تازيون خبرون

Daily Archives: June 10, 2015

وزير اعظم پاران تاجڪستان کان 1000 ميگاواٽ بجلي خريد ڪرڻ جو اعلان

دوشنبي (مانيٽرنگ ڊيسڪ) وزير اعظم نواز شريف، تاجڪستان کان هڪ هزار ميگاواٽ بجلي خريد ڪرڻ جو اعلان ڪيو آهي. تاجڪستان جي صدر سان گڏ ڪيل پريس ڪانفرنس کي خطاب ڪندي وزير اعظم چيو ته ٻئي ملڪ دهشتگرديءَ جي خلاف ويهه نڪاتي پروگرام تي عمل ڪري رهيا آهن. هن چيو ته ٻئي ملڪ دهشتگردي، منشيات فروشي ۽ ٻين ڏوهن جي خلاف گڏيل ڪارروائي ڪري رهيا آهن. نوازشريف اميد ظاهر ڪئي ته جلد تاجڪستان جي هوائي ڪمپني پاڪستان لاءِ اڏامون شروع ڪندي. ان کان اڳ صدر سان ملاقات دوران وزير اعظم نوازشريف چيو ته وچ ايشيائي ملڪن سان لاڳاپا مضبوط ڪرڻ پاڪستان جي پهرين اوليت آهي، ته جيئن هڪٻئي جي تجربي مان سکي سگهجي. وزير اعظم دوشنبي ۾ گڏيل قومن جي سيڪريٽري جنرل بان ڪي مون سان به ملاقات ڪئي. ملاقات دوران وزير اعظم چيو ته پاڪستان عالمي امن مشن ۾ سڀني کان وڌيڪ سهڪار ڪندڙ ملڪ آهي. هن چيو ته پاڪستان جا گڏيل قومن سان مضبوط لاڳاپا آهن. هن چيو ته عالمي امن ۽ استحڪام ۾ پاڪستان اهم ڪردار ادا ڪري رهيو آهي. ان موقعي تي بچاءَ جو وزير خواجا آصف ۽ پرڏيهي مددگار طارق فاطمي موجود هئا. وزير اعظم نوازشريف، تاجڪ صدر کي پاڪستان جي دوري جي دعوت ڏني. ان کان پهريان وزيراعظم نواز شريف تاجڪستان جي گادي واري شهر دوشنبـَي ۾ واٽر فار لائيف جي عنوان هيٺ ڪوٺايل عالمي ڪانفرنس کي خطاب ڪندي چيو ته پاڪستان جي اقتصادي ترقي ۾ زراعت جي وڏي اهميت آهي، انڪري پاڻي جي دستيابي لاءِ خطي ۾ سهڪار ۽ اعتماد سازي هئڻ گهـُرجي. ان موقعي تي وزيراعظم نواز شريف جو چوڻ هو ته غربت جي خاتمي ۽ خوراڪ توڙي توانائي جي تحفظ لاءِ پاڻي تمام گهڻي اهميت رکي ٿو. نواز شريف چيو ته پاڪستان جي اقتصادي ترقي ۾ زراعت جي وڏي اهميت آهي، ماحولياتي تبديلين ۽ وڌندڙ آباديءَ سبب دنيا ڪيترن ئي چيلينجز کي منهن ڏئي رهي آهي. هن چيو ته پاڻي ماحوليات جي بقا لاءِ اهم عنصر آهي، عالمي سطح تي پاڻي جي گهـُرج ۾ واڌ ٿي رهي آهي، ان جي صحيح استعمال تي ڌياڻ ڏيڻو پوندو. نواز شريف جو چوڻ هو ته مستقبل ۾ پاڻي جي کوٽ پوري ڪرڻ هڪ وڏو چيلينج آهي، پاڻي جي تحفظ جا هدف حاصل ڪرڻ ۾ واٽر فار لائيف ڪانفرنس مددگار ثابت ٿيندي. ياد رهي ته وزيراعظم نواز شريف تاجڪستان جي وزيراعظم قاهر رسول زاده جي خاص دعوت تي ٻن ڏينهن جي دوري تي دوشنبــَي پهتل آهي.

