تازيون خبرون

Daily Archives: June 22, 2015

بينظير ڀٽو کي شهيد ڪرڻ وارن مان هڪ کانسواءِ سڀ ماڻهو ختم ٿي ويا: آصف زرداري

نئون ديرو (بيورو) نئون ديرو ۾ اڳوڻي وزيراعظم محترمه بينظير ڀٽو جي 62 هين سالگره جي تقريب منعقد ٿي، پاڪستان پيپلز پارٽي جي شريڪ چيئرمين ۽ اڳوڻي صدر آصف علي زرداري چيو ته بينظير کي شهيد ڪرڻ وارن صرف هڪ ماڻهو بچيو آهي باقي سڀ ختم ٿي ويا آهن، اڳوڻو صدر آصف علي زرداري هيليڪاپٽر ذريعي نئون ديرو مان ڳڙهي خدا بخش ڀٽو پهتو، بختاور ڀٽو زرداري، آزاد ڪشمير جو وزيراعظم چوڌري عبدالمجيد به ساڻس گڏ هئا. آصف زرداري بينظير ڀٽو جي مزار تي حاضري ڀري ۽ چادر چاڙهي فاتح خواني ڪئي، اڳوڻو صدر چادر چاڙهڻ کانپوءِ باءِ روڊ واپس نئون ديرو روانو ٿيو جتي قرآن خواني کانپوءِ سالگره جي تقريب کي خطاب ڪندي هن چيو ته بينظير ڀٽو پنهنجي زندگي ۾ ٻڌائي ڇڏيو هو ته ان کي ڪجهه ٿيو ته ڪهڙا ماڻهو ذميوار هوندا. هن چيو ته بينظير ڀٽو کي شهيد ڪرڻ وارن مان صرف هڪ بچيو آهي باقي ختم ٿيويا آهن.  اڳوڻي صدر ۽ پاڪستان پيپلز پارٽي جي شريڪ چيئرمين آصف علي زرداري چيو آهي ته سڀ ادارا پنهنجي اختيارن ۾ رهي ڪم ڪن، پاڪستان ۾ فيصلا گولي سان نه پر ووٽ جي طاقت سان ٿيڻ گهرجن. بينظير جي سالگره جي موقعي تي نئون ڊيرو هائوس ۾  پ پ جي اهم اڳواڻن جو اجلاس طلب ڪيو ويو هو. ان موقعي تي آصف زرداري چيو ته سياسي ۽ عسڪري اتحاد دهشتگردن خلاف ڪاميابيون حاصل ڪيون آهن، هي جنگ اتحاد سان ئي کٽي سگهجي ٿي، عسڪريت پسندن کي طاقت جي زور تي ايجنڊا مڙهڻ نه ڪرڻ ڏينداسين، هن چيو ته مڙئي ادارا پنهنجي اختيارن ۾ رهي ڪم ڪن، ملڪ ۾ جمهوريت ۽ قانون جي حڪمراني لاءِ جدوجهد جاري رکي ويندي، پاڪستان ۾ فيصلا گولي سان نه پر ووٽ جي طاقت سان ٿيڻ گهرجن.  اڳوڻي صدر آصف علي زرداري چيو آهي ته محترمه کي شهيد ڪندڙ سوا هڪ جي سڀ ختم ٿي ويا، بينظير قتل ڪيس ۾ هڪ جنرل خلاف ايف آءِ آر آهي، محترمه لکرايو هو ته جيڪڏهن مون کي ڪجهه ٿيو ته مشرف ذميوار هوندو، ايف آءِ آر واپس نه وٺنداسين، مسئلا ڪجهه ٻيا آهن، ڏيکاريو ڪجهه ٻيو پيو وڃي، نئون ديرو ۾ بينظير جي 62 سالگره تقريب ٿي، ان موقعي تي آصف زرداري پنهنجي خطاب ۾ چيو ته محترمه کي شهيد ڪندڙ سوا هڪ جي سڀ ختم ٿي ويا، آصف علي زرداري نئون ديرو هائوس ۾ ڳڙهي خدا بخش پهتو، بختاور ڀٽو ۽ وزيراعظم آزاد ڪشمر عبدالمجيد چوڌري ساڻس گڏ هئا، آصف زرداري مزار تي حاضري کانپوءِ روڊ ذريعي نئون ديرو واپس هليو ويو، جتي قرآن خاني کانپوءِ سالگره تقريب ٿي جنهن کي خطاب ڪندي آصف زرداري چيو ته بينظير ڀٽو پنهنجي زندگي ۾ ٻڌايو هو ته بينظير ڪجهه ٿيو ته ڪهڙا ماڻهو ذميوار هوندا، بينظير کي شهيد ڪندڙن مان صرف هڪ ماڻهو بچيو آهي، هن چيو ته بينظير پاڻ چيو هو ته مون کي ڪجهه ٿيو ته ذميوار پرويز مشرف هوندو، آصف زرداري چيو ته پرويز مشرف جو نالو مان نه پر شهيد بينظير پاڻ لکرايو هو، هن چيو ته ڪيترو به ظلم ڪيو وڃي پر ايف آءِ آر واپس نه وٺنداسين.

