تازيون خبرون

Daily Archives: June 20, 2015

دهشتگردن جي همدردن ۽ مالي سهڪار ڪندڙن کي به نه ڇڏيو ويندو: آرمي چيف

راولپنڊي (م.ڊ) آرمي چيف جنرل راحيل شريف چيو آهي ته دهشتگردن جي مضبوط مرڪزن جو خاتمو ڪيو ويو آهي ويڙهه هاڻي افغان سرحد ويجهو ڪجهه علائقن ۾ جاري آهي دهشتگردن سهولت ڪارن ۽ مالي مدد ڪندڙن جو به خاتمو ڪيو ويندو دهشتگردن جي خلاف زمين سوڙهي ڪئي پئي وڃي ٻيهر منظم ٿيڻ جي اجازت نه ڏني ويندي قومي عزم ۽ واضح رخ جي ڪري پاڪستان کي دهشتگردي کان پاڪ ملڪ بنائڻ جي مقصد ۾ ڪامياب ٿي وينداسين روس جي دوري کان پوءِ خيبر ايجنسي ۾ فوجي جوانن سان ڳالهه ٻولهه ڪندي آرمي چيف چيو ته دهشتگردن جي خلاف گهيرو تنگ ڪيو پيو وڃي ۽ کين ٻيهر منظم ٿيڻ جي اجازت نه ڏني ويندي هن چيو ته جن علائقن ۾ آپريشن ڪيو ويو اتي تمام وڌيڪ بارودي سرنگهون وڇايون ويون هيون جن ۾ گهڻائي پرڏيهي قسم جي سرنگهن جي هئي هن چيو ته اتر وزيرستان ۾ آپريشن کان پوءِ دهشتگرد خيبرايجنسي جي جابلو سلسلي کي مرڪز طور استعمال ڪري رهيا آهن دوري ۾ آرمي چيف باڙه ۾ هن مرڪز جو به دورو ڪيو جتي آپريشن وقت پنهنجو پاڻ کي حوالي ڪندڙ شدت پسندن جي مختلف تعليمي ۽ وڪيشنل تربيت ڪئي پئي وڃي هن قبائلي عوام جي دهشتگردن جي خلاف ايجنسي ۾ فوج سان تعاون تي انهن جو شڪريو ادا ڪيو ۽ دهشتگردن کي پنهنجن علائقن ۾ واپس نه اچڻ جي اجازت نه ڏيڻ جي عزم جي تعريف ڪئي.

 

