تازيون خبرون

Daily Archives: June 27, 2015

ڪراچي ۾ گرمي وگهي فوت ٿيل وڌيڪ 50 نامعلوم فوتين جا مڙهه مواڇ ڳوٺ قبرستان ۾ مٽيءَ ماءُ حوالي

ڪراچي (اي پي پي) ڪراچي ۾ گرمي جي شدت ۽ بجلي جي لوڊ شيڊنگ سبب فوت ٿي ويل وڌيڪ 50 نامعلوم فوتين جا مڙهه مواڇ ڳوٺ جي قبرستان ۾ مٽي ماءُ حوالي ڪيا ويا. ايڌي سرد خاني سهراب ڳوٺ ۾ پيل 50 فوتين جي لاشن جي سڃاڻپ نه ٿي سگهي ۽ نه ئي ڪنهن فوتي جو وارث لاش وصول ڪرڻ لاءِ پهتو.ايڌي انتظاميه 50 فوتين جي لاشن کي لاوارث قرار ڏئي مواڇ ڳوٺ قبرستان ۾ مٽي ماءُ حوالي ڪيو ويو. ان کان اڳ ايڌي سرد خاني آڏو عبدالستار ايڌي جي امامت ۾ فوتين جي جنازي نماز ادا ڪئي وئي. 50 فوتين جا مڙهه سرد خاني مان ٻاهر ڪڍڻ وقت هر طرف سوڳ وارو ماحول نظر آيو.

 

سجاول لڳ اوطات تي هٿياربندن جي ڪاهه، مامي ڀاڻيجي سميت 3 ڄڻا گوليون هڻي قتل

جاتي (رپورٽ: عاشق ميمڻ ) سجاول ڀرسان رات دير سان نامعلوم هٿياربندن اوطاق تي ستل مري برادري جي ٽن ڄڻن کي گوليون هڻي ٿڌي تي قتل ڪري ڇڏيو اطلاع تي پوليس واقعي واري هنڌ پهتي ٽنهي مقتولن جا لاش تعلقه اسپتال جاتي آندا ويا پوسٽ مارٽم بعد وارثن کڻائي ويا مارجي ويل ٽهي ڄڻا مٽياري ضلعي جا رهواسي هئا. مقاطعي تي زمين وٺي ترسيل هئا ته اهڙو واقعو پيش آيو واقعي جو ڪارڻ پراڻي دشمني ٻڌايو پيو وڃي مقتولن جا وارث لاش جي ڪفن دفن بعد ڪيس داخل ڪرڻجو چئي لاش کڻاي ويا. گذريل رات دير سان سجاول لوڻيا واٽر لڳ ديھ شاھڪپور ۾ اوطاق ۾ ستل مري برادري جي ٽن ڄڻن حيبب الله خان مري،ابراهيم خان مري ۽ گل محمد خان مري تي نامعلوم هٿياربندن فائرنگ ڪري ٽنهي ڄڻن کي تڏي تي قتل ڪري ڇڏيو اهڙي اطلاع کان پوءِ ايس ايس پي سجاول جان محمد برهماڻي، ڊي ايس پي جاتي، ايس ايڇ او جاتي ، ايس ايڇ او سجاول پوليس اٽالا ساڻ ڪري جاءِ واردات تي پهتا جتان ٽنهي مقتولن جا لاش کڻائي تعلقه اسپتال جاتي آندا ويا جتي پوسٽ مارٽم بعد لاش وارثن حوالي ڪيا ويا جيڪي پنهنجي ڳوٺ ضلعي مٽياري کڻائي ويا مارجي ويلن جو تعلق ضلعي مٽياري سان هو جن ۾ ٻه ڄڻا پاڻ ۾ مامو ڀاڻيجو هئا جيڪي 23 ڏينهن اڳ ۾ زميندار عبدالحميد نظاماڻي کان 100 ايڪڙ زمين مقاطعي تي وٺي سارسنڀال لاءِ اوطاق تي ترسيل هئا ذريعن موجب واقعي جو ڪارڻ پراڻي دشمني ٻڌايو پيو وڃي ٻي طرف ايس ايڇ او سجاول مشتاق برهماڻي رابطو ڪرڻ تي ٻڌايو ته اهڙي اطلاع ملڻ بعد اسان واقعي واري هنڌ پهتاسين جتان ٽنهي مقتولن جا لاش کڻائي پوسٽ مارٽم لاءِ جاتي آندا جتان پوسٽ مارٽم ٿيڻ بعد مقتولن جا لاش وارثن جي حوالي ڪيا وارث لاش دفن ڪري بعد ۾ ايف آءِ آر داخل ڪرائڻ جو چئي لاش کڻائي واقعي جو ڪوبه ڪيس داخل نه ٿيو آهي

 

