تازيون خبرون

Daily Archives: June 5, 2015

ملڪ مان آخري دهشتگرد جي خاتمي تائين آپريشن ضرب عضب جاري رهندو: صدر

اسلام آباد (بيورو) صدر ممنون حسين چيو آهي ته ملڪ مان آخري دهشتگرد جي خاتمي تائين آپريشن ضرب عضب جاري رهندو، پاڪ-چين اقتصادي راهداري منصوبو انقلاب آڻيندو، پاڪستان ڀارت سان برابري جي بنياد تي لاڳاپا چاهي ٿو. پارليامينٽ جي گڏيل اجلاس کي خطاب ڪندي صدر چيو ته قومي ايڪشن پلان تي ڪاميابي سان عملدرآمد جاري آهي. هن چيو ته دهشتگردن جي خاتمي لاءِ آپريشن ضرب عضب ڪيو پيو وڃي،ملڪ مان آخري دهشتگرد جي خاتمي تائين آپريشن جاري رهندو. صدر چيو ته دهشتگردن کي ملڪ جي ڪنهن به حصي ۾ پناهه لاءِ جڳهه نه ملندي، اهي غلط فهمي نه رهن کين انجام تائين پهچايو ويندو. ممنون حسين چيو ته تمام جلد ڪراچي ۽ بلوچستان جون حالتون بهتر ٿي وينديون، ملڪ اندر هر حال ۾ امن قائم ڪيو ويندو. صدر ممنون حسين چيو ته دهشتگردي خلاف جنگ ۾ هـُو پنهنجي 60 هزار شهيدن کي ناهي وساريو، کين ڀيٽا پيش ڪن ٿا. صدر چيو ته آئين ۽ قانون جي بالادستي ئي ملڪي ترقي جو رستو آهي ۽ امن کانسواءِ ترقي ناممڪن آهي، پاڪستان ۾ رهندڙ هر شهري کي برابري جي بنياد تي حق حاصل آهن. سندس چوڻ هو ته پاڪ-چين اقتصادي راهداري منصوبو انقلاب آڻيندو، ان منصوبي سان ملڪ جو ڪو به حصو محروم نه ٿيندو. ممنون حسين چيو ته ملڪ ۾ عالمي ڪرڪيٽ جي بحالي بهتر عمل آهي، ان سان دنيا کي سٺو پيغام ڏنو ويو آهي، ڪرڪيٽ سميت ٻين راندين جا به عالمي مقابلا پاڪستان ۾ ڪرايا ويندا. صدر چيو ته پوليو کي بنياد بڻائي پاڪستان تي پابنديون لڳايون ويون، اسان پنهنجي ٻارن کي موت جي منهن ۾ نه وڃڻ ڏينداسين. اجلاس ۾ صدر جي خطاب دوران ايم ڪيو ايم ميمبرن ايوان مان واڪ آئوٽ پڻ ڪيو. پارليامينٽ جي گڏيل اجلاس دوران آرمي چيف جنرل راحيل شريف سميت ٽنهي هٿياربند فوجن جا سربراهه، چئني صوبن جا وڏا وزير ۽ گورنر به شريڪ هئا.

 

