تازيون خبرون

Daily Archives: June 15, 2015

سنڌ بجيٽ خلاف ايم ڪيو ايم جي سڏ تي اڌ ڏينهن هڙتال کانپوءِ عام زندگي معمول تي اچي وئي

ڪراچي (اسٽاف رپورٽر) سنڌ بجيٽ خلاف ايم ڪيو ايم جي سڏ تي ڪراچي سوڌو سنڌ جي مختلف شهرن ۾ اڌ ڏينهن جي هڙتال ڪئي وئي،ايم ڪيو ايم رابطا ڪاميٽي جي اعلان تحت منجهند جو هڪ وڳي تائين ڪاروبار ۽ ٽرانسپورٽ بند رهڻ کانپوءِ عام زندگي معمول تي اچڻ شروع ٿي وئي، ڪراچي ۾ صبح جو بند ٿيل هوٽل، دڪان ، آچر بازارون ، پيٽرول پمپ ۽ سي اين جي اسٽيشنون کلي ويون،  جڏهن ته رستن تي ٽريفڪ به روان دوان آهي ايم ڪيو ايم رابطا ڪاميٽي طرفان هڪ ڏينهن جي هڙتال واري اعلان کانپوءِ وري اڏ ڏينهن هڙتال جو سڏ ڏيندي منجهند جو هڪ وڳي ڪاروبار ۽ ٽرانسپورٽ کولڻ جي اپيل ڪئي وئي هئي. ان کانسواءِ حيدرآباد جا شهري علائقا به صبح جو بند رهيا،جيڪي منجهند جو هڪ وڳي کانپوءِ کلي ويا، نوابشاهه، ٽنڊوالهيار، ميرپورخاص ۽ ڪجه ٻين شهرن ۾ به جزوي هڙتال کانپوءِ عام زندگي معمول تي اچي وئي.

 

چڪوال ۾ مسافر وين ۽ ڊمپر وچ ۾ ٽڪر،5 ڄڻافوت،12ڄڻا زخمي

چڪوال(م.ڊ) تله گنگ ويجهو مسافر وين ۽ ڊمپر ۾ ٽڪر ٿيڻ سان 5 ڄڻا فوت جڏهن ته 12 ڄڻا زخمي ٿيا آهن. ذريعن مطابق چڪوال کان ميانوالي ويندڙ مسافر وين تله گنگ روڊ تي فوڊ ويلي ويجهو ڊرائيور کان بي قابو ٿي مخالف روڊ کان ايندڙ ڊمپر سان ٽڪرائجي وئي، حادثي جي نتيجي ۾۾ مسافر وين ۾ سوار 5 ڄڻا موقعي تي ئي فوت ٿي ويا جڏهن ته 12 ڄڻا زخمي ٿيا آهن. حادثي کانپوءِ امدادي رضاڪارن لاشن ۽ زخمين کي ڊسٽرڪٽ هيڊ ڪواٽر چڪوال  اسپتال پهچايو جتي زمين کي طبي مدد ڏني پئي وڃي، اسپتال انتظاميا جو چوڻ آهي ته زخمين مان 3 جي حالت نازڪ آهي.

 

