تازيون خبرون

Daily Archives: June 8, 2015

دهشتگرديءَ خلاف جنگ کي منطقي انجام تائين پهچائينداسين: آرمي چيف

ڪولمبو(مانيٽرنگ ڊيسڪ) پاڪ فوج جي سربراهه جنرل راحيل شريف چيو آهي ته هڪ قوم جي حيثيت سان دهشتگردي کي ضرور پاڙان پٽيو ويندو. پاڪ فوج جي عام لاڳاپن واري شعبي (آئي ايس پي آر) مطابق جنرل راحيل شريف پنهنجي سري لنڪا جي ٽن ڏينهن واري دوري دوران هاڪاري ملاقاتون ڪيون، آرمي چيف جي دوري سان پاڪ-سري لنڪا فوجي لاڳاپا به مضبوط ٿيا آهن. ان موقعي تي جنرل راحيل شريف جو چوڻ هو ته قوم جي راضپي سان ضرب عضب آپريشن ڪاميابي سان هلي رهيو آهي، جنهن جو مقصد پاڪستان ۾ امن ۽ سلامتي آڻڻ آهي. جنرل راحيل شريف ڪوئيٽا ملٽري اڪيڊمي مان سکيا وٺندڙ سريلنڪن فوجي آفيسرن کي به خطاب ڪيو، آرمي چيف جو چوڻ هو ته دهشتگردي خلاف جنگ ۾ سريلنڪن فوج جون قربانيون ۽ عزم ساراهه جوڳو آهي.

 

30 جون تي ملير پل جي افتتاح جو اعلان، مهراڻ انڊر پاس عوام کي عيد جو تحفو هوندو: شرجيل ميمڻ

