تازيون خبرون

Daily Archives: June 25, 2015

سنڌ ۾ گرمي وڌيڪ 114 ماڻهون ڳڙڪائي وئي، انگ 900 کان وڌي ويو

ڪراچي (اسٽاف رپورٽر) ڪراچي ۾ گرمي وگهي وڌيڪ هڪ سئو ماڻهن جي فوت ٿيڻ کان پوءِ انگ وڌي 856 ٿي ويو آهي، سنڌ جي ٻين علائقن ۾ اڄوڪي ڏينهن ۾ 14 ڄڻن جي فوت ٿيڻ کان پوءِ انگ 62 کان وڌي ويو آهي. ڪراچي ۾ پنجين ڏينهن به گرمي جو زور نه ٽٽو آهي رات 12هين کان هن وقت تائين مختلف اسپتالن ۾ هڪ سئو ماڻهن جون حياتيون کسجي ويون. ڪورنگي جي سنڌ گورنمينٽ اسپتال ۾ 14 ماڻهن دم ڏنو جڏهن ته سنڌ گورنمينٽ نيو ڪراچي جي اسپتال ۾ 8 ماڻهن جي ساهه جو سڳو ٽٽي ويو. جناح اسپتال ۾ 59 ۽ سول اسپتال ۾ 15 ماڻهن دم ڏنو. گرم سبب لياقت آباد جي اسپتال ۾ 6 ماڻهن دم ڏنو. قهر جي گرمي دوران 5 ڏينهن دوران رڳو ڪراچي ۾فوتين جو انگ وڌي856 ٿي ويو آهي، جڏهن ته مختلف اسپتالن ۾ داخل سوين ماڻهن مان ڪيترن ئي ڄڻن جي حالت خراب هجڻ سبب فوتين جو انگ وڌڻ جو خدشو ظاهر ڪيو پيو وڃي. گذريل 5 ڏينهن دوران ڪراچي جي جناح اسپتال ۾ گرمي سٽيل  497 ،سول اسپتال ۾ 96، عباسي شهيد اسپتال ۾84، لياري جنرل اسپتال ۾ 22 ، ڪورنگي اسپتال ۾ 2 ڄڻا، سعود آباد اسپتال ۾ 3،سنڌ ميڊيڪل اسپتال لياقت آباد ۾ 31 ڄڻا ۽ خانگي اسپتالن ۾ ڪيترائي ماڻهو گرميءَ جي سٽ نه سهندي دم ڏنو. گرمي سٽيل سوين ماڻهن کي ڪراچي جي مختلف اسپتالن ۾ داخل ڪيو ويو آهي، جڏهن ته ڪيترن ئي اسپتالن ۾ مريضن کي داخل ڪرڻ جي گنجائش پڻ نه رهي آهي. حيدرآباد جي مختلف اسپتالن ۾ لطيف آباد 6 واسي اڪبر، لطيف آباد 12 جو شهزاد، گول بلڊنگ واسي منور، گرو نگر واسي عبدالڪريم ۽ ڪوٽڙي واسي معظم علي فوت ٿي ويا. حيدر آباد جي مختلف علائقن ۾  وڌيڪ 5 ڄڻن جي فوت ٿيڻ کان پوءِ پنجن ڏينهن دوران فوت ٿيلن جو انگ وڌي 29 ٿي ويو آهي. ٺٽي جي سول اسپتال ۾ 62 ورهين جو محمد حسن پٽيل ۽ ڳوٺ امام بخش ۾ مسمات آمي مڱڻهار دم ڏنو. جاتي جي وارڊ نمبر چار ۾ گرمي سبب پيرسن محمد اسلم تهمور فوت ٿي ويو. سيراڻي ۾ گرمي سبب 2 عورتون اسپتال داخل ڪيون ويون جن رات دير سان دم ڏنو. پڊ عيدن جي ڳوٺ چيهو ۾ 60 ورهين جو نظر مڱڻهار فوت ٿي ويو، جڏهن ته ٺل جي چانڊاڻ ڳوٺ ۾ 60 ورهين جي نواب خاتون ٻرڙو حياتي وڃائي ويٺي. ٺارو شاهه جي وارڊ نمبر ۾ ٻه ۾ 22 ورهين جي شبنم سومرو ۽ 30 ورهين جي خاتون سولنگي فوت ٿي ويون جڏهن ته مختلف علائقن ۾ پنج ماڻهو بيهوش ٿي ويا. ڇاڇري جي مختلف علائقن ۾ عورتن سميت 12 ماڻهو گرمي سبب بيهوش ٿي ويا جن کي اسپتال  منتقل ڪيو ويو.