 

نيب پاران پيرمظهر، مراد علي شاهه ۽ اسلم رئيساڻي خلاف ڪرپشن بابت جانچ جو فيصلو

اسلام آباد(بيورو) نيب جي چئرمين قمرالزمان چوڌري جي صدارت هيٺ ايگزيڪيوٽو بورڊ جو اجلاس ٿيو. نيب جي ترجمان چيو ته اجلاس ۾ بلوچستان جي اڳوڻي وزيراعليٰ اسلم رئيساڻي جي خلاف جاچ جي منظوري ڏني وئي آهي، اسلم رئيساڻي جي خلاف 3 نائب تحصيلدارن جي خلاف مقرري جي قانون تي جاچ ٿيندي. ترجمان جو چوڻ هو ته سنڌ جي اڳوڻي تعليم واري وزير پير مظهرالحق جي خلاف نقلي ڀرتين، سنڌ جي اڳوڻي آبادي واري وزير علي مردان شاهه جي خلاف ڪرپشن ۽ اختيارن جي غلط استعمال جي جاچ به ٿيندي.

 

پاڪستان ، ننڍي کنڊ ۽ عالمي تاريخ جي نئين سرجوڙجڪ لاءِ ڪاميٽي ڪم ڪري رهي آهي : صدر ممنون حسين

ڪراچي (اسٽاف رپورٽر) صدر ممنون حسين چيو آهي ته مستقبل جي تعمير لاءِ نئين نسل جي بهتر تعليم ۽ سکيا وقت جي اهم ضرورت آهي، هن اها ڳالهه ڪرن ۽ اخوت فائونڊيشن جي وفد سان ڳالهائيندي چئي، جنهن ڪالهه اسٽيٽ گيسٽ هائوس ڪراچي ۾ ساڻس ملاقات ڪئي، ان موقعي تي لياري سان تعلق رکندڙ شاگرد به موجود هئا، صدر چيو ته اسان چاهيون ٿا ته نئين نسل جي صلاحيتن کي نکارڻ لاءِ کين بهترين تعليمي سهولتون فراهم ڪيون وڃن، ان مقصد لاءِ حڪومت سچي نيت سان سمورا وسيلا ڪتب آڻي رهي آهي، هن چيو ته هو چاهي ٿو ته ٻارن کي هر قسم جي امتياز کان مٿانهون ٿي تعليم فراهم ڪئي وڃي ته هو سـٺا پاڪستاني ۽ سٺا شهري بڻجي سگهن ٿا، ان مقصد لاءِ ضروري آهي ته کين پاڪستان جي تحريڪ، ننڍي کنڊ ۽ عالمي تاريخ به ٻڌائي وڃي ان مقصد لاءِ نصاب جي نئين سرجوڙجڪ لاءِ ڪاميٽي ڪم ڪري رهي آهي، جنهن جون تجويزون جلد ئي سامهون اچي وينديون،

 