سمورين ادران کي جمهوريت جو احترام ڪرڻ گهرجي : وزيراعظم

اسلام آباد (بيورو) وزيراعظم نوازشريف ملڪ جي قومي سياسي قيادت سان راولپنڊي اسلام آباد ميٽرو بس جو باضابطه افتتاح ڪيو ڪنوينشن سينٽر ۾ ٿيندڙ پروقار تقريب ۾ افتتاح کان اڳ ان منصوبي جي دستاويزي فلم ڏيکاري ويئي ۽ ماڻهن جا تاثرات پيش ڪيا ويا ان کان پوءِ جڏهن وزيراعظم کي منصوبي جي افتتاح جي دعوت ڏني ويئي ته وزيراعظم اڳيان واري نشستن تي موجود ملڪ جي قومي سياسي قيادت کي به ڊائس تي اچڻ جي دعوت ڏني جنهن تي مولانا فضل الرحمان محمود خان اچڪزئي محمد اعجاز الحق راجا ظفرالحق ۽ ٻيا اڳواڻ اسٽيج تي پهچي وزيراعظم گهرو وزير چوڌري نثارعلي خان وزيراعليٰ پنجاب وزيراعليءٰ ڪي پي ڪي پرويز خٽڪ وزيراعليٰ بلوچستان ڊاڪٽر عبدالمالڪ بلوچ گورنر خيبر پختونخواهه گورنر پنجاب ۽ سياسي قائدين سان گڏ بٽڻ دٻائي منصوبي جو باقاعده افتتاح ڪيو تقريب ۾ غير ملڪي سفير وفاقي ۽ صوبائي وزير پارليمينٽ ميمبر اسلام آباد ۽ راولپنڊي کان ايندڙ واپارين سميت ڪيترن ئي مردن ۽ عورتن وڏي تعداد ۾ شرڪت ڪئي. تقريب کي خطاب ڪندي وزير اعظم چيو ته پنجاب ۾ ترقيءَ جو سفر جاري آهي، راولپنڊيءَ کان اسلام آباد تائين ميٽرو بس منصوبي جو افتتاح ڪيو ويو آهي، وزيراعظم نواز شريف وفاقي حڪومت طرفان ڪراچي ۾ به جلد گرين بس سروس شروع ڪرڻ جو اعلان ڪندي چيو آهي ته دهشتگردي خلاف فيصلائتي ويڙهه جاري آهي، آمريتن سدائين ملڪ کي نقصان پهچايو. وزيراعظم نواز شريف، ميٽرو بس سروس جو افتتاح پنجاب جي وڏي وزير شهباز شريف، گورنر، ڪي پي ڪي ۽ بلوچستان جي وڏن وزيرن کانسواءِ جي يو آءِ ف سربراهه مولانا فضل الرحمان ۽ پشتونخواهه ملي عوامي پارٽي جي محمود خان اچڪزئي سان گڏجي ڪيو ميٽرو بس منصوبي جي افتتاحي تقريب کي خطاب ڪندي وزيراعظم نواز شريف چيو ته رٿا مڪمل طور شفاف نموني مڪمل ڪئي وئي آهي،ڪير به آڱر نه ٿو کڻي سگهي،وفاقي حڪومت جلد سنڌ جي راڄڌاني واري شهر ڪراچي ۾ به گرين بس سروس تي ڪم شروع ڪندي. وزيراعظم پنهنجي خطاب دوران انتهائي خوشگوار موڊ ۾ نظر آيو ۽ شهباز شريف کي صلاح ڏني ته پاڪستان بدلجي رهيو آهي انڪري هاڻي کيس پنهنجا شعر به تبديل ڪرڻ گهرجن.. ميان نواز شريف ان موقعي تي آمريتي حڪومتن کي تنقيد جو نشانو بڻايو ۽ اهو پڻ چيو ته فوج دهشتگردي خلاف فيصلائتي ويڙهه وڙهي رهي آهي،جنهن ۾ ڪاميابي ماڻي ويندي. وزيراعظم ميٽرو بس منصوبي جي اڏاوت ۾ حصو وٺندڙ پورهيتن لاءِ 5 ڪروڙ رپيا انعام جو اعلان پڻ ڪيو ان کان اڳ ڪنوينشن سينٽر ۾ ميٽرو بس منصوبي بابت تيار ڪيل ڊاڪيومينٽري پڻ ڏيکاري وئي.

