تازيون خبرون

Daily Archives: June 11, 2015

ڪراچي آپريشن باوجود پوليس جي ٽارگيٽ ڪلنگ، امن ڪير بحال ڪندو؟

 

ڪراچي ۾ بلديا ٽائون سانحي بابت جاچ ۾ شامل ڊي ايس پي مجيد عباسي هٿياربندن هٿان قتل ٿي ويو. ملير جي علائقي شاهه لطيف ٽائون ٿاڻي جي حد ظفر ٽائون ۾ ڪالهه صبح جو ٻن موٽر سائيڪلن تي سوار چار هٿياربند ڊي ايس پي سائيٽ مجيد عباسي کي ٽارگيٽ بڻائي گوليون هڻي قتل ڪرڻ بعد فرار ٿي ويا، واقعي جي اطلاع تي پوليس ۽ رينجرز پهچي ڪري علائقي کي گهيري ۾ آڻي ورتو ۽ واقعي واري هنڌ کي سيل ڪري ڇڏيو، جڏهن ته ايڊيشنل آءِ جي ڪراچي غلام قادر ٿيٻو، ڊي آءِ جي ايسٽ منير شيخ، ڊي آءِ جي ويسٽ فيروز شاهه، ايس ايس پي ملير ڊاڪٽر نجيب سميت ٻيا پوليس آفيسر واقعي واري هنڌ پهچي ڊي ايس پي جي قتل بابت ڄاڻ ورتي ايس ايس پي ملير ڊاڪٽر نجيب صحافين سان ڳالهائيندي چيو ته شهيد ڊي ايس پي مجيد عباسي اولهه ضلعي جي سائيٽ واري علائقي ۾ ايس ڊي اپي او مقرر هو ڪالهه صبح جو هو پوليس موبائيل ۾ اڪيلو سوار ٿي آفيس وڃي رهيو هو ته ٻن موٽر سائيڪل سوار چئن هٿياربندن رستي ۾ وجهه وٺي مٿس فائرنگ ڪري ڏني، جنهن جي نتيجي ۾ ڊي ايس پي مارجي ويو. پوسٽ مارٽم رپورٽ موجب ڊي ايس پي کي سيني ۽ مٿي ۾ 5 کان وڌيڪ گوليون لڳيون آهن. هن چيو ته ڊي ايس پي مجيد عباسي سان گڏ سندس گارڊ ۽ ڊرائيور نه هو هو اڪيلو موبائيل هلائي ڪري آفيس وڃي رهيو هو. هن چيو ته ڊي ايس پي مجيد عباسي هڪ بهادر ۽ ايماندار آفيسر هو، مقتول ڊي ايس پي مجيد عباسي اصل ۾ ايبٽ آباد جو رهواسي هو جيڪو گذريل ڪيترن ئي سالن کان ملير جي علائقي ظفر ٽائون ۾ رهائش پذير هو.هوڏانهن سنڌ جي وڏي وزير سيد قائم علي شاهه ڊي ايس پي جي قتل جو نوٽيس وٺندي چيو آهي ته قاتل گرفتار ڪيا وڃن. هوڏانهن پ پ چيئرمين بلاول ۽ شريڪ چيئرمين آصف زرداري به واقعي جي مذمت ڪئي آهي.

ضرورت ان ڳالهه جي آهي ته جتي عام ماڻهو جي زندگي محفوظ ناهي اتي اگر محافظ به محفوظ نه هجن ته ڪراچي جو امن ڪيئن بحال ٿيندو انڪري حڪومت کي گهرجي ته ڏوهارين خلاف وڏي آپريشن جو سلسلو شروع ڪيو وڃي جيڪو سخت هئڻ گهرجي ۽ ڪنهن به ڏوهاري کي بخش ڪرڻ بنا گرفتار ڪري قانوني ڪٽهڙي ۾ آڻي انهن کي عبرتناڪ سزائون ڏئي ته جيئن ڪراچي شهر جو امن مڪمل طور بحال ٿي سگهي ۽ عوام سک ۽ سڪون جو ساهه کڻي سگهجي.