هميشه آمرن کي منهن ڏنو ۽ ڏيندا رهنداسين، ڊڄڻ وارا ناهيون: پيپلزپارٽي

اسلام آباد (بيورو) پيپلزپارٽي جي نائب صدر شيري رحمان چيو آهي ته پ پ هميشه آمرن کي منهن ڏنو آهي ۽ ڏيندي رهندي اسين ڊڄڻ وارا ناهيون، جڏهن ته قمرالزمان ڪائره جو چوڻ هو ته آصف علي زرداري جي بيان تي جيڪو طوفان پيدا ڪيو ويو آهي اُن جو ڪوبه وجود ئي ناهي. اسلام آباد ۾ افطار ڊنر کانپوءِ ميڊيا سان ڳالهائيندي شيري رحمان جو چوڻ هوته فوج هڪ مهذب ادارو آهي، پيپلزپارٽي ۽ اتحادين آپريسن ضرب عضب کي ساراهيو آهي جڏهن ته پيپلزپارٽي جي جنرل راحيل شريف جي ڪردار کي ساراهيو آهي. هن چيو ته آصف علي زرداري جو بيان گذريل آمرن ڏانهن هو، پيلزپارٽي آمرن جو ڄمي مقابلو ڪيو ۽ ڪندي رهندياسين ڪنهن کان ڊڄڻ وارا ناهيون. شيري رحمان جو چوڻ هو ته پيپلزپارٽي ڪڏهن به ڪرپشن جو دفاع نه ڪيو ۽ نه ڪندي، هن وقت ملڪ ۾ دشمن قوتون متحرڪ آهن، دهشتگردي خلاف اسين سڀني کان پهرين صف ۾ بيٺل آهيون، اسانجي قيادت شهادتون ڏنيون ۽ اسين پنهنجي فوج جو به ساٿ ڏيندا رهيا آهيون. هن چيو ته نيشنل ايڪشن پلان تي جلدي عملدرامد ٿيڻ گهرجي، ايڪشن پلان کي اڳتي کڻي وڃڻ وفاقي حڪومت جي ذميواري آهي، اسين ضرور چاهينداسين ته ايڪشن پلان منطقي انجام تائين پهچي ۽ ملڪ مان دهشتگردي جو ناسور ختم ٿئي جنهن لاءِ چاهي جيڪي به قربانيون ڏيڻيون پون ڏينداسين. انهيءَ موقعي پيپلزپارٽي جي اطلاعات واري سيڪريٽري قمرالزمان ڪائره جو چوڻ هو ته آصف زرداري جي بيان تي جيڪو طوفان کڙو ڪيو ويو آهي اُن جو ڪوبه حقيقي وجود ئي ناهي، ليڊر بيان ڏيڻ وقت پڇندا ناهن، آصف زرداري جيڪو بيان ڏنو اُن جي سڄي حمايت جي حمايت حاصل آهي. بيان تي ڪنهن کي به ڪو اعتراف ناهي پر ڪجهه پارتين پاران ميڊيا تي واوالي ڪئي وئي آهي. هن چيو ته پيپلز پارٽي سمورين سياسي قوتن ۽ رياستي ادارن کي گڏ کڻي هلڻ چاهي ٿي ۽ سڀني به اتفاق راءِ اُهو چيو آهي ته آصف زرداري کي پنهنجي مفاهمتي رويو جاري رکڻ گهرجي ڇو ته اُها پ پ جي پاليسي آهي. قمرالزمان ڪائره جو چوڻ هو ته آصف زرداري جو بيان هڪ خاص توازن ۾ آهي اُن کي ڪنهن به بيان واپس وٺڻ لاءِ ناهي چيو. هن چيو ته 18 هين ترميم کانپوءِ به ڪوبه ادارو ڪنهن وقت حدن مان نڪري ويندو آهي ته اُن کي بهتر ڪرڻو پوندو جڏهن ته رينجرز پنهنجي مينڊيٽ ۾ رکي ڪم ڪري ڇو ته پيپلزپارتي جي حڪومت ئي اُن کي صوبي ۾ گهرايو ۽ تعاون ڪيو. ان کان اڳ ۾  اڳوڻي صدر آصف علي زرداري جي دعوت تي مختلف سياسي جماعتن جي اڳواڻن افطار ڊنر ۾ شرڪت ڪري موجوده صورتحال تي خيالن جي ڏي وٺ پڻ ڪئي، ذريعن موجب پ پ، ايم ڪيو ايم ۽ ٻين پارٽين ڪراچي جو معاملو پارليامينٽ ۾ اٿارڻ تي اتفاق پڻ ڪيو آهي، جڏهن ته چوڌري شجاعت حسين، پ پ جي شريڪ چيئرمين کي صلاح ڏني آهي ته فوج خلاف ڏنل بيان واپس ورتو وڃي. آصف علي زرداري پاران مختلف سياسي اڳواڻن جي مان ۾ زرداري هائوس اسلام آباد ۾ افطار ڊنر جو بندوبست ڪيو ويو. پيپلز پارٽي جي شريڪ چيئرمين جي افطار ڊنر ۾ ق ليگ جي سربراهه چوڌري شجاعت حسين، جي يو آئي جي سربراهه مولانا فضل الرحمان ،متحده اڳواڻ ڊاڪٽر فاروق ستار، خالد مقبول صديقي، اي اين پي جي ميان افتخار حسين، افراسياب خٽڪ ۽ ٻين شرڪت ڪئي، جڏهن ته پي ٽي آءِ ۽ جماعت اسلامي پاران دعوت ۾ شرڪت کان معذرت ڪئي وئي. ذريعن موجب افطار ڊنر جي موقعي تي آصف علي زرداري مختلف سياسي اڳواڻن سان ملڪ جي موجوده سياسي صورتحال، ڪراچي آپريشن ۽ ٻين معاملن تي خيالن جي ڏي وٺ ڪئي. ذريعن وٽان مليل ڄاڻ موجب ان موقعي تي سياسي اڳواڻن ڪراچي جي موجوده صورتحال تي قومي اسيمبلي ۽ سينيٽ ۾ آواز اٿارڻ تي اتفاق ڪندي پارليامينٽ ۾ حڪومت کي ٽف ٽائيم ڏيڻ تي به اتفاق ڪيو. ذريعن موجب ملاقات دوران ق ليگ جي سربراهه چوڌري شجاعت حسين، آصف علي زرداري کي صلاح ڏني ته فوج خلاف ڏنل بيان واپس وٺي، ڇاڪاڻ ته آرمي خلاف اهڙي ڳالهه مناسب ناهي.