 

ميڊيا جي مالڪن کي پنهنجي ورڪرن جا حق پورا ڪرڻ گهرجن: پرويز رشيد

اسلام آباد (بيورو) اطلاعات، نشريات ۽ قومي ورثي جي وفاقي وزير سينيٽر پرويز رشيد چيو آهي ته 2014ع جو پاڪستان 2013ع کان بهتر هو ۽ 2015ع ۽ 2016ع جو پاڪستان تمام گهڻو بهتر هوندو، پهرين ڏينهن کان موقف رهيو آهي ته ايگزيڪٽ خلاف جاچ پنهنجي جاءِ تي پر صحافي بيقصور آهن ۽ انهن جي حقن جو تحفظ حڪومت جي ذميواري آهي، ايندڙ ڪجهه ڏينهن ۾ بول ملازمن جي پگهارن جو معاملو حل ٿي ويندو، ويج بورڊ ايوارڊ مسئلي تي حڪومت يا ڪارڪن رڪاوٽ نه آهن، مالڪن جا خدشا آهن، هن اهو پيغام ڏيندي چيو ته هو پنهنجا نمائندا ويج بورڊ لاءِ مقرر ڪن ٻي صورت ۾ هڪ طرفو ويج بورڊ جوڙيو ويندو. اهڙن خيالن جو اظهار هن ڪالهه خميس ڏينهن نيشنل پريس ڪلب ۾ پي ايف يو جي ۽ ايپنڪ جي اهتمام هيٺ بول ملازمن ۽ انهن جي گهروارن سان يڪجهتي جي لاءِ منعقد ڪيل پروگرام ۾ خصوصي شرڪت جي موقعي تي ڪيو. اطلاعات ۽ نشريات جي وفاقي وزير چيو ته پي ايف يو جي يا پريس ڪلب جي ڪري هتي نه آيو آهيان پر پنهنجي ٻارن ۽ ڀينرن جي لاءِ آيو آهيان، هن چيو ته ايگزيڪٽ جي معاملي تي جاچ جي پهرين ڏينهن به منهنجو اهو بيان اخبارن ۽ چينلن تي شايع ۽ نشر ٿيو ته ايگزيڪٽ جي جاچ جو معاملو پنهنجي جاءِ تي بول سان لاڳاپيل صحافين جي حقن جو تحفظ حڪومت جي ذميواري آهي ۽ ان ۾ ڪي ٻٽي راءِ نه آهي. هن چيو ته مون پي ايف يو جي جي صدر افضل بٽ سان گڏجي وزيراعظم جي خصوصي معاون اشتر اوصاف سان ملاقات ڪئي جنهن ۾ بول جي صحافين جي مسئلي بابت قانوني طريقيڪار طئي ڪرڻ تي ڳالهه ٻولهه ڪئي آهي ته جيئن رمضان المبارڪ کان اڳ ان جي ڪارڪنن ۽ سندن خاندانن کي مالي ڏکيائين کان بچايو وڃي ڇو ته اهي بيقصور آهن. هن چيو ته ان جو مثال اهڙي بس جي مسافرن وانگر آهي جن کي ان بس جي حوالي سان حقيقتن جي خبر نه هئي ۽ هو سوار ٿي ويا، تنهن ڪري بس ۽ سوارين جو معاملو جدا جدا آهي. هن چيو ته ماضي ۾ اسان تي جهاز هاءِ جيڪ جا ڪيس ٺاهيا ويا ته اسان ان وقت به عدالتي فيصلن جو احترام ڪيو ۽ تشدد يا بغاوت جو رستو اختيار نه ڪيو پر قانوني طريقيڪار اختيار ڪيو. هن چيو ته اڄ پاڪستان جون حالتون ماضي کان بهتر آهن، 2014ع جو پاڪستان 2013ع کان بهتر هو ۽ 2015ع ۽ 2016ع جو پاڪستان اڃا وڌيڪ بهتر هوندو، صحافين کي انهن جي بهتري لاءِ پنهنجو ڪردار ادا ڪرڻو پوندو. اطلاعات ۽ نشريات واري وفاقي وزير چيو ته حڪومت جي نظر ۾ ميڊيا مالڪ ۽ ميڊيا ورڪر برابر آهن، گذريل ٻن سالن ۾ اسان ميڊيا مالڪن جا سمورا مسئلا حل ڪيا ته انهن کي به پنهنجي ڪارڪنن کي شڪايت جو موقعو نه ڏيڻ گهرجي. هن چيو ته ميڊيا مالڪن کي پيغام ڏيان ٿو ته ويج بورڊ جي حوالي سان پنهنجا نمائندا مقرر ڪن ٻي صورت ۾ هڪ طرفو ويج بورڊ جوڙيو ويندو.

