تازيون خبرون

Daily Archives: June 11, 2015

ڀارت کي منهن ٽوڙ جواب ڏنو ويندو، گهيري ۾ آيل دهشتگردن کي ڀڄڻ نه ڏبو: آرمي چيف

راولپنڊي (بيورو) فارميشن ڪمانڊرز ڪانفرنس ۾ ان عزم کي ورجايو ويو آهي ته پاڪستان جي خلاف ڪنهن به مهم جوئيءَ جو منهن ٽوڙ جواب ڏنو ويندو. فوج جي سربراهه جنرل راحيل شريف جي صدارت هيٺ ٿيل اجلاس ۾ ڪمانڊرز جو چوڻ هو ته پاڪستان جي علائقائي سلامتي جو هر قيمت تي تحفظ ڪيو ويندو. ان موقعي تي چيو ويو ته پاڪستان کي ڪمزور ڪندڙ ڀارتي منصوبن کي ناڪام بڻايو ويندو. ڪمانڊرز جو اهو به چوڻ هو ته ڀارتي سياستدانن جي ارادن کي مات ڏني ويندي. آئي ايس پي آر ڄاڻايو آهي ته ڪور ڪمانڊرن ان ڳالهه جو اظهار ڪيو ته پاڪستان طرف ڪنهن کي به ميري اک سان ڏسڻ جي اجازت نه ڏني ويندي. آئي ايس پي آر جو چوڻ آهي ته ڀارتي سياستدانن جو ٻين ملڪن جي معاملن ۾ مداخلت تي فخر افسوسناڪ آهي. ان مطابق ڀارت جا ظاهري ۽ لڪل ارادا پاڪستان کي ڪمزور ڪرڻ آهن. قوم جي مدد ۽ ڪوششسان ملڪ کي دهشتگردي کان پاڪ ڪيو ويندو. آئي ايس پي آر جو وڌيڪ چوڻ آهي ته ڪور ڪمانڊرز ڪانفرنس ۾ ڀارتي قيادت جي تازن بيانن جو سختي سان نوٽيس ورتو ويو. ان موقعي تي ڀارت جي اڳرائي وارن بيانن جو نوٽيس ورتو ويو. هنن چيو ته گهيري ۾ آيل دهشتگردن کي ڀڄڻ نه ڏنو ويندو. آئي ايس پي آر جو چوڻ آهي ته هاڻ ويڙهه جو مرڪز پاڪ افغان سرحد ويجهو جا ڪجهه علائقا آهن. اجلاس ۾ اهو به چيو ويو ته اتر وزيرستان ۽ خيبر مان دهشتگردن جا اڏا ختم ڪيا ويا آهن.

 

”بجلي ۽ گئس معاملي ۾ زيادتي بند ڪيو“ سنڌ حڪومت وفاق خلاف رستن تي نڪرڻ جي ڌمڪي ڏئي ڇڏي

