تازيون خبرون

Daily Archives: June 18, 2015

رينجرز سميت ڪرپشن خلاف جيڪو به ڪارروائي ڪندو حمايت ڪنداسين: لياقت جتوئي

ڪراچي (اين اين آءِ) سنڌ جي اڳوڻي وڏي وزير ۽ مسلم ليگ (ن) جي سنڌ اسيمبلي ميمبر لياقت علي جتوئي چيو آهي ته رينجرز سميت ڪرپشن جي خلاف جيڪو به ڪارروائي ڪندو ان جي حمايت ڪنداسين سنڌ بلڊنگ ڪنٽرول اٿارٽي ۾ رينجرز ڪارروائي ڪري سٺو ڪم ڪيو آهي اڳوڻي صدر آصف علي زرداري جي بيان جي ڀرپور مذمت ڪيان ٿو اربع تي سنڌ اسيمبلي جي اجلاس کان پوءِ ميڊيا سان ڳالهائيندي لياقت جتوئي چيو ته آصف زرداري، بينظير ڀٽو ۽ مرتضيٰ ڀٽو جي شهادت تي اعتراض سخت جملا استعمال نه ڪيا هئا جيڪي هن سنڌ بلڊنگ ڪنٽرول اٿارٽي جي آفيس تي ڇاپي کان پوءِ قانون لاڳو ڪندڙ ادارن جي خلاف ڳالهايا آهن هن چيو ته رينجرز ڪرپشن جي خلاف ڪارروائي ڪري ڪوئي غلط ڪم نه ڪيو آهي حڪمرانن گذريل ستن سالن ۾ سنڌ کي تباهه ڪري ڇڏيو آهي ان موقعي تي مسلم ليگ فنڪشنل جي سنڌ اسيمبلي ميمبر نصرت سحر عباسي آصف زرداري جي بيان جي مذمت ڪندي چيو ته قومي سلامتي جي ادارن جي خلاف اهڙا لفظ يا اهڙي زبان استعمال نه ڪرڻ گهرجي هن مطالبو ڪيو ته آصف زرداري پنهنجو بيان واپس وٺي ۽ کيس معافي وٺڻ گهرجي. ڪنهن کي خبر نهآهي ته سڄي سنڌ ۾ ڪرپشن پويان ڪنهن جو هٿ آهي هن ڪرپشن سڄي سنڌ کي تباهه ڪري ڇڏيوآهي.

 

پنجاب جي مختلف جيلن ۾ قتل جي ستن جوابدارن کي ڦاهي ڏني ويئي

فيصل آباد (اين اين آءِ) پنجاب جي مختلف جيلن ۾ قتل جي ستن جوابدارن کي ڦاهي ڏني ويئي تفصيل مطابق سينٽرل جيل فيصل آباد ۾ قتل جي ٽن جوابدارن کي صبح جو سوير ڦاهي ڏني ويئي ان موقعي تي سيڪيورٽي جا سخت انتظام ڪيا ويا هئا جوابدار نبيل احمد 2000 ۾ قتل ڪيو هو، محمد سليم ۽ محمد راشد 1998 ۾ قتل ڪيو هو ساهيوال سينٽرل جيل ۾ به موت جي سزا جي ٻن قيدين کي ڦاهي ڏني ويئي جوابدار فياض 2003 ۾ هڪ شخص کي قتل ڪيو هو جوابدار قيصر 2004 ۾ ڦر دوران مزاحمت تي هڪ شخص کي قتل ڪيو هو سينٽرل جيل ميانوالي ۾ ٻٽي قتل جي مجرم محمد اسلم خان کي ڦاهي ڏني ويئي محمد اسلم 1997 ۾ ٻن ڄڻن کي قتل ڪيو هو گجرات جي جيل ۾ به موت جي سزا جي ٻن قيدي اقبال عرف بالا کي ڦاهي ڏني ويئي جوابدار 1998 ۾ قتل ڪيو هو گجرات ۾ ئي مندي بهاولدين جي جوابدار غلام رسول جي ڦاهي عدالت پاران اسٽي آرڊر کان پوءِ ملتوي ڪئي ويئي جوابدار غلام رسول 15 سال اڳ قتل ڪيو هو.

 

پريانڪا چوپڙا جيان ڳائڻ جي ميدان ۾ اڳتي وڌڻ چاهيان ٿي: پرينيتي

ممبئي (شوبز نيوز) بالي ووڊ اداڪارا پرينيتي چوپڙا پنهنجي سپر اسٽار سؤٽ پريانڪا چوپڙا جي پير تي هلندي هاڻي ڳائڻ جي ميدان ۾ قدم رکڻ جون تياريون ڪري رهي آهي. ڀارتي ميڊيا موجب بالي ووڊ اداڪارا پرينيتي چوپڙا پنهنجي هڪ انٽرويوءَ ۾ چيو ته کيس ڳائڻ جو شوق آهي ۽ هوءَ به پنهنجي سؤٽ پريانڪا چوپڙا جيان ڳائڻ جي ميدان ۾ اڳتي وڌڻ چاهي ٿي، جلد ئي ماڻهو سندس آواز ٻڌي سگھندا. هن چيو ته هو فلم انڊسٽريءَ کان پري رهڻ وارين خبرن مان بيزار ٿي چڪي آهي، هن چيو ته مون وٽ ڪيترين ئي فلمن جا اسڪرپٽ موجود آهن ۽ مان هلندڙ سال جي آخر تائين انهن فلمن جي شوٽنگ شروع ڪرائي ڇڏينديس. واضح رهي ته پرينيتي چوپڙا بالي ووڊ جي دبنگ اسٽار سلمان خان جي ايندڙ فلم ”سلطان“ ۾ اداڪاريءَ جو جوهر ڏيکاريندي