 

مخالف ڌر صدر جي تقرير کي مايوس ڪندڙ قرار ڏئي ڇڏيو، ممنون حسين لکيل تقرير پڙهي: خورشيد شاهه

اسلام آباد (بيورو) اپوزيشن ليڊر خورشيد شاهه چيو آهي ته صدر ممنون حسين حڪومت جي لکيل تقرير پڙهي پارليامينٽ جي ٻن سالن جي مايوس ڪندڙ ڪارڪردگي کي سٺو چئي عجيب ڳالهه ڪئي آهي، ممنون حسين پشاور سانحي جو ذڪر ڪيو، پر سنڌ ۾بجلي جي لوڊشيڊنگ واري معاملي کي نظر انداز ڪيو ويو. اسلام آباد ۾ پارليامينٽ جي گڏيل اجلاس کانپوءِ  ميڊيا سان ڳالهائيندي خورشيد شاهه چيو ته پارليامينٽ جي ٻن سالن جي ڪارڪردگي مايوس ڪندڙ آهي. هن چيو ته صدر ممنون حسين پشاور جي آرمي پبلڪ اسڪول سانحي جي ڳالهه ڪئي، پر سنڌ ۾ بجلي جي اڻ اعلانيل لوڊشيڊنگ واري معاملي کي نظر انداز ڪيو ويو. اپوزيشن ليڊر صدر جي خطاب کي عجيب قرار ڏيندي چيو ته ممنون حسين  حڪومت جي لکيل تقرير پڙهي پارليامينٽ جي مايوس ڪندڙ ڪارڪردگي کي سٺو قرار ڏنو. خورشيد شاهه نئين سال جي مالي بجيٽ ۾ سرڪاري ملازمن جي  پگهار ۾ اضافو ڪرڻ جو مطالبو ڪندي چيو ته حڪومت سرڪاري ملازمن جي پگهار  ۾ اضافي جو اعلان ڪري. خورشيد شاهه وڌيڪ چيو ته پوليس کاتي ۾ ملازمن جون پگهارون سئو سيڪڙو وڌايون وڃن.

 

جيڪڏهن دهشتگردي 2 سئو سال جاري رهي ته ڇا فوجي عدالتون ڪم ڪنديون رهنديون: سپريم ڪورٽ

