تازيون خبرون

Daily Archives: June 5, 2015

جيڪب آباد:قتل ٿيل نوجوان وارو واقعو، وارث انصاف جي اوسيئڙي ۾؟

 

جيڪب آباد جي مولاداد ٿاڻي جي حد ڳوٺ مولاداد لڳ جوابدارن مدرسي ۾ رهندڙ فالج ۾ مبتلا 35 ورهين جي نوجوان کي رات جو ننڊ مان اٿاري کنڀي کڻي ويا جڏهن ته جوابدارن نوجوان کي تشدد ڪري گهٽا ڏئي قتل ڪري ڇڏيو. جوابدارن ڏوهه کي لڪائڻ لاءِ لاش گڏهه گاڏي تي رکي جهنگ ۾ ڦٽو ڪرڻ جي ڪوشش ڪئي جنهن ۾ هو ناڪام ٿيڻ بعد لاش جي سڃاڻپ نه ٿيڻ جوڳو ڪرڻ لاءِ لاش مٿان تيزاب هاري لاش جي بي حرمتي ڪئي وئي اهڙو ڀانڊو ڦاٽڻ بعد مولاداد پوليس لاش جي ڳولها شروع ڪري ڇڏي جڏهن ته مقتول جي وارثن جو پتو پوڻ تي پوليس پاران وارثن سان سڌو رابطو ڪيو ويو ان سلسلي ۾ وارثن پوليس کي ٻڌايو ته مقتول کي 23 اپريل تي کنڀي بي دردي سان قتل ڪيو ويو جنهن جو لاش ملڻ بعد اسان غريب بي پهچ ماڻهن دفنائي ڇڏيو آهي جڏهن ته اسان سان انصاف ڪيو وڃي جنهن تي پوليس ڪارروائي ڪندي هڪ ڳوٺ ۾ ڇاپو هڻي ٽن جوابدارن علي بهر ڊومڪي علي اصغر ڊومڪي ۽ حبيب الله ڊومڪي کي گرفتار ڪري پڇا ڳاڇا ڪئي جن پوليس اڳيان ڏوهه جو اعتراف ڪندي چيو ته مقتول نوجوان کي ڪارنهن جي الزام هيٺ اسان قتل ڪيو آهي جڏهن ته پوليس جوابدارن جي ڪيل اعتراف جي بنياد تي مقتول نوجوان جي ڀاءُ عبدالغني ڊومڪي جي فرياد تي ڪيس داخل ڪري وڌيڪ جاچ شروع ڪري ڇڏي آهي . ٻئي پاسي مقتول نوجوان عبدالرشيد ڊومڪي جي پير سن امڙ زر بي بي ٻڌايو ته جوابدارن منهنجي معذور پٽ تي نه مڃڻ جوڳي تهمت مڙهي آهي جيڪا قتل کان وڌيڪ جهير ڏئي رهي آهي مان ان وقت تائين الله کان موت نه گهرندس جيستائين ملوث جوابدارن کي ڦاهي جي سزا نه ملندي هن چيو ته منهنجو پٽ مدرسي ۾ رهندو هو جيڪو دنيا کان بيگانو هو هنن منهنجي جهولي خالي ڪري وڏو ظلم ڪيو آهي اميد ته مون سان انصاف ٿيندو  ان موقعي تي ان سان گڏ مقتول جو ڪيس ۾ فريادي ڀاءُ عبدالغني ڊومڪي به موجود هو

ان حوالي سان پوليس اهلڪارن ٻڌايو ته اسان کي ٻڙڪ هئي ته اهڙي قسم جو بلائنڊ واقعو پيش آيو آهي تصديق لاءِ پوليس کي سرگرم ڪيو ويو جنهن بعد سمورو قصو سامهون اچي ويو هن چيو ته مقتول عبداالرشيد ڊومڪي کي بي دردري سان قتل ڪري لاش مٿان تيزاب هاريو ويو جڏهن ته واقعو 23 اپريل تي پيش آيو ۽ اسان وٽ 17 مئي تي رپورٽ ٿيو اسان مقتول جي استعمال ڪيل موبائل فون نمبر تي ٽريس ڪري جوابدارن جي نشاندهي ڪئي سين هن چيو ته هي بلائنڊ ڪيس هو جنهن ۾ ڪاميابي ملي اڄ اسان ايس ايس پي ظفر اقبال ملڪ وٽ پيش تي حقيقت ٻڌائڻ آيا آهيون هن چيو ته جوابدارن ڪارنهن جو الزام مڙهي نوجوان کي قتل ڪيو ۽ جوابدارن هڪ پلانگ ڪئي ته پهريان لاش گڏهه گاڏي تي کڻي گم ڪيو ويندو پر هو ان ۾ ناڪام ويا اميد ته ان ۾ جوابدارن سان سهڪار ڪندڙ ماڻهو به پڪڙجي پوندا .

