تازيون خبرون

Daily Archives: June 3, 2015

ڪوئيٽا ۾ اي پي سي، دشمن پاڪ – چين اقتصادي لنگهه رٿا کي تباهه ڪرڻ گهرن ٿا: نواز شريف وزيراعظم

ڪوئيٽا (بيورو) وزيراعظم ميان نواز شريف، چين جِي مدد سان ڀارت جَي ارادن کي مٽيءَ ۾ ملائڻ جو عزم ظاهر ڪندَي چيو آهي ته دشمن پاڪستان کي خوشحال نٿا ڏسڻ چاهين، قوم کي ورهائڻ لاءِ مستونگ جهڙا واقعا ڪندڙ دهشتگردن جَي مڪمل خاتمي تائين آپريشن ضرب عضب جاري رکيو ويندو. ڪوئيٽا ۾ مستونگ سانحي تي گهرايل آل پارٽيز ڪانفرنس کي خطاب ڪندي نواز شريف چيو ته مستونگ سانحو انتهائي افسوسناڪ آهي، جنهن جي جيتري مذمت ڪجي گهٽ آهي. وزيراعظم چيو ته دشمن مستونگ واقعن جهڙيون ڪارروايون ڪري پاڪستان کي ڪمزور ۽ قوم کي ورهائڻ چاهين ٿا. ميان نواز شريف چيو ته ن ليگ سرڪار ملڪ مان دهشتگردي ۽ انتهاپسندي جَي خاتمي لاءِ پرعزم آهي. هـُن چيو ته دهشتگردي خلاف جنگ ۾ پاڪستان جو 110 ارب ڊالرز جو نقصان ٿي چڪو آهي. وزيراعظم چيو ته آپريشن ضرب عضب کانپوءِ دهشتگرد ڀڄڻ تي مجبور ٿي ويا آهن، ملڪ مان دهشتگردي جي مڪمل خاتمي تائين آپريشن جاري رکيو ويندو. اقتصادي راهداري بابت ڳالهائيندي نواز شريف چيو ته ڀارت پاڪ-چين اقتصادي راهداري تي اعتراض واريا آهن، جن کي چين رد ڪري ڇڏيو آهي. نواز شريف چيو ته پاڪ-چين راهداري تي ملڪ جون سموريون سياسي پارٽيون متحده آهن، ڪنهن ٻئي جي کين پرواهه ناهي. وزيراعظم چيو ته ڀارت نٿو چاهي ته پاڪستان ترقي ڪري پر هو دشمن جي اهڙن ارادن کي مٽيءَ ۾ ملائي پوءِ ئي سک جو ساهه کڻندا. بلوچستان جِي صورتحال تي ڳالهائيندي ميان نواز شريف چيو ته بلوچستان ۾ حالتون ماضي جي ڀيٽ ۾ ڪافي بهتر آهن، ڪوئيٽا جون رونقون جلد ٻيهر بحال ڪرايون وينديون. بلوچستان جي صورتحال تي گهرايل آل پارٽيز ڪانفرنس ۾ وفاقي گهرو وزير چوڌري نثار علي، وفاقي وزير عبدالقادر بلوچ، مير ڄام ڪمال، وڏو وزير عبدالمالڪ بلوچ، صوبائي وزير ۽ ن ليگ، پشتون خواهه ملي عوامي پارٽي، جي يو آءِ، اي اين پي ۽ بي اين پي جَي مقامي اڳواڻن وڏي انگ ۾ شرڪت ڪئي. اي پي سي ۾ پاڪ فوج جو سربراهه جنرل راحيل شريف، ڊي جي آءِ ايس آءِ ليفٽيننٽ جنرل رضوان اختر، ڊي جي آءِ بي، ڪمانڊر سدرن ڪمانڊ ليفٽيننٽ جنرل ناصر جنجوعه ۽ آءِ جي ايف سي به شريڪ ٿيو. ان کان اڳ وزيراعظم ميان نواز شريف گورنر هائوس ڪوئيٽا ۾ اعليٰ سطحي اجلاس جِي صدارت پڻ ڪئي، جنهن ۾ مستونگ سانحي ۽ بلوچستان صورتحال تي غور ويچار ڪيو ويو.