اسلام آباد (بيورو) سپريم ڪورٽ ۾ 18 هين ۽ 21 ترميمن خلاف درخواستن جي ٻڌڻي دوران ججز رمارڪس ڏنا آهن ته ماضي ۾ فوجي عدالتون نظريه ضرورت تحت ٺاهيون ويون، موجوده دور ۾ فوجي عدالتن کي آئيني تحفظ ڏنو ويو آهي، جيڪڏهن دهشتگردي 2 سئو سال جاري رهي ته ڇا فوجي عدالتون ڪم ڪنديون رهنديون.. سپريم ڪورٽ ۾ چيف جسٽس ناصر الملڪ جي سربراهي ۾ 17 رڪني فل ڪورٽ بئنچ 18 هين ۽ 21 هين ترميمن خلاف داخل درخواستن جي ٻڌڻي ڪئي.وڪيل حامد خان فوجي عدالتون قائم ڪرڻ خلاف دليل ڏيندي چيو ته 1953 ۾ فوجي عدالت عبدالستار خان نيازي کي موت جي سزا ٻڌائي هئي، سول مارشل لا ايڊمنسٽريٽر ان سزا کي عمر قيد جي سزا ۾ تبديل ڪيو. جسٽس ثاقب نثار رمارڪس ڏيندي چيو ته 1953 ۾ جڏهن فوجي عدالتون قائم ٿيون ته ان وقت آئين موجود نه هيو، 1953 ۾ فوجي عدالتون نظريه ضرورت تحت ۽ انتظامي نظام تحت فوجي عدالتون قائم ٿيون، هن دفعي فوجي عدالتن کي آئيني تحفظ ڏنو ويو آهي. چيف جسٽس ناصرالملڪ چيو ته عدالتي فيصلي مطابق 1953 جي مارشل لا گڏيل مشاورت سان لڳائي وئي. جسٽس ثاقب نثار رمارڪس ڏيندي چيو ته جيڪڏهن 2 سئو سال دهشتگردي ٿيندي رهي ته ڇا فوجي عدالتون ڪم ڪنديون رهنديون.

 

ڀارتي بيانن تي گهٻرائڻ جي ڪا به ضروت ناهي، هر قسم جي اڳرائي جو منهن ٽوڙ جواب ڏيڻ ڄاڻون ٿا:آرمي چيف

اسلام آباد (بيورو) آرمي چيف جنرل راحيل شريف چيو آهي ته ڀارت جي حوالي سان گهٻرائڻ جي ڪا به ضرورت ناهي، پاڪ فوج هر قسم جي اڳرائي جو جواب ڏيڻ ڄاڻي ٿي. اسلام آباد ۾ پارليامينٽ جي گڏيل اجلاس جي موقعي تي صحافين سان غير رسمي ڳالهه ٻولهه ڪندي آرمي چيف چيو ته ڀارت طرفان آيل بيانن تي گهٻرائڻ جي ڪا به ضرورت ناهي. جنرل راحيل شريف چيو ته پاڪ فوج هر قسم جي اڳرائي جو ڀرپور جواب ڏيڻ ڄاڻي ٿي. آرمي چيف چيو ته قومي سلامتي ۽ امن امان جي صورتحال ۾ بهتري آئي آهي ۽ ان ۾ وڌيڪ بهتري ايندي. ان کان اڳ آرمي چيف جنرل راحيل شريف سان سينيٽ چيئرمين ميان رضا رباني ملاقات ڪئي. ملاقات دوران آرمي چيف پارلياماني ڪارروائي تي دلچسپي جو اظهار ڪيو جڏهن ته رضا رباني جنرل راحيل شريف کي سينيٽ جي قدمن کان آگاهه ڪيو.

 

ڪي پي ڪي ۾ مڪاني چونڊن دوران 18ماڻهو مارجي ويا جنهن تي ڏک ٿيو آهي: نوازشريف

اسلام آباد (بيورو) وزيراعظم نواز شريف، ڪي پي ڪي۾ مڪاني چونڊن دوران 18 ڄڻن جي مارجڻ تي افسوس جو اظهار ڪندي چيو آهي ته عام چونڊن کان وڌيڪ خيبرپختونخواهه جي مڪاني چونڊن ۾ بدنظمي ٿي، ڇا انساني جانين سان کيڏڻ نئون پاڪستان آهي؟. اسلام آباد ۾ ميڊيا سان ڳالهائيندي وزير اعظم نواز شريف چيو ته ڪي پي ڪي جي مڪاني چونڊن ۾ جيڪو ڪجهه ٿيو، اهــــو قوم کان ڳجهو ناهي.  هن چيو ته عام چونڊن کان وڌيڪ خيبر بختونخوه جي مڪاني چونڊن ۾بدنظميون ٿيون.وزير اعظم نواز شريف چيو ته ڪي پي ڪي ۾ مڪاني چونڊن دوران ووٽرز جي جان جي حفاظت صوبائي حڪومت جي ذميواري آهي. نواز شريف وڌيڪ چيو ته ڪي پي ڪي ۾ مڪاني چونڊن دوران 18ماڻهو مارجي ويا، جنهن تي کيس افسوس ٿيو آهي، ٻڌايو وڃي ته ڇا انساني جانين سان کيڏڻ نئون پاڪستان آهي.