ڪراچي (اسٽاف رپورٽر) سنڌ جي مڪاني ادارن ۽ سڌسماءَ واري وزير شرجيل انعام ميمڻ چيوآهي ته جيڪڏهن وفاقي حڪومت گيس ۽ بجلي جي معاملي تي زيادتي بند نه ڪئي ۽ ترقياتي رٿائن لاءِ رقم جاري نه ڪيا ته سنڌ جو عوام روڊن تي نڪرڻ لاءِ تياري آهي، سرچاءَ جي پاليسي کي اسان جي ڪمزوري نه سمجهيو وڃي، سي ايم هائوس ۾ تقريب کي خطاب ڪندي شرجيل انعام ميمڻ چيوته ڪراچي کي وڌيڪ پاڻي ۽ ٻين بنيادي سهولتن جي ضرورت آهي پر اها افسوس جوڳي ڳالهه آهي ته وفاقي حڪومت طرفان ڪراچي سميت سڄي سنڌ جو جائز حصو ناهي ملي رهيو ،وفاق جي ذميواري آهي ته اهو سڀني صوبن کي ساڻ کڻي هلي پر ترقياتي منصوبن جي حوالي سان وفاقي حڪومت جو رويو مايوس ڪندڙ آهي، ائين محسوس ٿي رهيو آهي ته خيبر پختونخوا ،سنڌ ۽ بلوچستان وفاق جي ذميواري ناهي ،انهي جي نظر ۾ صرف پنجاب ئي پاڪستان آهي ،هن چيو ته ڪراچي گرين لائن بس لاءِ گذريل سال رقم رکي وئي پر هڪ سال دير کانپوءِ ايندڙ بجيٽ ۾ اها رقم رکي وئي آهي، هن چيوته سڀ کان وڏو ڌاڙو گيس تي هنيو ٿو وڃي ۽ آئين جي ڀڄڪڙي ڪئي ٿي وڃي،آئين ۾ لکيل آهي ته جنهن صوبي ۾ گيس پيدا ٿئي ٿي ته انهي صوبي کي واڌو حصو ڏنو وڃي، ايل اين جي سنڌ جي ضرورت ناهي پر اسان تي ايل اين جو بار به وڌو ٿو وڃي، سازش اها ڪئي ٿي وڃي ته صنعتون سنڌ مان ڪنهن ٻئي هنڌ منتقل ڪيون وڃن، صنتعڪارن اسان کي چيو ته اسان انهن لاءِ آواز اٿاريون ۽ اسان آواز اٿاري به رهياآهيون، سنڌ جي وڏي وزير زبردست طريقي سان وفاقي اڳيان مسئلو پيش ڪيو آهي،هن چيو ته هاڻي وڌيڪ زيادتي برداشت نه ڪنداسين، وفاقي حڪومت کي گهرجي ته اها آئين جي پاسداري ڪري، ايل اين جي جو بار وجهي اسان کي تنگ نه ڪيو وڃي،هن چيوته بجلي جي 16کان 18 ڪلاڪن تائين لوڊشينڊنگ ڪري سنڌ سان ويڳي ماءُ وارو سلوڪ ڪيو ٿو وڃي،سنڌ ۾ عام چونڊن ۾ مسلم ليگ (ن)کي ردڪيو ويو،انهي لاءِ سنڌ کي سزا ڏني ٿي وڃي شرجيل انعام ميمڻ چيوته سنڌ جي عوام سان دشمني نه ڪئي وڃي،ماضي جي پنجاب حڪومت جيئان اسان به احتجاج ۽ مظاهرا ڪري سگهون ٿا، اسان رڳو سنڌ ۾ ئي نه پر سڄي پاڪستان ۾ مظاهرا ڪري سگهون ٿا.

 