ضرورت ان ڳالهه جي آهي ته حڪومت کي گهرجي ته هن معاملي جون اصل حقيقتون ڄاڻڻ لاءِ معاملي جي جڙتائين پهچي ۽ گرفتار ٿيل ڏوهارين جي ڪيل اعتراف مطابق مرحوم جي وارثن سان انصاف ڪيو وڃي ۽ ڪارنهن واري ڪڌي رسم کي ٻنجون ڏيڻ لاءِ سخت اقدام ڪري ته جيئن ٻيهر اهڙي قسم جو ڪو واقعو پيش نه اچي سگهي.

 

اٺيتاليهه ڪلاڪن ۾ ملندڙ خبر وارو معاملو؛امر جليل

مائي صفوران چوڪ واري واقعي کان هڪ ڏينهن اڳ سرڪار سڳوري هن قوم کي هڪ خوشخبري ٻڌائي هئي ته ايندڙ 48 ڪلاڪ، ملڪ جي هاڻوڪي تاريخ جا اهم ڪلاڪ آهن. ڏکوئيل قوم کي هڪ اهڙي خبر ٻڌڻ لاءِ ملندي، جنهن کي ٻڌندي ئي ڏکوئيل قوم جو واڇون ٽڙي پونديون. هاڻوڪي تاريخ جي هڪ اهم خبر ٻڌڻ لاءِ قوم بيچين ٿي وئي.قوم پنهنجي پنهنجي حيثيت مطابق پنهنجا ڪنَ صاف  ڪرايا. ڪنهن جي ڪنن مان 68 سال پراڻن واعدن واري مير نڪتي. هڪ جهونو ماڻهو اڄ به پاڪستان ۾ کير ۽ ماکيءَ جون نديون وهندي ڏسڻ جي اميد تي اڄ به آس لڳائي ويٺو آهي، ان جي ڪنَ مان اورنگزيب عالمگير جي سُورن جي مير نڪتي.هڪ  ٻيو جهونو هو. ان جي ڪن مان وڪرما جيت جي زماني جي مير نڪتي. هڪ ماڻهو جي ڪن مان مئل ڪرڙي به نڪتي هئي. توهان ٿورو سوچيو ته، 20ڪروڙ ماڻهن جي قوم جيڪڏهن ڪنَ صاف ڪرائڻ ويهي رهي ته ڇا ٿو ٿي سگهي! فٽ پاٿ تي ويٺل نڪ، ڪن، ۽ نڙي جي بيمارين جي عطائي ماهرن کان وٺي  5 اسٽار هوٽلن جهڙين اسپتالن ۾ ويٺل ڊاڪٽرن جي ته چاندي ٿي ويندي. بلڪه سون ٿيندي. انهن جا ته وارا نيارا ٿي ويندا.ڪنَ صاف ڪرائڻ کانپوءِ ڏکوئيل قوم هاڻوڪي تاريخ جي اهم خبر ٻڌڻ لاءِ ڌيان ڏئي ويٺل هئي. 48 ڪلاڪن ڏکوئيل قوم کي 48 سال به نه پر 48 صديون محسوس ٿيڻ لڳيون هيون.