 

پاڻي ۽ بجلي واري وزارت لوڊشيڊنگ سان لاڳاپيل وزيراعظم جا حڪم هوا ۾ اڏائي ڇڏيا، نواز شريف نوٽيس ورتو، سخت ڪاوڙ جو اظهار

اسلام آباد(بيورو) پاڻي ۽ بجلي واري وزارت وزيراعظم نوازشريف جي رمضان جي مبارڪ مهيني دوران لوڊشيڊنگ نه ڪرڻ جا حڪم جاري ڪيا هئا، جن کي پاڻي ۽ بجلي واري وزارت ٻڌو اڻ ٻڌو ڪري، هڪ ڪن مان ٻڌي ٻئي مان ڪڍي ڇڏيو۽ نذرانداز ڪندي چيو ته سحري ۽ افطار جي وقتن ۾ به لوڊشيڊنگ ڪئي ويندي. پاڻي ۽ بجلي واري وزارت پاران جاري ڪيل بيان ۾ چيو ويو آهي ته  سحر ۽افطار جي وقتن ۾ بجلي جو شارٽ فال 1300 ميگاواٽ تائين پهچي چڪو آهي، ان ڪري سحر ۽ افطار ۾ به لوڊشيڊنگ ڪئي ويندي. پاڻي ۽ بجلي واري وزارت صارفين کان سحري ۽ افطار ۾ بجلي گهٽ استعمال ڪرڻ جي درخواست ڪئي آهي. وزير اعظم نواز شريف ملڪ جي مختلف شهرن ۾ سحري جي وقت بجلي جي لوڊشيڊنگ تي سخت ڪاوڙ جو اظهار ڪندي ان ڳالهه جو نوٽيس ورتو.وزيراعظم نواز شريف رمضان جي ڀلاري مهيني  جي پهري سحري دوران مختلف شهرن ۾ بجلي جي ڊگهي لوڊشيڊنگ جو نوٽيس وٺندي پاڻي ۽ بجلي واري وزارت تي سخت ڪاوڙ جو اظهار ڪيو. وزيراعظم نوازشريف سحري ۽ افطار دوران لوڊشيڊنگ نه ڪرڻ ۽ شڪايتن جي ازالي جي هدايت ڏني جڏهن ته وزيراعظم بجلي ۽ پاڻي جي وزارت کان سحري دوران لوڊشيڊنگ  تي جواب به گهري ورتو.

 

