تازيون خبرون

Daily Archives: June 6, 2015

43 کرب 13 ارب جي وفاقي بجيٽ پيش، دفاع لاءِ 780 ارب رپيا مختص

‏اسلام آباد (بيورو) نواز سرڪار پهرين جولائي کان شروع ٿيندڙ نئين مالي سال 2015-16 جي لاءِ 43 کرب 13 ارب رپين جي وفاقي بجيٽ پيش ڪري ڇڏي آهي. خزاني جي وفاقي وزير اسحاق ڊار نئين مالي سال جي بجيٽ پيش ڪئي. قومي اسيمبلي جي اسپيڪر سردار اياز صادق اجلاس جي صدارت ڪئي. اسحاق ڊار سرڪاري ملازمن جي پگهارن ۽ پينشن ۾ ساڍا 7 سيڪڙو واڌ جو اعلان ڪيو. هن چيو ته پگهارن ۽ الائونس جي مد ۾ 183ڏهائي 95ارب مختص ڪيا ويا. اسحاق ڊار چيو ته گذريل سال جي مالي کوٽ 5ڏهائي 5تائين محدود ڪئي وئي. وزيراعظم جي قدمن سبب معاشي پاليسيون مضبوط ٿيون. مهانگائي جي شرح 11سالن جي سڀ کان گهٽ سطح تي آئي آهي. هلندڙ سال ترقي جي شرح 7سالن ۾ سڀ کان وڌيڪ آهي. عام واهپي وارين شين جي اگهن ۾ گهٽتائي ٿي آهي. هن چيو ته 20 ارب 83ڪروڙ ڊالرز جون شيون امپورٽ ڪيون ويون.هن چيو ته مشينري جي درآمد تي 10 ڏهائي 3سيڪڙو اضافو ٿيو. ناڻي وارا ذخيرا 17ارب ڊالرز تائين پهچي ويا آهن. ناڻي وارن ذخيرن کي 19 ارب ڊالرز تائين پهچائڻ جو هدف مقرر ڪيو . هن چيو ته ڄامشوري ۾ ڪوئلي مان بجلي پيداوار جي پلاٽن لاءِ 20ارب رپيارکيا ويا. اسحاق ڊار چيو ته ڊسمبر 2017 تائين بجلي جي لوڊشيڊنگ ختم ڪئي ويندي. پگهارن ۽ الائونس جي مد ۾ 183.95 ارب رپيا مختص ڪيا ويا. هن چيو ته پورهيتن جي گهٽ ۾ گهٽ پگهار 12هزار مان وڌائي 13هزار ڪئي وئي. پاڻي جي بجلي منصوبن لاءِ 30 ارب 12 ڪروڙ رپيا رکيا ويا. هن چيو ته واپڊا لاءِ 112ارب 29ڪروڙ رپيا رکيا ويا آهن. هن چيو ته ڪميونٽي پروگرام لاءِ 20 ارب رپيا رکيا ويا آهن. وزيراعظم يوٿ پروگرام لاءِ 20 ارب رپيا رکيا ويا آهن. نيلم جهلم پاور پراجيڪٽ لاءِ 11ارب رپيا رکيا ويا آهن. هن چيو ته بجلي جي 7هزار ميگا واٽ منصوبن تي ڪم هلندڙ آهي. مجموعي گهرو پئداوار جي رفتار 13سيڪڙو تائين آڻڻ جو هدف رکيو آهي . جڏهن ته 128تعلقن کي فائيبر آپٽڪس سان ڳنڍيو پيو وڃي. گاڏين جي ٽرانسفر ۽ ٽوڪن ٽيڪس تي وٿ هولڊنگ ٽيڪس ۾ گهٽتائي ڪئي وئي آهي. هن چيو ته صحت لاءِ 11ڏهائي هڪ ارب رپيا رکيا ويا آهن . هن چيو ته بچاءَ لاءِ 781.2ارب رپيا رکيا ويا آهن. تعليم لاءِ. 75.58 ارب رپيا رکيا ويا آهن. هن چيو ته وفاق جو ساليانو ترقياتي پروگرام 7سئو ارب رپين تي ٻڌل هوندو. اعليٰ تعليم لاءِ 71ڏهائي 5ارب رپيا رکيا ويا آهن. زرعي ترقي جو هدف 3ڏهائي 9سيڪڙو مقرر ڪيو آهي. هن چيو ته گهٽ آمدني وارن کي 2سيڪڙو ٽيڪس رعايت ڏني وئي آهي. هن چيو ته سنڌ صوبي لاءِ 482ڏهائي 8سئو هڪ ارب رپيا رکيا ويا آهن يوٿ لون اسڪيم تي وياج جي