 

شڪستن مان ئي سکي وٺو!؛عاجز جمالي

سنڌ جي نئين مالي سال جي بجيٽ اچڻ واري آهي، اسان جو اڄ جو موضوع بجيٽ ناهي، پر ايندڙ بجيٽ ۾ وفاق کان رقمون نه ملڻ جو وڏو ماتم شامل هوندو، پر اسان جو موضوع پيپلز پارٽي جي شڪستن سان واسطو رکي ٿو، جن مان اهو اندازو ٿي رهيو آهي ته ’چارون صوبون ڪي زنجير‘ هاڻي ڪڙي ڪڙي ٿي وئي آهي. ڇو ته بينظير جو نه رهي ته اها زنجير به نه رهي، جنهن جو هڪ عظيم مثال 18 آڪٽوبر 2007ع تي ڪارساز وٽ ٿيل بم ڌماڪو آهي، جنهن ۾ پاڪستان ۾ رهندڙ هر قوم، هر مذهب، هر فرقي، هر نسل جا ماڻهو شهيد ٿيا هئا. لڳي ائين ٿو ته 27 ڊسمبر 2007ع تي ’چارون صوبون ڪي زنجير‘ ٽٽڻ شروع ٿي هئي. گذريل ستن سالن جي سرڪار ۾ ان زنجير جو هڪ حصو اسان جي هٿن ۾ آهي، جيڪو سنڌ آهي.

ملڪ ۾ سڀ کان پهرين ڪينٽومينٽ جون چونڊون ٿيون، پيپلز پارٽي جو آخري نمبر. ملڪ ۾ مختلف علائقن ۾ ٿيل ضمني چونڊن ۾ پيپلز پارٽي جو نالو نشان ڪونهي، ان کانپوءِ تازو خيبرپختونخواهه ۾ مڪاني ادارن جون چونڊون ٿيون، جن ۾ عوامي نيشنل پارٽي زبردست مقابلو ڪندي پي ٽي آءِ جي سامهون پنهنجي پوزيشن ڪافي بهتر ڪئي، اي اين پي به 2013ع جي عام چونڊن ۾ هارائي وئي هئي پيپلز پارٽيءَ وانگر، پر ان پاڻ کي ٻن سالن ۾ بهتر ثابت ڪيو، پر اتي به پيپلز پارٽي پَٽ تي رهجي وئي.

گذريل ڏينهن گلگت بلتستان جي صوبائي سرڪار لاءِ چونڊون ٿيون، جن ۾ مسلم ليگ (ن) سڀ کان وڏي پارٽيءَ جي صورت ۾ اڀري آئي آهي. پيپلز پارٽي صرف هڪ اڌ سيٽ کڻي سگهي آهي. گلگت بلتستان ۾ پيپلز پارٽي جي سرڪار هئي، سندس وڏو وزير به هارائي ويو. گلگت بلتستان جي آزاد حيثيت ڏيندڙ پيپلز پارٽي اڄ ان ۾ پنهنجي صوبائي ساک وڃائي ويٺي آهي.

سچ اهو آهي ته پيپلز پارٽي لاءِ 2013ع جي عام چونڊن کان شڪستن جو هڪ سلسلو شروع ٿيو، جيڪو اڃا تائين جاري آهي. پر مئي 2013ع کان وٺي جُون 2015ع تائين به پيپلز پارٽي پنهنجي شڪستن منجهان سبق حاصل نه ڪري سگهي آهي. چئن صوبن جي زنجير جا دعويدار صرف سنڌ تائين رهجي ويا آهن ۽ سنڌ ۾ مڪاني چونڊن جي تيارين ۾ آهن.

پنج سال وفاقي سرڪار جي ڇٽي ۾ هلندڙ سنڌ جي سرڪار گذريل ٻن سالن کان وفاق جي مخالف پارٽي جي صورت ۾ سنڌ ۾ حڪمراني ڪري رهي آهي. سنڌ جي سرڪار سڄي پاڪستان جي پيپلز پارٽي لاءِ اهو مسافر خانو آهي، جنهن ۾ هر ڪنهن کي کٽ ۽ بسترو مليو وڃي. اردو ڳالهائيندڙن جي نالي ۾ ايم ڪيو ايم کي 40 سيڪڙو حصو ڏيندڙ پيپلز پارٽي سنڌ جي حڪومت ۽ نوڪرين ۾ ٻين صوبن کي به حصو ڏئي رهي آهي، جنهن سبب چئن صوبن جي زنجير ڪڏهن به مضبوط نه ٿيندي بلڪه ڪمزور ٿيندي.