بنگلاديش ٺاهڻ بابت نريندر مودي جو بيان مذمت جوڳو آهي: خورشيد شاهه

اسلام آباد (بيورو) قومي اسيمبلي ۾ اپوزيشن ليڊر خورشيد شاهه چيو آهي ته بنگلاديش ٺاهڻ بابت ڀارتي وزيراعظم نريندر مودي جو بيان مذمت جوڳو آهي، هندستان اڄ به پاڪستان جي خودمختياري ۽ سلامتي کي چيلينج ڪري رهيو آهي، مودي جي اعتراف کانپوءِ پرڏيهي کاتي جي خاموشي تي ڏک پهتو آهي. قومي اسيمبلي ۾ خطاب ڪندي خورشيد شاهه چيو ته ڀارتي وزير اعظم ۾ نريندر مودي جو بنگلاديش ٺاهڻ بابت بيان مذمت جوڳو آهي. خورشيد شاهه چيو ته ڀارتي وزير اعظم نريندر مودي جي بيان مان ثابت ٿي  ويو آهي ته هندوستان پاڪستان ٽوڙڻ ۾ اهم ڪردار ادا ڪيو، جڏهن ته ماضي ۾ ملڪي حالتون خراب ڪرڻ جي سازش ڪئي وئي. هن چيو ته اڄ ثابت ٿي  ويو آهي ته ماضي ۾ ڊڪٽيٽر شپ جي ڪجهه غلط پاليسين سبب دشمن پاڪستان جي اندروني معاملن ۾ مداخت ڪري رهيو آهي. خورشيد شاهه پاڪستان جي پرڏيهي کاتي تي تنقيد ڪندي چيو ته ڀارتي وزير اعظم نريندر مودي جي پاڪستان خلاف چڙ ڏياريندڙ بيان تي پرڏيهي کاتي جي خاموشي مذمت جوڳو عمل آهي. هن چيو ته ڀارت پاڪستان جي سلامتي ۽ خودمختياري کي چيلينج ڪري رهيو آهي، نريندر مودي خلاف قومي اسيمبلي ۾ مذمتي ٺهراءُ منظور ڪيو وڃي. هن چيو ته جڏهن پيپلز پارٽي حڪومت سنڀالي ان وقت دهشتگردي عروج تي هئي، اسلام آباد جي پهاڙن پٺيان دهشتگردن جا اطلاع ملندا هئا. خورشيد شاهه جو چوڻ هو ته پاڪستان اندرني دهشتگردي کي منهن ڏئي رهيو آهي، امن جي بحالي لاءِ سياسي ۽ عسڪري قيادت کي متحد ٿيڻ جي ضرورت آهي. اپوزيشن ليڊر چيو ته پاڪستان کي ٻين تي ڀاڙڻ بدران پنهنجون شيون تيار ڪرڻ گهرجن، جيڪڏهن ٻين جي آسري تي ويهبو ته ماڻهو بک مري ويندا. خورشيد شاهه نئين مالي سال جي بجيٽ حوالي سان ڳالهائيندي چيو ته وفاقي حڪومت بجيٽ ۾ عوام کي رليف ڏيڻ ۾ مڪمل طور ناڪام رهيو.

 

ڪراچي: بلديه سانحي جي جاچ ٽيم ۾ شامل ڊي ايس پي شهيد، وزير اعظم نوٽيس ورتو، وڏي وزير پاران رپورٽ طلب

