تازيون خبرون

Daily Archives: June 24, 2015

سياسي ۽ عسڪري قيادت جي ملاقات، ڏوهارين خلاف آپريشن جاري رکڻ تي اتفاق

اسلام آباد(بيورو) پاڪ فوج جي سربراهه جنرل راحيل شريف وزيراعظم نواز شريف سان اهم ملاقات ڪئي آهي. پي ايم هائوس ۾ ٿيل ملاقات دوران آرمي چيف آپريشن ضرب عضب بابت وزيراعظم کي بريفنگ ڏني. ذريعن مطابق بريفنگ دوران جنرل راحيل شريف جو چوڻ هو ته آپريشن ضرب عضب ڪاميابي سان هلندڙ آهي، جنهن کي پنهنجي منطقي انجام تي پهچائينداسين. ان موقعي تي وزيراعظم نواز شريف آپريشن ضرب جي نتيجي ۾ مليل ڪاميابين جي ڀرپور نموني ساراهه ڪئي. ملاقات دوران امن امان ۽ پاڪ فوج جي پيشيور معاملن سوڌو ملڪ جي جملي صورتحال غور هيٺ آئي. ملاقات دوران ضرب عضب سوڌو ڏوهارين خلاف ملڪ ۾ هلندڙ آپريشن جاري رکڻ ٽي اتفاق ڪيو ويو، وزيراعظم نواز شريف جو چوڻ هو ته دهشتگردي خلاف ويڙهه ۾ سڄي قوم پاڪ فوج سان گڏ آهي.

 

سنڌ ۾ گرمي جي لهر برقرار، فوتين جو انگ 700 کان به ٽپي ويو

ڪراچي (اسٽاف رپورٽر) ڪراچي سميت پوري سنڌ ۾ چوٿين ڏينهن به گرميءَ جي شدت برقرار آهي، اڄ وڌيڪ 70 ڄڻن جي فوت ٿيڻ کان پوءِ ڪراچي ۾ فوتين جو انگ وڌي 722 ٿي ويو آهي. سول اسپتال ۾ رات کان هن وقت تائين 15 ماڻهن دم ڏنو جنهن بعد چئن ڏينهن اندر سول اسپتال ۾ فوتين جو  انگ 86 ٿي ويو.  قطر اسپتال ۾ وڌيڪ چار ڄڻا فوت ٿي ويا.  جناح اسپتال ۾ 201 مريضن دم ڏنو، جڏهن ته وڌيڪ ڪيترائي ماڻهو داخل ڪيا ويا آهن. شديد گرمي سبب هزارين ماڻهو مختلف اسپتالن ۾ بي حال آهن جن جو علاج ڪيو پيو وڃي. گذريل چئن ڏينهن دوران رڳو ڪراچي ۾ فوتين جو انگ 531 ٿي ويو آهي جڏهن ته سنڌ جي  مختلف شهرن ۾ به هڪ سئو کان وڌيڪ ماڻهو فوت ٿيا آهن. گذريل چئن ڏينهن دوران جناح اسپتال ۾ اڍائي سئو، سول اسپتال ۾ 71، لياري جنرل اسپتال ۾ 17، سنڌ گورنمينٽ اسپتال ۾ 8 خانگي اسپتالن ۾ هڪ سئو ٻه ، ڪامياڙي اسپتال ۾ 2 ماڻهو فوت ٿيا. جناح اسپتال جي ترجمان سيمي جمالي چيو آهي ته گرمي سٽيل 3 هزار کان وڌيڪ ماڻهن جو علاج ڪيو ويو. حيدرآباد جي هالي روڊ واري علائقي ۾ هڪ نامعلوم شخص فوت ٿي ويو جنهن جو لاش ايڌي حوالي ڪيو ويو. مڪلي جي اسپتال ۾ پيرسن حاجي رحيم جوکيو ۽ 8 ورهين جي نائله فوت ٿي ويا. ٿاڻو بولا خان جي ڳوٺ ڪرچات ۾ 50 ورهين جو الهجڙيو برفت گرمي جي سٽ نه سهندي فوت ٿي ويو.