 

پورٽ قاسم اٿارٽي ۾ غير قانوني ڀرتي ڪيل ملازمن خلاف ڪارروائي جو حڪم

ڪراچي (اسٽاف رپورٽر) سپريم ڪورٽ جي جسٽس انور ظهير جمالي پورٽ ۽ شپنگ جي اڳوڻي وفاقي وزير بابر غوري جي وزارت واري دور ۾ پورٽ قاسم اٿارٽي ۾ 2 گريڊ کان 21 هين گريڊ تائين غير قانوني طور ڀرتي ڪيل ملازمن خلاف ڪارروائي جو حڪم ڏيندي، اڪلايل ڪيس کي ٻيهر کوليندي ڄاڻايل ملازمن خلاف ڪارروائي بابت عدالتي حڪمن تي عملدرآمد لاءِ فل بئنچ جوڙڻ جي سفارش ڪري ڇڏي آهي. عدالت اهڙو حڪم گذريل ڏينهن پورٽ قاسم اٿارٽي جي اڳوڻي سيڪريٽري جاويد جبار ميمڻ پاران داخل ڪيل درخواست تي ڏنو. جنهن ۾ سندس پاران اهو موقف  اختيار ڪيو ويو هو ته پورٽ ۽ شپنگ جي اڳوڻي  وفاقي وزير بابر غوري جي وزارت واري دور ۾ پورٽ قاسم اٿارٽي ۾ قائدن جي خلاف ورزي ڪندي 2 گريڊ کان 21 هين گريڊ تائين  1091 ملازمن کي ڀرتي ڪيو ويو، جنهن خلاف سپريم ڪورٽ پاران انڪوائري جو حڪم ڏيڻ تي پورٽ ۽ شپنگ جي وفاقي سيڪريٽري ڄاڻايل ڀرتين ۾ قائدن جي خلاف ورزي ٿيڻ جي تصديق ڪئي، جنهن تي عدالت وفاقي سرڪار ۽ پورٽ قاسم جي چيئرمين کي انهن ملازمن خلاف قانون مطابق ڪارروائي جو حڪم ڏنو ۽ ان سان گڏو گڏ پورٽ قاسم اٿارٽي ۾ ڀرتين، ترقين ۽  ڪانٽريڪٽي ملازمن کي ريگيولر ڪرڻ خلاف منع نامو جاري ڪيو پر ان باوجود وفاقي سرڪار ۽ پورٽ قاسم اٿارٽي جي انتظاميه اهڙي حڪم تي عملدرآمد نه ڪيو جنهن خلاف عدالت ۾ توهين عدالت جي درخواست داخل ڪئي وئي جنهن تي پورٽ قاسم جي موجوده چيئرمين آغا جان اختر ۽ پورٽ ۽ شپنگ واري اڳوڻي سيڪريٽري حبيب الله خٽڪ عدالت کان غير مشروط معافي طلب ڪندي عدالتي حڪمن تي عملدرآمد لاءِ حلف ناما داخل ڪيا جنهن تحت اڳوڻي وفاقي سيڪريٽري حبيب الله خٽڪ پورٽ قاسم ۾ غير قانوني طور ڀرتي ڪيل ڪجهه اعليٰ آفيسرن کي شوڪاز نوٽيس جاري ڪيا پر حبيب الله خٽڪ جي رٽائرمينٽ کان پوءِ انهن خلاف وڌيڪ ڪارروائي روڪي وئي جيڪا هن وقت تائين تڪميل تي نه پهچي سگهي آهي ۽ عدالت جي حڪم تي غير قانوني طور ڀرتي ڪيل ملازمن کي فارغ نه ڪيو ويو پر ان کان پوءِ پورٽ قاسم جي موجوده چيئرمين شڪارپور جي اڳوڻي ڊپٽي ڪمشنر ڪاظم جتوئي ۽ اڳوڻي ايس ايس پي ڊاڪٽر نجف مرزا کي ڊائريڪٽر جي عهدن تي مقرر ڪري ڇڏيو آهي جيڪو پڻ قانون جي خلاف آهي. داخل ڪيل درخواست ۾ عدالت کي گذارش ڪئي وئي آهي ته پورٽ قاسم اٿارٽي ۾ غير قانوني ڀرتين خلاف ڪارروائي جو يقين ڏيارڻ جي بنياد تي اڪلايل ڪيس کي ٻيهر بحال ڪيو وڃي ۽ پورٽ قاسم جي چيئرمين ۽ ٻين خلاف ڪارروائي ڪئي وڃي.