ڪراچي ( اسٽاف رپورٽر)سنڌ جي اطلاعات ۽ بلديات واري صوبائي وزير شرجيل انعام ميمڻ چيو آهي ته ڪراچي ۾ پيپلز پارٽي جي سنڌ حڪومت جيڪي ترقياتي ڪم ڪري رهي آهي انهن جوماضي ۾ مثال نه ٿو ملي.ايندڙ مالي سال جي بجيٽ ۾ڪراچي سميت سڄي صوبي ۾ وڌيڪ ميگا پراجيڪٽن لاءِ رقم رکي ويئي آهي.مهراڻ انڊرپاس ۽ ڄام صادق پل تي 24 ڪلاڪ تيزي سان ڪم هلندڙ آهي ۽ ملير هالٽ ۽ ملير 15 جي اوور هيڊ پل به پنهنجي مقرر وقت تي مڪمل ڪيا ويندا.جڏهن ته سينيئر وزير خزانه سيد مراد علي شاهه چيوآهي ته ايندڙ مالي سال ۾ ريڪارڊ ترقياتي ڪمن لاءِ بجيٽ مختص ڪئي ويندي ۽ انشاءَالله 13 جون تي سنڌ جي بجيٽ عوام دوست بجيٽ هوندي.اهڙن خيالن جو اظهار هن آچر ڏينهن ڪراچي ۾ هلندڙ مختلف ترقياتي منصوبن جي دوري دوران ميڊيا سان ڳالهائيندي ڪيو.ان موقعي تي ايڊمنسٽريٽر ڪراچي ثاقب سومرو،ڊي جي نياز سومرو، ايڊمنسٽريٽر سائوٿ محمد فاروق لانگو ۽ ٻيا ان سان گڏ هئا.صوبائي وزير شرجيل انعام ميمڻ دوري دوران هلندڙ ترقياتي منصوبن سان گڏوگڏ سڄي شهر ۾ هلندڙ رودن جي مرمت، صفوران ڳوٺ ۾ 5ڪلو ميٽري نئين سر روڊ جي تعمير، طارق روڊ سميت شهر جي منختلف رودن جي مرمت ۽ سڄي شهر ۾ لڳايل اسٽريٽ لائيٽن جو معائنو ڪيو.صوبائي وزير پنهنجي دوري جي شروعات شاراع فيصل تي ٺهندڙ مهراڻ انڊر پاس جي دوري سان ڪئي.ان موقعي تي پراجيڪٽ ڊائريڪٽر ، صوبائي وزيرن کي هلندڙ ڪم جي تفصيل سان آگاهي ڏني، ان بعد ميڊيا سان ڳالهائيندي شرجيل انعام ميمڻ چيو ته انهن منصوبن جو  2 مهينا ۽ 18 ڏينهن اڳ هن پاڻ سنگ بنياد رکيو ۽ ان وقت اهو واعدو ڪيو ويو ته اهي منصوبا چئن مهينن ۾ مڪمل ڪيا ويندا.هن چيو ته هاڻي انهن منصوبن تي 70 سيڪڙو ڪم ٿي چڪو آهي ۽ انشاءَالله اسان ڪراچي جي عوام کي هن رمضان واري عيد تي مهراڻ انڊر پاس کي مڪمل ڪري تحفو ڏيندا سين.هن چيو ته اهي منصوبا 54 ڪروڙ روپين جي لاڳت سان مڪمل ٿيندا جنهن ۾ صرف هتان مختلف يوٽيليز کي شفٽ ڪرڻ تي 14 ڪروڙ روپيا خرچ ٿيندا.هن چيو ته هن منصوبي جي سڀ کان وڏي خاصيت اها آهي ته مين شاراع فيصل تي ڪم دوران هڪ ڏينهن لاءِ به شاراع فيصل جي ٽريفڪ کي بند ناهي ڪيو ويو.هن چيو ته پاڪستان پيپلز پارٽي جي موجوده سنڌ حڪومت هن شهر لاءِ جيڪي ترقياتي منصوبا شروع ڪيا آهن۽ جيڪي منصوبا مڪمل ٿي رهيا آهن ، انهن جي ماضي ۾ مثال نه ٿي ملي.شرجيل ميمڻ چيو ته ايندڙ مالي سال جي بجيٽ ۾به  ڪراچي لاءِ پاڻي جي ميگا منصوبن، ٽرانسپورٽ ۽ سالڊ ويسٽ مئنيجمينٽ لاءِ هڪ جهجهي رقم رکي ويئي آهي.ان بعد صوبائي وزيرن طارق روڊ، بهادر آباد، گلشن اقبال سميت شهر جي مختلف علائقن جو دورو ڪيو، بعد ۾ صفوران چورنگي تي الاظهر گارڊن جي ويجهو هلندڙ 5 ڪلو ميٽر طويل روڊ جي تعميراتي ڪم بابت انجنيئرن کان تفصيل ورتي.ان موقعي تي اتان جي علائقي جي ماڻهن انجنيئرن جي ڪم جي رفتار ۽ معيار تي مڪمل اعتماد جو اظهار ڪيو.ان بعد صوبائي وزيرن ملير هالٽ تي ٺهندڙ پل جو دورو ڪيو.اتي موجود پراجيڪٽ ڊائريڪٽرن کان مڪمل تفصيل طلب ڪئي.صوبائي وزيرن کي ٻڌايو ويو ته پل تي 80 سيڪڙو کان وڌيڪ ڪم مڪمل ڪيو ويو آهي ۽ اها پل جون جي آخري هفتي ۾ ٽريفڪ لاءِ کولي ويندي.جڏهن ملير 15 تي پل جو 70 سيڪڙو کان وڌيڪ ڪم مڪمل ڪيوويو آهي ۽ اها پل جولاءِ جي آخري هفتي ۾ مڪمل ڪئي ويندي.ان بعد صوبائي وزيرن ڪورنگي انڊسٽريل ايريا ۾ ڄام صادق پل تي هلندڙ تعميراتي ڪم جوجائزو ورتو.