 

قومي اسيمبلي بجيٽ جي منظوري ڏئي ڇڏي،مخالف ڌر جو مالي مطالبا منظور نه ٿيڻ ۽ لوڊشيڊنگ خلاف احتجاج

اسلام آباد: (بيورو) قومي اسيمبلي نئين مالي سال  جي بجيٽ جي منظوري ڏئي ڇڏي ، جڏهن ته مخالف ڌر لوڊشيڊنگ واري معاملي ۽  مالي مطالبا منظور نه ٿيڻ  تي ايوان ۾ سخت احتجاج ڪيو. قومي اسيمبلي جي اجلاس ۾ مخالف ڌر جي غير موجودگي دوران وفاقي بجيٽ جي منظوري ڏني وئي ، ان کان اڳ اجلاس شروع ٿيو ته سخت گرمي ۽ لوڊشيڊنگ سبب فوت ٿيلن لاءِ دعا گهري وئي. مخالف ڌر جي ميمبرن ايوان ۾ حڪومت تي سخت تنقيد ڪئي ۽ نعرا هنيا.مخالف ڌر جي اڳواڻ سيد خورشيد احمد شاهه ايوان ۾ ڳالهائيندي چيو ته مخالف ڌر جي غير موجودگي ۾ مالي مطالبا منظور ڪرايا ويا هن چيو ته گرمي ۽ لوڊشيڊنگ سبب ماڻهو مري رهيا آهن، سرد خانن ۾ لاش رکڻ جي جاءِ ناهي پر حڪومت کي ڪا به پرواهه ناهي. تحريڪ انصاف جي اڳواڻ شاهه محمود قريشي چيو ته جيڪڏهن پاڻي ۽ بجلي وارو وزير ايترو ئي مصروف آهي ته وزارت ڇڏي ڏئي. عوامي مسلم ليگ جي سربراهه شيخ رشيد جو چوڻ هو ته لوڊشيڊنگ واري معاملي تي پاڻي ۽ بجلي واري وڏي وزير خواجا آصف ۽ ننڍي وزير عابد شير علي کي استعيفيٰ ڏيڻ گهرجي. جمشيد دستي اجلاس دوران اسپيڪر جي ڊائيس اڳيان پهتو ۽ ايجنڊا جي ڪاپي ڦاڙي ڇڏي.

 