اڃان مشڪل سان 24 ڪلاڪ گذريا هوندا ته صفوران واقعي قوم جا هوش خطا ڪري ڇڏيا.صفوران چوڪ کان گذرندڙ نجي بس کي 5،6 دهشتگردن روڪيو. بس بيهڻ سان ئي 5،6 ئي ڄڻا بس ۾ گهڙي ويا.ٻارن، پوڙهن، جوانن، عورتن تي ٻڌل مسافرن تي انڌا ڌنڌ انداز ۾ گوليون هلائي 48 مسافرن کي ڏسندي ئي ڏسندي موت جي ننڊ سمهاري ڇڏيو.مارجي ويندڙن بابت قوم کي هڪ دم خبر پئجي وئي ته اهي اسان مسلمانن جي مختلف مڪتبِ فڪر  ۾ سڀ کان وڌيڪ امن پسند، سياست کان پري، ڪاروبار سان لاڳاپيل، سلجهيل ۽ پڙهيل لکيل هئا. ڏکوئيل  ۽ وايون بتال قوم کي اها به خبر پئجي وئي ته  مسلمانن ۾ سڀ کان وڌيڪ نيڪي جي ڪم ڪندڙن کي مارڻ وارا هندو نه هئا. سک نه هئا، ڪرسچن نه هئا، يهودي نه هئا، پارسي نه هئا، ڪميونيسٽ نه هئا. دهريا نه هئا. ملحد نه هئا،ته پوءِ ڇا اهي قاتل مسلمان هئا؟ جيڪڏهن مسلمان هئا ته انهن جو تعلق ڪهڙي مڪتبِ فڪر سان هو؟ جيترا وات اوتريون ڳالهيون. جڏهن 20ڪروڙ وات هجن ته ڪيتريون ۽ ڪهڙيون ڪهڙيون ڳالهيون ٿي سگهن ٿيون، ان جو اندازو توهان چڱي ريت لڳائي سگهو ٿا.مون کي ٻڌائڻ جي ضرورت ناهي.ڪنهن چيو ته قاتلن جو تعلق لشڪرِ جهنڪوي سان هو، ڪنهن چيو ته قاتلن جو تعلق طالبان سان هو، ڪنهن چيو ته قاتلن جو تعلق استادن سان هو. ڪنهن چيو ته قاتلن جو تعلق القائده سان هو، ڪنهن چيو ته قاتلن جو تعلق بي قائده سان هو. ڪنهن چيو ته قاتل داعش جا هئا، ڪنهن چيو حوثي هئا، ڪنهن چيو ته اهو ڪم پرڏيهي ڳجهن هٿن جو آهي،

پرڏيهي ڳجهن هٿن کي مسلمانن ۾ سڀ کان وڌيڪ پرامن پڙهيل لکيل، نيڪي وارا ڪم ڪندڙ طبقي سان ڪهڙي دشمني هئي؟ اها ڳالهه سمجهه ۾ نه آئي. پر ننڍي وات مان نڪتل وڏي ڳالهه فقيرن جي سمجهه ۾ اچي وئي.ننڍي وات چيو ته هي وحشياڻو ڪم مسلمانن جي ان گروهه جو آهي، جيڪي پاڻ کانسواءِ ٻين مسلمانن کي ٻه نمبري سمجهن ٿا ۽ ڪفر جي فتويٰ اڏائيندا رهندا آهن. ڪنهن تي قتل ثابت ٿيڻ جي فتويٰ تائين ڏيڻ ۾ دير ناهن ڪندا. صفوران ڳوٺ يا چوڪ جي طوفان پوري ملڪ کي وڪوڙي ڇڏيو. قوم ڀلجي وئي ته 48 ڪلاڪن اندر هو ڪهڙي خوشخبري ٻڌڻ وارا هئا، جنهن جي خبر هنن کي سرڪار جي خاص ماڻهو چوڌري نثار علي ڏني هئي. اها ڪهڙي خبر هئي جنهن کي ٻڌي انهن جي مرجهايل منهن تي مسڪراهٽ اچڻ واري هئي!  50 ٽي وي چينلن لاڳيتو هفتي جا 7  ئي ڏينهن ۽ راتيون صفوران واقعي تي پروگرام ڏيکاريا. بحث، تبصرا ڏسڻ ۽ ٻڌڻ لاءِ مليا. تجزيا ٻڌريا ۽ ڏيکاريا ويا . پوليس آفيسرن ۽ قانون لاڳو ڪندڙ ادارن جي اعليٰ آفيسرن جا انٽرويوز ٻڌريا  ۽ ڏيکاريا ويا ، عوام جا تاثر ڏيکاريا ۽ ٻڌرايا ويا، هڪ ئي نوعيت جا پروگرام لاڳيتو ڏسڻ سان ظاهر آهي توهان جو ذهن ڌوپجي ويندو! ماڻهو ڀلجي ويندا ته 48 ڪلاڪن  ۾ هو ڇا ٻڌڻ وارا هئا! پاڪستان جي هاڻوڪي تاريخ جي حوالي سان اها هڪ غير معامعولي خبر  هئي، بلڪه، انڪشاف هو. ماڻهن  وساري ڇڏيو. ماڻهن کي ڪجهه به ياد نه رهيو ته هو ڪهڙي قسم جي تاريخ ساز خوشخبري ٻڌڻ وارا هئا.خدا خدا ڪري صفوران واقعي بابت بحث، مباحثا، تجزيا ۽ تقريرن جو طوفان بيٺو، شڪي ڏوهاري يعني قاتل پڪڙجي ويا.  سنڌ جي وڏي وزير سائين قائم علي شاهه 5 ڪروڙ رپيا روڪ پوليس آفيسرن جي نالي ڪئي. ڏوهارين کي عدالت ۾ پيش ڪيو ويندو. ڪيس هلندو،