ان موقعي تي اتي موجود پراجيڪٽ ڊائريڪٽرن ٻڌايو ته پل جي مرمتي ڪم دوران ڪيتريون ئي ٽيسٽيون ڪرايون ويون آهن ۽ مڪمل خيال رکيو ويو آهي ته هي پل آئنده  ڪيترن ئي سالن تائين انڊسٽريل ايريا جي هيوي ٽريفڪ لاءِ ڪارآمد آهي.هن چيو ته  هن ڪم جي شروعات 17 مارچ 2015 کان ڪئي ويئي هئي ۽ ان کي 31 آگسٽ 2015 تائين مڪمل ڪرڻ جي تاريخ ڏني ويئي آهي ،جڏهن ته  ڪم دوران ڪيترن ئي جاين تي ڪم ۾ اضافي باعث هتي ڏينهن رات ڪم ڪيو پيو وڃي ۽ ڪوشش ڪئي پئي وڃي ته ان کي مقرر وقت تي مڪمل ڪيو وڃي.ان بعد شرجيل انعام ميمڻ ميڊيا سان ڳالهائيندي چيو ته سڀئي هلندڙ ترقياتي منصوبن تي هن سان گڏ سينيئر وزير خزانه سيد مراد ڳلي شاهه به موجود هو، هن چيو ته ڇوته انهن سڀني منصوبن جا فنڊ محڪمه خزانو رليز ڪندو آهي ۽ اڄ خود مراد علي شاهه ان سلسلي ۾ سڀني ترقياتي ڪمن جو جائزو ورتو ۽ انهن تي اطمينان جو اظهار ڪيو. هن چيو ته اسان جو ڪراچي جي عوام سان اهو واعدو آهي ته سڀئي وسيلا استعمال ڪندي هن شهر جي عوام جي معيار زندگي کي بهتر کان بهتر بنائڻ لاءِ قدم کڻندا سين ۽ اڄ الحمدالله اسانجي ڪراچي ۾ هلندڙچئني ميگا پراجيڪٽن تي ڏينهن رات ڪم هلندڙ آهي ۽ اهي سڀئي منصوبا پنهنجي مقرر ڪيل وقت تي مڪمل ٿيندا. هن چيو ته ايندڙ مالي سال جي بجيٽ ۾ ڪراچي جي ميگا منصوبن ڪي فور، 100 ، ۽ 65 ايم جي ڊي جي ٻين منصوبن لاءِ جهجهي رقم رکي ويئي آهي ۽ هوڏي ڪراچي کان ٺٽه ڊيول ڪريوج روڊ جي تعمير ۽ اندرون سنڌ ۾ پاڻي ، بجلي ۽ ٻين منصوبن لاءِ جهجهي رقم رکي ويئي آهي.ان موقعي تي سينيئر وزير خزانه سيد مراد علي شاهه چيو ته ڪراچي ۾  جيڪي منصوبا زير تعمير آهن انهن کان علاوه ايندڙ مالي سال لاءِ ڪراچي سميت سڄي سنڌ ۾ نوان ميگا پراجيڪٽ ٺاهيا پيا وڃن ۽ ايندڙ مالي سال ۾ صوبي ۾ جيڪي ترقياتي ڪم ٿيندا اهي هن صوبي جي تاريخ ۾ ڪڏهن به نه ڪيا ويا هوندا.هن چيو ته هلندڙ مالي سال ۾ ترقياتي منصوبن تي 185 ارب رپيا رکيا ويا هئا پر وفاق کان حصو نه ملڻ ڪري ان کي 168 ارب ڪيا ويا۽ ايندڙ مالي سال جي بجيٽ ۾ جيڪي به ترقياتي ڪمن لاءِ رقم رکي ويندي اها هڪ ريڪارڊ ترقياتي ڪم ڪرائيندي. هڪ سوال جي جواب ۾ هن چيو ته صوبي جي بجيٽ انشاءَالله هو 13 جون ڇنڇر ڏينهن پيش ڪندا  ۽ ان سلسلي ۾ سڀئي تياريون مڪمل ڪيون ويون آهن ۽ بجيٽ پرنٽنگ جي مرحلي ۾ آهي. ايم ڪيو ايم طرفان پيش ڪيل شيڊو بجيٽ تي هن چيو ته اڃا تائين هن کي ان سلسلي ۾ ڪا به ڪاپي ناهي ملي ۽ ميڊيا جي توسط کا ڪجهه خبرون مليون آهن پر هاڻي وقت گذري چڪو آهي ڇو ته بجيٽ پيش ڪرڻ کان هڪ هفتو اڳ ڇپائي لاءِ موڪلي ويندي آهي.هلندڙ مالي سال ۾ ڪجهه اسڪيمن کي ختم ڪرڻ جي سوال جي جواب ۾ سينيئر وزير سيد مراد علي شاهه چيو ته اسان ڪا به اسڪيم ختم ناهي ڪئي پر وفاق طرفان جيڪا رقم ايلوڪيشن ٿيڻي هئي يا اهي اسڪيمون جن تي قائدن موجب ڪم نه ڪيو ويو اهي التواءَ جو شڪار ٿيون. هڪ سوال جي جواب ۾ هن چيو ايندڙ مالي سال جي بجيٽ ۾ ٽرانسپورٽ لاءِ سنڌ حڪومت بلو، اورينج، ييلو، ۽ ريڊ لائينيون بسن جي اسڪيم متعارف ڪرائي رهي آهي ۽ اسان جو عزم آهي ته ڪراچي جي شهرين جي ٽرانسپورٽ جي مسئلي کي ايندڙ هڪ کان ڏيڍ سال تائين حل ڪيو وڃي.ان کان علاوه سولڊ ويسٽ مئنيجمينٽ ذريعي صفائي سٿرائي جي اسڪيم به سيپٽمبر ۾ شروع ڪئي ويندي.ان موقعي تي شرجيل انعام ميمڻ سڀني منصوبن تي هلندڙ ڪم جي رفتار کي وڌيڪ تيز ڪرڻ جي آفيسرن کي  هدايت ڏني.