رحمان ملڪ ۽ ملڪ رياض کان وٺي انور مجيد تائين، سليم مانڊوي والا کان وٺي شيري رحمان تائين، اسلام دين شيخ کان وٺي انهن سڀني ماڻهن تائين جن وٽ سنڌ کي هلائڻ جا اختيار مليل آهن، انهن سڀني جي لاءِ هڪڙو ئي سوال ڪجي ته انهن سڀني جون سنڌ لاءِ ڪهڙون خدمتون آهن؟

۽ اهو هڪ ٻيو ڊگهو بحث ٿي ويندو ته ان قسم جي ماڻهن سنڌ کي ڪيترو نقصان پهچايو آهي. سنڌ جا ٺيڪا، سنڌ جي ترقي، سنڌ جي تعليم، سنڌ جي صحت، سنڌ جي ثقافت کان وٺي ادب تائين انهن سنڌ کي گذريل ستن سالن ۾ ڪيترو نقصان پهچايو آهي، سنڌين جي پنهنجي سول سوسائٽي نه هجڻ سبب انهن مامرن تي ڪير به آواز ڪونه پيو اٿاري، سنڌي اديب، دانشور، غير ملڪي ڊونرز کان فنڊ کائيندڙ ماڻهو بظاهر اڇا اجرا لڳندا آهن، پر حقيقت ۾ اهي سڀ ان گناهه ۾ برابر جا شريڪ آهن.

منهنجي نظر ۾ ملڪ رياض کان وڌيڪ خطرناڪ اهو سنڌي آهي، جيڪو ذاتي مفاد خاطر ترقي جو اهو دهل وڄائي پيو، جنهن تي سنڌي ماڻهن کي دوسو وانگر نچايو پيو وڃي. سنڌي قومپرست اڳواڻ کلي ڳالهائڻ بدران ”ليپا پوتي سياست“ جا ماهر لڳا ويٺا آهن، سنڌ جو هر شعبو ڪرپشن جي گپ ۾ لٿل آهي، ان ڪرپشن جي خلاف جيڪو به ڳالهائي ٿو يا لکي ٿو، اهو سندن نظر ۾ چريو آهي يا مايوس آهي. سنڌ کان ٻاهر رهندڙ سنڌين جون تنظيمون واويلا ۾ ڪمال رکن ٿيون، پر سنڌ ۾ ويهي عملي ڪم ڪهڙو ڪجي؟ شايد اهو سندن ايجنڊا ۾ ناهي. ادب، راڳ رنگ، موسيقي جون محفلون، ڊونرز پروگرام، سنڌ مان مخصوص ماڻهن کي سڏائي هو جمالا ڳارائي هو سمجهن ٿا ته دنيا ۾ سنڌ کي هو زنده رکيو ويٺا آهن.

پر حقيقت ۾ جيڪا اصلي سنڌ آهي، اها هر سماجي سطح تي مري رهي آهي، ڪرپٽ ترين سماجن جي فهرست ۾ اچي چڪي آهي، جنهن جو ڪارڻ رڳو حڪومت ڪندڙ پارٽي ناهي، ان حڪمران پارٽي جا سڌي يا اڻ سڌي ريت ڀرجهلا ٿيندڙ مڊل ڪلاس جا به اهي سڀ ماڻهو آهن، جيڪي چند سالن ۾ ڪروڙ پتي بڻجي ويا آهن.