ڪراچي (اسٽاف رپورٽر) ڪراچي ۾ پوليس تي حملن جو سلسلو جاري آهي، شاهه لطيف ٽائون واري علائقي ۾ هٿياربندن جي فائرنگ ۾ ڊي ايس پي مجيد عباس شهيد ٿي ويو ۽ سندس ڊرائيور زخمي ٿي پيو، پوسٽ مارٽم رپورٽ ۾ چيو ويو آهي ته ڊي ايس پي کي 5 گوليون هنيون ويون. سائيٽ ايريا ۾ مقرر ڊي ايس پي مجيد عباس پوليس موبائيل تي گهر کان آفيس وڃي رهيو هو ته ٻن موٽر سائيڪلن تي سوار هٿياربندن مٿس فائرنگ ڪري ڏني. واقعي بعد ڊي ايس پي ۽ سندس ڊرائيور سخت زخمي ٿي پيا، جن کي جناح اسپتال منتقل ڪيو ويو،جتي مجيد عباس زخمن جا سور نه سهندي فوت ٿي ويو. واقعي بابت ڊي آءِ جِي اوڀر منير شيخ ٻڌايو ته ڊي ايس پي مجيد عباس پاڻ گاڏي هلائي رهيو هو ۽ کيس سادا ڪپڙا پهريل هئا. جناح اسپتال جي ايمرجنسي وارڊ جي انچارج ڊاڪٽر سيمي جمالي ڊي ايس پي مجيد عباس جي فوت ٿيڻ جي تصديق ڪئي. جناح اسپتال جي ايم ايل او ڊاڪٽر شهزاد ڊي ايس پي جي قتل جي پوسٽ مارٽم رپورٽ پڌري ڪري ڇڏي. پوسٽ مارٽم رپورٽ ۾ چيو ويو آهي ته مجيد عباس کي 5 گوليون هنيون ويون جيڪي ويجهي کان لڳل آهن. شهيد ٿيل ڊي ايس پِي مجيد عباس بلديا فيڪٽري سانحي ڪيس جي جاچ ۾ شامل هو. ٻئي طرف وڏي وزير سيد قائم علي شاهه ۽ صوبائي گهرو وزير سهيل انور سيال، ڊي ايس پي مجيد عباس جي قتل جو سختيءَ سان نوٽيس وٺندي آءِ جِي غلام حيدر جمالي کان بنا دير رپورٽ طلب ڪري ورتي. وڏي وزير هدايت ڪئي ته واقعي ۾ ملوث دهشتگردن کي گرفتار ڪري سڪيورٽي جا انتظام سخت ڪيا وڃن. ياد رهي ته ڪراچي ۾ گذريل ٻن مهينن دوران 3 ڊي ايس پيز شهيد ٿي چڪا آهن، ان کان اڳ ڊي ايس پي ذوالفقار زيدي ۽ ڊي ايس پي عبدالفتاح سانگري کي نشانو بڻايو ويو هو. شاهه لطيف ٽائون ٿاڻي جي حد ۾ ظفر ٽائون ۾ اڻڄاتل موٽر سائيڪل سوار دهشتگردن جي فائرنگ ۾ شهيد ٿيل ڊي ايس پي سائيٽ مجيد عباس جي جنازي نماز پوليس هيڊ ڪوارٽر گارڊن سائوٿ ۾ ادا ڪئي وئي، جنهن ۾ صوبائي گهرو وزير سهيل انور سيال، آءِ جي سنڌ پوليس غلام حيدر جمالي، ايڊيشنل آءِ جي ڪراچي غلام قادر ٿيٻو سميت پوليس جي ٻين سينيئر آفيسرن، شهيد جي وارثن، مائٽن ۽ علائقي واسين وڏي انگ ۾ شرڪت ڪئي. ان موقعي تي پوليس جي خاص جٿي شهيد کي سلام پيش ڪيو. صوبائي گهرو وزير چيو ته ڏوهن خلاف جنگ ۾ شهيد پوليس آفيسرن ۽ جوانن جون قربانيون نه وِسارڻ جوڳيون آهن. ان موقعي تي آءِ جي سنڌ شهيد جي وارثن سان دلي همدردي ۽ تعزيت جو اظهار ڪيو. هن واقعي جو سخت نوٽيس وٺندي ڊي آءِ جي ايسٽ، ايس ايس پي ملير ۽ ايس ايس پي ويسٽ کي هدايتون جاري ڪيون ته ملوث دهشتگردن جي گرفتاريءَ لاءِ ڀرپور قدم کنيا وڃن ۽ تفصيلي رپورٽ فوري طور فراهم ڪئي وڃي. هن هدايتون ڏنيون ته پوليس آفيسرن، آفيسن ڏانهن ويندڙ ۽ واپس ايندڙن جي وقت ۾ پنهنجي سيڪيورٽي اپائن کي غير معمولي بڻايو وڃي ته جيئن اهڙن واقعن جي روڪٿام کي يقيني بڻائي سگهجي.

 

پاڪستان پاران ڀارتي وزيراعظم جي بيانن تي سخت ڪاوڙ جو اظهار، عالمي برادري کان نوٽيس وٺڻ جو مطالبو

