تازيون خبرون

Daily Archives: May 27, 2015

دفاع لاءِ 772 ارب رکڻ جو فيصلو، وفاقي ڪابينا بجيٽ دستاويز جي منظوري ڏئي ڇڏي

اسلام آباد (بيورو) وزيراعظم محمد نواز شريف جي صدارت ۾ وفاقي ڪابينا جو اجلاس ڪالهه اڱاري ڏينهن هتي وزيراعظم هائوس ۾ ٿيو جنهن ۾ مالي سال 16 -2015ع لاءِ بجيٽ حڪمت عملي جو جائزو ورتو ويو. وزيراعظم چيو ته ايندڙ بجيٽ عام ماڻهن جي ڀلائي تي ٻڌل هجڻ گهرجي ته جيئن وڌندڙ اقتصادي استحڪام جي ثمرن کي وڌيڪ مضبوط بڻايو وڃي، وزيراعظم ان ڳالهه جي واکاڻ ڪئي ته معيشت جي اهم اشارن ۾ نمايان بهتري آئي آهي جيڪو ٻه سال اڳ ۾ هيٺين سطح تي هئا، هن چيو ته ٽيڪسن جي بنياد کي وسيع ڪرڻ لاءِ اوڳاڙين ۾ اضافي لاءِ ٽيڪس تجويزون تيار ڪرڻ وقت جامع قدم کنيا وڃن، هن چيو ته هڪ اهڙو نظام جوڙيو وڃي جنهن جي نتيجي ۾ بدعنواني ۾ گهٽتائي ٿئي ۽ عوام رضاڪاراڻي طور تي ٽيڪس ادا ڪري. وزيراعظم ملڪ ۾ وڌيڪ ترقي ۽ معاشي استحڪام حاصل ڪرڻ تي ناڻي واري وزير ۽ سندسٽيم کي مبارڪباد ڏني، هن پرڏيهي ملڪن ۾ رهندڙ پاڪستانين پاران مٽاسٽا جو ناڻو پاڪستان موڪلڻ جي ڪوششن جي واکاڻ ڪئي ۽ هدايت ڪئي ته بئنڪاري نظام جي ذريعي مٽاسٽا جو ناڻو موڪلڻ لاءِ سمنڊ پار پاڪستانين جي مدد ڪئي وڃي، وزيراعظم ان ڳالهه تي اطمينان جو اظهار ڪيو ته وياج جي شرح 8 سيڪڙو کان گهٽ ڪري 7 سيڪڙو ڪرڻ سان سيڙپڪاري جي حوصلا افزائي ٿيندي. هن واپار واري وزارت کي هدايت ڪئي ته روانگي واپار ۾ اضافي لاءِ ڪوششون تيز ڪيون وڃن، ڪابينا اها ڳالهه محسوس ڪئي ته جاري منصوبن جا فائدا ايندڙ پنج کان 10 سالن ۾ حاصل ٿيڻ شروع ٿي ويندا ۽ نجي شعبي ۾ سيڙپڪاري جي حوصلا افزائي لاءِ فوري قدمن جي ضرورت آهي، وزيراعظم هدايت ڪئي ته ايندڙ بجيٽ ۾ عوام جي مجموعي خوشحالي اولين ترجيح هجڻ گهرجي، هن چيو ته نوجوانن لاءِ روزگار جي موقعن ۾ اضافي لاءِ جي ڊي پي گروٿ جو موجوده رجحان جاري رهڻ گهرجي، هن چيو ته ملڪي معيشت جي وڌيڪ استحڪام لاءِ ڏينهن رات ڪم ڪندي زراعت ۽ مصنوعات سازي جي شعبن جا مسئلا حل ڪرڻ گهرجن، ان کان اڳ ناڻي واري وزير اسحاق ڊار ۽ ناڻي واري ڊويزن جي سيڪريٽري ڊاڪٽر وقار مسعود ڪابينا جي