 

سنڌ حڪومت جو لوڊشيدنگ خلاف ڌرڻو، سنڌ ۾ فوتگين جو ذميوار وفاق قرار

ڪراچي (اسٽاف رپورٽر) سنڌ جي وڏي وزير سيد قائم علي شاهه جي اڳواڻي ۾ ڪراچي سميت سموري سنڌ ۾ وفاق ۽ ڪي اليڪٽرڪ پاران اڻ اعلانيل لوڊ شيڊنگ خلاف سنڌ اسيمبلي ٻاهران ڌرڻو هڻي احتجاج ڪيو ويو. ڌرڻي ۾ مخالف ڌر کانسواءِ سينئر وزير نثار کهڙو، شرجيل انعام ميمڻ ، ڊپٽي اسپيڪر سيدا شهلا رضا، سيد مراد علي شاهه ، ڊاڪٽر سڪندر مينڌرو ۽ ٻين شرڪت ڪئي. ان موقعي تي عورت ايم پي ايز جو به وڏو تعداد موجود هو، جيڪي وفاقي حڪومت جي خلاف نعريبازي ڪري رهيون هيون. ڌرڻي کي خطاب ڪندي سنڌ جي وڏي وزير سيد قائم شاهه سموري سنڌ ۾ لوڊشيڊنگ سبب فوت ٿيلن جو ذميواروفاق کي قرار ڏيندي چيو ته پاڻي ۽ بجلي جو وفاقي وزير خواجا آصف فوتين لاءِ معاوضي جو اعلان ڪري . هن مطالبو ڪيو ته خواجا آصف ذميداري محسوس ڪندي پنهنجي عهدي تان استعيفا ڏئي. وڏي وزير چيو ته وفاق سنڌ کي گهربل بجلي فراهم ڪرڻ ۾ مڪمل طور تي ناڪام ٿيو آهي. هن چيو ته رمضان شريف جهڙي ڀلاري مهيني ۾ به سموري سنڌ جي بجلي بند آهي، جنهن ڪري قيمتي جانيون ضايع ٿيون آهن. وڏي وزير چيو ته سندن صبر جو پيمانو ختم ٿي ويو آهي، ان کان اڳ جو عوام رستن تي نڪري اچي ، وفاقي حڪومت کي گهرجي ته اها سندن احتجاج جو نوٽيس وٺندي سنڌ سان امتيازي سلوڪ ختم ڪري . ان موقعي تي ايم پي ايز جينا هوگا، مرنا هوگا،ڌرنا هوگا، ڌرنا هوگا،سنڌ کي بجلي ۽ سنڌ کي پاڻي ڏيو جا نعرا هڻي رهيا هئا.

