تازيون خبرون

Daily Archives: June 17, 2015

ڪراچي ۾ مقابلا، 5 هٿياربند مارجي ويا، رينجرز ۽ پوليس ڪيترن ئي جوابدارن کي گرفتار ڪري ورتو

ڪراچي(اسٽاف رپورٽر) ڪراچي ۾ مبينا مقابلن دوران 5 هٿياربند مارجي ويا، رينجرز ۽ پوليس  ڪيترن کي جوابدارن کي گرفتار ڪري ورتو.سپر هاءِ وي تي نيو سبزي منڊي وٽ پوليس سان مقابلي ۾ 2 ڏوهارين کي ماريو ويو.قائدآباد جي مولاداد قبرستان وٽ مبينا مقابلي ۾ 3 ڏوهاري مارجي ويا.پي آءِ بي ڪالوني ۽ گلستان جوهر جي علائقن مان 6 جوابدارن سميت 41 شڪين کي پڪڙيو ويو.گلشن اقبال جي علائقي عباس ٽائون ۾ رينجرز ٽارگيٽيڊ آپريشن ڪري 3 جوابدار گرفتار ڪيا، جن ۾ باقر، جوني ۽ عارف شامل آهن.رينجرز ذريعن موجب ٽنهي جوابدارن گلشن چورنگي ويجهو ڦر دوران هڪ شخص کي قتل ڪيو هو….

 

شاهه رخ جتوئي ڪيس ۾ مدد نه ڪرڻ تي الزام تراشي ٿي رهي آهي، قانوني جنگ وڙهندس: پير مظهر الحق

ڪراچي(اسٽاف رپورٽر) پيپلز پارٽي سنڌ جي سينيئر اڳواڻ ۽ اڳوڻي صوبائي وزير پير مظهرالحق چيو آهي ته هڪ سنڌي ٽي وي چينل جو مالڪ ۽ اينڪر پرسن سندس خلاف پنهجي ٽي وي چينل تي ڪوڙي ۽ من گهڙت پروپيگنڊه ڪري رهيو آهي، هڪ بيان ۾ پير مظهر الحق چيو ته نوڪريون کپائڻ وارو بي غيرت ئي ٿي سگهي ٿو. پير مظهرالحق چيو ته حقيقت هي آهي ته مذڪوره ٽي وي چينل جو مالڪ ۽ ان جو مذڪوره ملازم مون وٽ آيا ۽ چيو ته شاه زيب قتل ڪيس ۾ اسانجي مدد ڪيو ڇو ته هن قتل ڪيس ۾ اوهان جي ڪوآرڊينيٽر ۽ سياسي دوست نويد زبيري جو ڀائيٽيو محمد احمد زبيري اکين ڏٺو شاهد آهي ڪنهن به طريقي سان اوهان ان جو بيان تبديل ڪرائي ڏيو، مون صاف انڪار ڪيو ۽ چيو ته ان معاملي ۾ ڪابه مدد نٿو ڪري سگهان ۽ نه ئي ڪندس جنهن تي شاهه رخ جتوئي جو والد سڪندر جتوئي ۽ ان جي ٽيم هاڻي منهجي خلاف اندر جي باهه ڪڍي رهيا آهن ۽ مسلسل ڪوڙي پروپيگنڊه ۾ مصروف عمل آهن. هن چيو ته سڪندر جتوئي کي  تمام سٺي طرح سڃاڻان ٿو هو ماضي ۾ زيل پاڪ سيمنٽ فيڪٽري ۾ مزدور طور ڪم ڪندو هو ۽ هاڻ هو کرب پتي ڪيئن بڻيو، نيب کي ان جي تحقيقات ڪرڻ گهرجي. الحمدالله مان سپريم ڪورٽ آف پاڪستان جو وڪيل ۽ سنڌ جي اڳوڻي چيف منسٽر ۽ قائد اعظم جي سياسي رفيق پير الاهي بخش جو پوٽو آهيان، مون وٽ الله پاڪ جو ڏنل ايترو ضرور آهي جو نوڪرين کپائڻ جهڙي ذليل ڪم ڪرڻ جي ضرورت ناهي، پر چند سالن ۾ ارب پتي بڻجڻ وارا ڪنهن منهن سان الزام تراشين تي لهي آيا آهن. هن چيو ته هو هڪ وڪيل آهي ۽ ان مِيڊيائي مافيائن جي خلاف قانوني جنگ لڙندو ۽ جلد انهن جي خلاف ڪورٽ ۾ هرجاڻي جي دعوي داخل ڪندس.ا