 

گلگت ۾ ڪڻڪ تان سبسڊي ختم ڪرڻ وارو فيصلو واپس ورتو وڃي: آصف زرداري

اسلام آباد(بيورو) اڳوڻي صدر آصف علي زرداري چيو آهي ته وفاقي حڪومت پاران ڪڻڪ تي گلگت بلتستان لاءِ سبسڊي واپس وٺڻ وريون خبرون ڳڻتي جوڳيون آهن، ان ڪري وفاقي سڌ سماءَ واري وزير پرويز رشيد اهڙين سمورين خبرن جي ترديد رد ڪري ڇڏي آهي.آصف علي زرداري گلگت بلتستان لاءِ ڪڻڪ جي سبسڊي ختم ڪرڻ واري فيصلي کي تضاد تي ٻڌل قرار ڏيندي چيو ته وفاقي حڪومت جو اهو قدم غيرب ماڻهو جي پريشانين ۾ واڌاري جو ڪارڻ بڻجندو.آصف علي زرداري وفاقي حڪومت کي ان قدم کي ترت واپس وٺڻ جو مطالبو ڪيو آهي. ٻئي پاسي وفاقي سڌ سماءَ واري وزير پاران جاري ٿيندڙ بيان ۾ اهڙين سمورين خبرن جي ترديد ڪئي وئي آهي. بيان ۾ چيو ويو آهي ته اهڙيون سموريون افواهون چونڊن ۾ ووٽ وٺڻ لاءِ ڦهلايون پيون وڃن.

 

ڪوئيٽا ۾ هٿياربندن جي فائرنگ ۾ هزاره برادري جا 5 ڄڻا مارجي ويا، ڪترائي زخمي

ڪوئيٽا(بيورو) ڪوئيٽا کي دهشتگردن هڪ ڀيرو وري نشانو بڻايو آهي ۽ دڪان تي فائرنگ جي نتيجي ۾ هزارا شيعا برداري جا 5 ڄڻا مارجي ويا آهن، رپورٽ موجب موٽرسائيڪل تي سوار دهشتگردن ڪوئيٽا جي ميزان چوڪ ۽ سرڪلر روڊ تي قائم دڪانن تي انڌاڌنڌ فائرنگ شروع ڪري ڏني، جنهن جي نتيجي ۾ 5 ماڻهو ٿڏي تي ئي مارجي ويا ۽ ڪيترائي زخمي ٿي پيا. اکين ڏٺن شاهدن مطابق مارجي ويلن ۾ پيءُ پٽ به شامل آهن. واقعي کانپوءِ سيڪيورٽي فورسز علائقي ۾ پهچي ڪڙو چاڙهي ڇڏيو، جنهنن کانپوءِ مارجي ويلن جا لاش ۽ زخمين کي اسپتال منتقل ڪيو ويو، دهشتگردي جي واقعي خلاف متاثر علائقن جي دڪاندارن ۽ واپارين احتجاج طور دڪان ۽ بازارون بند ڪري ڇڏيون، پوليس سڄي شهر جي ناڪابندي ڪري دهشتگردن جي ڳولا شروع ڪري ڇڏي آهي، ٻئي پاسي بلوچستان جي وڏي وزير عبدالمالڪ بلوچ واقعي جي سخت لفظن ۾ مذمت ڪندي رپورٽ طلب ڪري ورتي آهي.