 

ايم ڪيو ايم جي ٻن اڳواڻن ڀارتي حڪومت کان مالي مدد ملڻ جو اعتراف ڪري ورتو: بي بي سي جي دعويٰ

لنڊن(م.ڊ) برطانوي نشرياتي اداري بي بي سي پنهنجي رپورٽ ۾ دعويٰ ڪئي آهي ته ايم ڪيو ايم جي ٻن اڳواڻن برطانوي اختيارين جي سامهون اهو قبوليو آهي ته کين ڀارت پاران مالي مدد ملندي رهي آهي.رپورٽ مطابق ڀارت کان مالي مدد ملڻ جو اعتراف لنڊن ۾ رهندڙ ايم ڪيو ايم جي ٻن سينئير اڳواڻن 2012ع ۾ پوليس کي رڪارڊ ڪرايل هڪ بيان ۾ ڪيو. بي بي سي جي رپورٽ مطابق ايم ڪيو ايم جي خلاف مني لانڊرنگ جي جاچ ڪندڙ برطانوي اختيارين کي ايم ڪيو ايم جي هڪ اڳواڻ جي گهران 2013ع ۾ هڪ ڇاپي دوران هٿيارن ۽ ڌماڪو ڪندڙ مواد جي هڪ فهرست به ملي آهي. رپورٽ ۾ چيو ويو آهي ته ڄاڻايل ڇاپي دوران مليل فهرست ۾ ورتل هٿيار ۽ پئسا امڪاني طور تي ڪراچي ۾ استعمال ٿيڻا هئا.رپورٽ مطابق پاڪستاني اختيارين بي بي سي کي ٻڌايو آهي ته ڀارت گذريل ڏهن سالن دوران ايم ڪيو ايم جي سوين انتها پسندن کي تربيت به ڏني.ڀارتي اختيارين ان دعويٰ کي بي بنياد قرار ڏئي ڇڏيو آهي ،جڏهن ته ايم ڪيو ايم ان تي بحث يا تبصرو ڪرڻ کان انڪار ڪري ڇڏيو آهي.اها دعويٰ اپريل ۾ ڪراچي جي هڪ سينئير پوليس آفيسر جي ان بيان کان پوءِ سامهون آئي آهي جنهن ۾ ايم ڪيو ايم جي ڪارڪنن جي ڀارت ۾ تربيت جي دعويٰ ڪئي وئي هئي.اپريل ۾ ڪراچي پوليس جي سينئير آفيسر رائو انوار ميڊيا جي سامهون ٻن ماڻهن کي پيش ڪندي ٻڌايو هو ته ڪهڙي ريت ٻئي ماڻهو ٿائيلينڊ ذريعي ڀارت پهتا جتي هنن ڀارتي انٽيليجينس اداري“را” کان تربيت ورتي هئي.

 