 

عورتن جي مقابلي ۾ مرد اداڪارن جو وڌيڪ معاوضو ناانصافي آهي: شرڌا ڪپور

ممبئي (شوبز نيوز) بالي ووڊ اداڪارا شرڌا ڪپور چيو آهي ته هن وٽ پئسي جي ايتري اهميت ناهي، اها ڳالهه ان ڪري به گهڻي حيراني واري سمجھي پئي وڃي ته بالي ووڊ جو اڪثر اداڪارائون مرد ۽ عورت اداڪارن جي معاوضيتي تمام گهڻو ڳالهائيندا آهن ۽ سندن موقف هوندو آهي ته عورتن جي مقابلي ۾ مرد اداڪارن جو وڌيڪ معاوضو ناانصافي آهي، پر شرڌا جي ان بيان بالي ووڊ ۾ هڪ نئين بحث کي جنم ڏئي ڇڏيو آهي، شرڌا ڪپور موجب هو فلمن ۾ ڪم ڪرڻ پسند ڪري ٿي، ان ڪري هن پئسي لاءِ ايترو ناهي سوچيو ۽ هن وٽ ان جي اهميت ٻئي درجي واري هوندي آهي، شرڌا ان ڳالهه کي ته تسليم ڪيو ته انڊسٽريءَ تي مرد اداڪارن جي هڪ هٽي آهي، شرڌا جي آخري فلم ”حيدر“ آهي جنهن ڪيترائي فلم فيئر ايوارڊ ٻهاريا هئا، شرڌا ڪپور وڌيڪ چيو ته هن وٽ پئسي کان وڌيڪ سندس مداحن جي اهميت آهي، ڇو جو اهو سندن پيار ئي هوندو آهي جو اسان کي ايوراڊ ملندا آهن.

 

فلمساز ۽ هدايتڪار ڪنگ خان کي سائيڪل گفٽ ڪري ڇڏي، سائيڪل شاهه رخ کي گوڏي جي آپريشن ڇٽائڻ ۾ مدد ڪندي: روهت شيٽي

ممبئي (شوبز نيوز) بالي ووڊ فلسماز ۽ هدايتڪارروهت شيٽيءَ پنهنجي نئين ايندڙ فلم جي هيرو شاهه رخ خان کي گفٽ ۾ سائيڪل ڏني آهي، روهت شيٽي موجب سائيڪل شاهه رخ کي گوڏي جي آپريشن ڇٽائڻ ۾ مدد ڏيندي، بلغاريا ۾ ”دل والي“ جي شوٽنگ ۾ مصروف شاهه رخ ۽ روهت هڪ ئي هوٽل ۾ رهي رهيا آهن.

 

پاڪستاني ٽيم هن ڀيري سريلنڪن اسپنر رنگانا هيراٿ جي حملن جو جواب ڳولي لڌو آهي: مصباح الحق جي دعويٰ

ڪولمبو (اسپورٽس نيوز) پاڪستان ٽيسٽ ٽيم جي ڪپتان مصباح الحق دعويٰ ڪئي آهي ته پاڪستاني ٽيم هن ڀيري سريلنڪن اسپنر رنگانا هيراٿ جي حملن جو جواب ڳولي لڌو آهي. هيراٿ گذريل ڪجھه سيريزن دوران پاڪستان لاءِ سڀ کان خطرناڪ بالر ثابت ٿيو هو، هن هيل تائين پاڪستان خلاف 17 ٽيسٽ ميچن ۾ 88 وڪيٽون پنهنجي نالي ڪيون آهن، جيڪو کيس دنيا جي ڪنهن ٻي ٽيم خلاف هڪ ٽيون ڪامياب بالر بڻائي ٿي. کيس شين وارن جو رڪارڊ ٽوڙڻ لاءِ صرف ٽي جڏهن ته پاڪستان خلاف ٽيسٽ ڪرڪيٽ ۾ 100 وڪيٽون وٺندڙ دنيا جو پهريون بالر بڻجڻ لاءِ 12 وڪيٽون گھربل آهن. مصباح جو چوڻ هو ته هن هيراٿ جو ٽوڙ ڳولي لڌو آهي، ڇو ته سڀني ڇوڪرن هيراٿ کي ڪيئن کيڏڻو آهي لاءِ تمام گھڻي محنت ڪئي آهي. اسان گذريل سيريز ۾ کيس سٺو کيڏياسين، بازي ڪڏهن بالرن وٽ ته ڪڏهن بيٽسمينن وٽ. مصباح موجب هيراٿ خلاف سڀ سٺي راند ڪندا، هن گذريل ڀيري ڪنڊيشنن جو سٺو فائدو ورتو هو، پر هيل کيس هر بال تي جواب ملندو. اسپن بالر سڀني لاءِ مسئلو هوندو آهي، هن چيو ته ان کان اڳ مرلي ڌرن هو ۽ هاڻي هيراٿ به حيران ڪندڙ راند پيش ڪري رهيو آهي، ان ڪري اسان وٽ اصل مسئلو اسپن بالنگ آهي، جنهن خلاف اسان جدوجهد ڪري رهيا آهيون. اسان ان سلسلي ۾ ڪجھه مختلف ڪرڻ پيا وڃون. سريلنڪا ۽ پاڪستان جي ٽيسٽ ڪرڪيٽ ٽيمن ۾ ٽين ٽيسٽ ميچن جي پهرين ميچ اڄ کان شروع ٿي رهي آهي.

