تازيون خبرون

Daily Archives: May 27, 2015

ڊسڪا واقعو، جمهوريت تي هڪ ڀيرو ٻيهر داغ

 

سيالڪوٽ جي علائقي ڊسڪا ۾ پوليس ۽ وڪيلن وچ ۾ جهيڙي دوران ايس ايڇ او جي مبينا فائرنگ ۾ بار ايسوسيئشن جي صدر رانا خالد سميت 2 وڪيل مارجي ويا جڏهن ته هڪ واٽهڙو سميت 3 زخمي ٿي پيا. ڊسڪا ۾ وڪيلن طرفان ميونسپل ايڊمنسٽريشن آفيس ٻاهران نڪاح نامي جي رجسٽريشن جي معاملي تي احتجاج ڪيو پئي ويو ته ان دوران وڪيلن ۽ پوليس وچ ۾ ڏند چڪ ٿي. ان موقعي تي ايس ايڇ او شهزاد وڙائچ، مبينا طور وڪيلن تي فائرنگ ڪري ڏني، جنهن جي نتيجي ۾ سيالڪوٽ بار ايسوسيئشن جي صدر راڻا اقبال ۽ سندس ساٿي وڪيل سميت پنج ڄڻا زخمي ٿي ويا. زخمين کي فوري طور اسپتال منتقل ڪيو ويو جتي راڻا اقبال ۽ سندس هڪ وڪيل دوست زخمن جا سور نه سهندي فوت ٿي ويا، جڏهن ته ٻين زخمين کي طبي امداد ڏني وئي. سيالڪوٽ جي ڊي پي او آصف شهزاد موجب وڪيل ميونسپل ايڊمنسٽريشن آفيس ۾ هنگامو ڪري رهيا هئا، جن کي پوليس روڪڻ جي ڪوشش ڪئي ته معاملو سنگين ٿي ويو . هن چيو ته وڪيلن تي فائرنگ ڪندڙ ايس ايڇ او سميت 5 اهلڪارن کي حراست ۾ ورتو ويو آهي. ٻڌايو پيو وڃي ته وڪيل ميونسپل ايڊمنسٽريشن ۾ هڪ نڪاح نامو رجسٽرڊ ڪرائڻ لاءِ آيا هئا، ان موقعي تي ميونسپل ايڊمنسٽريشن جي عملدارن سان سندن منهن ماري ٿي پئي، منهن ماري کانپوءِ معاملو ايترو ته وڌي ويو جو پوليس کي گھرايو ويو. معاملي کي نبيرڻ لاءِ آيل پوليس صورتحال وڌيڪ خراب ڪري ڇڏي ۽ هڪ ايس ايڇ او پاران مبينا سڌي فائرنگ جي ڪري 2 وڪيل حياتي وڃائي ويٺا. ٻئي طرف وڪيلن جي قتل واري واقعي کانپوءِ وڪيل مڇرجي ويا ۽ سول اسپتال ۾ اندر ڀڃ ڊاهه ڪرڻ بعد ٻاهر ٽائرن کي باهه ڏئي عدالتي ڪارروائي جو به بائيڪاٽ ڪري ڇڏيو. ان دوران مڇريل وڪيلن هڪ پوليس اهلڪار کي به سخت تشدد جو نشانو بڻايو. ڪاوڙيل وڪيلن هٿ اچي ويل اهلڪار کي بندوق جا قنداق ۽ ٿڦڙون، لتون، مڪون هڻندا رهيا. هوڏانهن شام جو وڪيلن پاران ٻيهر احتجاج ڪيو ويو. ان