تازيون خبرون

Daily Archives: June 27, 2015

پاڪستان ايم ڪيو ايم بابت بي بي سي جي رپورٽ تي برطانيه کان باضابطا طور مدد گهري ورتي

اسلام آباد(بيورو) پاڪستان بي بي سي جي رپورٽ تي برطانيه کان باضابطا طور مدد گهري ورتي، پرڏيهي کاتي برطانيه اختيارين کي خط لکي ڇڏيو، خط ۾ چيو ويو آهي ته بي بي سي جي رپورٽ ۾ ڪيل انڪشافن ۽ حقيقتن تائين پهچ لاءِ مدد ۽ ڄاڻ فراهم ڪئي وڃي….. وفاقي گهرو وزارت جي منظوري کانپوءِ پرڏيهي کاتي پاران ايم ڪيو ايم بابت بي بي سي تي نشر ٿيل رپورٽ جي حقيقتن جي ڄاڻ تائين پهچ لاءِ برطانيه حڪومت کي خط لکيو ويو. پرڏيهي کاتي پاران لکيل خط پاڪستاني سفارتخاني ذريعي لاڳاپيل اختيارين تائين پهچايو ويندو. خط ۾ چيو ويو ته برطانيه جي هڪ معتبر اداري بي بي سي جي رپورٽ ۾ متحده بابت ڪيل انڪشافن کانپوءِ حڪومت پاڪستان ۽ قومي سلامتي وارن ادارن ۾ ڳڻتي ڇانيل آهي، بي بي سي جي رپورٽ ۾ ڪيل انڪشافن ۽ حقيقتن تائين پهچ لاءِ مدد ۽ ڄاڻ فراهم ڪئي وڃي.. خط ۾ چيو ويو ته ايم ڪيو ايم کي ملندڙ ڀارتيفنڊنگ توڙي ڪارڪنن جي ڀارت ۾ سکيا بابت ثبوت فراهم ڪيا وڃن، برطانيه پوليس پاران ايم ڪيو ايم جي اڳواڻن سان ڪيل پڇاڳاڇا جا به تفيصل فراهم ڪيا وڃن. خط ۾ برطانيه سان ٿيل پاڪستان جي مختلف معاهدن جو حوالو ڏنو ويو، جڏهن ته خط ۾ ڀارتي وزيراعظم نريندر مودي جي پاڪستان مخالف تازي بيان جو به ذڪر ڪيو ويو آهي….. واضح رهي ته وفاقي گهرو وزير چوڌري نثار علي گذريل ڏينهن بي بي سي جي رپورٽ تي برطانيه حڪومت کي خط لکڻ جو اعلان ڪيو هو، جنهن کانپوءِ وزيراعظم نواز شريف خط لکڻ جي منظوري ڏني هئي..

 