 

شڪارپور ۾ بولان ايڪسپريس جون 6 بوگيون پٽڙي تان لهي ويون، ڪيترائي مسافر زخمي

سکر (بيورو) شڪارپور ۾ بولان ايڪسپريس جون 6 بوگيون پٽڙي تان لهڻ جي نتيجي ۾ ڪيترائي  مسافر زخمي ٿي پيا. ڊي ايس پي ريلوي فرح تيمور خانگي ٽي وي چينل سان ڳالهائيندي ٻڌايو ته اڱاري جي صبح شڪارپور جي پسگردائي واري علائقي مديجي ۾ بولان ايڪسپريس جون 6 بوگيون پٽڙي تان لهي ويون جنهن جي نتيجي ۾ ڪيترائي مسافر زخمي ٿي پيا آهن. هن چيو ته بولان ايڪسپريس ڪراچي کان ڪوئٽا وڃي رهي هئي. هن چيو ته ريلوي ٽريڪ جي مرمت جو ڪم شروع ڪيو ويو آهي پر ڪراچي کان ڪوئٽا وچ ۾ ريلوي ٽريڪ عارضي طور تي بند ڪيو ويو آهي. شروعاتي جاچ موجب حادثو دادو ڪئنال جو حفاظتي بند ٽڻڻ سبب پيش آيو آهي.

 

وپل شاهه ۽ اڪشي ڪمار ”نمستي لنڊن“ جو سيڪوئل ٺاهيندا

ممبئي(شوبز نيوز) هدايتڪار وپل شاهه ۽ اداڪار اڪشي ڪمار 2007ع ۾ ريليز ٿيندڙ ڪامياب فلم ”نمستي لنڊن“ جو سيڪوئل ٺاهيندا. ذريعن مطابق اڪشي ڪمار وپل شاهه سان ملي ”نمستي لنڊن“ جو سيڪوئل انگلينڊ ۾ ٺاهڻ جو فيصلو ڪيو آهي. ان فلم جي شوٽنگ سيپٽمبر ۾ شروع ڪئي ويندي. فلم جو مرڪزي ڪردار هن ڀيري ٻيهر اڪشي ڪمار پاڻ ڪندو جڏهن ته هيروئن جي نالي جو اعلان ناهي ڪيو ويو. نمستي لنڊن ۾ اڪشي جي مقابلي ۾ ڪترينه ئي ۽ جڏهن ته رشي ڪپور به فلم ڪم ڪيو آهو. اڪشي مطابق سيڪوئل فلم جي ڪهاڻي جو تسلسل نه هوندو بلڪ ان لاءِ نئون پلان لکيو ويو آهي.

 

”جراسڪ ورلڊ“ جو سيڪوئل ٺاهڻ جو فيصلو

لاس اينجلس (شوبز نيوز) فلم ”جراسڪ ورلڊ“ جي مشهوري کان پوءِ ان جو سيڪوئل ٺاهڻ جو فيصلو ڪيو ويو آهي جنهن لاءِ اداڪار ڪرس پريٽ کي ڪاسٽ ڪيو ويو آهي. جراسڪ ورلڊ يونيورسل اسٽوڊيو جي فلم آهي جنهن فلم جي رليز جيپهرين ٽن ڏينهن جو رڪارڊ ٽوڙ حال ڏسندي ئي ان جو سيڪوئل ٺاهن جو فيصلو ڪندي ڪرس پريٽ کي سائن ڪري ورتو آهي. جنهن تازي فلم ۾ هڪ ماهر جو ڪردار ادا ڪيو آهي. سيڪوئل جو نالو ”ٽرٽي ايٽ“ رکيو پيو وڃي پر اهو قطعي ناهي سيڪوئل جو ڊائريڪٽر ڪولن ٽري وورو هوندو.