ايندڙ هفتي ڪارروائي مڪمل ڪرڻ چاهيون ٿا: چيف جسٽس

اسلام آباد(بيورو) 2013ع جي عام چونڊن ۾ ڌانڌلين بابت جاچ ڪندڙ عدالتي ڪميشن ۾ جمعي ڏينهن ايم ڪيو ايم جي اڳواڻ ڊاڪٽر فاروق ستار ۽ وڌيڪ ٽن تڪن جي رٽرننگ آفيسرن پيش ٿي پنهنجا بيان قلمبند ڪرايا، ثبوت جمع ڪرائڻ ۽ گواهه پيش ڪرڻ جو عمل مڪمل ٿي ويو، ڪميشن تحريڪ انصاف ۽ مسلم ليگ(ن) جي وڪيلن کي هدايت ڪئي آهي ته عدالتي ڪميشن قائم ڪرڻ بابت ٻنهي جماعتن وچ ۾ ٿيل معاهدي جي ڪاپي 29 جون تي رٿيل ايندڙ ٻڌڻي ۾ پيش ڪئي وڃي. عدالتي ڪميشن چيو آهي ته ٻنهي پارٽين وچ ۾ صحيح ٿيل مفاهمت واري ياداشت نامي کانسواءِ ان آرڊيننس کي سمجهي نه ٿو سگهجي. اهو آرڊيننس حڪومت ڪميشن جوڙڻ لاءِ رضاڪاراڻي نموني جاري ڪيو هو. جمعي ڏينهن چيف جسٽس آف پاڪستان جسٽس  ناصر الملڪ جي سربراهيءَ ۾ قائم عدالتي ڪميشن جو اجلاس ٿيو جنهن ۾ ڪميشن جي ٻين معزز ميمبرن پڻ شرڪت ڪئي. قومي اسيمبلي جي تڪ اين اي 130 جي رٽرننگ آفيسر انجم رضا، اين اي 157 جي رٽرننگ آفيسر قمر اعجاز ۽ هڪ ٻي تڪ جي رٽرننگ آفيسر خالد اقبال ڪميشن آڏو پيش ٿي بيان رڪارڊ ڪرايا. ٽنهي رٽرننگ آفيسرن تي جرح پڻ ٿي. رٽرننگ آفيسرن تي جرح بعد ڪميشن پاڪستاني تحريڪ انصاف جي وڪيل عبدالحفيظ پيرزاده ۽ مسلم ليگ(ن) جي وڪيل شاهد حامد کي چيو ته ڪميشن گواهن جا  بيان رڪارڊ ڪرائڻ جو عمل مڪمل ڪري ورتو آهي. تحريڪ انصاف جي وڪيل عبدالحفيظ پيرزاده چيو ته هو دليل ڏيڻ ۾ 2 ڏينهن وٺندو  جيڪڏهن 29 جون کان شروع ٿيندڙ هفتي ۾سماعت ڪئي وڃي ته هو سومر ۽ اڱاري ڏينهن دليل ڏيندو. شاهد حامد ۽ پ پ جي وڪيل اعتزاز احسن چيو ته هو عبدالحفيظ پيرزاده جي دليلن بعد پنهنجا دليل ڏيندا. عدالت ان موقعي تي تحريڪ انصاف ۽ مسلم ليگ(ن) جي وڪيلن کي هدايت ڪئي ته ٻنهي جماعتن وچ ۾ عدالتي ڪميشن جي قيام بابت ٿيل معاهدي جي ڪاپي پيش ڪئي وڃي ته جيئن ان کي رڪارڊ جو حصو بڻايو وڃي. ڪميشن جي اجلاس ۾  متحده قومي موومينٽ جي ايم اين اي ڊاڪٽر فاروق ستار چيو ته ايم ڪيو ايم سنڌ جي شهري علائقن ۾ 85 سيڪڙو نمائندگي واري جماعت آهي. عام چونڊن بعد اسان جي جماعت خلاف جيتريون به چونڊ درخواستون داخل ٿيون هيون اهي سمورين رد ٿي چڪيون آهن. هن چيو ته سندس پارٽي جماعت اسلامي ۽ ايم ڪيو ايم حقيقي طرفان لڳايل الزامن کي رد  ڪري ٿي ۽ اهي الزام بي بنياد آهن. ان موقعي تي چيف جسٽس چيو ته اسان ايندڙ هفتي ڪارروائي مڪمل ڪرڻ چاهيون ٿا. عبدالحفيظ پيرزاده تياري لاءِ هڪ هفتي جي مهلت طلب ڪئي جيڪا ڪميشن منظور ڪري ورتي ۽ ڪارروائي 29 جون تائين ملتوي ڪري ڇڏي.

 

