تازيون خبرون

Daily Archives: June 25, 2015

ڪراچي ۾ ماڻهو مرن پيا ۽ سنڌ جو وڏو وزير افطار پارٽيون ڏيڻ ۾ مصروف آهي: اسد عمر

ڪراچي (اسٽاف رپورٽر) پيپلز پارٽي جي اڳواڻ نويد قمر چيو آهي ته لاهور ۾ 700 ماڻهو مرن ها ته حڪومت لُڏي وڃي ها، پي ٽي آءِ جي اسد عمر چيو آهي ته ڪراچي ۾ ماڻهو مري رهيا آهن ۽ وڏو وزير افطار پارٽيون منعقد ڪرڻ ۾ مصروف آهي، جيڪا انساني المئي تي ٺٺول برابر آهي، رشيد گوڊيل چيو آهي ته ڪراچي ۾ قبرون وڪامي رهيون آهن، پئسا نه هجڻ سبب ماڻهو ميتون دفنائڻ لاءِ پريشان آهن. قومي اسيمبلي جي اجلاس ۾ ڳالهائيندي پ پ اڳواڻ نويد قمر چيو ته بجلي جي لوڊشيڊنگ جي ذميوار نيپرا آهي. هن چيو ته 700ماڻهو لاهور ۾ مرن ها ته حڪومت لُڏي وڃي ها. نويد قمر چيو ته تيل جي کوٽ تي اوگرا سربراهه کي هٽايو ويو هو پر بجلي جي کوٽ تي ڪنهن جي به خلاف ڪارروائي نه پئي ٿئي. هن چيو ته وفاقي حڪومت جو سنڌ سان رويو نا انصافي تي ٻڌل آهي. پي ٽي آءِ جي اسد عمر ڳالهائيندي چيو ته ڪراچي ۾ گرمي وگهي انساني جانيون ضايع ٿي رهيون آهن. هن چيو ته ڪراچي جي صورتحال تي سياستدانن جي بيانبازي انتهائي افسوسناڪ عمل آهي. هن چيو ته وفاقي وزير خواجه آصف جو اهو چوڻ ته ڪراچي سندس مينڊيٽ ۾ نٿي اچي، انتهائي افسوس جوڳو بيان آهي. هن چيو ته ڪراچي جيڪڏهن ڪنهن جي مينڊيٽ ۾ نه ٿي اچي ته پوءِ اتان ٽيڪس ڇو پيو اوڳاڙيو وڃي. اسد عمر سنڌ حڪومت جي سربراهه تي به تنقيد ڪئي، سندس چوڻ هو ته ڪراچي ۾ ماڻهو مرن پيا ۽ وڏو وزير افطار پارٽي ڏيڻ ۾ مصروف آهي. اسد عمر جو چوڻ هو ته ڪراچي سڙي رهيو آهي ۽ حڪومت کي ڪا به پرواهه نه آهي. هن چيو ته وفاق کي ڪراچي جو عوام رڳو ٽيڪس اوڳاڙڻ وقت ياد اچي ٿو. اسد عمر چيو ته صوبائي حڪومت ڪراچي صورتحال جي ذميواري کڻڻ لاءِ تيار ناهي ۽ وفاق وري پنهنجي استدلال ڏئي رهيو آهي ته پوءِ آخر ڪراچي جو ماڻهو صورتحال جو ذميوار ڪنهن کي سمجهي ۽ ڪنهن کان پڇي ته هي ملڪ اندر ڇا ٿي رهيو آهي. ايم ڪيو ايم جي رشيد گوڊيل چيو ته ڪراچي ۾ هڙتال ٿيندي آهي ته سڀ دانهون ڪندا آهن، باقي جيڪڏهن اتي ماڻهو مري رهيا آهن ته ڪنهن کي ڪا پرواهه ئي نه آهي. رشيد گوڊيل جو چوڻ هو ته ڪراچي کي حق نه ٿا ملن، ڪراچي کي حق ملندا ته هڙتال ڇو ٿيندي؟ هن چيو ته هڙتال جي خلاف آهيون، پر ڪراچي کي حق ڏنا وڃن، جيڪڏهن حق نه ملندا ته مسئلا ٿيندا. رشيد گوڊيل چيو ته ڪراچي سان ماٽيلي ماءُ وارو سلوڪ ڪيو پيو وڃي. هن چيو ته حالت اها آهي ته ڪراچي ۾ گرمي وگهي مرندڙ ماڻهن لاءِ هاڻي سرد خانن ۾ لاش رکڻ جي گنجائش ختم ٿي وئي آهي، جڏهن ته قبرون وڪرو ٿي رهيون آهن. هن چيو ته ڪالهه هڪ همراهه کي پنهنجي هڪ ميت دفنائڻي هئي پر ان وٽ قبر جي خريداري لاءِ 35 هزار رپيا نه هئا.