دوران وڪيل ڊي پي او آفيس آڏو احتجاج ڪرڻ کانپوءِ آفيس کي باهه ڏئي ڇڏي. ان دوران پوليس مظاهرين کي روڪڻ لاءِ انهن تي شيلنگ پڻ ڪئي. هوڏانهن ڊسڪه واقعي خلاف سڄي پنجاب ۾ هنگاما برپا ٿي ويا. فيصل آباد، لاهور، سيالڪوٽ، سرگوڌا سميت سڄي پنجاب جي ننڍن وڏن شهرن ۾ وڪيل ۽ عام شهري روڊن تي نڪري آيا ۽ ڀڃ ڊاهه پڻ ڪئي. لاهور ۾ مڇريل وڪيلن لاهور هاءِ ڪورٽ جي چيف جسٽس جي گاڏي کي گھيري ۾ آڻي ورتو ۽ سخت نعريبازي ڪئي. ان موقعي تي لاهور هاءِ ڪورٽ جي چيف جسٽس منظور احمد ملڪ واقعي جو نوٽيس وٺندي پنجاب حڪومت کي معاملي جي جاچ جو حڪم ڏنو ۽ رپورٽ پڻ طلب ڪري ورتي. چيف جسٽس منظور احمد ملڪ ڊسڪه ۾ رينجرز مقرر ڪرڻ جا حڪم پڻ جاري ڪيا. ٻئي پاسي پنجاب جي وڏي وزير شهباز شريف پڻ ڊسڪه ۾ اهلڪارن هٿان ٻن وڪيلن جي مارجڻ جو نوٽيس وٺندي ملوث اهلڪارن خلاف ڪارروائي ڪرڻ جي هدايت ڪئي آهي. پنجاب جي وڏي وزير شهباز شريف واقعي جي عدالتي  جاچ ڪرائڻ جو اعلان ڪندي  عدالتي ڪاميٽي جوڙڻ جو به اعلان ڪيو.هن چيو ته واقعي ۾ ملوث ماڻهن کي سخت سزا ڏني ويندي، جڏهن ته متاثرن سان مڪمل انصاف ڪيو ويندو. شهباز شريف جي ترجمان موجب وڏي وزير اسسٽنٽ ڪمشنر ڊسڪهکي او ايس ڊي ٺاهڻ جي هدايت ڪندي پنجاب جي سيڪريٽري کي ان حوالي سان لاهور هاءِ ڪورٽ جي چيف جسٽس کي خط لکڻ جي به هدايت ڪئي آهي. هوڏانهن ڊسڪه ۾ ٻن وڪيلن جي مارجڻ کانپوءِ پاڪستان بار ڪائونسل اڄ سڄي ملڪ ۾ هڙتال جو اعلان ڪندي ٽن ڏينهن جي سوڳ جو اعلان ڪيو آهي. ان کان سواءِ گوجرانوالا ڊسٽرڪٽ بار ايسو سي ايشن اڄ هڙتال ۽ ملتان بار ڪارو ڏينهن ملهائڻ جو اعلان ڪيو. ان کان سواءِ اسلام آباد بار ايسوسي ايشن پڻ اڄ احتجاج ڪندي عدالتي ڪارروائين جو بائيڪاٽ ڪرڻ جو اعلان ڪيو آهي. هوڏانهن وزيراعظم محمد نواز شريف ڊسڪه ۾ امن امان جي صورتحال تي ڳڻتي جو اظهار ڪندي واقعي جي رپورٽ طلب ڪري ورتي آهي ۽ لاڳاپيل عملدارن کي چيو آهي ته هو صورتحال جي بهتري لاءِ فوري قدم کڻن.

