تازيون خبرون

Daily Archives: June 23, 2015

ڪٿي به جبري لوڊشيڊنگ نه پئي ڪئي وڃي، ڪي اليڪٽرڪ کي اوور ٽيڪ به ڪرڻو پيو ته ڪنداسين:عابد شير علي

اسلام آباد (بيورو) پاڻي ۽ بجلي جي مملڪتي وزير عابد شير علي چيو آهي ته ملڪ ۾ ڪٿي به جبري لوڊشيڊنگ نه پئي ڪئي وڃي، جڏهن ته ڪــَي اليڪٽرڪ کي 650 ميگاواٽ بجلي فراهم ٿي رهي آهي، جيڪڏهن کين اوور ٽيڪ به ڪرڻو پوي ته اهو به ڪندا. قومي اسيمبلي جي اجلاس کانپوءِ پارليامينٽ هائوس ٻاهران ميڊيا سان ڳالهائيندي عابد شير علي چيو ته ڪراچي ۾ بدترين لوڊشيڊنگ جي ذميوار پيپلز پارٽي آهي جنهن ڪــَي اليڪٽرڪ کي خانگائڻ واري پرويز مشرفجي فيصلي جي حمايت ڪئي. هن چيو ته پراڻي معاهدي تحت حڪومت 650 ميگاواٽ بجلي ڪــَي اليڪٽرڪ کي ڏئي رهي آهي جڏهن ته گهــُرج ۽ سپلاءِ کي برقرار رکڻ ڪــَي اليڪٽرڪ جي ذميواري آهي. عابد شير علي چيو ته جيڪڏهن کين ڪــَي اليڪٽرڪ کي ٽيڪ اوور ڪرڻو پوي ته ان تان پوئتي نه هٽندا. سندس چوڻ هو ته وزيراعظم نواز شريف جي هدايت ڪئي آهي ته ڪراچي پاڪستان جي دل آهي ۽ دل جي ڌڙڪن کي جاري رکڻو آهي. عابد شير علي چيو ته ڪراچي جي عوام لاءِ واٽر بورڊ جا اڍائي ارب رپيا به وفاقي حڪومت ادا ڪيا ته جيئن شهرين کي پاڻي فراهم ڪيو وڃي. مملڪتي وزير چيو ته موجوده حڪومت 16 هزار 300 ميگاواٽ بجلي جي پيداوار وڌائي ۽ جيڪڏهن ملڪ جي ڪنهن حصي ۾ ٽرانسفارمر خراب ٿئي ٿو ته ان ۾ 12 کان 14 ڪلاڪ تبديل ڪرڻ ڪرڻ ۾ لڳندا آهن. عابد شير علي چيو ته خيبر پختون خواهه ۾ لوڊمينجمينٽ پاڻ صوبائي حڪومت ڪندي آهي ۽ وفاقي حڪومت خلاف جلوس ڪڍيا پيا وڃن.

 

تمنا ڀاٽيا فلم ”باهو بلي“ ۾ ڪردار لاءِ پنهنجو وزن وڌائي ڇڏيو

ممبئي (شوبز نيوز) بالي ووڊ اداڪارا تمنا ڀاٽيا فلم ”باهو بلي“ ۾ ڪردار لاءِ وزن وڌائي ڇڏيو آهي، ڀارتي سڌ سماءَ جي ذريعن مطابق بالي ووڊ اداڪارا تمنا ڀاٽيا فلم ”باهو بلي“ ۾ ڪردار نڀائڻ لاءِ وزن وڌايو آهي، اداڪارا جو چوڻ آهي ته هن ڪردار جي حوالي سان وزن وڌايو آهي، جڏهن ته هوءَ فلم ۾ ويڙهاڪ عورت جو ڪردار ادا ڪري رهي آهي، اداڪارا جو وڌيڪ چوڻ آهي ته فٽ رهڻ لاءِ سنهو هجڻ پر پر صحتمند هجڻ به ضروري آهي. فلم 10 جولاءِ تي سينيما گهرن ۾ نمائش لاءِ لڳائي ويندي.