 

زراعت تي انڪم ٽيڪس نه لڳائڻ جاگيردارن کي تحفظ ڏيڻ آهي: خواجه اظهار الحسن

ڪراچي (اسٽاف رپورٽر) سنڌ اسيمبلي ۾ مخالف ڌر جي اڳواڻ خواجه اظهار الحسن چيو آهي ته  زراعت تي انڪم ٽيڪس نه لڳائڻ جاگيردارن کي تحفظ ڏيڻ آهي، سنڌ جو هر معاملو عدالتن ڏانهن پيو وڃي، ٻڌايو وڃي ته حڪومت ڇا پئي ڪري؟ سنڌ اسيمبلي ۾ بجيٽ تي بحث دوران ڳالهائيندي خواجه اظهار الحسن چيو ته  ايگريڪلچر انڪم ٽئڪس نه هڻڻ جاگيردارن کي تحفظ مليل آهي، متحده جڏهن زرعي ٽئڪس لڳائڻ جي ڳالهه ڪئي ته چيو ويو اها ٻهراڙين خلاف ڳالهه آهي، حقيقت ۾ تجويز ڏني هئي ته هارين بدران رڳو زميندارن کان ٽئڪس اوڳاڙيو وڃي.مخالف ڌر جي اڳواڻ جو چوڻ هو ته هتي 92 سيڪڙو اڻ سڌا ٽيڪس لڳايا ويا آهن، رڳو 8 سيڪڙو سڌا ٽيڪس لڳايا ويا آهن، اهڙي ريت عوام کي رليف نه ملندو. هن چيو ته ٽئڪسز جو سمورو بار عام ماڻهو تي پوي ٿو. خواجه اظهار الحسن جو چوڻ هو ته گذريل مالي سال سنڌ سرڪار بجلي جي بلن سان گڏ 4 ارب رپيا اوڳاڙيا، هن سال اهو هدف 5 ارب رپيا لڳايو ويو آهي. هن چيو ته سرڪار بلڊرز ۽ ڪميشن ايجنٽن کان به ٽئڪس پئي اوڳاڙي جيڪا رڳو شهري علائقن مان وصول ڪئي ويندي. خواجه اظهارالحسن جو چوڻ هو ته 7 سالن ۾ سنڌ سرڪار کي 4 هزار 96 ارب رپيا ترقياتي رٿائن لاءِ مليا، جنهن سان سنڌ جي تقدير بدلجي پئي سگهي، پر هتي ان جو استعمال ڪيئن ٿيو، سڀني کي خبر آهي. مخالف ڌر جي اڳواڻ جو چوڻ هو ته اوهان چئو ٿا ته بجيٽ ۾ رقم گهٽ آهي، جڏهن ته سنڌ جي بجيٽ گڏيل قومن ۾ رجسٽرڊ 50 ملڪن کان وڌيڪ آهي. هن چيو ته اوهان چئو ٿا ته وفاق پئسا نه ٿو ڏئي، 5 سالن دوران اوهان جي وفاق ۾ حڪومت هئي، اوهان ڇا ڪيو؟ خواجه اظهار الحسن جو چوڻ هو ته تعليم ، صحت ۽ ٻين کاتن ۾ غيرقانوني مقرريون ٿيون آهن جيڪڏهن انهن جوليٽر ڏيکاريم ته ٻڌايو وڃي ته استيعفيٰ ڪير ڏيندو. هن چيو ته اسپتالن ۾ دوائون ۽ انفرا اسٽڪچر جي نالي وڏي رقم رکي ويندي آهي پر خبر ناهي اها ڪيڏانهن پئي وڃي. مخالف ڌر جي اڳواڻ جو چوڻ هو ته سنڌ ۾ ڊولپمنيٽ، هيلٿ، زراعت بابت پاليسيون انتهائي خراب آهن. هن چيو ته ملازمن جي پگهار گهٽ وڌائي وئي آهي، 10 سيڪڙو واڌ مان 20 سيڪڙو ڪئي وڃي. خواجه اظهار الحسن جو چوڻ هو ته کين اها به ڄاڻ آهي ته سنڌ جي سيڪريٽرين جي دبئي، سعودي عرب ۽ ٻين ملڪن ۾ ملڪيتون آهن. هن چيو ته ڪراچي ۾ 160 غير قانوني هائڊرنس آهن ۽ ان مان اندازو لڳايو ته دهشتگردي تي ڪيتري رقم خرچ ٿيندي هوندي. خواجه اظهار الحسن جو چوڻ هو ته ٿر ڏڪار معاملو هجي، يا ڪرپشن، صحت جون  سهولتون هجن يا ڪو ٻيو معاملو هر شئي لاءِ عدالت ٿو وڃڻو پوي. مخالف ڌر جي اڳواڻ چيو ته صوبن ۾ ويهي وفاق کي للڪاريو ويندو آهي پر ڇا اسيمبلي ۾ ويهي ضلعن جو آواز نه ٿو ٻڌي سگهجي؟