 

گلگت بلتستان جي عوام کان ماني جو ڳڀو کسڻ نه ڏينداسين: خورشيد شاهه

اسلام آباد (بيورو) قومي اسيمبلي ۾ مخالف ڌر اڳواڻ سيد خورشيد شاهه چيو آهي ته گلگت بلستان جي عوام کان ماني جو ڳڀو کسڻ نه ڏينداسين، حڪومت پاران گلگت بلتستان لاءِ ڪڻڪ تي سبسڊي ختم ڪرڻ جي مذمت ڪريون ٿا. پنهنجي بيان ۾ خورشيد شاهه چيو ته ايندڙ مالي سال جي بجيٽ ۾ حڪومت گلگت بلستان جي ڪڻڪ تي سبسڊي ختم ڪري ڇڏي آهي، سبسڊي ختم ڪرڻ تي حڪومتي قدم جي اسان سخت مذمت ڪريون ٿا، مخالف ڌر اڳواڻ ڪڻڪ تي سبسڊي فوري طورتي بحال ڪندي مطالبو ڪندي چيو ته گلگت بلتستان لاءِ شهيد ذوالفقار علي ڀٽو جي ڏنل سهولت ختم ٿيڻ نه ڏينداسين. ٻئي پاسي سڌ سماءَ جي وفاقي وزير پرويز رشيد پاران جاري ڪيل بيان ۾ اهڙن افواهن جي ترديد ڪئي وئي آهي، بيان ۾ چيو ويو آهي ته اهڙا افواهه چونڊن ۾ ووٽ حاصل ڪرڻ لاءِ ڦهلايا پيا وڃن.

 

پنڊي پوليس هٿان ٻن ڀائرن جي قتل جي مذمت، پنجاب ۾ ادارن جي تباهي جي ذميوار نواز ليگ آهي : عمران خان

اسلام آباد (بيورو) تحريڪ انصاف جي سربراهه عمران خان راولپنڊي ۾ پوليس هٿان ٻن ڀائرن جيقتل واري واقعي جي سخت مذمت ڪندي چيو آهي ته پنجاب ۾ ادارن جي تباهي جي ذميوار مسملم ليگ ( ن ) آهي. پنهنجي هڪ بيان ۾پنڊي سانحي تي ردعمل ۾ عمران خان چيو ته پنجاب پوليس طرفان اهڙا تشدد وارا واقعا ڳڻتي جوڳا آهن، سندس چوڻ هو ته ڊسڪا واقعي کانپوءِ راولپنڊي ۾ پوليس طرفان شهرين تي گوليون وسائڻ ڪنهن  به ريت قبول ناهي. عمران خان چيو ته صوبي ۾ ان قسم جا واقعا وڳوڙ پکيڙڻ جو ڪارڻ بڻجي رهيا آهن، قانون جا بکيا اڊيڙيندڙ اهلڪارن خلاف سخت قانوني ڪارروائي ڪئي وڃي. تحريڪ انصاف جي سربراهه مارجي ويل ڀائرن جي وارثن سان ڏک ۽ همدردي جو اظهار پڻ ڪيو.

 

خيبرپختونخواهه جو عوام شٽر ڊائون هڙتالن ۽ ڌرڻن جي سٽ نٿو سهي سگهي: سراج الحق

پشاور (بيورو) امير جماعت اسلامي سينيٽر سراج الحق مطالبو ڪيو آهي ته 30 مئي تي ڪي پي ڪي ۾ مڪاني چونڊن ۾ جن تڪن ۾ چونڊ ڌانڌلي جون ٺُوس شڪايتون موجود آهن اليڪشن ڪميشن انهن جو ازالو ڪري، ڪجهه تڪن ۾ چونڊ ڌانڌلين جي شڪايتن تي سڄي اليڪشن ڪالعدم قرار نه ڏيڻ گهرجي، ڪي پي ڪي جو عوام شٽرڊائون هڙتالن ۽ ڌرڻن جي سٽ نٿو سگهي سگهي، صوبي ۾ سياسي عدم استحڪام پيدا ٿيڻ نه ڏينداسين، اهڙن خيالن جو اظهار هن پنهنجي رهائشگاهه تي اجلاس کي خطاب ڪندي ڪيو، اجلاس ۾ جماعت اسلامي جو صوبائي امير پروفيسر محمد ابراهيم خان، بحر الله خان ۽ ٻيا اڳواڻ موجود هئا، سراج الحق وڌيڪ چيو ته اليڪشن ڪميشن کي چونڊ عمل کي صاف ۽ شفاف بڻائڻ لاءِ ڪو موثر نظام جوڙڻ گهرجي، ڇو ته ائين لڳي ٿو ته اسان ماضي جي چونڊ تجربن مان ڪجهه ناهي سگهيو، جيستائين عوام جو چونڊ عمل تي اعتماد بحال نه ٿيندو تيستائين جمهوريت مستحڪم نٿي ٿي سگهي، اهڙن حالتن ۾ شٽر ڊائون ۽ ڦيٿا روڪ جهڙيون احتجاجي تحريڪون عوام جي مفاد ۾ نه آهن.