شرح 8مان گهٽائي 6سيڪڙو مقرر ڪئي وئي آهي. جڏهن ته ريلوي جي ترقي لاءِ 170انجڻيون خريد ڪيون وينديون. هن چيو ته ديامر ڀاشا ڊيم جي زمين خريد ڪرڻ لاءِ 15ارب رپيا رکيا ويا. پاڪستان انرجي ڪميشن لاءِ 30ارب 40 ڪروڙ رکيا ويا. دفاع واري بجيٽ ۾ 11سيڪڙو واڌ کانپوءِ 780ارب رپيا رکيا ويا آهن جڏهن ته 12ارب رپين جي لاڳت سان يونيورسل اي ٽيلي سينٽر کوليا ويندا. هن ڪي اي ايس کي 20ارب رپيا سبسڊي ڏيڻ جو اعلان ڪيو. هن چيو ته يوٽيلي اسٽورز ڪارپوريشن لاءِ سبسڊي 7ارب رپيا مقرر ڪئي وئي آهي. هن رمضان پيڪيج لاءِ 3ارب رپين جو اعلان ڪيو. جڏهن ته ڪڻڪ، اٽي ۽ کنڊ جي ايڪسپورٽ تي سبسڊي ختم ڪرڻ جو اعلان ڪيو ويو. ڊگهي مدي وارين قرضن تي مارڪ اپ گهٽائي 6سيڪڙو ڪيو ويو آهي. اسحاق ڊار گوادر انٽرنيشنل ايئرپورٽ لاءِ 3ارب رپيا رکڻ جو اعلان ڪيو. ايڪسپورٽ واپار کي هٿي وٺرائڻ لاءِ 6ارب رپيا رکيا ويندا. جڏهن ته تربيلا فور ۾ واڌ واري منصوبي لاءِ 11ارب رپيا رکيا ويا. ٽيڪسٽائيل جي شعبي ۾ 30لک نوڪرين لاءِ 64ارب رپيا مقرر ڪيا ويا آهن. پاڪستان ريلوي جي نقصان جي ازالي لاءِ 37ارب رپيا مقرر ڪيا ويا آهن. واپڊا ۽ پيپڪو کي 98ارب رپيا سبسڊي ڏيڻ جو اعلان ڪيو ويو. اسحاق ڊار چيو ته بينظير انڪم سپورٽ فنڊ جي رقم 97 ارب رپين مان وڌائي 102 ارب رپيا ڪئي وئي آهي، جڏهن ته بيت المال جي بجيٽ 2 ارب رپين جي اضافي سان 4 ارب رپيا ڪئي وئي آهي. خزاني جي وفاقي وزير ٻڌايو ته حڪومت تباهي جي ڪنڌي تي پهتل معيشت جي بحالي طرف گامزن ڪري ڇڏيو آهي ۽ پاڪستاني معيشت لڏندڙ ٻيڙي کي محفوظ ڪناري تائين پهچائي ڇڏيو آهي. هن چيو ته حڪومت معيشت جي بحالي لاءِ ڪڏهن به ڏکيا فيصلا ڪرڻ کان نه هٻڪي آهي ۽ معاشي ماهرن جون اڳڪٿيون غلط ٿابت ڪيون آهن. هن جو چوڻ هو ته هلندڙ مالي سال دوران اقتصادي ترقي جي رفتار 4.24 سيڪڙو رهي، جڏهن ته هلندڙ مالي سال دوران مهانگائي جي رفتار يارهن سالن گهٽ کان گهٽ رهي،جڏهن ته ڌرڻي ۽ ٻوڏ سبب معاشي ڪاٿا پورا ٿي نه سگهيا. هن چيو ته هلندڙ مالي سال دوران پرڏيهي ناڻي جي مٽاسٽا جو ڪاٿو 19 ڊالر مقرر ڪيو ويو . هن جو چوڻ هو ته وياج جي شرح کي گهٽائي 7 سيڪڙو تائين آندو ويو آهي، جنهن سان سيڙپڪاري ۾ اضافو ٿيو آهي. خزاني جي وزير مطابق ملڪ ۾ في ماڻهو جي آمدني 13 سو ڊالرن مان وڌي ڪري 1512 ڊالر ٿي وئي آهي. خزاني جي وزير جو چوڻ هو ته وفاقي حڪومت ڪراچي جي عوام جي لاءِ گرين بس ٽرانزٽ سسٽم متعارف ڪرائڻ جو فيصلو ڪيو آهي، جنهن لاءِ 16 ارب رپيا رپيا ويا آهن ۽ هي منصوبا ڊسمبر 2016 تائين مڪمل ڪيا ويندا خزاني جي وزير مطابق صدر ۽ سرجاڻي ٽائون جي وچ ۾ ان منصوبي مان 3 لک ماڻهو کي روزانو فائدو ٿيندو.

