تازيون خبرون

Daily Archives: June 19, 2015

پاڪ فوج خلاف بيان تي خاموش نه ويهنداسين: نوازشريف

اسلام آباد (بيورو) وزيراعظم نوازشريف چيو آهي ته پاڪ فوج خلاف بيان تي خاموش نٿا ويهي سگهون. وزيراعظم نوازشريف ۽ آرمي چيف وچ ۾ گذريل ڏينهن ٽيليفون رابطو ٿيو جنهن ۾ وزيراعظم اڳوڻي صدر آصف علي زرداري پاران پاڪ فوج بابت ڏنل بيان تي ڳالهه ٻولهه ڪئي وئي. ذريعن موجب آرمي چيف جنرل راحيل شريف روس جي دوري تي آهي ۽ وزيراعظم نوازشريف ساڻس ٽيليفون تي رابطو ڪيو. ذريعن موجب آرمي چيف سان ڳالهه ٻولهه ۾ وزيراعظم جو چوڻ هو ته پاڪ فوج ملڪلاءِ جنگ وڙهي رهي آهي انُ خلاف بيان تي خاموش نٿا رهي سگهون ۽ اُهو نٿو ٿي سگهي ته ڪو پاڪ فوج خلاف بيان ڏئي ۽ اسين چپ رهون. ذريعن موجب وزير اعظم نواز شريف ۽ آرمي چيف جنرل راحيل شريف اڳوڻي صدر آصف زرداري جي بيان تي گهرو وزير چوڌري نثار جي ردعمل کي به ساراهيو.

 

سموريون بار ڪائونسل 21 هين ترميم خلاف آهن پر بنيادي حقن جا دليل الڳ معاملو آهي: چيف جسٽس

اسلام آباد (بيورو) سـُپريم ڪورٽ ۾ سمورين بار ڪائونسلز فوجي عدالتن واري قانون جي مخالفت ڪري ڇڏي آهي، جسٽس آصف سعيد کوسا ريمارڪس ڏنا آهن ته جيڪڏهن صدر آرمي ايڪٽ کان اڳ 21 هين ترميم جي منظوري ڏني ته پوءِ فوجي عدالتن واري قانون جو ڪو وجود ئي ناهي. چيف جسٽس ناصر الملڪ جي سربراهي ۾ سپريم ڪورٽ جي 17 رڪني فل ڪورٽ بينچ 18 هين ۽ 21 هين ترميمن خلاف درخواستن تي ٻڌڻي ڪئي. ٻڌڻيءَ دوران دليل ڏيندي سپريم ڪورٽ بار جي وڪيل عاصمه جهانگير چيو ته سپريم ڪورٽ 21 هين آئيني ترميم کي ڪالعدم قرار نٿي ڏئي سگهي، پر  اعليٰ عدالت بنيادي حقن جي روشني ۾ انهيءَ ترميم جي تشريح ڪري سگهي ٿي. عاصمه جهانگير چيو ته 21  ترميم اچڻ کان ملڪ جي سموري قيادت ترميم منظور نه ڪرڻ جا بيان ڏنا پر آءِ ايس پي آر جي ڊائريڪٽر جنرل جي ٽوئيٽ کانپوءِ پارليامينٽ مان اها ترميم منظور ڪرائي وئي. سپريم ڪورٽ بار جـِي وڪيل چيو ته ، عدالت کي پارليامينٽ کان وڌيڪ اختيار نه آهن، جيڪڏهن  اعليٰ عدالت پارليامينٽ کي تابع ڪري ڇڏيو ته وڌيڪ خطرناڪ هوندو. عاصمه جهانگير جو اهو به چوڻ هو ته  سموريون بار ايسوسيئيشن متفق آهن ته فوجي عدالتون وارو فيصلو شفاف انصاف کان انڪار آهي، انهيءَ ڪري  هـُو فوجي عدالتن جي خلاف آهيون. چيف جسٽس ناصر الملڪ ريمارڪس ڏنا ته سموريون بار ڪائونسل 21 هين ترميم خلاف آهن پر بنيادي حقن جا دليل الڳ معاملو آهي. جسٽس آصف سعيد کوسا ريمارڪس ڏنا ته ڏسڻو پوندو ته صدر 21 هين ترميم جي منظوري اڳ ۾ ڏني هئي يا آرمي ايڪٽ تي پهريان صحيح ڪئي هئي. جسٽس آصف سعيد کوسا ريمارڪس ۾ وڌيڪ چيو ته جيڪڏهن صدر 21 هين آئيني ترميم جي منظوري پهريان ڏني ته پوءِ فوجي عدالتن واري قانون جو وجود ئي نه آهي. جسٽس ثاقب نثار ريمارڪس ڏنا ته جيڪڏهن عدالت عتيقا اوڍو جهڙا ڪيس پاڻ ٻـــُڌي سگهي ٿي ته ڇا بنيادي حقن جي خلاف ڪنهن ترميم تي پاڻمرادو نوٽيس نٿو وٺي سگهجي.