 

عاطف اسلم جي آواز ۾ گانو پهريون ڀيرو اداڪار سلمان خان تي شوٽ ڪيو ويندو

ممبئي(شوبز نيوز) پاڪستاني ڳائڻو عاطف اسلم فلم ”بجرنگي ڀائي جان“ لاءِ گانو ڳائيندو. عاطف جي آواز ۾ ڳايل گانو پهريون ڀيرو اداڪار سلمان خان تي شوٽ ڪيو ويندو. ذريعن مطابق عاطف جو اهو رومانوي گانو آهي جنهن جي موسيقي پريتم ترتيب ڏني آهي، جڏهن ته گاني جو ٽائيٽل ”تو چاهي“ رکيو ويو آهي. گاني جي منظر ۾ سلمان سميت ڪرينه ڪپور به هوندي، ان گاني جي شوٽنگ پُراڻي دهليءَ ۾ ڪئي ويندي. ياد رهي ته راحت فتح علي خان جو ڳايل گانو ”تيري ميري پريم ڪهاني“ سلمان ۽ ڪرينه تي ٺاهيو ويو هو ۽ اهو سپرهٽ گانو ثابت ٿيو. ا

 

اداڪار سلمان خان خلاف ڪيس جي ٻڌڻي پهرين جولاءِ تائين ملتوي

ممبئي (شوبز نيوز) ڀارتي اداڪار سلمان خان خلاف داخل هٽ اينڊ رن ڪيس جي ٻڌڻي پهرين جولاءِ تائين ملتوي ڪئي وئي آهي. سلمان خان ممبئي هاءِ ڪورٽ ۾ ضلعي عدالت جي پنهنجي ڪيس جي فيصلي خلاف اپيل داخل ڪئي آهي جنهن جي ٻڌڻي هاڻي پهرين جولاءِ تي مقرر ڪئي وئي آهي. ضلعي عدالت 6 مئي تي سلمان خان کي ان ڪيس ۾ 5 سال قيد جي سزا جو فيصلو ٻڌايو هو، سلمان خان هن وقت ضمانت تي آزاد آهي ۽ پنهنجي مڪمل ٿيندڙ فلمن جي شوٽنگ ۾ مصروف آهي.

 

انگلينڊ خلاف ٽين ڪاميابي حاصل ڪري سيريز پنهنجي نالي ڪنداسين: ميڪولم

ناٽنگهم(اسپورٽس نيوز) نيوزيلينڊ ڪرڪيٽ ٽيم جي ڪپتان ۽ جارحي بيٽسمين برينڊن ميڪولم چيو آهي ته انگلينڊ ٽين ڪاميابي حاصل ڪري سيريز پنهنجي نالي ڪنداسين. پهرئين ون ڊي ۾ شڪست بعد لاڳيتو 2 ميچن ۾ ڪاميابي ٽيم جي اجتماعي ڪوششن جو نتيجو آهي. ڪيويز سيريز جي ٽين ميچ ۾ انگلينڊ کي 3 وڪيٽن تان شڪست ڏني هئي. هن چيو ته پهرئين ون ڊي ۾ ناقص ڪارڪردگي کانپوءِ ٽيم جهڙيءَ ريت شاندار ڪم بيڪ ڪيو آهي اها واکاڻ جوڳي ڳالهه آهي. هن اُميد ڏيکاري ته رانديگر ايندڙ ميچن ۾ به سٺي ڪارڪردگي جي تسلسل کي برقرار رکندا.