 

بالي ووڊ جي خانن شاهه رخ ۽ سلمان خان جي فلمن ”رئيس ۽ سلطان“ جو مقابلو ايندڙ سال عيد تي ٿيندو

ممبئي (شوبز نيوز) بالي ووڊ جي خانن شاهه رخ ۽ سلمان خان جي فلمن ”رئيس ۽ سلطان“ جو مقابلو ايندڙ سال عيد تي ٿيندو، يش راج بينر هيٺ ٺهندڙ فلم ”سلطان“ جي بانيڪار ٽوئيٽ ۾ چيو ته ”سلطان“ جي رليز جو بهتر وقت سال 2016ع جي عيد آهي، مداحن جي وڏي انگ ان ٽوئيٽ کي پسند ڪيو ۽ چيو ته اها ڪا راند ناهي، جو ٻنهي خانن جي فلمن جو ڪو مقابلو ٿيندو، ليکڪ ۽ هدايتڪار علي عباس ظفر جي فلم ”سلطان“ جو پڙاڏو ميڊيا تي ڪجهه هن لاءِ به رهيو ته ان ۾ ليڊ اداڪارا لاءِ پهرين دپيڪا پڊڪون ۽ بعد ۾ ڪنگنا راناوت انڪار ڪيو هو. پر بعد ۾ اهو چيو ويو ته فلم لاءِ ڪيرتي سينن کي آخري ڪاسٽ ڪيو ويو آهي، فلمي پنڊتن موجب اهو پهريون ڀيرو هوندو جو ڪنهن فلم جي شوٽنگ کان پهرين ان جي رليز جي تاريخ ٻڌائي وئي هجي. ٻئي پاسي علي عباس رضوي سان ”گُنڊي“ ۾ گڏ ڪم ڪندڙ اداڪارن رنوير سنگهه ۽ ارجن ڪپور به ”سلطان“بابت نيڪ خواهشن جو اظهار ڪندي ٽوئيٽر اڪائونٽ تي چيو ته علي عباس ظفر هڪ بهترين هدايتڪار آهي ان لاءِ دعا آهي ته ”سلطان“ڪامياب ترين فلم هجي.

 

ڳائڻ جو ننڍپڻ کان ئي شوق هو پر وقت ۽ حالتن سبب ڳائڻ جي تربيت نه وٺي سگهيس: راڌيڪا