پاڪستان برطانيا پوليس کي عمران فاروق قتل ڪيس جي جوابدار کان جاچ جي اجازت ڏئي ڇڏي

اسلام آباد (بيورو) وفاقي گهرو وزير چوڌري نثار چيو آهي ته عمران فاروق قتل ڪيس ۾ مدد لاءِ برطانيا جي درخواست آئي آهي.پاڪستان هڪ جوابدار کان پڇا ڳاڇا جي اجازت ڏئي پڏي آهي. اسلام آباد ۾ ميڊيا سان ڳالهائيندي هن چيو ته عمران فاروق قتل ڪيس جي حوالي سان برطانيا سان رابطي ۾ آهيون. هن چيو ته قتل ڪيس جي صورتحال ساڳي آهي جيڪا اڳ ميڊيا کي ٻڌائي هئي. چوڌري نثار چيو ته قتل ڪيس ۾ ٽي اهم جوابدار گرفتار ٿيل آهن. گهرو وزير چيو ته عمران فاروق قتل ڪيس ۾ سهڪار ڪرڻ اسان جي ذميواري آهي. هڪ سوال جي جواب ۾ هن چيو ته چمن مان گرفتار ڪيل ٻه جوابدار ايف سي جي تحويل ۾ آهن. عمران فاروق قتل ڪيس ۾ متحده مڪمل سهڪار ڪيو آهي. هن چيو ته عمران فاروق قتل ڪيس پاڪستان ۾ رجسٽرڊ نه ٿيو آهي. هڪ ٻئي سوال جي جواب ۾ هن چيو ته ايم ڪيو ايم عمران فاروق جي قاتلن کي ڪٽهڙي ۾ آڻڻ چاهي ٿي ۽ هينئر تائين هن سهڪار ڪيو آهي. هن چيو ته ڪيس ۾ گهربل گرفتار جوابدار برطانيا پوليس کي گهربل آهن. گهرو وزير چيو ته عمران فاروق قتل ڪيس ۾ برطانيا کي هڪ جوابدار کان پڇا ڳاڇا جي اجازت ڏني آهي. چوڌري نثار علي چيو ته ميٽرو پوليٽن پوليس هلندڙ هفتي پاڪستان ايندي. هن چيو ته عمران فاروق جي قتل جي اڻ ڌري جاچ ٿيڻ گهرجي. هڪ ٻئي سوال جي جواب ۾ چوڌري نثار چيو ته ماڊل ايان علي ڪيس ڪسٽم انٽيليجنس جي دائري ۾ اچي ٿو. هن واضح ڪيو ته ڏسي رهيا آهيون ته ايان علي ڪيس ۾ ڪو رخ رهجي ته ناهي ويو. هن چيو ته ايان علي ڪيس جي باري ۾ سڀاڻي گڏجاڻي ٿي رهي آهي. هن چيو ته ڏسڻو آهي ته ايان علي جي پٺيان ڪنهن جو هٿ ۽ پئسو ڪنهن جو آهي هن چيو ته زرداري مڃي يا نه مڃي هن فوج خلاف تقرير ڪري غلطي ڪئي. هن چيو ته ليڊر شپ قوم سامهون غلط لفظن جو استعمال ناهي ڪندي. ٻئي پاسي اسڪاٽ ليند يارڊ تصديق ڪندي چيو آهي ته هو پاڪستان سان رابطي ۾ آهن ۽ سندن ٽيم جلد پاڪستان ويندي. ترجمان مطابق عمران فاروق قتل ڪيس جي جاچ سندن ذميداري آهي. هن چيو ته ڪيس ۾ اهم اڳڀرائپ ٿي آهي، جنهن بابت جلد قوم کي آگاهه ڪنداسين.

 

ڪراچي ۾ سرڪاري ملازمن کي اڌ ڏينهن موڪل، وڏو وزير جوش ۾ اچي ويو، اڳواٽ ئي بند پيل اسڪولن ۾ به موڪل جو اعلان ڪري ڇڏيو

