تازيون خبرون

Daily Archives: June 4, 2015

ڪشمير ۽ پاڪستان کي ڪو به الڳ نٿو ڪري سگهي: آرمي چيف

اسلام آباد (بيورو رپورٽ) آرمي چيف جنرل راحيل شريف چيو آهي ته ڪشمير مسئلو هندستان جي ورهاڱي جي اڻپوري ايجنڊا آهي ۽ ان مسئلي کي حل ڪرڻ کانسواءِ خطي ۾ امن ممڪن ناهي، ڪنهن به ملڪ کي پاڪستان خلاف پراڪسي وار جِي اجازت نه ڏني ويندي. نيشنل ڊفينس يونيورسٽي اسلام آباد ۾ تقريب کي خطاب ڪندي جنرل راحيل شريف چيو ته هـُو خطي ۾ امن ۽ استحڪام جي خواهش رکن ٿا پر ڪنهن به ملڪ کي پاڪستان خلاف پراڪسي وار جي اجازت نه ڏني ويندي. سندس چوڻ هو ته دشمن دهشتگردي کي هوا ڏئي ملڪ ۾ ڏڦيڙ پيدا ڪري رهيا آهن پر پاڪ فوج هر قسم جي سازشن جو مقابلو ڪرڻ جي ڀرپور صلاحيت رکي ٿي، جنگي حڪمت عملي ۾ تيزيءَ سان تبديليون اچي رهيون آهن. آرمي چيف جو چوڻ آهي ته ننڍي کنڊ جي ورهاڱي وقت کان ئي ڪشمير مسئلو اڻپورو آهي، ڪشمير تڪرار ورهاڱي جي اڻپوري ايجنڊا آهي. هن چيو ته خطي ۾ امن لاءِ ڪشمير مسئلي جو حل ضروري آهي، اهو تڪرار گڏيل قومن جي ٺهرائن ۽ ڪشميرين جي خواهش موجب حل ٿيڻ گهـُرجي. آرمي چيف چيو ته ڪشمير مسئلي تي پاڪستان جو موقف واضح آهي، پاڪستان ۽ ڪشمير کي هڪٻئي کان ڌار نه ٿو ڪري سگهجي. هن چيو ته آپريشن ضرب عضب ۾ دهشتگردن خلاف ڪاميابين سبب شهري علائقن ۾ دهشتگردن خلاف ڪارروائين جو رستو صاف ٿيو جڏهن ته سياسي توڙي فوجي قيادت ۾ ويجهڙائي وڌي.