، هن چيو ته ڪنهن کي به قانون هٿ ۾ کڻڻ ۽ سرڪاري ملڪيتن کي نقصان پهچائڻ جي اجازت نه ڏني ويندي.

 

سنڌ جو نئون گهو وزير ۽ سنڌ جي عوام جون اميدون؛تحرير مصطفيٰ عباسي

پاڪستان پيپلز پارٽي پاران باقراڻي جي تڪ پي ايس 35 لاڙڪاڻي تان چونڊيل اسيمبلي ميمبر سهيل انور سيال جنهن خاندان سان تعلق رکي ٿو اهو سنڌ ۾ ڪو ايڏو وڏو مشهور نه آهي پر هن خاندان جي خاموش رهي پارٽي اندر وڏي قرباني آهي. عوام سان رابطو، اخلاق ۾ ۽ اعليٰ تعليم يافتا سيال خاندان جو بنيادي گذر سفر ايگريڪلچر ۽ بيورو ڪريسي تي ٻڌل آهي. هي خاندان باقراڻي لڳ سنڌو درياهه جي ڪپ تي ويٺل آهي هن خاندان جو ڳوٺ فريد آباد تمام گهڻو پراڻو ڳوٺ آهي. هن خاندان جي وابستگي پيپلز پارٽي سان ڪئي سالن کان رهي آهي تڪليفن، مصيبتن هوندي به هي خاندان پيپلز پارٽي سان وفادار رهيو، شهيد ڀٽو جي وقت کان اڄ تائين هڪ پارٽي سان رهيا. نئين گهرو وزير جو خاندان سنڌ اسيمبلي ۾ پڻ رهيو آهي پر اهم وزارت هن ڀيري هنن کي ملي آهي. پي ايس 35 واري سيٽ تي گهڻي ڀاڱي انڙ خاندان ڪامياب ٿيندو آيو آهي. هاڻي انڙ خاندان ۾ ڪو وڏو بزرگ نه رهيو آهي سڀ نوجوان آهن هنن نوجوانن جو عوام سان ڪو گهڻو رابطو نه آهي جيڪڏهن ڪم ڪار لاءِ اوطاق تي آيو ته ان سان ملبو ان جي خدمت ڪبي باقي ڳوٺن تائين وڃن وارو رابطو گهڻي ڀاڱي گهٽ آهي. هنن جي مقابلي ۾ سيال خاندان جي وڏن کان وٺي نوجوانن پڻ ڳوٺن ۾ وڃن ٿاعوام جي ڏک سور ۾ شريڪ ٿين ٿا. عوام جا فيصلا وغيره گهڻي ڀاڱي گهرو وزير جا چاچا ۽ ان جو ڀاءُ طارق سيال ڪري ٿو ۽ بيوروڪريسي سان اهو پڻ رابطي ۾ رهي ٿو. سيال برادري گذريل 40 سالن کان جيڪو پيپلز پارٽي لاءِ خاموش رهي ڪم ڪيو آهي ۽ قربانيون ڏنيون آهن اڄ ان کي سنڌ جي اهم گهرو وزارت جي صورت ۾ پارٽي هنن کي وڌيڪ عوام جي خدمت ڪرڻ جو موقعو ڏنو آهي. جڏهن سڄي سنڌ ڏوهن جي ور چڙهيل آهي خاص ڪري ڌاڙيل ڪلچر خاص ڪري لاڙڪاڻي ۾ سيال خاندان کي کپي ته جيئن خاموشي ۾ رهي هنن پارٽي جي خدمت ڪئي آهي تئين وڏي واڪي سنڌ جي عوام جي خدمت ڪن ڇو ته سنڌ جو عوام هنن مان وڏي اميد رکي ٿو. سنڌ جي هر شهر ۽ ڳوٺ ۾ امن هجي جيئن پارٽي هن خاندان جي خدمت جو سلو ڏنو آهي تئين عوام جي خدمت ڪندي سنڌ کي به سلو ڏين. نئين گهرو وزير تي اها به ذميواري آهي ته سنڌ صرف ڪراچي نه آهي پر سنڌ سڄي آهي هر ضلعي ۾ کليل ڪچهريون ڪري پوليس جو عوام سان جيڪو ڏکوئيندڙ رويو آهي ان کي پاڻ ڏسي هر ضلعي جي هر تعلقي ۾ وڃي عوام سان ملي، عوام جي جان مال جي حفاظت ڪري نئين وزير جي ذميواري اها به آهي ته پوليس جو قبلو درست ڪري سنڌ جي اندر قائم غنڊه راج ۽ ڌاڙيل راج ختم ڪري عوام جيئن سڪون جو ساهه پٽي ۽ ذوالفقار علي ڀٽو جو ۽ شهيد بينظير ڀٽو جو خواب مڪمل ٿئي.