بالي ووڊ اهڙي ڪمزور جاءِ آهي، جتي هر جمعي تي تبديلي ايندي آهي: شرڌا ڪپور

ممبئي(شوبز نيوز)بالي ووڊ اداڪارا شرڌا ڪپور چيو آهي ته بالي ووڊ اهڙي ڪمزور جاءِ آهي جتي هر جمعي تي تبديلي ايندي آهي. شرڌا جي فلم اي بي سي ڊي 2 ايندڙ اڱاري يعني 26 جون تي رليز ٿي رهي آهي. هڪ ڀارتي اخبار سان ڳالهائيندي شرڌا ڪپور چيو ته هوءَ پنهنجي شروعاتي فلمن جي ناڪامي بابت سوچي به نه پئي سگهي ۽ سندس ذهن ۾ اها ئي ڳالهه ڊوڙندي هئي ته ساڻس ائين ڇو ٿو ٿئي، پر اهو رڳو ڪجهه دير لاءِ هو، ان کانپوءِ مون پنهجي ڪارڪردگي کي وڌيڪ بهتر ڪيو ۽ مونکي خوشي آهي ته ان دوران مان گهڻو ڪجهه سکيو ۽ منهنجو خراب دور گذري چڪو آهي. هن چيو ته مان هاڻ سمجهان ٿي ته بالي ووڊ ۾ هر ڪنهن لاءِ هيٺ مٿانهين ٿيندي رهندي آهي، اڄ جيڪڏهن ڪو ڪامياب آهي ته ڪو وري ناڪام به آهي ۽ اڄ جيڪو ناڪام آهي اهو سڀاڻي ڪامياب به ٿي سگهي ٿو، سندس چوڻ هو ته مان جڏهن ڪنهن ناڪامي کي منهن ڏيندي آهيان ته پريشان ٿيڻ بدران پاڻ ۾ همٿ پيدا ڪندي آهيان ۽ ٻيهر ڪاميابي لاءِ جاکوڙيندي آهيان. 26 ورهين جي شرڌا ڪپور جو چوڻ هو ته اڄ بالي ووڊ ۾ گهڻيون ئي عورتون ڪم ڪري رهيون آهن ۽ مان سمجهان ٿي ته هي اداڪارائن لاءِ بهترين دور آهي.

 

“ مين ڪب ڪا جا چڪا هون،صدائين مجهي نه دو” مهدي حسن جي وڇوڙيِ کي 3 سال ٿي ويا

ڪراچي(شوبز نيوز): غزل جي شهنشاهه مهدي حسن جي وڇوڙي کي 3 سال ٿي ويا آهن ۽ اڄ سندس ورسي ملهائي پئي وڃي، حڪومت ۽ قوم راڳ جي دنيا ۾ پاڪستان جو نالو روشن ڪندڙ عظيم ڳائڻي مهدي حسن کي وساري ڇڏيو آهي، جنهن جو اندازو ان مان لڳائي سگهجي ٿو ته ڪراچي ۾ سندس قبر جي حالت انتهائي خراب آهي. سنڌ سرڪار ۽ ڪراچي ميٽروپوليٽن سندس يادگار ۽ قبر ٺهرائڻ جو اعلان ڪيوهو، ان سان گڏ ميوزڪ اڪيڊمي ٺاهڻ جو به واعدو ڪيو ويو هو پر اهي اعلان ۽ واعدا اڃا تائين پورا ناهن ٿي سگهيا. مهدي حسن راڳ جي دنيا ۾ پنهنجو منفرد رتبو ٺاهيو، 18 جولاءِ 1927ع تي اک کوليندڙ مهدي حسن 13 جون 2012ع تي غزل کي يتيم ۽ سازن کي سوڳوار ڪري اسان کان وڇڙي ويو هو.

 

دبنگ اسٽار سلمان خان ڪترينه ڪيف سان اشتهار ۾ ڪم ڪرڻ واري آڇ ٿڏي ڇڏي

ممبئي (شوبز نيوز) هڪ وقت به هو جڏهن دبنگ خان ۽ ڪترينا ڪيف جي دوستي ۽ سندن ويجھن لاڳاپن جون خبرون هر زبان تي عام هيون، وري اهڙو واءُ گھليو جو انهن جا هڪ ٻئي سان ويڇا وڌيا، جيڪي ايترو ته وڌي ويا جو ٻئي هڪ ٻئي جي لاءِ اڻڄاڻ بڻجي ويا. ڀارتي ميڊيائي رپورٽرن موجب سلمان خان ۽ ڪترينا ڪيف کي هڪ اشتهار ۾ گڏ ڪم ڪرڻ جي لاءِ 7 ڪروڙ رپين جي آڇ ٿي، جنهن کي دبنگ اسٽار سلمان خان ٿڏي ڇڏيو، جڏهن ته ڪترينا ڪيف ان اشتهار ۾ ڪم ڪري هڪ ڀيرو ٻيهر سلمان خان سان ڪم جي خواهشمند آهي. واضح رهي ته سلمان خان جي فلم ”بجرنگي بائيجان ۽ سلطان“ ۾ پهريان ڪترينا ڪيف جي ئي چونڊ ڪئي وئي آهي.

