تازيون خبرون

Daily Archives: June 22, 2015

رڪارڊ ٽوڙ گرمي ۽ لوڊشيڊنگ جو آزار…؟

 

ملڪ ۾ سخت گرمي رڪاڊ ٽوڙي ڇڏيا. ڪراچي ۾ 10 سالن جو رڪارڊ ٽٽي ويو. سخت گرمي باوجود لوڊشيڊنگ سبب 9 ڄڻا فوت ٿي ويا. عوام جو صبر ڇڏائجي ويو، وزيراعظم هنگامي قدم کڻڻ جي هدايت ڪري ڇڏي. عابد شير علي عوام کان معافي گهري ورتي آهي. ڪراچي شهر ۾ ٻئين سحري دوران به بجلي جي اڻ اعلانيل لوڊشيڊنگ جاري رکي وئي، جنهن جي ڪري عورتن کي رڌپچاءَ سميت ٻين ڪمن ڪارن ۾ سخت مشڪلاتون پيش آيون. ناظم آباد، لياقت آباد، عزيزآباد، ماڊل ڪالوني، پراڻي سبزي منڊي، جيل چورنگي سميت ٻين اڪثر علائقن ۾ بجلي بند رهي، لوڊشيڊنگ خلاف عزيز آباد ۽ جيل چورنگي وٽ شهري گهرن کان ٻاهر نڪري آيا ۽ روڊن تي احتجاجي مظاهرو ڪندي ٽائرن کي باهيون ڏينون جنهن جي ڪري ٽرئفڪ معطل ٿي وئي. هوڏانهن اليڪٽرڪ انتظاميا جو چوڻ آهي ته سوئي سدرن گئس ڪمپني پاران گئس گهٽ ڏني پئي وڃي جنهن سبب اهو مسئلو پيدا ٿيو آهي. جاري ڪيل بيان ۾ اليڪٽرڪ  جي ترجمان چيو ته گذريل رات سوئي گئس پاران ڪي اليڪٽرڪ  جي سائيٽ ايريا ۽ ڪورنگي ۾ لڳل اليڪٽرڪ پلانٽس جي گئس ڪٽي وئي آهي جنهن  جي ڪري گئس تي هلندڙ ٻئي پلانٽ بند ٿي ويا آهن جنهن سان “ڪي اي” جي پيداوري صلاحيت ۾ گهٽتائي ٿي آهي ۽ شهر سحري وقت اونداهي ۾ ٻڏل آهي. بيان ۾ وڌيڪ چيو ويو آهي ته  بجلي جي گهرج  وڌي1300 ميگاواٽ تائين پهچي چڪي آهي ۽ گرمي جي شدت وڌڻ سان گڏوگڏ بجلي جي گهرج ۾ واڌ ٿي آهي .مٽياري ۾ 15 منٽن کانپوءِ ٻه ٻه ڪلاڪ بجلي بند رهي. ڪوٽڙي ۾ 16 ڪلاڪ بجلي بند رهي. ڀان سيد آباد ۾ 20 ڪلاڪ لوڊشيڊنگ رهي. ميرپور ماٿيلي ۽ مومل جي ماڙي ۾ 16 ڪلاڪن تائين بجلي رهڻ معمول بڻجي ويو. ڪڙئي گهنور ۾ بجلي بند رهي. ٺٽي، غلام الله ۽ ڀرپاسي به ڪيترائي ڪلاڪ بجلي بند رهي. ڪوئلي جي دولت رکندڙ ٿر جي شهرن ۾ لڳاتار 36 ڪلاڪن تائين بجلي بند رهي. جيڪب آباد، حيدرآباد، نواب شاهه، پنگرئي، شڪارپور، سلطان ڪوٽ ۾ ڪيترائي ڪلاڪ بجلي بند رهي. رحيم  يار خان، پشاور ۽ راولپنڊي جي ڀرپاسي بجلي بند رهي. پختون خواهه، پنجاب ۽ بلوچستان جي علائقن ۾ ڪيترائي ڪلاڪ بجلي بند رهي. پشاور ۾ شهرين وفاقي صلاحاڪر امبر مقام کي گهيرو ورتو. ڊگهڙي ۾ ٻن ڏينهن کان بجلي بند رهي. اسلام ڪوٽ ۾ 30 ڪلاڪ ۽ مٺي ۾ 26 ڪلاڪن تائين بجلي بند رهي. ملتان ۾ بجلي بندش خلاف شهرين ريلوي ٽريڪ بلاڪ ڪيو. سينٽرل جيل جي قيدين به احتجاج ڪيو. موسميات کاتي پاران جاري ڪيل پڌرائي موجب سڄي ملڪ ۾ سخت گرمي جي لهر برقرار آهي. پڌرائي موجب، سامونڊي هوائون بند ٿيڻ ڪري ڪراچي ۾ گرمي جو 10 ورهيه پراڻو رڪارڊ ٽٽي ويو آهي، جتي ڪالهه گرمي پد 46 ڊگري سينٽي گريڊ رڪارڊ ڪيو ويو. موسميات کاتي جو چوڻ آهي ته ملڪ اندر سڀ کان وڌيڪ گرمي پد جيڪب آباد ۾ 49 ڊگري سينٽي گريڊ رڪارڊ ڪيو ويو. پڌرائي موجب، سبي ۽ ڀڪر ۾ 48، لاڙڪاڻي، موهن جي دڙي، ڪوٽ ادو، نور پور ٿل ۽ بهاولنگر ۾ 47، سکر، لسٻيلا، رحيم