 

وزيراعظم پاران رمضان شريف دوران لوڊشيڊنگ گهـَٽ ڪرڻ، روزَي رکڻ ۽ کولڻ وقت بجلي بند نه ڪرڻ جو حڪم

اسلام آباد (بيورو) وزيراعظم نواز شريف، رمضان شريف دوران لوڊشيڊنگ گهـَٽ ڪرڻ ۽ روزَي رکڻ، کولڻ وقت بجلي بند نه ڪرڻ جو حڪم ڏئي ڇڏيو. پي ايم هائوس اسلام آباد ۾ وزيراعظم ميان نواز شريف جي صدارت هيٺ وفاقي ڪابينا جِي توانائي ڪميٽي جو اجلاس ٿيو. اجلاس ۾ سڄي ملڪ اندر بجلي جي فراهمي بابت تفصيلي غور ويچار ڪيو ويو. ان موقعي تي وزيراعظم ميان نواز شريف هدايت ڪندَي چيو ته ڀلارَي مهيني دوران لوڊشيڊنگ گهٽ ڪئي وڃي. وزيراعظم اها پڻ هدايت ڪئي ته روزَي رکڻ ۽ کولڻ وقت بجلي جي لوڊشيڊنگ هرگز نه ڪئي وڃي. ميان نواز شريف تراويح نماز جَي وقت به سڄي ملڪ اندر بجلي جِي فراهمي يقيني بڻائڻ جِي هدايت ڪئي

 

الطاف حسين ۽ آصف زرداري وچ ۾ ٽيليفونڪ رابطو، اختلاف ختم ڪرڻ تي اتفاق

ڪراچي (مانيٽرنگ ڊيسڪ) پيپلزپارٽي جي ڪو چيئرمين آصف علي زرداري ۽ الطاف حسين وچ ۾ ٽيليفونڪ رابطو يو آهي جنهن ۾ ٻنهي اڳواڻن پاران پاڻ ۾ اختلاف ختم ڪرڻ تي اتفاق ڪيو ويو آهي. ايم ڪيو ايم جي پڌرائي موجب الطاف حسين ۽ آصف علي زرداري وچ ۾ ٽيليفونڪ رابطو ٿيو آهي جنهن ۾ ٻنهي اڳواڻن ملڪ جي موجوده صورتحال تي تفصيلي ڳالهه ٻولهه ڪئي ۽ سمورا اختلاف ختم ڪرڻ تي اتفاق ڪيو. انهيءَ موقعي تي الطاف حسين جو چوڻ هو ته اسانجو جيئڻ مرڻ سنڌ ڌرتيسان آهي ملڪ کي هن وقت اتحاد ۽ يڪجهتي جي ضرورت آهي، اسان کي اخوت، محبت ۽ ڀائيچاري جو مظاهرو ڪرڻ گهرجي. واضح رهي ته آصف علي زرداري پاران سمورين سياسي پارٽين جي اڳواڻن کي افطار پارٽي جي دعوت به ڏني آهي جنهن ۾ ملڪ جي موجوده صورتحال تي خيالن جي ڏي وٺ ڪئي ويندي.