 

پوليس کاتي ۾ به رينجرز آپريشن جي سخت ضرورت آهي؛ايم حسن ناز سومرو

سنڌ اندر ڏوهن ۾ گھٽتائي جو سبب رينجرز فورس پاران آپريشن ڪرڻ آهي، جنهن ۾ بنا ڪنهن رنگ ۽ نسل جي ڏوهارين خلاف آپريشن ڪيو پيو وڃي ۽ ان جو نتيجو سمورن سنڌ واسين جي سامهون آهي پر اڃان به ڪجھ اهڙا ڏوهاري موجود آهن جن کي پوليس جي پشت پناهي حاصل آهي ۽ پوليس وارا انهن جي مدد ڪندي وڏو فخر محسوس ڪري رهيا آهن، اسان وٽ سنڌ اندر اهو ڏاڍو ماڻهو ليکيو ويندو آهي جنهن جي ياري دوستي ڌاڙيلن سان هجي ۽ پو۽ ان شخص کان هر ماڻهو ڊڄندو به آهي ۽ خوف وڃان عزت به ڪندو آهي پر جيڪڏهن ڪنهن عزت نه ڪئي ته صبح جو ياته ان جو لاش ملندو يا مال چوري ڪيو ويندو، مطلب ته هتي جيڪو ڏاڍو سو گابو وارو قانون رائج ٿيل آهي اهڙي طرح سنڌ اندر ٿيندڙ ڏوهن ۾ جيسيتائين ڪو پوليس عملدار ساٿ نه ٿو ڏئي ايسيتائين تائين ڪوبه ڏوهاري ڏوه نه ٿو ڪري سگھي.

سنڌ ۾ ٻهراڙي وارن علائقن ۾ پوليس قانون جي گھٽ پر هڪ وڏيري جي غلام ضرور هوندي آهي، ڳوٺن اندر ٿيندڙ هر ٻڌي ۽ ڇوڙي وڏيرڪي حڪم تحت ٿيندي آهي، هڪ وڏيرو جيڪو پنهنجي ڳوٺ جو بادشاه هوندو آهي ان وڏيري جي حڪم ۾ تر جا سمورا ڏوهاري سندس هٿ هيٺ هوندا آهن، ان کان علاوه سندس علائقي جو صوبيدار به وڏيري جو هر حڪم بجا آڻيندو آهي، سو اهڙي طرح ڳوٺ جو وڏيرو پنهنجي اڻپڙهيل سوچ سان پيو ڳوٺ جي غريبن جي رت پيئندو رهندو آهي.

سنڌ جي ٻهراڙين وارن ٿاڻن جو حال ڏسڻ وٽان هوندو آهي، هڪ ڀيري هڪ ٿاڻي تي منهنجو وڃڻ ٿيو جتي صوبيدار صاحب هڪ ڪڪڙ کي بادام کارائي رهيو ۽ پاسي ۾ هڪ تتر به پڃري ۾ ٻوليون ڪري رهيو هو، اسان کي ڏسندي کي صوبيدار صاحب وڏو وات ڦاڙي چيو ته اچو سائين اچو …….!! اسين به ٿاڻي تي ويا سين ته صاحب سنتري کي چانهه آڻڻ لاءِ چيو مونکي دوست اڳ ۾ ئي چيو هو ته ڪري صاحب وٽ گھڻو نه ويهجو، معاف ڪندا اسان پنهنجي ڳوٺ جي صوبيدار کي اڪيلائي ۾ ڪرو ڪري سڏيندا آهيون ڇاڪاڻ ته هڪ ڀيري ڪتي ۽ سوئر جي شڪار دوران هڪ ڪتي جو چڪ سندس ڪن ۾ پئجي ويو ۽ ڪتي به رعايت ڪون ڪيس ۽ صاحب جو ڪن ڪٽي کائي ويو ۽ ان ڏينهن کان اڪثر ڳوٺاڻا صوبيدار کي ڪرو صاحب ڪري ڪوٺيندا آهن، سو صوبيدار صاحب تر جي اڪثر ڌاڙيلن جي شادين ۾ شرڪت ڪندو رهندو آهي ۽ ڌاڙيلن پاران ٺهرايل موويز ۾ اڪثر ڪرو صاحب ويٺل نظر ايندو آهي اهڙي طرح هڪ ڀيري رينجرز آپريشن ۾ اهڙيون موويز هٿ آيون جنهن ۾ ڪرو صاحب نمايان ويٺل هو سو ايس پي صاحب ان کي فقط رورٽ ڪري اي ايس آءِ ڪري ڇڏيو، جڏهن ته باقي ڪيل گناه سندس معاف ڪيا ويا، ڇاڪاڻ ته هو پوليس وارو هيو.