يار خان، اوڪاڙه ۽ شورڪوٽ ۾ 46، جڏهن ته ملتان ۾ 43 ڊگري سينٽي گريڊ گرمي پد رڪارڊ ڪيو ويو. موسميات کاتي جو چوڻ آهي ته ڪراچي سميت سنڌ ۽ بلوچستان جي ميداني علائقن ۽ ڏکڻ پنجاب ۾ گرمي جو دٻاءُ وڌيڪ ٻن ڏينهن تائين برقرار رهندو. موسميات کاتي موجب ايندڙ 24 ڪلاڪن دوران حيدرآباد 43 ۽ ڪراچي ۾ 41 ڊگري سينٽي گريڊ گرمي پد رهڻ جو امڪان آهي. ٻئي طرف وزيراعظم جي نوٽيس وٺڻ باوجود سنڌ ۾ رمضان شريف دوران به ڊگهي لوڊشيڊنگ جو سلسلو جاري آهي، سول اسپتال مٺي ۾ 50 ورهين جو ناٿو ڀيل جڏهن ته اشوڪ ميگهواڙ جي ٻن ڏينهن جي ٻارڙي فوت ٿي وئي. ڇاڇري جي خانگي اسپتال ۾ پنجن ڏينهن جو اصغر نهڙيو ۽ ڇهن ڏينهن جو لطيف رند گرمي جي سٽ نه سهندي فوت ٿي ويا. مٺي ۽ آسپاس جي ڪيترن ئي شهرن جي گذريل ڏينهن کان بجلي بند هئڻ سبب پيئڻ جي پاڻي جي فراهمي پڻ معطل ٿي وئي آهي. ٻئي پاسي کهڙا ڀرسان رپڙي وٽ روڊ جي تعميراتي ڪم ۾ مصروف پورهيت شادو ماڙيچو گرمي لڳڻ ڪري فوت ٿي ويو.ڀٽ شاهه لڳ ڳوٺ مولي ڏنو سهتو ۾ الهه ورايو لاکو فوت ٿي ويو. ڪوٽڙي ۾ 2 ڄٺڻا گرمي جي سٽ نه سهندي فوت ٿي ويا. ڪڙئي گهنور لڳ 80 سالن جو سانبون مشهوري فوت ٿي ويو. 5 ڄڻا بيهوش ٿي ويا. غلام الله لڳ حاجي لکو  فوت ٿي ويو. حيدرآباد شهر، قاسم آباد، لطيف آباد ۽ ٻهراڙي وارن علائقن ۾ اڻ اعلانيل لوڊشيڊنگ 18 کان 20 ڪلاڪن تائين پهچي وئي، گذريل سڄي رات حيدرآباد شهر اونداهه ۾ ٻڏل رهيو، سخت گرميءَ ۾ روزيدارن ۽ شهرين جون متيون مجهي ويون آهن، پيئڻ جي پاڻي جي فراهمي پڻ معطل ٿي وئي، جنهن سبب شهرين کي سحري ۽ افطاري جي وقت پاڻي جي بحران کي پڻ منهن ڏيڻو پئجي رهيو آهي، ڪالهه ٻئي ڏينهن به حيدرآباد شهر جي اڪثر علائقن صدر، گاڏي کاتو، مارڪيٽ، ٽنڊو ولي محمد، هيرآباد، قاسم آباد جي نسيم نگر، قاسم آباد فيز ون، فيز ٽو، انور ولاز،علمدار چوڪ، پرنس ٽائون، رشيد ڳوٺ، پٺاڻ ڳوٺ، اولڊ وحدت ڪالوني، شهباز ڪالوني، پراڻي وحدت ڪالوني، لطيف آباد ۾ حسين آباد، لطيف آباد نمبر 2، 3، 4، 5، 6، 7، 8، 9، 10، 11 ۽ ٻين علائقن ۾ بجلي بند رهي،  لياقت ڪالوني جا رهواسي ڏنڊا هٿن ۾ کڻي گهرن کان ٻاهر روڊن تي نڪري آيا، رهواسين لياقت ڪالوني ۾ حيسڪو آفيس سامهون احتجاجي مظاهرو ڪري ڌرڻو هنيو، ڌرڻي دوران مڇريل ماڻهن حيسڪو آفيس تي حملو ڪري ڀڄ ڊاهه ڪري ڏني، جنهن دوران حيسڪو عملي ڀڄي جان بچائي، اطلاع تي پوليس پهچي وئي، جنهن مظاهرين کي ڇڙو ڇڙ ڪري ڇڏيو، پوليس حملي جي الزام هيٺ هڪ ڄڻي کي گرفتار ڪري لاڪ اپ ڪري ڇڏيو، جڏهن ته قاسم آباد جي ڀٽائي ٽائون ۾ به مڇريل ماڻهن پاران حيسڪو آفيس ۾ داخل ٿي ڀڄ ڊاهه ڪري ڏني، لطيف آباد ۾ حيسڪو سب ڊويزن شهيد اميد علي جي آفيس تي حملو ڪرڻ جو شهرين مٿان ڪيس داخل ڪري 10 کان وڌيڪ ماڻهن کي گرفتار ڪيو ويو آهي، ان موقعي تي مظاهرين چيو ته حيسڪو اختيارين رمضان جي ڀلاري مهيني ۾ لوڊشيڊنگ نه ڪرڻ جو اعلان ڪيو هو پر ان تي عمل نه ٿو ڪيو وڃي.