 

رياست کي آئين تحت هلايو وڃي، هر ادارو پنهنجي حدن اندر رهي ڪم ڪندو ته ٽڪراءُ پيدا نه ٿيندو: خورشيد شاهه

اسلام آباد (بيورو) قومي اسيمبلي ۾ اپوزيشن ليڊر خورشيد شاهه چيو آهي ته230 ارب رپين جي ڳالهه ڪئي پئي وڃي ٻڌايو وڃي ته ايراني تيل 200 ناڪا ڪراس ڪري ڪراچي ڪيئن پهچي رهيو آهي،  رياست کي آئين تحت هلايو وڃي، هر ادارو پنهنجي حدن اندر رهي ڪم ڪندو ته ٽڪراءُ پيدا نه ٿيندو، اپيڪس ڪميٽين جو اهم ڪم ناهي، جيڪو ملڪ اندر ٿي رهيو آهي. اسلام آباد ۾ پنهنجي چيمبر ۾ ميڊيا ڳالهائيندي اپوزيشن ليڊر خورشيد شاهه چيو ته 230 ارب رپين جي ڳالهه ڪئي وئي، چيو  يو ته 110 ارب هيروئن ۽ 90 ارب ايراني پيٽرول ذريعي آيا آهن، بلڪل اها رقم ايندي هوندي پر ٻڌايو وڃي ته ايراني تيل ڪراچي ڪيئن ٿو پهچي؟. هن چيو ته رياست کي آئين جي ڪتاب جي طريقي سان هلايو وڃي، ڪنهن اداري کي ڪم ڪرڻو آهي يا نه اهو سڀ آئين ۾ طئي ٿيل آهي. خورشيد شاهه چيو ته نيب، اينٽي ڪرپشن، ايف آءِ اي جو ڪردار آئين ۾ لکيل آهي، هر ادارو پنهنجي حدن اندر رهي ڪم ڪندو ته ٽڪراءُ نه ٿيندو. اپوزيشن ليڊر وڌيڪ چيو ته اپيڪس ڪميٽين جو اهم ڪم ناهي، جيڪو ملڪ اندر ٿي رهيو آهي. خورشيد شاهه جو چوڻ هو ته سياستدانن مختصر مدي ۾ ايٽم بم ٺاهيو، ڌماڪا ڪيا ۽ ميزائل جي ٽيڪنالوجي ڏني، ڊڪٽيٽر سياستدانن جو ڪردار  ورتو ته هڪ فون ڪال تي ڍير ٿي ويو. هڪ سوال جي جواب ۾ خورشيد شاهه چيو ته ضرب عضب ۽ دهستگردي جي جنگ ۾ پيپلزپارٽي جو ڪردار ڪير به وساري نٿو سگهي، دهشتگردي خلاف جنگ ۾ فوجي عدالتون وقت جي ضرورت هئي، سڀني مخالفت ڪئي پر آصف علي زرداري فيصلو ڪرايو.

 

نواز شريف کي مودي جي فون سان ٻطرفا لاڳاپا معمول تي آڻڻ ۽ ڪشمير تڪرار نبيرڻ ۾ مدد ملندي: خواجا آصف

اسلام آباد (بيورو) بچاءُ واري وزير خواجا محمد آصف چيو آهي ته نريندر مودي جي وزيراعظم نوازشريف کي ٽيليفون سان ٻطرفا لاڳاپا معمول تي آڻڻ ۾ مدد ملندي، وزيراعظم نواشريف ماڻهن کي معاف ڪري ڇڏڻ جي هڪ بهترين خوبي جو مالڪ آهي، هڪ انٽرويو ۾ خواجا آصف چيو ته مسلم ليگ (ن) جڏهن اقتدار سنڀاليو هو ته ان آڏو ڪيتريون ئي چيلينجزهيون،  جن جي حل لاءِ اسان جي قيادت دليراڻا فيصلا ڪيا ۽ اهي سمورا اهم قدم کنيا ويا،جن سان اهي مسئلا حل ڪرڻ سان گڏوگڏ عوام کي فائدو به پهچائي سگهجي، هڪ ٻئي سوال جي جواب ۾ خواجا آصف چيو ته ڀارتي وزيراعظم جي محمد نوازشريف کي ٽيليفون سان ٻطرفا لاڳاپا معمول تي آڻڻ توڙي ڪشمير جي پراڻي مسئلي کي حل ڪرڻ ۾ مدد ملندي.