.سو سائين پوليس ۽ ڏوهارين جو ساٿ صديون پراڻو آهي، هڪ ڀيري اسان جي ڳوٺ ۾ ڌاڙيلن ماڻهو اغواءَ ڪيا هئا سو مونکي چڱي طرح ياد آهي ته پوليس جا چڱا ڀلا آفيسر ڌاڙيلن سان موبائيل فون تي ڳالهيون ڪري رهيا هئا پر جڏهن پوليس ۽ ڌاڙيل ڀنگ جي رقم تي نه ٺهيا ته ڌاڙيلن موبائل فون بند ڪري ڇڏيا، ۽ پوءِ وري پوليس وارا وڏيرن کي منٿون ڪندا رهيا ته اسان جي عزت جو ڀرم رکو ۽ ماڻهو موٽرائي ڏيو، سو اهڙي طرح پوليس ۽ ڏوهارين جو پاڻ ۾ چولي دامن جو ساٿ رهيو آهي پر ڇاڪجي شينهن کي ڪير چئي ته تنهنجي منهن ۾ ڌپ آهي….؟؟

جڏهن ته پوليس ۽ ڌاڙيلن جي دوستي جي مونکي ڇا پر پوري سنڌ جي ماڻهن کي خبر آهي پر سنڌ جا سٻاجھڙا ماڻهو ظلم سهي ڪري به ڪجھ ڪونه ڪڇندا آهن.

ڌاڙا هجن يا ڦرون هجن اڪثر موقعن تي پوليس وارا ڪافي ڀيرا پڪڙيا به ويا آهن پر پوليس جي نوڪري هجڻ ڪري انهن سان هر موڙ تي رعايت ٿيندي رهي آهي.اڄ به توهان ڌاڙيلن ۽ پوليس وارن جون موبائلون ٽريس ڪري ڏسو ته اڌ کان وڌيڪ پوليس اهلڪار ملوث نڪرندا پر ڪنهن کي دانهن ڏجي، جيڪڏهن ڌاڙيل سول ڪپڙن ۾ ڏوهاري آهن ته پوليس وارا وري سرڪاري وردي جا ڌاڙيل آهن، جيڪڏهن ڪو پوليس اهلڪار خود ڏوه نه ڪري سگھندو آهي ته پوءِ پنهنجي رائيفل يا پسٽل ضرور ڏوه ڪرڻ جي ارادي سان موڪلي ڇڏيندو آهي ته جيئن ڦر جي مال ۾ حصو پتي وڌيڪ اچي سگھي، اڪثر ڦرن ۽ ڏاڙن جي وارداتن ۾ خود پوليس وارا پڪڙيا ويا آهن يا وري سرڪاري هٿيار پڪڙيا ويا آهن پر سائين پوءِ به ڪير نالو کڻي……….!!