 

فيفا وومينز ورلڊڪپ ۾ اڄ چئن ميچن جو فيصلو ٿيندو

ٽورنٽو (اسپورٽس نيوز) فٽبال جي عالمي تنظيم فيفا جي اهتمام هيٺ ڪينيڊا م جاري ستين فيفا وومينز ورلڊڪپ فٽبال ٽورنامينٽ ۾ اڄ اربع تي وڌيڪ چئن ميچن جو فيصلو ٿيندو.ميگا ايونٽ ۾ اڄ گروپ اي جي پهرين ميچ ۾وسٽاريڪا ۽ برازيل جون ٽيمون آمهون سامهون ٿينديون جڏهن ته ان ئي گروپ جي ٻي ميچ ۾ جمهوريا ڪوريا ۽ اسپين وچ ۾ مقابلو ٿيندو. گروپ ايف جي پهرين ميچ ۾ ميڪسيڪو ۽ فرانس جون ٽيمون آمهون سامهون ٿينديون جڏهن ته ٻي ميچ انگلينڊ ۽ ڪولمبيا وچ ۾ کيڏي ويندي.

 

 

اتهاس جو ڏنل ڀونڊو: شوڪت لوهار

اسان جي مرتين تي مرثيا لکڻ وارا ڀي هاڻ ڪونه رهيا آهن، ڪٺل ٻاٻيهن جي ڪيهاٽ ۽ دانهن جا ورجائڻ ۽ ورنائڻ وارا پورا ٿي چڪا آهن. سڀني املتاسن جا پن ڇڻي ويا آهن ۽ سڀ ڪانويليون ڪنهن ڏرانهين ڏيهه ڏانهن هليون ويون آهن. مُسلسل چٻرن جي آوازن روح ۾ هِڪ عجيب خوف ۽ ڏهڪاءُ پيدا ڪري ڇڏيو آهي. هاڻي جا ٿلها پير آهن، جيڪي ماڪوڙين ۽ ڪولين جيان جيئندڙ ماڻهن کي مسلسل ماري رهيا آهن. ڪوبه اهڙي تماشي تي دانهن نٿو ڪري، شايد درد سهڻ هاڻ زندگي جيئڻ لاءِ لازمي ٿي ويو آهي.
هي ميٿوڙو پاڻي جيڪو هاڻ ماڻهو جي لهو سان ڳاڙهو ٿي ويو آهي، مجبورين ۽ بيوسين جو لهو جيڪو اسان جي جسم جي هر حصي کان جاري و ساري آهي. زندگي جو سفينو خبر ناهي ڪهڙي طرف ڌوڪيندو وڃي رهيو آهي. شايد اسان ڪنهن اهڙي ديس ۾ اچي ويا آهيون، جتي سڀ انڌا ۽ ٻوڙا آهن، سڀ گونگا ۽ وائڙا آهن. هي شايد انهي بگهڙ ننڊ جو آستان آهي، جتي ٿوري لهجي جي نڀاڳي ننڊ اسان کان ساهن جي مٺ به کسي ويندي، پر ڪير ڪُڇي؟ ڪوبه نه شايد ڪوبه نه!
ڀلا هن موت جي کيل نشاني جو ڪو انت به آهي شايد نه! ڀلا هي انياءَ ڏهڪاءُ هن ڏيهه جي نرڙ تي ڇو لکجي ويا آهن. ماڻهو جي ماس سڙڻ جي ڀلا ڪنهن کي جڳائي ڇو نٿي؟ گگهه انڌيارو چوڏس صرف دونهون ئي دونهون آهي.
