تازيون خبرون

Daily Archives: June 13, 2015

ڪراچي ۾ مک به مري ٿي ته احتجاج ۽ هڙتال ڪئي وڃي ٿي: وزيراعظم

ڪراچي (اسٽاف رپورٽر) وزيراعظم نوازشريف چيو آهي ته ڪراچي مک به مري ٿي ته احتجاج ٿئي ٿو جيڪڏهن احتجاج ۽ هڙتالون بند ٿي وڃن ته ماڻهو خوشحال ۽ ملڪ ترقي ڪرڻ لڳندو. ايوان صنعت ۽ تجارت جي تقريب کي خطاب ڪندي وزيراعظم جو چوڻ هو ته ڪراچي ۾ هڙتالون نه ٿين ته هتي سرمائيڪاري ايندي ۽ شهر ۾ ميٽرو هلڻ لڳندي، تمام جلد ڪراچي حيدرآباد موٽروي تي ڪم شروع ٿيڻ وارو آهي، جڏهن اقتدار ۾ آياسين ته چئلينجز تمام گهڻا هئا پر هاڻي انهن گهٽتائي آئي آهي پر ڪراچي ۽ بلوچستان سميت سڄي ملڪ جي سيڪيورٽي کان غافل ناهيون. هن چيو ته ايندڙ 10 سالن ۾ گوادر پورٽ کي فري پورٽ بڻائينداسين جنهن کانپوءِ ملڪ جي تقدير بدلجي ويندي جڏهن ته 2017ع تائين ملڪ مان بجلي جي کوٽ ختم ڪئي يوندي، بجلي جي لوڊشيڊنگ ختم ڪرڻ نه پر اُن کي سستو ڪرڻ به اسان جو فرض آهي. وزيراعظم چيو ته ٿر ۾ 330 ميگاواٽ بجلي جا 2 منصوبا لڳي رهيا آهن جنهن لاءِ ٿر جو ڪوئلو استعمال ٿيندو جڏهن ته نئين پلانٽ ۽ مشينري تي ڊيوٽي ختم ڪرڻ جي تجويز آئي آهي جنهن تي سوچي سگهجي ٿو ملڪ ۾ سرمائيڪاري آڻڻ لاءِ پرڏيهه مان پلانٽ آندا وڃن ۽ پيداوار ڏيڻ کانپوءِ اُن جي ڊيوٽي ادا ڪئي وڃي ته اُن ۾ ڪوبه حرج ناهي جڏهن ته حڪومت بزنس ڪونسل بڻائيندي جنهن سان گڏ روزاني جي بنياد تي ميٽنگ ٿيندي. ان کان اڳ ۾ وزيراعظم نواز شريف چيو آهي ته ڪراچي ۾ ٽارگيٽڊ آپريشن آخري دهشتگرد جي خاتمي تائين جاري رهندو، صفورا سانحي ۾ ملوث دهشتگردن کي گرفتار ڪيو آهي، اميد آهي ته عدالتون کين جلد سزا ڏينديون، گوادر کي سينٽرل ايشيا سان ملائڻ ۽ فوري پورٽ بڻائڻ لاءِ ڪم جاري آهي، بلوچستان کي ٻين صوبن کان اڳتي وٺي وينداسين. حب ۾ ملڪ جي سڀ کان وڏي تيل ڪارخاني جي توسيع منصوبي جي افتتاح تقريب کي خطاب ڪندي وزيراعظم نواز شريف چيو ته بلوچستان قدرتي وسيلن سان مالامال آهي، تيل پيدا ڪندڙن ملڪ کي وڏي اهميت حاصل آهي. هن چيو ته پاڪستان ۾ تيل جي پيدوار ضرورتن لاءِ ڪافي نه آهي، ملڪ ۾ 22 ملين ٽن تيل استعمال ٿي رهيو آهي پر پيداوار 13 ملين ٽن آهي. وزيراعظم چيو ته اڄ جي دور ۾ تيل جي پيدوار ضرورت بڻجي چڪي آهي، منصوبن تي عمل ڪري ملڪ کي اڳتي وڌائي سگهجي ٿو، تيل ۽گيس ۾ پاڻڀرو ٿيڻ لاءِ ڪجهه وقت لڳندو. نواز شريف چيو ته بلوچستان جي خوشحالي لاءِ منصوبا ٺاهي رهيا آهيون، سندس خواهش آهي ته گوادر کي خوبصورت فري پورٽ بڻايون، جيڪا ملڪي تاريخ ۾ پهرين فري پورٽ هوندي. وزيراعظم نواز شريف چيو ته گوادر کي سينٽرل ايشيا سان ڳنڍيو ويندو ۽ بلوچستان کي ٻين صوبن جي ڀيٽ ۾ اڳتي وٺي وينداسين ۽ هڪ ڏينهن اندر ته بلوچستان پر امن صوبو بڻجي ويندو. هن چيو ته بلوچستان ۾ جاري منصوبن دوران 16 پورهيت شهيد ٿي چڪا آهن پر ان باوجود ايف ڊبليو او جو ڪم جاري آهي ۽ پورهيتن تي حملن ۾ ملوثن کي پڪڙيو آهي، کين ڪيفر ڪردار تائين پهچايو ويندو. ڪراچي جي صورتحال تي ڳالهائيندي وزيراعظم نواز شريف چيو ته ڊسمبر 2013 ۾ٽارگيٽڊ آپريشن شروع ٿيڻ بعد صورتحال ۾ بهتري آئي آهي، آخري دهشتگرد جي خاتمي تائين آپريشن جاري رهندو. وزيراعظم نواز شريف چيو ته صفورا سانحو بزدلاڻو واقعو آهي، معصومن کي قتل ڪندڙن کي پڪڙيو ويو آهي، اميد آهي ته کين جلد سزا ملندي، ڏوهن ۾ ملوث جوابدارن کي سالن، يا مهينن نه پر هفتن اندر سزا ملڻ گهرجي. وزيراعظم نواز شريف دعويٰ ڪئي ته اتر وزيرستان پاڻي پر امن علائقو بڻجي چڪو آهي، آپريشن ضرب عضب کانپوءِ  جو فيصلو سوچي سمجهي ڪيو ويو. ان موقعي تي وزيراعظم نواز شريف هڪ ڀيرو ٻيهر ٽن سالن اندر لوڊشيڊنگ ختم ڪرڻ جو به اعلان ڪيو. وزيراعظم چيو ته ٿر جي ڪوئلي مان به بجلي پيدا ڪئي ويندي، جنهن سان توانائي بحران ختم ڪرڻ ۾ مدد ملندي.

