تازيون خبرون

Daily Archives: June 2, 2015

وزير اعظم مالي بجيٽ 16-2015 جي سالياني ترقياتي بجيٽ جي منظوري ڏئي ڇڏي

اسلام آباد (بيورو) وزير اعظم نواز شريف ،قومي اقتصادي ڪونسل جي اجلاس کانپوءِ مالي بجيٽ 2015-16 جي سالياني ترقياتي بجيٽ جي منظوري ڏئي ڇڏي آهي. قومي اقتصادي ڪونسل جو اجلاس وزير اعظم نواز شريف جي صدارت ۾ ٿيو. اجلاس ۾ خيبرپختون خوا ۽ گلگت بلتستان جي گورنرن سميت چئني صوبن جي وڏن وزيرن، خزاني جي وزيرن سميت وفاقي وزيرن شرڪت ڪئي. ان موقعي تي اجلاس کي 2014-15 دوران ملڪي معيشت ۽ ايندڙ مالي سال جي لاءِ ڪاٿن جي باري ۾ بريفنگ ڏني وئي. اجلاس ۾ پهرين جولائي کان شروع ٿيندڙ نئين مالي سال لاءِ ترقياتي بجيٽ جي مد ۾ پندرهن سو ٽيهه ارب رپين جي به منظوري ڏني وئي. ان موقعي تي صوبن جي مطالبي تي صحت لاءِ يارهن ارب ڏهه ڪروڙ رپيا رکڻ تي اتفاق ڪيو ويو. اجلاس ۾ واٽر ڪورسز جي لاءِ هلندڙ مالي سال دوران ٻه ارب جاري ڪرڻ تي به اتفاق ڪيو ويو. ڪراچي ۾ پاڻي جي منصوبي ڪي فور جي لاءِ ٻه ارب ۽ ايندڙ مالي سال لاءِ اڍائي ارب رپيا مختص ڪرڻ جو فيصلو ڪيو ويو. اجلاس ۾ سنڌ جي وڏي وزير سيد قائم علي شاهه ڪراچي جي پاڻي لاءِ وڌيڪ فنڊ فراهم ڪرڻ جو مطالبو ڪيو، جنهن تي وزير اعظم خاطري ڪرائي ته گهربل رقم فراهم ڪئي ويندي.

 

سنڌ هاءِڪورٽ آءِ جي سنڌ سميت ٻين پاران ٻيهر جمع ڪرايل معافي نامو رد ڪري ڇڏيو

ڪراچي (اسٽاف رپورٽر) سنڌ هاءِ ڪورٽ، توهين عدالت ڪيس ۾ آءِ جي سنڌ ۽ ٻين پوليس آفيسرن پاران ٻيو ڀيرو جمع ڪرايل معافي نامي کي قبول ڪرڻ کان انڪار ڪري ڇڏيو. جسٽس سجاد علي شاهه جي سربراهي ۾ سنڌ هاءِ ڪورٽ جي 2 رڪني بئنچ آءِ جي سنڌ ۽ ٻين پوليس آفيسرن خلاف توهين عدالت ڪيس جي ٻڌڻي ڪئي. ٻڌڻي دوران آءِ جِي سنڌ پوليس جَي وڪيل فاروق ايڇ نائيڪ هڪ ڀيرو ٻيهر عدالت ۾ معافي نامو جمع ڪرايو. معافي نامي ۾ موقف اختيار ڪيو ويو آهي ته آءِ جي سنڌ ۽ ٻين پوليس آفيسرن کان غلطي ٿي وئي آهي. فاروق ايڇ نائيڪ موجب، ميڊيا سان جيڪڏهن زيادتي ٿي آهي ته هو ان کان معافي وٺڻ لاءِ تيار آهن. آءِ جِـي سنڌ پوليس جَي وڪيل عدالت کي اپيل ڪئي ته آءِ جي سنڌ ۽ ٻين پوليس آفيسرن کي غلطي جي معافي ڏني وڃي. ٻڌڻيءَ دوران صحافين جَي وڪيل بئريسٽر صلاح الدين موقف اختيار ڪيو ته پوليس عدالت جي تقدس کي پائمال ڪيو آهي. بئريسٽر صلاح الدين چيو ته پوليس انصاف ۾ رڪاوٽ وجهڻ جي ڪوشش ڪئي، جيڪو عمل سڌو سنئون ڏوهه جَي زمري ۾ اچي ٿو. صحافين جَي وڪيل چيو ته سنڌ هاءِ ڪورٽ جي رجسٽرار پاران آءِ جي سنڌ ۽ ٻين پوليس اهلڪارن کي فون ڪري طلب ڪيو پر هو نه آيا. جسٽس سجاد علي شاهه ريمارڪس ڏيندي چيو ته 2007ع ۾ به آءِ جي سنڌ معافي طلب ڪئي هئي ۽ هاڻ ٻيهر معافي طلب ڪئي پئي وڃي. ايڊووڪيٽ جنرل سنڌ چيو ته رجسٽرار جي سربراهي ۾ ڪميٽي جوڙي واقعي جي جاچ ڪرائي وڃي. ايڊووڪيٽ جنرل سنڌ جو موقف ٻڌڻ کانپوءِ جسٽس سجاد علي شاهه ڪيس جي ٻڌڻي 4 جون تائين ملتوي ڪري ڇڏي. ان کان اڳ چيف سيڪريٽري صديق ميمڻ عدالت ۾ رپورٽ جمع ڪرائي، جنهن ۾ چيو ويو آهي ته سبحان ميمڻ جي سربراهي ۾ ڪميٽي قائم ڪئي وئي آهي، جيڪا واقعي جي جاچ ڪندي.