پاڪستان ۽ چين خطي ۾ امن کي فروغ ڏئي رهيا آهن: نواز شريف

اسلام آباد (بيورو/اي پي پي) وزيراعظم محمد نواز شريف چيو آهي ته پاڪستان ۽ چين “آئرن برادرز” آهن جيڪي خطي ۾ امن جي فروغ ۽ ٻنهي ملڪن جي عوام جي بهتر مستقبل لاءِ گڏيل ويزن سان هر شعبي ۾ ويجهو تعاون ڪري رهيا آهن. هو ڪالهه اربع ڏينهن پاڪ چين ٿنڪ ٽينڪ براءِ پاڪ چين اقتصادي راهداري ريسرچ ڊولپمينٽ انٽرنيشنل (آر ڊي آءِ) جي وفد سان ملاقات جي دوران ڳالهائي رهيو هو جنهن وزيراعظم هائوس ۾ ساڻس ملاقات ڪئي. وزيراعظم آر ڊي آءِ جي قيام جي آجيان ڪئي جنهن ۾ چين جا مشهور اسڪالر، اهم شخصيتون ۽ سنڪيانگ جا مشهور واپاري شامل آهن. وزيراعظم محمد نواز شريف چين جي صدر شي چن پنگ جي تازي پاڪستان جي دوري جو حوالو ڏيندي چيو ته پاڪ چين اقتصادي راهداري منصوبو “هڪ بيلٽ هڪ روڊ منصوبو” جو بنيادي منصوبو آهي جنهن سان ٻنهي ملڪن کي هڪجهڙو فائدو ٿيندو. چين جي صدر جي موجودگي ۾ 50 کان وڌيڪ معاهدن ۽ مفاهمت جي يادداشتن تي صحيحون ٿيون جيڪي پاڪستان ۽ چين جي مضبوط لاڳاپن لاءِ تاريخي موقعا فراهم ڪندا. وزيراعظم محمد نواز شريف يانگ زي دريا ۾ بحري جهاز جي افسوسناڪ واقعي تي چيني قيادت سان تعزيت جو اظهار ڪيو. وفد پاڪ چين اقتصادي راهداري تي آل پارٽيز ڪانفرنس ۾ تاريخي اتفاق راءِ تي وزيراعظم ۽ حڪومت کي مبارڪباد ڏني جنهن جي نتيجي ۾ سمورين سياسي پارٽين جي حمايت حاصل آهي، وزيراعظم چيو ته اقتصادي راهداري منصوبن جي نگراني ۽ منصوبي کي جلد کان جلد مڪمل ڪرڻ لاءِ پارلياماني ڪميٽي قائم ڪئي پئي وڃي، وفد وزيراعظم کي ٻڌايو ته آر ڊي آءِ چين پاڪستان انفارميشن ڪوريڊور قائم ڪرڻ چاهي ٿي. هي هڪ ون ونڊو آپريشن ٿيندو جتي سموري ضروري معلومات فراهم ڪئي ويندي. وزيراعظم کي ٻڌايو ويو ته چيني عملدار هر سال سنڪيانگ ۾ ڪرامي شهر ۾ سي پي اي سي فورم جو اجلاس منعقد ڪرڻ تي غور ڪري رهيا آهيون، وفد وزيراعظم کي ڪرامي جي دوري جي دعوت ڏني ته جيئن هو خصوصي اقتصادي زون کي ڏسي سگهي، وفد ماهيگيري ، انفارميشن ٽيڪنالاجي ۽ زراعت سميت ٻين شعبن ۾ تعاون ۾ دلچسپي جو اظهار ڪيو. وفد چين جي نيم خودمختيار مسلم اڪثريتي خطي سنڪيانگ جي چوٽي جي چيني اڳواڻ زانگ چن زيان پاران نيڪ تنمائون وزيراعظم تائين پهچايون، وفد ۾ منصوبابندي وارو اڳوڻو وزير ۽ پاڪ چين جوائنٽ ٿنڪ ٽينڪ اون سي پي اي سي جو شريڪ چيئرپرسن ڊاڪٽر بلگي زو، ڪرامي شهر جو ميئر هانگ يان زانگ، نيشنل انسٽيٽيوٽ آف نيشنل اسٽريٽجي جو پروفيسر يز هو وانگ، ڪرامي سٽي جو پرڏيهي معاملن وارو ڊائريڪٽر زي ڪيانگ زانگ، ريڊ ڪراس سوسائٽي جي ڪيانگ جن چن، ايسوسيئيٽ پروفيسر زي في لي، واءِ اي ايم اي گروپ جو چيف ايگزيڪيٽو آفيسر چن گين سميت ٻيا شامل هئا. ان موقعي تي وزيراعظم جو خصوصي صلاحڪار طارق فاطمي، سينيٽر مشاهد حسين سيد ۽ پاڪستان ۾ چين جو سفير سن وي ڊونگ به موجود هئا.

 

پ پ پاران ڪي پي ڪي ۾ ٻيهر مڪاني چونڊون ڪرائڻ جي آجيان، عمران خان جو اعلان سٺو سوڻ آهي: آصف علي زرداري

ڪراچي (اسٽاف رپورٽر) اڳوڻي صدر آصف علي زرداري خيبرپختون خواهه ۾ ٻيهر مڪاني چونڊون ڪرائڻ جي اعلان جو آڌرڀاءَ ڪيو آهي. اسلام آباد ۾ جاري ڪيل پنهنجي بيان ۾ پاڪستان پيپلز پارٽي جي شريڪ چيئرمين آصف علي زرداري عمران خان جي اعلان کي سٺو سنئوڻ قرار ڏنو آهي. هن چيو ته خيبرپختون خوا ۾ مڪاني چونڊن دوران تمام گهڻيون شڪايتون مليون . واضح رهي ته تحريڪ انصاف جي سربراهه عمران خان مخالف ڌر جي مطالبي کانپوءِ صوبي ۾ ٻيهر مڪاني چونڊن ڪرائڻ جو اعلان ڪيو آهي. هن ڄاڻايو ته خيبرپختون خوا جي حڪومت نئين سري سان مڪاني چونڊون ڪرائڻ لاءِ تيار آهي.