ميمبرن کي ايندڙ بجيٽ جي تجويزن جي تياري جي سلسلي ۾ حڪمت عملي کان آگاهه ڪيو. ناڻي واري وزير چيو ته حڪومت وڏي پاليسي قدمن تي ڌيان ڏئي رهي آهي جنهن جو مقصد معاشي استحڪام ۽ تيزي سان ترقي آڻڻ آهي، ناڻي واري وزير چيو ته جڏهن اسان اقتدار سنڀاليو ته ان وقت معاشي معيشت ڪمزور هئي، ناڻي واڌ 12 سيڪڙو کان وڌيڪ هئي، مالياتي خسارو 8.8 سيڪڙو هو تنهن هوندي به حڪومت جي اقتصادي پاليسين جي ڪري معيشت ترقي ڪرڻ شروع ڪري ڇڏي آهي، اي پي پي جي رپورٽ موجب هن چيو ته اسان مالي خسارو گهٽ ڪري 4 سيڪڙو ۽ پرڏيهي ناڻي جي ذخيرا وڌائي 20 ارب ڊالر ڪرڻ چاهيون ٿا، هن چيو ته اسان ٽيڪس – جي ڊي پي شرح جو 13 سيڪڙو مقرر ڪيو آهي ۽ روانگي واپار جو هدف 32 ارب ڊالر رکيو آهي، هن ڪابينا کي ٻڌايو ته ايف بي آر جي ٽيڪس وصولين ۾ 14 -2013ع جي دوران 2226 ارب روپين جو اضافو ٿيو جيڪي سال 13 -2012ع ۾ 1946 ارب روپيا هيون، گذريل 10 مهينن ۾ ٽيڪس وصوليون وڌي 1968 ارب روپيا تي پهتيون، هن چيو ته اسان پهرين سال 4.02 فيصد جي ڊي پي گروٿ ريٽ حاصل ڪيو ۽ موجوده سال جي دوران 4.24 سيڪڙو گروٿ ريٽ حاصل ڪنداسين جيڪو گذريل 7 سالن ۾ سڀ کان وڌيڪ آهي، هن چيو ته اسان بجيٽ خسارو موجوده سال دوران گهٽ ڪري 5 سيڪڙو ڪري ڇڏيو آهي جيڪو سال 13- 2012ع دوران 13 سيڪڙو هو، هن چيو ته پرڏيهي ملڪ مان ايندڙ مٽاسٽا جي ناڻي ۾ اضافو ٿيو آهي جيڪو هلندڙ مالي سال جي جولائي کان اپريل جي مدي دوران 14.8 ارب ڊالر ٿي ويو آهي جيڪو 16.06 سيڪڙو اضافو ظاهر ڪري ٿو، هن چيو ته پرڏيهي ناڻي جا ذخيرا وڌي 17.5 ارب ڊالر ٿي ويا آهن، ناڻي واري وزير ڪابينا کي ٻڌايو ته هي بجيٽ مجموعي معيشت ۽ روزگار جي موقعن جي بهتري لاءِ حوصلي افزا مراعتون آڻيندي، ڪابينا کي ٻڌايو ويو ته بجيٽ پاڪستان مسلم ليگ (ن) جي ترقياتي حڪمت عملي کي پوري ڪندي، هن چيو ته اسان معيشت جي مختلف شعبن جي تجويزن کي بجيٽ ۾ شامل ڪرڻ جي ڪوشش ڪئي آهي ۽ انهن شعبن ۾ سيڙپڪاري جو مناسب وقت آهي جيڪي تيزي سان ترقي ڪرڻ جي صلاحيت رکن ٿا ۽ اهڙي وقت ۾ جڏهن وياج جي شرح تاريخي طور تي گهٽ آهي، اسان ترقياتي ڪمن جي حوصلا افزائي لاءِ وڌيڪ گنجائش رکي آهي.