اسلام آباد (بيورو)  پاڪستان ڀارتي وزيراعظم نريندر مودي جي بنگلاديش جي دوري دوران پاڪستان مخالف بيانن تي سخت ڪاوڙ جو اظهار ڪندي چيو آهي ته ڀارتي وزيراعطم جي بيان ۾ ٿابت ٿي آهي ته ڀارت جو پاڙيسري ملڪ  پاڪستان ۾ انتهائي منفي ڪردار ادا ڪري رهيو آهي عالمي برادري نوٽيس وٺي پاڪستان پرامن بقا گڏيل اصولن تي يقين رکي ٿو پاڙيسري ملڪن بشمول ڀارت سان سٺا تعلق برقرار رهيا آهن ٻطرفي تعلقات جي باري ۾ ڀارتي وزيراعظم جو بيان انتهائي افسوسناڪ آهي پاڪستان ۽ بنگلاديش ۾ نفرت جو ٻج وجهڻ جون هندستاني ڪوششون ناڪام ٿي وينديون پرڏيهي آفيس جي ترجمان قاضي خليل الله اڱاري تي پنهنجي هڪ بيان ۾ چيو ته وزيراعظم نريندر مودي جي بيان مان ثابت ٿيو آهي ته ڀارت جو پاڙيسري ملڪ پاڪستان ۾ انتهائي منفي ڪردار آهي. ترجمان چيو ته اها ڳالهه قابل مذمت آهي ته ڀارتي سياستدانن جو نه صرف قول ۽ فعل اقوام متحده جي چارٽر جي خلاف ورزي آهي پر هو ٻين ملڪن ۾ مداخلت تي به فخر جو اظهار ڪري ٿو. ڀارتي وزيراعظم نريندر مودي جي بنگلاديش جي دوري دوران ڊاڪا يونيورسٽي ۾ پاڪستان جي خلاف لڳايل الزامن جي حوالي سان ترجمان چيو ته پاڪستان پرامن بقاءِ گڏيل اصولن تي يقين رکي ٿو ۽ چاهي ٿو ته پاڙيسري ملڪ بشمول هندستان سان سٺا تعلقات برقرار رهن.

 

پ پ قيادت پاران ڊي ايس پي مجيد عباس جي شهادت جي مذمت، سنڌ حڪومت کي قاتل جلد پڪڙڻ جي هدايت

ڪراچي (اسٽاف رپورٽر) اڳوڻي صدر ۽ پاڪستان پپلزپارٽي جي شريڪ چيئرمين آصف علي زرداري ڪراچي جي علائقي لانڍي  ۾ دهشتگردن جي فائرنگ ۾  ڊي ايس پي مجيد عباسي جي شهادت جي سخت لفظن ۾ مذمت ڪئي آهي. آصف علي زرداري سنڌ جي وڏي وزير کي هدايت ڪئي آهي ته ڊي ايس پي مجيد عباسي جا قاتل گرفتار ڪرڻ لاءِ سمورا وسيلا ڪتب آندا وڃن. پ پ شريڪ چيئرمين چيو ته دهشتگرد ڪراچي شهر ۾ دهشتگردي خلاف هلندڙ آپريشن ۾ فرنٽ لائين جو  ڪردار ادا ڪندڙ پوليس آفيسرن  کي نشانو بڻائي رهيا آهن، قوم دهشتگردي کي ختم ڪرڻ ۽ امن قائم ڪرڻ لاءِ قربانيون ڏيندڙن تي فخر ڪري ٿي. پاڪستان پپلزپارٽي جي چيئرمين بلاول ڀٽو زرداري ڪراچي ۾ دهشتگردن هٿان هڪ وڌيڪ پوليس آفيسر ڊي ايس پي مجيد عباسي جي قتل جي سخت لفظن ۾ مذمت ڪئي آهي ۽ سنڌ حڪومت تي زور ڀريو آهي ته دهشتگردي جي خاتمي لاءِ موجود سمورا وسيلا ڪتب آندا وڃن. واضح رهي ته هٿياربندن ڊي ايس پي مجيد عباسي جي پوليس موبائيل تي حملو ڪيو جنهن ۾ هو موقعي تي شهيد ٿي ويو. بلاول ڀٽو زرداري دهشتگردي جي خاتمي لاءِ سنڌ پوليس ۽ ان جي آفيسرن توڙي جوانن جي قربانين جي واکاڻ ڪئي. هن شهيد ڊي ايس پي جي خاندان سان همدردي جو اظهار ڪيو آهي.