 

 

اسان کي پنهنجي ڊوميسٽڪ ڪرڪيٽ بهتر ڪرڻ جي ضرورت آهي: آفريدي

جميڪا (اسپورٽس نيوز) پاڪستاني ٽي ٽوئنٽي ڪرڪيٽ ٽيم جي ڪپتان شاهد آفريديءَ جو چوڻ آهي ته اسان کي پنهنجي ڊوميسٽڪ ڪرڪيٽ بهتر ڪرڻ جي ضرورت آهي. ڪرڪيٽ آسٽريليا جي ويب سائيٽ کي انٽرويو ڏيندي شاهد آفريديءَ چيو ته پاڪستان جي ڪرڪيٽ کي مضبوط ڊوميسٽڪ ڍانچي جي سخت ضرورت آهي. اسان کي پنهنجي ڊوميسٽڪ ڪرڪيٽ ۾ پروفيشنل ازم آڻڻو پوندو. ڇو ته جيستائين اسان جي ڊوميسٽڪ ڪرڪيٽ ٺيڪ نه ٿيندي ته ان ۾ ڪو شق ناهي ته اسان جي انٽرنيشنل ڪرڪيٽ به پنهنجو پاڻ ئي ٺيڪ ٿي ويندي.

 

آصف علي زرداري جي معنيٰ خيز تقرير: ڊاڪٽر ايوب شيخ

پاڪستان پيپلزپارٽي جي شريڪ چيئرپرسن آصف علي زرداري گذريل ڏينهن اسلام آباد ۾ ( پارٽي اڳواڻ بلاول ڀٽو زرداري) جي موجودگي ۾ جيڪا تقرير ڪئي آهي، ان جا ڪهڙا ڪهڙا رخ آهن، ڪهڙا ڪهڙا پاسا آهن، ان تقرير ۾ ڪنهن جي لاءِ ڪيترا خطرا موجود آهن ۽ خود پاڪستان پيپلزپارٽي لاءِ ڪهڙا خطرا ٿي سگهن ٿا يا انهن کي ڪهڙا فائدا پهچي سگهن ٿا ۽ ملڪ جي سراسري سياست تي ڪهڙا اثر پوندا، جهڙا خيال پيدا ٿيا آهن. پر سڀ کان اهم ۽ وڏو تاثر اهو پيدا ٿيو آهي ته، ڄڻ ته آصف علي زرداري جي اها تقرير سنڌ ۾ ”ڪرپشن“ خلاف ڪاررواين توڙي اها ڪارروائي ڪندڙ ”فوجي جنرلن“ جي خلاف آهي. اها ڳالهه ميڊيا ۽ خاص ڪري ٽي وي چينلن سندس تقرير جي جملن کي هيٺ مٿي ڪري، رڳو ان جي ظاهري اثر کي پيش ڪيو آهي. جي ان تقرير کي غور سان ٻڌجي ته هن جي تقرير ۾ اها ڳالهه به موجود آهي ته ” هيءَ فوج اسان جي آهي، اسان ان سان ڪلهو ڪلهي سان ملائي گڏ هلڻ چاهيون ٿا“. پر اها ڳالهه سولائي سان چئي سگهجي ٿي ته سندس هيءَ تقرير ڪا عام ۽ تڪڙ ۾ سمجهه ۾ اچڻ واري تقرير ناهي. هيءَ سياسي طور آصف علي زرداري جي ڄڻ ته مسلسل ماٺ ٽوڙڻ واري تقرير آهي. ڄڻ ته پارٽيءَ جي ٿيل تمام وڏي نقصان کان پوءِ پنهنجا ٽپڙ سنڀالڻ جي تقرير آهي.  پر، اها تقرير ڪرڻ جي کيس ڪا ته گهرج محسوس ٿي هوندي. ان ”ضرورت“ جي ڳولا جي گهرج آهي. انصاف به اهو آهي ته سندس سڄي تقرير ٻڌي وڃي ۽ ان جي سمورين ڳالهين جو سراسري تاثر ۽ سندس اصلي ”ضرورت“ جي باري ۾ ڳولا ڪئي وڃي.

سنڌ ۾ ڪرپشن جي باري ۾ اهم ڳالهيون:

سنڌ صوبو پاڪستان جو اڪيلو صوبو آهي، جنهن جي ”ڪرپشن“ جا هوش اڏائيندڙ يا ”هوشربا“ تفصيل اچي رهيا آهن، ڪڏهن خبرون پيون اچن، ڪڏهن نالا پيا اچن، ڪڏهن لسٽون پيون اچن ته ڪڏهن وري ترديدون پيون اچن. اصل سچائي هي آهي ته سنڌ ۾ ڪرپشن آهي. سنڌ ۾ اربين رپين جي ڪرپشن جون خبرون عام آهن. ان ۾ مختلف کاتن جا ڪيئي آفيسر ۽ لاڳاپيل ذميدار شامل آهن، جن ۾ مبينه طور ڪجهه وزير به اچي وڃن ٿا. پر پروپئگنڊا رڳو ”سنڌ“ خلاف ڇو؟. ان جو هڪ سبب اهو آهي ته ”سنڌ” ۾ ڪرپشن ته آهي. ٻيو سبب اهو آهي ته ”ڪرپشن“ کي ٽارگيٽ ڪري هڪ پاسي ميان نواز سرڪار جي ”ڪرپشن“ کي ڍڪُ ڏنو ويو آهي، ٻيو ته ٽن صوبن ۾ اهڙي ڪابه ڪارروائي ان نموني ڪانهي.

سنڌ ۾ ڪرپشن جي حوالي سان سمورا تير پ پ پ  جي قيادت ۽ ان جي فيمليءَ تي وسايا وڃن ٿا. ان هڪطرفي تيراندازي جي ڪري سنڌ ۾ ٻيا جيڪي به ڪرپٽ عنصر آهن، سي لڪايا ويا آهن، انهن تي ڄڻ ته هڪ ڍڪُ ڏنل آهي.

