تازيون خبرون

Daily Archives: June 23, 2015

 دهشتگردي جو ناسور ختم ڪرڻ لاءِ قوم متحد آهي، وڏي قيمت ادا ڪري چڪا آهيون: نواز شريف

اسلام آباد (بيورو) وزيراعظم نواز شريف چيو آهي ته پاڪستان دهشتگردي خلاف جنگ ۾ وڏي قيمت ادا ڪئي، دهشتگردي جي ناسور کي ختم ڪرڻ لاءِ پوري قوم متحد آهي، آپريشن ضرب عضب ۾ دهشتگردن جي ٺڪاڻن ۽ نيٽ ورڪس کي ڪاميابي سان ٽوڙيو ويو، متاثرن جو پهريون جٿو گهرن ڏانهن واپس وڃي چڪو آهي، حڪومت متاثرن جي بحالي ۽ نئين سر تعمير لاءِ هڪ ارب ڊالر رکيا، وزيراعظم هائوس ۾ وزيراعظم نواز شريف سان پناهگيرن بابت گڏيل قومن جي هاءِ ڪمشنر ملاقات ڪئي، جنهن ۾ افغان پناهگيرن جي بحالي ۽ واپسي بابت معاملن تي ويچاريو ويو. ان موقعي تي ڳالهائيندي وزيراعظم نواز شريف وڌيڪ چيو ته پاڪستان افغان پناهگيرن جي بهتر طريقي سان سار سنڀال ڪئي ۽ هاڻ کين باعزت طريقي سان واپس موڪلڻ حڪومت جي پهرين اوليت آهي. ملاقات ۾ سيفران وارو وفاقي وزير ليفٽيننٽ جنرل (ر) عبدالقادر بلوچ، وزيراعظمجو پرڏيهي صلاحڪار سرتاج عزيز، سيڪريٽري جاويد اسلم، سيڪريٽري سيفران پير بخش جمالي ۽ پناهگيرن بابت ڪمشنر  عمران زيب پڻ موجود هئا.

 