آئين رياست آهي، انڪار نٿو ڪري سگهجي: سپريم ڪورٽ

اسلام آباد (بيورو) سپريم ڪورٽ ۾ فوجي عدالتن خلاف درخواستن جي ٻڌڻي دوران پابندي مڙهيل تنظيم تحريڪ طالبان جي اڳواڻ فضل الله سوڌو مختلف اڳواڻن جي وڊيو پيش ڪئي وئي، اٽارني جنرل آف پاڪستان جو چوڻ آهي ته رياست خلاف جنگ جو اعلان ڪندڙن جو ٽرائل فوجي عدالتن ۾ ٿيڻ گهرجي ،دهشتگرد پاڪستان ۽ رياست کي تسليم نٿا ڪن،تنهن ڪري دهشتگرد ڪنهن بنيادي حقن جو حقدار نه آهي، چيف جسٽس ناصر الملڪ جي سربراهي ۾ سپريم ڪورٽ جي فل ڪورٽ بئنچ 18هين ۽ 21هين آئيني ترميمن خلاف درخواستن جي ٻڌڻي ڪئي، ٻڌڻي دوران اٽارني جنرل فضل الله سميت پابندي مڙهيل تحريڪ طالبان جي اڳواڻن جون مختلف وڊيوز پيش ڪيون ،جن ۾ پاڪستان خلاف اعلان جنگ ڪيو پيو وڃي، جڏهن ته فوج خلاف مختلف هٿياربند ڪارروايون به ڏيکاريون ويون آهن ،اٽارني جنرل چيو ته وڊيوز مان ثابت ٿئي ٿو ته رياست خلاف جنگ جو اعلان ٿي چڪو آهي، شدت پسندن کي آرمي ايڪٽ جي دائري ۾ آڻڻ لاءِ آئيني ترميم ڪئي وئي، جسٽس قاضي فائز عيسيٰ پڇاڻو ڪيو ته اهڙي صورتحال ۾ رياست ڇا ڪري رهي آهي؟ ڇا رياست داعش کي دهشتگرد تنظيم قرار ڏنو؟ ڇا ڪنهن کي امير المومنين يا خليفو قرار ڏيڻ تي ڏوهه چيو ويو؟ جيڪڏهن ايئن آهي ته نوٽيفڪيشن پيش ڪيا وڃن، دهشتگردن جي ٽرائل جو طريقو موجود آهي، اهو استعمال ڇو نٿو ڪيو وڃي؟ ڇا وڊيوز ۾ ڏيکاريل ماڻهن خلاف ڪيس داخل ڪيا ويا ؟ جسٽس جواد ايس خواجه چيو ته روزانو ملڪ ۾ تشدد جا واقعا ٿي رهيا آهن، پاڪستان ۾ پهرين ته ايئن نه هو. جسٽس جواد چيو ته پاڪستان خلاف جنگ ڪندڙن خلاف ڪارروائي ضرور ٿيڻ گهرجي، ڪنهن کي ڪو شڪ نه هجڻ گهرجي، پاڪستان هميشه قائم رهڻو آهي، ٻڌايو وڃي ته دهشتگرد ڪٿان آيا ۽ ان جو ذميوار ڪير آهي؟ اٽارني جنرل چيو ته ان ڪئميرا ٻڌڻي ۾ سموريون حقيقتون پيش ڪري سگهجن ٿيون،21هين ترميم ۾ دهشتگردن جا بنيادي حق ختم ڪيا ويا. جسٽس ثاقب نثار چيو ته پاڪستان آهي ته آئين آهي، جسٽس جواد ايس خواجه ريمارڪس ڏنا ته هر طرف تشدد ڏسي رهيا آهيون، ڪا اسٽڊي ڪرائي وئي ته اهي ماڻهو ڪٿان آيا؟ هتي کين آڻڻ وارو ڪير آهي؟ وڊيو ۾ ڏيکاريل ماڻهو گرفتار نه ٿيندا ته انهن جو ٽرائل ڪيئن ٿيندو؟ هن چيو ته آئين رياست آهي، ان کي پٺي نٿي ڏئي سگهجي، عدالتون انهيءَ لاءِ آهن ته آئين کي پٺي نه ڏين، ان کانپوءِ ٻڌڻي خميس ڏينهن (سڀاڻي) تائين ملتوي ڪئي وئي.

 

وزيراعظم سان اسٽريٽجڪ پلانز ڊويزن ڊي جي مظهر جميل جي ملاقات. ائٽمي، ميزائل ۽ خلائي پروگرام متعلق معاملن تي ويچار

اسلام آباد (بيورو) وزيراعظم نواز شريف دفاعي صلاحيت کي مضبوط ڪرڻ ۾ اسٽريٽجڪ پلانز ڊويزن جي ڪردار جي واکاڻ ڪندي چيو آهي ته پاڪستان جي دفاعي صلاحيتن کي مستحڪم بنائڻ ۾ ايس پي ڊي جو ڪردار اهم آهي. وزيراعظم نواز شريف سان اسٽريٽجڪ پلانز ڊويزن ڊي جي ليفٽيننٽ جنرل مظهر جميل ملاقات ڪئي. ملاقات ۾ پاڪستان جي ائٽمي، ميزائل ۽ خلائي پروگرام متعلق معاملن تي ويچاريو ويو. ليفٽيننٽ جنرل مظهر جميل اهم ذميداري سونپڻ ۽ اعتماد تي وزيراعظم جو شڪريو ادا ڪيو. وزيراعظم نواز شريف چيو ته پاڪستان جي دفاعي صلاحيتن کي مستحڪم بنائڻ ۾ ايس پي ڊي جو ڪردار اهم آهي، اميد آهي اوهان جي ڪمان ۾ ڊويزن پنهنجو ڪم جاري رکندي. وزيراعظم نواز شريف اسٽريٽجڪ پلانز ڊويزن طرفان اهم تنصيبات جي سيڪيورٽي ۽ سيفٽي جي ميڪنزم کي به ساراهيو.