 

عدالت 18 هين ترميم خلاف ناهي، پر 21 هين ترميم تي روشني وڌي وڃي: سپريم ڪورٽ

اسلام آباد (بيورو) سپريم ڪورٽ، 18هين، 21 هين آئيني ترميمن توڙي فوجي عدالتن خلاف ڪيس ۾ وفاق طرفان اٽارني جنرل کي دليل ڏيڻ لاءِ 15 جون تي طلب ڪري ورتو، عدالت جو چوڻ آهي ته پارليامينٽ کي پاڻ ئي آئين جي بنيادي ڍانڍچي جي خبر ناهي. جسٽس ناصر المـُلڪ جي سربراهي ۾ 17 رڪني لارجر بينچ، 18 هين، 21 هين آئيني ترميمن ۽ فوجي عدالتن خلاف داخل درخواستن جي ٻـُڌڻي ڪئي. خيبر پختون خواهه حڪومت جي وڪيل افتخار گيلاني پنهنجا دليل مڪمل ڪري ورتا. افتخار گيلاني چيو ته پارليامينٽ جا اختيار بادشاهن جهڙا آهن، پارليامينٽ پنهنجا اختيار صوبن تائين محدود نه ٿي ڪري. جسٽس دوست محمد کوسا ريمارڪس ڏنا ته آئين جي آرٽيڪل 6 ۾ پارليامينٽ کي آئين جو ڪم محفوظ ڪيل آهي. جسٽس ثاقب نثار چيو ته پارليامينٽ کي پاڻ ئي آئين جي بنيادي ڍانچي جي خبر ناهي. جسٽس اعجاز اسلم چيو ته عدالت 18 هين ترميم خلاف ناهي، پر 21 هين ترميم تي روشني وجهي وڃي. چيف جسٽس ناصر المـُلڪ وفاق طرفان دليل ڏيڻ لاءِ اٽارني جنرل 15 جون تي طلب ڪري ورتو. اٽارني جنرل سلمان اسلم خواجا 21 هين آئيني ترميم بابت 15 جون تي پنهنجا دليل ڏيندو جڏهن ته ڪيس جي ٻڌڻي سڀاڻي تائين ملتوي ڪري ڇڏي.

 