ڏوهارين  جو بچاءُ ڪندڙ ۽ سرڪاري وڪيلن جي وچ ۾ قانوني نڪتن تي دليل ٿيندا. ننڍي عدالت کانپوءِ وڏي عدالت ۾ ڪيس هلندو. ان کان پوءِ سڀ کان وڏي عدالت سان رابطو ڪيو ويندو. جيڪڏهن سرڪاري وڪيل ڏوهارين کي سزا ڏيارڻ ۾ ناڪام رهيو ۽ ڏوهاري عزت سان ازاد ٿي ويا ته سائين قائم علي شاهه 5 ڪروڙ  جي انعام واري رقم پوليس آفيسرن کان واپس وٺي ڇڏيندو. آخر ڪار سرڪاري پئسو آهي، سائين قائم علي شاهه پنهنجي کيسي مان ته ناهي ڏنو، جو درگذر ڪري ڇڏي! مائي صفوران واري واقعي جي هلچل ختم ٿيڻ تي هئي. اسان پاڪستان جو غريب، مفلس، لاچار،عوام جيڪو حقيقت ۾ پاڪستان جي قانون ساز اسيمبلين ۾ ويٺل مالدار، اعليٰ تعليم يافتا اڪابر، ايم اين اي ۽ ايم پي اي جي ووٽ بئنڪ آهيون. اسان خوش ٿياسين ته هلو ڀلا48 ڪلاڪ نه سهي، هڪ سو 48 ڪلاڪن کان پوءِ  ئي سهي، اسان کي آخر ڪار اها تاريخ ساز خبر ٻڌڻ لاءِ ملندي، جنهن جو واعدو گهرو وزير چوڌري نثار علي خان ڪيو هو.

تاريخي انڪشاف ٻڌڻ لاءِ  اسان غريب عوام ڌيان ڏئي ٻڌڻ لاءِ ويٺل هئاسين ته ايگزيڪٽ نالي هڪ نجي ڪمپني جو پول زوردار ڌماڪي سان ڦاٽي پيو.ميڊيا وارن ايتري قدر واويلا ۽گوڙ ڪيو جو 48 ڪلاڪن ۾ تاريخي خوشخبري ٻڌڻ وارا اسان انتظار ۾ويٺل عوام سڀ ڪجهه وساري ايگزيڪٽ جي چڪر ۾ ڦري وياسين، ٺيڪ آ مڃون ٿا ته اسان بيوقوف، چريا ۽ ميڻ جو نڪ لڳائي گهمندا آهيون، ڏيئي هيٺان اونداهه واري چوڻي هاڻي غير مروج ٿي چڪي آهي. جيڪڏهن اسان نه، ته گهٽ ۾ گهٽ اسيمبلي ۾ ويٺل اڪابر  ته سي آئي ڊي قسم جي ادارن کان پڇي سگهن ٿا ته 10،15 سالن کان هڪ ڪاروباري ڪمپني انهن جي نڪ هيٺان ڌوڪو ڪري رهي هئي ۽ انهن کي خبر به نه پئي! ڇا اهو ممڪن آهي؟ پر اسان ميڻ جو نڪ رکندڙ عوام اڃان تائين 48 ڪلاڪن ۾ ملندڙ خوشخبري ٻڌڻ جي انتظار ۾ آهيون، جنهن خبر جي اچڻ ۾ هاڻي 248 ڪلاڪ گذري چڪا آهن.

