تازيون خبرون

Daily Archives: June 13, 2015

وزيراعظم ڪراچي ۾ شهيد ٿيندڙن جو مذاق اُڏايو آهي: خواجه اظهار الحسن

ڪراچي (اسٽاف رپورٽر) سنڌ اسيمبلي ۾ مخالف ڌر جي اڳواڻ خواجه اظهار الحسن چيو آهي ته ڪراچي ۾ مارجي ويلن کي مکي سان تشبيهه ڏيڻ وزيراعظم جي شايان شان نه آهي. ٿر ۾ ماڻهو بک ۽ ڪراچي ۾ اُڃ سان مري رهيا آهن. سنڌ حڪومت سان ڌماڌم مست قلندر جي تيار ڪري رهيا آهيون. سنڌ اسيمبلي ۾ پريس ڪانفرنس ڪندي خواجه اظهار الحسن چيو ته جمهوريت جي نالي تي سنڌ جي عوام کي يرغمال بڻايو ويو آهي. هڪ سوال جي جواب ۾ هن چيو ته ڪراچي شهر ۾ مارجي ويلن کي مکي سان تشبيهه ڏيڻ وزيراعظم جي شايان شان ناهي. ايم ڪيو ايم اڳواڻ حڪومت جي بجيٽ پاليسي کي تنقيد نو نشانوبڻائيندي چيو ته سنڌ بجيٽ ۾ سنڌ جي شهري علائقن کي نظر انداز ڪيو. ترقياتي بجيٽ ۾ 32 ارب جي گهٽتائي ڪئي آهي جيڪا سنڌ جي عوام سان زيادتي آهي. خواجه اظهار الحسن بيورو ڪريسي کي تبيهه ڪندي چيو ته جيڪڏهن آفيسر پنهنجو قبلو درست نه ڪيو ته پوءِ کين نيب ۽ عدالتن جي چڪر لڳائڻا پوندا.

 

اتر وزيرستان جي علائقي شوال ۾ سڪيورٽي فورسز سان چڪرين دوران 30 دهشتگرد مارجي ويا

اُتروزيرستان (مانيٽرنگ ڊيسڪ) اتر وزيرستان جي علائقي شوال ۾ سڪيورٽي فورسز سان چڪرين دوران 30 دهشتگرد مارجي ويا، فورسز علائقي ۾ دهشتگردن جو گهيرو تنگ ڪري ڇڏيو آهي ۽ پيش قدمي جاري آهي.  سڪيورٽي فورسز جو دهشتگردن خلاف آپريشن ضرب عضب ڪاميابي سان جاري آهي. فورسز اتر وزيرستان جي علائقي شوال ۾ سرچ آپريشن ڪيو، جنهن دوران دهشتگردن ۽ سڪيورٽي فورسز ۾ چڪريون ٿي پيون. ذريعن موجب، چڪرين جي نتيجي ۾ 30 دهشتگرد مارجي ويا، جن ۾ اهم ڪمانڊر پڻ شامل آهن. سڪيورٽي ذريعن موجب، فورسز جي علائقي ۾ پيش قدمي جاري آهي ۽ دهشتگردن جو گهيرو تنگ ڪيو ويو آهي.

 

فلم ”برادرز“ هالي ووڊ فلم ”واريئر“ جو سيڪوئل آهي:ڪرن جوهر

ممبئي (شوبز نيوز) بالي ووڊ جي فلم ميڪر ڪرن جوهر چيو آهي ته فلم ”برادرز“ هالي ووڊ فلم ”واريئر“ جو سيڪوئل آهي، ميڊيائي نمائندن سان ڳالهائيندي ڪرن جوهر چيو ته اسان ”برادرز“ بابت ڪافي پرجوش آهيون، ان فلم کي مان ۽ ڪرن ملهوترا گڏجي ڊائريڪٽ ڪري رهيا آهيون، پر اهڙي فلم جي هدايتڪاري منهنجي وس جي ڳالهه ناهي، هن چيو ته فلم ۾ مارشل آرٽ جي شاندار پرفارمنس ڏيکاري وئي آهي ۽ مان مارشل آرٽس جي ”الف، بي“ کان به اڻڄاڻ آهيان، مان مڃان ٿو ته ڪرن ملهوترا شاندار ڪارڪردگيءَ جو مظاهرو ڪيو آهي، هن وڌيڪ چيو ته شوقين ان فلم ۾ اڪشي، سڌارٿ، جيڪي ۽  جيڪولين فرنينڊس کي اهڙي انداز ۾ ڏسندا جيڪو هنن پهريان ڪڏهن به نه ڏٺو هوندو.