 

آءِ جي سنڌ سميت ٻين آفيسرن جي معافي رد، فرد جرم لاڳو ڪرڻ جو فيصلو

ڪراچي (اسٽاف رپورٽر) سنڌ هاءِ ڪورٽ عدالت جو گهيراءُ ۽ صحافين تي تشدد واري ڪيس ۾ آءِ جي سنڌ سميت سمورن  پوليس عملدارن جي غير مشروط معافي کي رد ڪندي مٿن 28 مئي تي فرد جرم لاڳو ڪرڻ جو فيصلو ڪيو آهي، عدالت چيو آهي ته عدالت جو گهيراءُ ڪندڙ سمورن ذميوارن خلاف ڪارروائي ٿيڻ تائين آءِ جي کي معافي نه ملندي. سنڌ هاءِ ڪورٽ جي جسٽس سجاد علي شاهه جي سربراهي ۾ ڊويزن بئنچ عدالت جو گهيراءُ ۽ صحافين تي تشدد واري ڪيس ۾ توهين عدالت نوٽيسن جي ٻڌڻي ڪئي، جنهن دوران آءِ جي سنڌ، ڊي آءِ جي ڏکڻ ۽ ٻيا عملدار پنهنجي وڪيل فاروق ايڇ نائيڪ سان گڏ  پيش ٿيا. فاروق ايڇ نائيڪ عدالت کي چيو ته آءِ جي سنڌ ۽ ٻيا پوليس عملدار غير مشروط معافي وٺڻ چاهين ٿا، جنهن تي عدالت چيو ته معافي جي ڪابه گنجائش نه  رهي آهي. ٻڌڻي دوران عدالت چيو ته منظم سازش تحت عدالت جو گهيراءُ ڪيو ويو، جنهن کانپوءِ سمورن عملدارن سان رابطو ڪيو پر انهن جواب  نه  ڏنو، جنهن مان ثابت ٿي ويو آهي ته سڀ عملدار ڳٺ جوڙ ۾ شامل هئا. عدالت چيو ته عدالت جي احترام تي ڪابه سوديبازي نه ڪئي ويندي. عدالت واقعي ۾ ملوث سمورن پوليس عملدارن ۽ هٽايل ايس ايس پيز فيصل بشير ميمڻ، فداحسين جانوري، طارق ڌاريجو، رئيس غني ۽ ذيشان بٽ کي به حلف ناما جمع ڪرائڻ جو حڪم ڏنو، جڏهن ته اڄ ٻڌڻي دوران آءِ جي سنڌ. ايڊيشنل آءِ جي، ڊي آءِ جي ڏکڻ ۽ 23مئي تي وقتي ڊي آءِ جي ڏکڻ فيروز شاهه حلف نامه جمع ڪرايا. چيف سيڪريٽري ۽ گهرو سيڪريٽري به لکت ۾  سنڌ هاءِ ڪورٽ ۾ لکت ۾ جواب داخل ڪرايا آهن. چيف سيڪريٽري جواب ۾  چيو آهي ته عدالت جي گهيراءُ جو حڪم ڪنهن ڏنو، ان بابت کيس ڪابه ڄاڻ نه آهي. چيف سيڪريٽري جواب ۾ چيو آهي ته ايس ايس يو جي ايس پي رٽائرڊ ميجر سليم پنهنجي صوابديد تي ڪارروائي ڪئي ۽ هن صحافين تي تشدد جو ڪوبه حڪم نه ڏنو هو. چيف سيڪريٽري چيو آهي ته هاءِ ڪورٽ آڏو تشدد بابت پوليس ئي بهتر جواب ڏئي سگهي ٿي، حڪومت آءِ جي سنڌ جي نشاندهي تي لاڳاپيل آفيسرن خلاف ڪارروائي شروع ڪئي آهي. گهرو سيڪريٽري مختيار سومري سنڌ هاءِ ڪورٽ ۾ داخل ڪرايل جواب ۾ چيو آهي ته 23مئي تي هن ڪنهن کي به عدالت جي گهيراءُ جو حڪم نه ڏنو هو ۽ نه ئي نقاب پوش اهلڪارن جي مقرري جو حڪم جاري ڪيو هو. گهرو سيڪريٽري چيو آهي ته سي سي ٽي وي فٽيجز ڏسي ذميوار پوليس آفيسرن ۽ اهلڪارن خلاف ڪارروائي شروع ڪئي وئي آهي. گهرو سيڪريٽري چيو آهي ته ايس ايس يو جي ايس پي ميجر رٽائرڊ سليم ۽ ايس ايڇ او پريڊي سميت 15 ڪمانڊوز کي معطل ڪيو ويو آهي. گهرو سيڪريٽري چيو آهي ته معاملي جي جاچ لاءِ ڊي آءِ جي ٽريفڪ امير شيخ جي سربراهي ۾ جاچ ڪميٽي جوڙي وئي آهي

 

وزيراعظم ۽ چوڌري نثار ۾ ڊگهي عرصي کانپوءِ ملاقات، ملڪي معاملاي اتفاق راءِ سان حل ڪرڻ تي اتفاق