تازو نئب جي مرڪزي اجلاس کان پوءِ، پريس رليز جاري ڪيو هيو ته، ”اسان اسلم رئيساڻي، پير مظهر الحق ۽ علي مردان شاهه خلاف ڪارروائي ڪنداسين “ ان پريس بيان مان اها ڳالهه سونگهي سگهجي ٿي ته ”نئب“ ڪارروائي لاءِ پنهنجو موڊ ٺاهي ڇڏيو آهي. ڪالهه ساڳي اداري نئب جي اڳوڻن ٽن سربراهن جي بي لغام ڪرپشن ڪرڻ تي پڻ ڪارروائي جو فيصلو ۽ اعلان ڪيو آهي.

ٻه هفتا اڳ، سنڌ جي هڪ کاتي جي سيڪريٽري ۽ ٻئي کاتي جي ائڊيشنل سيڪريٽري کي نئب پاران گرفتار ڪيو ويو. سنڌ جي آفيسرن سمجهيو هيو ته سياسي قيادت سندن مدد لاءِ اڳيان ايندي، پر اهي ان نموني اڳيان نه اچي سگهيا ڇوته، سنڌ ۾ به پنجاب وارو رواج پئجي ويو آهي ”سانون ڪي“! جنهن ڪري، آفيسرن ۾ سرڪار خلاف هڪ بي دلي ۽ بددلي پيدا ٿي آهي. هڪڙو ڊڄ وارو ماحول پيدا ٿيو آهي.

ڪرپشن جي باري ۾ اوهان کي واقعو ٻڌايان ته، مون هڪڙي نسبتن شريف طبيعت سيڪريٽري کان هڪ ٻئي انتهائي شريف طبع سيڪريٽري بابت پڇيو ته ”هن ڪڏهن ڪرپشن ڪئي هوندي“ ته هن امالڪ وراڻيو ته، ”جڏهن هو مشرف دور ۾ فلاڻي ڪارپوريشن جي هڪ شعبي جو سربراهه هيو ته هن لڳ ڀڳ هڪ ارب رپيا پاسيرا ڪيا هوندا“.  اها ڳالهه ٻڌڻ کان پوءِ مون ڪوشش ڪئي آهي ته تڪڙ ۾ ڪنهن کي ”شريف“ يا ”بدمعاش“ جو لقب نه ڏيڻ گهرجي.

سومر ڏينهن، رينجرز پاران ڪراچي شهر ۾ سنڌ جي ٻن ادارن تي ڪارروائي ڪئي وئي. هڪ ۾  ”لائينز ايريا پروجيڪٽ“ جي هزارين پلاٽن جي ڪرپشن ۽ اربين رپيا کائڻ تي چئن ڊائريڪٽرن کي گرفتار ڪيو ويو. انهن تي الزام آهي ته انهن ڪرپشن ڪري علائقي ۾ ”چائنا ڪٽنگ“ جي نالي ۾ اهي پلاٽ ڏنا، جن جي باري ۾ ايم ڪيو ايم سربراهه الطاف حُسين انڪشاف ڪندي پنهنجي تنظيم جي ماڻهن تي الزام هنيو هيو ته انهن شهر ۾ پارڪ ۽ پلاٽ قبضو ڪري انهن کي ”چائنا ڪٽنگ“ جو نالو ڏنو هيو.

ٻي ڪارروائي، ”سنڌ بلڊنگس ڪنٽرول ڊولپمينٽ اٿارٽي“ جي مکيه آفيس تي ڪئي وئي. جتان رينجرز وارا رڪارڊ پڻ ساڻ کڻي ويا. ان اٿارٽي جو اڳواڻ منظور ڪاڪا آهي، جنهن تي الزام آهي ته هن عمارتن ٺاهڻ، ڊاهڻ، مرمت ڪرڻ وغيره ۾ قانون کان هٽي منظوريون ڏنيون ۽ ايڪشن ڪيا. هن جي لاءِ چيو وڃي ٿو ته ”هو سنڌ سرڪار ۾ بااثر آفيسر رهيو آهي“

انهن ٽن چئن ڳالهين ۾ اها ڳالهه سامهون بيهندي ته هتان جو ”شريف“ به مها ڪرپٽ هوندو. هتي سياست ڪندڙ وڏي پارٽي ۽ ان جي فيملي به مبينه طور ڪرپٽ آهي. هتان جا آفيسر، وزير ۽ سياستدان سڀ مبينه ڪرپٽ آهن. سو اهو سمجهڻ گهرجي ته هڪ وڏي ڪارروائي لاءِ اهي ننڍيون ننڍيون ڪارروايون هڪ وڏو جواز مهيا ڪنديون.

آصف علي زرداري جي تقرير:

خيبرپختونخواهه ۽ فاٽا جي پارٽي ورڪرن جي اجلاس کي اسلام آباد ۾ خطاب ڪندي پاڪستان جي اڳوڻي صدر آصف علي زرداري چيو آهي ته لسٽون ٺاهڻ ڇڏي ڏيو، جي اسان پاڪستان ٺهڻ کان وٺي اڄ تائين ملڪ لٽيندڙ جنرلن جون لسٽون جاري ڪيون ته پوءِ ڪير به نه بيهي سگهندو. هن چيو ته اسان ماٺ آهيون، جمهوري سرڪار جي هلڻ جا حامي آهيون، ملڪ جي معاشي ترقيءَ جا حامي آهيون. جي چاهيون ها ته ڪپتان سان گڏجي ٻن سالن ۾ ئي سڄو قصو پورو ڪري ڏيکاريون ها. اسان تحرڪ ۾ اچئون ٿا ته سڄو ملڪ لُڏي وڃي ٿو، هن چيو ته پيپلزپارٽي جي ڪردار ڪُشي بند نه ڪئي وئي ته اسان ڪراچي کان وٺي فاٽا بند ڪرائي ڇڏيون، پوءِ ان کي ڪير به کولائي نه سگهندو.هن فوج جي اڳوڻي سربراهه جنرل پرويز مشرف تي سڌي ۽ صاف تنقيد ڪندي چيوته ” پاڻ کي ڪمانڊو سڏائيندڙ ٽي مهينا به جيل جو گرم پاڻي پي نه ٿو سگهي“. هن چيو ته پرويز مشرف کي خبر ئي ڪانهي ته ملڪ کي ڪهڙا خطرا لڳل آهن، اها کين خبر آهي. اسان سياست کي طاقت لاءِ نه پر خدمت لاءِ استعمال ڪريون ٿا.