 

صوبن ۾ مڪاني چونڊون ڪرائڻ جو اختيار اليڪشن ڪميشن کي ڏيڻ جو فيصلو

اسلام آباد (بيورو) چونڊ سڌارن بابت ذيلي ڪاميٽي صوبن ۾ مڪاني چونڊون ڪرائڻ جو اختيار اليڪشن ڪميشن کي ڏيڻ جو فيصلو ڪري ڇڏيو، هاڻ ڪميشن کي صوبن ۾ مڪاني چونڊون ڪرائڻ لاءِ صوبائي حڪومتن جي راضپي جي ضرورت نه هوندي، ڪميشن مڪاني ادارن جو مدو ختم ٿيڻ جي 120 ڏينهن ڱانپوءِ پاڻمرادو چونڊون ڪرائڻ لاءِ بااختيار هوندي. ڪاميٽي جو اجلاس ڪنوينئر زاهد حامد جي سربراهي ۾ پارليامينٽ هائوس ۾ ٿيو، اجلاس ۾ ڊاڪٽر عارف علوي، شيرين مزاري ۽ شازيه مري سميت ٻين ميمبرن شرڪت ڪئي، ڪاميٽي آئين جي شق 0 4 1 اي ۾ به ترميم جي سفارش ڪري ڇڏي، ڪاميٽي جي پڇاڻي تي اليڪششن ڪميشن اختيارين ٻڌايو ته سمنڊ پار پاڪستانين کي ووٽ جو حق ڏيڻ لاءِ ڪميشن ورڪنگ گروپ جوڙي ڇڏيو آهي، ڪاميٽي ورڪنگ گروپ ۾ ڪاميٽي جي نمائندگي لاءِ ڊاڪٽر عارف علوي ۽ ڊاڪٽر طارق فضل چوڌري کي به ميمبر مقرر ڪري ڇڏيو، اجلاس ڱانپوءِ زاهد حامد ميڊيا کي ٻڌايو ته ورڪنگ گروپ ۾ ڪاميٽي جي نمائندگي نه هئي، ان لاءِ ٻن ميمبرن کي مقرر ڪيو. هن چيو ته بائيو ميٽرڪ سسٽم ۽ اليڪٽرانڪ ووٽنگ جي حوالي سان گڏيل قومن جي اداري يو اين ڊي پي به هڪ رپورٽ ڪاميٽي حوالي ڪئي هئي، جنهن جون ڪاپيون يمبرن ۾ ورهائي ڇڏيون آهن.

 

صدر اسلامي ۽ پاڪ – هند تاريخ تعليمي نصاب ۾ شامل ڪرڻ جي هدايت ڪري ڇڏي

اسلام آباد (بيورو) صدر ممنون حسين ملڪ ۾ پڙهيل لکيل ماڻهن جي شرح ۾ واڌ تي زور ڏيندي چيو آهي ته ان مقصد لاءِ قومي افرادي قوت ۾ عورتن جي شموليت اڻٽر آهي. هن اها ڳالهه انساني ترقي بابت قومي ڪميشن جي چيئرپرسن روزينه عالم خان سان ڳالهائيندي چئي. ان موقعي تي تعليم ۽ فني تربيت وارو وفاقي سيڪريٽري امتياز تاجور به موجود هو. صدر چيو ته ملڪ جي ڪيترن ئي مسئلن جي ڪري خواندگي شرح ۾ گهٽتائي ٿي آهي، جنهن کي ختم ڪرڻ لاءِ ضروري آهي ته عورتن کي مرڪزي ڌارا ۾ آندو وڃي ته جيئن سماجي شعبي ۾ وڏيون تبديليون اچي سگهن ۽ معاشري جا اهي طبقا به عورتن کي تعليمي ادارن ۾ موڪلڻ تي راضي ٿين جيڪي گڏيل تعليمي نظام جي حق ۾ نه آهن. صدر اسلامي ۽ پاڪ هند تاريخ کي تعليمي نصاب ۾ شامل ڪرڻ جي هدايت ڪندي چيو ته ان جي نتيجي ۾ ٻارن ۾ تاريخ جو صحيح شعور پيدا ٿيندو ۽ هو سٺا پاڪستاني ۽ سٺا انسان بڻجي سگهندا،