ڪراچي ۾وڌيڪ 72 ڄڻا فوت، انگ 1117 ٿي ويو، جاني نقصان جي جاچ لاءِ ڪميشن قائم

اسلام آباد/ڪراچي(بيورو/اسٽاف رپورٽر) سنڌ ۾ سخت گرمي وگهي اڄ به ماڻهو مرڻ جو سلسلو جاري آهي، ڪراچيءَ ۾ وڌيڪ 17 ماڻهن جي فوتين ٿيڻ بعد 24 ڪلاڪن دوران 72 ماڻهو موت جي منهن هلي ويا، ستن ڏينهن دوران حياتيون وڃائيندڙن جو انگ 11 سئو 17 ٿي ويو آهي، ٿرپارڪر، حيدرآباد ۽ نوابشاهه سميت ٻين علائقن ۾ به فوتين جو انگ 74 تائين پهچي ويو آهي. ڪراچي ۾ سخت گرمي جي لهر جاري آهي،جهولو لڳڻ ۽ جسم ۾ پاڻي جي کوٽ سبب وڌيڪ 17 ڄڻا فوت ٿي ويا. جناح اسپتال ۾ 9 ڄڻا فوت ٿي ويا،سول اسپتال ۽ سنڌ گورنمينٽ اسپتالن ۾ 3 – 3 مريضن دم ڏنو جڏهن ته ڪي ايم سي ۽ قطر اسپتالن ۾ هڪ – هڪ مريض فوت ٿيو. ستن ڏينهن دوران قهر جي گرمي ۾ وڌيڪ 17 ڄڻن جي فوت ٿيل شهرين جو انگ 11 سئو 17 ٿي ويو آهي. جناح اسپتال،ڪي ايم سي، سول، لياقت نيشنل اسپتال، قطر ، ضياءُ الدين، دل جي بيمارين واري اسپتال، اين آءِ سي ايڇ ۽ ٻين اسپتالن ۾ گرمي سٽيل مريضن جو علاج هلندڙ آهي. ٻئي طرف ٿرپارڪر، حيدرآباد ۽ نوابشاهه سميت سنڌ جي ٻين علائقن ۾ پڻ سخت گرمي سبب فوتين جو انگ 74 ٿي ويو آهي. ڊاڪٽرن جو چوڻ آهي ته قوت مدافعت ۾ گهٽتائي سبب ماڻهو سولائي سان لـُڪ جو شڪار ٿي وڃن ٿا،تنهنڪري عوام گرم موسم ۾ بنا ڪنهن سبب جي گهرن کان ٻاهر نه نڪري ۽ پاڻي سان هر هر منهن ڌوتو وڃي. ڊاڪٽرن شهرين کي صلاح ڏني آهي ته روزي رکڻ ۽ کولڻ وقت وڌ کان وڌ پاڻي استعمال ڪيو وڃي ۽ گرم شين جي استعمال کان پاسو ڪيو وڃي. ٻئي پاسي وزيراعظم ڪراچي ۾ وڏي پئماني تي ٿيل جاني نقصان جي جاچ لاءِ ڪميشن جوڙي ڇڏي، وفاقي وزير عبدالقادر بلوچ، سائره افضل تارڙ ۽ ٻيا جناح اسپتال ڪراچي پهچي ويا، سخت گرمي کان متاثر مريضن جي عيادت ڪئي، اڳواڻن چيو آهي ته ڪراچي ۾ ايترا ماڻهو ڪيئن مئا آهن ان جي مڪمل جاچ ڪرائي ويندي. وفاقي حڪومت کي ڪراچي ۾ سخت گرمي سبب ٿيل فوتگين جو نيٺ خيال اچي ويو، سيفران جي وفاقي وزير عبدالقادر بلوچ، صحت واري وزير سائره افضل تارڙ ۽ ٻين جناح اسپتال ڪراچي پهچي گرمي سبب متاثر ٿيل مريضن جي عيادت ڪئي. جناح اسپتال جي انتظاميه وفاقي وزيرن کي مريضن جي حالت ۽ ٿيل فوتگين بابت آگاهي ڏني. ان موقعي تي ميڊيا سان ڳالهائيندي وفاقي وزيرن چيو ته وزيراعظم ڪراچي ۾ ٿيل فوتگين جي جاچ لاءِ ڪميشن جوڙي ڇڏي آهي، هو ٿيل جاني نقصان جي جاچ لاءِ ڪراچي آيا آهن. هنن چيو ته ڪراچي ۾ ٿيل جاني نقصان تي وزيراعظم کي سخت افسوس آهي، معاملي جي مڪمل جاچ ڪرائي ويندي ته ايڏي وڏي پئماني تي جاني نقصان ڪيئن ٿيو آهي……..