سنڌ حڪومت پاران پاڪ فوج جي شهيدن ۽ زخمين لاءِ 9 هزار ايڪڙ زمين الاٽ ڪرڻ جو فيصلو

ڪراچي (اي پي پي) سنڌ جي وڏي وزير سيد قائم علي شاهه 9 هزار ايڪڙ ٻيلي جي زمين پاڪستان آرمي جي شهيد اهلڪارن جي وارثن کي الاٽ ڪرڻ جو فيصلو ڪيو آهي. هن اهو فيصلو چيف منسٽر هائوس ۾ منعقد اجلاس جي صدارت ڪندي ڪيو. چيف منسٽر هائوس مان جاري ڪيل پريس رليز موجب ان موقعي تي سنڌ جي وڏي وزير چيو ته پاڪستان آرمي 2001ع ۾ ڳڙهي ياسين ضلع شڪارپور ۾ 35521 ايڪڙ فاريسٽ لينڊ جي الاٽمينٽ جي درخواست سنڌ حڪومت کي ڏني هئي ۽ ان سلسلي۾ فائيل تي مختلف آفيسن ۾ ڪم ٿيندو رهيو جيئن ته درخواست ٻيلي جي زمين پاڪ فوج جي شهيدن جي ڪٽنبن کي الاٽ ڪرڻ بابت آهي تنهنڪري چيف آف آرمي اسٽاف جنرل راحيل شريف ڄاڻايل زمين جي الاٽمينٽ لاءِ ذاتي طور تي چيو هو. ٻيلي کاتي جي صوبائي وزير گيان چند ايسراڻي وڏي وزير کي ٻڌايو ته ڄاڻايل زمين ڳڙهي ياسين جي گولو ديرو جي علائقي ۾ آهي ان مان 5 هزار ايڪڙ زمين ڪجهه بااثر ماڻهن جي غيرقانوني قبضي ۾ هئي جنهن کي تازو ئي رينجرز خالي ڪرايو آهي. صوبائي وزير چيو ته 25 هزار ايڪڙ ٻيلي جي زمين مان 5 هزار ايڪڙ زمين خانگي مالڪن وٽ آهي. هن وقت 9 هزار ايڪڙ زمين سندس کاتي وٽ موجود آهي جيڪا جيڪڏهن شهيدن جي ڪٽنبن کي الاٽ ڪئي وڃي ته سندس کاتي کي ڪو اعتراض نه هوندو. چيف سيڪريٽري سنڌ صديق ميمڻ چيو ته پاڪ فوج 500 شهيدن جي ڪٽنبن جن مان 200 جو تعلق سنڌ سان آهي لاءِ زمين جي درخواست ڪئي هئي ۽ جئين ته اها درخواست صحيح آهي تنهنڪري ان تي عملدرآمد ٿيڻ گهرجي. سينيئر ميمبر بورڊ آف روينيو شعيب صديقي چيو ته پاليسي تحت فاريسٽ لينڊ فقط زرعي مقصدن لاءِ الاٽ ڪري سگهجي ٿي ۽ پاڪستان آرمي به زرعي مقصدن لاءِ زمين استعمال ڪرڻ جي درخواست ڪئي تنهنڪري حڪومت کي زمين جي الاٽمينٽ ۾ ڪو عار نه آهي. ٻيلي کاتي جي سيڪريٽري سجاد عباسي چيو ته پاليسي تحت ٻيلي جي زمين جو ليز هولڊر الاٽ ڪيل مجموعي زمين جي 20 سيڪڙو تي ٻيلو پوکڻ جو پابند هوندو جڏهن ته باقي 80 سيڪڙو زمين زرعي مقصدن لاءِ هوندي. سنڌ جي وڏي وزير اصولي طور تي پاڪستان آرمي کي زمين جي الاٽمينٽ جي منظوري ڏني ۽ چيف سيڪريٽري سنڌ کي ان سلسلي ۾ سمري موڪلڻ جي هدايت ڪئي

 

بلاول ڀٽو لاءِ اپوزيشن ليڊر جو عهدو قربان ڪري ڇڏيندس: خورشيد شاهه

اسلام آباد (بيورو) قومي اسيمبلي ۾ اپوزيشن ليڊر سيد خورشيد شاهه چيو آهي ته هو بلاول ڀٽو لاءِ اپوزيشن ليڊر جو عهدو قربان ڪري ڇڏيندو، سندس دلي خواهش آهي ته بلاول اسيمبلي جو حصو بڻجي. اسلام آباد ۾ م ميڊِيا سان ڳالهائيندي سيد خورشيد شاهه چيو ته هو بلاول ڀٽو زرداري جي ساٿي ۽ صلاحڪار طور ڪم ڪرڻ لاءِ تيار آهي، کيس وڏو وزير ڪيو وڃي يا نه، ان جي پرواهه ناهي. سيد خورشيد شاهه چيو ته پ پ هميشه جمهوريت جي مضبوطي لاءِ ڪم ڪيو آهي، هو چاهين ٿا ته سموراادارن پنهنجي آئيني حدن ۾ رهي ڪم ڪن. اپوزيشن ليڊر جو چوڻ هو ته پ پ خلاف سازشون نه ماضي ۾ ڪامياب ٿيون آهن، نه هاڻ ڪامياب ٿينديون، ملڪ جو ڀلو جمهوريت ۾ ئي آهي