اسلام آباد (بيورو) وزيراعظم نواز شريف ۽ چوڌري نثار ۾ ڊگهي عرصي کانپوءِ ملاقات دوران ملڪي معاملي اتفاق راءِ سان حل ڪرڻ تي اتفاق ڪيو ويو آهي، وزيراعظم جو چوڻ آهي ته چوڌري نثار سڪيورٽي معاملن جو انچارج ۽ آزاد آهي، ڪراچي آپريشن ۾ سندس ڪردار انتهائي اهم آهي. وزيراعظم هائوس اسلام آباد ۾ وزيراعظم نواز شريف سان وفاقي گهرو وزير چوڌري نثار ملاقات ڪئي، ڏيڍ ڪلاڪ تائين جاري رهندڙ ملاقات ۾ پنجاب جو وڏو وزير شهباز شريف، گورنر ڪي پي ڪي سردار مهتاب عباسي، وفاقي وزير خواجه سعد رفيق، اسحاق ڊار، پرويز رشيد ۽ ٻين  ن ليگ جي اڳواڻن شرڪت ڪئي. ملاقات دوران وفاقي گهرو وزير چوڌري نثار پارٽي قيادت سان خدشن بابت وزير اعظم نواز شريف کي آگاهه ڪيو، جنهن تي وزيراعظم سندس سمورا خدشا ختم ڪرڻ جي خاطري ڪرائي. ملاقات دوران وزيراعظم نواز شريف ۽ چوڌري نثار ملڪي معاملا گڏجي حل ڪرڻ تي اتفاق ڪيو. وزير اعظم نواز شريف چيو ته ملڪي مسئلا گڏجي حل ڪري سگهجن ٿا، جيستائين سڀ وزير گڏجي ڪم نه ڪندا، تيستائين ملڪي مسئلا حل نٿا ٿي سگهن. وزيراعظم وڌيڪ چيو ته چوڌري نثار سڪيورٽي معاملن جو انچارج ۽ آزاد آهي، ڪراچي آپريشن ۾ سندس ڪردار انتهائي اهم آهي. گهرو وزير چوڌري نثار چيو ته هن هميشه ملڪي مفادن کي اهميت ڏني آهي. ٻنهي اڳواڻن ۾ ملاقات دوران ملڪ جي سياسي صورتحال ۽ امن امان جي مجموعي صورتحال تي ويچاريو ويو، جڏهن ته ڪراچي  جاري ٽارگيٽڊ آپريشن ۽ پنجاب جي شهر ڊسڪه ۾ ٻن وڪيلن جي قتل واري معاملي تي به غور ڪيو ڪيو ويو. واضح رهي ته گذريل ڊگهي عرصي کان گهرو وزير چوڌري نثار نون ليگ قيادت کان ناراض هو، جنهن سبب هن اهم اجلاسن ۾ شرڪت نه ڪئي هئي.

 