سنڌ جون سموريون قومپرست پارٽيون سنڌ ۾ رٿيل مڪاني چونڊن کان پري آهن، البته اڄ جسقم پاران سپر هاءِ وي تي ڌارين جي آبادڪاري خلاف ڌرڻو لڳندو، ڏسون ته ان جا ڪهڙا اثر پون ٿا، ڪيترا ماڻهو گڏ ٿين ٿا، سنڌي قومپرستن اڳيان رڳو بحريه ٽائون ناهي، ڊفينس هائوسنگ اٿارٽي به آهي، ان تي ڪير ڇونه ٿو اکر ڳالهائي، ٻيا به سنڌ دشمن منصوبا آهن، جيڪي ملڪ جي مختلف علائقن مان هارايل پيپلز پارٽي جي ڪارستانين جي کاتي ۾ شامل آهن، پر ان ۾ سنڌ جي پاسي ڪير بيٺو آهي؟

سنڌ جي مڪاني چونڊن کي چئلينج سمجهڻ گهرجي، جيستائين سنڌ آزاد ٿئي، تيستائين هي ننڍا ننڍا فورم ڇڏي ڏيڻ جو مطلب آهي ته اوهان ’کپي کپي‘ وارن کي رستو صاف ڪري پيا ڏيو. پيپلز پارٽي جي گناهن تان پردو ڪير چاڪ ڪندو، اهو ڪير ثابت ڪندو ته اوهان پنجاب کان وٺي خيبرپختونخواهه تائين، بلوچستان کان وٺي گلگت بلتستان تائين هر هنڌ کان شڪست کائي چڪا آهيو، ڇو ته اوهان شڪستن مان سبق ڪونه سکيو.

باقي بچي سنڌ، جنهن ۾ اوهان جون اکيون کتل آهن. شايد اوهان سمجهو ٿا ته سنڌ جو غريب عوام ڪاڏي ويندو؟ يا ممڪن آهي ته اوهان جو خيال هوندو ته سنڌ ۾ ڪير چئلينج ڪندو؟ سنڌ جو عوام سلجهيل ۽ لکيو پڙهيو نوجوان شديد اضطراب ۾ ورتل آهي، ماڻهو اوهان کان بيزار آهن، عوام جو مطلب اهي چار پنج هزار مراعت يافته ماڻهو ناهن، عوام جو مطلب سنڌ جي اڪثريت آهي، شايد ان جي جهلڪ اوهان کي سنڌ ۾ ٿيندڙ مڪاني چونڊن ۾ نظر ايندي.

 

