تازيون خبرون

Daily Archives: May 26, 2015

پاڪستان ڪرڪيٽ بورڊ طرفان انڊيا ۾ هوم سيريز کيڏڻ جي خواهش بابت هڪ خبر کي مڪمل رد ڪري ڇڏيو

لاهور (اسپورٽس نيوز) پاڪستان ڪرڪيٽ بورڊ شهريار خان طرفان انڊيا ۾ هوم سيريز کيڏڻ جي خواهش بابت هڪ خبر کي مڪمل رد ڪري ڇڏيو آهي. هندستان ٽائمز پي سي بي چيئرمين شهريار خان سان ڳالهائيندي ان بابت چيو ته پاڪستان انڊيا ۾ پنهنجي هوم سيريز جي لاءِ تيار آهي. هندستان ٽائمز شهريار خان جو حوالو ڏيندي وڌيڪ ٻڌايو ته بنگلاديش ۽ سريلنڪا هوم سيريز جي ميزبانيءَ ۾ دلچسپي ڏيکاري آهي، پر مالي اعتبار سان انڊيا سڀ کان بهترين آپشن هوندو. شهريار خان هلندڙ مهيني انڊيا جو دورو ڪرڻ کان پوءِ چيو هو ته ٻنهي پاڙيسري ٽيمن وچ ۾ ڊسمبر ۾ يو اي اِي ۾ مڪمل سيريز جو امڪان آهي. پي سي بيءَ ميڊيا تي هلندڙ ان خبر کي تڪڙو ئي رد ڪندي چيو ته هندستان ٽائمز شهريار خان جي بيان کي صحيح طريقي سان رپورٽ ناهي ڪيو، هندستان ٽائمز جي ان خبر ۾ ڪا صداقت ناهي، اسان جون آخري ڪوششون اهي هونديون ته سيريز پاڪستان يا نيوٽرل گرائونڊ (يو اي اِي) ۾ ڪرائي وڃي. جڏهن ته پي سي بي اختياين قذافي اسٽيڊيم لاهور ۾ پاڪستان ۽ زمبابوي وچ ۾ ڪالهه آخري ٽي ٽوئنٽي ميچ کان اڳ اسٽيڊيم جي سمورن انتظامن جو مڪمل طور جائزو رتو. پهرين ٽي ٽوئنٽي ميچ دوران تماشائين طرفان کائڻ پيئڻ جون شيون انڪلوزرز ۾ اڇلائڻ سبب انڪلوزرز جي مڪمل صفائي ڪرائي وئي ۽ عملي کي هدايت ڪئي وئي ته ميچ ختم ٿيندي ئي انڪلوزرز جي صفائي کي يقيني بڻايو وڃي. اختيارين مختلف انڪلوزرز ۾ تماشائين لاءِ پاڻي پيئڻ جي سهولت کي بهتر بڻائڻ جي هدايت ڪئي ۽ سيڪيورٽي انتظامن جو جائزو پڻ ورتو. پي سي بي جي چيف آپريٽنگ آفيسر سبحان احمد جو چوڻ آهي ته 6 سالن کان پوءِ انٽرنيشنل ڪرڪيٽ جي بحالي ٿي. پهرين ميچ ۾ ڪجهه خاميون سامهون آيون آهن جنهن تي ڳالهه ٻولهه ڪئي وئي آهي.

 

سيالڪوٽ ۾ وڪيلن جي مارجي وڃڻ کان پوءِ علائقو جنگ ميدان بڻجي ويو

 