ممبئي (شوبز نيوز) بالي ووڊ ۾ بدلاپور فلم ذريعي نالو ٺاهيندڙ اداڪارا راڌيڪا آپٽي به عاليه ڀٽ ۽ شرڌا ڪپور جي پيرن تي هلندي فلمن ۾ اداڪاري سان ڳائڻ لاءِ ڪلاس وٺڻ جو فيصلو ڪيو آهي، ان ڏس ۾ هن هڪ ٽرينر به مقرر ڪيو آهي، اداڪارا موجب کيس ڳائڻ جو ننڍپڻ کان ئي شوق هو پر وقت ۽ حالتن سبب هو ڳائڻ جي تربيت نه وٺي سگهي، هن چيو ته سندس ڏاڏي پڻ هڪ ڳائڻي هئي، جيڪا کيس ننڍپڻ ۾ موسيقي جا ٻه ڪلاڪ ڏيندي هئي. هن چيو ته ممبئي شفٽ ٿيڻ کان پوءِ فلمن جي مصروفيتن سبب ڳائڻ جا ڪلاس جاري نه رکي سگهي هئي. راڌيڪا آپٽي چيو ته کيس چڱي ريت ياد آهي ته جڏهن ننڍپڻ هن جي ڏاڏي موسيقي جو سبق ڏيندي هئي. هن چيو ته ايندڙ فلمن تائين پنهنجو آواز بهتر ڪرڻ چاهيان ٿي، ياد رهي ته سندس ايندڙ فلم ”بمبوريا“ آهي

 

ٽِي سيريز جي نئين ايندڙ فلم ”صنم ري“ جو پوسٽر جاري

نئين دهلي (شوبز نيوز) ٽِي سيريز جي نئين ايندڙ فلم ”صنم ري“ جو پوسٽر جاري ڪيو ويو آهي، سماجي رابطن جي ويب سائيٽ ٽوئٽر تي فلمي پنڊت ترن آدرش اداڪارا يامي گوتم ۽ پلڪت سمراٽ جي فلم جو پوسٽ جاري ڪيو. آدرش لکيو ته ٽي سيريز جي ”صنم ري“ جي پوسٽر جون تصويرون، يامي گوتم، اروشي روتيلا، ڪوسل ڪمار ان جي ڊائريڪشن ڪئي آهي. فلم جي پوسٽر ۾ پلڪت سمراٽ ”ماچو مين“ نظر اچي رهيو آهي جڏهن ته يامي گوتم 80ع جي ڏهاڪي دوران ٺهندڙ فلمن وارين هيروئنن جھڙي در جي اوٽ ۾ بيٺل شرمائي رهي آهي. ”صنم ري“ کي دويا ڪوسلا ڪُمار ڊائريڪٽ ڪيو آهي.

 

مشهور فلم ٽائٽينڪ جي موسيقي تخليق ڪندڙ موسيقار جيمز هارنر فوت

لاس اينجلس(شوبز نيوز) آنجهاني جيمز هارنر ٽائيٽينڪ کانسواءِ بريو هارٽ، اوتارا، اسٽار ٽيڪ ۽ ٽرائي جهڙين مشهور فلمن  کي دل ڇهندڙ موسيقي ڏني.هالي ووڊ جي ليجينڊري موسيقار جيمز هارنر هڪ هوائي حادثي ۾ مارجي ويو.پرڏيهي خابرو اداري مطابق 61 سالن جي جهاز کي حادثو ساتنا باربرا جي علائقي ۾ پيش آيو. ذريعن مطابق هارنر پاڻ جهاز هلائي رهيو هو.1997ع ۾ جيمز هارنر کي فلم ٽائيٽينڪ  جي خوبصورت موسيقي ڏيڻ جو اعزاز حاصل هو جنهن تي کيس آسڪر ايوارڊ پڻ مليو.هڪ اندازي مطابق ان مشهور گيت جون 27 ملين کان وڌيڪ ڪاپيون وڪرو ٿي چڪيون آهن.هڪ ڀيرو هڪ انٽرويو ۾ جيمز هارنر جو چوڻ هو ته موسيقي منهنجي زندگي آهي. مان هميشا اهڙو ڪم ڪرڻ جي ڪوشش ڪندو آهيان جيڪو ماڻهن جي دلين کي ڇهي.

 

سريلنڪا کي ميچ جي پنجين ڏينهن 10 وڪيٽن تان ڳري شڪست ڏيڻ کان پوءِ پاڪستاني ٽيم جو اعتماد مٿانهون