 

اسان سزا ڏني ته سمورا آفيسر نوڪري تان هٿ ڌوئي ويهندا : سنڌ هاءِ ڪورٽ

ڪراچي (اسٽاف رپورٽر) سنڌ هاءِ ڪورٽ آءِ جي سنڌ غلام حيدر جمالي سميت ٻين پوليس فيسرن جي خلاف توهين عدالت ڪيس ۾ ڌرين جا دليل مڪمل ٿيڻ کان پوءِ فيصلو اڻڄايل مدي تائين محفوظ ڪري ورتو آهي جسٽس سجاعلي شاهه چيو ته 23 مئي تي پوليس سنڌ هاءِڪورٽ کي يرغمال بڻايو هو ٻڌايو وڃي ته نقاب پوش اهلڪار ڪنهن مقرر ڪيا هئا عدالت ۾ داخل ٿيڻ کان اڳ انٽري ڪرائي ويندي آهي پر بنا اجازت اسنائپرز مقرر ڪيا ويا جمعي تي جسٽس سجاد علي شاهه ۽ جسٽس جنيد غفار تي ٻڌل ٻه رڪني بئنڪ ذوالفقار مرزا ڪيس جي ٻڌڻي دوران صحافين تي تشدد ۽ توهين عدالت ڪيس جي ٻڌڻي ڪئي ٻڌڻي ۾ عدالت آءِ جي کي وزيراعظم سان گڏ ڊيوٽي وڃڻ جي اجازت ڏني پوليس جي وڪيل فاروق ايڇ نائڪ دليل ڏنا ته 23 مئي تي ٿيل واقعو انصاف فراهم ڪرڻ جي رستي ۾ رنڊڪ نه آهي پوليس عدالتي معاملن ۾ ڪائي رنڊڪ ناهي وڌي واقعو عدالتي حدن کان ٻاهر ٿيو پوليس جيڪو ڪجهه ڪيو اهو عدالتي اڱڻ کان ٻاهر ڪيو جنهن تي جسٽس سجاد علي شاهه ريمارڪس ڏنا ته جيڪڏهن اوهان اهو سڀ ڪجهه ڏسي وٺو ها ته ايئن نه چئو ها سڀني ڏٺو پوليس عدالتي حدن ۾ ڇا ڪجهه ناهي ڪيو هي سڄو چونڪ ۽ روڊ عدالتي حدن جو حصو آهي نقاب پوش پوليس اهلڪار ميڊيا تي تشدد ۽ گاڏين جا شيشا ٽوڙِندا رهيا نقاب پوشن کي ڏسي رينجرز اهلڪار به ٻڏتر جو شڪار هئا ته هي پوليس اهلڪار آهن يا دهشتگرد نقاب پوش اهلڪار جيڪو ڪجهه ڪيو اها دهشتگردي نه آهي جسٽس سجاد علي شاهه چيو ته جيڪڏهن هن ڏينهن هاءِ ڪورٽ پوليس کي گولي هلائڻ جو حڪم ڏي ها ته پوءِ ڇا ٿئي ها اوهان هي پهلو ناهي ڏٺو ته سنڌ هاءِ ڪورٽ جي پنهنجي سيڪيورٽِ آهي جنهن ۾ 100 کان وڌيڪ اهلڪار ۽ هڪ فول ٽائيم ڊي ايس پي شامل آهي فاروق ايڇ نائڪ چيو ته پوليس دهستگردن جي اطلاع تي 23 مئي تي ڪارروائي ڪئي هئي جسٽس سجاد علي شاهه پڇاڻو ڪيو ته ٻڌايو وڃي ته ڪارروائي جو حڪم ڪنهن جاري ڪيو آءِ جي يا گهرو سيڪريٽري فاروق ايڇ نائب عدالت کي ٻڌايو ته هي ڪارروائي صفوران ڳوٺ سانحي جي نموني ۾ ڪئي ويئي جسٽس سجاد علي شاهه پنهنجي ريمارڪس ۾ چيو ته آپريشن لاءِ پهريان رٿابندي ڪئي وڃي ٿي ڪنهن رٿابندي ڪئي فاروق ايڇ نائڪ چيو ته 23 مئي تي پوليس سنڌ هاءِ ڪورٽ جي حدن کان پري هئي جسٽس سجاد علي شاهه پنهنجي ريمارڪس ۾ چيو ته اوهان کي ته سنڌ هاءِ ڪورٽ جي حدن جي ئي خبر نه آهي فاروق ايڇ نائڪ چيو ته معذرت خواهه آهيان هاڻي سنڌ هاءِ ڪورٽ جو حدون ڏسي پيو اچان جسٽس سجاد علي شاهه پڇاڻو ڪيو ته اسان کي ٻڌايو وڃي ته نقاب پوش اهلڪار ڪنهن مقرر ڪيا بنا اجازت اسنائپرز مقرر ڪيا ويا فاروق ايڇ نائڪ چيو ته پوليس ملڪ لاءِ قرباني ڏيئي رهي آهي جسٽس سجاد علي شاهه جواب ۾ چيو ته پوليس جي قربانين کان انڪار نه آهي پر هن ڏينهن توهين عدالت ڪئي ويئي صحافين جي وڪيل بئريسٽر صلاح الدين دليل ۾ چيو ته عدالتي ڪارروائي ۾ رنڊڪ جي حوالي سان فاروق نائڪ جي دليلن سان اتفاق نٿو ڪيان ايڊووڪيٽ جنرل سنڌ عبدالفتاح ملڪ عدالت کي اپيل ڪئي ته پوليس آفيسرن توهين عدالت ڪئي آهي ته کين هلڪي ڦلڪي سزا ڏيئي ڇڏيو سپريم ڪورٽ هڪ ڪيس ۾ پوليس وارن کي عدالتي 100 رپيا ڏنڊ وجهي ڇڏيو جنهن تي جسٽس سجاد علي شآهه چيو ته عدالتون 100، 100 رپيا نه پر 10، 10 رپين جي ڪيسن تي به سزائون ڏينديون آهن اسان سزا ڏني ته سمورا آڦيسر نوڪري تان هٿ ڌوئي ويهندا عدالت ڪيس جي ٻڌڻي مڪمل ڪري ڪيس اڻڄايل مدي تائين ملتوي ڪري ڇڏيو.