 

انڪوائري ڪميشن قاف ليگ جي درخواست تي پنجاب جي 7 ريٽرننگ آفيسرز کي اڄ شاهد طور طلب ڪري ورتو

اسلام آباد (بيورو) عام چونڊن ۾ مبينا ڌانڌلين جي جاچ ڪندڙ انڪوائري ڪميشن، قاف ليگ جي درخواست تي پنجاب جي 7 ريٽرننگ آفيسرز کي اڄ شاهد طور طلب ڪري ورتو آهي، جڏهن ته تحريڪ انصاف جي وڪيل، عمران خان کي انڪوائري ڪميشن آڏو شاهد طور پيش ڪرڻ وارو فيصلو واپس وٺي ڇڏيو آهي. چيف جسٽس، جسٽس ناصر الملڪ جي سربراهي ۾ ٽي رڪني انڪوائري ڪميشن جو 24 هون اجلاس ٿيو، جنهن دوران اليڪشن ڪميشن فارم 14 ۽ 15 بابت تفصيل ڪميشن ۾ جمع ڪرايا.  تحريڪ انصاف جي وڪيل حفيظ پيرزادي چيو ته عمران خان کي ڪميشن آڏو پيش نه ڪيو ويندو، هو پنهنجو فيصلو واپس وٺي رهيو آهي. ٻڌڻيءَ دوران قاف ليگ جا 7 شاهد پيش ٿيا، جڏهن ته وڌيڪ 7 ريٽرننگ آفيسرز کي پڻ شاهد طور طلب ڪرڻ جي استدعا ڪي وئي. مسلم ليگ قاف جي وڪيل خالد رانجها چيو ته هنن شاهدن جي جيڪا فهرست جمع ڪرائي آهي، انهن مان 7 هن وقت ڪميشن ۾ موجود آهن، عام چونڊن ۾ منظم ڌانڌلي ڪئي وئي، ان ڪري ريٽرننگ آفيسرز کي شاهد طور طلب ڪيو وڃي. ق ليگ جي شاهد احمد يار هراج بيان رڪارڊ ڪرائيندي چيو ته نتيجن بابت ساڻن ڪنهن به قسم جو مشورو نه ڪيو ويو ۽ نه ئي فارم 14 لڳايو ويو. هڪ سوال جي جواب ۾ احمد يار هراج چيو ته هن چونڊ عزرداري بابت ڪا به درخواست نه ڏني هئي. هڪ ٻي شاهد سردار طارق ٻڌايو ته هن اين اي هڪ سئو 42 قصور تان چونڊن ۾ حصو ورتو ۽ جنهن تان هـُو هارائي ويو پر نتيجا تيار ڪرڻ وقت کين نه ڪو نوٽيس موڪليو ويو  ۽ نه ئي اندر وڃڻ ڏنو ويو. شاهدن جي بيانن بعد ڪميشن مسلم ليگ قاف جي درخواست تي اين اي هڪ سئو 40، اين اي هڪ سئو 42، اين اي هڪ سئو 34  ۽ اين اي هڪ سئو 64 جي ريٽرننگ آفيسرن کي طلب ڪري ورتو آهي. ڪميشن ٽن صوبائي تڪن پي پي 2 سئو پندرنهن، پي پي هڪ سئو 9 ۽ پي پي هڪ سئو 61 جي ريٽرننگ آفيسرز کي به ساڻي رڪارڊ سميت پيش ٿيڻ جي هدايت ڪندي اجلاس جي ڪارروائي ملتوي ڪري ڇڏي.

 