 

ميڪا سنگھه لائيو ڪنسرٽ دوران هڪ ڊاڪٽر کي مبينا طور چماٽ هڻڻ واري ڪيس ۾ گرفتار

نئين دهلي (شوبز نيوز) هندستان جي مشهور ڳائڻي ميڪا سنگھه کي لائيو ڪنسرٽ دوران هڪ ڊاڪٽر کي مبينا طور چماٽ هڻڻ واري ڪيس ۾ گرفتار ڪيو ويو، ڪجھه ڪلاڪن کان پوءِ ضمانت تي آزاد ڪيو ويو. 38 سالا ڳائڻي خلاف ڊاڪٽر شري ڪانت طرفان هلندڙ سال اپريل ۾ نئين دهليءَ جي اِندر پُوري پوليس اسٽيشن تي ايف آءِ آر داخل ڪرائي وئي هئي، جنهن ۾ تڪليف پهچائڻ ۽ نامناسب رويو رکڻ جو الزام هنيو ويو هو. ڀارتي خابرو اداري ٽائمز آف انڊيا موجب ميگا سنگھه کي ڪالهه نئين دهلي ۾ گرفتار ڪيو ويو ۽ ڪجهه ڪلاڪ جيل ۾ رکي کيس ضمانت تي آزاد ڪيو ويو. ميڊيائي رپورٽن موجب پرفارمنس دوران ميڪا سنگھه مرد ڊاڪٽرن کي اسٽيج جي ساڄي ۽ کاٻي پاسي رهڻ جو چيو، جڏهن ته عورت ڊاڪٽرن کي اسٽيج سامهون واري حصي ۾ رهڻو هو. پر ڄاڻايل ڊاڪٽر عورتن جي حصي ۾ وڃڻ جي ڪوشش ڪئي، جنهن تي ميڪا ڪاوڙ ۾ اچي ڄاڻايل ڊاڪٽر کي اسٽيج گھرائي زوردار چماٽ وهائي گارڊن حوالي ڪري ڇڏيو هو. ميڪا موجب ڊاڪٽر نشي جي حالت ۾ ڪنسرٽ دوران عورتن جي حصي ۾ وڃڻ جي ڪوشش ڪئي جنهن تي هن ڊاڪٽر کي چماٽ هنئي، جڏهن ته ڊاڪٽر شري ڪانت جو موقف هو ته ميڪا سنگھه اسٽيج تي کيس چماٽ هڻي سندس بي عزتي ڪئي آهي.

 

اداڪارا ڪنگنا رناوت جو هڪ نئون انداز سامهون اچي ويو

ممبئي (شوبز نيوز) هڪ ٻئي پٺيان ۽ تازو ئي ”تَنو ويڊز مَنو ريٽرنز ۽ ڪوئين“ جهڙيون ڪامياب فلمون ڏيندڙ اداڪارا ڪنگنا رناوت جو هڪ نئون انداز سامهون اچي ويو آهي، اداڪارا هلندڙ سال ڀارتي ميگزين ”ووگ“ جي فرنٽ پيج جي ڪور ڦوٽو لاءِ ”جاندار“ فوٽو شوٽ ڪرايو، جنهن ڪوئين اداڪارا هڪ آرمي گرل طور ظاهر ٿي آهي. ڪنگنا جي ڪڍرايل تصويرن بابت چيو پيو وڃي ته فيشن کي صحيح طور سڃاڻڻ ۾ ڪنگنا کي ٻين اداڪارائن تي واضح سرسي  حاصل آهي.

 

”پي ڪي“ جي ڪاميابيءَ  جي خوشيءَ ۾ جشن، فلمي ستارن جي شرڪت

ممبئي (شوبز نيوز) ڀارتي باڪس آفيس تي پراڻا سڀ رڪارڊ ٽوڙيندڙ ڀارتي مسٽر پرفيڪشنسٽ عامر خان ۽ انوشڪا شرما جي گذريل سال رليز ٿيل ايڊوينچر ڪاميڊي فلم ”پي ڪي“ جي ڪاميابيءَ  جي خوشيءَ ۾ فلم ٺاهيندڙن پاران هڪ عاليشان پارٽي ڏني وئي ۽ جشن ملهايو ويو. ان پارٽي ۾ بالي ووڊ اسٽارن جي هڪ وڏي انگ شرڪت ڪئي. ان جشن کي ملهائڻ لاءِ اميتاڀ بچن، انيل ڪپور، رنوير سنگهه، دپيڪا پڊڪون، پاڻ انوشڪا شرما ۽ اداڪارائن جي ”عامر خان“ ڪنگنا رناوت به پهتي. جڏهن ته انيل ڪپور به عامر جي سپر هٽ فلم جو جشن ملهائڻ لاءِ پارٽيءَ کي چار چنڊ لڳايا. جشن جي اهم ڳالهه عامر خان جو خاندان سميت اچڻ هو، جنهن ۾سندس ڌي آريا به شامل هئي. ”پي ڪي“ ڀارت سميت سڄي دنيا ۾ 620 ڪروڙن جو رڪارڊ ناڻو ڪمايو آهي، چين ۾ رليز ٿيڻ کان پوءِ ”پي ڪي“ پهرين ڀارتي فلم به آهي جنهن پرڏيهه ۾ سئو ڪروڙ ڪمايا هجن، فقط 100 ڪروڙ چين جي سينما گهرن مان ميڙيا ويا. عامر خان سان گڏ ڪاميابي جو جشن ملهائڻ لاءِ اڳوڻي زال رينا، موجودا زال ڪرن رائو ۽ ڀاڻيج عمران خان به پهتو. سڄي محفل ۾ عامر جي ڌيءَ اريا ڇانيل رهي، جنهن پنهنجي ڏاڏيءَ زينت حسين سان گڏ سيلفي تصوير پڻ ٺهرائي.