 

ڪور ڪمانڊر ڪراچي پاران رينجرز هيڊ ڪوارٽر جو دورو، امن امان بابت بريفنگ

ڪراچي (اسٽاف رپورٽر) ڪورڪمانڊر ڪراچي ليفٽيننٽ جنرل نويد مختيار رينجرز هيڊڪوارٽر جو دورو ڪيو جتي کيس شهر ۾ امن امان جي صورتحال تي بريفنگ ڏني وئي. ڪورڪمانڊر ڪراچي رينجرز هيڊڪوارٽر پهتو ته ڊي جي رينجرز سنڌ ميجر جنرل بلال اڪبر سندس استقبال ڪيو جنهن کانپوءِ رينجرز اختيارين ليفٽيننٽ جنرل نيود مختار کي ڪراچي ۾ جاري ٽارگيٽڊ آپريشن سميت امن امان جيصورتحال تي بريفنگ ڏني جڏهن ته ڪورڪمانڊر ڪراچي آپريشن تي اطمينان جو اظهار ڪندي رينجرز جي ڪارڪردگي کي ساراهيو.

 

عمران فاروق قتل ڪيس ۾ ڊرامائي مور، چمن بارڊر تان 2 ڄڻا گرفتار، ايف آءِ اي حوالي

ڪوئيٽا (مانيٽرنگ ڊيسڪ) پاڪ افغان بارڊر چمن مان ايف سي ڪارروائي دوران عمران فاروق قتل ڪيس ۾ ملوث 2 ڄڻن کي گرفتار ڪري ورتو آهي. وڌيڪ جانچ لاءِ ايف آئي اي حوالي ڪيو ويو آهي. پاڪ افغان بارڊر چمن ۾ ايف سي ٻه شڪي ماڻهن کي گرفتار ڪيو آهي. شروعاتي جانچ دوران انڪشاف ڪيو ويو آهي ته ٻنهي گرفتار ماڻهن خالد شميم ۽ محسن جو تعلق سياسي پارٽي سان آهي جيڪي عمران فاروق قتل ڪيس ۾ ملوث آهن. ايف سي ترجمان جو چوڻ هو ته وڌيڪ جانچ لاءِ ٻنهي کي ايف آئي اي حوالي ڪيو ويو آهي جڏهن ته گهرو وزارت کي به گرفتاري کان آگاهه ڪيو ويو آهي. ٻئين ڄڻا پاڪ افغان بارڊر چمن کان افغانستان وڃي رهيا هئا.

 

ٽيڪسون وڌائڻ سان ڪڪڙ جو گوشت به مهانگو ٿي ويندو : سراج الحق

لاهور (م.ڊ) جماعت اسلامي پاڪستان جي امير سينيٽر سراج الحق پولٽري تي لڳايل نئين ۽ پراڻي ٽيڪس ۾ ڳاٽي ٽوڙ واڌ جي مذمت ڪندي چيو آهي ته ٽيڪسون وڌائڻ سان ڪڪڙ جي گوشت جون قيمتون به وڌي وينديون، جنهن سان ڪڪڙ جو گوشت عام ماڻهن جي پهچ کان ٻاهر ٿي ويندو، هن چيو ته ٻڪر ۽ ڳئون جي گوشت جون قيمتون هاڻي ايتريون وڌي ويون آهن جو ڪو غريب گوشت کائڻ بابت سوچي به نٿو سگهي، ڪڪڙ جو گوشت سستو ٿيڻ سان عام ماڻهو جي پهچ ۾ هو، ماڻهو مهمانن جي اچڻ تي سبزي يا دال ۾ ڪڪڙ وجهي پنهنجي سفيد پوشي جو ڀرم رکندا هئا پر هاڻي حڪومت اهو به ناممڪن بڻائي ڇڏيو آهي،

 