 

ڪراچي ۾ 24 ڪلاڪن اندر گرمي ۽ ٻوسٽ سبب 150 ڄڻا فوت ٿي ويا

ڪراچي (اسٽاف رپورٽر) ڪراچي ۾ قهر جي گرمي جي لهر برقرار آهي. ايڌي سينٽر جي ترجمان موجب 24 ڪلاڪن اندر گرمي ۽ ٻوسٽ سبب فوت ٿي ويل 150 ڄڻن جا لاش سرد خاني پهچايا ويا. سنڌ جي راڄڌاني واري شهر ڪراچي ۾ قهر جهڙي گرمي گهٽتائي جو نانءُ ئي نه ٿي وٺي،، ايڌي سرد خاني جي رپورٽ موجب گذريل 24 ڪلاڪن دوران 150 ماڻهن جا لاش آندا ويا آهن. ايڌي سرد خاني جي انچارج پاران جاري ڪيل رپورٽ موجب فوتين ۾ اڪثريت وڏي ڄمار جي ماڻهن جي آهي ايڌي سرد خاني جي انچارج موجب 150 لاشن مان 30 جي سڃاڻپ نه ٿي سگهي،جنهن بعد کين لاوارث ڄاڻائي دفنايو ويو ايڌي جي ترجمان موجب ڏيڍ سئو ماڻهن جي موت جو سبب سخت گرمي ۽ پيرسني آهي سنڌ جي راڄڌاني واري شهر ڪراچي ۾ سخت گرمي ۽ ٻوسٽ برقرار آهي، ڇنڇر ڏينهن گرمي پد 46 ۽ آچر تي به 44 ڊگري سينٽي گريڊ تائين پهتو ٻئي طرف موسميات کاتي شهر ۾ اڱاري کان تيز برساتن ۽ گرمي ۾ گهٽتائي جي اڳڪٿي پڻ ڪئي آهي.

 

پ پ اڳواڻن جي قربانين جمهوريت ۽ آمريت ۾ فرق چڱي ريت سمجهائي ڇڏيو آهي: خورشيد شاهه

لاڙڪاڻو(بيورو) قومي اسميبلي ۾ مخالف ڌر جي اڳواڻ خورشيد شاهه چيو آهي ته قربانين کين هميشه جمهوريت ۽ آمريت جو سبق سيکاريو آهي. قومي اسميبلي ۾ مخالف ڌر جي اڳواڻ خورشيد شاهه نئين ديري ۾ ميڊيا سان ڳالهائيندي چيو ته ماضي گواهه آهي ته جمهوريت کي جڏهن به خطرو ٿيو آهي ته پ پ ئي قربانيون ڏنيون آهن. هن چيو ته پاڪستان ۾ جمهوريت جو وجود بينظير ڀٽو جي قربانين جو ثمر آهي. خورشيد شاهه چيو ته هو جمهوريت لاءِ هر قرباني ڏيڻ لاءِ تيار آهن. سندس چوڻ هو ته ملڪ۾ آزاد ۽ مضبوط جمهوريت جو خواب پورو ڪيو ويندو.

