تازيون خبرون

Daily Archives: June 9, 2015

پ پ جي نائب صدر شيري رحمان بنا مقابلي سينيٽر چونڊجي وئي

ڪراچي (اسٽاف رپورٽر) پيپلز پارٽي جي نائب صدر شيري رحمان جنرل سيٽ تي بنا مقابلي سينيٽر چونڊجي وئي،سندس چوڻ هو ته هوءَ ايوان ۾ وڃي غريب ماڻهن جو آواز اٿاريندي. سنڌ مان سينيٽر عبداللطيف انصاري جي استعيفيٰ کانپوءِ سينيٽ جي خالي سيٽ تي پ پ اڳواڻ شيري رحمان کانسواءِ ڪنهن ٻئي اميدوار نامزدگي ڪاغذ جمع نه ڪرايا. صوبائي اليڪشن ڪميشن شيري رحمان جو فارم درست قرار ڏنو جنهن بعد هوءَ بنا مقابليسينيٽر چونڊجي وئي. اليڪشن ڪميشن ٻاهران ميڊيا سان ڳالهائيندي شيري رحمان چيو ته هوءَ پ پ قيادت جي ٿورائتي آهي جو کيس ٽيون ڀيرو ايوان ۾ آڻڻ لاءِ سينيٽ جي ٽڪيٽ ڏني آهي. هن چيو ته هوءَ سينيٽ ۾ سنڌ سميت ٻين صوبن جي غريب طبقي جي ماڻهن جو آواز اٿاريندي. پ پ اڳواڻ شيري رحمان وفاقي بجيٽ کي عوام دشمن قرار ڏيندي چيو ته بجيٽ تي بحث ۾ دما دم مست قلندر ٿيندو. هن چيو ته ميٽرو بس هلائڻ وارو منصوبو ٺيڪ آهي پر عوام 18ڪلاڪ جي لوڊشيڊنگ کان تنگ اچي چـُڪو آهي . شيري رحمان چيو ته پنجاب ۾ پيپلز پارٽي کي سرگرم ڪيو ويندو ۽ نئين تنظيم سازي ڪئي ويندي. هن چيو ته دهشتگردي ۽ آمريت هميشه پ پ جو گهيرو تنگ ڪرڻ لاءِ تيار هوندا آهن. شيري رحمان چيو ته گلگت بلتستان ۾ اڳ به پ پ پهرين نمبر تي رهي ۽ هاڻي به کين اميد آهي ته پ پ ئي ڪامياب ٿيندي. نئين چونڊيل سينيٽر شيري رحمان، ڊاڪٽر ذوالفقار مرزا پاران پ پ جي وڪيل سان بداخلاقي جي مذمت ڪندي چيو ته سنڌ هاءِ ڪورٽ واقعي جو پاڻمرادو نوٽيس وٺي.

 

خيبرپختونخواهه ۾ فوج جي نگراني هيٺ ٻيهر مڪاني چونڊون ڪرائڻ لاءِ تيار آهيان: عمران خان