ان تقرير ڪرڻ جو مقصد ڪهڙو؟:

جناب آصف علي زرداري جو خيال رهيو آهي ته ”ڪرپشن“ هن ملڪ جو اشو ناهي ۽ اهو ڪنهن مهل به ڪنهن جي خلاف به استعمال ڪري سگهجي ٿو. ان ڪري اها ڳالهه سمجهڻ گهرجي ته هن جي تقرير ڪرڻ جو بنيادي مقصد اهو خيال آهي، جنهن خيال هيٺ ميان نواز شريف ۽ آصف علي زرداري الڳ الڳ سوچي رهيا آهن. ٻنهي جا رستا الڳ الڳ ٿي رهيا آهن. هن جي تقرير ۾ جنرل پرويز مشرف تي تنقيد گهڻين معنائن ۾ ٺهڪندڙ به آهي ته اها مسٽر زرداري جي گهرج به آهي ته، جنرل پرويز مشرف سميت جيڪي به ماڻهو ايم ڪيو ايم جا جانشين ٿيڻ جي ڪوشش ڪندا ته هي انهن جي واسطي وڏو، ناڪاري ۽ وقتائتو پيغام آهي. شايد ! الطاف حسين سان ٻيون جيڪي به هزارين ڀلايون آصف زرداري ڪيون هونديون، هي ”پنهنجي سر تي سهي“ جنرل پرويز مشرف جي مخالفت واري ڀلائي الطاف حسين کان ڪڏهن به نه وسرندي.

ان تقرير جا پاسائتا ناڪاري اثر:

جيڪڏهن اها تقرير رٽائرڊ جنرلن پنهنجي سر تي کنئي، يا اسٽيبلشمينٽ ان کي پاڻ مٿان سمجهيو ته پوءِ ملڪ جي سياست ۾ وڏي تيزي اچي ويندي. سنڌ ۾ ان تقرير جا اولڙا شدت سان محسوس ڪيا ويندا. پر، جيڪڏهن نواز شريف سميت ملڪ جون سموريون پارٽيون هڪ پاسي نئين صفبندي ڏانهن وڌڻ شروع ڪنديون ته ايم ڪيو ايم پڻ پيپلزپارٽي جو ساٿ ڇڏي ويندي. سنڌ ۾ پنهنجي وجود جو ڪجهه حصو بچائڻ ايم ڪيو ايم لاءِ بنهه ضروري آهي. پيپلزپارٽي تي اڃا اهڙو وقت نه آيو آهي.

 

سنڌي اديبن ۾ نمبر جي ڊوڙ ڪٿي دنگ ڪندي؟ : سرواڻ سنڌي

سنڌي اهو واحد سماج آهي جتي هر شيءَ ۾ اسان ڪو نئون تجربو ڪندا آهيون ۽ ان حوالي سان غور به نه ڪندا آهيون ته ان جو اسان جي معاشري تي، ثقافت تي ۽ اسان جي سڃاڻپ سميت ادبي کيتر تي ڪهڙو اثر پوندو؟ جڏهن سنڌ ۾ ڌاڙيل ڪلچر هو ته سڀڪو پرو چانڊيو ٿيڻ جي چڪر ۾ رڍ ۽ ٻڪري جو چور به گهران نڪري بندوق کڻي ٻيلي ۾ لهندو ويو ۽ پوءِ گهڻا ته پرو نه ٿي سگهيا پر پنهنجي زندگين تان هٿ کڻي ويٺا ۽ پوءِ وري جو وارو آيو فنڪاري جو ته گهڻن وري جلال چانڊيو ٿيڻ جي چڪر ۾ يڪتارو ۽ چپڙي کڻي واڄٽ وڄائڻ شروع ڪيا، پوءِ ڀلي ڪنهن وٽ سُر ۽ تال نه هو پر ڪلام جو سلسلو شروع ٿي ويو ۽ سڀني ڏٺو ته جلال جي ڪاپي ڪندي ڪيترن ئي عورتن به يڪتاري ۽ چپڙي تي ڳائڻ شروع ڪيو. روبينه حيدري ۽ تاج مستاني ان جو واضح مثال آهن. جڏهن ته روبينه حيدري ته سنڌي ٽوپي به پائيندي هئي.