 

عمران فاروق قتل ڪيس جا جوابدار خالد شميم ۽ محسن علي اسلام آباد منتقل

اسلام آباد (بيورو) وفاقي گهرو وزير چوڌري نثار علي خان جي هدايت تي عمران فاروق قتل ڪيس جا ملزم خالد شميم ۽ محسن علي اسلام آباد پهچايو ويو. جمعي ڏينهن ذريعن موجب عمران فاروق قتل ڪيس جي چمن مان گرفتارٻن ملزمن کي اسلام آباد پهچايو ويو، ملزم 1 1 0 2 ع کان افغانستان ۾ روپوش هئا، گهرو وزير چوڌري نثار علي خان جي هدايت تي ٻنهي ملزمن خالد شميم ۽ محسن علي کي خاص جهاز تي اسلام آباد پهچايو ويو.

 

19 جون 1992 ڪارو ڏينهن هو جڏهن سنڌ جي وڏين مڇين ۽ ڌاڙيلن خلاف ٿيندڙ آپريشن جو رخ ايم ڪيو ايم ڏانهن ڪيوويو: الطاف حسين

ڪراچي (اسٽاف رپورٽر) ايم ڪيو ايم جي قائد الطاف حسين چيو آهي ته 19 جون 1992 پاڪستان جي تاريخ جو هڪ ڪارو ڏينهن هو جڏهن سنڌ جي وڏين مڇين ۽ ڌاڙيلن جي خلاف ٿيندڙ آپريشن جو رخ ايم ڪيو ايم ڏانهن موڙيو ويو 19 جون 1992 جي شهيدن جي 23هين ورسي جي موقعي تي پنهنجي هڪ بيان ۾ هن چيو ته سنڌ جي 72 وڏين مڇين ڌاڙيلن ۽ اغوا جي وارداتن جي خلاف ٿيندڙ آپريشنجو رخ ايم ڪيو ايم ڏانهن موڙيو ويو ايم ڪيو ايم جي خلاف شروع ڪيل رياستي آپريشن دوران 18 هزار کان وڌيڪ ڪارڪنن کي عدالت کان مٿانهون قتل ڪيو ويو هزارن کي گرفتار ڪري خانگي جيلن ۾ بند ڪري تشدد ڪيو ويو مٿن ڪوڙا ڪيس داخل ڪيا ويا سوين ڪارڪن جلاوطني جي زندگي گذارڻ تي مجبور ڪيا ويا هن چيو ته سمورن رياستي ظلمن جي باوجود ايم ڪيو ايم جا پرعزم جيالا ۽ ثابت قادر ڪارڪنن جا حوصلا ڪڏهن به ڪمزور نه ٿي سگهيا ۽ حقن جي جدوجهد ۾ ڪارڪنن لازوال تاريخ رقم ڪئي هن چيو ته 19 جون 1992 کان پوءِ ايم ڪيو ايم جي خلاف شروع ٿيندڙ رياستي آپريشن ڪنهن نه ڪنهن شڪل ۾ اڄ تائين جاري اهي الطاف حسين 19 جون 1992 جي شهيدن کي زبردست خراج عقيدت پيش ڪيو ۽ چيو ته سمورن ظلمن جي باوجود شهيدن جي قربانين جي ڪري اڄ ايم ڪيو ايم قائم ۽ دائم آهي.