 

پاڪستان، ڪشمير ۽ گلگت بلتستان کي اڻٽـُٽ حصو قرار ڏيڻ واري ڀارتي دعويٰ رد ڪري ڇڏي

اسلام آباد (بيورو) پاڪستان، ڪشمير ۽ گلگت بلتستان کي اڻٽـُٽ حصو قرار ڏيڻ واري ڀارتي دعويٰ رد ڪري ڇڏي، پرڏيهي ترجمان قاضي خليل الله جو چوڻ آهي ته ڀارت ڄمون ڪشمير تي غير قانوني قبضو ڪيو آهي، ڪشميري عوام تي ڀارتي ظلم گڏيل قومن جي ٺهرائن جي کــُليل ڀڃڪڙي آهي. پرڏيهي کاتي جي ترجمان قاضي خليل الله اسلام آباد ۾ صحافين کي بريفنگ ڏيندي چيو ته ڀارت ڄمون ڪشمير تي غير قانوني قبضو ڄمائي ڇڏيو آهي. هن چيو ته گلگت بلتستان ۽ والاريل ڄمون ڪشمير بابت ڀارتي پرڏيهي وزارت جو بيان هـُو رد ڪن ٿا جڏهن ته ڪشمير عالمي سطح تي هڪ تسليم ٿيل تڪراري علائقو آهي. هن چيو ته ڀارت ڪشمير تي 70 هزار فوجي مقررڪري غير قانوني قبضو ڪيو آهي ۽ ڀارتي فوجي ڪشمير ۾ مظلوم عوام تي ظلم ڪري رهيا آهن جيڪا گڏيل قومن جي ٺهرائن جي کــُليل ڀڃڪڙي آهي. پرڏيهي ترجمان چيو ته گلگت بلتستان جي چونڊن تي ڀارتي بيان پاڪستان جي اندروني معاملن ۾ مداخلت آهي جڏهن ته ڪشمير جي مستقبل جو فيصلو گڏيل قومن تحت گهـُرجي.

 

معاشي ترقي لاءِ پرامن ايٽمي ٽيڪنالاجي تائين پهچ ضروري آهي : پاڪستان

واشنگٽن (م.ڊ) پاڪستان آمريڪا تي معاشي ترقي لاءِ پرامن ايٽمي ٽيڪنالاجي تائين پهچ جي ضرورت تي زور ڀريو آهي. واشنگٽن ۾ پاڪ – آمريڪا ورڪنگ گروپ جي اجلاس کانپوءِ جاري ڪيل پڌرنامي ۾ اهڙو مطالبو ڪيو ويو. پاڪ – آمريڪا ورڪنگ گروپ جو ستون اجلاس واشنگٽن ۾ ٿيو، جنهن ۾ پاڪستان سماجي ۽ معاشي ترقي لاءِ جوهري ٽيڪنالاجي تائين پهچ جي ضرورت تي زور ڀريو. اجلاس دوران وڏي پئماني تي تباهي پکيڙيندڙ هٿيارن کي روڪڻ تي به زور ڏنو ويو، جڏهن ته غير رياستي عنصرن جي انهن هٿيارن تائين پهچ روڪڻ جو عزم به ورجايو ويو. اجلاس جي صدارت پاڪستان جي پرڏيهي سيڪريٽري اعزاز چوڌري ۽ آرمز ڪنٽرول بابت آمريڪا جي نائب پرڏيهي سيڪريٽري روز گوٽموئلر گڏيل طور ڪئي. اجلاس دوران ٻنهي ملڪن عالمي برادري جي ڀلائي لاءِ هٿيارن تي پابندي واري اهميت تي اتفاق ڪيو. اجلاس ۾ آمريڪا اهو عزم ورجايو ته هو وڌيڪ ڪو به ايٽمي تجربو نه ڪندو، پاڪستان به اهو عزم ورجايو ته هو خطي ۾ ايٽمي تجربو ٻيهر ڪرڻ لاءِ اڳرائي نه ڪندو. پاڪستان چيو ته هٿياربند ٽڪراءَ کان بچڻ ۽ اعتماد وڌائڻ لاءِ وڌ ۾ وڌ ايٽمي صلاحيت برقرار رکي ويندي.