 

عمران فاروق قتل ڪيس ۾اهم اڳڀرائي جو امڪان، اسڪاٽ لينڊ يارڊ کي گرفتار ڏوهارين تائين پهچ ڏيڻ جو فيصلو

اسلام آباد (بيورو) ايم ڪيو ايم جي مقتول اڳواڻ ڊاڪٽر عمران فاروق جي قتل ڪيس ۾ ايندڙ هفتي اهم اڳڀرائي جو امڪان آهي، ذريعن جو چوڻ آهي ته پاڪستان حڪومت برطانوي پوليس اسڪاٽ لينڊ يارڊ کي عمران فاروق قتل ڪيس ۾ گرفتار ڪيل ڏوهارين تائين ايندڙ هفتي پهچ ڏئي رهي آهي، جڏهن ته برطانيا پاران گرفتار ڏوهاري محسن علي جي ٻانهن گهرڻ جو به امڪان آهي. چمن مان گرفتار ڪيل محسن علي کي عمران فاروق قتل ڪيس جو اهم ڏوهاري قرار ڏنو پيو وڃي، ذريعن جو چوڻ آهي ته اسڪاٽ لينڊ يارڊ ترت پاڪستان جو دورو ڪندي، جنهن دوران برطانوي پوليس جي ٽيم عمران فاروق قتل ڪيس ۾ گرفتار ڪيل ڏوهارين کان پڇا ڳاڇا ڪندي، پاڪستاني ٽيم به ان سان گڏ هوندي. اسڪاٽ لينڊ يارڊ پهرين ئي محسن علي ۽ ڪاشف کي سندن حوالي ڪرڻ جي درخواست ڏني هئي، محسن علي کي ڪجهه ڏينهن پهرين خالد شميم سان گڏ چمن مان گرفتار ڪيو ويو هو، هاڻ برطانيا سندس حوالگي جو مطالبو ڪري سگهي ٿو. چيو پيو وڃي ته ٻنهي ملڪن ۾ ڏوهارين جي مٽا سٽا جو ڪو ٺاهه ٿيل ناهي، جيڪڏهن برطانيا عمران فاروق قتل ڪيس جي ڏوهارين کي سندس حوالي ڪرڻ جو مطالبو ڪندو ته پاڪستان به گهربل ڏوهاري حوالي ڪرڻ جو مطالبو ڪري سگهي ٿو.

 

ايندڙ اليڪشن ۾ مقابلو بجلي سان ٿيندو، ملڪ ۾ بجلي هوندي ته اسان ڪامياب ٿينداسين: چوڌري نثار

راولپنڊي (بيورو) گهرو وفاقي وزير چوڌري نثار علي خان چيو آهي ته اپوزيشن ۾ هوندي چوڪا ۽ ڇڪا لڳائڻ سولو ڪم آهي ۽ حڪومت ڪرڻ وڏو ڏکيو ڪم آهي، ايندڙ اليڪشن ۾ مقابلو بجلي سان ٿيندو، ملڪ ۾ بجلي هوندي ته اسان ڪامياب ٿينداسين، راولپنڊي جي چڪ لالا جي اسڪيم ٿري ۾ روڊ جي افتتاحي تقريب کي خطاب ڪندي هن چيو ته عوام کي اندازو نه آهي ملڪ ڪهڙن مسئلن جو شڪار آهي، جن کي اسان دوست چئون ٿا اهي به اندروني طور دشمن آهن، هن چيو ته حڪومت ڏينهن رات عوام جا مسئلا حل ڪرڻ لاءِ ڪوشان آهي، هن چيو ته ادارن جي نااهلي بابت سڀ ڄاڻن ٿا، ڪم ادرن کي ڪرڻو هوندو آهي، حڪومت ناهي ڪندي، بجلي جو مسئلو جلد حل ٿي ويندو، تقريب ۾ گهرو وزير جي چونڊ تڪ جي عوام گيس فراهم ڪرڻ لاءِ احتجاج ڪيو جنهن تي چوڌري نثار علي خان چيو ته گيس سڄي ملڪ جو مسئلو آهي، حڪومت ايل اين جي جا جهاز گهرائي رهي آهي، چوڌري نثار علي خان راولپنڊي 3 اهم رستن جن ۾ ايئرپورٽ روڊ، هاءِ ڪورٽ روڊ ۽ اڊيالا روڊ شامل آهن انهن جي مرمت ۽ انهن کي وڌائڻ جي منصوبن جو باقائده افتتاح ڪيو، منصوبن جي جملي لاڳت هڪ سئو 10 ڪروڙن کان وڌيڪ آهي.