 

سعودي متاثرين جي پڪار ڪڏهن ٻڌي ويندي؟؛سرواڻ چانڊيو

ملڪ هميشه پرڏيهي پاليسين جي ڪري ئي سڃاتا وڃن ٿا، ڪنهن به ملڪ جي مڪمل آزاد هجڻ جو اندازو ان جي پرڏيهي پاليسي مان ئي لڳايو وڃي ٿو ۽ حڪمرانن جي طاقتور هجڻ جو پتو به عالمي سطح تي ڪيل فيصلن مان پوي ٿو. ڪو دور هو جو عرب- اسرائيل جنگ ۾ پاڪستان جي شموليت ڪرڻ يا نه ڪرڻ جي حوالي سان مشڪل فيصلو ڪرڻ جي گهڙي آئي ته ان وقت جي وزيراعظم ذوالفقار علي ڀٽو فوج جي عهديدارن کي گهرائي واضح ڪيو هو ته پاڪستان ان جنگ ۾ حصو ضرور وٺندو پر اڻ اعلانيل طور تي حصو وٺندو ۽ بغير سڃاڻپ جي فوجي جوان اتي وڃي ويڙهه ۾ حصو وٺندا ۽ ان وقت جي ايئرفورس جي پائيليٽن کي موڪل تي روانو ڪري غير سرڪاري طور تي سعودي عرب ڏانهن موڪليو ويو، جن اتي جنگ ۾ حصو ورتو. ان موقعي تي انهن پائيليٽن تي واضح طور اها ڳالهه پڌري ڪئي وئي هئي ته جيڪڏهن هو گرفتار ٿين ٿا ته پاڪستان جو نالو نه وٺندا ۽ پاڪستان انهن جي مڙهه جي لاءِ ڪنهن به عالمي فورم تي آواز نه اٿاريندو. اهو فيصلو هڪ جمهوري طور تي چونڊيل وزيراعظم جو هو، جنهن کي فوج پاران قبول ڪيو ويو ۽ ان تي لبيڪ چوندي پنهنجا آفيسر ٻاهرين ملڪ موڪليا ويا، جن عرب- اسرائيل جنگ ۾ حصو ورتو ۽ ان کانپوءِ سڄي دنيا ڏٺو ته شهيد ذوالفقار علي ڀٽو عرب دنيا جي اڳواڻ طور سامهون آيو ۽ عربن کي ان ڳالهه جو باور ڪرايو ته هو طاقتور آهن ۽ وٽن تيل جي وڏي طاقت آهي، جنهن سان هو سڄي دنيا کي جهڪائي سگهن ٿا ۽ شهيد ذوالفقار علي ڀُٽي جي ان فيصلي کانپوءِ عرب دنيا پڻ سندس هر لاڏ برداشت ڪيو ۽ مشڪل جي هر گهڙيءَ ۾ سندس ساٿ ڏنو، جنهن ۾ شاهه فيصل، ياسر عرفات، ڪرنل قذافي، فيڊل ڪاسترو ۽ ٻيا سندس عظيم دوست هئا ۽ پوءِ عالمي دنيا انهن اڳواڻن کي هڪ هڪ ڪري منظر عام تان هٽائڻ جو منصوبو جوڙيو ۽ شروعات شهيد ذوالفقار علي ڀٽو کان ڪئي وئي ۽ پوءِ هڪ هڪ ڪري سڀني کي منظر عام تان گم ڪيو ويو.