 

وزيراعظم جي ڏنل هدفن کي پورو ڪندڙ وزارتن کي هڪ ارب رپيا انعام ڏيڻ جو اعلان

اسلام آباد (بيورو) وزيراعظم نواز شريف تمام وزارتن جي ڪارڪردگي جو هڪ ڀيرو وري جائزو وٺڻ ۽ کين ٽارگيٽ ڏيڻ جو فيصلو ڪري ڇڏيو آهي جنهن لاءِ منصوبابندي وزير احسن اقبال کي ٽاسڪ ڏنو ويو آهي، جيڪا به وزارت ايندڙ هڪ سال اندر پنهنجا تمام هدف حاصل ڪندي ان کي هڪ ارب رپيا انعام ۾ ڏنو ويندو جڏهن ته تمام وزارتن کي هدايت ڪئي وئي آهي ته اها گريڊ 0 2  جي آفيسر کي فوڪل پرسن نامزد ڪري جڏهن ته تمام وزير وزيراعظم سان هڪ پرفارمنس ڪنٽريڪٽ تي به صحيحون ڪندا. تفصيل موجب باخبر سرڪاري ذريعن ٻڌايو ته وزيراعظم جي هدايت تي منصوبابندي وزارت 5 2  جون تي هڪ اجلاس ڪوٺايو، جنهن جي صدارت وفاقي وزير احسن اقبال ڪئي اجلاس ۾ 0 1  اهم وزارتن جا سينئر حڪام ۽ منصوبابندي ڪميشن جا ميمبر شريڪ ٿيا جنهن ۾ کين ٻڌايو ويو ته وزيراعظم ۽ لاڳاپيل وزيرن وچ ۾ هڪ پرفارمنس ڪنٽريڪٽ تي ايندڙ مهيني صحيحون ڪيون وينديون ۽ وزيراعظم طرفان وزارتن کي هڪ سال لاءِ ٽارگيٽ ڏنا ويندا ۽ جيڪا به وزارت ٽارگيٽ حاصل ڪرڻ ۾ پهريون نمبر حاصل ڪندي ان کي انعام ۾ هڪ ارب رپيا ڏنو ويندو. پلاننگ ڪميشن جي چيف گورننس جاويد سڪندر طرفان نوٽيفڪيشن جن وزارتن کي موڪليو ويو آهي انهن ۾ پيٽروليم ۽ قدرتي وسيلا، ايويئيشن ڊويزن، ٽيڪسٽائل انڊسٽري، ريلوي، انفارميشن ٽيڪنالاجي، نيشنل هيلٿ سروسز، ايجوڪيشن اينڊ پروفيشنل ٽريننگ، مواصلات ۽ ڪامرس کي موڪليو ويو آهي، پرپوءِ اهو نوٽيفڪيشن اڃا تائين پاڻي ۽ بجلي وزارت، سُڌ سماءَ وزارت جهڙين اهم وزارتن کي ناهي موڪليو ويو. ان نوٽيفڪيشن ۾ چيو ويو آهي ته وزيراعظم نواز شريف جي هدايت تي تمام وزارتن کي پرفارمنس لاءِ خاص ٽاسڪ ڏنا ويندا، 5 2  جون تي احسن اقبال جي صدارت ۾ ٿيل اجلاس ۾ احسن اقبل حڪومت جي گڊ گورننس ۽ پاليسين تي عملدرآمد جي حوالي سان سرڪاري حڪام کي گائيڊ لائين ڏني ۽ کين ٻڌايو ته پرفارمنس ڪنٽريڪٽ کي 3  جولاءِ تائين حتمي شڪل ڏني ويندي، تمام وزارتن طرفان فوڪل پرسن لاءِ گريڊ 0 2  تائين جي آفيسر کي فوري طور تي نامزد ڪيو وڃي جڏهن ته پرفارمنس جي حوالي سان تمام تجوزيون وزارتن طرفان ٽن ڏينهن اندر پلاننگ ڪميشن کي موڪليون وڃن.

