تازيون خبرون

Daily Archives: June 26, 2015

ايم ڪيو ايم تي الزام سنگين آهن، چور ۽ ڦورو ڪراچي مان ڀڄندا پيا وڃن: شيخ رشيد

اسلام آباد(بيورو) عوامي مسلم ليگ جي سربراهه شيخ رشيد احمد چيو  آهي ته چور ۽ ڦورو ڪراچي مان ڀڄي رهيا آهن.اسلام آباد ۾ پارليامينٽ هائوس ٻاهران ميڊيا سان ڳالهائيندي شيخ رشيد چيو ته قومي اسيمبلي ۾ اسپيڪر جو رويو سهڻ جوڳو ناهي رهيو، لڳي ٿو ته اين اي 122 جو فيصلو ويجهو اچي چڪو آهي، جيڪڏهن اسپيڪر رويو نه بدلايو ته احتجاج ڪيو ويندو. هن چيو ته حڪومت جو رويو صفا غير جمهوريي آهي، قومي اسيمبلي ۾ ڳالهائڻ جي اجازت نه ٿي ملي، ايوان ۾ ڪم جي ڳالهه ڪرڻ جو موقعو ملي ٿو ته مائيڪ بند ڪئي وڃي ٿي. شيخ رشيد چيو ته پاڻي ۽ بجلي واري وزارت قومي اسيمبلي ۾ غلط انگ اکر پيش ڪيا، هڪ سوال جي جواب ۾  عوامي مسلم ليگ جي سربراهه چيو ته ايم ڪيو ايم تي تمام سنگين الزام لڳا آهن، وزيراعظم کي اڄ پارليامينٽ ۾ اچڻ گهرجي ها.

 

ڪراچي ۾ دهشتگردي ڀارت مان سکيا ورتل ايم ڪيو ايم ڪارڪن ڪن ٿا، نديم نصرت هدايتون ڏيندو آهي: ايس ايس پي رائو انوار

ڪراچي (اسٽآف رپورٽر) ايس ايس پي ملير رائو انوار چيو آهي ته ان ڳالهه ۾ ڪوبه شڪ ناهي ته ايم ڪيو ايم جا ڪجهه ڪارڪن ڀارت مان سکيا وٺندا آهن، ڪجهه عرصو اڳ ايم ڪيو ايم جي ڪارڪنن کي گرفتار ڪري ڀارتي ڳجهي ايجنسي ” را“ سان تعلق جو انڪشاف ڪندڙ ايس ايس پي رائو انوار جي ان ڳالهه کي بي بي سي جي رپورٽ کانپوءِ وڌيڪ هٿي ملي آهي. هڪ نجي ٽي وي سان ڳالهائيندي رائو انوار چيو ته ڪراچي ۾ ٿيندڙ ڏوهن ۽ دهشتگردي ۾ ايم ڪيو ايم جي انهن ڪارڪنن جو هٿ هوندو آهي، جيڪي ڀارت مان سکيا وٺي ايندا آهن. هن چيو ته ايم ڪيو ايم ۾ نوجوانن جا مختلف گروپ آهن، ان وٽ اهڙا شوٽر به آهن، جيڪي جتي حڪم ملي اتي گولي هلائيندا آهن. ايس ايس پي ملير جو چوڻ هو ته لنڊن مان ايم ڪيو ايم اڳواڻ نصرت نديم ۽ ٻي قيادت ڪوڊ استعمال ڪري ڪارڪنن کي هدايتون ڏيندي آهي. سندس چوڻ هو ته جاويد لنگڙا ڀارت ۾ ايم ڪيو ايم جي ڇوڪرن کي سکيا ڏيندو آهي، امتياز عرف گڊو به ٻڌايو ته سندن سکيا ڀارت ۾ ٿي،رائو انوار چيو ته ڪافي انگ ۾ اهڙا ڪيترائي نوجوان اڃا باقي آهن، جن کي گرفتار ڪرڻو آهي.

 

مستونگ ۾ وين ۽ ٽرڪ وچ ۾ ٽڪر، 12 مسافر فوت ، 8 زخمي

ڪوئٽه (م.ڊ) مستونگ ۾ ٽرڪ ۽ وين ۾ ٽڪر جي نتيجي ۾ 12 ڄڻا فوت ٿي ويا ۽ 8 کان وڌيڪ زخمي ٿي پيا. ڪوئٽه کان منگوچر ويندڙ مسافر وين جو مستونگ جي کڏ چوڪ وٽ سامهون ايندڙ ٽرڪ سان ٽڪر ٿي پيو، حادثي جي نتيجي ۾ 12 مسافر ٿڏي تي ئي فوت ٿي پيا ۽ 8 کان وڌيڪ زخمي ٿي پيا، فوت ٿيندڙ مسافرن ۾ عورتون ۽ ٻارڙا پڻ شامل هئا. حادثي کان پوءِ امدادي ڪارروايون شروع ڪري فوت ٿي ويلن جا لاش ۽ زخمين کي مستونگ اسپتال منتقل ڪيو ويو.