 

بينظير قتل ڪيس: سرڪاري ڌر جا 15 شاهد غيرضروري قرار، بيان نه وٺڻ جو فيصلو

راولپنڊي (م.ڊ) راولپنڊي جي دهشتگردي ٽوڙ عدالت شهيد محترما بينظير ڀٽو جي قتل ڪيس ۾ سرڪاري ڌر جي 15 شاهدن کي غيرضروري قرار ڏيندي سندن شاهدي وٺڻ جو فيصلو ختم ڪري ڇڏيو. شهيد بينظير ڀٽو قتل ڪيس جي ٻڌڻي دهشتگردي ٽوڙ عدالت جي جج راءِ محمد ايوب خان اڊيالا جيل ۾ ڪئي. ٻڌڻي دوران عدالت سرڪاري ڌر جي 15 شاهدن کي اجائي ۽ غيرضروري قرار ڏيندي چيو ته انهن جا بيان نه ورتا ويندا.عدالت وڌيڪ شاهدن کي ايندڙ ٻڌڻي تي پيش ٿيڻ جا سمن جاري ڪندي ڪارروائي 29 جون تائين ملتوي ڪري ڇڏي.

 

حڪومت ڪي اليڪٽرڪ کي ٽيڪ اوور ڪري يا بند ڪري ته حمايت ڪئي ويندي: خورشيد شاهه

اسلام آباد (بيورو) اپوزيشن ليڊر خورشيد شاهه چيو آهي ته حڪومت ڪي اليڪٽرڪ کي ٽيڪ اوور ڪري يا بند ڪري ته حمايت ڪئي ويندي، جڏهن ته هي وقت سياست ڪرڻ جو نه پر گرمي وگهي ٿيندڙ فوتگين کي روڪڻ جو آهي، حڪومت واڻئي واري بندي کڻي ليکي ڪرڻ بدران بحران کي حل ڪري. قومي اسيمبلي ۾ حڪومتي تنقيد جي جواب ۾ خورشيد شاهه ڳالهائيندي چيو ته سنڌ ۾ خاص ڪري ڪراچي اندر گرمي وگهي هزار-ٻارنهن سئو ماڻهو فوت ٿيا آهن، جيڪو افسوس جوڳو امر آهي. هن چيو ته حڪومت دعوائون ڪري رهي آهي ته بجلي جي بحران تي 2018 تائين ضابطو آندو ويندو، جيڪڏهن ايئن ٿيو ته اها حڪومت جي وڏي ڪاميابي هوندي، جيڪا کيس ايندڙ چونڊن ۾ به سوڀ ڏياريندي پر هي وقت سياست جو نه پر گرمي وگهي فوت ٿيندڙ انسانن سان همدردي ۽ انهن کي بچائڻ لاءِ اپاءُ وٺڻ جو وقت آهي. هن چيو ته حڪومت واڻئي واري بندي کڻي ليکي ڪرڻ بدران بجلي ڏئي ۽ ان تي سبسڊي ڏئي هر ماڻهو جي بجلي تائين رسد کي يقيني بڻائي. خورشيد شاهه چيو ته جمهوريت لاءِ محبت جو تعلق جوڙيو آهي، جيڪو برقرار رهي ته بهتر آهي، ڇاڪاڻ ته ڪجهه قوتون انهي ئي انتظار ۾ آهن ته سياستدان هڪٻئي ۾ هٿ وجهن. هن چيو ته پيپلز پارٽي جي ماضي وارين حڪومتن کي به اڌ ۾ ختم ڪيو ويو، پيپلز پارٽي نه ٿي چاهي ته حڪومت وقت کان اڳ رخصت ٿئي ۽ اها ڳالهه اسان مختلف وقتن تي ثابت به ڪندا رهيا آهيون. خورشيد شاهه چيو ته ماضي ۾ حڪومت تي جيڪي به ڏکيا مرحلا آيا، ان ۾ ملڪ جي سموري سياسي قيادت اپوزيشن ۽ مختلف فڪر جي ڌرين حڪومت جو ساٿ ڏنو ته جيئن جمهوريت مضبوط ٿئي. خورشيد شاهه ڪيترائي ڀيرا هٿ جوڙي اسپيڪر کي عرض ڪندو رهيو ته بجلي بنا ليکي ماڻهن کي ڏئي گرمي وگهي کين مرڻ کان بچايو وڃي.