 

پراڻن ساٿي اداڪارن جي ٻارن سان گڏ ڪم ڪرڻ ۾ مزو اچي رهيو آهي : رشي ڪپور

ممبئي(شوبز نيوز) بالي ووڊ جي سينيئر اداڪار رشي ڪپور چيو آهي ته کيس فلمن ۾ پراڻن اداڪارن جي ٻارن سان ڪم ڪرڻ ۾ مزو اچي رهيو آهي. ڀارتي ميڊيا مطابق ڊائريڪٽر اميش شڪلا جي فلم “ آل از ويل” ۾ اداڪارا سوناڪشي سنها ۽ اڀيشيڪ بچن پهريون ڀيرو گڏ ڪم ڪندي نظر ايندا، جنهن ۾ رشي ڪپور به اداڪاري جا جوهر ڏيکاريندو. رشي ڪپور جو چوڻ آهي ته هن امتاڀ  بچن ۽ شتروگهن سنها سان فلم “ نصيب” ۾ گڏ ڪم ڪيو هو ۽ هاڻ هو سندن ٻارن سان “ آل از ويل” ۾ ڪم ڪري رهيو آهي. سندس چوڻ هو ته کيس پراڻن اسٽارز جي ٻارن سان گڏ ڪم ڪرڻ سٺو لڳي ٿو.

 

پاڪستان ڪرڪيٽ ٽيم سريلنڪا خلاف ٽيسٽ سيريز جي پهرين ميچ کيڏڻ لاءِ گال پهچي وئي

ڪولمبو(اسپورٽس نيوز) پاڪستان ڪرڪيٽ ٽيم ڪولمبو ۾ وارم اپ ميچ ذريعي سرينلڪا جي دوري جي شروعات ڪرڻ کانپوءِ گال پهچي وئي آهي، جتي ٻنهي ملڪن وچ ۾ اربع کان پهرين ٽيسٽ ميچ شروع ٿيندي. پاڪستان ۽ سريلنڪا جي پريزيڊنٽ بورڊ اليون ۾ ٽن ڏينهن واري وارم اپ ميچ بنا ڪنهن نتيجي جي ختم ٿي وئي هئي، گال پهچڻ تي قومي ڪرڪيٽ ٽيم جي ڪپتان مصباح الحق جو چوڻ هو ته هن مختلف قومي ٽيمن سان گڏ سريلنڪا جو دورو ڪيو پر تمام گهٽ ڪاميابيون مليون، هن ڀيري سولائي سان کٽڻ جي ڪوشش ڪنداسين. سريلنڪن ڪپتان اينجلو ميٿيوز چيو ته دنيا جي ڪنهن به ميدان تي گرين ڪيپس کي هارائڻ سولو ناهي. واضح رهي ته پاڪستان ڪرڪيٽ تيم 10 سالن کان سريلنڪا کان ڪابه ٽيسٽ سيريز نه کٽي آهي.

 