 

بالي ووڊ اداڪارن پاران والدين کي ڀيٽا پيش

ممبئي (شوبز نيوز) بالي ووڊ جي ٻن پٺاڻ ڀائرن سلمان ۽ سهيل خان پنهنجي والد سليم خان کي ”فادرز ڊي“ تي ٽوئيٽر تي تصوير جاري ڀيٽا پيش ڪئي، سلمان خان پنهنجي والد ۽ ڀاءَ سان گڏ بنا شرٽ واري تصوير رکي هڪ الڳ انداز سان والد کي فادرز ڊي تي ڀيٽا پيش ڪئي. سلمان خان پنهنجي ٽوئيٽ ۾ والد سليم خان کي مغل بادشاهه سليم طور مخاطب ڪيو ۽ چيو  ته اصل ۾ اهو ”بجرنگي ڀائيجان“ آهي. تصوير ۾ ٻئي ڀائر هڪ ٻئي جا ڏورا ڏيکاريندي به ڏيکاريل آهن ۽ ان کان سواءِ شاهه رخ خان، اڪشي ڪمار، سونم ڪپور، عاليه ڀٽ، سوناڪشي سنها ۽ ڪرن کير به 21 فادرز ڊي تي پنهنجي والدين کي ٽوئيٽر اڪائونٽ ڀيٽا پيش ڪئي ۽ انهن جي اهميت بابت دل جا خيال اوريا، شاهه رخ خان چيو ته والدين اوهان جي ڏکين حالتن ۾ اهڙي آٿت ڏيندا آهن جو وڏي کان وڏو مسئلو به ننڍڙو لڳندو آهي. سوناڪشي سنها چيو ته فادرز ڊي تي پنهنجي پهرين ۽ تاحيات هيرو کي کوڙ سارو پيار ڏئي ٿي، جڏهن ته انڊسٽريءَ ۾ پنهنجي الڳ سڃاڻپ رکندڙ اداڪار انوپم کير جي گهر واري ڪرن کير چيو ته دنيا جو بهترين والد ٿيڻ تي اوهان جي ٿورائتي آهيان، هن چيو ته پنهنجي والد ڪرنل (ر) ٺڪر سنگهه کي فادرز ڊي تي مبارڪون ڏيان ٿي. جڏهن ته ڀٽ خاندان جي نياڻي عاليه ڀٽ چيو ته سندس والد تمام بهترين انسان آهي نه صرف اڄ هميشه بهترين شخص رهيو آهي. ارجن ڪپور چيو ته فادرز ڊي هڪ ڏينهن نه پر هر ڏينهن ملهائڻ گهرجي ڇو جو اوهان کي انهن جي هر وقت ضرورت هوندي آهي. جڏهن ته ماڌوري ڊڪشت چيو ته مان پنهنجي والد جي کوٽ محسوس ڪري رهي آهيان، هن چيو ته کيس اميد آهي ته سندس والد هن کي ڏسندو هوندو، جيئن هن سڄي عمر هن جو خيال رکيو هو. سونم ڪپور چيو ته جڏهن ننڍي هوندي پنهنجي والد جي شهپرن سان کيڏندي هيس اهي ڏينهن ڪڏهن نه وسرندا، بپاشا باسو چيو ته هو پنهنجي والد سان انتهائي گهڻو پيار ڪري ٿي، پرينتي چوپڙا چيو ته فادرز ڊي تي پنهنجي اصلي پروڊيوسر کي تمام گهڻو پيار چوان ٿي

 