 

پرڏيهي اين جي اوز جي سرگرمين تي نظر رکڻ لاءِ اليڪٽرانڪ رجسٽريشن سسٽم متعارف ڪرائڻ جو فيصلو

اسلام آباد (بيورو) حڪومت، بين الاقوامي اين جــِي اوز جي سرگرمين تي نظر رکڻ لاءِ اليڪٽرانڪ رجسٽريشن سسٽم متعارف ڪرائڻ جو فيصلو ڪيو آهي. وزيراعظم نواز شريف جي صلاحڪار طارق فاطمي جي صدارت هيٺ اقتصادي معاملن واري ڊويزن جي ميمبرن تي ٻڌل خاص ڪميٽي جو اسلام آباد ۾ اجلاس ٿيو. اجلاس ۾ پرڏيهي اين جــِي اوز جي سرگرمين بابت تفصيلي خيالن جي ڏي وٺ ڪئي وئي. ڪميٽي، 7 نقاطي سفارشون وزيراعظم ڏانهن اماڻي ڇڏيو، جن ۾ پرڏيهي اين جِي اوز جي رجسٽريشن لاءِ 10 ڏينهن ۾ اليڪٽرانڪ سسٽم متعارف ڪرائڻ جو فيصلو ڪيو ويو آهي. پرڏيهي اين جِي اوز جي آن لائن رجسٽريشن لاءِ پهرين مرحلي ۾ اسڪريننگ ڪئي ويندي ۽ پوءِ حاصل ٿيندڙ درخواستن جي 45 ڏينهن اندر ڇنڊڇاڻ ڪرائي ويندي. اين جــِي اوز جي ماضي جي سرگرمين ۽ فنڊنگ جي ذريعن جي تصديق ڪئي ويندي ۽ ڪليئر ٿيندڙ پرڏيهي اين جــِي اوز کي خاص علائقن ۾ ڪم جي اجازت ڏني ويندي جڏهن ته اڻپوري آن لائين فارم جون درخواستون رد ٿي وينديون. خاص ڪميٽيءَ پرڏيهي اين جــِي اوز جي رجسٽريشن جو ڪم گهرو وزارت کي سونپڻ جي سفارش ڪندي چيو آهي ته هر اين جــِي او جي رجسٽريشن تي پروفارما گهرو وزارت کي موڪليو ويندو. اقتصادي ڊويزن جي ميمبرن تي ٻڌل خاص ڪميٽي آمريڪي اين جي او ”سيو دي چلڊرين“ سميت 9 پرڏيهي اين جــِي اوز کي نئين سر رجسٽريشن جي هدايت ڪئي آهي.

 

سياسي چيلينجز سبب ايڪشن پلان تي مڪمل عمل ۾ وقت لڳندو: جنرل عاصم باجوا

راولپنڊي (مانيٽرنگ ڊيسڪ) آءِ ايس پي آر جي ڊائريڪٽر جنرل ميجر جنرل عاصم باجوا چيو آهي ته قومي ايڪشن پلان دهشتگردن جي مالي معاونت روڪڻ ۾ اهم ثابت ٿيو آهي، سياسي چيلينجز سبب ايڪشن پلان تي مڪمل عمل ۾ وقت لڳندو. روسي ميڊيا کي انٽرويو ڏيندي ڊي جي آءِ ايس پي آر ميجر جنرل عاصم باجوا چيو ته پاڪستاني وفد جو روس وارو دورو انتهائي مثبت رهيو. هن چيو ته پاڪستان، روس سان عسڪري سامان جي خريداري کي حتمي شڪل ڏيڻ چاهي ٿو، روسي قيادتسان اهم معاملن تي ڳالهيون ٿيون آهن. هڪ سوال جي جواب ۾ ڊي جي آءِ ايس پي آر چيو ته پاڪستان دهشتگردي خلاف جنگ ۾ مصروف آهي، ڪيترن ئي جوانن دهشتگردي خلاف جنگ ۾ شهادت ماڻي آهي. ميجر جنرل عاصم باجوا چيو ته دهشتگردي خلاف قومي ايڪشن پلان دهشتگردن جي مالي معاونت روڪڻ ۾ انتهائي اهم رهيو آهي پر سياسي چيلينجز سبب ايڪشن پلان تي مڪمل عمل ۾ وقت لڳندو. هن چيو ته قومي ايڪشن پلان جي سڀ کان وڏي ڪاميابي قبائي علائقن ۾ دهشتگردن خلاف ڪارروايون آهن، اتي دهشتگردن جي مالي معاونت مڪمل طور روڪي وئي آهي. ڊي جي آءِ ايس پي آر چيو ته صفورا  بس سانحي تي حملي ۾ هڪ پڙهيل لکيل نوجوان ملوث هو، جنهن کي گرفتار ڪيو ويو آهي.