تنقيد ڪندڙ شهريار مهر ۽ شيرازي ڀائرن پ پ ۾ شموليت لاءِ منٿون ڪيون: شرجيل ميمڻ ،

ڪراچي (اسٽاف رپورٽر) سنڌ اسيمبليءَ ۾ مخالف ڌر ميمبرن بدترين لوڊشيڊنگ خلاف سخت احتجاج ڪندي ايوان مان علامتي واڪ آئوٽ ڪيو جڏهن ته سخت گرمي سبب ماڻهن جي فوتگين جو ڪيس ڪي اليڪٽرڪ ۽ سنڌ حڪومت خلاف داخل ڪرائڻ جو مطالبو پڻ ڪيو ويو. سنڌ اسيمبلي جو اجلاس ڊپٽي اسپيڪر شهلا رضا جي صدارت هيٺ شروع ٿيو ته ميمبرن بجيٽ بدران بدترين لوڊشيڊنگ خلاف بحث شروع ڪري ڏنو. سنڌ اسيمبلي ۾ صوبائي وزير شرجيل ميمڻ ۽ اپوزيشن ميمبرن وچ ۾ سخت جملن جي ڏي وٺ ٿي، شرجيل ميمڻ جي تقرير دوران اپوزيشن ميمبرن ” 2 ارب، 2 ارب“ جا نعرا هنيا، شرجيل ميمڻ فنڪشنل ليگ ميمبر نند ڪمار کي چيو ته” توکان نٿو ڊڄان، توکي ته ڏسي رهندس. سنڌ اسيمبلي جي اجلاس ۾ صوبائي وزير شرجيل ميمڻ ڪراچي جي ترقياتي بجيٽ تي ڳالهائيندي چيو ته اپوزيشن جي تنقيد بنا جواز آهي، ڪراچي جي منصوبن لاءِ 49 ارب رپيا رکيا ويا آهن، ڪيترن ئي منصوبن تي ڪم هلي رهيو آهي، ڪي فور ۽ ٻيا منصوبا به جلد مڪمل ڪيا ويندا. صوبائي وزير شرجيل ميمڻ جي تقرير دوران ايم ڪيو ايم ۽ فنڪشنل ليگ جي ميمبرن ” 2 ارب، 2 ارب“ جا هوڪرا ڪيا، جنهن تان ايوان جو ماحول گرم ٿي ويو. صوبائي وزير شرجيل ميمڻ چيو ته سڀني کي خبر آهي ته نيٽو ڪنٽينرن مان چوري ٿيل هٿيار ڪٿان مليا، سندس وات نه کولرايو وڃي، شهريار مهر ۽ شيرازي ڀائرن پ پ ۾ شموليت لاءِ منٿون ڪيون، اڄ پ پ تي تنقيد ڪري رهيا آهن. شرجيل ميمڻ چيو ته ڪير غلط فهمي ۾ نه رهي، پ پ قومي ادارن جو احترام ڪري ٿي، ڪنهن جي به خواهش پوري نه ٿيندي. شرجيل ميمڻ چيو ته اهو تاثر ڏنو پيو وڃي ته پ پ ۽ اسٽيبلشمينٽ ۾ ڇڪتاڻ آهي، پ پ فوج جي ڪالهه به عزت ڪندي هئي، اڄ به ڪري ٿي ۽ هميشه ڪندي رهندي هن چيو ته هو سڀ هڪ هئا ۽ هڪ رهندا، ڊڄڻ انهن کي گهرجي جن دهشتگردن سان مفاهمت ڪري رکي آهي، اهي ڊڄن جيڪي طالبان جي سهڪار سان چونڊون کٽي آيا آهن. اپوزيشن ليڊر خواجا اظهار الحسن ۽ متحده ميمبر محمد حسين چيو ته ڪراچي ۾ سخت گرمي سبب ماڻهو فوت ٿي ويا ۽ ڪــَي اليڪٽرڪ انتظاميه اَي سي وارن ڪمرن ۾ ويهي بيان جاري ڪري ٿي جڏهن ته کيس ايوان ۾ ٿڌي هوا ڏسي سخت ڏک ٿي رهيو آهي. هنن چيو ته ڪــَي اليڪٽرڪ جي نااهلي سبب پاڻي جو بحران بدترين ٿي چڪو آهي، وفاقي وزير خواجا آصف ۽ عابد شير علي کي بجلي بابت ڪا به ڄاڻ ناهي. ايم ڪيو ايم ميمبرن چيو ته هڪ ڪلاڪ ايوان جي ايئرڪنڊيشن بند ڪئي وڃي ته ميمبرن کي بجلي بند هجڻ جو احساس ٿيندو. ان موقعي تي سينيئر صوبائي وزير نثار کهڙي چيو ته ايوان جي اَي سي بند ڪرڻ سان مسئلو حل نه ٿيندو، ڪــَي اليڪٽرڪ کي خانگائڻ جي هنن مخالفت ڪئي هئي. نثار کهڙي چيو ته ڪـَي اليڪٽرڪ کي گرمي سبب فوت ٿيل ماڻهن جي وارثن سان همدردي جو اظهار ڪرڻو آهي ته کين معاوضو ڏنو وڃي. صوبائي وزير جاويد ناگوري چيو ته هڪ ڪلاڪ اَي ســِي بند ڪرڻ سان فائدو نه ٿيندو، هڪ ڏينهن جي عام موڪل ۽ مسئلي جو اثرائتو حل ڳوليو وڃي. پي ٽي آءِ ميمبر خرم شير زمان چيو ته گرمي جي شدت ۽ بدترين لوڊشيڊنگ جي نشاندهي باوجود حڪومت ڪي به قدم نه کنيا ان ڪري ڪي اليڪٽرڪ انتظام سميت سنڌ حڪومت خلاف به ايف آءِ آر داخل ڪرائي وڃي. پ پ ميمبر شميم ممتاز چيو ته ڪــَي اليڪٽرڪ خلاف ايف آءِ آر اسپيڪر ۽ ڊپٽي اسپيڪر جي فرياد تي داخل ڪرائڻ گهـُرجي. پ پ ميمبر ڊاڪٽر سهراب سرڪي چيو ته گرمي سبب فوتگين جي ذميوار ڪــَي اليڪٽرڪ آهي، فوت ٿيلن لاءِ دعا ڪرائي وڃي. بجلي جي بدترين لوڊشيڊنگ خلاف ايم ڪيو ايم سميت مخالف ڌر جي ٻين ميمبرن علامتي واڪ آئوٽ پڻ ڪيو. اجلاس دوران صوبائي وزير جاويد ناگوري چيو ته لياري ۾ سڀ کان اڳ مهاجر آبادي قائم ٿي، پ پ جي ترقياتي ڪمن کي نه مڃڻ منافقت آهي. جاويد ناگوري چيو ته مڪي ۽ مديني جي هجرت کي هندستان جي هجرت سان نه ڳنڍيو وڃي، ان هجرت ۾ پنجابين جو اهم ڪردار آهي. هن چيو ته گرمي تي سياست ڪرڻ بدران برسات لاءِ دعا ڪرائي وڃي، ايم ڪيو ايم ڪجهه ٽــَڪن خاطري ڪــَي اليڪٽرڪ کي خانگايو. جاويد ناگوري چيو ته ايم ڪيو ايم وارا ڪنهن کي برادشت نه ٿا ڪرڻ چاهين، هــُو مهاجر دشمني نه پر محب وطني تي ڳالهائي رهيو آهي. جاويد ناگوري جي تقرير دوران ايم ڪيو ايم ميمبرن گوڙ ڪيو. صوبائي وزير جاويد ناگوري ايم ڪيو ايم ميمبرن جي گوڙ باوجود تقرير جاري رکي ۽ چيو ته هــُو امن ڪميٽي کان لاتعلقي جو اعلان ڪري ٿو ۽ ڪنهن به قسم جي دهشتگردي جي مخالفت ڪري ٿو.