 

ڪراچي ۾ موٽرسائيڪل سوارن لاءِ اڄ کان هيلمٽ پائڻ لازمي قرار

ڪراچي(اسٽاف رپورٽر) ڪراچي ۾ اڄ کان موٽرسائيڪل سوارن لاءِ هيلمٽ پائڻ لازمي هوندو، ڀڃڪڙي ڪندڙ تي ڏيڍ سئو رپيا ڏنڊ لڳندو،  ٽريفڪ پوليس موٽرسائيڪل سوارن لاءِ هيلمٽ پائڻ لازمي قرار ڏني آهي، جنهن تي اڄ سومر کان عمل ٿيندو، ڊي آءِ جي ٽريفڪ امير شيخ جو چوڻ آهي ته هيلمٽ جو استعمال لازمي قرار ڏيڻ وارو فيصلو عوام جي تحفظ لاءِ ڪيو ويو آهي، عورتون به موٽرسائيڪل تي سواري دوران هيلمٽ پائڻ جون پابند هونديون، ٽريفڪ پوليس پهرين جون کان هيلمٽ پائڻ لازمي قرار ڏنو هو، جنهن ۾ 8 جون تائين واڌ ڪئي وئي هئي، جيڪا اڄ ختم ٿي رهي آهي.

جي ايف 17 ٿنڊر پيرس ايئر شو ۾ شامل ٿيڻ لاءِ روانو

اسلام آباد(بيورو) پاڪستان جو جي ايف 17 ٿنڊر جهازن ، هوائي فوج جي پائليٽن ۽ ٽيڪنيڪي سهڪارين تي ٻڌل ٽولو پيرس ايئر شو ۾ شامل ٿيڻ لاءِ روانو ٿي ويو،هوائي فوج جي ترجمان ايئر ڪمانڊر ايس ايم علي مطابق فرانس جي ايئروسپيس انڊسٽري ايسوسئيشن پاران رٿيل91 ايئر شو جي شروعات 15 جون کان پيرس ۾ ٿيندي ۽ اها 21 جون تائين هلندي. ترجمان مطابق پاڪستان جو هڪ جي ايف 17 ٿنڊر جهاز مظاهري ۾ شامل ٿيندو، جڏهن ته ٻيا ٻه نماءُ لاءِ رکيا ويندا. پاڪستان ۽ چين جي گڏيل ڪوششن سان تيار ڪيل جي ايف 17 ٿنڊر جهاز ان کان اڳ به برطانيا، چين، ترڪي ۽ دبئي سوڌو پوري دنيا ۾ ڪيترن ئي ايئر شوز ۾ پنهنجون صلاحيتون ڏيکاري چڪا آهن. جي ايف 17ٿنڊر هڪ ملٽي رول جهاز آهي جنهن کي چين جي ايوي ايشن انڊسٽري جي سهڪار سان هوائي فوج جون گهرجون پوريون ڪرڻ لاءِ تيار ڪيو ويو آهي.

 

مراد علي شاهه عوام جي مفادن ۽ مسئلن کي نظر ۾ رکندي ئي بجيٽ تيار ڪري رهيو آهي: آغا سراج دراني