ڪراچي(اسٽاف رپورٽر) سنڌ جي وڏي وزير سيد قائم علي شاهه ڪراچي ۾ سخت گرمي سبب اڄ سرڪاري آفيسن ۾ موڪل ڪري ڇڏي، اهڙو نوٽيفڪيشن منجهند جو 12 لڳي 35 منٽن تي جاري ڪيو ويو، سنڌ اسيمبلي ۾ جوشيلي تقرير ڪندي وڏي وزير سرڪاري ملازمن لاءِ موڪل جو اعلان ته ڪيو پر هو جوش ۾ اڳواٽ ئي گرمين جي موڪلن سبب بند پيل اسڪول ٻيهر بند ڪرڻ جو اعلان به ڪري ويو.وڏي وزير جو چوڻ هو ته ڪراچي ۾ ٿيل موتن تي سياست نه ڪئي وڃي، گرمي سبب ٿيل فوتگين تي اسان کي به افسوس آهي، هن چيو ته ڏڪار سڀني جي دور ۾ ايندو رهندو آهي، پر مان ڪنهن جو نالو کڻي معاملي کي تڪراري بڻائڻ نه ٿو چاهيان، هن ٻين پارٽين کي به اها ئي صلاح ڏني ته هن معاملي تي سياست ڪرڻ بدران ڏک جو اظهار ڪيو وڃي. سيد قائم علي شاهه چيو ته ڪٿي نه ڪٿي غفلت ضرور ٿي آهي پر بجلي جا معاملا وفاقي حڪومت سنڀالي رهي آهي، اسان ڪراچي ۾ لوڊشيڊنگ جي معاملي تي لاڳاپيل اختيارين سان رابطي ۾ آهيون. سندس چوڻ هو ته ڪراچي ۾ گرمي سبب فوتگين جي معاملي تي سڀاڻي ايوان کي ٻڌائيندس ته سنڌ جو عوام صوبائي حڪومت جي ڪارڪردگي مان ڪيتري حد تائين مطمئن آهي، ڪراچي جي تاريخ ۾ پهريون ڀيرو اهڙيون اوچتيون فوتگيون ڏسڻ ۾ آيون آهن، اڄ به مختلف علائقن ۾ 15 ماڻهن جي فوت ٿيڻ جا اطلاع آهن. وڏي وزير چيو ته حڪومت بجلي جي بحران جي خاتمي لاءِ قدم کڻي رهي آهي، دڪان رات جو 9 وڳي بند ڪرڻ جو فيصلو به ان سلسلي جي ڪڙي آهي، موجوده صورتحال کي نظر ۾ رکندي جيڪڏهن ماڻهن رات جو خريداري نه به ڪئي ته خير جي ڳالهه آهي. هن چيو ته سڄي سنڌ جي ڪمشنرن کي فوري ايمرجنسي سينٽر قائم ڪرڻ جي هدايت ڪئي وئي آهي، ڊزاسٽر مينيجمينٽ جو نمبر به اخبارن ۾ ڇاپرائينداسين ته جيئن عوام سهولتن لاءِ رابطو ڪري سگهي. سيد قائم علي شاهه جي خطاب دوران مخالف ڌر جا ميمبر نعرا هڻندا ۽ اسپيڪر آعا سراج دراني کين چپ رهڻ لاءِ چوندو رهيو. ان موقعي تي وڏي وزير اپوزيشن جي نعريبازي تي ٽوڪ ڪندي چيو ته اهو اسيمبلي ميمبرن جو اخلاق آهي جنهن جو مظاهرو ڪيو پيو وڃي، مخالف ڌر جا ميمبر شايد پهريون ڀيرو ايوان ۾ آيا آهن.

 

فريال ٽالپر مڙس ۽ سهيل انوار سيال سان گڏ دبئي هلي وئي

ڪراچي (اسٽاف رپورٽر) اڳوڻي صدر آصف علي زرداريءَ جي ڀيڻ ۽ ايم اين اي فريال ٽالپر اوچتو دبئي رواني ٿي وئي اهي. ذريعن موجب اڳوڻي صدر آصف علي زرداري جي ڀيڻ فريال ٽالپر اوچتو دبئي رواني ٿي وئي آهي. فريال ٽالپر پارانهڪ هفتو اڳ لاڙڪاڻي ۾ ترسڻ جو اعلان ڪيو هو. فريال ٽالپر پرڏيهي ايئرلائين جي اُڏام اي ڪي 603 ذريعي دبئي رواني ٿي. فريال ٽالپر سان گڏ مير منور ٽالپر ۽ صوبائي گهرو وزير سهيل انور سيال به دبئي روانا ٿي ويا آهن.

 

اپوزيشن ملڪي معيشت تي سياست بدران اقتصادي چارٽر تي حڪومت سان اتفاق ڪري: اسحاق ڊار