ڪولمبو (اسپورٽس نيوز) پاڪستاني ڪرڪيٽ ٽيم پهرين ٽيسٽ ميچ ۾ فتح کان پوءِ خميس کان ڪولمبو ۾ شروع ٿيندڙ ٻين ٽِسٽ ميچ کٽي 9 سالن کان پوءِ سريلنڪا خلاف سيريز کٽڻ لاءِ پرعزم آهي. گال ٽيست ميچ جا چار سيشن برسات جي وَر چڙهي وڃڻ کان پوءِ سريلنڪا کي ميچ جي پنجين ڏينهن 10 وڪيٽن تان ڳري شڪست ڏيڻ کان پوءِ پاڪستاني ٽيم جو اعتماد مٿانهون آهي. پاڪستان کي سريلنڪا ۾ گذريل ٽِنهي سيريزن ۾ شڪستن سان منهن ڏيڻو پيو هو، جتي آخري ڀيرو ملڪي ٽيم 2006 ۾ 1-0 سان سيريز پنهنجي نالي ڪئي هئي. پر پاڪستان جي لاءِ سيريز پنهنجي نالي ڪرڻ جي لاءِ اوول جي تاريخي ميدان کان بهتر ڪا جڳهه نٿي ٿي سگھي، جتي سريلنڪا 1982ع ۾ انگلينڊ خلاف پهريون ٽيسٽ ميچ کيڏيو هو. ڪولمبو جي اوول اسٽيڊيم جي پچ بيٽنگ ۽ بالنگ لاءِ سازگار هجڻ ڪري سريلنڪا جي سڀ کان بهترين پچ تصور ڪئي ويندي آهي ۽ 2005ع کان هيل تائين ان ميدان تي 8 ٽيسٽ ميچون نتيجن واريون ثابت ٿيون. پاڪستان هاڻي به ان گرائونڊ تي 2009ع ۾ کيڏيل پنهنجي آخري ميچ ۾ شڪست سان منهن ڏيڻو پيو هو، پر ماضيءَ کي وساري ٽيسٽ ميچ جي شاندار ڪارڪردگي ٻي ميچ ۾ به دهرائڻ جو خواهشمند آهي. پهرين ٽيسٽ ميچ ۾ پاڪستان پهريان بالنگ جو فيصلو ڪيو هو ۽ سريلنڪا 300 رنسون ٺاهي آئوٽ ٿي وئي هئي، پر جواب ۾ پاڪستاني ٽيم جا صرف 96 رنسن تي پنج وڪيٽون ڪري پيون هيون ۽ ٽيم ڏکيائين کي منهن ڏنو هو. پر 96 رنسون ٺاهيندڙ سرفراز احمد ۽ 131 رنسن جي اننگ کيڏندڙ اسد شفيق 139 رنسن جي ڀائيواري جوڙي پاڪستان کي پهرين اننگ ۾ 117 رنسن جي سرسي ڏياري هئي. جڏهن ته ٻي اننگ ۾ ياسر شاهه سريلنڪن صفن کي ٽوڙي ڇڏيو هو ۽ 76 رنسن عيوض 7 وڪيٽون وٺي 206 رنسون تي ميزبان ٽيم کي آئوٽ ڪيو هو. پاڪستان جي فتح ۾ بالرن جو وڏو حصو هو. هيراٿ 2014 ۾ پاڪستان پاران سريلنڪن دوري ۾ پاڪستان خلاف ٻِن ٽيسٽبن جي سيريز ۾ 2-0 سان فتح ۾ مرڪزي ڪردار ادا ڪندي 23 وڪيٽون ورتيون هيون. هيراٿ جو جادوهيل هلڻ نه ڏنو ويو. ايندڙ ٽيسٽ جي لاءِ پاڪستان ۾ ٻِن تبديلين جي امڪان آهن،

 

ملڪي ٽيم جو آل رائونڊر حارث سهيل پريڪٽس سيڪشن دوران زخمي

ڪولمبو (اسپورٽس نيوز) ملڪي ٽيم جو آل رائونڊر حارث سهيل پريڪٽس سيڪشن دوران زخمي ٿي پيو، جنهن کان پوءِ انجريءَ جي صورتحال کي نظر ۾ رکندي ٽيم مئنيجمينٽ پاران کيس ڏيهه ورائڻ جو فيصلو ڪيو ويو هو. خابرو اداري جي رپورٽ موجب ڪولمبو ٽيسٽ جي لاءِ پريڪٽس ڪئمپ دوران مڊل آرڊر بيٽمين حارث سهيل گوڏي جي انجريءَ جو شڪار ٿي ويو هو، جنهن کي فوري طور طبي مدد جي لاءِ گرائونڊ کان ٻاهر موڪليو ويو. ذريعن موجب حارث سهيل جي انجريءَ سخت قسم جي آهي ۽ هو ڪولمبو ٽيسٽ ۾ ٽيم جو حصو نه بڻجي سگھندو ان جي لاءِ کيس جلد ڏيهه ورڻ جي لاءِ چيو ويو آهي.