بالي ووڊ جي سپر هٽ والدين جو فلاپ ٿيندڙ اولاد

ممبئي (شوبز نيوز) بالي ووڊ ۾ پير ڃمائڻ لاءِ ڪنهن ”گاڊ فادر“ جو هجڻ لازمي آهي ۽ جن جا والدين فلم انڊسٽريءَ مان هجن ته سندن ڪيريئر جي راهه سڌي ٿي ويندي آهي.پر بالي ووڊ ۾ ڪيترائي اهڙا والدين به آهن جيڪي فلم انڊسٽريءَ جي مشهور شخصيتن ۾ ڳڻيا ويندا آهن پر سندن ٻارن کي اها ڪاميابي نصيب نه ٿي سگھي آهي جيڪا کين ملي هئي. اڀيشيڪ بچن: اميتاڀ بچن جو پٽ اڀيشيڪ بچن سنه 2000 ۾ جي پي دته جي فلم ”رفيوجي“ سان ڪيريئر جي شروعات ڪئي، فلم جو باڪس آفيس تي حال خراب ٿي ويو. هڪ هِٽ فلم جي لاءِ اڀيشيڪ بچن کي لڳ ڀڳ چار سال انتظار ڪرڻو پيو. ان دوران سندس 14 فلمون فلاپ رهيون. سنه 2004ع ۾ ايندر مني رتنم جي فلم ”يوا“ اڀيشيڪ بچن جي پهرين هِٽ فلم هئي. ان کان پوءِ اڀيشيڪ جي ”بنٽي ۽ ببلي، گُرو، ڌوم ۽ سرڪار“ جھڙيون چند فلمن کي ئي ڪاميابي ملي، پر اڀيشيڪ پنهنجي والد جھڙي مشهوريءَ جي ويجھو به پهچي نه سگھيو. بوبي ديول: پنهنجي زماني جي ايڪشن اسٽار ڌرمينڌر جي وڏي پٽ سني ديول فلم انڊسٽريءَ ۾ جيئن تيئن پنهنجي جڳهه ٺاهي، پر ننڍي پٽ بوبي ديول اميدن موجب هلي نه سگھيو. سنه 1995ع ۾ ڪيريئر جي شروعات ڪندڙ بوبي ديول لڳ ڀڳ 41 فلمن ۾ ڪم ڪيو آهي. انهن مان ”گپت، سولجر، بادل، همزاد ۽ دوستانا“ جھڙيو فلمن کي ئي ڪاميابي ملي سگھي، باقي سڀ ناڪام ويون. تشار ڪپور: بالي ووڊ جي مشهور اداڪار جتيندر جي ڌيءُ ايڪتا ڪپور پروڊيوسر طور ٽي وي ۽ فلمن ۾ پنهنجو سِڪو ڃمايو پر ان جو پٽ تُشار ڪپرو کي اداڪار طور ڪو سٺو هنڌ نه مليو، تشار فلم ”مجھي ڪچهه ڪهنا هي“ کان سنه 2001ع ۾ ڪيريئر جي شروعات ڪئي هئي. سندس فلم ”غائب، خاڪي، گول مال سيريز، دي ڊرٽي پڪچرز ۽ ڪيا سپر ڪول هين هم“ ڪامياب سمجھيو وينديون. لو سنها: پنهنجي ڳري ۽ وزندار آواز سان ماڻهن کي ”خاموش“ ڪرائيندڙ اداڪار شتروگھن سنها جو پٽ لو سنها سنه 2010ع ۾ فلم ”صديان“ ۾ ڪم ڪيو، پر ان کي ڪو ڌيان نه ملي سگھيو، پر سندس ڌيءُ سوناڪشي سنها فلم ”دبنگ“ کان پوءِ پوئتي مُڙي ناهي ڏٺو. لو سنها جي فلم نه مبصرن کي پسند آئي ۽ نه ئي ڏسندڙن کي. سُنيل آنند: بالي ووڊ جي سدا بهار اداڪار ديو آنند جو پٽ سُنيل آنند 80 جي ڏهاڪي ۾ ”آنند هي آنند، ڪار ٿيف ۽ ميري تيري ليي“ جھڙين فلمن ذريعي بالي ووڊ ۾ پنهنجا پير ڃمائڻ جي ڪوشش ڪئي، پر هر ڀيري کيس ناڪامي ئي نصيب ٿي. هن سنه 2001ع ۾ فلم ”ماسٽر“ سان بالي ووڊ ۾ ڊائريڪٽر طور ٻي اننگ جي شروعات ڪرڻ چاهي پر کيس ان ۾ به ناڪامي ملي. مهاڪشيه چڪر ورتي: ”ڊسڪو ڊانسر“ مٿن چڪر ورتي جو پٽ مهاڪشيه چڪر ورتيءَ سنه 2008ع جي فلم ”جِمي“ سان بالي ووڊ ۾ قدم رکيو. فلم نه ته تجزيه نگارن کي راس آئي نه ئي ڏسندڙن کي وڻين، مهاڪشيه اڄ به پنهنجي والد کان الڳ سڃاڻپ ٺاهڻ جي ڪوششن ۾ رڌل آهي. فردين خان: ”قرباني، ڌرماتما، جانباز“ جھڙيون زبردست فلمون ٺاهيندڙ ادڪار ۽ پروڊيوسر ڊائريڪٽر فيروز خان جي سڪيلڌي پٽ فردين خان کي ”پريم اگن“ فلم سان لانچ ڪيو. فردين رام گوپال ورلا جي ڪجھه فملمن ۾ ڪم ڪيو، جن ۾ کيس ڪاميابي ملي پر والد جي موت کان پوءِ هِن فلمي سفر تي هِڪ قسم جي بريڪ لڳائي ڇڏي آهي. ايشا ديول: ”ڊريم گرل“ هيما مالني ۽ ڌرمينڌر جي ڌيءُ ايشا ديول ماءُ جي قدم تي هلندي فلمن ۾ اداڪاري ڪرڻ جو فيصلو ڪيو. ايشا فلم انڊسٽريءَ ۾ پنهنجي ماءُ جيان ”ڊريم گرل“ ته نه بڻجي سگھي. سندس ڪيريئر سنوارڻ لاءِ هيما مالنيءَ ”ٽيل مي او گاڊ“ فلم جي هدايتڪاري به ڪئي، پر ان ڪوشش سان به ايشا جو ڪيريئر نه سنڀالجي سگھيو. ڪمار گورو: پنهنجي زماني جي ”جبلي ڪمار“ چورائيندڙ اداڪار راجندر ڪمار جو پٽ ڪمار گورو پنهنجي پهرين فلم ”لو اسٽوري“ سان راتو واهه سپر اسٽار بڻجي ويو هو. پر ان کان پوءِ ان جي ڪا به فلم باڪس آفيس تي هلي نه سگھي. فلم ”نام“ هلي به ته سنيل دت جي پٽ سنجي دت ڪمار کان بازي کڻي ويو.