جهڙي طرح سنڌ جون زمينون ذاتي ملڪيتن ۾ تبديل ٿي رهيون آهن، ان ڳالهه جي پڪي اميد آهي ته هتان جي ماڻهن جي زندگي جنهن کي اڄڪلهه نالي ماتر سندس ئي چئون ٿا اِها به ڪنهن ٻئي وس ٿي ويندي يا ٿي رهي آهي، جهڙي نموني هٿرادو بحران برپا ڪري هن ڀونءَ جي ڌرتتي کي ٽامو بڻايو پيو وڃي، جتي ڪوبه امن جو پکي پر ساهي نه سگهي، جتي ڪوبه مور ٽهوڪو ٻڌڻ ۾ نه اچي اتي صرف ۽ صرف وحشين وارا ٽهڪ ۽ ٽهڪ هجن ۽ آسمان ۾ نظر اڇلائي پنهنجي وحشين جي جيت تي سرهو ٿجي. شيڪسپيئر شايد اهڙن ئي ماڻهن لاءِ پنهنجي جڳ مشهور ناٽڪ ۾ چيو هو ته،
“Smile, smile and be villain”
”کلو، کڳيون هڻو ۽ پوءِ وحشي بڻجي وڃو“
هر شيءِ ذاتي ٿي رهي آهي، اوهان جي جيون کي تور ماپ جي ساهمي ۾ توريو وڃي ٿو، جتي ڀڳڙن مُٺ جا محاورا هاڻ مذاق لڳڻ لڳا آهن.
اسان وٽ هونئن ته ڪڏهن به اهڙا خواب ڏٺا به نه ويا آهن، جن جي ساڀيان انهن جي حيثيت ۽ اوقات کان مٿي هجي پر تڏهن به اسان پوري زندگي جيڪي خواب ڏسون ٿا اِهي به ڪي سهانا سپنا ناهن هوندا، پر اِهي ڀوائتا Nightmares هوندا آهن، جن جي تعبير جو سوچڻ به گناهه آهن. انهن خوابن جي وچان ڇرڪ ڀري اٿڻ ۽ وري پنهنجي پيرن ۾ پاتل زنجير کي هٿ لائڻ ته انهن جا ڪلف ته اڃا ساڳيا آهن ۽ مسلسل بند آهن.
جيتوڻيڪ هونئن ته سنڌ ۾ گذرندڙ هر ڏينهن ۽ رات ڪربلا کان گهٽ نه آهي، جتي روزانو ڪيڏارا لکجن ٿا. هن ننڍڙي يونين ڪائونسل کان ڪاسمو پوليٽن شهر تائين سڀ جا سڀ اهڙي ڪيڏاڙي جو موضوع آهن، جتي آپگهات ڪرڻ اخبار جي سرخي کان وڌ حيثيت نٿو رکي، جتي ڪامورن جي ڪارن ڪرتوتن هڻي ماڻهن جي اکين ۾ گرم سيخون وجهي ڇڏيون آهن. سنڌ جو هر شهر ۽ واهڻ وستي گٽر ۾ تبديل ڪندڙ ميونسپل انتظاميه هجي يا ڪو ٻيو ادارو سڀئي هِڪ ڀوتارڪي رياست جا صعا لڳن ٿا، جتي ڪنهن به حساس ماڻهو جو جيئڻ هِڪ تمام ڏکي ڳالهه آهي. ڪير به پڇاڻو ڪرڻ وارو ڪونه آهي. هر ڪنهن جو حصو پتي رکيل آهي. مانائتي سنڌ جي معزز امڙين کي جڏهن پِنَ جا پئسا ملڻ جي آسري اميد ۾ صبح کان شام تائين اي ٽي ايم مشين جي ٻاهران ڳوٺ ٻڌجندي ڏسان ٿو ته درد جو هڪ خنجر اندر ۾ لهي وڃي ٿو. وري انهي ۾ ڪرپشن جي انتها آهي جو بيواهه ماڻهن کان ايجنٽ پنهنجي ڀاڙ وٺي پوءِ کين ڪجهه ٽڪا تڙپائي تڙپائي ڏين ٿا. سنڌ ۾ ٿيندڙ اهڙي الميي تي ڇا چئي سگهجي ٿو؟ اسان جي پاڻي، اسان جي ماني تي چوڪيدار ويهاريل آهن، هر گرهه سان گڏ زهر جو ڍڪ به پيئڻو پوي ٿو.