 

وفاقي حڪومت سنڌ جي گورنر ڊاڪٽر عشرت العباد کان استعيفيٰ طلب ڪري ورتي……….ايوان صدر ۽ وزيراعظم هائوس،سنڌ جي گورنر جي تبديلي وارين خبرن جي ترديد ڪري ڇڌي

اسلام آباد (بيورو) وفاقي حڪومت، سنڌ ۾ڊگهي عرصي کان گورنر جي منصب تي ويٺل ڊاڪٽر عشرت العباد کان استعيفيٰ طلب ڪري ورتي آهي، وزيراعظم نواز شريف ڪجهه ڏينهن اندر نئين گورنر جي نالي جو اعلان ڪندو. ذريعن موجب، وفاقي حڪومت، سنڌ سرڪار کي اعتماد ۾ وٺڻ بعد گورنر ڊاڪٽر عشرت العباد کان استعيفيٰ طلب موقف اختيار ڪيو آهي ته صولت مرزا جي الزامن بعد ڊاڪٽر عشرت العباد جو گورنر جي عهدي تي رهڻ مناسب ناهي. ذريعن جو چوڻ آهي ته ڊاڪٽر عشرت العباد، وفاق کان نجي مصروفيتن سبب استعيفيٰ لاءِ مهلت طلب ڪري ورتي آهي ۽ امڪان آهي ته 10 جون تائين عشرت العباد گورنر جو عهدو ڇڏي ڏيندو. ذريعن موجب، ڊاڪٽر عشرت العباد جي نياڻي جي سڀاڻي شادي آهي ۽ شادي جون تقريبون سڀاڻي گورنر هائوس ۾ رٿيل آهن، جنهن بعد ڊاڪٽر عشرت العباد پاران استيعفيٰ ڏيڻ جو امڪان آهي. ڊاڪٽر عشرت العباد کان استعيفيٰ طلب ڪرڻ بعد وفاقي حڪومت نئين نالن تي غور شروع ڪري ڇڏيو آهي، وزيراعظم نواز شريف ڪجهه ڏينهن اندر نئين گورنر جي نالي جي منظوري ڏيندو. واضح رهي ته ڊاڪٽر عشرت العباد ڊسمبر 27 ڊسمبر 2002 تي گورنر جو حلف کنيو هو ۽ 13 سالن تائين گورنر جي عهدي تي رهيو، جيڪو سڀ کان وڌيڪ گورنر جي عهدي تي رهڻ وارو رڪارڊ پڻ آهي. ڊاڪٽر عشرت العباد 27 جون 2011 تي استيعفيٰ پڻ ڏني هئي، پر ان وقت جي صدر آصف علي زرداري استيعفيٰ منظور ڪرڻ کان انڪار ڪيو هو، جنهن بعد عشرت العباد ٻيهر عهدو سنڀاليو. ايوان صدر ۽ وزيراعظم هائوس،سنڌ جي گورنر جي تبديلي وارين خبرن جي ترديد ڪندي چيو آهي ته وفاق،گورنر ڊاڪٽر عشرت العباد کان استعيفيٰ وٺڻ جو فيصلو ناهي ڪيو ويو. ايوان صدر ۽ وزيراعظم هائوس جي ترجمانن پاران جاري ڪيل ڌار ڌار بيانن ۾ چيو ويو آهي ته سنڌ جي گورنر ڊاڪٽر عشرت العباد کي هٽائڻ واري خبر درست ناهي. ترجمانن جي بيانن موجب وفاقي حڪومت سنڌ جي گورنر عشرت العباد کان استعيفيٰ طلب ناهي ڪئي ۽ نه وري ٻين نالن تي غور ڪيو پيو وڃي. ٻئي طرف سنڌ جي گورنر هائوس جي ترجمان پڻ ترديد ڪندي چيو آهي ته وفاق استعيفيٰ لاءِ گورنر سان ڪنهن به قسم جو رابطو ناهي ڪيو. گورنر هائوس جي ترجمان موجب پنجاب جو وڏو وزير شهباز شريف گورنر کي سندس نياڻي جي شادي جي مبارڪ ڏيڻ آيو هو. ان کان اڳ ذريعن ٻڌايو ته سنڌ جي گورنر ڊاڪٽر عشرت العباد 10 جون تائين عهدي ڇڏڻ جو فيصلو ڪيو آهي. ميڊيا تي اها ڳالهه به گردش ۾ رهي ته پنجاب جي وڏي وزير شهباز شريف گذريل ڏينهن سنڌ جي دوري تي پهچي گورنر کي استيعفيٰ ڏيڻ جي صلاح ڏني هئي.