قومي اسيمبلي ۾ ميانمار جي مسلمانن تي ٿيندڙ ظلم خلاف مذمتي ٺهراءُ منظور

اسلام آباد (بيورو) قومي اسيمبلي ميانمار جي مسلمانن تي ظلم خلاف مذمتي ٺهراءُ منظور ڪري ورتو اسپيڪر اياز صادق جي صدارت هيٺ قومي اسيمبلي جو اجلاس ٿيو. اجلاس ۾ دفاعي پيداوار واري وفاقي وزير راڻا تنوير ميانمار جي مسلمانن تي ٿيندڙ ظلم خلاف مذمتي ٺهراءُ پيش ڪيو جيڪو اتفاق راءِ سان منظور ڪيو ويو، اجلاس دوران خطاب ڪندي پي ٽي آءِ جَي ايم اين اي شاهه محمود قريشي چيو ته اسيمبلي ۾ بدمعاشي ڪرڻ لاءِ لائيوِ ڪوريج نه پئي ڪرائي وڃي. شاهه محمود قريشي چيو ته رڳو جملي بازي ٿيندي ته اجلاس جي ڪارروائي ڪيئن هلي سگهندي،جنهن تي اسپيڪر اياز صادق پي ٽي آءِ ايم اين اي کي مخاطب ٿيندي چيو ته قريشي صاحب اوهان مان اهڙي اميد نه هئي. ان موقعي تي وفاقي وزير راڻا تنوير وچ ۾ ڳالهائيندي چيو ته هو شاهه محمود قريشي جَي پيءُ ۽ ڏاڏي کي به سڃاڻي ٿو. اسپيڪر پاران وفاقي وزير جي لفظن تي اعتراض بعد وفاقي وزير راڻا تنوير گٿا لفظ ڳالهائڻ تي شاهه محمود قريشي کان معافي وٺي ڇڏي. اجلاس دوران عوامي مسلم ليگ جي سربراهه شيخ رشيد ڳالهائيندي چيو ته ڪڻڪ خريد ڪرڻ وارو ڪير به ناهي،اسحاق ڊار ۽ احسن اقبال جَي بيانن ۾ ڏينهن ۽ رات جيترو فرق آهي. شيخ رشيد چيو ته ڪامورن کي 2-2 گاڏيون ڏنيون پيو وڃن،جيڪو عوام سان سراسر ظلم آهي. شيخ رشيد چيو ته ڪينسر ۽ هيپاٽائيٽس جهڙن موذي مرضن جِي انجيڪشنز ۾ پاڻي ملايو پيو،جنهن جو ڪو نوٽيس وٺڻ لاءِ تيار ناهي. اجلاس دوران ايم ڪيو ايم جي نسرين جليل ترقي ۽ منصوبابندي جَي وفاقي وزير احسن اقبال خلاف قومي اسيمبلي ۾ استحقاق واري رٿ پڻ جمع ڪرائي. استحقاق واري رٿ ۾ چيو ويو آهي ته وفاقي وزير احسن اقبال پنهنجي بيان ۾ چيو ته ڪراچي واٽر بورڊ کي 80 ملين رپيا جاري ڪيا ويا آهن، جيڪو سراسر ڪوڙ آهي.

 

سنڌ جي وڏي وزير جي صدارت هيٺ اجلاس، يئلولائين بس پروجيڪٽ تي بريفنگ

ڪراچي (اسٽاف رپورٽر) وڏي وزير سيد قائم علي شاهه جي صدارت هيٺ بس ريپڊ ٽرانزٽ سسٽم سان لاڳاپيل اجلاس ٿيو، جنهن ۾ يئلو لائين ٽرانسپورٽ پروجيڪٽ جي حوالي سان بريفنگ ڏني وئي، منصوبي تي 13 ارب روپيا خرچ ٿيندا. سنڌ جي وڏي وزير اجلاس ۾ ٽرانسپورٽ ممتاز جکراڻي ۽ ٻيا آفيسر شامل هئا، فيڊرل گورنمنٽ جو بس ريپڊ ٽرانزٽ گرين لائين جي  اڳواڻ صالح فاروق به اجلاس ۾ شامل هو.اجلاس ۾ شامل آفيسرن کي يئلولائين جو ڪوريڊور 26 ڪلو ميٽر ڊگهو هوندو، پروجيڪٽ چيني ڪمپني جي سهڪار سان ٺهندو، پروجيڪٽ تي 13 ارب روپيا خرچ ايندا. وڏي وزير وڌيڪ چيو ته يئلو لائين ۾ هڪ لک 25 هزار ماڻهو روزانو سفر ڪري سگهندا. منصوبي مطابق يئلو لائين پروجيڪٽ 2017ع تائين مڪمل ڪيو ويندو،  سندس چوڻ هو ته پروجيڪٽ جو روٽ ڪورنگي، ڄام صادق پل، ايف ٽي سي، شاهراه فيصل، شاهراهه قائدين ۽ پيپلز پارٽي سيڪريٽريٽ کان صدر تائين هوندو.