 

يوگا جو مذهب سان ڪو واسطو ناهي هوندو:شلپا شيٽي

ممبئي (شوبز نيوز) بالي ووڊ اداڪارا شلپا شيٽي يوگا جي حوالي ملهائجندڙ ڏينهن تي جاري ڪيل بيان ۾ چيو آهي ته ”يوگا جو مذهب سان ڪو واسطو ناهي هوندو“ هن چيو ته يوگا هڪ سائنس آهي ۽ هو پڪ سان چوي ٿي ته يوگا جو عالمي ڏينهن ملهائڻ جو تعلق مذهب سان ناهي. هن پنهنجي يوگا انداز بابت چيو ته يوگا جو به انداز مقرر ناهي هوندو، يوگا جو هر انداز اوهان جي جسامت تي فرق وجهندو آهي. شلپا شيٽي موجب سريا نمسڪار دوران هٿ ٻڌڻ وارو عل به يوگا جو هڪ قسم آهي ۽ ان سان به اوهان جي جسم جو هر حصو فائديمند ٿي ويندو آهي. شلپا يوگا جي وڪالت ڪندي چيو ته ماڻهن کي اها پراڻي سائنس استعمال ڪرڻ گهرجي، هن موجب يوگا انساني دماغ، روح کي حرڪت ۾ آڻيندي اوهان کي چست ڪري ڇڏيندو آهي.

 