 

وفاقي ڪابينا نئين مالي سال 16-2015 جي بجيٽ جي منظوري ڏئي ڇڏي

اسلام آباد (بيورو) وفاقي ڪابينا نئين مالي سال 6 1 Á5 1 0 2 ع جي بجيٽ جي منظوري ڏئي ڇڏي، جنهن ۾ سرڪاري ملازمن جي پگهارن ۾ ساڍا 7 سيڪڙو واڌ ڪئي وئي آهي جڏهن ته گذريل 3 سالن جي ايڊهاڪ رليف کي بنيادي پگهار ۾ ضم ڪيو ويو آهي، ميڊيڪل الائونس ۾ 5 2 سيڪڙو واڌ جي منظوري ڏني وئي ،دهشتگردي جي واقعن ۾ مارجي ويلن جا قرض به معاف ڪيا ويا آهن. وفاقي ڪابينا جو اجلاس پارليامينٽ هائوس جي ڪاميٽي روم نمبر 2 ۾ وزيراعظم جي سربراهي ۾ ٿيو، جنهن ۾ نئين مالي سال جي بجيٽ جي منظوري ڏني وئي، ناڻي وزير اسحاق ڊار بجيٽ تي ڪابينا کي تفصيلي بريفنگ ڏني ۽ حڪومت جي ٻن سالن ڪاميابين، معيشت جي بهتري، ناڻي جي ذخيرن ۾ واڌ سميت ٻين شعبن ۾ ڪاميابين جي حوالي سان بريف ڪيو. ذريعن موجب اجلاس ۾ ناڻي وزارت سرڪاري ملازمن جي پگهارن ۾ 5 سيڪڙو واڌ جي تجويز رکي هئي، جنهن تي وفاقي وزير خواجا سعد رفيق، شيخ آفتاب احمد ۽ ٻين وزيرن چيو ته سرڪاري ملازمن جي پگهارن ۾ 5 سيڪڙو واڌ جي تجويز تمام گهٽ آهي، اسان کي گهٽ ۾ گهٽ 0 1 سيڪڙو واڌ ڪرڻ گهرجي، ڇوته مهانگائي جي شرح جنهن حساب سان وڌي ۽ گهٽجي ٿي، ان حساب سان پگهارن ۾ واڌ ٿيڻ گهرجي، ان معاملي تي ڪافي دير بحث مباحثو ٿيندو رهيو، جنهن تي وزيراعظم به ناڻي واري وزير اسحاق ڊار کي چيو ته ڪابينا جي ميمبرن جي راءِ جو احترام ڪيو وڃڻ گهرجي، ڪابينا اجلاس جي آخر ۾ ان ڳالهه تي فيصلو ڪيو ويو ته سرڪاري ملازمن جي پگهارن ۾ ساڍا 7 سيڪڙو واڌ ڪئي وڃي. اجلاس ۾ زرعي شعبي تي به ڊيوٽي گهٽائڻ جي منظوري ڏني وئي .

 

اردو کي سرڪاري ٻولي جو درجو ڏيڻ بابت وفاقي حڪومت کي يارنهن جون تائين حتمي جواب داخل ڪرڻ جو حڪم