 

فلم “بجرنگي ڀائي جان” ۾ عاطف اسلم جي گيت“ تو چاهئي” جي وڊيو جاري

ممبئي(شوبز نيوز): سلمان خان جي ايندڙ نئين ايڪشن، رومينٽڪ فلم “بجرنگي ڀائي جان” لاءِ پاڪستاني پاپ اسٽار عاطف اسلم جي گيت “تو چاهئي” جي وڊيو جري ڪئي وئي آهي. بالي ووڊ جي دبنگ سلمان خان جي ايندڙ نئين ايڪشن ۽ رومينٽڪ بالي ووڊ فلم ” بجرنگي ڀائي جان لاءِ سپر پاپ اسٽار عاطف اسلم جي آواز ۾ رڪارڊ ڪيل گيت “تو چاهئي” جي وڊيو رليز ڪئي وئي آهي. توچاهئي، تي ٻڌل ٻولن جي هن گيت جي موسيقي پريتم ترتيب ڏني آهي، جنهن جي وڊيو ۾ سلمان خان ۽ ڪرينا ڪپور کي خوشگوار موڊ ۾ ڏيکاريو ويو آهي. هن فلم ۾ سلمان خان نه رڳو ايڪشن ۾ نظر ايندو پر هڪ پاڪستاني ٻار جي محافظ جي روپ ۾ به کيس ڏسي سگهنداسين.ڪبير خان جي هدايت ۾ ٺهندڙ هن فلم جي ڪهاڻي هڪ پاڪستاني ڇوڪري جي آهي، جيڪا ڀارت ۾ پنهنجي مائٽن کان وڇڙي ٿي وڃي. وڌيڪ توهان فلم ڏسو خبر پئجي ويندي ته پوءِ ڇا ٿيو.

 

پاپ موسيقي جي شهنشاهه مائيڪل جيڪسن جي 6 هين ورسي ملهائي وئي

نيويارڪ (شوبز نيوز): پاپ موسيقي جي شهنشاهه مائيڪل جيڪسن جي 6 هين ورسي ملهائي وئي، پنهنجي منفرد انداز سان پاپ موسيقي پرانمٽ نقوش ڇڏيندڙ مائيڪل جيڪسن 1958ع ۾ آمريڪي شهر گيري ۾ پيدا ٿيو ۽ 5 سالن جي عمر ۾ ئي ميوزڪ جي دنيا ۾ قدم رکيو هن پنهنجي فني ڪيريئر جو آغاز 1964ع ۾ پنهنجن ڀائرن جي پاپ گروپ جيڪسن فائيو کان ڪيو جنهن جو پهريون ميوزڪ البم “آءِ وانٽ يو بيڪ” هيو جنهن سموري دنيا ۾ اهڙي ڌوم مچائي ته سڀني کي پنهنجو ديوانو بڻايو، مائيڪل جيڪسن پنهنجي پهرين سولر البم آف دي وال ذريعي پاپ موسيقي جي دنيا ۾ الڳ سڃاڻپ ٺاهي، 1982ع ۾ ان جي هڪ ٻئي البم ٿرلر اهڙي ڌوم مچائي ته هر هڪ جي زبان تي مائيڪل مائيڪل هيو جيڪو دنيا جو سڀ کان وڌيڪ وڪرو ٿيل البم به قرار ڏنو ويو، مائيڪل جيڪسن جي آواز سان ان جي انوکي ڊانس اسٽائلز به عالمگير مقبوليت حاصل ڪئي جنهن جو مون واڪ نالي ڊانس اسٽال ان جي سڃاڻپ بڻجي ويو، ٿرلر، بيٽ اٽ، بيڊ، ڊينجرس ۽ بلي جينز جهڙا بلاڪ بسٽر ميوزڪ البم ڏيندڙ مائيڪل هڪ حمد الله ٽو ٿئينڪس گو به رڪارڊ ڪرايو جنهن سان ان جي اسلام قبول ڪرڻ جي افواهن جنم ورتو، ڪنگ آف پاپ مائيڪل جيڪسن ڪجهه سال پهريان دنيا کان رخصت ٿيو جڏهن ته پنهنجن گانن جي صورت ۾ هو اڄ به پنهنجن چاهيندڙن جي دلين ۾ جيئرو آهي.