اسلام آباد (بيورو) تحريڪ انصاف جي سربراهه عمران خان چيو آهي ته هـُو خيبرپختونخواهه ۾فوج جي نگراني هيٺ ٻيهر مڪاني چونڊون ڪرائڻ لاءِ تيار آهن، ڪي پي ڪي حڪومت کان استعيفيٰ جو مطالبو ڪندڙن 2013 جي عام چونڊن ۾ نواز شريف کان استعيفيٰ ڇو نه ورتي هئي.؟ اسلام آباد ۾ جڊيشل ڪميشن جي ڪارروائي بعد ميڊيا سان ڳالهائيندي عمران خان چيو ته مڪاني چونڊن ۾ ڌانڌلين واري معاملي تي سڀاڻي آل پارٽيز ڪانفرنس گهرائي وئي آهي. هن چيو ته جيڪڏهن سڀ پارٽيونچون ٿيون مڪاني چونڊن ۾ ڌانڌلي ٿي آهي ته هو ٻيهر فوج جي نگراني هيٺ چونڊ ڪرائڻ ۽ ڪو به تڪ کولڻ لاءِ تيار آهن. عمران خان چيو ته ڪـَي پـِي ڪـَي ۾ مڪاني چونڊن واري معاملي تي استيعفيٰ طلب ڪندڙ منافق پارٽيون آهن، جي يو آءِ، پيپلزپارٽي ۽ مسلم ليگ نون ۾ ڳٺ جوڙ آهي. تحريڪ انصاف جي سربراهه وڌيڪ چيو ته خيبرپختونخواهه حڪومت کان استعيفيٰ گهرندڙ ٻڌائين ته ڇا انهن 2013 واري چونڊن ۾ ڌانڌلي تي نواز شريف کان استعيفيٰ طلب ڪئي هئي. هن چيو ته آصف علي زرداري سميت سڀني تسليم ڪيو هو ته 2013 واري اليڪشن آر آوز جي هئي، جڏهن تحريڪ انصاف احتجاج شروع ڪيو ۽ نواز شريف کان استعيفيٰ جو مطالبو ڪيو ته سڀ وڃي نواز شريف سان گڏ ٿي ويا. هڪ سوال جي جواب ۾ عمران خان چيو ته خيبرپختونخواهه جي پوليس غير سياسي آهي، پنجاب پوليس گلو بٽن تي ٻڌل آهي.

 

عربي سمنڊ ۾ ٺهندڙ هوا جو گهٽ دٻاءُ اشوڀا طوفان ۾ تبديل، ڪراچي سميت ساحلي پٽي کي خطرو، 24 ڪلاڪ انتهائي اهم

ڪراچي (اسٽاف رپورٽر) عربي سمنڊ ۾ ٺهندڙ هوا جو گهٽ دٻاءُ اشوڀا طوفان ۾ تبديل ٿي ويو آهي، امڪاني سامونڊي طوفان جي خطري سبب سنڌ ۽ بلوچستان ۾ سمنڊ اندر اڄ تيز ڇوليون اٿڻ،مينهن وسڻ ۽ تيز هوائن جو امڪان آهي،جڏهن ته موسميات کاتي مهاڻن کي کــُليل سمنڊ ۾ نه وڃڻ جي هدايت ڪئي آهي. موسميات کاتي موجب عربي سمنڊ ۾ ٺهندڙ هوا جو گهٽ دٻاءُ طوفان ۾ تبديل ٿي ويو آهي،جنهن کي اشوڀا جو نالو ڏنو ويو آهي. سامونڊي طوفان اشوڀا هڪ ناٽ في ڪلاڪ جي رفتار سان وڌي رهيو آهي ۽ هن وقت ڪراچي جي اتر کان 750 ڪلوميٽر پري آهي. موسميات کاتي موجب 80 سيڪڙو امڪان آهي ته اشوڀا اومان جي سامونڊي پٽي سان ٽڪرائجندو،جڏهن ته طوفان 20 سيڪڙو بلوچستان جي سامونڊي پٽي سان ٽڪرائجڻ جو امڪان آهي. طوفان سبب ايندڙ 24 ڪلاڪن دوران سنڌ ۽ بلوچستان جي سامونڊي پٽي ۾ وڏيون لهرون اُٿڻ،مينهن پوڻ ۽ تيز هوائن جو امڪان آهي. موسميات کاتي موجب ايندڙ 24 کان 36 ڪلاڪن دوران ڪراچي، حيدرآباد، ميرپورخاص، ٿرپارڪر، ٺٽي، بدين ۽ سجاول ضلعن ۾ مينهن وسي سگهي ٿو،جڏهن ته بلوچستان جي ڏکڻ وارن علائقن ۾ به برسات جو امڪان آهي. موسميات کاتي جو چوڻ آهي ته سنڌ جا مهاڻا اڄ شام کان خميس تائين،جڏهن ته بلوچستان جا مهاڻا سڀاڻي کان جمعي تائين سمنڊ ۾ وڃڻ کان پاسو ڪن. ٻئي طرف سامونڊي طوفان جي خدشي سبب مڪاني ادارن واري صوبائي وزير شرجيل انعام ميمڻ، ايڊمنسٽريٽرکي ڪراچي ۾ لڳل سائن بورڊز هٽائڻ جو حڪم ڏئي ڇڏيو آهي.