ڇا جج جي مقرري امتحانن ذريعي ٿيڻ گهرجي؟: چيف جسٽس

اسلام آباد (بيورو) سپريم ڪورٽ ۾ 8 1 هين ۽ 1 2 هين آئيني ترميمن، فوجي عدالتن جي قيام خلاف ڪيس جي ٻڌڻي 8 2  مئي تائين ملتوي ڪئي وئي، چيف جسٽس ناصرالملڪ رمارڪس ڏنا ته ڇا جج جي مقرري امتحانن ذريعي ٿيڻ گهرجي، جسٽس اعجاز چوڌري رمارڪس ڏنا ته 8 1 هين ترميم ذريعي ڪئين آرٽيڪلز ۾ ترميمون ٿيون، پارليامينٽ پوري آئين تي نظرثاني ڪري ڇڏي جنهن جو ان کي اختيار نه هو. اڱاري ڏينهن سپريم ڪورٽ ۾ 8 1 هين ۽ 1 2 هين آئيني ترميمن، فوجي عدالتن جي قيام خلاف ڪيس جي ٻڌڻي ٿي، چيف جسٽس جسٽس ناصرالملڪ جي سربراهي ۾ 7 1  رڪني فل ڪورٽ ٻڌڻي ڪئي. ٻڌڻي ۾ جسٽس اعجاز چوڌري رمارڪس ڏنا ته 8 1 هين ترميم ذريعي ڪئين آرٽيڪلز ۾ ترميمون ٿيون، پارليامينٽ پوري آئين تي نظرثاني ڪري ڇڏي، جنهن جو ان کي اختيار نه هو اها قانون ساز اسيمبلي آهي جنهن آئين ساز اسيمبلي جو اختيار استعمال ڪيو، وڪيل اي ڪي ڏوگر دليل ڏنا ته اسان جي ملڪ جي سياستدانن متعلق ماڻهن جا ويچار سٺا نه آهن، ابليس چيو ته هاڻ منهنجي ضرورت نه آهي، سياستدانن جي صورت ۾ منهنجا جانشين اچي ويا آهن، سياسي پارٽين ۾ انٽرا پارٽي چونڊون نه ٿيڻ غير جمهوري طرزِ عمل آهي، 8 1 هين ترميم ۾ انٽرا پارٽي چونڊن جي شرط آئين مان ڪڍي وئي هئي. جسٽس اعجاز چوڌري رمارڪس ڏنا ته هڪ پاسي جمهوريت جي حمايت ۽ ٻئي پاسي اوهان سياستدانن کي برو ڀلو چئو ٿا. اي ڪي ڏوگر دليل ڏنا ته بار ايسوسيئيشن ان لاءِ مجبور آهي ته ان جون هر سال چونڊون ٿين ٿيون، ڊگهي عرصي لاءِ ڪنهن شخص وٽ اختيارن جو رهڻ ڪرپشن کي جنم ڏئي ٿو، هڪ شخص جي هر هر وزيراعظم بڻجڻ سان ٻين جي حق تلفي ٿئي ٿي. ڪميشن ۾ ججن جي مقرري جي طريقيڪار تي اعتراض آهي، ان حوالي سان وڪيلن کان درخواستون گهريون وڃن. جسٽس سرمد جلال عثماني رمارڪس ڏنا ته ان جو مطلب ته ججز ڪميشن ايليٽ ڪلب بنايو ويو آهي. اي ڪي ڏوگر چيو ته منهنجو به ڪجهه اهڙو ئي خيال آهي ته اهليت رکندڙ وڪيلن جو ججز بنجڻ سندن بنيادي حق آهي، ججز مقرري جو موجوده طريقو من پسند ماڻهن جي چونڊ آهي. اي ڪي ڏوگر چيو ته منهنجو فرض آهي ته عدالت کي ٻڌايان ته برطانيا ۾ ججز کي سرڪاري گاڏيون ۽ سهولتون نٿيون ڏنيون وڃن، رائل ڪورٽ آف جسٽس ۾ عدالت جي ڪمري ۾ ججز پنهنجو ڪم پاڻ ڪن ٿا، رائل ڪورٽ آف جسٽس ۾ ڪورٽ اسسٽنٽ ۽ پٽيوالا ناهن هوندا. جسٽس آصف سعيد کوسي رمارڪس ڏنا ته برطانيا ۽ ويلز ۾ هاءِ ڪورٽ جو مطلب ٽرائل ڪورٽ هوندو آهي. اي ڪي ڏوگر چيو ته برطانيا ۾ ججز کي گاڏي ۽ ڊرائيور نٿو ملي، ڀارت ۾ هاءِ ڪورٽ جي جج جي پگهار 8 1  هزار رپيا ۽ پاڪستان ۾ 0 1  لک رپيا آهي. جسٽس ثاقب نثار رمارڪس ڏنا ته اسلامي نظام عدل ۾ قاضي کي وڪيل جي ضرورت به ناهي هوندي. چيف جسٽس ناصرالملڪ پڇو ته ججز جي مقرري امتحانن ذريعي ٿيڻ گهرجي. جسٽس اعجاز چوڌري رمارڪس ڏنا ته ڇا پارليامينٽ پوري آئين جو نئين سرِ جائزو وٺي سگهي ٿي، سپريم ڪورٽ ۾ 8 1 هين ۽ 1 2 هين آئيني ترميمن خلاف ڪيس جي ٻڌڻي 8 2  مئي تائين ملتوي ڪئي وئي.