پوءِ وقت ڦيرو کاڌو ۽ صورتحال تبديل ٿيڻ شروع ٿي وئي ۽ پاڪستان ۽ عرب دنيا جي وچ ۾ ويڇا وڌڻ شروع ٿي ويا، جيڪي هاڻي ان نهج تي پهتا آهن جو هڪٻئي جي شهرين کي تذليل ڪري ملڪن مان ڪڍيو پيو وڃي ۽ غير مسلم ملڪن جي افرادي قوت تي ڀاڙيو پيو وڃي.روزاني عبرت کي سدائين ان ڳالهه جو اعزاز حاصل رهيو آهي جو هن هر معاملي تي سڀ کان اڳ ۾ آواز اٿاريو آهي ۽ سعودي عرب ۾ جنهن وقت انساني المئي جنم ورتو ته ان وقت به صرف عبرت ئي آهي، جنهن ان سڄي تصوير کي قوم آڏو آندو آهي. يمن جنگ ۾ شموليت نه ڪرڻ بابت فيصلو جيتوڻيڪ حڪمرانن جو آهي پر ان جا نتيجا غريب طبقو ڀوڳي رهيو آهي. جيڪڏهن جنگ ۾ شموليت ڪئي وڃي ها ته بمن بارود وسيلي غريب عوام پنهنجي زندگين تان هٿ ڌوئي ها ۽ جڏهن هن جنگ ۾ شموليت بدران ٻنهي ملڪن کي ڳالهين وسيلي معاملو نبيرڻ جي صلاح ڏني ته هاڻي سعودي عرب ۾ پاڪستانين جي خلاف ڌرتي تنگ ڪئي وئي آهي ۽ اتي پاڪستانين لاءِ جيئڻ عذاب ڪيو ويو آهي. پاڪستان ڇا پر سڄي مسلمان دنيا جون ڀلاريون جايون سعودي عرب ۾ آهن ۽ اتي جي حڪمرانن جي انسان دوستي جا روپ آهستي آهستي سامهون اچي رهيا آهن. اتي گهٽ ۾ گهٽ اها ڳالهه ته ناهي ته هي سنڌي آهي، پنجابي يا پختون آهي پر جنهن به ذات سان آهي ۽ پاڪستاني آهي ته بنا ڪنهن سبب جي وجهه گلي ۾ هٿ ۽ هڻينس ترم ۾.عبرت کي پهتل انگن اکرن موجب هيستائين 10 هزار کان وڌيڪ قانوني طور تي ويل پاڪستانين کي سعودي عرب جي مختلف جيلن شميسي جيل، اشرافيا جيل سميت ٻين جيلن ۾ واڙيو ويو آهي. انهن جو ڏوهه صرف ايترو آهي ته انهن سعودي عرب ڇڏڻ کان انڪار ڪيو ۽ انهن کي ان ڏوهه ۾ جيل ۾ وڌو ويو آهي. جڏهن ته روزانو ٻن هزارن تائين ماڻهن کي سعودي عرب مان لوڌي ڪڍيو پيو وڃي. پر حيرانگيءَ جي ڳالهه آهي ته حڪمرانن پنهنجين اکين تي کوپا چاڙهي ڇڏيا آهن، جن کي اها صورتحال نظر نٿي اچي ته هي هيترا ماڻهو ڇا جي لاءِ واپس اچي رهيا آهن يا انهن جو ڪهڙو ڏوهه آهي.ايئن به ناهي ته ڪو حڪمران ۽ پاڪستان جو پرڏيهي کاتو ان سڄي صورتحال کان لاعلم آهي. ڇو ته سوين ماڻهن عبرت جي خبرن کي بنياد بڻائي پرڏيهي آفيس ۾ درخواستون جمع ڪرايون آهن ۽ انهن واضح طور تي موقف اختيار ڪيو آهي ته جن ماڻهن کي گرفتار ڪيو ويو آهي، انهن جو ڪو به ڏوهه نه آهي. اهي قانوني طور سعودي عرب ويل آهن، پوءِ انهن کي ڇو گرفتار ڪيو ويو آهي؟ جڏهن ته سعودي عرب ۾ پاڪستاني قونصليٽ پڻ سعودي اختيارين جو ٻانهن ٻيلي بڻيل آهي، بجاءِ متاثرين جي مدد جي قونصليٽ جا عملدار قانوني طور تي ويل پاڪستانين کي به ماٺ ميٺ ۾ ملڪ ڇڏڻ جو مشورو ڏئي رهيا آهن ۽ گرفتار پاڪستانين کي سعودي اختيارين جي فرمائش تي پاسون ٺاهي ملڪ بدر ڪرڻ جي عمل ۾ شامل بڻجي ويا آهن.فيصل آباد واسي ڪاشف، عبرت جا ٿورا مڃيندي چيو ته ”حڪمران ڀلي اکيون پوري ڇڏين پر ميڊيا جون اکيون پوريل نه آهن،

اسين سنڌي ميڊيا جا ٿورائتا آهيون جن ان معاملي تي آواز اٿاريو آهي، ان ڳالهه جي ته اسان کي به خبر نه هئي پر عبرت وسيلي اسان کي پتو پيو آهي.“