 

آصف زرداري جو وزيراعظم کي خط، سنڌ ۾ لوڊشيڊنگ تي نوٽيس وٺڻ جو مطالبو

ڪراچي (اسٽاف رپورٽر) پيپلزپارٽي جي ڪو چيئرمين ۽ اڳوڻي صدر آصف علي زرداري وزيراعظم نوازشريف کي خط لکيو آهي جنهن ۾ سنڌ ۾ لوڊشيڊنگ تي ڪنٽرول ڪرڻ لاءِ قدم کڻڻ جو مطالبو ڪيو ويو آهي. آصف زرداري پاران لکيل خط ۾ چيو ويو آهي ته بدترين گرمي ۾ سنڌ ۾ 20 ڪلاڪن جي لوڊشيڊنگ ڪئي پئي وڃي جنهن سان رمضان المبارڪ مماڻهن ۾ ڏکيائيون وڌي رهيون آهن وزيراعظم صوبي ۾ ٿيندڙ بدترين لوڊشيڊنگ جو نوٽيس وٺي ۽ ان تي ڪنٽرول ڪرڻ لاءِ قدم کڻي. خط ۾ چيو ويو آهي ته سنڌ وفاق کي بجلي جي بلن جي مد ۾ 2.4 ارب روپيا ادا ڪري چڪي آهي پر انهيءَ جي باوجود وفاق پاران صوبي ۾ لوڊشيڊنگ جو مسئلو حل نه ٿيو آهي جڏهن ته مئي ۾ وزيراعظم سان ملاقات دوران به لوڊشيڊنگ جو مسئلو کنيو ويو هو. آصف زرداري پاران موڪليل خط ۾ وزيراعظم جي توجه نئون ديرو ۽ دادو جي ننڍن پاور پلانٽس جي ٽيرف جو مسئلو به ياد ڏياريو آهي.