 پي سي بي جو “ پاڪستان سپر ليگ” ايندڙ سال يو اي اي ۾ ڪرائڻ جو فيصلو

لاهور(اسپورٽس نيوز): پاڪستان ڪرڪيٽ بورڊ “ پاڪستان سپر ليگ” گڏيل عمارات ۾ ڪرائڻ جو فيصلو ڪيو آهي. پي سي بي گورننگ باڊي جي اجلاس دوران  اهو فيصلو ڪيو  ويو ته ايندڙ سال فيبروري ۾ پاڪستان سپر ليگ گڏيل عرب عمارات ۾ ڪرايو ويندو جڏهن ته ايونٽ ۾ وڏي انگ ۾ پريڏيهي رانديگر شامل هوندا جنهن  جي ڪري ايونٽ گڏيل عرب عمارات ۾ ڪرائڻ جو فيصلو ڪيو ويو آهي جڏهن ته پاڪستان سپر ليگ جا انتظام پاڪستان ڪرڪيت بورڊ ڪندو. پاڪستان سپر ليگ جي رٿا ان کان اڳ ٻه ڀيرا ناڪامي جو شڪار ٿي آهي ۽ اڳوڻي چئرمين پي سي بي ذڪا اشرف کانپوءِ نجم سيٺي جي دور ۾ به ليگ جي حوالي سان ڪا خاص اڳڀرائي نه ٿي سگهي هئي، پر چئرمين  پي سي بي شهريار خان جي ڪوششن کانپوءِ ايونٽ هاڻي يو اي اي ۾ ڪرايو ويندو

 

بنگلاديشي اوپنر تميم اقبال پنهنجي ملڪ جو ڪامياب ترين ٽيسٽ بيٽسمين بڻجي ويو

ڍاڪا (اسپورٽس نيوز) بنگلاديشي اوپنر تميم اقبال پنهنجي ملڪ جو ڪامياب ترين ٽيسٽ بيٽسمين بڻجي ويو آهي، ڍاڪا جي خان صاحب عثمان علي اسٽيڊيم ۾ جاري ميچ ۾ تميم اقبال جڏهن ايشانت شرما جي بال تي 2 رنسون مڪمل ڪيون ته ان سان گڏ ئي هو ڪپتان حبيب البشر جي جڳهه تي بنگلاديش جو ڪامياب ترين ٽيسٽ رانديگر بڻجي ويو. حبيب البشر 2000ع کان 2008ع دوران بنگلاديش طرفان 50 ٽيسٽ ميچن ۾ 87-30 جي سراسريءَ سان 3026 رنسون اسڪور ڪيون هيون، جنهن ۾ 3 سنچريون ۽ 24 ففٽيون به شامل هيون.

 

ڀٽ شاهه ۾ ڪرڪيٽ ٽورنامينٽ حبيب اسپورٽس ڪلب کٽي ورتي

ڀٽ شاهه(اسپورٽس نيوز) ڀٽ شاهه ۾شاهه حيبب اسپورٽس ڪلب طرفان ثقافتي مرڪز اسپورٽس گرائونڊ تي انٽر ڀٽ شاهه چيمپيئن ٽرافي جي نالي سان ڪرڪيٽ ٽورنامينٽ منعقد ڪئي وئي جنهن جو فائنل شاهه حبيب اسپورٽس ڪلب ۽ ڀٽائي اسپورٽس ڪلب جي درميان کيڏيو ويو ، مقرره  10 اوورن ۾ ڀٽائي اسپورٽس پهرين بئٽنگ ڪندي 94 رنسن تي پوري ٽيم آل آئوٽ ٿي وئي ، شاهه حبيب اسپورٽس ڪلب طرفان بئٽسمين ڪامران ، عبدالجبار ، ڊاڪٽر بابر ، نوشاد علي ۽ محمد رحيم کوسو بهترين بئٽنگ ڪندي پنجن رانديگرن جي آئوٽ ٿيڻ تي 9 اوورن ۾ 95 رنسون ٺاهي ڀٽ شاهه چيمپيئن ٽرافي جو فائنل پنهنجي نالي ڪري ورتو ، فائنل تقريب جي مهمان خاص اسسٽنٽ ڪمشنر مٽياري محمد سومار شيدي ۽ اعزازي مهمان ڀٽ شاهه پريس ڪلب جي صدر خورشيد ٻگهيو ڪامياب رانديگرن ۾ ٽرافي ۽ ٻيا انعام تقسيم ڪيا ، ٽورنامينٽ جو بهترين بئٽسمين ڪامران راجپوت ۽ بهترين بالر ظهور احمد پنڃارو  کي قرار ڏنو ويو ٽورنامينٽ جي ڪامياب ٽيم جي ڪپتان جاويد خاصخيلي کي مهمان خاص پاران ٽرافي ڏني وئي.