اسلام آباد (بيورو) قومي اسيمبلي ۾ ناڻي وزير اسحاق ڊار چيو آهي ته اپوزيشن ملڪي معيشت تي سياست بدران اقتصادي چارٽر تي حڪومت سان اتفاق ڪري، حزب اختلاف کي گڏ وٺي هلڻ چاهيون ٿا، ان لاءِ سندن تمام سٺين تجويزن کي بجيٽ جو حصو بنايو آهي، اقتصادي راهداري منصوبو گيم چينجز بنجڻ وڃي رهيو آهي، اقتصادي راهداري تي پاڙيسري ملڪ واويلا ڪيو ته تڪراري علائقي تي بنايو پيو وڃي، آزاد ڪشمير ۽ گلگت بلتستان ڪي تڪراري علائقا ناهن پر اهي پاڪستانجو حصو آهن، تڪراري علائقو والاريل ڪشمير آهي. اسحاق ڊار قومي اسيمبلي ۾ فنانس بل 6 1 -5 1 0 2 ع جي منظوري بعد ايوان کي خطاب ڪري رهيو هو. هن قومي اسيمبلي سينيٽ ۽ پي ٽي وي ملازمن سميت بجيٽ ۾ ڊيوٽي ڏيندڙ سرڪاري ملازمن کي 3  اعزازي پگهارون ڏيڻ جو به اعلان ڪيو. هن چيو ته بجيٽ منظوري جي آئيني ذميداري پوري ڪرڻ تي پارليامينٽ ميمبرن جو شڪريو ادا ڪريان ٿو، اپوزيشن کي مس ڪيو، آپوزيشن ڪٽ ووشنز نه آڻڻ تي واڪ آئوٽ ڪيو، حالانڪه گذريل ڏينهن انهن پاڻ ئي ايوان جي ڪاروائي ۾ حصو نه ورتو، وفاقي وزير جي گهرائڻ تي به نه آيا، اڄ به پوري ڪوششن باوجود هو ايوان نه آيا، اپوزيشن معيشت کي پنهنجي سياست کان الڳ رکي ۽ چارٽر آف ايڪانامي جي اسان جي تجويز تي اڳتي وڌي معاشي بحالي جي ڪوشش ۾ حڪومت جو ساٿ ڏئي، اپوزيشن جي سمورين سٺين تجويزن کي بجيٽ جو حصو بنايو، اپوزيشن جي تجويزن تي عمل ڪندي مشروبات جي قيمتن ۾ ڏيڍ سيڪڙو گهٽتائي ڪئي، پولٽري تي ريگوليٽري ڊيوٽي 5  سيڪڙو واپس ورتي، جمهوريت جو حسن قومي مفاد جو تحفظ آهي، قومي مفادن جي تحفظ لاءِ اپوزيشن حڪومت کي گڏجي هلڻ کپي، پاڪستان جي تباهه حال معيشت کي پيرن تي بيهاري ڇڏيو، تمام عالمي مانيٽري ادارا اسان جي معاشي پاليسين جي واکاڻ ڪري رهيا آهن، ملڪ کي وڌيڪ ترقي ڏانهن وٺي وڃڻو آهي.

 

ڪير گرميءَسان مري وڃي ته اُن جي ذميواري حڪومت جي ناهي: عابد شير علي

اسلام آباد (بيورو) پاڻي ۽ بجلي جي مملڪتي وزير عابد شير علي چيو آهي ته اپوزيشن جو ايجنڊو صرف حڪومت تي تنقيد ڪرڻ آهي، حڪومت ملڪ ۾ توانائي بحران جي خاتمي لاءِ وڏا منصوبا شروع ڪري رکيا آهن، توانائي جو بحران 7 1 0 2 ع تائين مڪمل طور تي ختم ٿي ويندو، ڪراچي ۾ لوڊشيڊنگ سان وفاق جو ڪوبه تعلق نه آهي، اها صوبائي حڪومت جي ذميداري آهي، ڪي اليڪٽرڪ ڪمپني خانگي ادارو آهي، ان باوجود اسان ان سان تعاون ڪري رهيا آهيون. پارليامينٽ هائوس ٻاهران ميڊيا سان ڳالهائيندي هن چيو ته حڪومت کي موسمي تبديلي کي سامهون رکندي صوبي ۾ ايمرجنسي لاڳو ڪرڻ کپي پئي، ان جو ڪو متبادل انتظام ڪرڻ کپي ها. هن چيو ته خانگي ڪمپني ڪي اليڪٽرڪ جي نااهلي سبب ڪراچي ۾ حالتون خراب ٿيون آهن، اڳوڻي صدر پرويز مشرف ۽ اڳوڻي صدر آصف علي زرداري ان کي ڪنٽريڪٽ ڏنا هئا. هن چيو ته جڏهن اسان اقتدار ۾ آياسين ته ان وقت 3 1  هزار ميگاواٽ بجلي جي پيداوار هئي، اسان ان کي 6 1  هزار تائين کڻي آيا آهيون. هن چيو ته خيبر پختونخوا وڏي وزير سان معاهدو ٿيو هو ته جيڪا بجلي ڏيندو ان کي بجلي ملندي هو ان معاهدي تان پوئتي هٽي ويو آهي، بل ڏيندڙ ۽ نه ڏيندڙن وچ ۾ فرق ته هئڻ گهرجي. هن چيو ته ڪراچي ۾ قدرتي موت جي ذميدار وفاقي حڪومت نه ڪي اليڪٽرڪ ڪراچي ۾ گذريل 5  سالن دوران هڪ ميگاواٽ بجلي پيدا ناهي ڪري سگهي. هن چيو ته هر ذميداري وفاقي حڪومت تي نه وڌي وڃي، صوبائي حڪومت به پنهنجو ڪردار ادا ڪري. عابد شير علي چيو ته وزيراعظم نواز شريف ڪراچي واٽر بورڊ کي 0 5 2  ارب رپيا ڏنا آهن، حالانڪه اهي پئسا صوبائي حڪومت کي ڏيڻا هئا. وڏي وزير سنڌ سيد قائم علي شاهه سان پنهنجي عوام بابت پڇو، سندس پارٽي اڳواڻ چئي ٿو ته اسان پوري ملڪ جي پارٽي آهيون جڏهن ته سنڌ حڪومت موسمي تبديلي کي سامهون رکندي متبادل انتظام ئي نه ڪري سگهي. هن چيو ته موجوده حڪومت توانائي بحران جي حل لاءِ ڊيگهاري پلاننگ ڪري رهي آهي ۽ 7 1 0 2 ع تائين توانائي بحران جو مڪمل خاتمو ٿي ويندو.