 

ڀارت ڪنهن به غلطي فهمي ۾ نه رهي، پاڪستان ميانمار ناهي: چوڌري نثار

اسلام آباد (بيورو) وفاقي گهرو وزير چوڌري نثار علي خان چيو آهي ته ڀارت خواب ڏسڻ ڇڏي ڏئي ۽ ڪنهن به غلطي فهمي ۾ نه رهي، پاڪستان ميانمار ناهي، پاڪ فوج هر قسم جي اڳرائي جو منهن ٽوڙ جواب ڏيڻ جي صلاحيت رکي ٿي. ڀارت جي مملڪتي وزير راجيه ورڌن راٺوڙ جي بيان تي پنهنجي ردعمل ۾ چوڌري نثار چيو ته پاڪستان خطي ۾ امن امان چاهي ٿو پر ڀارت جو قبضوڪڏهن به قبول نه ڪيو ويندو. گهرو وزارت مان جاري ڪيل بيان ۾ هن ڀارت کي ڏينهن ۾ خواب ڏسڻ کان پاسيرو رهڻ جي صلاح ڏيندي چيو ته ڀارت کي ڪنهن به قسم جي غلط فهمي ۾ نه رهڻ گهرجي، وفاقي گهرو وزير چيو ته پاڪستان بابت غلط عزم رکندڙ ڪن ۽ اکيون کولي رکن، چوڌري نثار چيو ته لائن آف ڪنٽرول تي بمباري ڀارتي حڪومت جي پاليسي بڻجي وئي آهي. سندس چوڻ هو ته خطي ۾ پاڪستان تي ٿاڻيداري هلائڻ وارا ڀارت جا خواب نه پهرين پورا ٿيا هئا ۽ نه ئي وري هاڻ پورا ٿيندا. وفاقي گهرو وزير چيو ته پاڪستان بابت غلط عزم رکندڙ ڪن ۽ اکيون کولي رکن، ڀارت ڪنهن غلط فهمي ۾ نه رهي پاڪستان ميانمار ناهي، پاڪ فوج هر قسم جي اڳرائي جو منهن ٽوڙ جواب ڏيڻ جي صلاحيت رکي ٿي.

 

برما ۾ ڪارروائي پاڪستان لاءِ پيغام آهي، ڀارت پاڪستان تي حملي جي ڌمڪي ڏئي ڇڏي

نئين دهلي (مانيٽرنگ ڊيسڪ) ڀارت، پاڪستان کي حملي جي ڌمڪي ڏئي ڇڏي، ڀارتي وزير راجيا ورڌن سنگهه راٺوڙ جو چوڻ آهي ته برما ۾ فوجي ڪارروائي پاڪستان لاءِ واضح پيغام آهي ته جيڪڏهن نئين دهلي کي خطرو محسوس ٿيو ته اسلام آباد تي حملو ڪري سگهجي ٿو. ڀارت جي سڌ سماءَ واري مملڪتي وزير راجيا ورڌن سنگهه راٺوڙ هڪ انٽريو ۾ چيو ته برما جي سرحد اندر گهڙي علحدگي پسندن خلاف ڪارروائي وزيراعظم نريندر مودي جي حڪم تي ڪئي وئي. هن چيو ته برما ۾ ڪارروائي پاڪستان سميت انهن سمورن ملڪن لاءِ واضح پيغام آهي ته جتي ڀارت مخالف نظريات جا ماڻهو رهن ٿا. راجيا ورڌن سنگهه راٺوڙ چيو ته هڪ دهشتگرد رڳو دهشتگرد هوندو آهي ان جي ڪا ٻي سڃاڻپ ناهي هوندي. هن چيو ته پاڪستان سميت انهن سمورن مخالف ملڪن خلاف ڪارروائي ڪري سگهجي ٿي جيڪي ڀارت خلاف دهشتگردي کي هٿي ڏئي رهيا آهن. سندس چوڻ هو ته ڀارت تي حملو ڪنهن به صورت ۾ برداشت نه ڪيو ويندو ۽ جتان به خطرو محسوس ٿيو ته هـُو اتي جارحاڻي ڪارروائي ۾ اڳرائي ڪندا. ياد رهي ته ڀارتي فورسز ۽ نيشنل سوشلسٽ پارٽي آف ناگالينڊ جي علحدگي پسندن وچ ۾ ڀارت ۽ برما جي سرحد تي چڪريون ٿيون هيون جنهن ۾ ڀارتي اختيارين طرفان ڪيترن ئي علحدگي پسندن کي مارڻ جي دعويٰ ڪئي وئي هئي.