اسلام آباد (بيورو) سـُپريم ڪورٽ، اردو کي سرڪاري ٻولي جو درجو ڏيڻ بابت وفاقي حڪومت کي يارنهن جون تائين حتمي جواب داخل ڪرڻ جو حڪم ڏئي ڇڏيو، جسٽس شيخ عظمت سعيد ريمارڪس ۾ چيو آهي ته هي ڪنهن جي پسند يا نا پسند جو معاملو ناهي، منافقت ختم ڪري آئين سان مذاق بند ڪيو وڃي. جسٽس جواد ايس خواجه ۽ جسٽس شيخ عظمت سعيد تي ٻڌل سپريم ڪورٽ جي 2 رڪني بينچ اردو کي سرڪاري ٻولي جو درجو ڏيڻ بابت ڪيس جي ٻڌڻي ڪئي. ٻڌڻيءَ دوران چئنيصوبن پاران علائقائي زبانن بابت رپورٽس پيش  ڪئي،ايڊووڪيٽ جنرل بلوچستان عدالت کي ٻڌايو ته صوبي ۾ 6 زبانن کي علائقائي زبانن جو درجو ڏنو ويو آهي. عدالت، سنڌ، پنجاب ۽ ڪي پي ڪي جي رپورٽس تي اطمينان جو اظهار ڪندي پنجاب حڪومت جي رپورٽ غير تسلي بخش قرار ڏئي ڇڏي. عدالت، پنجاب جي ايڊووڪيٽ جنرل کي حڪم ڏنو ته ايندڙ ٻڌڻي تي نئين رپورٽ جمع ڪرائي وڃي. جسٽس جواد ايس خواجه ريمارڪس ڏنا ته حڪومت ٻڌائي ته آئين جي شق 251 تي عمل ڪرڻو آهي يا نه. انفارميشن واري سيڪريٽري عدالت کي ٻڌايو ته 6 مهينن اندر اردو کي سرڪاري ٻولي جو درجو ڏنو ويندو، ان حوالي سان وزيراعظم پاليسي بيان پڻ جاري ڪندو. جسٽس شيخ عظمت سعيد ريمارڪس ۾ چيو ته هي ڪنهن جي پسند يا نا پسند جو معاملو ناهي، منافقت ڇڏي آئين سان مذاق بند ڪيو وڃي. جسٽس شيخ عظمت سعيد چيو ته انگريزي کي ختم ڪري قوم کي جااهل نه بڻايو وڃي، جيڪڏهن انگريزي کي ختم ڪرڻوآهي ته پوءِ طالبان جو انتظار ڪريو. عدالت، اردو کي سرڪاري ٻولي جو درجو ڏيڻ بابت وفاقي سرڪار کي ايندڙ ٻڌڻي تي جواب داخل ڪرڻ جو حڪم ڏيندي ٻڌڻي 11 جون تائين ملتوي ڪري ڇڏي.

 

بلاول ڀٽو ۽ آصف زرداري سان سينيٽر اعتزاز احسن جي ملاقات، سياسي صورتحال تي خيالن جي ڏي وٺ

ڪراچي (اسٽاف رپورٽر) پاڪستان پيپلزپارٽي جي چيئرمين بلاول ڀٽو زرداري ۽ شريڪ چيئرمين آصف زرداري سان پيپلزپارٽِ جي مرڪزي اڳواڻ سينيٽر اعتزازاحسن جمعي تي بلاول هائوس ۾ ملاقات ڪئي ملاقات ۾ گڏيل سياسي صورتحال پارٽي معاملن ۽ پنجاب ۾ ٿيندڙ بلدياتي چونڊن تي خيالن جي ڏي وٺ ڪئي ويئي ذريعن مطابق اعتزازاحسن چونڊون 2013 ۾ ٿيندڙ ڌانڌلي جي خلاف جڊيشل ڪميشن جي معاملن کي به پارٽي کي آگاهه ڪيو بلاول ڀٽو زرداري چيو ته پنجاب ۾ ضلعي کان وارڊ جي سطح تائين پيپلزپارٽي کي منظم ڪيو ويندو ۽ پنجاب ۾ بلدياتي چونڊن ۾ تمام نشستن تي اميدوار بيهارينداسين. جلد پنجاب جو دورو ڪندس ۽ عوام ۽ ڪارڪنن سان ملاقاتون ڪندس. هن چيو ته پنجاب جي پارٽي معاملي تي هاڻي ڀرپور طريقي سان توجهه ڏني ويندي ۽ منظم انداز ۾ عوامي رابطا مهم شروع ڪئي ويندي

 