 

 

ڪراچي ۾ متحده جي ڪارڪنن کي تشدد جو نشانو بڻايو پيو وڃي:خالد مقبول صديقي

ڪراچي (اسٽاف رپورٽر) ايم ڪيو ايم پنهنجي ڪارڪن جي قتل تي ٻن ڏينهن جي سوڳ جو اعلان ڪندي چيو آهي ته پارٽي جا 92 ڪارڪن اڃان تائين غائب آهن. نائين زيرو تي پريس ڪانفرنس کي خطاب ڪندي ايم ڪيو ايم جي اڳواڻ ڊاڪٽر خالد مقبول صديقي چيو ته ڪراچي ۾ متحده جي ڪارڪنن کي تشدد جو نشانو بڻايو پيو وڃي. هن چيو ته سندن ڪارڪنن جو عدالتن کان مٿانهون قتل جو سلسلو جاري آهي. هن ڪارڪنن جي قتل تي ٻن ڏينهن جي سوڳ لاءِ واپارين کي اپيل ڪئي. هن چيو ته سرڪاري اهلڪار گهرن ۾ داخل ٿي ڪارڪنن کي اغوا ڪري رهيا آهن. ان موقعي تي ڳالهائيندي ڪنور نويد جميل چيو ته ڪراچي آپريشن جو مطالبو ايم ڪيو ايم ڪيو هو. هن چيو ته ايم ڪيو ايم جا 92 ڪارڪن اڃا تائين گم آهن. هن چيو ته جاري آپريشن ڪجهه ڏينهن بعد سياسي رستو اختيار ڪيو. ڪنور نويد جميل چيو ته ايئن لڳي رهيو آهي ته عدالتون به دٻاءُ جو شڪار آهن. هن صدر، وزيراعظم ۽ وفاقي گهرو وزير تي زور ڀريو ته اهي ڪارڪنن جي قتل جو نوٽيس وٺن.

 

عوامي نيشنل پارٽي پاران ڪي پي ڪي ۾ حڪومت کان استعفيٰ جو مطالبو

پشاور (بيورو) عوامي نيشنل پارٽي ڪي پي ڪي ۾ حڪومت کان استعفيٰ جو مطالبو ڪندي چيو آهي ته نگران سيٽ اپ جوڙي نيون چونڊون ڪرايون وڃن. اي اين پي جي سربراهه اسفند يار ولي ڪي پي ڪي جي مڪاني چونڊن ۾ ڀرپور ڌانڌلين ۽ پرتشدد واقعن کانپوءِ ڪي پي ڪي سرڪار کان استعفيٰ جو مطالبو ڪندي گهر ڪئي آهي ته نگران سيٽ اپ جوڙي ٻيهر چونڊون ڪرايون وڃن. هن چيو ته موجوده حڪومت جي نگراني ۾ ٿيندڙ چونڊون شفاف نه ٿيون ٿي سگهن. هن چيو ته ميان افتخار سان جيڪي ڪجهه ٿيو، ان جو وياج سميت پلاند ورتو ويندو. هن چيو ته ڪي پي ڪي ۾ نين چونڊن لاءِ مختلف سياسي پارٽين سان رابطي ۾ آهيون. هن چيو ته ڪي پي ڪي جي مڪاني چونڊن ۾ سندس گهر واري پنهنجو ووٽ ڪاسٽ ڪرڻ لاءِ ٽن ڪلاڪن تائين انتظار ڪندي رهي.