يورپ جي معيار جون سهولتون فراهم ڪرڻ جو حڪومت ارادو رکي ٿي: پرويز رشيد

راولپنڊي (بيورو) راولپنڊي ميٽرو بس سروس منصوبي تي ڪم مڪمل ٿيڻ کانپوءِ آزمائشي سروس هلائي وئي، جنهن ۾ وفاقي وزير پرويز رشيد سميت ٻين اڳواڻن سفر ڪيو، شهباز شريف چيو آهي ته 23 ڪلوميٽر ڊگهو اهو منصوبو 24اسٽيشنن تي ٻڌل هوندو، جلد وزير اعظم ان جو افتتاح ڪندو. راولپنڊي کي اسلام آباد سان ملائيندڙ ميٽرو بس منصوبي جي آزمائشي سروس کانپوءِ پريس ڪانفرنس کي خطاب ڪندي شهباز شريف چيو ته انهي منصوبي سان اسلام آباد ۽ راولپنڊي جي لکين ماڻهن کي آسان سفري سهولت ملندي. هن چيو ته منصوبي تي رڪارڊ وقت ۾ ڪم مڪمل ڪيو ويو آهي ۽ جلد انهي منصوبي جو وزير اعظم افتتاح ڪندو. هن چيو ته منصوبي ۾ ٿرڊ پارٽي پارٽيسيپيشن طور نيسپاڪ کي شريڪ ڪيو ويو آهي، جنهن جي سرٽيفڪيٽس کانسواءِ ڪنهن کي به ادائيگيون نه ڪيون وينديون. هن چيو ته 1991 ۾ اسلام آباد جي آبادي هڪ لک کان گهٽ هئي ۽ اڄ وفاقي راڄڌاني ۾ 13 لک ماڻهو وسن ٿا، جڏهن ته راولپنڊي ۾ انهي کان چئوڻ پنجوڻ ماڻهو رهن ٿا. هن چيو ته هي منصوبو رڳو پنجاب جو منصوبو نه آهي پر ٻنهي شهرن ۾ ملڪ جي ڪنڊ ڪڙڇ کان ماڻهو آباد آهن، جن کي عالمي معيار جي سفري سهولت ملندي . شهباز شريف جو چوڻ هو ته سندس حڪومت قائد اعظم ۽ علامه اقبال جي جي خواب جي ساڀيان لاءِ ڪم ڪري رهي آهي. شهباز شريف جو چوڻ هو ته جلد وزير اعظم انهي منصوبي جو افتتاح ڪندو. ان کان اڳ وفاقي وزير پرويز رشيد به خطاب ڪندي چيو ته يورپ جي معيار جون سهولتون فراهم ڪرڻ جو حڪومت ارادو رکي ٿي ۽ ان سان شاگردن، مريضن، ملازمن، وڪيلن ۽ ججن سميت سڀني کي فائدو پهچندو.

 

تيل اگهن ۾ واڌ ڪري غريب عوام سان ظلم ڪيو ويو آهي: خورشيد شاهه

اسلام آباد (بيورو) مخالف ڌُر جي اڳواڻ سيد خورشيد شاهه چيو آهي ته پيٽروليم مصنوعات جي قيمتن ۾ واڌ سان ملڪ جي غريب عوام سان ظلم ٿيو، بجيٽ کان پهريان بجيٽ پيش ڪري عوام تي مهانگائي بم ڪرايو ويو. اسلام آباد مان جاري بيان ۾ خورشيد شاهه وفاقي حڪومت کي پيٽروليم مصنوعات جي قيمتن ۾ واڌ تي سخت تنقيد جو نشانو بنائيندي حڪومت کان مطالبو ڪيو آهي ته پيٽروليم مصنوعات جي قيمتن ۾ واڌ فوري واپس ورتي وڃي. هن چيو ته پيٽروليم مصنوعات جي قيمتن ۾ واڌ سان هر شيءِ مهانگي ٿي ويندي. اهڙي مني بجيٽ پيش ڪرڻي آهي ته سرڪاري ملازمن جي پگهارن ۾ گهٽ ۾ گهٽ 0 5  سيڪڙو واڌ ڪئي وڃي، اهڙي ۾ 5  جون تي بجيٽ پيش ڪرڻ جي ڪا ضرورت نه آهي. هن چيو ته پيٽروليم مصنوعات جي قيمتن ۾ واڌ ڪنهن جي منشا تي نه ڪئي وڃي.

 

سراج الحق پاران ڀارتي وزير اعظم نريندر مودي کي گرفتار ڪندڙ لاءِ هڪ ارب رپيا انعام جو اعلان ڪري ڇڏيو

راولاڪوٽ (مانيٽرنگ ڊيسڪ) جماعت اسلامي جي امير سراج الحق، ڀارتي وزيراعظم نريندر مودي کي گرفتار ڪندڙ لاءِ هڪ ارب رپيا انعام جو اعلان ڪري ڇڏيو، سندس چوڻ آهي ته ڪشمير مسئلي جي حل کانسواءِ ڀارت سان دوستي جي ڳالهه ڪندڙ غدار آهن. آزاد ڪشمير جي علائقي راولاڪوٽ ۾ عوامي جلسي کي خطاب ڪندي سراج الحق جو چوڻ هو ته ڪشمير پاڪستان جو حصو آهي ۽ ان مسئلي جي حل کانسواءِ نئين دهلي سان دوستي جي ڳالهه ڪندڙ غدار آهن. هن چيو ته ڀارت سان دوستي جي ڳالهه ڪندڙ ممبئي هليا وڃن، پاڪستان ۾ انهن لاءِ ڪا جڳهه ناهي، نئين دهلي سان سندن دوستي جي ايجنڊا ڪشمير جي آزادي آهي. جماعت اسلامي جي امير جو چوڻ هو ته سٺي قيادت کانسواءِ ملڪ ترقي نه ٿو ڪري سگهي، ڪشمير جو هر نوجوان شينهن پر حڪمراني بزدلن جي هٿن ۾ آهي. سراج الحق چيو ته ملڪ جا حڪمران انڌا، گونگا، ٻوڙا يا ڀارت سان مليل آهن. هن چيو ته پاڪستان جي محبت ۾ سيد علي گيلاني سڄي زندگي جيلن ۽ نظربندي ۾ گـُذاري.