ڀٽ شاهه: مخدوم امين فهيم چيلنج ڪپ 2015 ع آل سنڌ نائيٽ ڪرڪيٽ ٽورنامينٽ شروع

ڀٽ شاهه (اسپورٽس نيوز) ڀٽ شاهه ۾ مخدوم امين فهيم چيلنج ڪپ 2015 ع آل سنڌ نائيٽ  ڪرڪيٽ ٽورنامينٽ جو ميلو شروع ٿي ويو ، ملاکڙا گرائونڊ ۾ رنگ برنگي تقريب جو افتتاح پي پي اڳواڻ مخدوم فخرالزمان ڪيو ، نائيٽ ٽورنامينٽ جي پهرين رات گرين اسٽار هالا ۽ بحرام اليون حيدرآباد جي ٽيمن ڪاميابي حاصل ڪري ورتي ، الحسيني اليون ۽ اي لائيٽ قاضي احمد جي ٽيمن کي شڪست ملي ، گرين اسٽار هالا جي وقاص ۽ بحرام اليون جي اعجاز سولنگي کي مين آف دي مئچ قرار ڏنو ويو ، مهمانن پي پي اڳواڻ مخدوم فخرالزمان ، سيد سڪندر شاهه ، سيد خاور شاهه رانديگرن ۾ شيلڊ تقسيم ڪيا سوين شائقينن ميچن مان لطف اندوز ٿيندا رهيا ، خبر موجب ؛ڀٽ شاهه جي ملاکڙا گرائونڊ ۾ مخدوم اليون ڪرڪيٽ ڪلب جي صدر زنوار فقير حسين علي جعفري جي ميزباني هيٺ آل سنڌ نائيٽ ٽيپ بال ڪرڪيٽ مخدوم امين فهيم چيلنج ڪپ 2015ع جي رنگ برنگي افتتاحي تقريب منعقد ڪئي وئي ، تقريب جو مهمان خاص پي پي اڳواڻ مخدوم فخرالزمان هو جڏهن تـ اعزازي مهمانن ۾ سڪندر علي شاهه ،سيد عطا حسين شاهه ، سيد احسن هاشمي ، محمد ڪاظمي ، ولي محمد شاهه ، نثار احمد شيخ ، مهر علي ڀنگوار ، محمد اسلم ڪيريو ، غلام اڪبر ڀٽو ، فاروق احمد نوحپوٽو ، نثار ساگر ، ڊاڪٽر يونس ڇڄڙو ، علي محمد ساريو ، پريس ڪلب صدر خورشيد ٻگهيو ، وشنو داس راٺوڙ ، غلام فريد ابڙو ، سهيل ابڙو ، پي پي صدر حاجي غلام رسول ملاح شامل هئا ۽ ٽورنامينٽ جي افتتاحي تقريب کي ڏسڻ لاءِ سوين ماڻهو ملاکڙا گرائونڊ ۾ پهتا ٽورنامينٽ جي چيف آرگنائيزر فقير حسين علي جعفري آيل مهمانن کي سنڌ جي ثقافت لنگيون ۽ اجرڪن جا تحفا پيش ڪيا،جنهن بعد پي پي اڳواڻ مخدوم فخرالزمان ٻين مهمانن سان گڏجي ٽورنامينٽ جو باقاعده طور تي  افتتاح ڪيو ، افتتاحي تقريب دوران آتشبازي جو مظاهرو ڪيو ويو ، مخدوم امين فهيم چيلنج ڪپ 2015ع جي پهرين رات 2 مئچ کيڏيا ويا ،پهريون مئچ گرين اسٽار هالا ۽ اي لائيٽ قاضي احمد ۾ کيڏيو ويو  گرين اسٽار هالا جي ٽيم ٽاس کٽي پهرين بئٽنگ ڪندي مقرره 12 اوورن ۾ 128 رنسون ٺاهيون ، جنهن جي جواب ۾ اي لائيٽ قاضي احمد جي ٽيم مقرره 12 اوورن ۾ 9 وڪيٽن جي نقصان تي 121 رنسون اسڪور ڪري سگهي ، اهڙي طريقي سان گرين اسٽار هالا 7 رنسن تان مئچ کٽي ورتو ، گرين اسٽار جي وقاص کي 52 رنسون اسڪور ڪرڻ تي مين آف دي مئچ قرار ڏنو ويو ، جڏهن تـ ٻيو مئچ الحسيني اليون ۽ بحرام اليون حيدرآباد ۾ کيڏيو ويو ، جنهن ۾ الحسيني اليون پهرين بئٽنگ ڪندي مقرره اوورن ۾ 126 رنسون ٺاهيون ،جنهن جي جواب ۾ بحرام اليون 6 وڪيٽن جي نقصان تي مقرره حدف 127 رنسون حاصل ڪري مئچ ۾ ڪاميابي ماڻي ورتي ، بحرام اليون جي بئٽسمين اعجاز سولنگي 51 رنسون ٺاهڻ تي مين آف دي مئچ ايوارڊ ڏنو ويو ، مهمان خاص مخدوم فخرالزمان ، سيد سڪندر شاهه ، خاور حسين شاهه پاران مئچ کٽيندڙ رانديگرن ۾ شيلڊ تقسيم ڪيا ويا ، پي پي اڳواڻ مخدوم فخرالزمان پاران ٽورنامينٽ جي بهترين ڪوريج ڪرڻ تي صحافين خورشيد ٻگهيو ، رجب بوزدار ،عبدالغفور ميمڻ ، نوشاد ٻگهيو ، قاسم پلال ، رانا جهانگير ، سهيل راجپوت ، امان ڏاهري کي اجرڪ جا تحفا پيش ڪيا ويا ، ان موقعي تي پي پي اڳواڻ مخدوم فخرالزمان ميڊيا سان ڳالهائيندي چيو تـ لطيف جي نگري ۾ ٽورنامينٽ منعقد ڪرڻ جو مقصد نوجوانن جي ٽيلنٽ کي اجاگر ڪرڻ آهي ، هن چيو تـ سنڌ جي نوجوانن ۾ وڏو ٽيلنٽ آهي پر افسوس جي ڳالهه آهي تـ ملڪي ليول تي سنڌ جي نوجوانن کي نظر انداز ڪيو وڃي ٿو ، هن چيو تـ سنڌ جي نوجوانن کي قومي ٽيم ۾ شامل ٿيڻ جو موقعو ڏنو وڃي ، هن چيو تـ هي ٽورنامينٽ سنڌ جي تاريخ ۾ هڪ اهم ٽورنامينٽ ثابت ٿيندي ،