 

فيفا انڊر 20 ورلڊ ڪپ جي ڪوارٽر فائنلز 14 جون تي کيڏيا ويندا

ويلنگٽن(اسپورٽس نيوز) نيوزيلينڊ ۾ جاري فيفا انڊر 20 ورلڊ ڪپ جا ڪوارٽر فائنلز (سڀاڻي) آچر ڏينهن کيڏيا ويندا. ميگا ايونٽ جي ڪوارٽر فائنل لائن اپ مڪمل ٿي پئي آهي. برازيل، مالي، ازبڪستان، پرتگال، جرمني، سربيا ۽ سينيگال فائنل ايٽ ۾ شامل ٿي ويا آهن. ميگا ايوٽ جي ڪوارٽر فائنل 14 جون تي کيڏيو ويندو. پهرين ميچ ۾ برازيل جي ٽيم پرتگال سان مقابلو ڪندي، اها ميچ ويڪاٽو اسٽيڊيم هيملٽن ۾ کيڏي ويندي. ٻي ڪوارٽر فائنل ۾ جرمني ۽ مالي جون ٽيمون ڪرائسٽ چرچ اسٽيڊيم ۾ آمهون سامهون ٿينديون. ٽيون ڪوارٽر فائنل سربيا ۽ آمريڪا وچ ۾ نارٿ هاربر اسٽيڊيم آڪلينڊ ۾ کيڏيو ويندو، جڏهن ته چوٿون ۽ آخري ڪوارٽر فائنل ازبڪستان ۽ سينيگال جون ٽيمون ويلنگٽن ريجنل اسٽيڊيم ۾ مقابلو ڪنديون. سيمي فائنل مقابلا 17 جون جڏهن ته فائنل 20 جون تي کيڏيو ويندو.

 

مهيندرا سنگهه ڌوني پنهنجي ڌيءُ زيوا جي تصوري جاري ڪري ڇڏي

نئين دهلي (اسپورٽس نيوز) ڀارتي ون ڊي ٽيم جي ڪپتان مهيندرا سنگهه ڌوني پنهنجي ڌيءُ زيوا جي تصوري جاري ڪري ڇڏي، ڀارتي ويب سائيٽ انڊيا ڊاٽ ڪام موجب ڌونيءَ جي ڌيءُ سان به ٽنڊولڪر ۽ شاهه خان جي ٻارن جهڙِي حالت آهي، حالت ان ڪري جو شاهه رخ  جو پٽ ابراهم خان ۽ ٽنڊولڪر جي ٻارن ارجن ۽ سارا ٽنڊولڪر جي ذاتي زندگي بابت ماڻهن جي وڌندڙ دلچسپيءَ کين پريشان ڪري ڇڏيو آهي. ڀارتي ون ڊي ٽيم جي ڪپتان ڌوني ڪجهه  ڏينهن اندر بنگلاديش خلاف ون ڊي سيريز کيڏڻ لاءِ وڃي رهيو آهي، پر ان کان اڳ هن زال ساڪشي ۽ ڌيءُ زيوا سان وقت گذارڻ پسند ڪيو. هن ٻنهي ماءُ ڌيئن جي تصورير جاري ڪئي، جيڪا وائرس جيان پکڙجي وئي.