شميسي جيل ۾ قيد هڪ خيبرپختونخوا واسي عبرت سان ڳالهائيندي ان ڳالهه تي سخت ڪاوڙ جو اظهار ڪيو ته نواز شريف جڏهن شاهه عبدالله جي تعزيت لاءِ سعودي آيو ته ڪيترن ئي پاڪستانين هن معاملي تي ساڻس ملاقات ڪري آگاهي ڏيڻ جي ڪوشش ڪئي پر نواز شريف پاڪستانين سان ملڻ بدران پنهنجي خمري ۾ اسٽيل مل جي دوري تي هليو ويو ۽ هن اهو انڪشاف به ڪيو ته ان مل ۾ 4 هزار کان وڌيڪ ملازم آهن پر هڪ به پاڪستاني نه آهي، سڀ جا سڀ بنگالي ۽ ڀارتي آهن.

هاڻي جڏهن حڪمرانن جي اها صورتحال آهي جو هو ٻاهرين ملڪ صنعتون هڻي رهيا آهن ۽ مزدور وري ٻين ملڪن مان رکيا پيا وڃن ته پوءِ انهن مان چڱائيءَ جي ڪهڙي اميد رکي سگهجي ٿي ۽ پوءِ ڀلي سعودي هجن يا ٻين ملڪن جون اختياريون، انهن کي بهانو ملي ويو آهي ته توهان تي ته توهان جا حڪمران ئي اعتماد نٿا ڪن ته پوءِ اسان ڪيئن ڪنداسين؟ ان سڄي صورتحال ۾ موجوده حڪمرانن جو وڏو هٿ آهي، جن معاملي کي هيستائين پهچايو آهي ۽ انهن ۾ سعودي اختيارين سان ڳالهائڻ جي به سگهه نه آهي.

حيرت حڪمرانن تي نه آهي پر حيرت جي ڳالهه اها آهي ته مخالف ڌر جي به ڪا پارٽي ان معاملي تي چپ چورڻ لاءِ تيار نه آهي. پيپلز پارٽي جنهن ۾ پورهيت طبقي جا حامي وڏي انگ ۾ موجود آهن، ميان رضا رباني جيڪو هينئر سينيٽ چيئرمين آهي ۽ پورهيت جدوجهد ۾ سندس وڏو ڪردار آهي پر اهو به عهدو ملڻ کانپوءِ هاڻي لڳي ٿو ته حڪمراني رنگ ۾ رنڱجي ويو آهي ۽ کيس هاڻي ڪنهن سان به ڪو ڄڻ واسطو ئي ناهي رکڻو. عمران خان جيڪو عوام کي انصاف ڏيارڻ هليو آهي، اهو يمن جنگ ۾ پاڪستان جي شموليت جي خلاف هو سو به خاموش آهي ۽ هڪ اکر به ناهي ڳالهايو. جڏهن ته ٻين پارٽين ۾ عوامي نيشنل پارٽي جنهن جي جهنڊي جو رنگ پورهيتن جي جدوجهد جي جهنڊي جهڙو آهي، اها پارٽي به خاموش آهي ڄڻ ته ڪجهه ٿي ئي نه رهيو آهي ۽ جيئن پاڪستان ۾ حڪمران چوندا آهن، سڀ ڪجهه ٺيڪ آهي ۽ سعودي ۾ به انهي سڀ ڪجهه ٺيڪ آهي وانگر صورتحال بهتر آهي ۽ پاڪستاني پورهيت اتي کير ۽ ماکي جي ندين مان ڀرپور نموني سان لاڀ پرائي رهيا آهن ۽ اتان جا حڪمران انهن جي لاءِ تمام گهڻا پريشان آهن.

وقت ڪڏهن به ڪنهن جي ڪاڻ ناهي ڪڍندو ۽ پنهنجي رمز سان هلندي گذري ويندو آهي ۽ هي وقت به گذري ويندو پر جيڪي تاريخ ۾ اهڃاڻ ڇڏي ويندو اهي داغ شايد ڪڏهن به لهي نه سگهن ۽ ٿي سگهي ٿو ته اهو بحران حڪمرانن جي ڪن لاٽار جي ڪري ايترو وڌي وڃي جو سڄي ملڪ کي پنهنجي لپيٽ ۾ نه آڻي ڇڏي؛ ان جي لاءِ حڪمرانن کي اکيون کولڻ گهرجن ۽ صورتحال کي سنڀالڻ گهرجي.