سنڌي ٻولي تي آخري ختمو پڙهڻ جو اعلان؛مير اعظم علي ٽالپر

منهنجي پيدائش پاڪستان جي ٺهڻ کانپوءِ ستن سالن بعد 18 اپريل (شب رات هئي) آچر فجر ويل ٿي هئي (خانداني لکت موجب) پر ڄمڻ وقت منهنجي آمد هن دنيا ۾ سڄي رات تڪليف ۾ گذارڻ بعد به نه ٿيڻ تي عيسائي نرس مجبور ٿي چيو ته ”او ماءِ گاڊ“ هاڻ اوهان پنهنجي ڪنهن پير، فقير يا اولياءُ کي ڏسو، ان بعد منهنجو مامو درگاهه جهانيان (سائين منظور نقوي) تان پاڻي کڻي آيو ته ان جي پيئڻ بعد راقم اڄ 60 سال کان مٿي جو آهي ۽ چون ٿا ته ان نرس منهنجي ڄمڻ تي هڪدم پنهنجي مذهبي عقيدي مطابق پنهنجا هٿ ساڄي ۽ کاٻي ڪلهن تي هڻي گلي ۾ عيسائي ’سليب‘ واري نشان تي هٿ رکي حضرت عيسيٰ عه جو شڪريو ادا ڪيو هو ۽ اها نرس منهنجي سانڀر ۾ به گهر ايندي هئي ۽ مڌر ٽريسا (ڪلڪته) جي تعريف ڪندي هئي، ان بعد اها شهر واري سرڪاري اسپتال اسڪول بڻجي ويو ۽ صدر ايوب جي زماني ۾ وزير مواصلات محمد خان جوڻيجو هيلٿ سينٽر جو بنياد رکي ويو هو، جيڪا پوءِ پڪي واري اسپتال طور مشهور ٿي ۽ ان کانپوءِ هاڻ اهو اسڪول به نه رهيو آهي، جتي ڇوڪريون پڙهڻ لاءِ ڍڳي گاڏي ۾ چڙهي اينديون هيون ۽ هر سال اداڪار مشتاق چنگيزي جيستائين شهر ۾ هو جنم ڏينهن تي راقم جو يادگار طور فوٽو ڪڍندو هو. هي مذهب ۽ عقيدي جون ڳالهيون ان ڪري ياد پيون آهن، جو ڪالهه عبرت ۾ پهرين صفحي مٿان هڪ ٽن ڪالمن واري خبر ميانمار (برما) جي روهنگيا مسلمانن جي دربدر هئڻ واري خبر ۽ وفاقي سرڪار پاران کين مسلمان هئڻ ڪري ۽ پاڪستان خالص اسلامي ملڪ (دنيا ۾) هئڻ تي پاڪستان، پر خاص سنڌ سو به ڪراچي ۾ خيمه بستيون ٺاهي آباد ڪرڻ لاءِ چوڌري نثار علي، سرتاج عزيز ۽ طارق فاطمي شريڪ ٿي پي سي ون تيار ڪري رهيا آهن. ان کانسواءِ هن ڪم لاءِ مختلف جماعتون ۽ واپاري (ڪانگ کي لُڙ ۾ مزو) به مدد ڪندا. ڇو ته برما ۾ ٻُڌَ مذهب وارا سج ۽ چنڊ کي سلام ڪندڙ (پر نام) مذهبي (بَڪُشو) مارين ٿا. انهن لاءِ برما جي جمهوريت پسند آنگ سان سُوچي به چپ آهي. ڪجهه سال اڳ آئون شاهه بندر (سمنڊ) کان چوهڙ مالي وڃي رهيو هئس ته مڇي جو شڪار ڪندڙ نوجوان گاڏي کي هٿ ڏئي چڙهيو ۽ ٻڌايو ته هو برما جو آهي ۽ خاندان سان ڪراچي ۾ رهي ٿو. جيڪڏهن برما جا لکين پناهه گير مسلماني ”آساني“ جي نالي ۾ سنڌ ۾ آيا ته هي يتيم خانو ته اڳ ئي آهي ۽ سندس ڏيوالو به سياستدانن ڪڍي ڇڏيو آهي، نئين برما جي لُوڌ ته ڪجهه نه ڇڏيندي. ڇو ته پهرين بهاري آيا، جيتوڻيڪ ماٽيجا ڀاءُ بنگالي هتان گهڻا بنگلاديش هليا ويا، پوءِ به اڄڪلهه سپر هاءِ وي ڪوئيٽا درٻار هوٽل طرف جيڪي به پولٽري فارم آهن، انهن جا پورهيت رهجي ويل بنگالي آهن. سنڌ ۾ بهاري ۽ پوءِ طالبان اهلن وسهلن ۽ هاڻ روهنگيا ايندا ته آخر سنڌ جو ڇا ٿيندو؟ ڇو ته غلام حيدر وائين (پنجاب جي سابق وزير اعليٰ) بهاري گهرائڻ جي وڏي ڪوشش ڪئي هئي (وائين)!! حيدرآباد گاڏي کاتي ۾ هڪ ڌوٻي وٽ هڪ بهاري ملازم بيٺو ته هن راقم جو ڊگهو مٿو، منهن ۽ رنگ ڏسي بهاري سمجهيو هو، پر کيس ٻڌايم ته هزارين سالن جو سنڌي پوءِ مسلمان ۽ پاڪستاني آهيان، هُن ٻڌايو هو ته اسان پيٽرول بم ٺاهڻ جا ماهر هئاسين ۽ پاڪستان جو ساٿ ڏنوسين، هاڻي خاندان محمدپور ڪئمپ ۾ آهي (ڍاڪا) رزاق ڀائي ۽ نسيم ڀائي آڻڻ جي ڪوشش ڪن پيا.