 

بلاول ڀٽو زرداري 6 مهينن کانپوءِ ڏيهه واپس پهچي ويو، ڪي پي ڪي ۾ چونڊ دوران گهٽ سيٽون کڻڻ تي ڳڻتي ظاهر

ڪراچي(م.ڊ) پيپلز پارٽي جو چيئرمين بلاول ڀٽو زرداري 6 مهينن کانپوءِ ڏيهه واپس پهچي ويو. خيبر پختونخواهه جي مڪاني چونڊن ۾ گهٽ انگ ۾ کٽيل سيٽن تي بلاول ڀٽو زرداري سخت ڳڻتيءَ جو اظهار ڪندي ڏيهه واپس پهتو آهي. بلاول ڀٽو زرداري خاص جهاز ذريعي دبئي کان ڪراچي ايئرپورٽ پهتو. ذريعن موجب بلاول ڀٽو زرداري سنڌ ۽ پنجاب ۾ مڪاني چونڊ مهم جي قيادت پاڻ ڪندو. ذريعن ٻڌايو ته بلاول ڀٽو زرداري پنجاب جي مختلف شهرن ۾ جلوسن جي قيادت ڪندو ۽ هـُو پ پ کي پنجاب ۾ ٻيهر مضبوط ڪرڻ لاءِ ناراض ڪارڪنن ۽ ذميوارن کي هڪ ڀيرو ٻيهر گڏ ڪندو.

 

پشاور ۾ مڪاني چونڊن دوران بدانتظامي ٿيڻ سبب 26 پولنگ اسٽيشنز جا نتيجا ڪالعدم قرار، ٻيهر چونڊن جو اعلان

پشاور (بيورو) اليڪشن ڪميشن، پشاور ۾ ڊسٽرڪٽ ريٽرننگ آفيسر طرفان مڪاني چونڊن  دوران بدانتظامي جا واقعا پيش اچڻ سبب 26 پولنگ اسٽيشنز جا نتيجا ڪالعدم قرار ڏئي ڇڏيا. پشاور ۾ ڊسٽرڪٽ ريٽرننگ آفيسر جي صدارت هيٺ اجلاس ٿيو. اجلاس ۾ چيو ويو ته پشاور ۾ مڪاني چونڊن دوران ڪجهه پولنگ اسٽيشنز تي بدانتظامي ٿي جنهن سبب اليڪشن ڪميشن کي 26 پولنگ اسٽيشنز تي ٻيهر چونڊون ڪرائڻ جي تجويز ڏني آهي. اليڪشن ڪميشن تجويز منظور ڪندي ڄاڻايل پولنگ اسٽيشنز جا نتيجا ڪالعدم قرار ڏيندي ٻيهر پولنگ ڪرائڻ جو اعلان ڪيو آهي. اليڪشن ڪميشن طرفان جن پولنگ اسٽيشنز تي ٻيهر چونڊون ڪرايون وينديون انهن ۾ يونين ڪائونسل هزار خاني، ماشو خيل ۽ شاهي بالا جا علائقا شامل آهي. ياد رهي ته 30 مئي تي خيبر پختون خواهه ۾ ٿيل مڪاني چونڊن دوران ڪجهه هنڌن تي بدانتظامي، هوائي فائرنگ، ويڙهه ۽ ڀڃ ڊاهه جا واقعا پيش آيا هئا.