صحافت جي ڊوڙ ۾ به ڪيترن ئي هڪٻئي کان اڳ ڪڍڻ جي لاءِ وڏيون ڪوششون ڪيون ۽ ڏينهن رات هڪ ڪري ڇڏي پر اصل ڀينگ ته ادب ۾ شروع ٿي جڏهن کان ادب ۾ نمبر ون ۽ ٽو جو مقابلو شروع ٿي ويو. اياز، تنوير، استاد بخاري، ابراهيم منشي، تاجل بيوس، جمال ابڙو ۽ ٻين جي دور ۾ ڀٽائي ثاني ۽ سچل ثاني ٿيڻ جو رواج هو، ڇو ته ان وقت اڃان سوشل ميڊيا نه هئي، جو اهي ويچارا ان جو استعمال ڪن ها ۽ نمبر ون ۽ ٽو جي ڊوڙ شروع ٿئي ها. پر اهو وقت اڃان به ڪجهه بهتر هو، ڇو ته ان وقت جا اديب ڄاڻو هئا ۽ يقينن هڪٻئي جي مقابلي جي سگهه هئن پر هاڻي اهو دور نه آهي، هاڻي ته نه ڀٽائي رهيو آهي نه سچل ۽ نه ئي وري اياز جو ڪٿي ڪو اولڙو آهي، پر هاڻي سوشل ميڊيا جو دور آهي ۽ سڀڪو ٻه سٽون لکي فيس بڪ تي رکي ون ۽ ٽو نمبر جي چڪر ۾ لڳو پيو آهي.

اسان وٽ ڪنهن کي ٽيڪر ڏيڻ جي لاءِ فرمائشي ڪتاب سهيڙي جنهن کي نمبر ون قرار ڏيڻو آهي، ان کي سڀ کان مٿڀرو رکي سڀڪو پاڻ وڻائڻ ۾ پورو آهي ۽ تازو ئي اهڙو ڪتاب مارڪيٽ ۾ آيو جيڪو سنڌ جي چونڊ سنڌي شاعرائن بابت هو، جنهن ۾ آپا مريم مجيدي پڻ آهي پر ان کي ته ٽاپ ٽين ۾ به جاءِ نه ملي سگهي ۽ ويچاري بس مڙئي شاعره هجڻ جي ناطي ڪتاب ۾ جاءِ والاري سگهي ۽ ان ڪلاسيفڪيشن تي ڪتاب سهيڙيندڙ کي وري وري سلام ڪرڻ تي دل چوي ٿي.

نامياري شاعرائن جي چونڊ ۾ سڀ کان مٿي روبينه ابڙو کي رکيو ويو آهي. هوءَ سوشل ميڊيا تي اڄڪلهه واقعي ئي سڀ کان وڏي شاعره آهي جنهن جي هر تخليق تي توهان کي صرف ”تمام بهترين غزل آهي“ ”ڇا ته تخليق آهي“، ”توهان واقع ئي سنڌ جي وڏي شاعره آهيو“ جا درٻاري جملا وڏي مقدار ۾ ملندا، باقي هڪ به تنقيدي جملو توهان کي نه ملندو، تازو ئي محترمه فني طور تي ڪمزور غزل

جيئن لاباري کانپوءِ هي کيت ٿٻيون آهن

تيئن ساروڻيون مون وٽ ڪلهه رات پڳيون آهن

فيس بڪ تي شيئر ڪيو ۽ ساراهه ڪرڻ جي ڊوڙ لڳي وئي. ڪنهن به غزل جي بيهڪ ۽ ان جي فني پختگي کي جاچڻ جي ضرورت ئي محسوس نه ڪئي ۽ جڏهن مون ان ڳالهه جي نشاندهي ڪئي ته محترمه جواب ڏنو ته شاعر هميشه جهونگاري لکندو آهي ۽ مون به جهونگاري لکيو آهي، ان جي لاءِ مفعولن ۽ فعلن واري وزن جي غزل ۾ ڪٿي ڪٿي فعلن اچي ويو آهي باقي توهان کي جذباتي ٿيڻ نه گهرجي. جنهن تي مون جواب ڏنو ته جهونگاربي هميشه ڪا لکيل شيءَ آهي ۽ وڏو شاعر جهونگاري لکي اها ته حيرت جوڳي ڳالهه آهي ۽ جهونگاري انڊين ڪلامن جي طرز تي ڪيسٽي شاعر لکندا آهن ته جيئن تڪ تڪ سان ملي اچي باقي وڏو شاعر ڪڏهن به جهونگاري ناهي لکندو. جنهن تي محترمه اهي سڀ ڪمينٽس خير سان ڊليٽ ڪري ڇڏيا ۽ صرف واهه واهه وارا ڪمينٽس موجود هئا ۽ پوءِ ڪجهه وقت پڄاڻان آخرڪار پورو غزل ئي فيس بڪ وال تان گم ڪري ڇڏيو. جيڪا شاعره ڪنهن ڪلام کي جهونگاري ۽ پوءِ پنهنجي ڪا تخليق لکي، ان مان اندازو ڪري سگهجي ٿو ته هوءَ ڪيڏي پائي جي شاعره آهي.

ان غزل کي هٽائڻ کانپوءِ هُن هڪ ٻيو غزل رکيو

مون ۾ مند لٿي هئي رات انڌاري ۾

سهسين گل ٽڙي پيا منهنجي ٽاري ۾

۽ پوءِ ساڳي مافيا ان غزل جي ساراهه ۾ پڻ وسان ڪونه گهٽايو ۽ ڪنهن کانئس اها وضاحت وٺڻ جي تڪليف به نه ڪئي ته ڀلا ڪو مند رات ۽ ڏينهن ۾ ايندي ۽ ويندي آهي ڇا؟؟ ڀلا سيارو رات جو ايندو ۽ ڏينهن جو ويندو آهي ۽ ڇا ڀلا اونهارو به ائين ايندو ويندو آهي ڇا؟ ان بابت سوچڻ جي ڪنهن به تڪليف نه ڪئي ۽ بس وڏي شاعره پاران غزل رکڻ جي دير هئي ۽ همراهه پنهنجي ڪم کي لڳي ويا ۽ ڪنهن ته مٿئين شهنشاهه غزل لکڻ جي انعام طور کيس ماڳهين ئي ٿر گهمڻ جي صلاح هڻي ورتي.