 

حڪومت ماضي ۾ عوام دوست پاليسيون اختيار ڪيون ۽ اڳتي به ڪندي: پرويز رشيد

اسلام آباد (بيورو) اطلاعات ۽ نشريات جي وفاقي وزير سينيٽر پرويز رشيد چيو آهي ته حڪومت جهڙي طرح ماضي ۾ عوام دوست پاليسيون اختيار ڪيون ائين مستقبل ۾ به عوام دوست پاليسيون ٺاهيندي، اڳتي به عوام کي رليف ڏنو ويندو. ميٽرو بس سان عام ماڻهن کي فائدوپهچندو، حڪومت صاف شفاف طريقي سان پيمران چيئرمين آڻڻ چاهي ٿي، اسان کي هڪٻئي جي غمن ۽ خوشين ۾ ساٿ ڏيڻ گهرجي. ڪالهه اڱاري ڏينهن هتي مقامي هوٽل ۾ يونيورسل پيس مشن جي اهتمام هيـٺ بين المذاهب هم آهنگي سيمينار ۽ ميڊيا سان ڳالهايئندي وفاقي وزير چيو ته هلندڙ سال رپئي جو قدر مستحڪم ٿيو آهي، مهانگائي ۾ به واضح طور تي گهٽتائي آئي هي هي سمورا عوام دوست قدم آهن، هن چيو ته ڪيترن ئي ملڪن تيل جي قيمتن جو لاڀ عوام تائين ناهي پهچايو پر وزيراعظم محمد نواز شريف جي هدايتن تي تيل جي قيمتن ۾ گهٽتائي کي عوام تائين منتقل ڪيو ويو، حڪومت ماضي ۾ جهڙي طرح عوام دوست پالسيون اختيار ڪيون آهن ايندڙ ڏينهن ۾ به عوام دوست پاليسيون ٺاهيندي، اهڙي طرح بجلي جا ڪارخانان هڻڻ ۽ گئس جي پائيپ لائين وڇائڻ به عوام دوست پاليسيون آهن اهڙي طرح ميٽرو بس سان به عام ماڻهن کي فائدو پهچندو، ميٽرو بس روٽس تي ماڻهن کي پڪ اپ جي سهولت ڏيڻ به عوام دوست قدم آهن. هڪ سوال جي جواب ۾ وفاقي وزير چيو ته ڊسڪه واقعي تي حڪومت فوري طور تي نوٽيس وٺي ڪارروائي ڪئي ، پنجاب زنده ۽ پرامن آهي اتي صرف پرامن احتجاج ٿيو آهي، ڊسڪه واقعو افسوسناڪ آهي ۽ ان واقعي جو ڪيس داخل ٿيو آهي، هڪ سوال جي جواب ۾ سينيٽر پرويز رشيد چيو ته اسان صاف شفاف ۽ منصفاڻي طريقي سان پيئمرا چيئرمين آڻڻ چاهيون ٿا، هن چيو ته حڪومت کي هي آئيني ۽ قانوني حق حاصل آهي ته هو ڪنهن به فيصلي خلاف اپيل ڪري سگهي ٿي، هن چيو ته پاڪستان ۾ ڪنهن کي به باهه هڻڻ جي اجازت نه ڏني ويندي. ڊسڪه جي افسوسناڪ واقعي تي حڪومت جو رد عمل ظاهر آهي، سيمينار کي خطاب ڪندي وفاقي وزير چيو ته اسان اڄ هتي گڏ ٿيا آهيون اسان تي الله تعاليٰ جون رحمتون نازل ٿينديون اسان کي هڪٻئي جي ڏک درد ۾ شريڪ ٿيڻ گهرجي ان سان نه رڳو ماڻهن ۾ تعاون وڌي ٿو پر الله تعاليٰ به خوش ٿئي ٿو، جڏهن مخلوق هڪٻئي جي لاءِ اذيت جو سبب بڻجي ٿي ته ان سان الله تعاليٰ به خوش نٿو ٿئي، اردن جي سفير خطاب ڪندي چيو ته اڄ دنيا گلوبل وليج بڻجي وئي آهي انفارميشن ٽيڪنالاجي جي ڪري انساني قدر اسان کي هڪٻئي جي ويجهو آڻي رهيا آهن، اسلام برابري جو پيغام ڏي ٿو، جڏهن ته سيمينار ۾ ان کانسواءِ هندو، سک ۽ ٻين اسڪالرن به شرڪت ڪئي

 

وڏي وزير جي صدارت هيٺ اجلاس،امڪاني ٻوڏ کي منهن ڏيڻ ۽ پي ڊي ايم اي کي وڌيڪ بهتر بڻائڻ تي ويچار