 

عمران سنجيده آهي ته 3 شرطون پوريون ڪري،چونڊ عمل چورائيندڙن کي پارٽي توڙي حڪومت مان نيڪالي ڏِئَي: پرويز رشيد

اسلام آباد (بيورو) وفاقي سرڪار جي ترجمان پرويز رشد چيو آهي ته عمران سنجيده آهي ته 3 شرطون پوريون ڪري،چونڊ عمل چورائيندڙن کي پارٽي توڙي حڪومت مان نيڪالي ڏِئَي. پنهنجي جاري ڪيل بيان ۾ پرويز رشيد چيو ته خيبرپختونخوا ۾ مڪاني چونڊن دوران بدترين ڌانڌليون ٿيون. پرويز رشيد چيو ته عمران خان سنجيده آهي ته پهريان 3 شرطون پوريون ڪري.وفاقي وزير پرويز رشيد چيو ته عمران خان خيبرپختونخوا ۾ مڪاني چونڊن وارو عمل چورائيندڙن کي پارٽي توڙي حڪومت مان نيڪالي ڏئي. پرويز رشيد وڌيڪ چيو ته عمران خان چونڊ نتيجا چوري ڪندڙن کي پارٽي جي ٽڪيٽ نه ڏئي ۽ چار جي ٽولي جو نالو ٻڌائي. وفاقي وزير چيو ته چار جي ٽولي مڪاني چونڊن دوران مرضي جا نتيجا حاصل ڪرڻ لاءِ ڪِريَل حربا استعمال ڪرڻ جو مشورو ڏنو.

 

ڀارت اسان جي امن جي خواهش کي ڪمزوري نه سمجهي: چوڌري نثار

اسلام آباد:(بيورو) وفاقي گهرو وزير چوڌري نثار علي خان  چيو آهي ته ڀارتي بچاءَ واري وزير پنهنجي بيان ۾ پاڪستان  ۾ دهشتگردي جي ذميواري قبول ڪئي آهي، پاڪستان جي امن واري خواهش کي ڪمزوري نه سمجهيو وڃي. چوڌري نثار چيو ته ڀارتي قيادت پاڪستان کي پوئتي ڪرڻ ، ڪمزور ڪرڻ ۽ غير ترقي يافتا رکڻ لاءِ هر طريقو استعمال ڪري رهي آهي، پاڪ-چين اقتصادي لنگهه تي ڀارت جي واويلا سهپ کان ٻاهر آهي. ڀارت جو اصل چهرو  واضع طور تي سامهون  اچي ويو آهي. وفاقي گهرو وزير چيو ته ڀارتي وزير اعظم جو بيان اهو ظاهر ڪري ٿو ته ڀارت ، پاڪستان کي ٽوڙڻ چاهي ٿو، ڀارت اسان جي ترقي ۾ خوش ناهي.

 

خورشيد شاهه ڪي پي ڪي ۾ مڪاني چونڊون ٻيهر ڪرائڻ جو مطالبو ڪري ڇڏيو

اسلام آباد(بيورو) قومي اسيمبلي ۾ مخالف ڌر جي اڳواڻ سيد خورشيد احمد شاهه چيو آهي ته خيبرپختونوا جي مڪاني چونڊن ۾ رڪارڊ ڌانڌلي ٿي تنهن ڪري ٻيهر چونڊون ڪرايون وڃن. اسلام آباد ۾ ميڊيا سان ڳالهائيندي خورشيد شاهه چيو ته ثابت ٿي ويو ته جيڪو حڪومت ۾ هوندو آهي اهو اخلاقيات وساري ويهندو آهي. هن چيو ته اسان ڌانڌلي سٽيل اليڪشن  کي نٿا مڃون، تنهن ڪري عدالتي جاچ ڪرائي وڃي. خپرشيد شاهه چيو ته پيرا ملٽري فورسز جي نگراني ۾ چونڊون ٻيهر ٽن مرحلن ۾ ڪرايون وڃن.