هن خبر سان هڪ ٻي خبر اخبارن مغز جا چارئي خانا چٽ ڪندڙ ڏني آهي ته، ”عالمي بئنڪ جي پاليسي تحت (جيڪا سنڌ تعليم کاتي کي اسپانسر ڪندڙ آهي) سنڌ سرڪار تعليم کاتي مان پرائمري استادن جي آسامين کي هميشه لاءِ ختم ڪرڻ جو فيصلو ڪيو ويو آهي (نه رهي بانس نه بجي بانسري) هاڻ سڀ استاد جونيئر ايليمينٽري ٽيچر هوندا، جيڪي اٺون ڪلاس پڙهائيندا، ان ۾ سائنس، انگريزي ۽ رياض هوندي، ان اعلان جو واضح مطلب اهو آهي ته سابق صدر ايوب خان ان بعد پرائيويٽ اسڪول ۽ هاڻ خود حڪومت سنڌ سرڪاري پرائمري اسڪولن مان سنڌي پرائمري ماسترن جون آساميون ختم ڪري سنڌ جي سرڪاري اسڪولن ۾ سنڌي ٻولي تي آخري ختمو پڙهائڻ جو فيصلو ڪيو آهي.

اخلاق کان ڪريل يا اُن پارليامينٽ (لفظ) اکر لکڻ کان بچندي اهو لکي سگهجي ٿو ته ”ناچ ميري بُل بُل ڪي پئسا مليگا“ ڇو ته چيو ويندو آهي ته ’پئسا بولتا هي، پئسا ڦينڪو تماشا ديکو‘ ڇاڪاڻ ته جيڪو به خرچ ڪندو ۽ رقم ڏيندو ان جو حڪم به تسليم ڪرڻو پوندو. خدانخواسته آئينده عالمي بئنڪ پنهنجي پاليسي مطابق سنڌ حڪومت کي اهو چئي ته گرلس اسڪولن ۾ وڏي کڙي وارو سينڊل ۽ مني اسڪرٽ پائي اچو ته ڇا اهو قبول هوندو؟ جيڪڏهن ورلڊ بئنڪ جي فرمائش پوري ڪرڻي آهي ته برو ۽ ڀلو ڏسڻو نه آهي، بس ڏوڪڙن کي ڏسي ’سيڻ‘ تبديل ڪرڻا آهن، ڇو ته منهنجو پوٽو هڪ اسڪول (پرائيوٽ) جو شاگرد آهي ۽ پنهنجي منهن اسپيلون ياد ڪري رهيو هو ۽ چيائين (RABBIT) ’ريبٽ‘ مون پڇيو اهو ريبٽ سنڌي ۾ ڇا آهي؟ چيائين ڏاڏا خبر نه آهي. وري پڙهڻ لڳو Parrot ’پروٽ‘ وري چيم ڀلا اهو ڇا آهي، ان لاءِ چيائين، ڏاڏا گارڊن ۾ گرين برڊ آهي، ان بعد هڪ ٻي اسپيل ياد ڪيائين Crow ’ڪرو‘ پڇيم ابا اهو ڪهڙو پکي آهي، چيائين ڏاڏا اهو مُورنگ ۾ بليڪ ڪلر وارو پنهنجي گهر تي ويهندو آهي، ان بعد مون پوٽي کي چيو ته ”بابا صورتخطي لک ۽ لک منڌاڻي‘ سنڌي ۾ هن چيو ڏاڏا اهو جانور آهي يا پکي؟ اهو ٻڌي مون کي روئڻ اچي ويو، فجر ويل ناني جهڻ وُلوڙيندي هئي ته منڌاڻي جي آواز تي مون کي ننڊ ايندي هئي ۽ ان بعد هن کي چيم ته ابا ’نهيلو‘ ڇا آهي؟ چيائين ’واٽ از نهيلو‘ آئون منهن مٿو نراڙ پٽي ويهي رهيس. ڇو ته وفاقي سرڪار امداد لاءِ سعودي عرب جو رخ ڪندي آهي ته سنڌ سرڪار عالمي بئنڪ ڏانهن نهاريندي آهي. ٻنهي حڪومتن جي چپن تي هوندو آهي.

”حبيبِ حيا حيا“ ڏسجي ته اهو ڪيترو وقت ائين حال رهندو؟