ڪراچي (اسٽاف رپورٽر) سنڌ جي وڏي وزير سيد قائم علي شاهه جي صدارت هيٺ اجلاس ٿيو ، جنهن ۾ امڪاني ٻوڏ کي منهن ڏيڻ ۽ پي ڊي ايم اي کي وڌيڪ بهتر بڻائڻ تي غور ويچار ڪيو ويو. وڏي وزير جي صدارت هيٺ پي ڊي ايم اي جو  اجلاس  ٿيو، جنهن ۾ چيف سيڪريٽري محمد صديق ميمڻ، بحالي کاتي جي سيڪريٽري سعيد اعواڻ، وڏي وزير جي پرنسپل  سيڪريٽري علم الدين بلو، ڊي جي، پي ڊي ايم اي سلمان شاهه ۽ ٻين عملدارن شرڪت ڪئي. اجلاس ۾ امڪاني ٻوڏ کي منهن  ڏيڻ ۽ پي ڊي ايم اي کي وڌيڪ بهتر بڻائڻ تي غور ويچار ڪيو ويو.

 

دبئي: ايم ڪيو ايم جو حماد صديقي ۽ عزير بلوچ پاڪستان حوالي

ڪراچي (اسٽاف رپورٽر) دبئي اختيارين ايم ڪيو ايم جي اليڪشن سيل جي اڳوڻي انچارج حماد صديقي ۽ عزير بلوچ کي پاڪستاني جانچ ادارن حوالي ڪري ڇڏيو آهي ذريعن دعويٰ ڪئي آهي ته ٻنهي جوابدارن کي اڄ رات پاڪستان آندو ويندو. واضح رهي ته عذير بلوچ کي دبئي ۾ انٽرپول پوليس گرفتار ڪيو هو جڏهن ته حماد صديقي کي ڪجهه ڏينهن اڳ دبئي ۾ گرفتار ڪيو ويو هو. حماد صديقي ۽ عزير بلوچ قانون لاڳو ڪندڙ ادارن کي سنگين ڏوهن ۾ گهربل آهن.

 

بلاول ڀٽو زرداري ۽ آصف علي زرداري جي وچ ۾ اختلاف ختم ڪرائڻ لاءِ ڪوششون تيز، ايم اين اي فريال ٽالپر به دبئي پهتل

ڪراچي (اسٽاف رپورٽر) پيپلز پارٽي جي چيئرمين بلاول ڀٽو زرداري ۽ شريڪ چيئرمين آصف علي زرداري جي وچ ۾ اختلاف ختم ڪرائڻ لاءِ ڪوششون تيز ٿي ويون آهن، زرداري هائوس دبئي ۾ ٻنهي اڳواڻن ۾ اختلاف ختم ڪرائڻ لاءِ ايم اين اي فريال ٽالپر به موجود آهي. ذريعن جو چوڻ آهي ته پيپلز پارٽي جي چيئرمين بلاول ڀٽو زرداري ۽ شريڪ چيئرمين آصف علي زرداري جي وچ ۾ اختلاف ختم ڪرائڻ لاءِ ڪوششون تيز ٿي ويون آهن، زرداري هائوس دبئي ۾ ٻنهي اڳواڻن ۾ اختلاف ختم ڪرائڻ لاءِ ايم اين اي فريال ٽالپر به موجود آهي. فريال ٽالپر بلاول ڀٽو زرداري ۽ بختاور ڀٽو زرداري سان خوشگوار موڊ ۾ فوٽو به ڪڍرايا آهن. ذريعن جو چوڻ آهي ته پاڪستان کان پهريان لنڊن ۾ پارٽي ڪنونشن گهرائڻ تي غور ويچار ڪيو پيو وڃي، بلاول ڀٽو جو زور آهي ته پهريان پارٽي ڪنونشن لنڊن ۾ گهرايو وڃي.