 

بالي ووڊ اڪارا آرتي آگريوال دل جو دورو پوڻ سبب وفات ڪري وئي

ممبئي(شوبز نيوز): مشهور اداڪارا آرتي آگريوال دل جو دورو پوڻ سبب وفات ڪري وئي، آرتي آگريوال آمريڪا ۾ ليپوسيڪشن ڪرائڻ لاءِ ويل هئي جنهن کي علاج دوران دل جو دورو پئجي ويو جنهن سبب هو وفات ڪري وئي. ٻن ڏينهن کان پوءِ سندس نئين فلم رام ٽو ريليز ٿيڻي هئي.  آرتي آگريوال 2001 ۾ فلم انڊسٽري ۾ قدم رکيو ۽ ننڍي عمر ۾ فلم انڊسٽري ۾ پنهنجو نالو ڪمايو .

 

بالي ووڊ اداڪار ورن ڌون نئين فلم ”اي بي سي ڊي 2“ ۾ فلمايل نئون گيت پنهنجي امڙ کي ارپي ڇڏيو

ممبئي(شوبز نيوز) بالي ووڊ اداڪار ورن ڌون نئين فلم ”اي بي سي ڊي 2“ ۾ فلمايل نئون گيت پنهنجي امڙ کي ارپي ڇڏيو، ”چنر“ ٻول تي ٻڌل گانو ”اي بي سي ڊي 2“ ۾ فلمايل ٻيو گيت آهي، ورن ڌون پاران ڪيل ٽوئيٽ ۾ هن چيو ته گيت جي عڪسبندي لاءِ سندس ماءَ کيس مهيني جي تربيت ڏني، ان ڪري اهو گيت سندس نالي ڪيان ٿو، هن چيو ته سچن جگر جو ڪمپوز ڪيل گيت دل وٽان آهي ۽ ان جي رليز جو انتظا نه ٿو پُڄي، اداڪار موجب گيت توڙي ان جي عڪسبندي ماڻهن کي ضرور متاثر ڪندي. ياد رهي ته شرڌا، ورن ۽ پرڀو ديوا جي ڪاسٽ تي ٻڌل فلم ”اي بي سي ڊي 2“ اڻويهين جون تي سينمائن جي زينت بڻجي رهي آهي.

 

ڪرينا سان گڏ ڪم ڪرڻ مون لاءِ هڪ تمام وڏو اعزاز آهي:عاليه ڀٽ

ممبئي(شوبز نيوز) بالي ووڊ جي ڀٽ خاندان جي لاڏلي عاليه ڀٽ چيو آهي ته هو ايندڙ فلم ”اڙتا پنجاب“ ۾ ڪرينا سان گڏ ڪم ڪرڻ تي بيحد خوش آهي ۽ پاڻ کي خوشنصيب سمجهي ٿي. عاليه موجب ڪرينا ڪپور خان سندس پسنديده اداڪارا آهي، عاليه چيو ته ڪرينا سان گڏ ڪم هن لاءِ هڪ تمام وڏو اعزاز آهي، 22 سالن جي اداڪارا موجب جڏهن ڪرينا جيڪا عمر جي ته 34 سالن جي آهي، پنهنجا سين شوٽ ڪرائيندي هئي ته مان سندس اداڪاري ڏسي تمام گهڻو سکندي هئس. ياد رهي ته اڙتا پنجاب ۾ شاهد ڪپور سميت ڪرينا ڪپور به اداڪاري جا جوهر ڏيکاريندا ۽ فلم ۾ پنجاب ۾ منشيات جي اسمگلنگ کي موضوع بڻايو ويو آهي