مخالف ڌر جي اڳواڻ خورشيد شاهه بجيٽ کي امير جو بجيٽ قرار ڏئي ڇڏيو

اسلام آباد (بيورو) قومي اسيمبلي ۾ مخالف ڌر جي اڳواڻ سيد خورشيد شاهه مالي سال 16-2015 جي بجيٽ کي امير جو بجيٽ قرار ڏيندي رد ڪري ڇڏيو آهي. هن چيو ته قوم کي بجيٽ تقرير مان مايوسي ٿي آهي. پارليامينٽ ۾ پنهنجي چيمبر ۾ صحافين سان ڳالهائيندي خورشيد شاهه چيو ته بجيٽ تقرير ۾ حڪومت ڪارڪردگي جي تعريف ڪئي وئي آهي. سڄي تقرير ۾ رڳو ٽيڪس وڌائڻ جي ڳالهه ٻڌڻ ۾ آئي. هن چيو ته آئي ايم جي شرطن تي بجيٽ پيس ڪئي وئي جهازن جا پرزا سستا ڪرڻ سان عام ماڻهو کي ڪهڙو فائدو ٿيندو. هي بجيٽ امير طبقي جو آهي غريبن لاءِ بجيٽ ۾ ڪجهه به ناهي.

 

 

سنڌ سرڪار مڪاني چونڊون ڪرائڻ لاءِ تياري ڪري رهي آهي : قائم علي شاهه

ڪراچي (اسٽاف رپورٽر) سنڌ جي وڏي وزير سيد قائم علي شاهه چيو آهي ته سنڌ سرڪار مڪاني چونڊون ڪرائڻ لاءِ تياري ڪري رهي آهي. ڪراچي ۾ شيري رحمان جا سينيٽ ۾ نامزدگي ڪاغذ جمع ڪرائڻ جي موقعي تي صحافين سان ڳالهائيندي قائم علي شاهه چيو ته اسان نوجوانن جي روزگار لاءِ ڪم ڪري رهيا آهيون، ان موقعي تي شيري رحمان چيو ته پ پ ڏکئي گهڙيءَ ۾ جمهوريت جو ساٿ ڏيندي، 18 هين ترميم تي عمل ان وقت نظر ايندو، جڏهن وسيلا صوبن کي منتقل ٿيندا. هن چيو ته وفاقي حڪومت گذريل بجيٽ ۾ سمورا حدف پورا نه ڪرڻ جو اعتراف ڪري چڪي آهي، جڏهن ته توانائي بحران، بيروزگاري ۽ قرضن جو بار نه وڌائڻ جي ذميواري به وفاقي حڪومت تي لاڳو ٿئي ٿي.

 

برساتون نه وسڻ ڪري حب ڊيم ۾ پاڻي گهٽجي ويو، کوٽ پوري ڪرڻ لاءِ ڪوشش ڪيون پيا: شرجيل ميمڻ

ڪراچي(اسٽاف رپورٽر) سڌسماءَ ۽ مڪاني ادارن واري صوبائي وزير شرجيل انعام ميمڻ چيو آهي ته ڪراچي جي شهرين کي پاڻي جي کوٽ سان منهن ڏيڻو پيو آهي ، ان مسئلي جي حل لاءِ سنڌ حڪومت ۽ مڪاني ادارن وارو کاتو ڏينهن رات ڪوششون ڪري رهيو آهي، ڪراچي ۾ گهرج جي ڀيٽ پاڻي جي فراهمي ۾ 50 سيڪڙو گهٽتائي سبب کوٽ ٿي، پنهنجي آفيس ۾ ڪراچي چيمبر آف ڪامرس جي اڳواڻ سراج قاسم تيلي جي اڳواڻي ۾ آيل وفد سان ملاقات دوران ڳالهائيندي شرجيل انعام ميمڻچيو ته برساتون نه وسڻ ڪري هن وقت حب ڊيم ۾ 100 ايم جي ڊي پاڻي گهٽ آهي، هن چيو ته ڌاٻيچي پمپنگ اسٽيشن مان ڏهاڙي 510 ايم جي ڊي پاڻي جي مڪمل فراهمي ۽ 1000 مفت ٽينڪرز ذريعي متاثر علائقن ۾ پاڻي پهچائڻ جو سلسلو جاري آهي، جنهن سان عوام کي وڏي حد تائين رليف مليو آهي، هن چيو ته مفت ٽينڪر اسڪيم ان وقت تائين جاري رکي ويندي جيسيتائين اسان پاني جي بحران تي ڪنٽرول نه ٿا ڪري وڃون، صوبائي وزير صنتعڪارن ۽ واپارين کي سنڌ حڪومت ۽ مڪاني ادارن واري کاتي پاران پاڻي جي کوٽ ختم ڪرڻ لاءِ کنيل قدمن بابت ٻڌايو.هن چيو ته هن وقت 2 منصوبن تي ڪم هلي رهيو آهي، جن ۾ هڪ 65 ۽ ٻي 100 ايم جي ڊي پاڻي جي رٿا آهي، جڏهن ته گريٽر جي فور رٿا 10 جون کان شروع ٿي ويندي.