 

مدرسن جي رجسٽريشن بابت پاليسي جلد جاري ڪئي وڃي: سنڌ حڪومت جو وفاق کان مطالبو

ڪرچي (اسٽاف رپورٽر) سنڌ جي وڏي وزير سيد قائم علي شاهه جي صدارت هيٺ هڪ اهم اجلاس ۾ سي پي ايل سي آفيس گورنر هائوس کان آئي جي آفي منتقل ڪرڻ جو فيصلو ڪيو ويو آهي. وڏي وزير جي صدارت هيٺ امن امان بابت اهم اجلاس ٿيو جنهن ۾ رينجرس ۽ پوليس جي آفيسرن کانسواءِ صوبئي گهرو وزير سهيل انور سيال، نڻي واري وزير مراد علي شاهه، مڪاني ادارن واري وزير شرجيل ميمڻ ۽ ٻين شرڪت ڪئي. گهرو وزير سهيل انور سيال اجلاس کي صوبي ۾ امن امان بابت بريفنگ  ڏني. ان موقعي تي سي پي ايل سي آفيس گورنر هائوس کان آئي جي آفيس منتقل ڪرڻ، ڪچين آبادين کي بهتر نموني پڪو ڪرڻ ۽ ريسڪيو 1122 جيان سنڌ ۾ به ريسڪيو  سروس شروع ڪرڻ جو فيصلو ڪيو ويو. اجلاس دوران وڏي وزير هدايت ڪئي ته ڪراچي ۾ داخل ٿيندڙ ۽ ٻاهر ويندڙ رستن تي ترت اسڪينر لڳايا وڃن. اجلاس ۾ ايندڙ صوبائي بجيٽ ۾ پوليس لاءِ فنڊ رکڻ وارين تجويزن تي پڻ غُر ڪيو ويو، جڏهن ته  اجلاس ۾ وفاقي حڪومت کان مطالبو ڪيو ويو ته مدرسن جي رجسٽريشن بابت پاليسي جلد جاري ڪئي وڃي . وڏي وزير سيد قائم علي شاهه اجلاس کي خطاب ڪندي چيو ته ڪراچي ۾ امن قائم ڪرڻ لاءِ پوليس ۽ رينجرس جي ڪارروائي ساراهه جوڳي آهي ، اسان ٻنهي ادارن جي آفيسرن ۽ اهلڪارن جي ڏنل قربانين جو قدر ڪيون ٿا. هن ويڪ چيو ته ڪراچي ۾ هلندڙ ٽارگيٽيڊ آپريشن خلاف واويلا روڪڻ لاءِ آئي ايس پي آر کان به مدد وٺندي پوليس کي جديد هٿيار ڏنا ويندا.

 

سنڌ جي بجيٽ 12 جون تي پيش ڪرڻ جو امڪان، ملازمن جي پگهارن ۾ 15 سيڪڙو واڌ جي تجويز

ڪراچي (اسٽاف رپورٽر) سنڌ حڪومت ايندڙ مالي سال 16-2015 ع جي بجيٽ 12 جون تي پيش ڪرڻ جو فيصلو ڪيو آهي. سنڌ سرڪار جي ذريعن جو چوڻ آهي ته صوبائي بجيٽ ناڻي وارو وزير سيد مراد علي شاهه 12 جون تي سنڌ اسيمبلي ۾ پيش ڪندو. ذريعن مطابق سنڌ جي بجيٽ اٽڪل 700 ارب رپين تي ٻڌل هوندي،جنهن ۾ سالياني صوبائي ترقياتي پروگرام لاءِ هڪ کرب 60 ارب رپيا رکيا ويا آهن، ذريعن مطابق سنڌ حڪومت سرڪاري ملازمن جي پگهارن ۾ وفاقي سرڪار جي اعلان جي حساب سان واڌ ڪرڻ جو فيصلو ڪيو آهي، جنهن هيٺ ملازمن جي پگهارن ۽ پينشن ۾ 10 کان 15 سيڪڙو واڌ ڪرڻ جو امڪان آهي. صوبائي بجيٽ دستاويز مطابق پاڻي جي فراهمي واري رٿا ڪي فور لاءِ اڍائي ارب ۽ گندي پاڻي جي نيڪال واري نظام جي رٿا ايس ٿري لاءِ بجيٽ ۾ 2 ارب رپيا رکڻ جي تجويز آهي.