 

عمران خان عدالت ۾ ڪيس وڙهي، ميڊيا ٽرائل نه ڪري: پرويز رشيد

اسلام آباد(بيورو) سڌ سماءُ واري وزير پرويز رشيد جو چوڻ آهي ته عام چونڊن ۾ 35 پنڪچر لڳائڻ واري عمران خان خيبرپختونخوا جي چونڊن ۾ پورو ٽيوب ڦاڙي ڇڏيو جڏهن ته ان ۾ ايتري اخلاقي همت به ناهي جو هوسندس خواهش تي جڙندڙ جوڊيشل ڪميشن ۾ الزامن کي ثابت ڪري.اسلام آباد ۾ پريس ڪانفرنس ڪندي پرويز رشيد جو چوڻ هو ته عمران خان ميڊيا ٽرائيل جي ذريعي ماڻهن کي ءٽڪائي رهيو آهي هو پنهنجو ڪيس ميڊيا بدران عدالت ۾ ڇو نه ٿو وڙهي، عمران خان روزانو عوام کي عدالت کان انصاف نه ملڻ واري ڪهاڻي ٻڌائيندو آهي ۽ پاڻ عدالت مان گم هوندو آهي جنهن تي هن تي ڏنڊ به هنيو ويو،سندس چوڻ هو ته  عمران خان جي 35 پنڪچرس واري ڪهاڻي ڪوڙي هئي جيڪا رڳو ميڊيا تي هلائي سگهجي ٿي، عدالت ۾ ثبوت ڏيکارڻا پوندا آهن ۽ عمران خان وٽ ڪوڙ کانسواءِڪجهه به ناهي. پروزير رشيد جو چوڻ هو ته عدالت ۾ 35 پنڪچر جي ڳالهه ثابت ڪرڻ بدران پنهنجي سوچ ٻڌائي رهيو آهي مطکب ته کيس جيڪو خواب نظر ايندو آهي اهو الزام جي صورت ۾ چونڊن تي هڻي ڇڏيندو آهي.وفاقي سڌ سماءُ واري وزير جو چوڻ هو ته جڏهن عوام جو مينڊيٽ چوري ڪيو ويندو آهي ته اهي خاموش ٿي گهر ۾ نه ويهندا آهن ۽ نه ئيهڪ سال ان ڳالهه جو انتظار ڪندا آهن ته ڪڏهن ڊي چوڪ تي ڪنٽينر سجايا ويندا، هو پاڻ ئي روڊن تي نڪري ايندا آهن.