ڪي پي ڪي ۾ ٻيهر چونڊون ڪرائڻ گڏي ۽ گڏي واري راند نه آهي: چيف اليڪشن ڪمشنر

اسلام آباد (بيورو) چيف اليڪشن ڪمشنر جسٽس رٽائرڊ سردار رضا خان ڪي پي ڪي ۾ ٻيهر مڪاني چونڊون ڪرائڻ جي عمران خان واري بيانتي سخت ڪاوڙ ڪندي چيو آهي ته صوبي ۾ ٻيهر چونڊون ڪرائڻ گڏي ۽ گڏي واري راند نه آهي، ڪي پي ڪي جي شهر نوشهره ۾ مڪاني چونڊن دوران ڌانڌلي بابت چيف اليڪشن ڪمشنر جي صدارت هيٺ ٻڌڻي ٿي، ان موقعي تي ڊي پي او ۽ ڊي سي او نوشهره پيش ٿيو، ٻڌڻي دوران جسٽس رٽائرڊ سردار رضا صوبي ۾ ٻيهر چونڊون ڪرائڻ جي بيان تي ڪاوڙجي پيو ۽ چيو ته اليڪشن جي ڏينهن پوليس انتظاميا جي ڪنٽرول ۾ هو جنهن اليڪشن ڪميشن جو ساٿ نه ڏنو، جڏهن ته انتظاميا پاران سڄي صوبي ۾ امن امان جي صورتحال تي توجه نه ڏني وئي، ان لاءِ ري اليڪشن ڪرائڻ وارن جو علاج ڪنداسين. هن چيو ته ڪي پي ڪي ۾ ٻيهر اليڪشن ڪرائڻ جو فيصلو اسان کي ڪرڻو آهي ۽ نوڪري خدا جي هٿ ۾ ڪنهن خٽڪ، بنگش يا سيد جي هٿ ۾ نه آهي.

 

خيبرپختونخواهه ۾ ٻيهر مڪاني چونڊون ڪرائڻ آسان نه آهي: عمران خان

اسلام آباد (بيورو) تحريڪ انصاف جي چيئرمين عمران خان هلندڙ سال کي هڪ ڀيرو ٻيهر چونڊن جو سال قرار ڏيندي چيو آهي ته خيبرپختونخواهه ۾ ٻيهر مڪاني چونڊون ڪرائڻ آسان نه آهي پر سموريون پارٽيون ڌانڌلي جو چئي رهيون آهن ته هـُو ٻيهر چونڊون ڪرائڻ لاءِ تيار آهن. اسلام آباد ۾ ميڊيا سان ڳالهائيندي عمران خان چيو ته عام چونڊن دوران هڪ ڪروڙ واڌو بيلٽ پيپر ڇاپيا ويا، چونڊن ۾ ڌانڌلين جا ثبوت ٿيلهن ۾ موجود آهن. هن چيو ته انڪوائري ڪميشن جي ڪارروائي ذريعي سڀ حقيقتون سامهون اچي رهيون آهن، سندس خيال آهي ته پنجاب ۾ مڪاني چونڊن کان اڳ ملڪ ۾ ٻيهر چونڊون ٿينديون. عمران خان چيو ته تحريڪ انصاف جي مقبوليت ۾ واڌ اچي رهي آهي، منڊي بهاءُ الدين جي ننڍي چونڊ دوران پي ٽي آءِ ميمبرز اڳ جي ڀيٽ ۾ وڌيڪ ووٽ مليا آهن. هڪ سوال جي جواب ۾ عمران خان چيو ته گلگت بلتستان ۾ چونڊن کان اڳ ن ليگ اڳ ئي پنهنجا امپائر مقرر ڪري ڇڏيا هئا، هڪ وفاقي وزير کي گلگت جو گورنر مقرر  ڪري چونڊن کان اڳ منظم ڌانڌلي جي تياري ڪئي وئي. تحريڪ انصاف جي سربراهه وڌيڪ چيو ته ن ليگ وارن اڄ تائين ڪو به ڪم شفاف طريقي سان ناهي ڪيو، شريف ڀائر هميشه امپائر گڏ بيهاري پوءِ کيڏندا آهن. ڪي پي ڪي ۾ مڪاني چونڊن بابت سوال جي جواب ۾ عمران خان چيو ته هن ڪڏهن ناهي چيو ته ٻيهر اليڪشن آسان ڪم آهي پر  سڀ پارٽيون چئي رهيون آهن ته مڪاني چونڊن دوران بدنظمي ٿي ۽ ڌانڌلي ڪئي وئي، ان ڪري رِي پولنگ لاءِ تيار آهيون. عمران خان دعويٰ ڪئي ته جيڪڏهن ٻيهر مڪاني چونڊون ٿيون ته تحريڪ انصاف کي پهريان کان وڌيڪ ووٽ ملندا.