 

سريلنڪا خلاف پهرين ٽيسٽ ميچ ۾ ڪاميابيءَ تي پي سي بي چيئرمين باغ بهار

لاهور (اسپورٽس نيوز) سريلنڪا خلاف پهرين ٽيسٽ ميچ ۾ ڪاميابيءَ تي پي سي بي چيئرمين شهريار خان پاڪستان ڪرڪيٽ ٽيم کي مبارڪون ڏنيون آهن. شهريار خان چيو ته ميچ جو پهريون ڏينهن زيان ٿيڻ باوجود ٽيم بهترين راند جو مظاهرو ڪيو. پاڪستان ڪرڪيٽ بورڊ جي چيئرمين شهريار خان جو چوڻ هو ملڪي ٽيم سريلنڪا خلاف پهرين ٽيسٽ ميچ ۾ راند جي هر شعبي ۾ لنڪا کي شڪست ڏني. اسد شفيق، سرفراز احمد، ذوالفقار بابر، وهاب رياض ۽ خاص طور تي ياسر شاهه پاڪستان جي کٽڻ ۾ اهم ڪردار ادا ڪيو. هو پراميد آهي ته ٽيم سيريز جي ايندڙ ميچن ۾ به ايئن پرفارم ڪندي رهندي. ٻئي طرف پي سي بي جي ايگزيڪيوٽو ڪميٽيءَ جي سربراهه نجم سيٺيءَ ٽيم کي مبارڪ ڏيندي چيو ته سريلنڪا خلاف کٽڻ تي ڪپتان مصباح الحق ۽ ٽيم جي سمورا رانديگر مبارڪن جا لائق آهن.

 

آءِ سي سيءَ تازي ٽيسٽ رينڪنگ جاري ڪري ڇڏي

دبئي (اسپورٽس نيوز) انٽرنيشنل ڪرڪيٽ ڪائونسل (آءِ سي سيءَ) تازي ٽيسٽ رينڪنگ جاري ڪري ڇڏي، آءِ سي سيءَ پاڪستان ۽ سريلنڪا جي ٽيسٽ ميچ جي پڄاڻيءَ تي تازي ٽيسٽ رينڪنگ جاري ڪري ڇڏي آهي جنهن موجب سريلنڪا خلاف شاندار بيٽنگ جو مظاهرو ڪندڙ اسد شفيق بيٽسمينن جي رينڪنگ ۾ ست درجا ترقي وٺي 12 هين نمبر تي جڏهن ته وڪيٽ ڪيپر بيٽسمين سرفراز احمد پنج درجا ترقي ڪري 16 نمبر تي اچي ويو آهي. ٽيسٽ ٽيم جي ڪپتان مصباح الحق اڃا 9 نمبر تي آهي، جڏهن ته يونس خان هڪ درجو ترقي ڪري بيٽسمينن جي رينڪنگ ۾ 5 نمبر تي اچي ويو آهي، جڏهن ته آءِ سي سي جي بيٽسمينن جي رينڪنگ ۾ آسٽريليا جي اسٽيفن سمٿ پهرين، ڏکڻ آفريڪا جو اي بي ڊيوليئرز ٻئي، سريلنڪا جو ڪمار سنگاڪارا ٽئين نمبر تي موجود آهن. ٻئي طرف سريلنڪا خلاف شاندار بالنگ جو مظاهرو ڪندڙ ياسر شاهه بالنگ رينڪنگ ۾ ڇهه درجا ترقي ڪري 14 هين، وهاب رياض 11 درجا ترقي ڪري 14 هين ذوالفقار بابر ٽي درجا ترقي ماڻي 33 هين نمبر تي اچي ويو آهي. پاڪستان جو بهترين اسپنر سعيد اجمل اڃا تائين 11 هين نمبر تي آهي، عبدالرحمان 17 هين نمبر تي، جڏهن ته فاسٽ بالر جنيد خان چار درجا هيٺ ٿيڻ کان پوءِ 19 هين نمبر تي هليو ويو آهي. آءِ سي سي بالنگ رينڪنگ ۾ ڏکڻ آفريڪا جو ڊيل اسٽين پهرين، انگلينڊ جو جيمز اينڊرسن ٻئي جڏهن ته نيوزيلينڊ جو ٽرينٽ بولٽ ٽئين نمبر تي آهن.