عدنان سميع خان سلمان خان جي فرمائش تي پنهنجي فني ڪيريئر ۾ پهريون ڀيرو قوالي ڳائي

ممبئي (شوبز نيوز) چيو ويندو آهي ته بالي ووڊ جو دبنگ خان ڪا فرمائش ڪري ۽ ڪو ان کي پورو نه ڪري ته باقي ڇا بچو، عدنان سميع خان جنهن سلمان خان جي ايندڙ فلم ”بجرنگي ڀائيجان“ لاءِ پهريون ڀيرو نه رڳو قوالي ڳائي آهي پر ان کي پڪچرائز به ان تي ئي ڪيو ويو آهي. ڀارتي ميڊيا موجب عدنان سميع خان سلمان خان جي فرمائش تي پنهنجي فني ڪيريئر ۾ پهريون ڀيرو قوالي پڙهي ۽ ان جي عڪسبندي به مٿس ڪئي وئي. ”بهردو جھولي ميري“ جي عڪس بندي والاريل ڪسمير جي ضلعي پهلگام ۾ واقع مشهور روحاني مرڪز ”آئش مقام درگاهه“ ۾ ٿي. والاريل واديءَ جي حڪومت طرفان پهريون ڀيرو ان هنڌ شوٽنگ جي اجازت ڏني وئي هئي. قوالي پڙهڻ بابت عدنان سميع خان جو چوڻ هو ته سلمان خان ۽ سندس خاندان جا ڪيترن ئي سالن کان گھاٽا لاڳاپا آهن، بالي ووڊ ۾ ٺاهه ٺوهه وڌيڪ آهي پر سلمان خان جھڙو آهي تهڙو ئي نظر ايندو آهي. ان جي ڪري مان کيس تمام گھڻو پسند ڪندو آهيان. هن پنهنجي فني ڪيريئر دوران ڪڏهن قوالي ناهي ڳائي ۽ نه ئي ڪڏهن هن ڪنهن بالي ووڊ فلم ۾ ڪو گيت پڪچرائز ڪرايو آهي، پر سلمان خان کيس فون تي قوالي ڳائڻ ۽ مٿس فلمبندي جي فرمائش ڪئي جنهن تي هو انڪار نه ڪري سگھيو. هن چيو ته مون قوالي ڳائي عوام جي اميدن تي پورو لهڻ جي ڀرپور ڪوشش ڪئي آهي

 

فلم پروڊڪشن سان محبت آهي:چارليز

لاس اينجلس (شوبز نيوز) بالي ووڊ اداڪارا چارليز ٿيرون چيو آهي ته هن وقت سندس هدايتڪاري ڪرڻ جو ڪو به ارادو نه آهي، چارليز چيو ته هن کي فلم پروڊڪشن سان محبت آهي، هدايتڪاري لاءِ ڪنهن ٻئي ماڻهو جو هجڻ ضروري آهي ته جيئن فلم جي ناڪامي جي صورت ۾ ان کي ذميوار قرار ڏئي سگهجي. سنو وائيٽ اداڪارا چيو ته مان پنهنجي ادڪاريءَ واري شعبي مان مطمئن آهيان ۽ سٺو ڪم هلي رهيو آهي، واڌو ذميواريون نڀائڻ جو في الحال ڪو ارادو ناهي. چارليز چيو ته سندس نئين فلم ”ميڊ ميڪس-فيوري روڊ“ بهترين فلمن مان هڪ آهي، هن چيو ته ميڊ ميڪس جو تجربو منهنجي زندگيءَ جي ڪارائتن تجربن مان هڪ آهي. ميڊ ميڪس فيوري روڊ عوام کي ضرور پسند ايندي.

 

سوناڪشي سنها انسٽاگرام تي پنهنجي ”ڊب سميش“ وڊيو ۾ ”آنٽين“ کي ”ڪَرڪُ“ جواب ڏئي ڇڏيو

ممبئي (شوبز نيوز) بالي ووڊ جي دبنگ اداڪارا سوناڪشي سنها اڄ ڪلهه فلمن سان گڏوگڏ ”ڊب سميش“ ايپليڪيشن تي به پنهنجي اداڪاريءَ جا جوهر ڏيکاري رهي آهي. ان کان اڳ به هو پنهنجي مختلف ”ڊب سميش“ وڊيوز وسيلي سماجي رابطن جي ويب سائيٽ انسٽا گرام تي شيئر ڪري چڪي آهي، جن وڊيو کي تمام گھڻو پسند ڪيو ويو آهي. پر هِن ڀيري سوناڪشي سنها انسٽاگرام تي پنهنجي ”ڊب سميش“ وڊيو ۾ اُنهن ”آنٽين“ کي ”ڪَرڪُ“ جواب ڏنو آهي، جيڪي شادين ۾ ماڻهن کان لاڳيتو ڊانس ڪرڻ لاءِ اصرار ڪنديون آهن. اهڙين ئي ”آنٽين“ جي لاءِ سوناڪشي سنها ڀارتي بگ بي اميتاڀ ۽ گووندا جي فلم ”بڙي ميان چهوٽي ميان“ جي هڪ مشهور ڊائلاگ تي ڊب سميش وڊيو پنهنجي چاهيدڙن لاءِ شيئر ڪئي آهي.