 

سيف علي خان جي ٻارن ساره ۽ ابراهيم جي ويڳي ماءُ نه پر سٺي دوست آهي:ڪرينا

ممبئي (شوبز نيوز) بالي ووڊ اداڪارا ڪرينا ڪپور خان جو چوڻ آهي ته هوءَ نواب سيف علي خان جي ٻارن ساره ۽ ابراهيم جي نِڳي ماءُ نه پر سٺي دوست آهي. پنهنجي هڪ انٽرويو ۾ ڪرينا ڪپور خان چيو ته ساره ۽ ابراهيم تمام پيارا ٻار آهن ۽ ٻنهي سان منهنجي سٺي دوستي پڻ آهي، هن چيو ته آءٌ ساره کي تمام گھڻو پيار ڪندي آهيان ۽ سندس پرستار به آهيان، هوءَ تمام ذهين آهي.

 

فلمي دنيا کان پاسيري ٿي ويل بالي ووڊ اداڪارا ڪرشما ڪپور 41 ورهين جي ٿي وئي

ممبئي(شوبز نيوز)بالي ووڊ اداڪاره ڪرشما ڪپور پنهنجي 41 هين سالگرهه ملهائي، 25 جون 1974 تي ڀارتي رياست مهارشٽرا جي شهر ممبئي ۾ 70ع ۽ 80 ع جي ڏهاڪي جي مشهور اداڪار ۽ اداڪاره رندير ڪپور ۽ ببيتا جي گهر پيدا ٿيل ڪرشما ڪپور پنهنجي بالي ووڊ ڪيريئر جي شروعات 1991 ۾ فلم “پريم قيدي” کان ڪئي، جيڪا باڪس آفيس تي وچولي درجي جو بزنس ڪري سگهي، ان کانپوءِ ڪرشما جگر، راجه بابو، قولي نمبر ون، اناڙي، ساجن چلي سسرال ۽ جيت جهڙيون فلميون ڏنيون، جڏهن ته 1996ع ۾ عامر خان سان سندس فلم راجه هندستاني کيس ڪاميابي جي بلندين تي پهچايو، ان کانپوءِ فلم دل تو پاگل هي، فضا ۽ بيوي نمبر ون کي به باڪس آفيس تي وڏي ڪاميابي حاصل ٿي، بهترين اداڪاره جا ڪيترائي ايوارڊ پنهنجي نالي ڪندڙ ڪرشما ڪپور کي ذاتي زندگي ۾ ان وقت ناڪامي جو منهن ڏسڻو پيو، جڏهن ليجنڊري اداڪار اميتاب بچن جي اداڪار پٽ اڀيشڪ سان سندس مڱڻي ٽٽي پئي، سيپٽمبر 2003ع ۾ ناليواري صنعتڪار سنجي ڪپور کي پنهنجو جيون ساٿي چونڊي پنهنجي شادي جي زندگي جي شروعات ڪندڙ ڪرشما ڪپور هڪ پٽ ۽ ڌيءُ جي ماءُ آهي جڏهن ته هوءَ مڙس کان طلاق وٺي چڪي آهي، 2003ع کان بالي ووڊ فلم انڊسٽري کان پاسيري رهندڙ ڪرشما جي شوبز انڊسٽري ۾ واپسي 2008 ۾ ريئلٽي شو نچ بلئي ۾ جج جي حيثيت سان ٿي.

 

ڪولمبو ٽيسٽ ۾ سريلنڪا پاڪستان جا ترا ڪڍي ڇڏيا، مهمان ٽيم پهرين اننگز ۾ 138 رنسن تي ڍير

ڪولمبو(اسپورٽس نيوز): پاڪستاني ڪرڪيٽ ٽيم سريلنڪا خلاف ٻي ٽيسٽ ميچ جي پهرين اننگ ۾ پهرين ئي ڏينهن 138 رنسن تي ڍير ٿي وئي، ڪولمبو جي ميدان تي پاڪستاني ڪپتان مصباح الحق ٽاس کٽي پهرينبيٽنگ جو فيصلو ڪيو،جيڪو غلط ثابت ٿيو ۽ پاڪستاني بيٽنگ ٻارن کان به وڌيڪ خراب نظر آئي، محمد حفيظ 42، اظهر علي 26، ياسر شاهه 15 ۽ سرفراز احمد 14 رنسون ٺاهي پويلين موٽيا، جڏهن ته باقي 7 بيٽسمين ڊبل فگرز ۾ ئي نه پهتا، پهرين ٽيسٽ ميچ هارائيندڙ سريلنڪا جي ٽيم ٻي ٽيسٽ ۾ قهر بڻجي پاڪستاني بيٽنگ تي ڪڙڪي پئي، ڪوشال جي جاودوگري پاڪستاني بيٽسمينن کي پنهنجي وڪڙ ۾ آڻي ڇڏيو ۽ سڄي قومي ٽيم 138 رنسن تي همت هارائي ويٺي، ڪوشال 5 شڪار ڪري پاڪستان جي اننگ 42 ڏهائي 5 اوورن ۾ ختم ڪرائي ڇڏي، جڏهن ته پرساد 3 ۽ چميرا هڪ وڪيٽ ورتي.

