڪي سگهي ٿو. شهيد جي ٻاريل رشد و هدايت جي شمع تي پروانه ايندا رهيا. لاٽ مان لاٽ ٻرندي رهي. حضرت صديق عرف صادق فقير جو به شمار اهڙن صوفي ازم پرچارڪن ۾ ٿئي ٿو. صادق فقير رحه جن شوال مهيني ۾ 1170هه جي هڪ سڀاڳي سومر تي پيدا ٿيا، سندن والدين مالوند هئا ڪڏهن ڪٿي ته ڪڏهن ڪٿي، انهيءَ حالتن هوندي به صوفي صادق فقير جن ننڍي هوندي کان ذهين بهادر بيباڪ علم جا ڳولائو هئا. 17 سالن جي عمر کي رسيا ته ڏاڍا مڙس ٿي پيا، پر چيو وڃي ٿو ته سندن ڌاڙيل ٿيڻ ۾ سماج جي ڏاڍاين جو هٿ هو. فقير صاحب غريبن تي انصاف وٺي ڏيڻ لاءِ هي جهاد ڪيو سندن دور جا اهڙا ڪيئي واقعا ملندا، مديرن جي صاحبي ۾ هڪ غريب عورت کي حق وٺي ڏيڻ لاءِ ميرن جي تاج جي ڦر به ڪيائين، پر 25 سالن ۾ پهتا ته درگاهه جهوڪ شريف ويا، ان وقت شاهه فضل الله قلندر سجاده نشين هئا. پنهنجي ٽولي وارن منع ڪين ته صوفين وٽ جادو آهي ان ڪري اوهان نه وڃو، پر پاڻ جلد اچڻ جو واعدو ڪري سائين جن جي خدمت عاليه ۾ پهتا ته سائين جن فرمائي رهيا هئا ته ابا اڄ درياهه پلٽجي ٻيڙيءَ ۾ ٿو پوي اهي لفظ ٻڌي صادق فقير واپس وڃي ساٿين کي چيو ته ادا مون تي صوفين جو جادو ٿي ويو آهي اوهان ڀلي وڃو پوءِ شاهه فضل الله قلندر جن کي پنهنجو روحاني آقا ۽ مرشد بنائي سندس زندگيءَ ۾ ٽيهه سال روحاني تربيت حاصل ڪيائون، سندس صدق سچائي کي ڏسي مرشد سائين جن کين صديق بدران صادق فقير جي نالي سان سڏڻ لڳا. 55 سالن جي عمر ۾ شادي ڪيائون ۽ عمرڪوٽ ڇڏي اچي پرين جي پاڙي يعني جهوڪ شريف ۾ رهيا. پر ڪجهه وقت بعد واپس عمرڪوٽ لڏي ويا، فقير صاحب جن ٽي شاديون ڪيون. پاڻ 11 رمضان المبارڪ 1265هه سحر جي وقت وفات ڪئي، سندن فرزند صوفي نظام الدين جي اجازت سان سندن مريدن مزار تي چوکنڊي ٺهرائي، پر ٻوڏ سبب اها ڪمزور ٿي پئي، ان بعد سندن مزار تي عاليشان گنبذ تعمير ٿيو. شاعري تي شاهه عبداللطيف ڀٽائي جو رنگ سمايل نظر اچي ٿو، سندن رسالو شاهه سائين جي رسالي وانگر وسيع آهي، سندن 9 سر درگاهه جهوڪ شريف حضرت شاهه عنايت شهيد جن جي ميلي ۾ محفل سماع ۾ چيا وڃن ٿا. هر سال سندس ميلو به ملهايو وڃي ٿو.

جيڪي آهي اڄ، سڀان ناهه ”صديق“ چئي واڄي وانگر وڄ مٿي کي مرلي ڪري.فقير صادق جا هم عمر بزرگ هي آهن. عبدالوهاب ”سچل“ سائين، سيد راضي شاهه، سيد خير شاهه سيد ثابت علي شاهه، سيد قطب شاهه رضوي، پير محمد راشد، سيد بلال شاهه، پير علي گوهر شاهه، حاجي عبدالله مولوي احمد نواب، ولي محمد لغاري، گل محمد ”گل“ آخوند، محمد بچل، مولوي اويس احمد روحل فقير، غلام حيدر شر، قادر بخش بيدل سائين، عبدالرحيم گرهوڙي دلپت صوفي نانڪ يوسف مرزا ٻڍل بيگ عثمان فقير سانگي ۽ ٻياڪ انيڪ درويش شاعر شامل آهن.