 

آرٽيڪل 63 اي سياسي پارٽين ۾ ٺهندڙ بارورڊ بلاڪن تي ضابطو اڻڻ لاءِ شامل ڪيو ويو: چيف جسٽس

اسلام آباد(بيورو) سپريم ڪورٽ آف پاڪستان جي 17 رڪني فل بينچ جمعي ڏينهن آئين ۾ ڪيل 18 هين ۽ 21 هين آئيني ترميمن خلاف درخواستن جي ٻن مهينن تائين ٻڌڻي بعد فيصلو محفوظ ڪري ڇڏيو آهي. ملڪ جي بار ايسوسيئيشنن طرفان داخل ڪيل درخواستن جي شنوائي 17 رڪني فل بينچ ڪئي جنهن جي سربراهي چيف جسٽس ناصر الملڪ ڪري رهيو هو. عدالت اٽارني جنرل جي دليلن مڪمل ٿيڻ بعد ڪيس جو فيصلو محفوظ ڪري ڇڏيو. عدالتي ڪارروائي دوران اٽارني جنرل آف پاڪستان سلمان اسلم بٽ چيو ته آئين جي آرٽيڪل 175 اي تحت اعليٰ ترين عدليا جي ججن جي مقرري جا اختيار جڊيشل ڪميشن کي ڏنا ويا آهن. وفاقي حڪومت جي اعليٰ ترين وڪيل عدالت کي ٻڌايو ته ڪيناڊا ۾ صدر اعليٰ عدالتن جي ججن جي مقرري جو اختيار رکي ٿو. جسٽس عظمت سعيد چيو ته آمريڪا ۾ صدر آرمي چيف مقرر ڪندو آهي پر ان کان اڳ پارلياماني ڪميٽي ۾ ان تي تفصيلي غور ويچار ڪيو ويندو آهي. اٽارني جنرل آف پاڪستان آئين جي آرٽيڪل 63 اي جو حوالو ڏيندو ٻڌايو ته اهو آرٽيڪل ڀارتي آئين ۾ به شامل آهي. ان تي جسٽس ثاقب نثار چيو ته ڇا اهو آرٽيڪل آئين جو حصو آهي يا ان کي بعد ۾ ترميم ذريعي آئين ۾ شامل ڪيو ويو آهي. اٽارني جنرل چيو ته ڀارتي آئين ۾ اها شق 52هين ترميم جي ذريعي شامل ڪئي وئي آهي ۽ هڪ پارٽي جو سربراهه پارليامينٽ کان ٻاهر ويهي پارٽي جا معاملا هلائي سگهي ٿو. چيف جسٽس ناصر الملڪ ريمارڪس ڏيندي چيو ته آرٽيڪل 63 اي تحت پارلياماني اڳواڻ جو ذڪر ڪيو ويو آهي جڏهن ته عدالت کي ان ڳالهه جي پسمنظر جو جائزو وٺڻو آهي ته ان آرٽيڪل کي آئين ۾ ڇو شامل ڪيو ويو آهي. جسٽس فائز عيسيٰ اٽارني جنرل کي چيو ته دنيا ۾ ڪٿان جو به حوالو ڏيو جتي پارٽي سربراهه جيڪو پارليامينٽ جو ميمبر به نه هجي پر اهو پارليامينٽ جي ميمبر کي رڪنيت تان هٽائي سگهندو هجي. چيف جسٽس ناصر الملڪ ريمارڪس ڏيندي چيو ته آئين ۾ آرٽيڪل 63 اي ان ڪري شامل ڪيو ويو آهي ته سياسي پارٽين ۾ ٺهندڙ فارورڊ بلاڪن تي ضابطو آڻي سگهجي. اٽارني جنرل چيو ته جيئن ته عدالت فقط آئين جي تشريح ڪري سگهي ٿي جڏهن ته اها پارليامينٽ جي منظور ڪيل ڪنهن به قانون ۽ آئيني ترميم کي ڪالعدم قرار نه ٿي ڏئي سگهجي. هن عدالت کي گذارش ڪئي ته آئين ۾ ٿيل 18 هين ۽ 21 هين ترميمن خلاف درخواستن کي خارج ڪيو وڃي ڇاڪاڻ ته اهي درخواستون قابل سماعت نه آهن. ان موقعي تي چئني صوبن ۽ وفاقي حڪومت جي ايڊووڪيٽس جنرل اٽارني جنرل جي دليلن جي توثيق ڪئي. ان کان اڳ چئني صوبن، وفاقي گادي واري هنڌ جي ايڊووڪيٽس جنرل، بار ڪائونسلن جي وڪيلن، پاڪستان بار ڪائونسل جي نمائندن جن ۾ عاصمه جهانگير، ابرار حسن، خالد انور پنهنجا دليل مڪمل ڪري ڇڏيا هئا. واضح رهي ته 18 هين ترميم ججن جي مقرري ۽ 21 هين ترميم فوجي عدالتن جي قيام بابت آهي.