 

ايم ڪيو ايم اڳواڻ عامر خان 7 ڏينهن جي رمانڊ تي پوليس حوالي

ڪراچي (اسٽاف رپورٽر) ڪراچي جي دهشتگردي ٽوڙ عدالت،نائين زيرو تان گرفتار ڪيل ايم ڪيو ايم اڳواڻ عامر خان کي 7 ڏينهن جي رمانڊ تي پوليس حوالي ڪري ڇڏيو. 11 مارچ تي ايم ڪيو ايم جي مرڪز نائين زيرو تي
هنيل ڇاپي دوران رينجرز پاران گرفتار عامر خان جو 90 ڏينهن جو رمانڊ ختم ٿيڻ بعد پوليس اختيارين کيس دهشتگردي ٽوڙ عدالت نمبر 3 ۾ پيش ڪيو. پوليس عدالت کي درخواست ڪئي ته عامر خان نائين زيرو تي دهشتگردن کي پناهه ڏني هئي،تنهنڪري معاملي جي جاچ لاءِ سندس جسماني رمانڊ ۾ واڌ ڪئي وڃي. ٻڌڻي دوران ايم ڪيو ايم جي وڪيلن عدالت کي درخواست ڪئي ته رينجرز 90 ڏينهن لاءِ عامر خان کي حراست ۾ ورتو هو، مٿس ڪوبه الزام به ناهي ۽ نه ئي ڪنهن ڏوهه ثابت ٿيو آهي،تنهنڪري سندس وڌيڪ رمانڊ نه ڏنو وڃي. متحده جي وڪيلن چيو ته ڪرنل طاهر پريس ڪانفرنس ۾ چيو هو ته عامر خان کي رڳو جاچ لاءِ گرفتار ڪيو ويو آهي. رينجرز جي وڪيل شبير ٻٻر عدالت کي ٻڌايو ته 90 ڏينهن دوران جوابدار کان ٻي ڪابه جاچ ناهي ڪئي ويندي، رڳو جي آءِ ٽي جوڙي ويندي آهي. وڪيل چيو ته جوابدر مٿان اليون ڊبل اي ۽ ايٽي اي تحت وڌيڪ جاچ ٿيڻي آهي،تنهنڪري پوليس کي سندس رمانڊ ڏنو وڃي . رينجرز جي وڪيل جو وڌيڪ چوڻ هو ته عامر خان تي گلبرگ ۽ عزيز آباد ۾ ٻه ڪيس داخل ٿيل آهن ۽ هن ڪيترائي اهم انڪشاف ڪيا آهن،جيڪي کليل عدالت ۾ نه ٿا ٻڌائي سگهجن. ان موقعي تي عدالت،عامر خان کان سوال ڪيو ته اوهان کي ڪٿان گرفتار ڪيو ويو هو؟، جنهن تي متحده اڳواڻ جواب ڏيندي چيو ته کيس خورشِيد بيگم هال مان گرفتار ڪيو ويو هو. ايم ڪيو ايم جي وڪيل محمد جيواڻي ان موقعي تي دليل ڏنا ته نائن زيرو تي ايم پي اي هاسٽل قائم آهي،خورشيد بيگم هال جو عامر خان مالڪ ناهي،جڏهن ته نائين زيرو الطاف حسين جو گهر آهي،اتي ڏوهارين کي پناهه ڪيئن ٿي ڏئي سگهجي ٿي. عدالت ڌرين جا دليل ٻڌڻ کانپوءِ پوليس جي درخواست منظور ڪندي عامر خان جو 7 ڏينهن جو رمانڊ ڏنو. ٻئي طرف رينجرز نائين زيرو تان گرفتار ڪيل ايم ڪيو ايم جي 38 ٻين ڪارڪنن کي آزاد ڪري ڇڏيو،جن ۾ اڳوڻو ايم پي اي يوسف منير شيخ به شامل آهي.