 

15 سال پراڻيون اٽڪلون آزمائي رينڪنگ ۾ بهتري نه ٿي آڻي سگھجي: رميز راجا

لاهور (اسپورٽس نيوز) ملڪي ٽيم جي اڳوڻي ڪپتان رميز راجا پاڪستان جي ون ڊي ٽيڪنڪ کي پراڻو قرار ڏيندي چيو آهي ته 15 سال پراڻيون اٽڪلون آزمائي رينڪنگ ۾ بهتري نه ٿي آڻي سگھجي. هڪ انٽرويوءَ ۾ رميز راجا چيو ته اسان پراڻي ٽيڪنيڪ تي لاڳيتو عمل ڪري عالمي ون ڊي رينڪنگ ۾ نائين پوزيشن تي اچي پهتا آهيون. اڄ ڪلهه ڪرڪيٽ ۾ اننگن جي شروعات کان آخر تائين رنسن جي رفتار رکڻي پوندي آهي. پر اسان ان ئي پراڻي طريقي تي عمل ڪندي ان ڳالهه جي انتظار ۾ هوندا آهيون ته آخري 10 اوورن ۾ ئي 100 رنسون ٺاهي ٽارگيٽ بهتر ڪيون. اڳوڻي ڪپتان چيو ته گال ٽيسٽ ۾ سرفراز احمد ڏکئي وقت ۾ بيٽنگ ڪندي به جارحاڻو انداز اپنايو ۽ رنسن جي رفتار ۾ فرق نه اچڻ ڏنو، هن اهڙو پليٽ فارم ڏنو جو هڪ ڏينهن زيان ٿيڻ باوجود ميچ جو فيصلو ٿي ويو. اها ئي ٽيڪنڪ پاڪستان کي ون ڊي ڪرڪيٽ ۾ به اپنائڻي پوندي. رميز راجا چيو ته کٽڻ جو سفر جاري رکڻ لاءِ سپر فٽ رانديگرن جي به ضرورت پوندي آهي، پر ان مامري ۾ به گرين شرٽون تمام پوئتي آهن. 10 سالن کان انفرا اسٽرڪچر لاءِ ڪجھه نه ڪرڻ جو نتيجو هاڻي ڀوڳي رهيا آهيون، نئون ٽيلينٽ سامهون نه پيو اچي، جيڪو موجود آهي ان کي به ڪيترائي مسئلا آهن. هن چيو ته گراس روٽ سطح تي مسئلا حل ڪرڻ تي ڌيان ناهي ڏنو ويو، بائيو مڪينڪ ليب فعال ٿيڻ سان ڪجھه مدد ملي ها. اهو منصوبو به مڪمل نه ٿيو. اصل ۾ پي سي بي ۾ جرئتمنداڻن فيصلا ڪرڻ وارا عهديدار ناهن. ان جي لاءِ حالتون بهتريءَ طرف نه پيون وڃن. موجوده صورتحال ۾ پريمئير ٽي ٽوئنٽي ليگ جو پاڪستان ۾ ٿيڻ سخت ضروري آهي. ملڪ ۾ ايوينٽ ٿيڻ سان نئين ٽئلينٽ جي حوصلا افزائي ۽ نوجوانن جون صلاحيتون نکارڻ ۾ مدد ملندي.

 

مي ويڌر آخري فائيٽ جي لاءِ سولو مخالف ڳولي رهيو آهي: باڪسر عامر خان

لاس اينجلس (اسپورٽس نيوز) آمريڪي باڪس فلائيڊ مي ويڌر پاڪستان ڃائي برطانوي باڪسر عامر خان سان وڙهڻ بدران آندري برٽويايا ڪريم سان مقابلي جو اعلان ڪيو آهي. آمريڪي باڪسر فلائيڊ مي ويڌر عامر خان سان وڙهڻ کان انڪار ڪندي پنهنجو آخري مقابلو آندري برٽو يايا ڪريم مي فيلڊ سان وڙهڻ جو اعلان ڪيو آهي. ٻئي طرف عامر خان جو چوڻ هو ته مي ويڌر آخري فائيٽ جي لاءِ سولو مخالف ڳولي رهيو آهي ۽ جيڪڏهن مي ويڌر مون کان نه ٿو ڊڄي ته مون سان مقابلو ڪري. واضح رهي ته آندري برٽويا ۽ ڪريم مي فيلڊ ويلٽر ويٽس ريسلر آهن ۽ ٻنهي اڄ تائين هڪ به عالمي ٽائيٽل ناهن کٽي سگھيا، جڏهن ته عامر خان آمريڪي باڪس فلائيڊ مي ويڌر کي مقابلي جي لاءِ ڪيترائي ڀيرا چئلينج ڪري چڪو آهي.