 

ايم ڪيو ايم جي برطانيا ۾ پراپرٽي ڪمپني ۾ ڀارتي شهرين پاران لکين پائونڊ جمع ڪرائڻ جو انڪشاف

لنڊن (اين اين آءِ) ايم ڪيو ايم جي برطانيا ۾ پراپرٽي ڪمپني ۾ ڀارتي شهرين پاران لکين پائونڊ جمع ڪرائڻ جو انڪشاف ٿيو آهي جڏهن ته ڪمپني جو هڪ ڊائريڪٽر به ڀارتي آهي ميڊيا رپورٽ مطابق الطاف حسين جي نه صرف برطانيا پر ڪينيڊا ۾ به پراپرٽي فرم رجسٽرڊ آهي يورو پراپرٽي ڊيولپمينٽ لميٽيڊ يورو ڊيولپمينٽ ۽ يورو پراپرٽي ڪينيڊا نالي سان قائم ڪمپنين جي اڪائونٽس ۾ ٽن ڀارتي شهرين هڪ ملين پائونڊ کان وڌيڪ رقم 2012 ۽ 2013 ۾ جمع ڪرائي انهن اڪائونٽس ۽ رقم جمع ڪرائڻ جي تفصيل جو علم اسڪاٽ لينڊ يارڊ کي مني لانڊرنگ ڪيس جي جاچ ۾ ٿيو اڪائونٽس ۽ رقم منتقل ڪرڻ جا ثبوت به اسڪاٽ لينڊ يارڊ وٽ موجود آهن انهن ڪمپنين جي ملڪيت الطاف حسين جي نالي تي ئي آهي الطاف حسين 25 جون 2006 تي يورو پراپرٽي ڪمپني جو ڊائريڪٽر ٿيو ان جي هڪ ڏينهن کان پوءِ سندس ويجهو ساٿي محمد انور کي به ڊائريڪٽر ڪري ويهاريو ويو مني لانڊرنگ جو ڪيس ٺهڻ تائين ٻئي ليڊر هن ڪمپني جا ڊائريڪٽر هئا ۽ 16 جون 2014 تي ڪمپني مان استعيفا ڏيئي ڇڏي ان کان پوءِ هڪ ڏينهن لاءِ ايم ڪيو ايم جي اڳواڻ عادل صديقي ۽ سهيل منصور کي ڊائريڪٽر بڻايو ويو ۽ ٻئي ڏينهن استعيفا ورتي ويئي ان کان پوءِ ڪمپني جا 3 ڊائريڪٽر بڻايا ويا جن ۾ ارشد عبدالله وهيرا قاسم علي اظهارالدين خان شامل آهن هن ال 31 مئي تي به هن ڪمپني جي اڪائونٽس ۾ 12 ڪروڙ رپين کان وڌيڪ رقم موجود هئي.

 