 

 

 

 

ڪتابن جي دنيا اڃا ويران نه ٿي آهي؛مشتاق ٽانوري

اڄڪلھ دنيا ۾ اهو بحث هلي رهيو آهي ته ٽيڪنالوجي جي هن دور ۾ جڏهن دنيا جي سڄي ڄاڻ ڪمپيوٽر جي ڪي بورڊ جي چاٻين جي مدد سان اسڪرين  تي صرف بٽڻ دٻائڻ سان ملي وڃي ٿي، ڪتاب جي ڪا اھميت آهي، ڪتاب وڪرو ٿئي ٿويا پڙهندڙ ڪتاب هٿ ۾ کڻي ٿو. ان ڳالھ جي جواب ۾ اسن جي دوست ممتاز بخاري جو چوڻ آهي ته، اهو تاثر بلڪل غلط آهي ته ڪو ڪتاب جو پڙهندڙ ان کان ڀڄي ٿو. ڪتاب هاڻي به ڇپجي ٿو ۽ هڪ سال ۾ سوين ٽائيٽل سامهون اچن ٿا پر جاءِ صرف اهو ڪتاب ٺاهي ٿو جنهن ۾ ڪجھ هجي. ڄاڻ ۽ سوچن جي خوبصورتي اندر ۾ سمائيندڙ ڪتاب اڄ به پنهنجي جاءِ ٺاهي ٿو، وڪرو ٿئي ٿو ۽ پڙهندڙ اهو ڪتاب خريد ڪي پڙهن ٿا. سکر جي ٽن دوستن جي محنتن سان سجايل اشاعت گھر ماءِ پبليڪيشن ان جو بهترين مثال آهي. ٻن سالن جي مختصر عرصي ۾ ماءِ پبليڪيشن مختلف موضوعن تي معيار رکندڙ 26 ڪتاب ڇپي چڪي آهي ۽ سندن چوڻ آهي ته ڪنهن به ڪتاب جي وڪري کين مايوس ناهي ڪيو ۽ نه ئي ڪو نقصان ڏنو آهي. سکر ۾ معياري ڪتاب ڇاپيندڙ ماءِ پبليڪيشن جي تازوڇپائي پڌرا ڪيل ڪتابن ”رائي پير رت ڪيا“، ”رگ ويد ۽ سنڌو دريا“ ۽ ”اڻ سڃاتل ناول“ جي مهورت واري تقريب سکر پريس ڪلب جي هال  ۾ ٿي.  ڪتابن جي مهورت مختيار ملڪ، ارباب نيڪ محمد، ناول نگار انور شيخ، آتم ڪٿا لکندڙ امير بخش شر، اياز گل ۽ ممتاز بخاري ڪئي. پروگرام جي ڪمپئيرنگ خالد ٻانڀڻ ڪئي. تقريب ۾ صدارتي خطاب ڪندي هاڪاري شاعر ۽ براڊڪاسٽر مختيارملڪ چيو ته، ليکڪ نه ڳالهائيندا آهن پر انهن جون سرجيل سٽون ڳالهائينديون آھن.