 

پاڪستان ٽيم سڀ کان وڌيڪ 123 ٽيسٽ ميچون کٽيندڙ ايشيائي ٽيم جو اعزاز ماڻي روايتي مخالف ڀارت کي پوئتي ڌڪي ڇڏيو

گال (اسپورٽس نيوز) گال ٽيسٽ کٽڻ کان پوءِ پاڪستان ٽيم سڀ کان وڌيڪ 123 ٽيسٽ ميچون کٽيندڙ ايشيائي ٽيم جو اعزاز ماڻي روايتي مخالف ڀارت کي پوئتي ڌڪي ڇڏيو آهي. پاڪستان 9 سالن کان پوءِ سريلنڪا کي هوم گرائونڊ تي شڪست ڏني. مصباح اليون کي اهڙو اعزاز به ملي ويو آهي ته اها واحد ٽيم آهي جنهن سريلنڪا کي ان جي سرزمين تي ٽِيسٽ ميچ ۾ 10 وڪيٽن تان مات ڏني هجي. ڪپتان مصباح الحق ٽيست ڪرڪيٽ جي تاريخ ۾ 40 کان وڌيڪ عمر ۾ ڪپتان طور پنج ٽيسٽ ميچون کٽيندڙ واحد رانديگر به بڻجي ويو. پاڪستان جو ٻِن اننگ ۾ رن ريٽ 8.11 رهيو جيڪو ٽيسٽ ڪرڪيٽ جي تاريخ ۾ ڪنهن به ٽيم جو بهترين ڪارنامو آهي. آءِ لينڊرن کي لوها چڻا چٻرائيندڙ ملڪي ٽيم جي ليگ اسپنر ياسر شاهه 76 رنسن عيوض 7 وڪيٽون وٺي سريلنڪن سرزمين تي ڪامياب ترين ليگ اسپنر بڻجي ويو آهي. نوجوان وڪيٽ ڪيپر بيٽسمين سرفراز احمد، ڪامران اڪمل کان پوءِ ٻيون پاڪستاني وڪيٽ ڪيپر بيٽسمين بڻجي ويو آهي، جنهن ڪنهن ٽيسٽ ميچ ۾ مين آف دي ميچ جو ايوارڊ ماڻيو هجي. پهرين اننگ ۾ اهم موقعي تي ففٽي هڻندڙ 36 سالا اسپنر ذوالفقار بابر 10 هين وڪيٽ تي ففٽي اسڪور ڪندڙ وڏي عمر جو رانديگر بڻجي ويو آهي.

 

ڪراچي ۾ سخت گرمي سبب ٻن ڏينهن ۾ 225 ماڻهو فوت ٿيڻ جو انڪشاف

 