 

 

اسامه بن لادن ۽ ايمن الظواهري سان پڻ ملاقات ڪري چڪو آهيان:صفورا سانحي جي ماسٽر مائينڊ طاهر جو اعتراف

ڪراچي (اسٽاف رپورٽر) صفوران سانحي جي گرفتار ماسٽر مائينڊ طاهر انڪشاف ڪيو آهي ته هن 2010ع ۾ دهشتگردي لاءِ پنهنجو گروپ جوڙيو، جنهن ۾ شامل ميمبرن کي هر مهيني 25 هزار رپيا ڏيندو هو، جڏهن ته هو اساما بن لادن ۽ ايمن الظواهري سان پڻ ملاقات ڪري چڪو آهي. صفوران سانحي واري ڪيس ۾ گرفتار ماسٽر مائينڊ طاهر جاچ ٽيم آڏو اهم انڪشاف ڪيا آهن. طاهر جاچ ٽيم کي ٻڌايو آهي ته صفوران سانحي ۾ شهيد ٿيل 46 ڄڻن مان 19 کي هن پاڻ قتل ڪيو. سانحي جَي مک جوابدار موجب، 2007ع ۾ به هو گرفتار ٿيو هو، جنهن بعد 2010ع ۾ آزاد ٿيندَي ئي هن سڀ کان پهريون جاچ آفيسر منوج ڪمار کي قتل ڪيو. ذريعن موجب، طاهر جاچ ٽيم کي ٻڌايو ته جيل مان آزادي بعد 2010ع ۾ دهشتگردي لاءِ هن پنهنجو گروپ جوڙيو، جنهن ۾ شامل ميمبرن کي هو هر مهيني 20 کان 25 هزار رپيا ڏيندو هو. هـُن چيو ته حيدرآباد ۾ هڪ سياسي جماعت جَي ڪارڪن کي به قتل ڪيو، جڏهن ته 2012ع ۾ هو ڪراچي اندر بئنڪ ڌاڙين ۾ به ملوث رهيو آهي. صفوران سانحي جي ماسٽر مائينڊ چيو ته هنن رينجرز جي سيڪٽر ڪمانڊر برگيڊيئر باسط کي به قتل ڪرڻ جو منصوبو جوڙيو هو. ذريعن موجب، طاهر جاچ ٽيم کي اهو به ٻڌايو ته هو 1999ع ۾ جهاد لاءِ افغانستان ويو هو، جنهن دوران هن جي القاعده جي اڳوڻي سربراهه اساما بن لادن ۽ ايمن الظواهري سان ملاقات پڻ ٿي هئي

 

نادرا پنهنجي رپورٽ ۾ اياز صادق کي بچائڻ جي ڪوشش ڪري رهي آهي: عمران خان

ڏکڻ وزيرستان (مانيٽرنگ ڊيسڪ) ڏکڻ وزيرستان ۾ بم ڌماڪي سبب پوليٽڪل محرر سميت 3 ڄڻا مارجي ويا، وزير اعظم ۽ صدر ممنون حسين ڌماڪي جي مذمت ڪندي متاثر گهراڻن سان ڏُک ونڊيو آهي، آءِ ايس پي آر چيو آهي ته اتر وزيرستان ۾ ڪارروائي دوران 12 دهشتگردن کي ماريو ويو آهي. ڏکڻ وزيرستان ۾ روڊ ڪناري نصب بم ڦاٽڻ سبب پوليٽڪل محرر سميت 3 ڄڻا مارجي ويا. ڏکڻ وزيرستان ۾ روڊ ڪناري بم ڦاٽڻ سبب پوليٽيڪل محرر فاروق وزير مارجي ويو. صدر ممنون حسين ۽ وزير اعظم ميان نواز شريف ڏکڻ وزيرستان بم ڌماڪي جي مذمت ڪندي متاثرن گهراڻن سان همدردي جو اظهار ڪيو آهي، ٻنهي اڳواڻن چيو آهي ته دهشتگردن خلاف آپريشن آخري دهشتگرد جي خاتمي تائين جاري رهندو. اتر وزيرستان جي علائقي دته خيل ۾ سڪيورٽي فورسز جي زميني ڪارروائي دوران 12 دهشتگرد مارجي ويا آهن. آءِ ايس پي آر تصديق ڪندي چيو آهي ته اها زميني ڪارروائي گذريل رات اتر وزيرستان کان 10 ڪلوميٽر پري ڏکڻ-اولهه واري علائقي ۾ ڪئي وئي. آءِ ايس پي آر موجب زميني ڪارروائي دوران 12 دهشتگرد مارجي ويا آهن ۽ ڪجهه فرار ٿي ويا آهن. آءِ ايس پي آر موجب آپريشن ضرب عضب ڪاميابي سان جاري آهي ۽ دهشتگردن خلاف ڪارروائيون آخري دهشتگرد جي خاتمي تائين جاري رهنديون.