 

عالمي برادري ۽ گڏيل قومون نريندر مودي جي پاڪستان مخالف بيان جو نوٽيس وٺن:سرتاج عزيز

اسلام آباد (بيورو) پرڏيهي معاملن بابت وزيراعظم جي صلاحڪار سرتاج عزيز، ڀارت کي سلامتي ڪائونسل جي مستقل رڪنيت لاءِ نااهل قرار ڏيندَي عالمي برادري ۽ گڏيل قومن کان نريندر مودي جي پاڪستان مخالف بيان جو نوٽيس وٺڻ جو مطالبو ڪري ڇڏيو آهي. چيئرمين ميان رضا رباني جي صدارت هيٺ سينيٽ جو اجلاس جاري آهي. سينيٽ ۾ پاليسي /ڏسو صفحو 3 بقايا نمبر 20 يان ڏيندي سرتاج عزيز چيو ته پاڪستان ۽ بنگلاديش وچ ۾ مضبوط رشتو قائم آهي، جنهن ۾ ڏار وجهڻ جي ڪوشش ڪئي پئي وڃي. پرڏيهي صلاحڪار چيو ته پاڪستان سمورن پاڙيسري ملڪن سان بهتر لاڳاپا چاهي ٿو، جڏهن ته ڀارتي وزيراعظم نريندر مودي ۽ مملڪتي وزير راجيا ورڌن سنگهه راٺوڙ جي پاڪستان مخالف بيانن جي جيتري به مذمت ڪجي گهٽ آهي. سرتاج عزيز عالمي برادري ۽ گڏيل قومن کان مطالبو ڪيو ته ڀارتي وزير جي بنگلاديش ۾ ڏنل پاڪستان مخالف بيان جو نوٽيس ورتو وڃي. ٻئي طرف پ پ ۽ اي اين پي سميت مخالف ڌر جي جماعتن اجلاس جي صحيح نموني ڪوريج نه ڪرائڻ تان سينيٽ مان علامتي واڪ آئوٽ ڪيو.

 

خيبرپختونخوا پولنگ اسٽيشنز مان فارم 15 گم ٿيڻ جو انڪشاف

اسلام آباد(بيورو) چونڊ ڌانڌلي جي جاچ لاءِ جوڙيل جاچ ڪميشن ۾ رڪارڊ پيش ڪيو ويو، جنهن مطابق خيبرپختونوا مان ڪامياب تحريڪ انصاف جا ميمبر قومي اسيمبلي جي تڪ ۾ پولنگ اسٽيشنز جا فارم 15 غاب ٿيڻ جو انڪشاف ٿيو آهي. تحريڪ انصاف جي قومي اسيمبلي جي ميمبر مجاهد علي جي تڪ 11۾ 95 سيڪڙو پولنگ اسٽيشنز مان فارم 15 نه مليو آهي. 251 پولنگ اسٽيشنز ۾ 247 ۾ فارم15 نه ملي سگهي. اهڙي طرح 98 سيڪڙو پولنگ اسٽيشنز مان فارم 15 نه مليا آهن.شاهه محمود قريشي جي تڪ  150 ۾ 46 سيڪڙو پولنگ اسٽيشنز جا فارم 15 نه ملي سگهيا. 286 ۾ 133 پولنگ اسٽيشنز جا فارم 15 گم آهن. خيل زمان جي تڪ اين اي16 مان 60پولنگ اسٽيشنز جا فارم 15 گم آهن،انجئينر داوڙ خان جي تڪ اين اي 25 ۾ رڳو 30 سيڪڙو پولنگ اسٽيشنز جا فارم 15 مليا آهن، ۽ 308 مان 216 پولنگ اسٽيشنز مان فارم 15 گم ٿيڻ جا انڪشاف ٿيا آهن. اميرالله جي تڪ اين اي27 جا 254 مان 59 مان فارم 15 نه ملي سگهيا آهن، مراد سعيد جي تڪ 29 مان 45 سيڪڙو پولنگ اسٽيشنز مان فارم 15 مليا آهن جڏهن ته 321 مان 162 پولنگ اسٽيشنز جا فارم 15 گم آهن. پي ٽي آئي جي ايم اين اي سليم رحمان جي تڪ 30 جي 296 پولنگ اسٽيشن مان 251 مان فارم 15 ناهن مليا.