 

قومي اسيمبلي ۾ اپوزيشن جماعتن جي ميمبرز پاران اڻ اعلانيل لوڊشيڊنگ خلاف سخت احتجاج، واڪ آئوٽ

اسلام آباد (بيورو) قومي اسيمبلي ۾ اپوزيشن جماعتن جي ميمبرز اڻ اعلانيل لوڊشيڊنگ خلاف سخت احتجاج ڪرڻ بعد واڪ آئوٽ ڪيو ،  اڳواڻن چيو آهي ته لوڊشيڊنگ حڪومتي دعوائن جا پول پڌرا ڪري ڇڏيا آهن، گرمي ۽ لوڊشيڊنگ سبب ايترو جانيون ضايع ٿيڻ حڪومت جي نااهلي جو ثبوت آهي. اسپيڪر سردار اياز صادق جي صدارت هيٺ قومي اسيمبلي جو اجلاس ٿيو، جنهن  ۾ ڪراچي ۾ گرمي سبب انساني جانيون ضايع ٿيڻ ۽ اڻ اعلانيل لوڊشيڊنگ تي اپوزيشن جي ميمبرز سخت احتجاج ڪيو. جماعت اسلامي جا ميمبر لوڊشيڊنگ بند ڪريو جا بينر کڻي اسيمبلي جي چيمبر آڏو بيهي رهيا. پ پ ايم اين اي شازيه مري چيو ته حڪومت اقتدار ۾ اچڻ بعد دعويٰ ڪئي هئي ته 6 مهينن اندر لوڊشيڊنگ ختم ڪئي ويندي پر 3 سال گذرڻ وارا آهن، لوڊشيڊنگ گهٽجڻ بدران وڌي رهي آهي. شازيه مري چيو ته رمضان مبارڪ جي ڀلاري مهيني ۾ به سحري ۽ افطار دوران به بجلي جي لوڊشيڊنگ ٿي رهي آهي. تحريڪ انصاف جي اڳواڻ شاهه محمود قريشي چيو ته گرمي ۽ لوڊشيڊنگ سبب انساني جانيون ضايع ٿي رهيون آهن، پر حڪومت جي ڪن تي جونءَ به نٿي چـُري. شاهه محمود قريشي چيو ته گرمي سبب 150 کان وڌيڪ ڪراچي ۾ جانيون ضايع ٿي رهيون آهن، کيس فون اچي رهيا آهن ته ٿر پارڪر ۾ 16 جون کان بجلي بند آهي، ڏڪار سٽيل علائقن ۾ بجلي بند ڪئي پئي وڃي، جتي اڳ ئي ماڻهو پاڻي ڍڪ لاءِ ترسي رهيا آهن. جماعت اسلامي جي ميمبر طار الله چيو ته مالاڪنڊ ۾ 22 ڪلاڪن کان بجلي بند آهي، حڪومت قبائلي علائقن سان زيادتيون بند ڪري.

 

ڪراچي ۾ قهر جي گرميءَ سبب 200 کان جانيون ضايع ٿيون آهن پر حڪومت ايوان ۾ وضاحت ڏيڻ لاءِ تيار ناهي: خورشيد شاهه

اسلام آباد(بيورو) قومي اسيمبلي جي اجلاس بعد ميڊيا سان ڳالهائيندي اپوزيشن ليڊر خورشيد شاهه چيو ته سڄي ملڪ ۾ بدترين لوڊشيڊنگ ڪئي پئي وڃي، ڪراچي ۾ قهر جي گرميءَ سبب 200 کان جانيون ضايع ٿيون آهن پر حڪومت ايوان ۾ وضاحت ڏيڻ لاءِ تيار ناهي، چيو وڃي ٿو ته وزير موجود ناهي. خورشيد شاهه چيو ته بدترين لوڊشيڊنگ حڪومت جي نااهلي جو چٽو ثبوت آهي، بجلي جي اڻ اعلانيل بندش اپوزيشن کي متحد ڪري ڇڏيو آهي. حڪومت جي نااهلي سبب پهريون ڀيرو ايتريونجانيون ضايع ٿيون آهن، حڪومت ٻن سالن دوران لوڊشيڊنگ جي خاتمي تي ڪو به ڌيان نه ڏنو آهي، سرڪلر ڊيٽ وڌي ويو آهي پر حڪومت جي ترجيحن ۾ ڪجهه ميگا پراجيڪٽ آهن، عوام حڪومتي ترجيحن ۾ شامل ئي ناهي. ڪراچي ۾ ٽن ڏينهن دوران ڏيڍ سئو کان وڌيڪ جانيون ضايع ٿيون آهن، حڪومتي اعلانن باوجود لوڊشيڊنگ جو سلسلو جاري آهي.

