تازيون خبرون

Daily Archives: May 30, 2015

پنجاب ڪابينا ۾ واڌ، راڻا ثناءُ الله ۽ ڊاڪٽر عائشه غوث حلف کڻي ورتو ، راڻا ثناءُ کي ساڳيو قلمدان ملڻ جو امڪان

لاهور (بيورو) پنجاب ڪابينا ۾ واڌ کانپوءِ راڻا ثناءُ الله ۽ ڊاڪٽر عائشه غوث صوبائي وزير طور حلف کڻي ورتو آهي، راڻا ثناءُ الله کي قانون ۽ ڊاڪٽر عائشه کي ناڻي واري وزارت جو قلمدان ڏيڻ جو امڪان آهي. گورنر هائوس لاهور ۾ پنجاب جي صوبائي وزيرن جي حلف برداري تقريب ٿي، جنهن دوران گورنر رفيق رجوانه راڻا ثنا الله ۽ ڊاڪٽر عائشه کي صوبائي وزير طور حلف کڻايو. تقريب ۾ پنجاب جي وڏي وزير شهباز شريف سميت صوبائي وزيرن ۽ ٻين شرڪت ڪئي. راڻا ثناءُ الله کي هڪ ڀيرو ٻيهر قانون واري کاتي جو قلمدان ملڻ جو امڪان آهي، جڏهن ته ڊاڪٽر عائشه غوث کي ناڻي وارو وزير مقرر ڪيو ويندو. راڻا ثناءُ الله جي ڊگهي عرصي بعد پنجاب ڪابينا ۾ واپسي ٿي آهي، کيس ماڊل ٽائون واقعي کانپوءِ عهدي تان هٽايو ويو هو.

ڪي پي ڪي ۾ مڪاني چونڊون اڄ ٿينديون،84هزار کان وڌيڪ اميدوار ميدان تي لٿل

پشاور (بيورو) ڪي پي ڪي ۾ مڪاني چونڊون اڄ ٿي رهيون آهن، پيپلز پارٽي، نون ليگ، پي ٽي آءِ، جماعت اسلامي ۽ ٻين پارٽين سميت 84هزار کان وڌيڪ اميدوار ميدان تي لٿل آهن. اليڪشن ڪميشن عورتن کي ووٽ کان روڪيندڙن خلاف سخت ڪارروائي جي هدايت ڪري ڇڏي آهي. اليڪشن  ڪميشن موجب، خيبر پختونخوا جي 41 هزار سيٽن تي 84 هزار 420 اميدوارن ۾ مقابلو ٿيندو، جنهن لاءِ 11 هزار 211 پولنگ اسٽيشنز قائم ڪيون ويون  آهن. اليڪشن ڪميشن فوج جي نگراني ۾ ڪي پي ڪي جي 24 ضلعن ۾ 7 ڪروڙ کان وڌيڪ بيلٽ پيپرز ۽ ٻيو اسٽيشنري سامان رٽرننگ آفيسرز حوالي ڪيو ويو آهي. اليڪشن ڪميشن جي ترجمان موجب، ڪي پي ڪي ۾ هڪ ڪروڙ 31 لک کان وڌيڪ ووٽرز ووٽ جو حق استعمال ڪندا. چونڊن دوران ڪنهن اڻوڻندڙ واقعي کي منهن ڏيڻ لاءِ پاڪ فوج جا اهلڪار پولنگ اسٽيشنز تي سڪيورٽي جا فرض نڀائيندا. اليڪشن ڪميشن لوئر دير جي تڪ پي ڪي 95 تي عورتن کي ووٽ کان روڪڻ وارين شڪايتن کانپوءِ ڪي پي ڪي ۾ مڪاني چونڊن لاءِ خاص هدايتون جاري ڪيون آهن. اليڪشن ڪميشن  چيو آهي ته مڪاني چونڊن دوران عورتن کي ووٽن کان روڪڻ ڏوهه سمجهيو ويندو، جڏهن ته عورتن کي ووٽ کان روڪڻ واري اطلاع تي فوري طور ڪارروائي ڪئي ويندي.