ملڪ ۾ سخت گرمي جي لهر باوجود لوڊشيڊنگ جاري آهي. ڪراچي ۾ سخت گرمي سبب 150 ڄڻا فوت، ٻن ڏينهن ۾ 225 ماڻهو فوت ٿيڻ جو انڪشاف ٿيو آهي. لوڊشيڊنگ خلاف مختلف شهرن ۾ عوام سراپا احتجاج بڻيل رهيو. ڪراچي ۾ قيامت آڻيندڙ گرمي سبب 24 ڪلاڪن دوران 150 ماڻهو فوت ٿي ويا،  ايڌي سينٽر جي انچارج جو چوڻ آهي ته ڪراچي ۾ شديد گرمي جي لهر ڪري گذريل 24 ڪلاڪن دوران 150 ماڻهن جا لاش ايڌي سرد خاني آندا ويا آهن، فوتين مان اڪثريت وڏي عمر وارن جي آهي، جيڪي سخت گرمي جي سٽ نه سهندي فوت ٿيا آهن، هن ٻڌايو ته ايڌي سردخاني ۾ 24 ڪلاڪن دوران 150 لاش اچڻ ڪري لاش رکڻ جي جاءِ نه رهي آهي جنهن ڪري 30 لاش لاوارث قرار ڏئي دفن ڪيو ويو ويو آهي. جناح اسپتال انتظاميا گذريل ڏينهن 50 ماڻهو فوت ٿيڻ جي تصديق ڪئي. عباسي شهيد اسپتال ۾ 19 ڄڻا گرمي سبب فوت ٿيا. اسپتال انتظاميا موجب دماغ جي رڳ ڦاٽڻ، ڊي هائيڊريشن ۽ گرمي جي بخار سبب فوتگيون ٿيون آهن. ڪڙيو گهنور ويجهو ڳوٺ سهراب نظاماڻي ۾ 60 ورهين جي الهه جڙيو نظاماڻي دم ڏنو، پياري لنڊ شهر ۾ پورهيت داد محمد بروهي فوت ٿي ويو. ڪي اليڪٽرڪ پاران بجلي جي هٿرادو لوڊ شيڊنگ جو سلسلو جاري آهي، سحري توڙي افطاري جي وقت تي بجلي غاعب هجڻ ۽ سخت گرمي ۾ بجلي نه ملڻ ڪري مختلف علائقن ۾ شهرين روڊن تي نڪري سخت احتجاج ڪيو، ان ڏس ۾ گذريل رات ديرسان ڪورنگي اڍائي نمبر واري علا.قي ۾ شهرين احتجاج ڪري مين روڊ بلاڪ ڪري ڇڏيو، ڪورنگي زمان ٽائون واري علائقي ۾ رهواسين بجلي بند هجڻ خلاف گهرن مان نڪري احتجاج ڪيو، پٽيل پاڙي، جيڪب لائين، بلوچ پاڙي جي رهواسين نمائش چورنگي وٽ احتجاج ڪيو، غريب آباد، گلشن اقبال ۽ ابوالحسن اصفهاني روڊ وارن علائقن ۾ پڻ بجلي جي فراهمي معطل رهي، هوڏانهن ڪامران چورنگي وٽ بجلي بند هجڻ خلاف رهواسين سخت احتجاج ڪيو ان دوران اتان گذريندڙ ڪي اليڪٽرڪ جي گاڏي تي پٿراءُ ڪري ان جا شيشا ٽوڙي ڇڏيا، هوڏانهن گڏاپ واري علائقي ۾ تيز رفتار ڊمپر هاءِ ٽرانسميشن لائين سان ٽڪرائجي ويو جنهن جي نتيجي ۾ ڪراچي جي ڪيترن ئي علائقن کي بجلي جي سپلاءِ معطل ٿي وئي  سخي حسن، ڪورنگي ۾ احتجاج ڪيو ويو. حيدرآباد ۾ لوڊشيڊنگ خلاف شهرين ريلوي ٽريڪ تي ڌرڻو هنيو. ٽنڊي الهيار، ميرپورخاص، دادو ۽ لاڙڪاڻي ۾ ڪيترائي ڪلاڪ لوڊشيدنگ سبب شهري رستن تي نڪري آيا. قومي شاهراهه ۽ انڊس هاءِ وي تي ڌرڻا هنيا ويا. ملتان ۾ پي ٽي آءِ ڪارڪنن احتجاج ڪيو. راولپنڊي، زيارت ۽ پشاور ۾ به احتجاج ڪيو ويو. سخت گرمي سبب ٽنڊي جان محمد ۾ 3، صالح پٽ ۾ 2، چوهڙ جمالي ۾ هڪ ڄڻو فوت ٿي ويو. تنگواڻي ۾ هڪ ڄڻو فوت، ڪالهه تربت ۾ سڀ کان وڌيڪ گرمي پد 47 ڊگري سينٽي گريڊ رڪارڊ ڪيو ويو. موهن جو دڙو ۽ سبي ۾ 44، جيڪب آباد، دادو ۽ ڪراچي ۾ 42، لاڙڪاڻي، ميرپورخاص ۽ ڇور ۾ 41، نواب شاهه ۾ 39، بهاولپور ۽ ملتان ۾ 37 ڊگري رڪارڊ ڪيو ويو. موسميات کاتي 23 جون بعد گرمي جو زور ٽٽڻ جو امڪان ڏيکاريو آهي. ضرورت ان ڳالهه جي آهي ته حڪومت کي گهرجي ته هن سخت گرميءَ دوران عوام کي بجلي فراهم ڪري ته جيئن رمضان جهڙي ڀلاري مهيني ۾ عوام سڪون جو ساهه کڻي سگهي.