سنڌ ۾ گورنر راڄ کان ڊڄڻ وارا ناهيون، ميان صاحب! گهڻو ٿاٻڙيا آهيو، ڪٿي ائين نه ٿئي پاڻ کي سنڀالي نه سگهو: ڪائره

اسلام آباد (بيورو) پيپلز پارٽي جي اطلاعات واري سيڪريٽري قمر الزمان ڪائره چيو آهي ته آصف علي زرداري جي تقرير تي طوفان برپا ڪيو ويو آهي، هـُن رڳو ادارن کي ايترو چيو ته پنهنجي مينڊيٽ کان ٻاهر نه وڃو، سنڌ ۾ گورنر راڄ کان نه ڊڄڻ وارا هئاسين ۽ نه ئي هاڻي خوف آهي، ميان صاحب! گهڻو ٿاٻڙيا آهيو، ڪٿي ائين نه ٿئي پاڻ کي سنڀالي نه سگهو. اسلام آباد ۾ پريس ڪانفرنس سنڌ ۾ ڪرپشن جو گوڙ ڪندڙ ٻڌائين، پنجاب، ڪي پي ڪي ۽ بلوچستان ۾ ڪجهه نه پيو ٿئي، ڇا قومي احتساب بيورو ڪرپشن کان پاڪ آهي؟. هن چيو ته سوال آهي ته آصف زرداري ڇا چيو ۽ ڇو چيو، زرداري جي تقرير جو منظر ڏسڻ کانسواءِ ڳالهيون ڪيون ويون، پ پ جي شريڪ چيئرمين فوج جي ڪردار جي تعريف ڪئي آهي. هن چيو ته آصف زرداري ادارن کي چيو ته مينڊيٽ کان ٻاهر نه وڃو، ڪنهن غور نه ڪيو ته آصف زرداري اهڙي تقرير ڇو ڪئي. سندس چوڻ هو ته اپيڪس ڪميٽين جي حمايت ڪري مسئلن جو حل ڪڍيو پيو وڃي، پ پ شهيد ڀٽو کان وٺي اڄ تائين ادارن جو بچاءُ ڪيو آهي. قمر زمان ڪائره چيو ته آمرن جمهوريت کي نقصان پهچايو، ڪو ادارو دعويٰ ڪري سگهي ٿو ته اتي ڪرپشن نه آهي، ڇا قومي احتساب بيورو ۾ ڪرپشن نه پئي ٿئي. پ پ اڳواڻ چيو ته جنرلن سپريم ڪورٽ وڃي پ پ مخالف قدمن جو اعتراف ڪيو، آصف زرداري تي تنقيد ڪندڙ پنهنجي ڪردارن تي نظر ڊوڙائين. هن چيو ته شهيد ذوالفقار ڀٽو جي ڦاهي تي به پ پ فوج تي اعتراض نه واريا، ڪيئن سمجهيو پيو وڃي ته آصف زرداري فوج خلاف ڳالهايو . قمر زمان ڪائره چيو ته هُــو سنڌ ۾ گورنر راڄ لڳڻ کان ڊڄڻ وارا نه آهن، رڳو سنڌ ۾ ڪرپشن جو گوڙ ڇو پيو ڪيو وڃي. پ پ اڳواڻ چيو ته ادارن کي ميڊيا جي ذريعي نه ڳالهائڻ گهرجي، ذوالفقار مرزا کي پوليس گرفتار ڪرڻ وئي ته ڪنهن بچايو، پ پ نظام کي بچائڻ لاءِ بار بار سهارو ڏنو آهي، ڪرپٽ ماڻهن جو احتساب ٿيڻ گهرجي. ڪائره چيو ته پ پ ڪنهن به ڪرپٽ شخص کي سپورٽ نه ڪندي، ن ليگ هميشه ادارن سان جهيڙو ڪيو آهي، هو مارشل لا ۽ آمريت کان به نٿا ڊڄن. قمر زمان ڪائره وزير اعظم نواز شريف سان مخطاب ٿيندي چيو ته ميان صاحب! گهڻو ٿاٻڙيا آهيو، ڪٿي ائين نه ٿئي جو پاڻ کي سنڀالي نه سگهو.