 

اليڪشن ڪميشن اسلام آباد ۾ مڪاني چونڊن جي تفصيل جاري ڪري ڇڏي

اسلام آباد (بيورو) اليڪشن ڪميشن اسلام آباد ۾ مڪاني چونڊن جي تفصيل جاري ڪري ڇڏي، تڪ بندين جو نوٽيفڪيشن 5 1  جون تي جاري ٿيندو، اسلام آباد ۾ غير پارٽي بنيادن تي چونڊون ڪرايون وينديون، مڪاني چونڊن لاءِ 9 7  يونين ڪائونسلز بنايون ويون آهن، هر يونين ڪائونسل 3 1  ميمبرن تي ٻڌل هوندي، هر يونين ڪائونسل ۾ چيئرمين ۽ هڪ وائيس چيئرمين جي چونڊ ڪئي ويندي. جمعي ڏينهن اليڪشن ڪميشن اسلام آباد ۾ مڪاني چونڊن جي تفصيل جاري ڪري ڇڏي. اليڪشن ڪميشن ذريعن موجب اسلام آباد ۾ تڪ بندين جو نوٽيفڪيشن 5 1  جون تي جاري ٿيندو، اسلام آباد ۾ غير پارٽي بنيادن تي چونڊون ڪرايون وينديون، اسلام آباد ۾ هڪ ميٽرو پوليٽن ڪارپوريشن ۽ مڪاني چونڊن لاءِ 9 7  يونين ڪائونسلز بنايون ويون آهن، اسلام آباد ۾ ڪل رجسٽرڊ ووٽن جو انگ 6  لک 0 2  هزار 5 6 1  آهي، مرد ووٽرز جو انگ 3  لک 4 3  هزار 7 7 5  آهي، جڏهن ته عورت ووٽرز جو انگ 2  لک 5 8  هزار 8 8 5  آهي. اليڪشن ڪميشن مطابق هر يونين ڪائونسل 3 1  ميمبرن تي ٻڌل هوندي، هر يونين ڪائونسل ۾ چيئرمين ۽ هڪ وائيس چيئرمين چونڊيو ويندو، هر يونين ڪائونسل ۾ ڪائونسلرز جون 6  جنرل سيٽون مخصوص هونديون، عورتن جون 2 ، نوجوان، مزدور ۽ اقليتن لاءِ هڪ هڪ سيٽ هوندي.

 