 

زيڪو فٽبال جي عالمي تنظيم فيفا جي صدارت لاءِ چونڊ وڙهڻ جي خواهش ڏيکاري ڇڏي

برازيل (اسپورٽس نيوز) برازيل جو مشهور رانديگر زيڪو فٽبال جي عالمي تنظيم فيفا جي صدارت لاءِ چونڊ وڙهڻ جي خواهش ڏيکاري آهي. 62 سالا اڳوڻي برازيلين رانديگر جو پورو ناليو آرٿر ڪوئمبرا آهي. سندس چوڻ هو ته فيفا ۾ ٿيندڙ مبينا گھوٻين کيس اداس ڪري ڇڏيو آهي. واضح رهي ته فيفا جي تازي صدر سيپ بلاٽر گذريل مهيني پنجون ڀيرو تنظيم جو صدر چونڊجڻ کان پوءِ چئن ڏينهن جي اندر پنهنجي عهدي تان استعيفيٰ ڏئي ڇڏي هئي. سيپ بلاٽر جي استعيفيٰ آمريڪي ۽ سوئس عملدارن طرفان فيفا ۾ ٿيندڙ مبينا گھوٻين جي جاچ بعد سامهون آيو هو. ريو ڊي جنيرو ۾ پريس ڪانفرنس ڪندي زيڪو چيو ته اها شيءِ اسان جي راند لاءِ خراب آهي، فٽبال ۾ گھوٻيون ڏسي رهيا آهيون ۽ ڪيترن ئي ماڻهن طرفان ڪيل محنت زيان ٿي وئي. انهن حالتن ۾ مان سمجھان ٿو ته اهو منهنجو فرض آهي ته مان پنهنجي تجربي ۽ علم کي استعمال ڪندي فيفا جي صدار جي چونڊ وڙهان. جيتوڻيڪ زيڪو سڄي دنيا ۾ فٽبال کيڏي چڪو

 

پاڪستان سريلنڪن بورڊ پريزيڊنٽ اليون خلاف ٽوئر ميچ جي پهرين ڏينهن پاڪستاني بيٽنگ لائين جا پول پڌرا ٿي ويا

ڪولمبو (اسپورٽس نيوز) پاڪستان سريلنڪن بورڊ پريزيڊنٽ اليون خلاف ٽوئر ميچ جي پهرين ڏينهن پاڪستاني بيٽنگ لائين جا پول پڌرا ٿي ويا ۽ سموري ٽيم 247 رنسن تي ڍير ٿي وئي. ڪولمبو ۾ سريلنڪن بورڊ پريزيڊنٽ اليون خلاف ٽِن ڏينهن واري ٽوئر ميچ کان پهريان پاڪستاني ڪپتان مصباح الحق ٽاس کٽي پهريان کيڏڻ جو فيصلو ڪيو، جيڪو غلط ثابت ٿيو. دبئيءَ جي وڪيٽن تي رنسن جو ڍڳ لڳائيندڙ محمد حفيظ سريلنڪا پهچندي ئي فارم وڃائي ويٺو ۽ 3 رنسون ٺاهي آئوٽ ٿيو، اظهر علي به گھڻو وقت وڪيٽ تي ڄمي نه سگھيو ۽ 39 اسڪور تي 12 رنسن تي آئوٽ ٿيو. ان موقعي تي احمد شهزاد ۽ يونس خان بيٽنگ لائين کي سنڀاليو ۽ ٽين وڪيٽ لاءِ 113 رنسن جي ڀائيواري جوڙي اسڪور کي 152 تائين پهچايو. پاڪستان کي ٽيون نقصان يونس خان جي صورت ۾ ٿيو، جيڪو 64 رنسن کان پوءِ ملندا سري وردانا جي وڪيٽ بڻيو، جڏهن ته 176 اسڪور تي احمد شهزاد جي اننگ 82 رنسن تي پوري ٿي. احمد شهزاد جي آئوٽ ٿيڻ کان پوءِ ڪو به پاڪستاني بيٽسمين ڪريز تي ڄمي نه سگھيو ۽ سموري ٽيم 247 تي ڍير ٿي وئي. مصباح 15، اسد شفيق 27، سرفراز احمد 12، وهاب رياض 13، ياسر شاهه 9 ۽ جنيد خان 5 رنسون ٺاهي پويلين ڀيڙا ٿيا. پاڪستان جي ٿڌا ويڙهه جيفري وينڊر 5 وڪيٽون وٺي ڪئي. جواب ۾سريلنڪن پريزيڊنٽ اليون جي شروعات به سٺي نه رهي سندسن اوپنر دمٿ ڪرونا رتني ايل بي ڊبليو آئوٽ ٿيو، ان کان پوءِ ڪشال سلوا ۽ اپل ٿرنگا ڏينهن جي پڄاڻيءَ تائين ڪا وڪيٽ ڪرڻ نه ڏني. پهرئين ڏينهن جي پڄاڻي ٿي ته سريلنڪا هڪ وڪيٽ جي نقصان تي 44 رنسون ٺاهيون هيون ۽ کين ٽارگيٽ لاءِ وڌيڪ 203 رنسون گھربل هيون. پاڪستان ۽ سريلنڪا وچ ۾ ٽِن ٽيسٽ ميچن واري سيريز جي شروعات 17 جون کان گال ۾ ٿيندي.