 

آل رائونڊر محمد حفيظ جو بالنگ ٽيسٽ پهرين جولاءِ تي چناءِ ۾ رٿيل

لاهور (اسپورٽس نيوز) پاڪستان ڪرڪيٽ ٽيم جي آل رائونڊر محمد حفيظ جو بالنگ ٽيسٽ پهرين جولاءِ تي چناءِ ۾ رٿرائي وئي آهي. گال ٽيسٽ امپائرن پاران اعتراض ڪرڻ کان پوءِ ريفري ڪرس براڊ طرفان محمد حفيظ جو بالنگ ايڪشن شڪي قرار ڏئي آءِ سي سيءَ کي رپورٽ ڪئي وئي هئي، جنهن جي ڪري هاڻي محمد حفيظ کي هڪ ڀيرو ٻيهر بالنگ ايڪشن جي ٽيسٽ پاس ڪرڻي پوندي. ياد رهي ته ورلڊڪپ کان اڳ به محمد حفيظ جي بالنگ جو ايڪشن شڪي قرار ڏئي مٿس پابندي هنئي وئي هئي، پر محمد حفيظ بالنگ جي ٽيسٽ ڪليئر ڪرائي ورتي هئي.

 

ڀارت جي خلاف ون ڊي سيريز کٽي بنگلاديش آءِ سي سي ون ڊي رينڪنگ ۾ ستي پوزيشن مضبوط ڪري چيمپئنز ٽرافي جي لاءِ ڪوليفاءِ ڪري ورتو

ڍاڪا (اسپورٽس نيوز) ڀارت جي خلاف ون ڊي سيريز کٽي بنگلاديش آءِ سي سي ون ڊي رينڪنگ ۾ ستي پوزيشن مضبوط ڪري چيمپئنز ٽرافي جي لاءِ ڪوليفاءِ ڪري ورتو آهي، پر ٽورنامينٽ جي 8 ٽيم جي لاءِ پاڪستان ۽ ويسٽ انڊيز وچ ۾ مقابلو آهي، جنهن کان پوءِ اٺين ٽيم جو فيصلو ٿيندو. خابرو ايجنسي موجب آءِ سي سي چيمپئنز ٽرافي 2017ع جي فارميٽ پهرين سيپٽمبر 2015 تائين رينڪنگ ۾ اڳتي رهندڙ اٺ ٽيمون شرڪت ڪنديون. تازي ون ڊي رينڪنگ ۾ عالمي چيمپئن آسٽريليا پهرئين نمبر تي آهي، جڏهن ته نيوزيلينڊ کان سيريز هارائڻ کان پوءِ ڀارت جي ٻين پوزيشن بحال ٿي وئي ۽ ڪيويز ٽئين نمبر تي هلي وئي. ڏکڻ آفريڪا چوٿين، سريلنڪا پنجين پوزيشن تي آهي. ڪيويز کان سيريز جي فاتح انگلش ٽيم جي ڇهين پوزيشن آهي. بنگال ٽائيگرن پهريون ڀيرو ڀارت خلاف سيريز ۾ 2-0 جي فيصلائتي سرسيءَ کان پوءِ 99 پوائنٽن سان ستين پوزيشن مضبوط ڪري ورتي آهي ۽ چيمپئنز ٽرافيءَ جي لاءِ ڪوليفاءِ ڪري ورتو آهي. ڀارت جي مقابلي ۾ ڪلين سوئيپ سبب بنگلاديش جون پوائنٽون 96 ۽ ڀارت جون 113 ٿي وينديون، جڏهن ته ڀارت جي فتح سان بنگال ٽائيگر 93 ۽ ڌوني اليون 114 پوائنٽن سان نمبر 2 ۽ ستين تي اچي ويندي. چيمپئنز ٽرافي جي لاءِ اٺين ٽيم جي لاءِ هاڻي پاڪستان ۽ ويسٽ انڊيز ۾ مقابلو آهي. ويسٽ انڊيز 88 پوائنٽن سان اٺين ۽ پاڪستان هڪ پوائنٽ جي فرق سان نائين نمبر تي آهي.