موت جي سزائن جو سلسلو جاري رهندو: چوڌري نثار

اسلام آباد (بيورو) وفاقي گهرو وزير چوڌري نثارعلي خان اين جي او کي واضح پيغام ڏنو آهي ته اين جي اوز کي پاڪستان جي قانون ۽ آئين مطابق ڪم ڪرڻوپوندو اين جي اوز کي دائري ۾ آڻڻ لاءِ ڪنهن قسم جو دٻاءُ برداشت نه ڪيو ويندو مقامي اين جي اوز ڪجهه ٽڪيٽن لاءِ پاڪستان جي عزت نفس نه وڪرو ڪري پاڪستان جي مفادن تي ڪائي سوديبازي نه ڪئي ويندي دهشتگردن کي ڦاهيون پاڪستاني قانون ۽ آئين مطابق ڏنيون پيون وڃن ڪنهن کي طوفان برپا ڪرڻ جي ضرورت نه آهي. ڪيترن ئي اين جي اوز جا ڪم ٻڌايون ته ماڻهو توبه توبه ڪندا معاملو پارليامينٽ ۾ اٿارڻ جو سوچي رهيو آهيان مثبت ڪردار ادا ڪندڙ اين جي اوز سان تعاون ڪيو ويندو پاليسي هلندڙ جون ۾ اچي ويندي جمعي تي هتي ميڊيا سان ڳالهائيندي چوڌري نثارعلي خان چيو ته ڪيترائي اين جي اوز پنهنجي ايجنڊا سان پاڪستان جي مختلف علائقن ۾ ڪم ڪري رهيا آهن ۽ انهن جو ايجنڊا پاڪستان مخالف آهي اسان فيصلو ڪيو آهي ته مسئلي کي منتقي انجام تائين پهچايو ويندو هن چيو ته مان واضح طور تي پرڏيهي اين جي اوز ۽ عالمي ملڪن کي پيغام ڏيڻ چاهيان ٿو ته اين جي اوز کي پاڪستان جي قانون مطابق ڪم ڪرڻو پوندو ۽ اين جي اوز کي دائري ۾ آڻڻ لاءِ ڪنهن قسم جو ڪو دٻاءُ برداشت نه ڪيو ويندو هن چيو ته اين جي اوز کي پاڪستان جا مفاد ضابطا ۽ قانون جو احترام ڪرڻو پوندو اهو نٿو ٿي سگهي ته اين جي اوز رجسٽرڊ ڪنهن ٻئي ڪم لاءِ هجي ۽ هو ڪم ڪوئي ٻيو ڪري هن چيو ته مان سوچي رهيو آهيان ته هي سمورو معاملو پارليامينٽ ۾ا اٿاريا هن چيو ته ڪافي اين جي اوز اهڙيون به آهن جيڪي بهتر ڪم ڪري رهيون آهن اسان انهن جي حمايت ڪنداسين ۽ پر بهتر ڪم ڪندڙ اين جي اوز جي ڇٽي هيٺان ڪوئي ٻيو ڪم ڪرڻ نه ڏنو ويندو ۽ هن مسئلي تي ڪوئي طوفان نه برپا ٿيڻ گهرجي هن چيو ته دنيا جي ملڪن جا پنهنجا پنهنجا قانون هوندا آهن مان انهن کان سوال ڪيان ٿو ته ڇا هو پنهنجي قانون خلاف ڪنهن کي ڪم ڪرڻ جي اجازت ڏيئي سگهن ٿا ڇا اهي پنهنجي ضابطي جي خلاف ڪنهن کي قبول ڪندا هن ٻڌايو ته هڪ اين جي اوز آفريڪا ۾ رجسٽرڊ آهي ۽ پاڪستان ۾ بنا اجازت سان ڪم ڪري رهي آهي بلوچستان ۽ گلگت تي غلط رپورٽون اماڻيو پيون وڃن ڪوڙ تي ٻڌل رپورٽون جاري ٿي رهيون آهن ۽ هاڻي ايئن نه ٿيندو گهرو وزير چيو ته دنيا جا ملڪ اسان جي پارليامينٽ جي ميمبرن کي ويزا ڏيڻ کان انڪار ڪن ٿا ته اوهان پارليامينٽ ۾ فلاڻي تقرير ڪئي اهو اوهان جو اختيار آهي ڇا اسان کيڪوئي اختيار نه آهي گهرو وزير چيو ته ڪيترائي اين جي اوز رجسٽرڊ به نه آهن ۽ 10-10 ۽ 12-12 سالن کان ڪم ڪري رهيونآهن اها به خبر نه آهي ته هو پاڪستان جي ڪهڙي ڪنڊ ۾ ڪم ڪري رهيون آهن هن چيو ته شفقت حسين ڪيس ذريعي اسان جي جڊيشل سسٽم تي تنقيد ڪئي ويئي سپريم ڪورٽ تائين فيصلو شفقت حسين جي خلاف آيو انڪوائري کان پوءِ اها ڳالهه واضح آهي ته شفقت حسين جي عمر 23 سال هئي هن چيو ته هر سال ڏوهاري ماڻهن کي گهٽ عمر قرار ڏيڻ جي ڪوشش ڪئي وڃي ٿي گهرو وزير چيو ته مقامي اين جي اوز کي فنڊنگ ٻاهران ٿئي ٿي پر بيروني ايجنڊا پاڪستان تي مڙهڻ جي اجازت نه ڏني ويندي ۽ بهتر ڪم ڪندڙ اين جي اوز خوف ۽ خبرو محسوس نه ڪن جڏهن ته پاڪستان جي خلاف ڪم ڪندڙ اين جي اوز کي خوف ۽ خطرو محسوس ٿيڻ گهرجي.

 