 

سول حڪومتون عوام کي بنيادي شيون فراهم ڪرڻ ۾ ناڪام ٿي چڪيون : الطاف حسين

لنڊن (مانيٽرنگ ڊيسڪڪ) ايم ڪيو ايم جي باني تحريڪ الطاف حسين چيف آف آرمي اسٽاف جنرل راحيل سريف کي مخطاطب ٿيندي ان کي اپيل ڪئي ته جتي جتي سويلين حڪومتون وفاقي حڪومت عوام کي بنيادي سهولتون مثال طور گئس بجلي ۽ پاڻي جهڙيون بنيادي شيون فراهم ڪرڻ ۾ ناڪام ٿين اتياتي اوهان سمورن علائقائي ڪمانڊرن سب ڪمانڊرن ۽ يونٽ ڪمانڊرن کي ارجنٽ هدايت ڏيو ته اهي ميدان عمل ۾ اچي اهڙي طرح محنت سان عوام کي هي بنيادي سهولتون فراهم ڪن جهڙي طرح اهي زلزلن ٻوڏن قدرتي آفتن ۽ ٻين موقعن تي پنهنجي روزمره جا سمورا معاملا ڇڏي عوام جي فلاح ۽ بهبود لاءِ ايندا رهيا آهيو الطاف حسين چيو ته اهڙي طرح هڪ طرف عوام جون ڏکيائيون ۽ انهن جون پريشانيون گهٽجي وينديون جڏهن ته ٻئي طرف ڪروڙين عوام پاڪ فوج کي دعائون ڏيندو هن چيو ته هائيڊرنگ پاران پاڻي جا ٽينڪر اڄ به وڪرو ڪيا پيا وڃن بجلي اڄ به چوري ٿي رهي آهي ۽ گئس جا ناجائز ڪنيڪشن گئس جي قلت جو سبب بڻجي رهيا آهن الطاف حسين ڪراچي جي عوام کي اپيل ڪئي ته اهو ان ڏکئي وقت ۾ صبر ڪري هڪٻئي جي مدد جي اصول مطابق هڪٻئي جون ڏکيائيون حل ڪرڻ جون ڪوششون ڪيو الطاف حسين ايم ڪيو ايم جي سمورن ذميوارن ڪارڪنن ۽ همدرد عوام کي الله ۽ ان جي رسول جو واسطو ڏيئي ان کي اپيل ته بجلي گئس ۽ پاڻي جي روانگي جو نظام مرمت ۽ انهن سهولتن جو عدم فراهمي جو سبب بڻجندڙ ٻيا فالٽ دور ڪرڻ لاءِ جڏهن انهن ادارن جاآفيسر ۽ ملازم اوهان جي علائقن ۾ پهچن ته اوهان انهن تي تشدد نه ڪيو ۽ نه ئي انهن جون گاڏين ۽ سامان کي نقصان پهچايو پر عملي سان مڪمل تعاون ڪيو.

 

پ پ قائم علي شاهه کي عسڪري قيادت سان ملاقات ۽ خورشيد شاهه کي وفاقي حڪومت سان وڇوٽيون ختم ڪرڻ جو ٽاسڪ ڏئي ڇڏيو

ڪراچي (اسٽاف رپورٽر) پاڪستان پيپلزپارٽي عسڪري قيادت سان لاڳاپا ٻيهر قائم ڪرڻ جو فيصلوڪندي سيد قائم علي شاهه کي آپريشن بابت غلط فهميون دور ڪرڻ جو ٽاسڪ ڏيئي ڇڏيو آهي ذريعن مطابق لاڙڪاڻي ۾ پيپلزپارٽي جي اڳواڻن جو اهم اجلاس ٿيو اجلاس ۾ فيصلو ڪيو ويو ته عسڪري قيادت سان لاڳاپا ٻيهر قائم ڪرڻ لاءِ سيد قائم علي شاهه ڪور ڪمانڊر ڪراچي ۽ ڊي جي رينجرز سان ملاقات ڪندو جنهن ۾ آصف زرداري جي بيان کان پوءِ پيدا ٿيل خدشا ۽ تحفظات دور ڪيا ويندا اجلاس ۾ مخالف ڌر اڳواڻ کي ذميواري ڏني ويئي ته هو وفاقي حڪومت ۽ پيپلزپارٽي وچ ۾ وڇوٽيون ختم ڪرڻ لاءِ پنهنجو ڪردار ادا ڪري ان ڏس ۾ هو وزيراعظم نوازشريف سان جلد ملاقات ڪري.