 

ڪراچي ۾ گرمي سبب فوتگين جي ذميوار وفاقي حڪومت نه آهي: خواجه آصف

اسلام آباد (بيورو) پـاڻـِي ۽ بجلي واري وفاقي وزير خواجه آصف چيو آهي ته ڪراچي ۾ گرمي سبب فوتگين جي ذميوار وفاقي حڪومت نه آهي، هر معاملي تي وفاق کي ذميوار قرار ڏنو ويندو ته پوءِ صوبا ڇا ڪندا، ڪي اليڪٽرڪ سستي بجلي خريد ڪري مهانگي اگهه تي وڪرو ڪري منافعو ڪمائي رهيو آهي. قومي اسيمبلي جي اجلاس کي خطاب ڪندي پاڻي ۽ بجلي واري وفاقي وزير خواجه آصف چيو ته ملڪ ۾ بجلي جي پيداوار ۾ واڌ ٿي آهي، بجلي جي پيدوار 13 هزار ميگاواٽ ۽ طلب 16 ميگاواٽ آهي، هن وقت شارٽ فال 3 هزار تائين رهجي ويو آهي ۽ هاڻي غير اعلانيل لوڊشيڊنگ نه ڪئي ويندي. هن چيو ته پهرين رمضان کان ملڪ ۾ بجلي جو بحران ٿيو، پر ڪراچي ۾ گرمي سبب فوتگين جي ذميوار وفاقي حڪومت نه آهي، شهر ۾ پاڻي جي کوٽ آهي. خواجه آصف چيو ته ڪراچي ۾ گرمي سبب فوتگين جو الزام وفاق مٿان لڳايو پيو وڃي، ٿر ۾ ايترا ماڻهو ڏڪار سبب فوت ٿيا، ڇا ان جو ذميوار به وفاق آهي، هر معاملي تي وفاق کي وچ ۾ آندو ويندو ته پوءِ صوبا ڇا ڪندا.؟ پاڻي ۽ بجلي واري وفاقي وزير چيو ته وفاقي حڪومت ڪي اليڪٽرڪ کي معاهدو ختم ٿيڻ باوجود 650 ميگاواٽ بجلي فراهم ڪري رهي آهي،  ڪي اليڪٽرڪ وفاق کان سستي اگهه تي بجلي خريد ڪري  منافعو ڪمائي ٿو، ڪراچي کي بجلي جي ورڇ ڪندڙ ڪمپني ڏانهن تقريبن 58 ارب رپيا رهيل آهن، جيڪي ادا نٿا ڪيا وڃن. خواجه آصف دعويٰ ڪئي ته شهر ۾ 5 ڪلاڪ ۽ ٻهراڙي ۾ 8 ڪلاڪ بجلي جي لوڊشيڊنگ ٿي رهي آهي، جڏهن ته بلوچستان ۾ بجلي جي صورتحال ڪافي بهتر ٿي چڪي آهي. بجلي ورڇ ڪندڙ ڪمپنين جي وصولين بابت ٻڌائيندي وفاقي وزير خواجه آصف چيو ته فيسڪو جي وصولي 100 سيڪڙو، حيسڪو جي 76 سيڪڙو ۽ سيپڪو جي 58 سيڪڙو آهي. خواجه آصف جو چوڻ هو ته سنڌ ۾ ڊسٽري بيوشن لائين بهتر ٿيون آهن، بجلي چوري ڪندڙن خلاف ڪارروائي ڪرڻ تي عملدارن کي شهيد ڪيو پيو وڃي. وفاقي وزير چيو ته قطر سان ايل اين جي خريداري جو معاهدو فائنل ناهي ٿيو، معاهدو ٿيڻ بعد سستي ايل اين جي فراهم ٿيندي.