 

اليڪشن ڪميشن خيبر پختونخوا ۾ مڪاني چونڊن لاءِ جوڙيل پولنگ اسڪيم جاري ڪري ڇڏي

اسلام آباد (بيورو) اليڪشن ڪميشن خيبر پختونخوا ۾ مڪاني چونڊن لاءِ جوڙيل پولنگ اسڪيم جاري ڪري ڇڏي، ڪُل 1 1  هزار 4 5 1  پولنگ اسٽيشنز مان 9 5 0 4  حساس، 9 5 8 2  پولنگ اسٽيشن نهايت حساس قرار ڏنيون ويون، نهايت حساس پولنگ اسٽيشنز تي سيڪيورٽي جا خاص انتظام ڪيا ويندا، ڪجهه تي فوج، سول آرمڊ فورسز مقرر ڪري سگهجي ٿي. جاري ڪيل تفصيل موجب خيبر پختونخوا  صوبي جي 4 2  ضلعن ۾ مڪاني چونڊن لاءِ 4 5 1 1 1  پولنگ اسٽيشنز نوٽيفاءِ ڪيون ويون آهن، پشاور ڊويزن جي 3  ضلعن پشاور، چارسده ۽ نوشهره ۾ 6 4 1 2  پولنگ اسٽيشنز هونديون جن ۾ 1 6 8  حساس، 5 4 9  نهايت حساس جڏهن ته 0 4 3  کي نارمل قرار ڏنو ويو آهي، ڪوهاٽ ضلعي جي 3  ضلعن ڪوهاٽ، ڪرڪ ۽ هنگو ۾ 2 5 9  پولنگ اسٽيشنز مان 2 7 2  حساس ۽ 1 3 1  نهايت حساس قرار ڏنيون ويون، بنون ڊويزن جي 2  ضلعن بنون ۽ لڪي مروت جي 4 4 8  پولنگ اسٽيشنز مان 6 7 3  حساس ۽ 9 0 2  نهايت حساس قرار ڏنيون ويون آهن، هزارا ڊويزن جي 8  ضلعن هري پور، ايبٽ آباد، مانسهره، بٽگرام ۽ تور گهر جي 6 8 1 2  پولنگ اسٽيشنز مان 4 9 8  حساس ۽ 0 5 3  نهايت حساس قرار ڏنيون ويون آهن. مالاڪنڊ ڊويزن جي 7  ضلعن ۾ قائم 0 9 4 2  پولنگ اسٽيشنز مان 8 9 6  حساس ۽ 4 0 4  نهايت حساس قرار، جڏهن ته مردان ڊويزن جي 2  ضلعن مردان ۽ صوابي جي 9 0 7 1  پولنگ اسٽيشنز مان 6 9 6  حساس ۽ 6 5 4  نهايت حساس قرار ڏنيون ويون آهن.

 

اقتصادي راهداري منصوبو منصفاڻي طريقي سان نه جوڙيو ويو ته پنجاب خلاف نفرت وڌندي ۽ ان سان وفاق ڪمزور ٿيندو:عمران خان

اسلام آباد (بيورو) پي ٽي آءِ جي سربراهه عمران خان چيو آهي ته پاڪ چين اقتصادي راهداري منصوبو منصفاڻي طريقي سان نه جوڙيو ويو ته پنجاب خلاف نفرت وڌندي ۽ ان سان وفاق ڪمزور ٿيندو. پشاور ۾ ميڊيا سان ڳالهائيندي عمران خان چيو ته پاڪ چين راهداري منصوبي تي ٻنهي ملڪن وچ ۾ گذريل ٻن سالن کان ڳالهيون هلي رهيون آهن پر حڪومت صوبن کي اعتماد ۾ ئي ناهي ورتو ۽ صوبائي حڪومتن کان منصوبي جو روٽ لِڪايو ويو. سندس چوڻ هو ته اقتصادي راهداري منصوبو چئني صوبن کي ڳنڍڻ جو زبردست موقعو هو پر حڪومت بلوچستان سميت پٺتي پيل علائقن ۾ غربت جي خاتمي لاءِ موقعو وڃائي رهي آهي. هن چيو ته شريف ڪٽنب سمجهي ٿو ته پنجاب مان 60 سيڪڙو ووٽ حاصل ڪري حڪومت ٺاهي، ننڍن صوبن کي مڪمل طور نظر انداز ڪيو وڃي. پي ٽي آءِ چيئرمين چيو ته وفاق خيبر پختون خواهه جي 80 سيڪڙو ترقياتي بجيٽ اڃا تائين جاري ناهي ڪئي. عمران خان چيو ته چشما رائيٽ بينڪ ڪئنال 20 سالن کان ناهي ٺهيو ۽ وفاق طرفان ان جي بجيٽ ٻئي هنڌ خرچ ڪئي ويندي آهي جنهن سبب خيبر پختون خواهه جو پاڻي ضايع ٿي رهيو آهي.