 

مسلم ليگ (ق) پاران سيد جلال محمود شاهه کي حڪومت مخالف اتحاد ۾ شامل ٿيڻ جي دعوت

ڪراچي (اسٽاف رپورٽر) مسلم ليگ قاف سنڌ جي صدر حليم عادل شيخ ايس يو پي سربراهه سيد جلال محمود شاهه سان ملاقات ڪري کيس حڪومت مخالف اتحاد ۾ شامل ٿيڻ جي دعوت ڏئي ڇڏي، سيد جلال محمود شاهه چيو آهي ته پهريان مسلم ليگي ڌڙا گڏ ڪيا وڃن بعد ۾ اتحاد لاءِ غور ڪيو ويندو. مسلم ليگ قاف سنڌ جي صدر حليم عادل شيخ ڪراچي ۾ حيدر منزل پهچي سنڌ يونائيٽيڊ پارٽي جي سربراهه سيد جلال محمود شاهه سان ملاقات ڪري حڪومت مخالف اتحاد ۾ شموليت جي دعوتڏني. ملاقات کانپوءِ ميڊيا سان ڳالهائيندي حليم عادل شيخ چيو ته پاڪستان ٺاهڻ ۾ سائين جي ايم سيد جو اهم ڪردار هو جنهن ڪري سندس خاندان کي نطرانداز نٿو ڪري سگهجي ۽ هنن جو اتحاد ۾ شامل ٿيڻ انتهائي ضروري آهي. حليم عادل شيخ چيو ته پيپلز پارٽي ۽ ايم ڪيو ايم هڪ پچ تي آهن جيڪي گڏجي عوام جو رت چوسي رهيا آهن، جنهنڪري ٽين سياسي طاقت جي گڏ ٿيڻ جي ضرورت آهي. هن چيو ته مڪاني ادارن جي چونڊن ۽ ڪرپشن خلاف مضبوط گرينڊ الائنس جي ضرورت آهي جنهن لاءِ ڪوششون ڪيون پيون وڃن. ان موقعي تي ڳالهائيندي ايس يو پي سربراهه سيد جلال محمود شاهه چيو ته حليم عادل شيخ حڪومت مخالف اتحاد ۾ شامل ٿيڻ جي دعوت ڏني آهي جنهن ۾ شامل ٿيڻ لاءِ پارٽي جي سي اي سي جي اجلاس ۾ حتمي فيصلو ڪيو ويندو . سيد جلال محمود شاهه چيو ته سڀ کان پهريان سمورن مسلم ليگي ڌڙن کي گڏ ڪيو وڃي جنهن کانپوءِ اتحاد ۾ شامل ٿيڻ يا نه ٿيڻ بابت غور ويچار ڪيو ويندو.

 

جيڪولن فريننڊس جا نخرا آسمانن سان ڳالهيون ڪرڻ لڳا

ممبئي(شوبز نيوز)جيڪولن فريننڊس جا نخرا ۽ ناز هيٺ لهڻ جو نالو ئي نه ٿا وٺن. دبئي ۾ رڳو 3 منٽن جي پرفارمنس ڪرڻ جا 75 لک رپيا وصول ڪيا. لڳي ائين ٿو ته جيڪولن پنهنجي ٻنهي هٿن سان ٽجوڙيون ڀرڻ چاهي ٿي. دبئي ۾ پرفارمنس ڪرڻ جي پيشڪش ٿي ته رڳو 3 منٽن جي انٽري فيس 75 لک رپيا گهري ورتا. سريلنڪن بيوٽي گذريل ڪجهه ڏينهن پهرين هڪ شادي جي تقريب ۾ پنهنجو ڊانس ڏيکارڻ لاءِ چار ڪروڙ رپيا وصول ڪيا هئا. هاڻي دبئي ۾ عرب انڊو بالي ووڊ ايوارڊ تقريب لاءِ جڏهن هن سان رابطو ڪيو ويو ته هن منهن سان 75 لک رپيا وصول ڪيا. مزي واري ڳالهه وري اها آهي ته جيڪولن فرينڊس صرف 3 منٽن جا اهي پئسا ورتا آهن.