سنڌ جي بجيٽ به پيش ٿي چڪي، پر بدين جي رهواسي اڀاڳي ناجو ۽ ڪيول جي زندگين جو بجيٽ ته انهي کان اڳ ۾ ئي پيش ٿي ويو، جن مسلسل هِڪ هفتو بک ۾ گذاريو، جڏهن ڪابه واهه ۽ واهر ڪانه ڏٺي ته انهن پاڻ مارڻ جو فيصلو ڪيو. واقعي پاڻ مارڻ ڪفر آهي، مايوسي آهي، مايوس نه ٿيڻ گهرجي، پر انهي کان وڌيڪ شدت پنهنجي معصوم ڇهن ٻچڙن کي بک مرندو ڏسي خاموش رهڻ انهي کان وڌيڪ وحشتناڪ آهي. جهٽ گهڙي لاءِ سوچي ته ڏسو پاڻ مارڻ ڪو آسان ڪم آهي. ڇا اِهي ماڻهو هئا جن ڪنهن ڊپريشن تحت خودڪشي ڪئي هئي؟ ڇا ناجو ۽ ڪيول اهي ماڻهو هئا جن ان ڪري آتم هتيا ڪئي هئي جو هاڻ زندگي مان مزو ختم ٿي ويو هو يا هو آسائشن ۾ اهڙو ته الست ٿي ويا هئا جو هاڻ هو بس پاڻ مارڻ لاءِ تيار ٿي ويا هئا يا کين ڪا اهڙي بيماري هئي جنهن جي درد مسلسل جي ڪري هو جان نه پئي ڇڏائي سگهيا؟ ها واقعي هو هِڪ اهڙي بيماري جي ور چڙهي ويا هئا، جيڪا اڄڪلهه سنڌ ۾ عام جام وچڙندڙ بيماري ٿي پئي آهي ۽ آئي ڏينهن ڪونه ڪو ان جو شڪار ٿي رهيو آهي. جي ها اِها بيماري آهي بک جي بيماري ڇاڪاڻ ته بک جهڙي بيماري کان وڌ ٻيو ڪجهه آهي به ڪونه. موسلو جي ضرورتن وارو احرام اِهو ٻڌائي ٿو ته ماڻهو جي اول ضرورت بک آهي. هي اسان جو نام نهاد ۽ غيرتون ۽ منافقتن پٺيان لڪل مڪاريون سڀ پوءِ آهن، پهريون بک آهي ۽ بک ۾ بکيو گدڙ شينهن کي به کائي ويندو آهي، پر هي ويچارا ناجو ۽ ڪيول ته ماڻهو هئا ۽ گدڙ به ڪونه ٿي سگهيا، پر هي انهن گدڙن جي هٿان بک ماريا ويا جيڪي شينهن جي کل پائي روزانو ٿلهن ٽائرن وارين گاڏين ۾ گشت تي نڪرندا آهن، اِهو ڏسڻ لاءِ نه ته ڪو بکيو ته رهيو آهي، بلڪه اِهو ڏسڻ لاءِ ته اڄوڪي ڏينهن تي بک ۾ ڪيترا ماڻهو مئا آهن!!
بجيٽ جو گورک ڌنڌو جنهن کي سمجهه اچي اهي ئي ٻڌائي سگهندا ته سنڌ جي هڪ عام رواجي زندگي گذاريندڙ ماڻهو کي ان مان ڪيترو فائدو رسيو آهي. ڇاڪاڻ ته چارٽڊ اڪائونٽن ٿيڻ لاءِ نه ئي ڇاڇري ۾ ڪو ادارو آهي نه جوهي ۾ ڪا يونيورسٽي. عام ماڻهو کي هِڪ لپ اٽي جي هِڪ دال جي پليٽ ۽ ٿوري بتي گهرجي ٿي، جيڪا سندس جيون جي گهاڻي کي هلائي سگهي، پر اهي سڀ شيون ايتريون سستيون ڪونه آهن جو ٽڪي سير ڀاڄي ۽ ٽڪي سير کاڄا ملن؟ عام ماڻهو جي جيون جا فانوس هر بحث کانپوءِ جهيڻا ئي ٿيا آهن، ٿي رهيا آهن ۽ آخرڪار انهن جي جوت صفا جواب ڏئي وڃي ٿي ۽ اهي ناجو ۽ ڪيول بڻجي پون ٿا!