 

نيب بينظير هائوسنگ اسڪيم جي ڊائريڪٽر منظر عباس کي گهوٻين جي الزام هيٺ گرفتار ڪري ورتو

ڪراچي (اسٽاف رپورٽر) قومي احتساب بيورو ڪراچي بينظير هائوس سيل جي ڊائريڪٽر ٽيڪنيڪل ڊرائينگ ۽ ڊسبرسمينٽ منظر عباس کي 36 ڪروڙ 75 لک رپين جي گهوٻين جي الزام هيٺ گرفتار ڪري ورتو آهي. سستن گهرن جي تعمير واري رٿا ۾ گهوٻين جي جاچ شروع ڪرڻ بعد نيب اها گرفتاري عمل ۾ آندي. اڱاري ڏينهن نيب جي عملدارن هڪ بيان ۾ ڄاڻايو آهي ته جوابدار مٿان بينظير ائوسنگ اسڪيم ضلعي ڪشمور جي فنڊن ۾ گهوٻين جا الزام آهن. جوابدار کي اربع ڏينهن (اڄ) جسماني رمانڊ لاءِ احتساب عدالت ۾ پيش ڪيو ويندو.

 

ڪراچي پوليس عامر خان کان جاچ مڪمل ڪري چالان اي ٽي سي ۾ پيش ڪري ڇڏيو، شاهد 25 جون تائين طلب

ڪراچي(اسٽاف رپورٽر) ڪراچي پوليس ايم ڪيو ايم جي اڳواڻ عامر خان خلاف جاچ مڪمل ڪري ورتي ۽ چالان عدالت ۾ پيش ڪري ڇڏيو،عامر خان کي 11 مارچ تي رينجرز ايم ڪيو ايم جي مرڪز نائن زيرو تان گرفتار ڪيو هو، پوليس کانئس جاچ مڪمل ڪرڻ کانپوءِ چالان دهشتگردي جي انت واري خاص عدالت ۾ پيش ڪيو، ان موقعي تي عامر خان کي به سخت سيڪيورٽي ۾ عدالت آندو ويو هو، پوليس طرفان پيش ڪيل چالان ۾ عامر خان تي دهشتگردن کي پناهه ڏيڻ جو الزام لڳايو ويو آهي. دهشتگردي ٽوڙ عدالت پوليس پاران پيش ڪيل چالان منظور ڪندي ڪيس جي شاهدن کي 25 جون تائين طلب ڪري ورتو آهي.