ڪراچي ۾ لوڊشيڊنگ جي ذميوار ڪي اليڪٽرڪ آهي: خواجه سعد رفيق

گجرانوالا (مانيٽرنگ ڊيسڪ) ريلوي واري وفاقي وزير خواجه سعد رفيق چيو آهي ته بي بي سي پرڏيهي خابرو ادارو  آهي، ايم ڪيو ايم بابت رپورٽ تي حتمي راءِ نٿي ڏئي سگهجي، ڪراچي ۾ بجلي بحران جو ذميوار ڪي اليڪٽرڪ آهي، آصف علي زرداري وڏي اپوزيشن پارٽي جو سربراهه آهي، فرار ٿيڻ واريون خبرون افواهه آهن. گجرانولا ۾ ميڊيا سان ڳالهائيندي خواجه سعد رفيق چيو ته بي بي سي پرڏيهي خابرو ادارو آهي، ايم ڪيو ايم بابت رپورٽ تي حتمي راءِ نٿي ڏئي سگهجي. هــن چيو ته آصف علي زرداري اپوزيشن پارٽي جو سربراهه آهي،  سندس پرڏيهه فرار ٿيڻ بابت افواهه غلط آهي. سندس چوڻ هو ته ايم ڪيو ايم بابت برطانوي خابرو اداري بي بي سي جي رپورٽ تي ملڪي ادارا ڪم ڪري رهيا آهن، پر هـــــو ان بابت حتمي راءِ نٿو ڏئي سگهي. خواجه سعد رفيق بجلي بحران تي ڳالهائيندي چيو ته ڪراچي ۾ لوڊشيڊنگ جي ذميوار ڪي اليڪٽرڪ آهي، سنڌ جي راڄڌاني شهر ۾ پلانٽ بند ڪرڻ بابت وفاقي حڪومت نوٽيس ورتو آهي. پاڻي ۽ بجلي واري وزير چيوت ه رمضان شريف جي ڀلاري مهيني ۾ سحري ۽ افطار دوران لوڊشيڊنگ ۾ واڌ ٿي، بجلي بحران تي گهڻي حدتائين ضابطو آندو ويو آهي. خواجه سعد رفيق وڌيڪ چيو ته آئيسڪو، گيسڪو، ميپسڪو، ۽ ٻين شهرن کي 100سيڪڙو بجلي فراهم ڪئي پئي وڃي.

 

بلاول ڀٽو هنگامي طور تي ڏيهه پهچي ويو، لائحه عمل جي اعلان جو امڪان

ڪراچي (اسٽاف رپورٽر) پيپلزپارٽي جو چيئرمين بلاول ڀٽو زرداري دبئي کان هنگامي طور تي واپس موٽي آيو، جڏهن ته ڪجهه دير کانپوءِ ميڊيا سان ڳالهه ٻولهه دوران نئين لائحه مل جي اعلان جو امڪان، آصف زرداري ۽ فريال ٽالپر سميت ٻيا اهم اڳواڻ دبئي ۾ ئي آهن. پيپلزپارٽي جي قيادت جي هڪٻئي پٺيان دبئي وڃڻ کانپوءِ پارٽي اڳواڻن ۽ ڪارڪن ۾ بي چيني پکڙجي وئي ۽ اڳڪٿين ۽ افواهن جي بازار گرم ٿي وئي جنهن کانپوءِ پيپلزپارٽي جي چيئرمين بلاول ڀٽو زرداري دبئي کان پاڪستان واپس پهچي ويو. پارٽي اڳواڻن جو چوڻ هو ته اڳواڻن ۽ ڪارڪنن جا حوصلا بلند آهن. ڪراچي ۾ سرڪاري آفيسرن ۽ فرنٽ مينن جي گرفتاريون ٿيون ته ڪيترائي سياستدان ۽ بيوروڪريٽس گرفتاري کان اڳ ضمانتون ڪرائي ورتيون جڏهن ته آصف زرداري، بلاول ڀٽو زرداري، فريال ٽالپر دبئي هليا ويا. هڪ پاسي پنجاب مڪاني چونڊن جون تياريون شروع آهن، ٻئي پاسي ڪراچي ۾ گرفتاريون جاري آهن، اهڙي صورتحال ۾ واضحح لائحه عمل جوڙڻ بجاءِ پارٽي قيادت ٻڏتر جو شڪار نظر اچي رهي آهي.