 

الطاف حسين سنڌ جا شڪ ختم ڪري ڪالاباغ ڊيم ٺاهڻ جو مطالبو ڪري ڇڏيو

لنڊن(م.ڊ) ايم ڪيو ايم جي سربراهه الطاف حسين پاڻي جي مسئلي جي حل لاءِ ڪالاباغ ڊيم جي اڏاوت خاطر سنڌ جا شڪ ۽ اعتراض ختم ڪرڻ جو مطالبو ڪيو آهي. لنڊن مان جاري ڪيل بيان ۾ الطاف حسين چيو ته ڪراچي ۾ سخت گرمي سبب فوتگين کانپوءِ سرد خانن ۾ ميتون رکڻ جي جاءِ به ناهي ، سندس چوڻ هو ته پاڻي نه هجڻ ڪري ڪراچي ۾ قيامت ڪڙڪي پئي آهي، پاڻي جي فراهمي وفاقي ۽ سنڌ حڪومت جي ذميواري آهي. ايم ڪيو ايم سربراهه چيو ته پاڻي ذخيرو ڪرڻ لاءِ سڄي ملڪ ۾ ننڍا ڊيم ٺاهيا وڃن، جڏهن ته سنڌ جا شڪ ۽ اعتراض ختم ڪري ڪالاباغ ڊيم ٺاهيو وڃي، ان ڏس ۾ چئني صوبن جي ماهرن جو اجلاس به سڏايو وڃي،

 

ڪراچي جي مختلف علائقن ۾ رينجرز جون ڪارروايون، 10 دهشتگرد مارجي ويا

ڪراچي(اسٽآف رپورٽر) ڪرچي جي مختلف علائقن ۾ رينجرز جي ڪاررواين جي نتيجي ۾ 10 دهشتگرد مارجي ويا ۽ فائرنگ ۾ 3 اهلڪار زخمي ٿي پيا، رينجرز ترجمان مطابق سپر هاءِ وي ويجهو ڪاٺوڙ واري هنڌ دهشتگردن جي موجودگي واري اطلاع تي ڇاپو هنيو ويو ته دهشتگردن دستي بمن سان حملو ڪيو. رينجرز پوزيشنون سنڀالي دهشتگردن جو مقابلو ڪيو، جنهن دوران فائرنگ جي ڏي وٺ ۾ 6 دهشتگرد مارجي ويا. ترجمان جو چوڻ هو ته مارجي ويل دهشتگردن جو تعلق پابندي مڙهيل  تنظيم سان هو جيڪي رمضان جي ڀلاري مهيني دوران صوبي ۾ دهشتگردي جي رٿا بندي ڪري رهيا هئا.ترجمان مطابق مارجي ويل دهشتگردن جي قبضي مان ايس ايم جي ،آپگهاتي جيڪيٽون ۽ ٻيا هٿيار هٿ ڪيا ويا.رينجرز ترجمان ٻڌايو ته منگهو پير ۽ سلطان آباد ۾ به ڪارروائيون ڪيون ويون ،جنهن جي نتيجي ۾ 4 دهشتگرد مارجي ويا، هن ٻڌايو ته ڪاررواين دوران دهشتگردن جي ڪاررواين ۾ 3 اهلڪار زخمي پڻ ٿي پيا.