جي اگر اسين نالو کڻنداسين ته پوءِ ڀلا ڇا اسان کي هتي رهڻو نه آهي ڇا…..؟؟

اسين پوليس جي خلاف هرگز نه آهيون، ڇاڪاڻ ته پوليس ۾ ڪجھ اهڙا اهلڪار به آهن جن جي سهاري اسين زندگي گذاريون پيا ۽ اهي آفيسر پنهنجي ڌرتي ۽ سنڌ جي عوام سان محبت به ڪن ٿا پر پوليس اندر داخل ٿيل ڪجھ سياسي سپورٽ وارا يا وڏيرڪي حمايت رکندڙ ماڻهو جيڪي پنهنجي بالا آفيسرن کي به بدلين جو ڌمڪيون ڏيئي ڪم وٺندا آهن ۽ هر ڪڌي ڪم ۾ ملوث هوندا آهن اهڙن پوليس اهلڪارن لاءِ رينجرز آپريشن جي سخت ضرورت آهي ته جيئن انهن ڏوهارين کي پوليس مان ڪڍي عبرتناڪ سزا ڌني وڃي ۽ پوليس کي ڏوهاري ماڻهن کان پاڪ ڪيو وڃي.

هن وقت گھوٽڪي ضلعي اندر رانوتي ٿاڻي جي حد اند هلندڙ آپريشن دوران پوليس کي شڪست حاصل ٿي ۽ ان کان پوءِ اتان جو آپريشن رينجرس حوالي ڪيو ڇاڪاڻ ته پوليس وارا آپريشن به پاڻ پيا ڪن ته ڌاڙيلن کي اطلاع به خود ڪن پيا ته هيڏانهن پوليس اچي پيئي توهان هوڏانهن نڪري وڃو، سو سائين جڏهن گھر جا ماڻهو بيٺا خود ڏوهارين جي سرپرستي ڪن ته پوءِ اهي ڌاڙيل ڪيئن پڪڙي سگھجندا ۽ پوءِ ظاهر آهي ته پوليس کي شڪست ئي ملندي ۽ پوءِ انهيءَ جڳه تي جڏهن رينجز کي موڪليو ويو آهي ته هاڻي نتيجا گارگر نڪرندا.

سو پوليس ۽ ڌاڙيلن جي رابطن کي ختم ڪيو وڃي ۽ پوليس اند موجود ڏوهارين جي ساٿاري پوليس وارن جي به فل فرائي ڪئي وڃي ته جيئن هڪ ڀيرو ٻيهر سنڌ ڌرتي کي امن جو گهوارو بڻائي سگھجي.

هڪ ڀيري جاپان، آمريڪا ۽ پاڪستان جي پوليس آفيسرن جي پاڻ ۾ ملاقات ٿي جنهن دوران هو هڪ ٻئي سان پنهنجي بهادري ۽ ڏاهپ جا قصا ٻڌائي رهيا هئا، ايتري ۾ جاپان جي پوليس آفيسر چيو ته اسين پنهنجي ملڪ ۾ ڏوه ٿيڻ کان پوءِ هڪ هفتي اندر ڏوهاري کي پڪڙي وٺندا آهيون …….!!

آمريڪي پوليس آفيسر چيو ته اسين واردات ٿيڻ کان پوءِ 24 ڪلاڪن اندر ڏوهارين کي پڪڙڻ ۾ ڪامياب ٿيندا آهيون …..!!

پاڪستاني پوليس آفيسر اهو سڀ ٻڌي خاموش ٿي ويو …….!! جاپاني ۽ آمريڪي حيران ٿي پاڪستاني کان پڇڻ لڳا ته توهان به ته ٻڌايو ته توهان ڪيتري دير ۾ ڏوهاري پڪڙي وٺندا آهيو….؟؟

تنهن تي پاڪستاني پوليس آفيسر چيو ته اسين هڪ هفتو اڳ ۾ ٻڌائي ڇڏيندا آهيون ته فلاڻي هنڌ تي ۽ فلاڻي وقت تي ڦر ٿيندي يا ڌڙو لڳندو………!! انهيءَ ڳاله مان صاف ظاهر آهي ته سنڌ پوليس اندر اهڙيون ٻوٿ ڪاريون رڍون موجود آهن جيڪي ڌاڙيلن سان رابطي ۾ آهن ۽ هر وقت سندن مدد ڪرڻ ۾ خوشي محسوس ڪندا آهن سو اهڙن ڏوهاري پوليس وارن جو رينجرز آپريشن ٿيڻ ضروري آهي