 

سيالڪوٽ، پارڪنگ ۾ بيٺل گاڏي ۾ ساهه گهٽجڻ سبب 2 معصوم ٻار فوت

سيالڪوٽ(م.د) پسرور جي علائقي چڪ مڇاڻا ۾ پارڪنگ ۾ بيٺل هڪ گاڏي ۾ ٻه معصوم ٻارڙا ساهه گهٽجڻ سب فوت ٿي ويا. پوليس مطابق گاڏي جو مالڪ گاڏي پارڪنگ ۾ بيهاري لاڪ ڪري هليو ويو، گاڏي جا دروازا ۽شيشا بند هجڻ سبب ٻارڙن جو ساهه گهٽجي ويو ۽ دم ڌڻي حوالي ڪري ڇڏين. پوليس مطابق ٻارڙن جي عمر 3 ۽ 5 سال هئي.

 

نريندر مودي کي وزير اعظم چونڊڻ هندوستاني عوام جي بدقستي آهي: عمران خان

اسلام آباد (بيورو) پي ٽي آءِ سربراهه عمران خان ڀارتي وزير اعظم جي بنگلاديش بابت بيان جي مذمت ڪندي چيو آهي ته نريندر مودي کي وزير اعظم چونڊڻ هندوستاني عوام جي بدقستي آهي. اسلام آباد ۾ ميڊيا سان ڳالهائيندي عمران خان چيو ته ڀارتي وزير اعظم نريندر مودي ملڪ مان غربت ختم ڪرڻ بدران پاڙيسري ملڪن سان سازشون ڪري رهيو آهي. هن چيو ته نريندر مودي کي عوام ووٽ ڏئي ڪامياب ڪيو، کيس ڪشمير تڪرار جي حل لاءِ ڪردار ادا ڪرڻ گهرجي ها، پر هندوستان جي بدقستي آهي جو نريندر مودي جهڙي ماڻهو کي وزير اعظم چونڊيو ويو. پي ٽي آءِ سربراهه چيو ته ڀارت ۾ بک سبب ماڻهو پنهنجا ٻار وڪرو ڪري رهيا آهن، افسوس جهڙي ڳالهه جو ان ملڪ جو وزير اعظم بادشاهت جي حد ڪري ڇڏي آهي. عمران خان چيو ته عام چونڊن ۾ منظم ڌانڌلي ٿي، ان حوالي سان سمورا ثبوت انڪوائري ڪميشن ۾ پيش ڪيا ويا آهن، ڪميشن جيڪو به فيصلو ڏيندي اها تسليم ڪيو ويندو. عمران خان وڌيڪ چيو ته اڪثر تڪن تان فارم 15 پنجاهه سيڪڙو کان وڌيڪ غائب آهي، انڪوائري ڪميشن کي نوٽيس وٺڻ گهرجي.