 

جڏهن فلمي دنيا ۾ پير پاتو ته والدين ان فيصلي جي مخالفت ڪئي هئي:پريانيڪا چوپڙا

ممبئي (شوبز نيوز) بالي ووڊ اداڪارا پريانڪا چوپڙا چيو آهي ته جڏهن هن فلمي دنيا ۾ پير پاتو ته سندس والدين سندس ان فيصلي جي مخالفت ڪئي هئي، پريانڪا چيو ته سندس قدامت پسند پنجابي خاندان فلمي دنيا ۾ پير پائڻ تي گهڻو خوش نه هو، انڊسٽريءَ ۾ پنهنجي ادڪاريءَ وسيلي ڪاميابيءُ جون بلندين تائين پهچندڙ ڙ اداڪارا چيو ته 10 سال اڳ هن جڏهن فلمي دنيا ۾ اچڻ پئي چاهيو ته هن خاندان جي مزاحمت کي منهن ڏنو هو، هن چيو ته ڪجهه سالن کان پوءِ والدين مون کي آزادي سان ڪم ڪرڻ جي اجازت ڏني ۽ اختيار ڏنو ته جيڪو وڻي وڃي ڪيان، آئيفا ايوارڊ تقريب ۾ هن چيو ته سندس فلم ”دل ڌڙڪني دو“ ۾ نڀايل ڪردار هندستان جي اڪثريت عورتن جي ترجماني ڪري ٿو، هن چيو ته فلم ۾ جنسي برابري تي ڀرپور نموني ڳالهايو ويو آهي ۽ هو اميد ڪري ٿي ماڻهن کي فلم نه رڳو پسند ايندي پر هو ڪاميابيون به ماڻيندي

 

پاڪستان جي ٽيسٽ ڪرڪيٽ ٽيم سريلنڪا جي دوري تي ڪولمبو رواني ٿي وئي

لاهور(اسپورٽس نيوز) پاڪستان ڪرڪيٽ ٽيم سريلنڪا جي دوري تي ڪولمبو رواني ٿي وئي. مصباح الحق جي قيادت ۾ پاڪستاني ٽيسٽ ٽيم لاهور ايئرپورٽ تان رواني ٿي، زمبابوي جي ڪمزرو ٽيم جي ميزباني کانپوءِ قومي ٽيم کي سريلنڪا جهڙي مضبوط ٽيم جو مقابلو ڪرڻو آهي. 10 ورهين جي ناڪامين جو سلسلو ختم ڪرڻ لاءِ مصباح الحق اليون کي غيرمعمولي ڪارڪردگي ڏيکارڻي پوندي. قومي ڪرڪيٽ ٽيم سريلنڪا جي دوري جي شروعات 11 جو ن تي ڪولمبو ۾ ٽن ڏينهن واري وارم اپ ميچ سان ڪندي، هيڊ ڪوچ وقار يونس جي غير موجودگي سبب پريڪٽس جي کوٽ وارم اپ ميچ ذريعي پوري ڪندي. پاڪستان ۽ سريلنڪا وچ ۾ ٽن ٽيسٽ ميچن واري سيرز جي پهرين ميچ 17 جون کان گال اسٽيڊيم ۾ شروع ٿيندي.