 

سلمان خان جي نئين فلم بجرنگي ڀائي جان عيد تي رليز ٿيندي

ممبئي(شوبز نيوز): بولي ووڊ سپر اسٽار سلمان خان پنهنجي نئين فلم بجرنگي ڀائي جان جو ٽيلر جاري ڪري ڇڏيو، هو هڪ تقريب ۾ شرڪت لاءِ دبئي ويندو.  ڪبير خان جي هن فلم ۾ ڏيکاريو ويو آهي ته پاڪستاني  ڇوڪري ريل نڪري وڃڻ کانپوءِ انڊيا ۾ رهجي ويندي آهي. ان کانپوءِ سلمان خان ننڍڙي جي مدد لاءِ ايندو آهي ۽ پاڪستان واپس ڇڏڻ جي ذميواري سنڀاليندو آهي. اها فلم عيد تي رليز ڪئي ويندي. هن ايڪشن سان ڀريل ميوزيڪل فلم ۾ ڪرينا ڪپور ۽نواز الدين صديقي به نظر ايندا.

 

ڀارتي اداڪار سلمان خان جي ڪيس جا فائل آفيس ۾ باهه لڳڻ سبب سڙي رک

ممبئي(شوبز نيوز) ڀارتي ميڊيا جي مطابق دبنگ خان جي هٽ اينڊ رن ڪيس جي متعلق سماجي ڪارڪن منصور درويش اطلاع ڏني ته قانون مطابق ڪيس جو رڪارڊ حاصل ڪرڻ جي لاءِ درخواست ڏني، جنهن جي جواب ۾ قانون لاڳو ڪندڙن چيو ته ڪيس جا تمام فائل 3 سال اڳ 21 جون 2012ع تي عدالتي آفيس ۾ باهه لڳڻ  سبب سڙي رک ٿي ويا آهن، برحال ڪيس جي متعلق ڪو رڪارڊ موجود نه آهي.

 

دبنگ گرل سوناڪشي سنها هاڻي گلوڪاري جا سر سکڻ ۾ مصروف

ممبئي(شوبز نيوز): هاڻي دبنگ گرل کي چڙهي ويو بخار گلوڪاري جو، هاڻي بيهندي مائيڪ سامهون ۽ ڳائيندي مڌر آواز ۾ گانا، لڳي ٿو ته شرڌا ڪپور ۽ عاليه بٽ جي نقش قدم تي هلي رهي آهي. مست مست نينن واري سوناڪشي سنها هاڻي سوچيو گلوڪاري جو. انهي لاءِ هو هاڻي سرُ ملائڻ جي تيارين جي ڀرپور ڪوششن ۾ رڌل آهي. سوناڪشي سنها اها پنهنجي گلوڪاري 5 جون تي ٿيندڙ ايوارڊ شو ۾ هلائيندي.

 

پاڪستاني رانديگر  سالن ٿيندڙ هوم سيريز اڄ ئي پنهنجي نالي ڪرڻ لاءِ بي قرار

لاهور(اسپورٽس نيوز): پاڪستاني رانديگر  سالن ٿيندڙ هوم سيريز اڄ ئي پنهنجي نالي ڪرڻ لاءِ بي قرار آهن. جڏهن ته زمبابوي ٽيم پاڪستاني تماشائين جي دل ٽوڙڻ جو ارادو ٺاهي ڇڏيو آهي. پاڪ زمبابوي سيريز  جو ٻيو ميچ اڄ منجهند لاهور جي قذافي اسٽيڊيم ۾ کيڏيو ويندو. مهمان ٽيم پنهنجي ريگيولر ڪپتان جي غير موجودگي ۾ ميزبان ٽيم خلاف ميچ کيڏي برابر ڪرڻ جي ڪوشش ڪندا. زمبابوي ڪپتان تي 2 ميچن جي پابندي هئڻ سبب اڄ ميدان تي نه لهندو. پاڪستان جيڪڏهن اهو ميچ کٽي ويو ته 2013ع کان پوءِ پهريون ڀيرو ون ڊي سيريز ان جي نالي ٿي ويندي. هارجي ويو ته مهمان ٽيم لاءِ اها وڏي ڪاميابي هوندي. هن ميچ کي ڏسڻ لاءِ تماشائين جي وڏي تعداد قذافي اسٽيڊيم جو رخ ڪري رهي آهي. اهو ميچ شام 4 وڳي شروع ٿيندو.