 

فواد بالي ووڊ اداڪار سلمان خان جي ڀاءُ هدايتڪار سهيل خان جي فلم ٿڏي ڇڏي

ممبئي (شوبز نيوز) پاڪستاني اداڪار فواد خان پنهنجي ڪيريئر کي ڪاميابيءَ سان اڳتي وڌائڻ ۾ تمام احتياط کان ڪم وٺي رهيو آهي ۽ رڳو اهي ئي اسڪرپٽ قبول ڪندو آهي جيڪو پنهنجي لاءِ مناست سمجھندو آهي. رڳو اهو ئي نه پر پنهنجي جانداراداڪاري ذريعي بالي ووڊ ۾ ٿرٿلو برپا ڪندڙ فواد خان جي ترجيح انگ بدران معيار آهي. اڄ ڪلهه ان بابت خبرون آهن ته فواد بالي ووڊ اداڪار سلمان خان جي ڀاءُ هدايتڪار سهيل خان جي فلم ٿڏي ڇڏي آهي. ٽائمز آف انڊيا موجب اسڪرپٽ پسند نه اچڻ تي فواد سهيل خان جي فلم ۾ ڪم ڪرڻ کان معذوري ڏيکاري. رپورٽ موجب سهيل خان فواد سان ملاقات ڪري تفصيل ڏيڻ کان انڪار ڪيو، سندس چوڻ هو ته اڃا مان اسڪرپٽ تي مصروف آهي، ڏسون ٿا ان بابت ڪجھه چئي نه ٿو سگھان. ٻئي طرف فواد خان جي ويجھن ذريعن جو چوڻ هو ته اڃا ڪجھه اسڪرپٽ سندس نظرن مان گذري رهيا آهن، جڏهن هو ممبئي ايندو ته ڪجھه پروڊيوسرن سان ملاقات ڪندو. فواد خان اڄ ڪلهه پنهنجي نئين ايندڙ فلم ”ڪپور اينڊ سنز“ جي شوٽنگ ۾ مصروف آهي. ان فلم ۾ به هن عاليه ڀٽ سان بولڊ سين فلمبند ڪرائڻ کان صاف انڪار ڪري ڇڏيو هو، جنهن جي ڪري فلم جو اسڪرپٽ بدلائڻو پيو هو.

 

هاڪي ورلڊ ليگ ۾ آسٽريليا پاڪستان کي هڪ جي مقابلي 6 گولن تان هارائي ڇڏيو

بيلجيم (اسپورٽس نيوز) بيلجيم جي شهر انٽيراپ ۾ هلندڙ هاڪي ورلڊ ليگ ۾ آسٽريليا پاڪستان کي هڪ جي مقابلي 6 گولن تان هارائي ڇڏيو. هاڪي ورلڊ ليگ جي پول اي جي ميچ ۾ آسٽريليا پهرين ڪوارٽر جي 9 منٽ ۾ ويٽن جيڪب جي گول سبب سرسي ماڻي. پر سندن اها سرسي گھڻي دير تائين برقرار نه رهي سگھي ۽ چئن منٽن کان پوءِ محمد عرفان پينلٽي ڪارنر تي گول ڪري ميچ برابر ڪري ڇڏي. ٻئي ڪوارٽر ۾ ڪا به ٽيم گول ڪري نه سگھي. پر ان کان پوءِ پاڪستان تي آسٽريليا هڪ ٻئي پويان حملا شروع ڪيا. ٽئين ڪوارٽر ۽ چوٿين ڪوارٽر ۾ آسٽريلين ٽيم ڇانيل رهي. ٽئين ڪوارٽر جي شروع ۾ ڊينيئل بيل گول ڪري آسٽريليا کي هڪ ڀيرو ٻيهر سرسي ڏياري، جڏهن ته ڪوارٽر جي پڄاڻيءَ کان پهريان ميٿيو سوان گول ڪري سرسي 3-1 ڪري ڇڏي. ڇوٿين ۽ آخري ڪوارٽر ۾ آسٽريلين ٽيم جي خطرناڪ حملن جو پاڪستاني ٽيم وٽ ڪو جواب نه هو ۽ آسٽريليا وڌيڪ ٽي گول ڪري ميچ هڪ جي مقابلي ڇهن گولن تان کٽي ورتي. پاڪستان پنهنجو ايندڙ ميچ جمعي تي روايتي مخالف ڀارت خلاف کيڏندو