هاڻ انهن جي ڇهن ٻارن جو ڇا ٿيندو؟ انهي سوال جي تڪي نوڪ کان ئي مون کي ڀوءُ ٿئي ٿو. جيتوڻيڪ کوڙ ٻوڙ ۽ روسٽ کاڌل وڌيل پيٽن وارا اُتي اچي دعويٰ به ڪندا ۽ فوٽو سيشن به ٿيندو.
ناجو ۽ ڪيول هڪ اهڙي ديس جا رهواسي آهن، جتي جي نام نهاد قومي ميڊيا جا اڌ درجن چئنل صرف کاڌن پچائڻ وارا آهن، جن تي روزانو خوبصورت ٿانون ۾ هِڪ خوبصورت اينڪر پرسن اڌ چمچو ”اجينو موٽو ۽ پنج ڪلو هرڻ جو گوشت“ جهڙا ڊائلاگ ڳالهائيندي نه ٿڪندا آهن، پر اسان جيڪڏهن پنهنجي اکين تان ڪرپشن، اقربا پروري، نرگيت جي عينڪ هٽائي ڏسون ته اِهو گوشت ڪنهن ٻئي جو نه بلڪه انهن مجبور ۽ محڪوم ماڻهن جو ئي هوندو جيڪي بک، بيماري ۽ بيوسي جي ٽيڪندي جي انگاس تي بنگجي آتم هتيا ڪندا آهن ۽ پوءِ اهي ناجو ۽ ڪيول بڻجي ويندا آهن.
سنڌ جون ٻهراڙيون جهڙي نموني ذاتي رياستن ۾ تبديل ٿي رهيون آهن، اُتي اوهان پنهنجي مرضي سان ڪجهه به ڪونه ٿا ڪري سگهو سواءِ آپگهات ڪرڻ جي. جيڪڏهن اوهان سوال ڪيو ته پوءِ رومي سلطنت جيان اوهان کي گليڊيئٽر جو کيل تماشو ٿيڻ لاءِ تيار رهڻ گهرجي.
اسان جيتريون ترقي جون دعوائون وڌيڪ ڪيون ٿا، اوترو ئي تنزلي جي ڌٻڻ ۾ وڌيڪ ڦاسجندا پيا وڃون. اسان کي هاڻ حڪمرانن جون ڪيل ڳالهيون ائين لڳن ٿيون، جيئن ڪنهن ڊرامي جو ڊراپ سين هجي. حقيقتن کان وانجهيل حڪمران جڏهن پنهنجي قوم جو اصل درد نه ڄاڻي سگهندا آهن، تڏهن هو الزام تراشي تي لهي ايندا آهن. اِهي حڪمران به ته ڪونه آهن، جيڪي ڀلي ڪوڙو اتهاس تحرير ڪرائين پر تڏهن به رات جو چمڙا پوش ٿي ڪري وڃي رعايا جو حال احوال ته وٺن ته ماڻهو بنا بجلي، بنا روڊ رستن، بنا قانون، بنا پاڻي، بنا هوا جي ڪهڙي زندگي گذاري رهيا آهن؟ ٿورو وقت ڪڍي ماڻهن جي حقيقي زندگي ۾ ليئو پائڻ سان من اوهان جي مَن کي جهٻو يا جهير اچي پوي…!!