هن چيو ته ، جيڪو ڪم سنڌ جي ڪنهن وڏي اداري کي ڪرڻ گھرجي، اهو ڪم هڪ فرد ڪري رهيو آهي. ماءِ پبليڪيشن پبلشنگ جي صحتمند روايتن جي باني آهي. هي ڪتاب اجايا ناهن پر لائبريرين جي ضرورت آهن. سھڻي شاعر ايازگل چيو ته، سکر علمي، ادبي ۽ ثقافتي حوالي سان پٺتي رهيو آهي، اتي اهڙو اشاعت گھر کولي ۽ مهورت تقريب ڪوٺائي ادبي ۽ ھقافتي سرگرمين ۾ ساھ وجھڻ جي ڪوشش ڪئي وئي آهي. نامياري اديب ۽ ڪالم نگار ارباب نيڪ محمد چيو ته، ليکڪ اڻ ڌريو جائزو وٺي قوم کي اڳتي وڌڻ جو گس ڏسيندا آهن. زميني حقيقتن جو جائزو وٺي اڳتي وڌي دنيا ۾ پنهنجي جاءِ ٺاهي سگھجي ٿي. نقاد ممتاز منگي ۽ شبير شر چيو ته ماءِ پبليڪيشن پاران ڇپائي پڌرو ڪيل ڪتاب سنڌي ادب ۾ تمام سٺو اضافو آهن ۽ هي ڪتاب سنڌي ماڻهن جي لائبريرين ۾ ضرور موجود هئڻ گهرجن جو انهن جو مواد سنڌ جي تاريخ جو حصو آهي ۽ انهن جا ڪردار نج سنڌ ماڻهن جا ڪردار آهن، سنڌ ۽ سنڌي ماڻهن سان محبت ڪندڙ ۽ ٺڳيون ڪندڙن کي پڻ ڄاڻايل ڪتابن ۾ وائکو ڪيو ويو آهي، ”رائي پير رت ڪيا“ جي ليکڪ امير بخش شر ۽ ”اڻ سڃاتل ناول“ جي ليکڪ انور شيخ تقرير ڪندي چيو ته، ماءِ پبليڪيشن اداري پاران هڪ نيئن روايت جو بنياد وڌو ويو آهي جو هو نون اديبن جا لکيل ڪتاب هٿ ڪري پنهنجي خرچ سان ڇپرائي رهيو آهي ۽ نون اديبن کي هن ڌرتي جي ماڻهن سان واقف ڪرائي رهيو آهي، ان کان اڳ ۾ جيڪي به ادارا ڪتاب ڇپرائيندا آهن سي گهڻي ڀاڱي ليکڪ سان ڇپائي جو خرچ وٺندا آهن، ماءِ پبليڪيشن پاران تقرير ڪندي ممتاز بخاري چيو ته، ماءِ پبليڪيشن سنڌي ادب کي تمام بهتر ڪتاب ڏيڻ لاءِ جاکوڙي رهيو آهي، سنڌي ليکڪن کان سواءِ دنيا جي ٻين ٻولين ۾ لکندڙ اديبن جا ڪتاب پڻ ترجمو ڪري ڇپرايا  پيا وڃن. خوشي جهڙي ڳالهه آهي ته، سندن ڪتاب ماڻهو پنهنجي مرضي ۽ خوشي سان خريد ڪري رهيا آهن، ان حوالي سان ڪو مالي نقصان نه ٿيو آهي ۽ اڃان ان اداري ذريعي بهتر ڪتاب ڇپرائبا.  هن تقريب ۾ سکر، شڪارپور، لاڙڪاڻو، هالا، حيدر آباد، خيرپور، گهوٽڪي، پنوعاقل ۽ سنڌ جي ٻين علائقن کان آيل اديبن، شاعرن،نقادن ۽ ساڃاهه وندن عاشق سوز هالائي، ادل سومرو، هارون چنو، سجاد ميراڻي، ياسين جوڻيجو، قدير انصاري، مشتاق ٽانوري، جبار مهر، ضمير ڦل، عبدالغفار ٿهيم، ستار زنگيجو، محمد علي پٺاڻ، غفار ٿهيم، سجاد مهر، عديل مهر، صوبدار سعيد، اڪبر شاهه، ڊاڪٽر خادم منگي، ضياءَ ڀٽي، سچل ڀٽي، امير حمزو ميراڻي، پروفيسر سرور سيف ۽ ٻين وڏي انگ  ۾ شرڪت ڪئي