سينيٽ ۾ حميد گل جي بيان خلاف سينيٽرز پاران آرٽيڪل 6 تحت ڪيس هلائڻ جو مطالبو

اسلام آباد (بيورو) چيئرمين سينيٽ ميان رضا رباني چيو آهي ته اظهار راءِ جي آزادي جو مطلب اهو نه آهي ته ڪنهن به لائسنس ڏيئي ڇڏجي گذريل ڏينهن کان اڳ تائين آئين پارليمان ۽ جمهوري نظام کي ٽارگيٽ بڻايو پيو وڃي پارليمان هن معاملي کي سنجيده نه پئي وٺي هن شخص جو بيان جمهوري عمل کي هڪ دفعو ٻيهر ڊي ريل ڪرڻ جي دعوت آهي هي سراسر آئين جي خلاف ورزي آهي جڏهن ته سينيٽ ميمبرن جنرل رٽائرڊ حميد گل جي بيان تي ان جي خلاف آرٽيڪل 6 تحت ڪيس هلائڻ جو مطالبو ڪيو آهي ۽ ڪجهه ميمبرن موقف اختيار ڪيو تها ن جي بيان کي ايتري اهميت نه ڏني وڃي جمعي تي سينيٽ جي اجلاس ۾ سينيٽر عثمان الله ڪاڪڙ چيو ته جنرل رٽائرڊ حميد گل جو انٽرويو شايع ٿيو آهي جنهن ۾ هن چيو ته آئين کي منسوخ ڪري فوج اقتدار سنڀالي قرارداد مقاصد جي هوندي سياسي جماعتن جي ضرورت نه آهي سينيٽر عثمان الله ڪاڪڙ چيو ته جنرل حميد گل جو ماضي هن ملڪ جي سب جرنيل ۽ عوام کي معلوم آهي حميد گل دهشتگردي جي حوالي سان سب کان وڌيڪ ذميوار آهي بنيادي طور تي هو دهشتگردن جو سرپرست آهي افسوس آهي جو هڪ پاسي ضرب عضب ٿي رهيو آهي ٻئي پاسي نيشنل ايڪشن پلان موجود آهي ان جي باوجود ان کي نه ئي ڪنهن عدالت طلب ڪيو ۽ نه ئي ان جو بيان آئين ۽ قانون جي لتاڙ جي زمري ۾ آيو هن چيو ته پارليمينٽ گڏيل طور تي مطالبو ڪري ته حميد گل جي خلاف آرٽيڪل 6 جي تحت ڪيس داخل ڪيو وڃي ميڊيا به ان کي پرموٽ ڪري رهيو آهي خاص حالتن ۾ ان شخص کي آڏو آندو وڃي ٿو ان موقعي تي چيئرمين سينيٽ ميان رضا رباني چيو ته هن شخص کي قرارداد ذريعي اهميت نه ڏيڻ گهرجي ايوان ان ڳالهه جو خود نوٽيس ضرور وٺي آئين تحت راءِ جي اظهار جو مطلب اهو نه آهي ته ڪنهن کي لائسنس ملي وڃي هن چيو ته گذريل ڏينهن کان اڄ تائين آئين پارليمينٽ جمهوري نظام کي ٽارگيٽ بڻايو پيو وڃي پارليمان ان معاملي کي سنجيده نه پئي وٺي ان شخص جو بيان آئين جي خلاف ورزي آهي جمهوري عمل کي هڪ دفعو ٻيهر ڊي ريل ڪرڻ جي دعوت آهي جنهن لاءِ هو بيان ڏنو اهو جمهوريت کي ڊي ريل نه ڪنداسين هو پنهنجون ذميواريون سمجهن ٿا ان تي ڳالهه ٻولهه نه ٿيڻ گهرجي ان موقعي تي سينيٽر فرحت الله بابر چيو ته هن شخص جو نالو نه وٺڻ گهرجي گذريل 10 سالن ۾ هي ڪوئي موقعو نٿو ڇڏي جو ان کي ڪيئن شهرت ملي جنهن غلازت ڪئي ان جي مشوري ٿي ايوان ان کي اهميت نه ڏي ۽ نه ئي ان تي ڳالهايو وڃي سينيٽر سعيد غني چيو ته ان شخص جي هڪ تاريخ آهي هميشه ڪوشش ڪئي آهي ته ملڪ ۾ جمهوري وڌي ويجهي جڏهن به ملڪ ۾ جمهوري آئي آهي اهڙو شخص آڏو اچي وڃي ٿو هاڻي هو عمر جي ان حصي ۾ آهي جو ان کي اهميت نه ڏني وڃي جڏهن ته اهڙِ قسم جي بيان تي حڪومت ان جي خلاف ڪارروائي ڪئي.

 

حميد گل پاران آئين کي منسوخ، فوج کي اقتدار سنڀالڻ جو مشور ڏيڻ جو بيان مذمت جوڳو آهي: خورشيد شاهه

اسلام آباد (بيورو) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته ليفٽيننٽ جنرل رٽائرڊ حميد گل جو بيان ته ملڪي آئين منسوخ به ڪيو وڃي ته ڪجهه نه بگڙجندو، مذمت جوڳو بيان آهي، ان جي صلاح ته فوج کي ڪجهه وقت لاءِ اقتدار سنڀالڻ گهرجي نه ته ملڪ ۾ سول وار ٿيندي، ان بيان جي مذمت ڪئي آهي، جمعي تي صحافين سان ڳالهائيندي هن چيو ته جنرل گل هي بيان سوچي سمجهي ڏنو آهي ته ان جو بيان ملڪ خلاف هڪ وڏي سازش آهي ۽ هي سازش هن ملڪ کيٻيهر طالبان جي حوالي ڪرڻ ان کي گروي رکڻ ۽ ٻيهر ٻاهرين ملڪن جي مفاد لاءِ کيڏڻ جي سالمتي ۽ پوري نظام کي ختم ڪرڻ جي دعوت ڏيڻ آهي، هن چيو ته ملڪ تي اٽڪل 40 سالن تائين فوج حڪومت ڪئي، باقي عرصو ذوالفقار علي ڀٽو کانسواءِ جي دور ڪنٽولڊ رهي، حميد گل ٻڌائي ته آمرن جي اقتدار ملڪ جي ڪهڙي خدمت ڪئي آهي، هن چيو ته آئين هن ملڪ ۽ ان جي سالميت ۽ اتحاد جي نشاني آهي ۽ ان کي ٽوڙيندڙ هن ملڪ کي ٽوڙڻ چاهين ٿا.