حيدرآباد ( بيورو) سنڌ اسيمبلي جي اسپيڪر  آغا سراج دراني  چيو آهي ته  اسيمبلي جي  چار ميمبرن  خلاف  ريفرنس تيار  ڪيو ويو آهي  جن  اسيمبلي جي   تقدس کي  پائمال ڪيو  تنهن هوندي  به کين  هدايت  ڪئي وئي  ته اهي  پنهنجي  رويي  تي  معافي  گهرن  جنهن تي انهن  معافي  گهرڻ کان  انڪار  ڪيو  ان لاءِ سندن  خلاف  ڪاروائي جو اثرائتو جواز آهي  ۽ ڪنهن  کي به اسيمبلي جي  تقدس  کي پائمال  ڪرڻ جي اجازت نه ڏني ويندي.  اهڙو اظهار هن  گذريل  رات  حيدرآباد  جي مقامي  هوٽل ۾  سنڌ جي اڳوڻي  ٽيڪنوڪريٽ، تعليمدان  ۽ اديب  آغا شهاب الدين جي چوٿين  ورسي  ۽ ڪتاب عدالت  عداوت جي  پڌرائي  واري  تقريب  ۾ ميڊيا سان ڳالهائيندي ڪيو  هن چيو  ته  اسپيڪر جي  حيثيت  سان سندس  اها ڪوشش  هوندي آهي  ته  مخالف ڌر  توڙي  حڪومتي  ميمبرن  وچ ۾ امن واري  فضا قائم هجي ،  ڪو  به تڪرار  نه ٿئي ۽  هر  مسئلي  کي برداشت ، صبر ۽ تحمل سان  گڏجي حل ڪيو  وڃي  پڇيل  هڪ سوال تي  هن چيو ته  سنڌ جي  بجيٽ  تيار ڪندڙ  صوبائي  وزير خزانه سيد مراد علي شاهه  سنڌ جي  بهترين  صوبائي وزيرن منجهان  آهي  ۽ اهو  عوام جي  مفادن  ۽ مسئلن کي  نظر ۾ رکندي ئي  بجيٽ  تيار ڪري  رهيو آهي   هڪ سوال  تي هن  چيو ته  بلدياتي  چونڊون عدالت جي حڪم موجب  هن سال   سيپٽمبر   ۾ ئي  ٿينديون  پڇيل هڪ سوال تي هن چيو ته  هر  سياسي  جماعت کي  اهو آئيني  حق حاصل آهي ته  هو  ڪنهن  به مسئلي جي  حل لاءِ  پرامن  احتجاج ڪري    جڏهن  ته  صوبائي حڪومت  صوبي جي ترقي   وارن  ڪمن ۾  مصروف عمل آهي  ان کان  اڳ تقريب  کي  خاص مهمان طور خطاب ڪندي  اسپيڪر سنڌ اسيمبلي آغا سراج دراني چيو ته  آغاشهاب الدين  نه صرف هڪ بهترين  انسان  هو پر هو  هڪ بهترين  سرپرست ۽ رهنماءَ پڻ هو  هن ٻڌايو  ته سندس بلدياتي  وزارت واري اڳوڻي دور ۾  آغا شهاب  الدين  کاتي  جي ترقي لاءِ   جيڪي  مشورا  ڏنا  اهي  بيمثال هئا  جن تي  عمل ڪندي اسان کاتي جي  بهتري لاءِ  ڪم ڪيو  هن وڌيڪ ٻڌايو  بلديات کاتي جي ٽي ايم اوز  جي ٽريننگ  لاءِ قائم  ڪيل اسڪول پڻ  آغاشهاب الدين جي ڪوششن جو نتيجو آهي اسپيڪر سنڌ اسيمبلي وڌيڪ  چيو ته آغا شهاب الدين  ٽيڪنوڪريٽ هئڻ سان  گڏ و گڏ  تعليمدان  پڻ هو  جنهن  هميشه سنڌ جي نوجوانن جي  تعليم لاءِ  جاکوڙ ڪئي  اهو ئي سبب آهي  جو اڄ  آغا خاندان  جا حيدرآباد  ۾ 4  هائي اسڪو 2 مڊل اسڪول ، هڪ آئي ٽي سينٽر  ۽ هڪ ڪاليج  فعال  آهن  جتي  معياري  تعليم  جي فراهمي جو  سلسلو  جاري آهي اسپيڪر سنڌ اسيمبلي آغا سراج دراني  آغا شهاب الدين جي ڪتاب جي  عدالت عداوت جي حوالي سان  چيو اهو ڪتاب ايندڙ  نسل  لاءِ  انتهائي  ڪارآمد  ثابت  ٿيندو  ان  موقعي  تقريب  کي  مظهر الحق صديقي، حميد سنڌي ، جهمٽ مل ، قاضي خادم ، اياز لطيف پليجو ، سيدجلال محمود  شاهه ،  قاضي جاويد ، نصير مرزا،  ڊاڪٽر آغا تاج محمد ، ذوالفقار  هاليپوٽو  ۽ ٻين  پڻ خطاب ڪيو  جڏهن  ته   نورالنساءَ ابڙو ، شاهده پروين ابڙو ، يوسف لغاري،  پروفيسر  نظير قاسمي ، اسد ابڙو ، شاهد پنهور ۽ ٻِيا پڻ ان موقعي تي موجود هئا