 

لوڊشيڊنگ!؛واحد پارس هيسباڻي

بجلي بحران تي ڪنٽرول ڪرڻ ۽ لوڊشيڊنگ جي خاتمي جي حوالي سان موجوده سرڪار طرفان جيتريون دعوائون ڪيون ويون آهن، جيڪڏهن ان جي چوٿين حصي جيتري به سنجيدگي اختيار ڪئي وڃي ها ۽ هن مسئلي جي حل جي سلسلي ۾ ڪا سنجيده ڪوشش ڪئي وڃي ها ته شايد صورتحال اِن حد تائين نه پهچي ها، جنهن حد تائين اڄ نظر اچي رهي آهي. هونئن ته لوڊشيڊنگ جي حوالي سان حڪومت جي دعوائن جي تاريخ ڊگهي آهي، پاڻ گهڻو پوئتي نٿا وڃون، رڳو رمضان المبارڪ کان اڳ ۾ حڪومت طرفان جيڪا دعويٰ ڪئي وئي هئي ته هِن ڀلاري مهيني ۾ انتهائي گهٽ لوڊشيڊنگ ڪئي ويندي، خاص ڪري سحري ۽ افطاري دوران ته قطعي به بجلي بند نه ڪئي ويندي، پر هينئر جيڪي پاڻ منظر ڏسي رهيا آهيون، انهن مان حڪومتي دعوائن جي پت پري کان وائکي ٿيل نظر اچي رهي آهي. سڄي ملڪ ۾ احتجاجن جو هڪ سلسلو آهي، جيڪو جيئن پوءِ تيئن شديد ٿي رهيو آهي. رمضان المبارڪ ۾ گهٽ لوڊشيڊنگ واري دعويٰ ته پنهنجي جڳهه تي، پر قوم سان سحري ۽ افطاري دوران جيڪو بجلي بند نه ڪرڻ وارو واعدو ڪيو ويو هو اُهو به پورو نه ڪيو ويو آهي، هاڻي ته صورتحال اِن حد تي پهچي وئي آهي جو 10 منٽ بجلي هلي رهي آهي ته اڌ ڪلاڪ بند ٿي رهي آهي. ڏينهن ۽ رات جي فرق کانسواءِ اِهو سلسلو جاري آهي. نتيجي ۾ روزيدارن کي هڪڙي پاسي الڳ تڪليف ٿي رهي آهي ته ڪاروبار الڳ تباهه ٿي رهيو آهي، هِن صورتحال ۾ اليڪٽرانڪس جي شين جو ڪاٻاڙو نڪري ويو آهي. عوام سراپا احتجاج بڻيل آهي ۽ حڪومت کي ڪنهن به قسم جي ڪابه پرواهه نه آهي. بجلي وارو وفاقي وزير نئين سج عوام کي نوان آسرا ڏئي رهيو آهي ۽ نوان خواب ڏيکاري رهيو آهي، پر بجلي جي لوڊشيڊنگ جو هي سلسلو گهٽجڻ بجاءِ مسلسل وڌي رهيو آهي. اسان کي اِها خبر نه ٿي پئي ته نيٺ هِن اهم مسئلي جي حل جي سلسلي ۾ اُهي قدم ڇو نه پيا کنيا وڃن، جيڪي لاڀائتا ثابت ٿي سگهن ۽ عوام کي رليف ملي سگهي.