 

پهرين روزي کان بجلي جي گهرج 21 هزار ميگاواٽ ٿي وئي: خواجه آصف

اسلام آباد(م.د) پاڻي ۽ بجلي جي وفاقي وزير خواجه محمد آصف چيو آهي ته پهرين روزي کان بجلي جي گهرج 21 هزار ميگاواٽ ٿي وئي، هن چيو ته افطار سبب صنعتي علائقن کي بجلي شام 7 وڳي کان صبح 4 وڳي تائين بجلي نه پيا ڏيون، وفاقي وزير چيو ته بحران تي ڪنٽرول لاءِ ڪوششون ڪريون پيا، خواجه آصف اهو به ٻڌايو ته جتي احتجاج پيو ٿئي اتي رڪوري بلڪل ناهي ٿي رهي.

 

دهشتگردي خلاف سنڌ، وفاقي حڪومت، فوج ۽ قانون لاڳو ڪندڙ ادارا هڪ پچ تي آهن: وڏو وزير

ڪراچي (اسٽاف رپورٽر) وزير اعليٰ سنڌ سيد قائم علي شاهه، اسپيڪر سنڌ اسيمبلي آغا سراج دراني سان گڏجي آچر ڏينهن  شهيد محترمه بينظير ڀٽو جي 62 هين سالگرهه جي موقعي تي ڳڙهي خدابخش ڀٽو پهچي شهيد ذوالفقار علي ڀٽو، شهيد محترمه بينظير ڀٽو، شهيد مير مرتضيٰ ڀٽو، شهيد شاهنواز ڀٽو، مرحومه بيگم نصرت ڀٽو ۽ مرحومه امير بيگم جي مزارن تي حاضري ڀري فاتح پڙهي ۽ گلن جون چادرون چاڙهيون. ان موقعي تي ميڊيا سان ڳالهائيندي وڏي وزير سيد قائم علي شاهه چيو ته شهيد بينظير ڀٽو ملڪ ۾ جمهوريت ۽ عوام لاءِ تاريخي جدوجهد ڪئي. انهيءَ جدوجهد جي ڪري صدين تائين کيس ياد رکيو ويندو. هن چيو ته پيپلز پارٽي جي حڪومت شهيد بينظير ڀٽو جيفلسفي تي عمل ڪري رهي آهي. اسان سندس پاليسين تحت عوام جي خدمت ڪري رهيا آهيون ۽ ڪندا رهنداسين، عوام جي ڀلائي ۽ بهتري لاءِ سندس راهه تي عمل ڪري رهيا آهيون. هڪ سوال جي جواب ۾ وڏي وزير چيو ته ڊي جي رينجرز کي لکيل خط بابت ميڊيا وڌائي پيش ڪيو. رينجرز هڪ وفاقي ادارو آهي جيڪو دهشتگرديءَ جي خاتمي لاءِ سنڌ ۾ ڪم ڪري رهيو آهي. هن چيو ته دهشتگردي جي خاتمي لاءِ سنڌ حڪومت، وفاقي حڪومت، فوج ۽ قانون لاڳو ڪندڙ ادارا هڪ پچ تي ڪم ڪري رهيا آهن. ان سلسلي ۾ جيڪي رنجشون پيدا ٿيون آهن، اهي به جلد ختم ٿي وينديون ۽ گڏجي دهشتگردن کي ختم ڪنداسين. ايم ڪيو ايم جي سنڌ حڪومت ۾ شموليت بابت پڇيل سوال جي جواب ۾ وڏي وزير چيو ته ان بابت في الحال ڪجهه به خبر ناهي، ايم ڪيو ايم سان ڪنهن دوست معرفت ڳالهيون ٿي رهيون آهن ان بابت وڌيڪ ڪجهه به نه ٿو چئي سگهان. نواز ليگ سان اختلافن بابت پڇيل سوال جي جواب ۾ وڏي وزير چيو ته اسان نواز ليگ نه پر وفاقي حڪومت سان دهشتگرديءَ جي خاتمي ۽ سنڌ ۾ امن امان جي بحالي لاءِ گڏجي ڪم ڪري رهيا آهيون ۽ اڳتي به ڪندا رهنداسين