 

 

توهين عدالت ڪيس: سنڌ سرڪار کي 8 جون تائين جي مهلت، سومر ڏينهن هر صورت م ڪارروائي هلائي ويندي: عدالت جو حڪم

ڪراچي (اي پي پي) سنڌ هاءِ ڪورٽ ۾ توهين عدالت ڪيس جي ٻڌڻي عدالت ۾ سرڪار پاران معاملي بابت جڙيل 21هين گريڊ وارن آفيسرن جي ڪميٽي جي رپورٽ جي انتظار لاءِ ٻيهر تاريخ ڏيڻ جي گهر ڪئي وئي، عدالت 8 جون سومر ڏينهن تائين مهلت ڏيندي ايندڙ ٻڌڻي واري ڏينهن عدالت صبح ساڍي نائين وڳي هر هال ۾ ڪارروائي شروع ڪرڻ جي هدايت ڪئي آهي. تفصيل موجب سنڌ هاءِ  ڪورٽ ۾ جڏهن ڪالهه توهين عدالت ڪيس جي ٻڌڻي شروع ٿي ته جسٽس سجاد علي شاھ سرڪاري وڪيل فاروق ايڇ نائيڪ ۽ ايڊوڪيٽ جنرل سنڌ فتاح ملڪ کان وزير اعليٰ سنڌ جي مليل 3 صفحن تي ٻڌل خط بابت تصديق ڪندي پڇيو ته ڇا هي خط سنڌ حڪومت جو آهي؟ جواب ۾ سرڪاري وڪيلن پاران اهو خط پاڻ جمع نه ڪرڻ جو جواز ٻڌايو جنهن تي عدالت خط جي تصديق ڪرڻ لاءِ مهلت ڏيندي اڌ ڪلاڪ جي لاءِ عدالت ملتوي ڪئي. اڌ ڪلاڪ بعد ٻيهر جڏهن عدالت ٻڌڻي شروع ڪئي ته اي جي سنڌ خط جي مالڪي ڪندي عدالت کي ٻڌايو تي هي خط آهي سرڪار جو اهو حڪومتي ڪميٽي پاران ئي جمع ڪرايو آهي پر اهو رجسٽرار معرفت موڪليو ويو آهي جنهن تي جسٽس سجاد علي شاھ کيس چيو ته عدالت ۾ معاملو توهين عدالت جو هلي رهيوآهي پر خط ۾ موُقف انتظامي معاملن جو لکيو ويو آهي، عدالت جڏهن ڪاروئي شروع ڪئي ته سرڪار جي وڪيلن موُقف رکيو ته حڪومت سنڌ  هن معاملي تي اعليٰ سطح جي ڪميٽي جوڙي معاملي جي جاچ ڪري رهي آهي. ڪميٽي ۾ اعليٰ سطح جا 21 هين گريڊ جا عملدار آهن جيڪي عدالت جي معاملي ۾ ڪوتاهي ڪندڙن جو تعين ڪري رهيا آهن. عدالت کي گذارش آهي ته هو هن انڪوائري جي مڪمل ٿيڻ تائين لاءِ گهٽ ۾ گهٽ 15 ڏينهن لاءِ وقت ڏئي جنهن تي جسٽس سجاد علي شاھ ريمارڪس ڏيندي چيو ته اها ڪميٽي ڇا ڪندي وڌ ۾ وڌ عملدارن جا ڦول لهرائيندي ٻيو ڇا ڪندي، بهرحال هن ۾ وڌيڪ وقت نٿو ڏئي سگهجي. اوهان کي سومر 8 جون ساڍا 9 وڳي تائين مهلت ڏجي ٿي، عدالت ۾ رپورٽ ڏيو ۽ ڄاڻايل تاريخ تي ٻڌڻي ۾ پنهنجا دليل ضرور ڏيو جنهن بعد ٻڌڻي ملتوي ڪئي وئي.