 

پ پ جي ڪردار ڪشي ڪندڙ بوکلاهٽ جو شڪار ٿي ويا آهن: قمر الزمان ڪائره

لالا موسيٰ (مانيٽرنگ ڊيسڪ) پيپلز پارٽي جَي جنرل سيڪريٽري قمر الزمان ڪائره چيو آهي تهبلاول ڀٽو زرداري کي اپوزيشن اڳواڻ بڻائڻ بابت حتمي فيصلو ناهي ٿيو، پ پ جي ڪردار ڪشي ڪندڙ بوکلاهٽ جو شڪار ٿي ويا آهن. لالا موسيٰ ۾ ميڊيا سان ڳالهائيندي قمر الزمان ڪائره چيو ته  پ پ چيئرمين بلاول ڀٽو زرداري جلد دبئي مان ڏيهه واپس ايندو. هن چيو ته اڳوڻو صدر آصف علي زرداري شيڊيول موجب دبئي ويو، جِتان هـــُــو ڪجهه ذاتي مصروفيتن سبب آمريڪا ويندو. قمر الزمان ڪائره چيو ته آصف علي زرداري آمريڪا کانپوءِ طئي ٿيل پروگرام موجب پاڪستان موٽي ايندو. هن چيو ته پيپلز پارٽي جي قيادت جي ڪردار ڪشي ڪندڙ بوکلاهٽ جو شڪار ٿي ويا آهن، کين ناڪامي کانسواءِ ڪجهه به حاصل نه ٿيندو. پ پ اڳواڻ قمر الزمان ڪائره وڌيڪ چيو ته  پيپلز پارٽي جي عظيم قربانين سبب ملڪ ۾ جمهوريت مضبوط ٿي، جنهن کي ڊي ريل نه ٿيڻ ڏنو ويندو.

 

نيپرا فيول ايڊجسٽمينٽ جي مد ۾ بجلي اگهن ۾ هڪ رپيو 86 پئسا گهٽتائي ڪري ڇڏي

اسلام آباد (بيورو) نيپرا، فيول ايڊجسٽمينٽ جي مد ۾ بجلي اگهن ۾ هڪ رپيو 86 پئسا گهٽتائي ڪري ڇڏي، نوان اگهه ڪي اليڪٽرڪ جي صارفين تي لاڳو نه هوندا. سي پي بي اي پاران نيپرا کي بجلي اگهن ۾ 2 رپيا 92 پئسا لاٿ جي درخواست ڪئي وئي هئي. نيپرا بجلي اگهن ۾ هڪ رپيو 86 پئسا گهٽتائي جي منظوري ڏئي ڇڏي آهي، نوان اگهه جولاءِ کان لاڳو ٿيندا.

 

اليڪشن ڪميشن کي تڪبندين جو اختيار ڏيڻ آئين خلاف آهي: پ پ

ڪراچي (اين اين آءِ) پاڪستان پيپلز پارٽي ڪراچي ڊويزن جو هڪ اهم اجلاس نجمي عالم جي صدارت ۾ ٿيو، اجلاس ۾ وقار مهدي، سينيٽر سعيد غني، سردار خان، عابد ستي، لطيف مغل، قاسم بلوچ،نديم ڀٽو، صديق اڪبر، مرزا مقبول، شهزاد مزاري، ظفر صديقي. سعيد چاولا، اعجاز بلوچ، قاضي بشير شرڪت ڪئي، اجلاس ۾ اليڪشن ڪميشن پاران مڪاني تبندين تي تفصيلي غور ڪيو ويو ۽ تڪبندين کي نهايت جابنداراڻا قرار ڏنو ويو، جنهن ۾ 1974 قانون جي خلاف ورزي ڪئي وئي ته جئين پاڪستان پيپلز پارٽي کي نقصان ڏئي سگهجي ۽ موجود ماڻهن جو اهو خيال هو اليڪشن ڪميشن کي تڪبندين جو اختيار آئين جي خلاف ورزي آهي، اليڪشن ڪميشن سمورن قانون کي پاسي تي رکي پ پ کي نشانو بڻايو آهي، ڪراچي جي هر ڊسٽرڪٽ ۾ ناانصافين جي هڪ ڊگهي لسٽ آڏو آيو آهي، پارٽي لائير فورم جون خاص ڪميٽيون هر ڊسٽرڪٽ ۾ ٺاهيون آهن ته جئين اهي اليڪشن ڪميشن جي قانون ٽوڙڻ بابت ۽ ٽربيونل آڏو شڪايتون پيش ڪري سگهي.