 

ڪي _اليڪٽرڪ پنهنجو قبلو فوري طور تي درست ڪري ۽ شهرين لاءِ بجلي جي مڪمل فراهمي کي يقيني بڻايو وڃي: شرجيل ميمڻ

ڪراچي(اسٽاف رپورٽر) سنڌ جي انفارميشن ۽ بلديات کاتي واري وزير شرجيل انعام ميمڻ چيو آهي ته رمضان جي مقدس مهيني ۾ بجلي جي بدترين بندش ۽ ان سبب پاڻي جي بحران جي ذميوار ڪي_اليڪٽرڪ انتظاميه آهي.هن چيو ته ڪي _اليڪٽرڪ انتظاميه پنهنجو قبلو فوري طور تي درست ڪري ۽ شهرين لاءِ بجلي جي مڪمل فراهمي کي يقيني بڻايو وڃي. هن وڌيڪ چيوته ڪي_ اليڪٽرڪ طرفان ڪراچي واٽر اينڊ سيوريج بورڊ جي تنصيبات تي بجلي جي لوڊشيڊنگ توهين عدالت آهي. جڏهن ته ڪراچي ۾ پاڻي جي بحران جي مڪمل ذميوار ڪي_اليڪٽرڪ آهي.

 

 زمينن تي قبضا اهم سياسي شخصيت جي حڪم تي ڪرايا، اعليٰ آفيسر به ڪرپشن ۾ ملوث آهن: اڳوڻو ٽي ايم او ممتاز زرداري

ڪراچي(اسٽاف رپورٽر) ڪرپشن جي الزام ۾ گرفتار اڳوڻي ٽي ايم او ممتاز زرداري انڪشاف ڪيو آهي ته هن زمينن تي قبضا اهم سياسي شخصيت جي حڪم تي ڪرايا، اعليٰ آفيسر به ڪرپشن ۾ ملوث آهن، نيب سنڌ هٿان ڪرپشن جي الزام ۾ گرفتار اڳوڻي ٽي ايم او سجاول ممتاز زرداري کان جاچ جاري آهي، ذريعن مطابق ممتاز زرداري جاچ دوران انڪشافڪيو آهي ته هن سرڪاري کاتن ۾ ڦيرڦار ڪري زمينن تي قبضا ڪرايا، جڏهن ته سرڪاري ايراضي اهم شخصيتن جي ملي ڀڳت سان وڪرو ڪئي وئي، ممتاز زرداري جو چوڻ هو ته هن ٺٽي جي زمينن تي اهم سياسي شخصيت جي حڪم تي قبضا ڪرايا۽ سرڪاري جاين تي ڀرتين لاءِ رشوت ورتي، اعليٰ آفيسر به ڪرپشن ۾ ملوث آهن، اڳوڻي ٽي ايم او ممتاز زرداري ترقياتي منصوبن جي نالي تي ملندڙ رقم ۾ به گهوٻين جو اعتراف ڪيو آهي.

 

اڳوڻي وزيراعظم يوسف رضا گيلاني کي ترڪ خاتون اول جو هار رکڻ تي نوٽيس جاري

اسلام آباد(بيورو) ايف آئي اي ترڪ عورت جي هار واري معاملي ۾ اڳوڻي وزيراعظم يوسف رضا گيلاني کي قانوني نوٽيس موڪليو آهي. ذريعن مطابق ايف آئي اي جو ترڪ وزيراعظم جي گهرواري جي هار واري معاملي تي چوڻ آهي ته  جيڪڏهن اڳوڻي وزيراعظم اڱاري تائين هار واپس نه ڪيو ته سندس خلاف 403 هيٺ ڪيس داخل ڪيو ويندو. واضع رهي ته هن وقت جي ترڪ وزيراعظم ۽هاڻوڪي صدر رجب طيب اردگان جي گهرواري پاران 2010ع ۾ پاڪستان جي ٻوڏ متاثرن لاءِ عطيو ڏيندي گم ٿيل هار جو راز ڪجهه ڏينهن اڳ معلوم ٿيو جڏهن ته وزيراعظم يوسف رضا گيلاني اهو قبول به ڪيو ته هار سندس وٽ آهي.