 

ڪراچي ۾ تيز برسات، ٻن ڏينهن اندر 200 جانيون ڳڙڪائيندڙ گرمي جو زور ٽٽي ويو

ڪراچي (اسٽاف رپورٽر) ڪراچي ۾ سخت گرمي سبب فوتين جو انگ 200 کان وڌي وڃڻ کاپوءِ برسات شهرين ۾ ساهه وجهي ڇڏيو، ڪراچي ۾ صبح کان ئي سخت گرمي کانپوءِ منجهند جو آسمان تي ڪارا ڪڪر ڇانئجڻ شروع ٿي ويا ۽ پوءِ اوچتو مختلف علائقن ۾ تيز برسات شروع ٿي وئي، ڪورنگي، نارٿ ناظم آباد ۽ ٻين علائقن ۾ برسات کانپوءِ گرمي جو زور ٽٽي ويو ۽ هڪ هفتي کان گرمي توڙي بجلي جي لوڊشيڊنگ جو عذاب ڀوڳيندڙ ڪراچي واسين سک جو ساهه کنيو، گادي واري شهر ۾ گرمي پد 40 ڊگري سينٽي گريڊ کان وڌيڪ هجڻ ڪري رڳو 24 ڪلاڪن اندر 150 کان وڌيڪ ماڻهو حياتي وڃائي ويٺا هئا،جنهن کانپوءِ اڄ وڌيڪ 50 ماڻهن جي ساهه جوسڳو ٽٽي پيو ۽ انگ 200 تائين وڃي پهتو، موسميات کاتي جي ڊي جي مطابق ڪراچي ۾ اڱاري کان جمعي تائين ساهي ساهي سان وسڪاري جو امڪان ظاهر ڪيو هو پر اڄ منجهند ڌاري شهر جي مختلف علائقن ۾ تيز وسڪاري گرمي ۾ ڪڙهندڙ شهرين ۾ ساهه وجهي ڇڏيو،موسميات کاتي مطابق اڄ کان سامونڊي پٽي تي هوا گهلڻ سبب گرمي جو زور ٽٽندو، جڏهن ته اڄ رات ڪراچي ۾ گرمي پد 30 سينٽي گريڊ تائين پهچڻ جو امڪان آهي. موسميات کاتي مطابق حيدرآباد، ميرپورخاص ۽ سکر ڊويزن ۾ به برسات جو امڪان آهي، ان کانسواءِ ڪي پي ڪي، پنجاب ۽ بلوچستان جي مختلف علائقن ۾ پڻ 24 ڪلاڪن دوران برسات جي اڳڪٿي ڪئي وئي آهي.

 

نيب ڪراچي ۾ ريفارم سپورٽ يونٽ جي دفتر تي ڇاپو، ڊائريڪٽر سميت 4 ملازم سوگها

ڪراچي (اسٽاف رپورٽر) نيب ڪراچي ۾ تعليم کاتي جي ماتحت اداري ريفارم سپورٽ يونٽ جي دفتر تي ڇاپو هڻي ڊائريڪٽر صبا محمود سميت 4  ملازمن کي گرفتار ڪري ورتو، ريفارمز سپورٽ يونٽ تي اربين رپين جي ڪرپشن جا الزام هئا. سومر ڏينهن يب ذريعن موجب تعليم کاتي جي ماتحت اداري ريفارمز سپورٽ يونٽ جي دفتر تي ڇاپو هنيو، مالي بي ضابطگين جي نشاندهي تي آڊٽ اعتراضن جي روشني ۾ ڇاپو هنيو ويو، ريفارمز سپورٽ يونٽ تي اربين رپين جي ڪرپشن جا الزام هئا، ڇاپي دوران ريفارمز سپورٽ يونٽ جي ڊائريڪٽر صبا محمود سميت چئن ملازمن کي گرفتار ڪيو ويو.