 

نيپرا بجلي اگهن ۾ 2 رپيا 8 پئسا في يونٽ گهٽتائي جي منظوري ڏئي ڇڏي

اسلام آباد (بيورو) نيپرا بجلي اگهن ۾ 2 رپيا 8 پئسا في يونٽ گهٽتائي جي منظوري ڏئي ڇڏي آهي، اگهن ۾ لاٿ ڪي اليڪٽرڪ جي واهپيدارن تي لاڳو نه هوندي. نيپرا نيشنل پاور پراجيزنگ ايجنسي جي درخواست تي بجلي اگهن ۾ لاٿ جي منظوري ڏئي ڇڏي. نيپرا موجب، مارچ مهيني جي فيول ايڊجيسٽمينٽ جي مد ۾ بجلي قيمتن ۾ 2 رپيا 8 پئسا في يونٽ گهٽتائي ڪئي وئي آهي، جڏهن ته بلن ۾ گهٽائي جون مهيني ۾ ڪئي ويندي. بجلي اگهن م لاٿ50 کان گهٽ يونٽ استعمال ڪندڙ ڪي اليڪٽرڪ جي واهپيدارن تي لاڳو نه هوندي. واضح رهي ته عالمي مارڪيٽ ۾ تيل جي اگهن ۾ گهٽتائي سبب ملڪ اندر بجلي قيمتن م لاٿ جي منظوري ڏني وئي آهي.

 

ايبٽ آباد ۾ فائرنگ، تحريڪ انصاف جا 4 ڪارڪن مارجي ويا

ايبٽ آباد (م.ڊ) ايبٽ آباد ۾ اڻڄاتل هٿيار بندن جي فائرنگ ۾ تحريڪ انصاف جا 4 ڪارڪن مارجي ويا. شهر جي ڦهاري چوڪ تي اڻڄاتل هٿياربندن فائرنگ ڪئي جنهن جي نتيجي ۾ 3 ڄڻا موقعي تي ئي مارجي ويا ۽ هڪ ڄڻو زخمي ٿي پيو. واقعي کانپوءِ پوليس پهچي زخمي کي اسپتال منتقل ڪيو جيڪو پڻ علاج دوران فوت ٿي ويو. واقعي کانپوءِ مقتولن جي وارثن شهر ۾ تيز برسات کانپوءِ به لاش روڊ تي رکي ڌرڻو هنيو جنهن سبب شاهراههِ ريشم تي ٽريفڪ بيهجي وئي. احتجاج دوران مڇريل ماڻهن قومي اسيمبلي ڊپٽي اسپيڪر مرتضيٰ جاويد عباسي جي گاڏي پڻ روڪي ڇڏي. پوليس جو چوڻ آهي ته واقعو مڪاني چونڊن دوران ٿيل جهيڙي جو نتيجو لڳي ٿو.

 

خيبر پختونخوا ۾ مڪاني چونڊون ٻيهرڪرائڻ لاءِ تيار آهيون: عمران خان

اسلام آباد (بيورو) تحريڪ انصاف جي سربراهه عمران خان چيو آهي ته هو خيبرپختونخوا ۾ مڪاني چونڊون ٻيهر ڪرائڻ لاءِ تيار آهن، اسلام آباد ۾ ميڊيا سان ڳالهائيندي عمران خان چيو ته اسان خيبرپختونخوا ۾ ملڪي تاريخ جون سڀ کان وڏيون چونڊون ڪرايون آهن، جن ۾ سڀني سياسي پارٽين گڏجي تحريڪ انصاف جو مقابلو ڪيو. چونڊن ۾ ڌانڌلي بابت سوال جي جواب ۾ عمران خان چيو ته اسان مڪاني چونڊون ٻيهر ڪرائڻ لاءِ تيار آهيون، جتي ڌانڌلي جو الزام لڳو آهي، اسان اتي به اليڪشن ٻيهر ڪرائڻ لاءِ تيار آهيون، سندس چوڻ هو ته مان اڳڪٿي ٿو ڪيان ته جيڪڏهن ٻيهر چونڊون ٿيون ته تحريڪ انصاف اڳ کان به وڌيڪ ووٽ کڻندي. هڪ سوال جي جواب ۾ عمران خان چيو ته اسان فوج جي نگراني ۾ به چونڊون ڪرائڻ لاءِ تيار آهيون.