 

جرمن وفد جي پ پ چيئرمين ۽ ڪو چيئرمين سان ملاقات، سنڌ ۾ سيڙپڪاري بابت ڳالهيون

ڪراچي (اسٽاف رپورٽر) جرمني جي اسٽيٽ سيڪريٽري اسٽيفن اسٽينلن  جي سربراهي ۾  جرمن سيڙپڪارن جي هڪ وفد ڪالهه جمعي جي ڏينهن بلاول هائوس ۾ پاڪستان پپلزپارٽي جي  چيئرمين بلاول ڀٽو زرداري ۽ شريڪ چيئرمين آصف علي زرداري سان ملاقات ڪئي، ملاقات ۾ سنڌ صوبي ۾ سيڙپڪاري جي حوالي سان خيالن جي ڏي وٺ ڪئي وئي، ان موقعي تي  بختاور ڀٽو زرداري، جرمن سفير ڊاڪٽر سيرل نن، چونڊيل سينيٽرشيري رحمان به موجود هئا .

 

سنڌ حڪومت سان 230 ارب رپين واري غير قانوني اڳاڙي تي ڳالهه ٻولهه ٿي آهي ڊي جي رينجرز جي رپورٽ مبهم آهي: اعتزازاحسن

اسلام آباد (بيورو) پيپلزپارٽي جي مرڪزي اڳواڻ ۽ سينيٽ ۾ مخالف ڌر اڳواڻ سينيٽر اعتزازاحسن چيو ته سنڌ حڪومت سان 230 ارب رپين واري غير قانوني اڳاڙي بابت ڳالهه ٻولهه ٿي آهي ڊي جي رينجرز جي رپورٽ مبهم آهي 230 ارب جا حتمي انگ اکر ڪهڙي طرح ڪڍيا ويا آهن جاچ ٿيڻ گهرجي پارليمينٽ هائوس جي ٻاهران ميڊيا سان ڳالهائيندي اعتزازاحسن چيو ته ڪراچي ۾ ڀتاخوري ايراني تيل جي اسمگلنگ سميت ٻيا ڏوهه مشرف دور کان شروع ٿيا جڏهن ته چيو ويو ته سنڌ ۾ 230 ارب رپين جي ڪرپشن ٿي جڏهن ته مخصوص عدد ڪهڙي طرح ڪڍيو ويو ان جي جاچ ٿيڻ گهرجي ۽ اپيڪس ڪميٽي جي اجلاس جي هڪ هفتي کان پوءِ انڪشاف ڪرڻ جو ڇا مقصد آهي هن چيو ته ايراني تيل سنڌ ۾ ڪيئن اچي ٿو ۽ ڇا ايران بلوچستان سرحد تي سنڌ انتظاميه آهي ايراني تيل چائنا ڪٽنگ هي سڀ معاملا اڄ جا نه آهن انهن انگن اکرن جا ٺوس ثبوت فراهم ڪيا وڃن ۽ اهو به ٻڌايو وڃي ته ايڏي وڏي ڪرپشن ڪڏهن کان ٿي رهي آهي سينيٽر اعتزازاحسن چيو ته سنڌ ۾ ڪرپشن بابت صوبائي حڪومت سان ڳالهه ٻولهه ٿي آهي ڪراچي ۾ بدامني پکيڙيندڙ ڪيترن ئي سالن کان ڪارروايون ڪري رهيا آهن يا هي هڪ ٻن سالن جي ڪارروائي آهي جيڪي به الزام آهن اهي سنڌ حڪومت سان شيئر ڪرڻ گهرجن هن چيو ته هن نوعيت جا الزام سياسي ماحول کي خراب ڪندا. خاص طور تي اهڙي وقت ۾ جڏهن سب ڀارت جي خلاف هڪڙائي جو مطاهرو ڪري رهيا آهيون.

 