تازو ئي سنڌ جي نامياري اديب سائين بيدل هُن جي حوالي سان لکيو آهي، منهنجي خيال ۾ سائين بيدل پاران ڪڙو سچ لکڻ کانپوءِ ٺوڳي اديبن ۽ سوشل ميڊيا جي اديبن کي ٿورو پنهنجي جيءَ ۾جهاتي پائڻ گهرجي ۽ خير سان اسان جا هڪ ٻه دوست اهڙا به آهن جو جڏهن اهي بيروزگار هوندا آهن ته وحيد هيڪڙي کان به ننڍا شاعر هوندا آهن ۽ سڀني جا پڳ مٽ يار هوندا آهن ۽ پوءِ انهيءَ چاپلوسي وارو ڪردار ڪري جڏهن ڪٿي کين چڱڙي نوڪري ملي ٿي ته نوڪري ڏيندڙ جي ئي ڳچي ۾ پئجيو وڃن ۽ ڀٽائي ۽ اياز کان به ڪئين ڀيرا وڏا اديب بڻجي وڃن ٿا ۽ پوءِ اهو ئي رويو سندن روزگار کسجڻ جو سبب بڻجي ٿو ۽ همراهه وري ساڳي واري پوزيشن تي اچيو وڃن ۽ وري دعا سلام جو سلسلو جتان کان ٽُٽو اتان کان شروع ٿيو وڃي. خير سان اهي يارڙا اڄڪلهه روزگار سان لڳل آهن ۽ سڀ کان وڏا اديب بڻيل آهن.

سوشل ميڊيا تي ته اڄڪلهه ٻه ٽي سٽون لکندڙ به وڏو شاعر ۽ اديب بڻيل آهي ۽ جڏهن ان حوالي سان معلوم ڪيو ويو ته عجيب قسم جا انڪشاف سامهون آيا، اُهي اِهي ته نمبر ون جي ڊوڙ ۾ شامل شاعر ڪا سٽ لکي پوءِ پنهنجي سمورن ايڊ ٿيل دوستن کي ان باڪس مسيج ڪري سندن ان تخليق کي لائيڪ ڪرڻ ۽ ڪمينٽس ڏيڻ جي گذارش ڪن ٿا ۽ يقينن ڪنهن کي هڪ ڪلڪ ڪرڻ ۾ ڪيتري دير ٿئي ٿي ۽ ان حساب سان گهٽ ۾ گهٽ به چار پنج سئو لائيڪس ملي وڃن ٿا ۽ همراهه وڏو شاعر بڻجي وڃي ٿو ۽ پوءِ وري توهان ميسيج به پڙهو ته سائين واهه واهه توهان ته اڄڪلهه ملهه ماري ويا آهيو.

سنڌ ۾ رينجرز جي وٺ پڪڙ

وفاق جي ماتحت هلندڙ رينجرز سنڌ جي مختلف کاتن ۾ ڪرپشن خلاف جاچ جي سلسلي ۾ ڇاپن ۽ ڪامورن جي وٺ پڪڙ جو سلسلو شروع ڪري ڇڏيو آهي، هڪ ڏينهن اڳ ڪراچي ۾ سنڌ بلڊنگ ڪنٽرول اٿارٽي جي مرڪزي آفيس تي ڇاپو هڻي عمارت کي ڪڙو چاڙهيو ويو، رينجرز اهلڪارن اڳوڻي ڊي جي منظور قادر بابت، شهر ۾ غير قانوني اڏاوتن، چائنا ڪٽنگ ۽ مختلف رٿائن جي نقشن جي منظوري جي حوالي سان  پڻ معلومات ورتي، بعد ۾ رينجرز زمينن جي الاٽمينٽ وارو رڪارڊ ، ڪمپيوٽر ۽ اهم دستاويز پاڻ سان گڏ کڻي وئي. نيب سنڌ ۾ غيرقانوني پلاٽ الاٽ ڪرڻ وارين شڪايتن جي جاچ جي سلسلي ۾ سنڌ لائينز ايريا ري ڊولپمينٽ اٿارٽي جي 5 اهم عملدارن کي پڻ گرفتار ڪري ورتو، مٿن اهو الزام آهي ته هنن چائنا ڪٽنگ وسيلي 1200 کان وڌيڪ پلاٽ مختلف مافيائن کي وڪرو ڪري ساڍا چار ارب رپين کان وڌيڪ رقم هڙپ ڪئي، نيب موجب ڄاڻايل عملدارن پنهنجي اختيارين جو ناجائز استعمال ڪندي بلڊرز ۽ مافيائن کي غيرقانوني طور پلاٽ الاٽ ڪيا ۽ ڪرپشن ذريعي وڏو ناڻو ڪمايو. جڏهن ته اي سي ايل ۾ 50 کان وڌيڪ آفيسرن جا نالا شامل ڪيا ويا آهن ته جيئن هو ٻاهرين ملڪن ڏانهن فرار نه ٿي سگهن، اطلاع اهي به آهن ته رينجرز جي ڇاپن سبب سنڌ بلڊنگ ڪنٽرول اٿارٽي جو ڊي جي منظور قادر عرف ڪاڪا ڪارروائين کان ڪجهه ڏينهن اڳ ئي دبئي فرار ٿي ويو هو، ان سان گڏوگڏ 30 کان وڌيڪ بلڊر دبئي فرار ٿي ويا آهن، نيب ۽ رينجرز سنڌ جي صحت، تعليم، مڪاني ادارن، ورڪس اينڊ سروسز، آبپاشي کاتن ۾ غيرقانوني ڪمن، اربين رپين جي ڪرپشن ۽ گوسڙو ملازمن خلاف وڏي پئماني تي جاچ شروع ڪري ڇڏي آهي، ٻڌايو پيو وڃي ته ملڪ جي سگهاري قيادت ۽ اختيارين جي اتفاق سان سنڌ جي مختلف کاتن ۾ ڪامورن خلاف جاچ ۽ گرفتارين جو سلسلو شروع ڪيو ويو آهي. سنڌ جي سرڪاري کاتن جي ڪامورن خلاف رينجرز جي اهڙين ڪاررواين بابت آگاهه نه ڪرڻ تي صوبائي حڪمران جماعت پيپلزپارٽي سخت احتجاج ڪندي ان تي خدشا ظاهر ڪيا آهن، سنڌ جي مختلف کاتن جي خلاف ڪارروائين ۾ ان وقت کان تيزي آندي وئي آهي، جڏهن ڪجهه ڏينهن اڳ ڊي جي رينجرز رپورٽ پيش ڪندي ڄاڻايو هو ته ڪراچي ۾ هر سال غيرقانوني طريقن سان 230 ارب رپيا اوڳاڙيا وڃن ٿا، جن ۾ سنڌ جون بااثر شخصيتون به شامل آهن. ڏٺو وڃي ته ملڪ ۾ دهشتگردي ۽ ڪرپشن ٻه وڏا مسئلا آهن، جيتري گهرج دهشتگردي کان ڇوٽڪاري جي آهي، ايتري ئي وري ڪرپشن ۽ بي ضابطگين جي خاتمي جي آهي، ڇو ته دهشتگردي توڙي ڪرپشن هوندي ڪو به ملڪ ترقي جي منزل ماڻي نٿو سگهي، جيستائن سوال سنڌ ۾ ڪرپشن جي الزامن يا حقيقتن جو آهي ته لازمي طور تي اسان کي ڪرپشن ڪندڙ هٿن تائين پهچڻو پوندو. ماضيءَ ۾ به پ پ جي هر حڪومت تي ڪرپشن ۽ بي ضابطگين جا الزام لڳندا رهيا ۽ هاڻ به اهڙي قسم جون ڳالهيون ڪيون پيون وڃن.سنڌ ۾ جيڪڏهن واقعي ڪرپشن جو وڏو آزار آهي يا مختلف سرڪاري کاتن جا ڪامورا بدعنواني جي بيماري ۾ مبتلا آهن ته انهن جو علاج ڪرڻ ضروري آهي، پر هتي ته علاج ڪندڙن تي ئي الزام لڳايا پيا وڃن ته پوءِ انهيءَ درد جي دوا ڪير ڏيندو؟