بجلي جو بحران اهڙو مسئلو آهي، جيڪو ڊگهي عرصي کان عوام جي ڳچيءَ ۾ پيل آهي ۽ هِن سلسلي ۾ صرف آسرا ئي ملندا رهيا آهن، جيڪڏهن حڪومت سنجيده ڪوششون وٺي ها ته هي اهڙو مسئلو هرگز به ناهي جو حل نه ٿي سگهي ها. هينئر تائين حڪومتي سطح تي جيڪو ڪردار نظر آيو آهي، اُهو بس جان ڇڏائڻ وارو رهيو آهي، جيتوڻيڪ ڪيترن ئي دوست ملڪن ان سلسلي ۾ سهڪار ڪرڻ جي آڇ پڻ ڪئي آهي ۽ انتهائي گهٽ خرچ ۾ بجلي مهيا ڪرڻ جو چيو آهي، پر خبر ناهي ڇو ان آڇ کي اُها اهميت نه ڏني وئي آهي، جيڪا ڏيڻ گهرجي. تازو چيني صدر پاڪستاني دوري دوران جتي ٻيا ڪيترائي اهم معاهدا ڪري ويو، اُتي بجلي جي حوالي سان پڻ معاهدو ڪري ويو، اُن معاهدي جي بنياد تي حڪومتي سطح تان وڏا شادمانا ٻڌڻ ۾ آيا ته هاڻي لوڊشيڊنگ جو تصور به ختم ٿي ويندو، پنهنجون ملڪي ضرورتون ته پوريون ٿي وينديون پر اسين اوڙي پاڙي کي به بجلي ڏيڻ جهڙا ٿي وينداسين، پر ان معاملي کي به ڪافي عرصو گذري چڪو آهي، اڃا تائين ڪا اڳڀرائي نظر نه پئي اچي. پاڻ وٽ توانائي بحران جو جيڪو عالم آهي، اُن ۾ ٿيڻ ته ائين گهرجي ها ته هنگامي بنيادن تي اِن ڪيل معاهدي تي عمل کي يقيني بڻايو وڃي ها ۽ چين کان هِن سلسلي ۾ تڪڙو سهڪار حاصل ڪيو وڃي ها، پر جهڙي نموني ڍڳو پير پيران وارو منظر نظر اچي رهيو آهي، ان کي ڏسي نٿو لڳي ته هِن معاهدي تي ڪو تڪڙو عمل ٿيندو ۽ عوام کي ڪو تڪڙو رليف ملندو. پوري دنيا ۾ ائين ۾ ٿيندو آهي ته آبادي وڌڻ سان گڏ شين جي کپت کي سامهون رکندي اُن حساب سان پلاننگ ڪئي ويندي آهي، پر اسان وٽ اهڙي قسم جو ڪو رواج قائم نه آهي. هتي اٺ تڏهن رڙندا آهن، جڏهن ٻورا سببا آهن، مسئلو ڀلي ڪيڏو به سنجيده قسم جو ڇو نه هجي، پر رويا سدائين غير سنجيده ئي نظر ايندا آهن ۽ اِن غير سنجيدگي ئي معاملن کي هِن حد تائين پهچايو آهي جو عوام لاءِ وڏو عذاب بڻجي ويو آهي. ان کان وڌيڪ افسوس واري ڳالهه ٻي ڪهڙي ٿي سگهي ٿي جو عوام کي نيون سهولتون ۽ سُک ڏيڻ ته پري جي ڳالهه پر اُهي شيون جيڪي بنيادي ضرورتن جي زمري ۾ اچن ٿيون، اُنهن کان به کيس محروم بڻايو ويو آهي. هڪڙي پاسي پاڻ وارو حڪمران طبقو دعوائون ته وڏيون ٿو ڪري ته اسين جديد ٽيڪنالاجي واري هِن دور ۾ دنيا سان ڪلهو ڪلهي ۾ ملائي هلي رهيا آهيون ۽ ڪنهن به حوالي سان گهٽ نه آهيون، پر ٻئي طرف حالت اِها آهي جو عوام کي پوري بجلي به دستياب ناهي. اِهو حڪومت به چوي ٿي ۽ عوام به سمجهي ٿو ته بجلي جي هِن بحران جو سبب کپت جي ڀيٽ ۾ بجلي جي اُپت گهٽ آهي، جنهن ڪري هي مسئلو پيدا ٿي رهيو آهي، يقينن جتي کپت جي ڀيٽ ۾ اپت گهٽ هوندي آهي، اُتي اُپت ۾ اضافي لاءِ ڪوششون ڪيون وينديون آهن، پر اسان وٽ بجاءِ بجلي جي نئين اپت واري پاسي ڌيان ڏيڻ جي، عوام کي بجلي بچائڻ جون صلاحون ڏنيون وينديون آهن. اهڙي صورتحال ۾ جڏهن 24 ڪلاڪن مان بجلي 5 ڪلاڪ به دستياب نه هجي ته اُن مان عوام ڪهڙي بچت ڪندو ۽ اهڙي صورتحال ۾ اُن کي بچت جي صلاح ڏيڻ ساڻس مذاق ڪرڻ ناهي ته ٻيو ڇا آهي. هِن وقت گرمي جي جيڪا حالت آهي، اُها اسين سڀ ڏسي رهيا آهيون، 46 کان 48 ۽ 50 سينٽي گريڊ گرمي رڪارڊ ڪئي پئي وڃي. گهر کورن جيان ٻري رهيا آهن، اهڙين حالتن ۾ روزيدار ڪيئن گذاريندا هوندا، اِهو اندازو لڳائڻ ڏکيو ڪونهي. رمضان المبارڪ ۾ لوڊشيڊنگ گهٽجڻ ته پري جي ڳالهه پر ويتر به وڌي وئي آهي ۽ هاڻي بجلي بند ٿيڻ جو ڪوبه ٽائيم شيڊول نه رهيو آهي، هر 10 منٽن کانپوءِ بجلي بند ٿي رهي آهي، هِن صورتحال ۾ ماڻهو ذهني اذيت ۾ مبتلا ٿي ويا آهن، اُهي نه سولائي سان پنهنجو ڪو ڪم ڪار ڪري سگهن ٿا ۽ نه آرام ڪري سگهن ٿا. هنن حالتن کين سخت پريشان ڪري ڇڏيو آهي.