 

ظهير عباس باضابطا طور آءِ سي سيءَ جي صدر جو عهدو سنڀالي ورتو

ڪراچي (اسپورٽس نيوز) پاڪستان ڪرڪيٽ ٽيم جي اڳوڻي ۽ پنهنجي دور جي اسٽائلش بيٽسمين ظهير عباس باضابطا طور آءِ سي سيءَ جي صدر جو عهدو سنڀالي ورتو آهي. آءِ سي سيءَ جي بارباڊوس ۾ ٿيندڙ گڏجاڻيءَ ۾ هن اها ذميواري سنڀالي ۽ هو هڪ سال جي لاءِ انٽرنيشنل ڪرڪيٽ ڪائونسل جو صدر بڻجي ويو آهي. ياد رهي ته پاڪستان ڪرڪيٽ بورڊ جي اڳوڻي سربراهه نجم سيٺيءَ طرفان نالو واپس وٺڻ کان پوءِ ظهير عباس کي ان عهدي لاءِ چونڊيو ويو هو. ظهير عباس ٻيون پاڪستاني آهي جيڪو آءِ سي سي جو صدر بڻيو آهي. ان کان اڳ احسان ماني آءِ سي سيءَ جو صدر رهي چڪو آهي، پر احسان ماني هڪ بااختيار صدر هو، جڏهن ته آءِ سي سيءَ جو موجوده آئين تحت صدر جو عهدو رسمي آهي ۽ سڀ اختيار چيئرمين وٽ هوندا آهن.

 

سريلنڪا خلاف شروع ٿيندڙ سيريز جي ٻين ٽيسٽ مصباح لاءِ ڪپتان طور لاڳيتو 23 هون ٽيسٽ ميچ بڻجي ويو

ڪولمبو (اسپورٽس نيوز) پاڪستان ٽيم جي سينيئر بيٽسمين مصباح الحق ڪپتان طور لاڳيتو 23 ٽيسٽ ميچون کيڏي پاڪستان جي اڳوڻي رانديگر عبدالقادر، ڪلائيو لائيڊ، ناصر حسين ۽ ڪيٽنگ جو رڪارڊ برابر ڪري ڇڏيو، مصباح الحق سريلنڪا خلاف ٻي ٽيسٽ ۾ شرڪت ڪري اهڙو اعزاز ماڻيو. خميس تي ڪولمبو ۾ سريلنڪا خلاف شروع ٿيندڙ سيريز جي ٻين ٽيسٽمصباح لاءِ ڪپتان طور لاڳيتو 23 هون ٽيسٽ ميچ هو ۽ ان سان گڏ ئي هو اهڙو ڪارنامون انجام ڏيندڙ گڏيل طور پاڪستان جو پهريون رانديگر به بڻجي ويو آهي. ان کان اڳ پاڪستان رانديگر عبدالقادر کي به ملڪ طرفان لاڳيتو 23 ٽيسٽ ميچون کيڏڻ جو اعزاز مليل هو.

 

آءِ سي سي ورلڊ ڪرڪيٽ ليگ چيمپئن شپ ۾ هاليند پاپوانيوگني کي 85 رنسن تان هارائي ڇڏيو

ايمسٽل وين (اسپورٽس نيوز) آءِ سي سي ورلڊ ڪرڪيٽ ليگ چيمپئن شپ ۾ هاليند پاپوانيوگني کي 85 رنسن تان هارائي ڇڏيو. پاپوانيو گني جي ٽيم 297 رنسن جي ٽارگيٽ پويان 3-40 اوورن ۾ 212 رنسون ٺاهي آئوٽ ٿي وئي. ڪيلا پالا جي ناقابل شڪست ففٽي هڻي ٽيم کي فتح نه ڏياري. ايمسٽل وين ۾ کيڏيل ايوينٽ جي چوٿين ميچ ۾ هاليند جي ٽيم پهريان کيڏندي مقرر اوورن ۾ 6 وڪيٽن تي 297 رنسون ٺاهيون. ڪپتان پيٽربورن بهترين بيٽنگ ڪندي 105 رنسن جي ناقابل شڪست اننگ کيڏي. مدثر بخاري 51 رنسون ٺاهي نمايان رهيو. نورمن ٻِن رانديگرن کي آئوٽ ڪيو. جواب ۾ پاپوانيوگني جي ٽيم گھربل ٽارگيٽ حاصل ڪرڻ ۾ ناڪام رهي. سموري ٽيم 41 هين اوور جي ٽئي بال تي 212 رنسون ٺاهي آئوٽ ٿي وئي. ڪيلا پالا جي ففٽي ناڪام ثابت ٿي. ٽم وانڊر، سيلار ۽ رپٽن ٻِن ٻِن رانديگرن کي آئوٽ ڪيو.