 

بلوچستان ۾ برسات تباهي مچائي ڇڏي، ندين ۾ چاڙهه، نئيون وهي آيون، 9 ڄڻا لڙهي ويا

ڪراچي (نمائندن وٽان) بلوچستان ۾ برسات تباهي مچائي ڇڏي، ندين ۾ چاڙهه ۽ نئيون وهي اچڻ سبب خضدار جي وڍ واري علائقي ويجهو 9 ڄڻا برساتي پاڻي ۾ ٻڏي فوت ٿي ويا، سنڌ جي مختلف علائقن ۾ برسات کانپوءِ معطل ٿيل بجلي اڃان بحال نه ٿي سگهي آهي، ايندڙ 24 ڪلاڪن دوران سنڌ ۾ وڌيڪ برسات پوڻ جي اڳڪٿي ڪئي وئي آهي.. جعفرآباد سميت بلوچستان جي مختلف علائقن صحبتپور، ڊيرا مراد جمالي، سبي، مچ، جهل مگسي، لورا لائي، قلات خضدار، مستونگ ۽ ٻين علائقن ۾ تيز هوائن سان گڏ برسات سبب سمورو مواصلاتي نظام درهم برهم ٿي ويو. خضدار جي وڍ واري علائقي ۾ 9 ڄڻا برساتي پاڻي ۾ ٻڏي ويا، جن جا لاش هٿ اچي ويا آهن.. برسات سبب ڪيترن ئي علائقن ۾ گندو پاڻي بهيجي ويو آهي جيڪو اڃا تائين نيڪال نه ٿي سگهيو آهي. تيز برسات سبب جعفرآباد جا 5 گرڊ اسٽيشن روجهان جمالي، منجهو شوري، ڊيرا مراد جمالي، صحبت پور، گنداخا، اوستا محمد بند پيل آهن، جنهن سبب مختلف علائقن ۾ بجلي جي فراهمي معطل ٿي وئي آهي. طوفاني برسات سبب ڪيترائي ڪچا گهر ڊهي پٽ پئجي ويا آهن، جنهن سبب متاثر کليل آسمان هيٺ بيارو مددگار ويٺل آهن. سنڌ ۾ تيز هوا سان برسات کانپوءِ مختلف علائقن ۾ معطل ٿيل بجلي اڃا تائين بحال ناهي ٿي سگهي.. ٻئي پاسي، موسميات کاتي ايندڙ 24 ڪلاڪن دوران ڪراچي، حيدرآباد، سکر ۽ لاڙڪاڻي ڊويزن ۾ وڌيڪ برسات پوڻ جي اڳڪٿي ڪئي آهي.