 

ملڪ ۾ 40 سيڪڙو اين جــِي اوز اڻ رجسٽرڊ آهن:چوڌري نثار

اسلام آباد (بيورو) وفاقي گهرو وزير چوڌري نثار علي خان پرڏيهي اين جي اوز کي 6  مهينن جي مهلت ڏيندي چيو آهي ته 6  مهينن تائين سيو دي چلڊرين سوڌو سڀئي اين جي اوز قانون تحت ڪم ڪنديون رهنديون، جيڪي اين جي اوز 6  مهينن تائين نون قانونن هيٺ رجسٽريشن نه ڪرائينديون يا جن اين جي اوز کي اسان روڪينداسين اهي ملڪ ۾ ڪم نه ڪري سگهنديون، ڪنهن اين جي اوز کي ملڪي ۽ اسلامي قدرن خلاف ڪم ڪرڻ جي اجازت نه ڏينداسين، . ميڊيا سان ڳالهائيندي چوڌري نثار علي  خان چيو ته سيو دي چلڊرين تان پابندي هٽائڻ جو ڪوبه فيصلو ناهي ٿيو، ڪڏهن به نه چيو هو ته سيو دي چلڊرين ملڪ دشمن آهي، اها اين جي او 7 9 9 1  کان رجسٽرڊ آهي، 2 1 0 2 ع ۾ سيو دي چلڊرين خلاف انٽيليجنس شڪايتون مليون هيون، ڪو غلط فهمي ۾ نه رهي ته اين جي اوز جي آڙ ۾ ڪنهن کي ملڪي مفاد خلاف ڪم ڪرڻ ڏينداسين، ملڪ ۾ اين جي اوز بابت پهرين ڪو قانون نه هو، هاڻ حڪومت اين جي اوز بابت گهڻيون پاليسيون ٺاهي رهي آهي، هن چيو ته پاڪستان ۾ سڀني اين جي اوز کي ملڪي قانونن ۾ رهندي ڪم ڪرڻو پوندو، پاڪستان ۾ ڪافي اين جي اوز سٺو ڪم ڪري رهيون آهن، جڏهن ته ڪجهه اين جي اوز ملڪي مفاد خلاف به ڪم ڪري رهيون هيون، حڪومت اين جي اوز بابت نيون پاليسيون آڻي رهي آهي، سٺا ڪم ڪندڙ اين جي اوز کي ساراهينداسين، ميڊيا کي به خبر ڏيڻ وقت ذميواري جو مظاهرو ڪرڻ گهرجي، چوڌري نثار علي خان چيو ته پاڪستان ۾ هزارين اين جي اوز ڪم ڪري رهيون آهن، جن مان 0 4  سيڪڙو غير رجسٽرڊ آهن، پاڪستان ۾ اين جي اوز 10 کان 18 قانون استعمال ڪن ٿيون. گهرو وزير چيو ته ملڪي تاريخ ۾ پهريون ڀيرو اين جي اوز کي باقاعدا مضبوط نظام تحت آندو پيو وڃي. وزيراعظم جي فيصلي تي اين جي اوز جا سڀ معاملا گهرو وزارت ڏسندي، اين جي اوز جي رجسٽريشن جو طريقيڪار سادو ۽ آن لائين هوندو، اين جي اوز جي احتساب ۽ شفافيت جو مناسب نظام قائم ڪيو ويندو، هن چيو ته سيو دي چلڊرين تي پابندي هٽائڻ جو اڃا ڪو فيصلو ناهي ٿيو، غير منظور ٿيل اين جي اوز کي ويزا به جاري نه ڪنداسين، چوڌري نثار علي خان چيو ته سيو دي چلڊرين 7 9 9 1 ع کان رجسٽرڊ اين جي او آهي، 2012ع ۾ سيو دي چلڊرين جي حوالي سان انٽيليجنس رپورٽ سامهون آئي، گذريل حڪومت ان رپورٽ تي ايڪشن ڇو نه ورتو؟