ڊي جي رينجرز جو بيان سنڌ حڪومت جي خلاف چارج شيٽ نه آهي: نثار کهڙو

ڪراچي(اسٽاف رپورٽر) سنڌ جي سينيئر وزير نثار احمد کهڙو چيو آهي ته ڊي جي رينجرز جو بيان سنڌ حڪومت جي خلاف چارج شيٽ نه آهي، رينجرز جي بيان ۾ جن مسئلن طرف اشارو ڪيو ويو آهي اهي اڄ يا ڪلهه جا نه پر سالن جا پراڻا آهن ۽ انهن مسئلن تي رپورٽ پيش ڪرڻ جو بهتر فورم اپيڪس ڪميٽي ئي آهي، ڀتو مافيا، لينڊ مافيا ۽ ٽارگيٽ ڪلنگ جا واقعا اڄ جي پيداوار نه پر آمراڻي حڪومتن جا تحفا آهن ۽ سنڌ حڪومت سڀني سياسي جماعتن جي اتفاق سان رينجرز ۽ پوليس جي مدد سان امن جي بحاليءَ لاءِ انهن عنصرن جي خلاف ڪاروائي ڪري رهي آهي ۽ ان آپريشن جا بهتر نتيجا اچي رهيا آهن. اهڙن خيالن جو اظهار هن جمعي ڏينهن پنهنجي آفيس ۾ پريس ڪانفرنس ڪندي ڪيو. نثار احمد کهڙو چيو ته سنڌ ۾ بد امني ڦهلائڻ لاءِ سالن کان منظم منصوبا بندي ڪئي وئي ۽ غير ملڪي هٿيار ڦهلايا ويا ۽ آمراڻين حڪومتن انهن هٿيارن جي ضبط ڪرڻ ۽ غير قانوني پرڏيهين جي روڪٿام لاءِ ڪا به مهم نه هلائي پر سنڌ حڪومت طرفان امن جي بحاليءَ لاءِ ورتل ڪوششن سان عدم تحفظ جي احساس جو خاتمو آيو آهي. هڪ سوال جي جواب ۾ هن چيو ته نيب هڪ آزاد ادارو آهي ۽ حڪومت شفاف احتساب جي خلاف نه آهي. هڪ سوال جي جواب ۾ هن چيو ته سنڌ حڪومت مڪاني چونڊون ڪرائڻ لاءِ تيار آهي پر جيڪڏهن اليڪشن ڪميشن پاران تياريون مڪمل نه آهن ته پوءِ عدالت کي 20 سيپٽيمبر واري تاريخ ۾ واڌ لاءِ نظر ثاني جي اپيل ڪري سگهجي ٿي ۽ مڪاني چونڊون مرحليوار يا  هڪ ئي ڏينهن تي ٿيڻ يا نه ٿيڻ بابت ڪو فيصلو  اليڪشن شيڊول اچڻ تي ڪيو ويندو. هڪ سوال جي جواب ۾ نثار کهڙو چيو ته سنڌ جي گورنر کي وفاقي حڪومت پاران هٽائڻ لاءِ ڪو باضابطا اعلان نه ڪيو ويو آهي پر جيڪڏهن سنڌ جو گورنر پاڻ استعيفي ڏي ٿو ته سندس استعيفي کي قبول ڪرڻ يا نه ڪرڻ جو اختيار پڻ وفاق کي حاصل آهي. هن چيو ته سنڌ حڪومت جي خلاف ماضيءَ ۾ به سازشون ٿينديون رهيون آهن ۽ جڏهن سنڌ ۾ عدم استحڪام ٿيندو آهي ته ان جا اثر پڻ وفاق تي پوندا آهن ماضيءَ ۾ جڏهن 1998ع ۾ سنڌ جي خلاف سازش ڪري اسيمبليءَ کي معطل ڪري صوبائي حڪمت کي ختم ڪيو ويو ته سڀني ڏٺو ته فاقي حڪومت به باقي نه رهي سگهي. هن چيو ته وفاق تيل گئس ۽ بجلي جي معاملي تي سنڌ سان  زيادتي ڪري رهيو آهي ۽ سنڌ اهڙين زيادتين جي خلاف خاموش نه ويهندي ۽ زيادتين جي خلاف ڀرپور آواز اٿاريو ويندو. هن چيو ته 18هين ترميم تحت تيل گئس جي مد ۾ صوبي کي 50 سيڪڙو حصو ڏنو وڃي ۽ سنڌ ۾ 18 ڪلاڪن کان وڌيڪ ٿيندڙ لوڊشيڊنگ کي برداشت نه ڪيو ويندو ان ڪري سنڌ کان صبر جو امتحان نه ورتو وڃي. هن چيو ته عابد شير علي ڪڏهن سنڌ جي عوام کي بجلي چور ته ڪڏهن سنڌ جي عوام لاءِ گٿا لفظ ڳالهائي رهيو آهي ۽ ن ليگ 6 مهينن ۾ لوڊشيڊنگ ختم ڪرڻ جو عوام سان واعدو ڪيو هو پر 2 سالن کان وڏيڪ عرصو گذرڻ باوجود لوڊشيڊنگ جو خاتمو نه اچي سگهيو آهي ۽ لوڊشيڊنگ جي معاملي تي ن ليگ جي خاموشي عوام سان ڌوڪو آهي. هن چيو ته سنڌ اسيمبليءَ ۾ مخالف ڌر جي اڳواڻ کي سوچي سمجهي اردو ڳالهائڻ گهرجي. هن چيو ته سنڌ اسيمبليءَ ۾ اڄ سنڌ جي بجيٽ پيش ڪئي ويندي جنهن ۾ امن امان صحت تعليم تي خاص ڌيان ڏنو ويو آهي.