نيب جي ڪارروائين ۽ رينجرز جي وڌندڙ ڇاپن مان اهو ئي اندازو لڳائي سگهجي ٿو ته وفاق سنڌ حڪومت تي بي اعتمادي ظاهر ڪري رهيو آهي، اهو ئي نتيجو آهي ته ملڪ جي چئني صوبن مان گهڻي قدر سنڌ ۾ ئي ڪرپشن جو راڳ آلاپيو وڃي ٿو، ان سان نه رڳو سنڌ حڪومت پر پيپلزپارٽي جي استحڪام لاءِ به خطرو  پيدا ٿي رهيو آهي، بهرحال، اسين سمجهون ٿا ته ڪجهه ڪوتاهيون اسان جون پنهنجون به آهن، هر غريب ماڻهوءَ جي واتان اڄ به ٻڌڻ ۾ ايندو آهي ته سنڌ حڪومت ۾ نوڪريون رڳو پئسن تي ملن ٿيون، غريب جي ڪا جاءِ ئي ناهي، هاڻ ته پٽيوالي به وزيراعليٰ يا ڪنهن وزير جي اجازت بنا نٿي ملي! غريبن جي ذهن ۾ سنڌ حڪومت لاءِ اهڙي قسم جو تاثر پيدا ٿيڻ يقينن انتهائي ڳڻتي جوڳي ڳالهه آهي، ڇو ته پيپلزپارٽي جي باني شهيد ذالفقار علي ڀٽو جي منشور ۾ سڀ کان پهرين اوليت غريبن جي حقن کي هئي، جيڪڏهن انهن جي جاءِ هاڻ اميرن والاري آهي ته اها اسان جي پنهنجي ڪوتاهي سڏبي. خير، اڃا به وقت ويو ناهي، سنڌ حڪومت وٽ بهترين موقعو آهي ته صوبي ۾ شفاف نموني سان عوام کي صحت، تعليم ۽ پيئڻ لاءِ صاف پاڻي سميت بنيادي سهولتون فراهم ڪيون وڃن ته جيئن وفاق کي سنڌ حڪومت تي آڱر کڻڻ جي ضرورت نه پوي، سنڌ سرڪار تي اهو لازمي آهي ته ڪرپشن جي خاتمي لاءِ اهڙو نظام جوڙيو وڃي، جنهن سان نه رڳو بدعنوانين ۾ ملوث ڪامورا قانون جي جڪڙ ۾ اچي سگهن، پر ان سان گڏوگڏ ڪرپشن مان به مڪمل طور تي ڇوٽڪارو ماڻي سگهجي، جيڪڏهن وفاق ڪنهن آڙ ۾ سنڌ حڪومت کي ڪمزور ڪرڻ چاهي ٿو ته اهو اهم ۽ سنجيده معاملو آهي، جنهن تي وفاق سان باضابطا طور تي ڳالهائڻو پوندو، اميد آهي ته سنڌ حڪومت پنهنجي ڪارڪردگي شفاف ۽ صاف سٿري بڻائي وفاق آڏو صوبي جي هر ان مسئلي کي اٿاريندي، جنهن سان عوام جون اميدون واڳيل آهن.