 

عمران خان جو بانڪي مون کي خط، برما ۾ مسلمانن سان ٿيندڙ ظلمن تي گڏيل قومن جي خاموشي تي ڳڻتي ظاهر

اسلام آباد (بيورو) تحريڪ انصاف جي سربراهه عمران خان بانڪي مون کي خط لکي برما ۾ مسلمانن سان ٿيندڙ ظلمن تي گڏيل قومن جي خاموشي تي ڳڻتي ظاهر ڪئي آهي. پي ٽي آءِ سربراهه بانڪي مون کي لکيل خط ۾ چيو ته برما ۾ مسلمانن تي وڏو ظلم ٿي رهيو آهي جنهن تي کين ڳڻتي آهي. خط ۾ لکيو ويو آهي ته گڏيل قومون برما ۾ مسلمانن سان ٿيندڙ ظلم جو نوٽيس وٺن. عمران خان جو چوڻ هو ته برما ۾ مسلمانن تي ٿيندڙ ظلم فوري طور بند ڪيو وڃي.

 

رينجرز سنڌ پوليس ۾ مقررين ۽ بدلين کي ايپيڪس ڪميٽي جي فيصلن جي ابتڙ قرار ڏئي ڇڏيو

ڪراچي (اسٽاف رپورٽر) سنڌ رينجرز جي ترجمان سنڌ پوليس ۾ مقررين ۽ بدلين کي ايپيڪس ڪميٽي جي فيصلن جي ابتڙ قرار ڏنو آهي. ترجمان ڄاڻايو ته ايپيڪس ڪميٽي جي فيصلي ابتڙ پوليس عملدارن جي مقررين ۽ بدلين سان سندن ڪوبه واسطو ناهي. ترجمان واضح ڪيو ته پوليس ۾ ڀرتيون رائج سسٽم جي تحت ڪرڻ سنڌ پوليس جو پنهنجو فيصلو آهي. ان کان اڳ سنڌ جي نئين گهرو وزير سهيلانور سيال به اعتراض واريو هو. ان جي باوجود هڪ دفعو ٻيهر ڪراچي پوليس ۾ مقرريون ۽ بدليون ڪيون ويون آهن. سنڌ جي آئي جي ڪجهه عرصو اڳ بدلين جا اختيار ڪراچي پوليس چيف غلام قادر ٿيٻي کي ڏنا هئا.

 

دهشتگردي کي مات ڏينداسين ۽ امن کانسواءِ ملڪ ترقي ڪري نٿو سگهي: شهباز شريف

‏ڪراچي (اسٽاف رپورٽر) پنجاب جي وڏي وزير شهباز شريف چيو آهي ته دهشتگردي کي مات ڏينداسين ۽ امن کانسواءِ ملڪ ترقي ڪري نٿو سگهي. ڪراچي ۾ سي ايم هائوس ۾ ميڊيا سان ڳالهائيندي شهباز شريف چيو ته ڪافي عرصي کانپوءِ ڪراچي آيو آهي ، هو صفوران چورنگي سانحي جا جوابدار گرفتار ڪرڻ تي سنڌ جي وڏي وزير کي مبارڪون ڏيڻ آيو آهي. پنجاب جي وڏي وزير چيو ته دهشتگردي صرف بندوق سان ختم نه ٿيندي. هن چيو ته چين جي قيادت وزير اعظم نواز شريف تي اعتماد جو اظهار ڪيو ۽ چين پنجاب ۾ ڏهه ارب ڊالرن جي سيڙپ ڪندو. هن چيو ته وزير اعظم ملڪ ۾ بجلي جي پئدوار ۾ واڌ ڪرڻ گهري ٿو. شهباز شريف چيو ته وزير اعظم نوازشريف ۽ گهرو وزير چوڌري نثار علي ڪراچي ۾ دهشتگردي جو خاتمو ڪرڻ جو پڪو پهه ڪري ڇڏيو آهي. هن چيو ته دهشتگردي جي خاتمي لاءِ سنڌ جي وڏي وزير ۽ گورنر سان ڳالهه ٻولهه ٿي آهي. هن چيو ته پنجاب ۾ ميٽرو بس جي افتتاحي تقريب ۾ شرڪت لاءِ سنڌ جي وڏي وزير ۽ گورنر کي شريڪ ٿيڻ جي دعوت ڏيڻ آيو آهي. هن چيو ته ميٽرو بس مان سموري ملڪ کي فائدو ٿيندو.