 

سانگهڙ ضلعي جو نالي وارو ملهه پهلوان سو ڀو خان نظاماڻي فوت

سانگهڙ (ن ع آ) سانگهڙ ضلعي جو نالي وارو ملهه پهلوان سو ڀو خان نظاماڻي ڪيتري عرصي کان بيمار هو 95 ورهين جي ڄمار ۾ حيدرآباد جي سرڪاري اسپتال ۾ فوت ٿي ويو. کيس سانگهڙ ويجهو ڳوٺ نظر علي نظاماڻي ۾ مٽي ماءُ حوالي ڪيو ويو. سوڀي خان نظاماڻي شاهه عبدالطيف ڀٽائي جي ميلي بهرم بري جي ميلي، سمن سرڪار جي ميلي، قلندر لال جي ميلن سميت سنڌ جي مڙني درگاهن تي ٿيندڙ ميلن ملهه مقابلا ڪيا. پنهنجي وقت جي پهرين جوڙ جي ملهه جي ڪنهن به سار نه لڌي غربت واري حالت ۾ وفات ڪيائين.

 

پريگ ڪرڪيٽ ڪلب جي ٽيم جا نوَ (9) رانديگر رنس ٺاهڻ بنا آئوٽ ٿي ويا

(اسپورٽس نيوز) چيڪ ڪرڪيٽ يونين پرو 20 ليگ ۾ پريگ ڪرڪيٽ ڪلب جي ٽيم جا نوَ (9) رانديگر بوهيمن ڪرڪيٽ ڪلب خلاف ميچ ۾ ڪا رنس ٺاهڻ کان سواءِ ئي آئوٽ ٿي ويا. پريگ ۽ بوهيمين ڪرڪيٽ ڪلب وچ ۾ ميچ ۾ بوهيمين جي ٽيم پهريان کيڏندي 125 رنسون ٺاهي آئوٽ ٿي وئي، پر هڪ سولو نطر ايندڙ ٽارگيٽ پويان پريگ جي ٽيم تباهيءَ جو شڪار ٿي 54 رنسون ٺاهي پويلين موٽي وئي. پريگ جي ٽيم جا 9 رانديگر ڪا رنس ٺاهڻ کان سواءِ پويلين ڏانهن موٽي ويا ۽ ٽئين نمبر تي ايندڙ ادتيا جيسوال کان سواءِ ڪو به رانديگر ڪارڪردگي ڏيکاري نه سگھيو. ادتيا ناقابل شڪست 43 رنسون ٺاهيون. ان کان سواءِ صرف هڪ رانديگر هڪ رنسن ٺاهي سگھيو، چوٿين نمبر تي انيدر اڀي سمانٿ هو جنهن هڪ رنس ٺاهي. اننگ ۾ 10 ايڪسٽرا رنسون به شامل هيون. ٽيسٽ ڪرڪيٽ جي هڪ اننگ ۾ سڀ کان وڌيڪ ڇهه ڀيرا ڪنهن به اننگ ۾ ڇهه رانديگر ٻُڙيءَ تي آئوٽ ٿيا ۽ ان خراب رڪارڊ ۾ پاڪستان، ڀارت، بنگلاديش ۽ ڏکڻ آفريڪا حصيدار آهن. ون ڊي ڪرڪيٽ ۾ پنجن موقعن تي ڪنهن به ٽيم جا ڇهه رانديگر ٻُڙيءَ تي آئوٽ ٿيا آهن ۽ حيران ڪندڙ ڳالهه اها ته ان خراب ترين رڪارڊ ۾ پاڪستان ٽيم ٽِن موقعن تي ان مامري جو شڪار ٿيڻ کان پوءِ پهرين نمبر تي آهي. گذريل سال چيشائر ليگ ٿرڊ ڊويزن جي ميچ ۾ ويرل ڪرڪيٽ ڪلب هيسلنگٽن خلاف صرف ٽي رنسون ٺاهي آئوٽ ٿي ويو هو. ان ميچ ۾ ويرل جا 10 رانديگر ٻُڙيءَ تي آئوٽ ٿيا جڏهن ته يارهين نمبر واري بيٽسمين ڪونر هڊسن هڪ رنس ٺاهي سڀني کان ڪامياب بيٽسمين رهيو جڏهن ته سڀ کان وڌيڪ ٻه رنسون ايڪسٽراز جون هيون