حڪومتي سطح تي دعوائن کان اڳتي ڪوبه سلسلو نظر نه پيو اچي. ماڻهن جي احتجاجن جو اُن کي ڪوبه احساس نه آهي. شهرن ۾ اِها حالت آهي، ٻهراڙين ۾ وري اڃا بدتر حالت آهي، اُتي سڄو سڄو ڏينهن بجلي بند رهي ٿي ۽ ماڻهن جي دانهن جو ڪوبه داد فرياد نه ٿو ٿئي. اصولي طور تي ٿيڻ ته ائين گهرجي ها ته حڪومت پنهنجي ناڪامي جو اعتراف ڪندي هنگامي بنيادن تي لوڊشيڊنگ کي منهن ڏيڻ لاءِ قدم کڻي ها، پر هِتي بجاءِ پنهنجي ناڪامي جو اعتراف ڪرڻ جي ائين محسوس ڪرايو وڃي ٿو ته هُن جو ڪوبه ڏوهه ناهي، سڄو ڏوهه عوام جو آهي، جيڪو بجليءَ جو گهڻو استعمال ڪري ٿو. بهتر ائين ئي ٿيندو ته هنن روين کي تبديل ڪيو وڃي ۽ هِن اهم مسئلي کي سنجيدگيءَ سان ورتو وڃي ته جيئن هِن جي حل جو ڪو رستو نڪري اچي ۽ عوام جي هِن عذاب مان جان آجي ٿي سگهي.پر اسان وٽ بجاءِ بجلي جي نئين اپت واري پاسي ڌيان ڏيڻ جي، عوام کي بجلي بچائڻ جون صلاحون ڏنيون وينديون آهن. اهڙي صورتحال ۾ جڏهن 24 ڪلاڪن مان بجلي 5 ڪلاڪ به دستياب نه هجي ته اُن مان عوام ڪهڙي بچت ڪندو ۽ اهڙي صورتحال ۾ اُن کي بچت جي صلاح ڏيڻ ساڻس مذاق ڪرڻ ناهي ته ٻيو ڇا آهي. هِن وقت گرمي جي جيڪا حالت آهي،

اُها اسين سڀ ڏسي رهيا آهيون،