 

قومي ٽيم جو ڪپتان مصباح الحق 41 سالن جو ٿي ويو

لاهور(اسپورٽس نيوز): مصباح الحق 28 مئي 1974ع تي ڏکڻ پنجاب جي شهر ميانوالي ۾ پيدا ٿيو ۽ ان 2001ع ۾ نيوزيلينڊ جي خلاف ٽيسٽ ميچ سان پنهنجي بين الاقوامي ڪيريئر جي شروعات ڪئي، مصباح الحق 2010ع ۾ ان وقت قومي ٽيم جي قيادت سنڀالي جڏهن قومي ٽيم ڏکئي وقت ۾ هئي، مصباح الحق پنهنجي جارهاڻي انداز جي ڪري نه صرف قومي ٽيم کي سهارو ڏنو پر گرين شرٽس جي ڪرندڙ ساک کي بچايو، مصباح الحق ون ڊي ۽ ٽي ٽوئينٽي ڪرڪيٽ کان رٽائرمينٽ جو اعلان ڪري چڪو آهي، جڏهن ته ٽيسٽ ٽيم قيادت ڪري رهيو آهي، مصباح 55 ٽيسٽ، 162 ون ڊي ۽ 39 ٽي ٽوئينٽي ۾ گرين شرٽس جي اڳواڻي ڪري چڪو آهي، ان کان علاوه مصبا الحق 36 ٽيسٽ، 87 ون ڊي ميچن ۾ قومي ٽيم جص قيادت جو فرض به نڀائي چڪو آهي.

 

فيفا: ڪرپشن اسڪينڊل جي پاڇي ۾ نئين صدر جي چونڊ

سوئٽزرلينڊ(اسپورٽس نيوز) بدعنواني جي الزامن ۾ گهريل فٽبال جي عالمي تنظيم فيفاجا209 ميمبر اڄ سوئٽزرلينڊ جي شهر ريرخ ۾ پنهنجي نئين صدر جي چونڊ ڪري رهيا آهن.اهي چونڊون هڪ اهڙي موقعي تي ٿي رهيون آهن جڏهن ٻه ڏينهن اڳ زيورخ مان ئي فيفا جي ٻن نائب صدرن سوڌو 7 عهديدارن کي آمريڪا ۾ هلندڙ دوکي ۽ بدعنواني جي جاچ جي سلسلي ۾ گرفتار ڪيو ويو آهي.آمريڪي اختيارين هن وقت تائين ان سلسلي ۾ 14 مانهن تي ٻڌل مني لانڊرنگ، دوکي ڏيڻ ۽ ڪميشن وٺڻ واري الزام جي هيٺ ڏوهي قرار ڏنو آهي. انهن گرفتارين کانپوءِ انهن چونڊن ۾ پسنديده سمجهندڙ اميدوار ۽ تنظيم جي هاڻوڪي صدر سيپ بليٽر جي اسعيفيٰ جا مطالبا به سامهون آيا پر هن چيو ته هو ان اسڪينڊل جو ذميوار ناهي.بدعنواني جي اسڪينڊل تي پرنس علي جو چوڻ هو ته فيفا کي هڪ اهڙينئين قيادت جي ضرورت آهي جيڪا پنهنجي هر عمل جي ذميواري کڻي ۽ گند ٻين تي اڇلي.