سيالڪوٽ جي علائقي ڊسڪا ۾ ايس ايڇ جي فائرنگ ۾ وڪيلن جي مارجڻ کان پوءِ وڪيل سراپا احتجاج اسپتال ۾ هنگاما آرائي، وڪيلن اسپتال ۾ ٽوڙ ڦوڙ ڪري درين جا شيشا ٽوڙي ڇڏيا، روڊن تي نڪري ٽائرن کي باهيون ڏيئي روڊ بند ڪري ڇڏيو، جنهن کان پوءِ ٿاڻي جو گهيراءُ ڪيو ويو جنهن تي پوليس وڪيلن  کي ڇڙو ڇڙ ڪرڻ لاءِ آنسو گئس جو استعمال ڪيو، جنهن سبب ڊسڪا وارو علائقو ميدان جنگ بنجي ويو.  سيالڪوٽ ۾ به  وڪيلن احتجاج ڪندي ٿاڻي جو گهيراءُ ڪري پوليس جي گاڏين جا شيشا ٽوڙي ڇڏيا. ائين ئي لاهور ۾ به وڪيل مال روڊ تي نڪري آيا ۽ پنجاب اسيمبلي جو گهيراءُ ڪيو  جنهن دوران اسيمبلي ۾ موجود ميمبرن ۽ عملي کي ٻئي دروازي کان ٻاهر ڪڍيو ويو.  ملتان جي ڪچهري  چوڪ تي پڻ وڪيلن احتجاج ڪيو  ۽ روڊ بند ڪري ڇڏيو جنهن سبب ٽرئفڪ جام ٿي وئي، وڪيلن پوليس اهلڪارن کي ڌڪا ڏئي ڀڄايو  ۽ سندن گاڏين جا شيشا ٽوڙي ڇڏيا.ٻئي طرف چيف جسٽس لاهور هائي ڪورٽ جسٽس منظور ملڪ ڊسڪا واقعي جو نوٽيس وٺندي، فوري طور تي رينجرز  طلب ڪرڻ جو حڪم ڏيئي ڇڏيو . ڊي پي او سيالڪوٽ ڊاڪٽر آصف شهزاد چيو ته وڪيل تعلقه ميونسپل  ايڊمنسٽريشن جي آفيس ۾ ٽوڙ ڦوڙ ڪئي جنهن تي  پوليس کين روڪڻ لاءِ فائرنگ ڪئي جنهن ڪري معاملو سنگين ٿي ويو، جڏهن ته وڪيلن تي فائرنگ ڪندڙ ايس ايڇ او کي گرفتار ڪيو ويو آهي.

ضرورت ان ڳالهه جي آهي ته حڪومت کي گهرجي ته هن سموري واقعي جي جانچ لاءِ ڪميٽي جوڙي ۽ اصل حقيقت کي وائکو ڪري ملوث ماڻهن خلاف سخت ڪارروائي ڪري ته جيئن جمهوريت کي بچائي سگهجي ٻي صورت ۾ اگر ان معاملي تي ماٺ ڪئي وئي ته معاملو اڃان وڌيڪ خراب صورتحال اختيار ڪري سگهي ٿو.

 

جي هريڙون به ٻڏي وڃن!!!؛ارشد شاهه

پاڪستان ۾ بهتر سياسي ماحول نه جڙڻ ۾ لابين جو وڏو اهم ڪردار رهندو آيو آهي، مختلف سياسي جماعتن اندر موجود لابيون پنهنجي سياسي پوزيشن کي مستحڪم ڪرڻ لاءِ مرڪزي، صوبائي، ڊويزنل، ضلعي توڙي تعلقن ۽ مقامي سطح تائين پنهنجا حمايتي پيدا ڪري پنهنجي پوزيشن کي مستحڪم ڪرڻ لاءِ ڪم ڪنديون رهنديون آهن. ان لابي سسٽم جي ڪري ئي سياسي جماعتن ۾ قربانيون ڏيندڙ ڪارڪنن ۽ اهم شخصيتن کي پنهنجين پارٽين کان تحفظات رهندا آيا آهن ۽ اڪثر ڀيرا ڪيترن ئي سالن تائين پارٽي سان گڏ رهي پارٽي لاءِ قربانيون ڏيندڙ ڪارڪن توڙي اڳواڻ يا ته ٻين پارٽين ۾ هليا ويندا آهن يا وري اهي سياست کان پاسيرا ٿي ويندا آهن، ان جا ڪيترائي مثال اسان کي پنهنجي ملڪ جي سياسي جماعتن ۾ نظر اچن ٿا. موجوده دور ۾ جتي ملڪ ۽ قوم جي حالتن ۾ رتي برابر به تبديلي نه آئي آهي، اتي سياسي جماعتن جي اندر ضرور تبديلي ڏسڻ ۾ اچي رهي آهي، جنهن جو تازو مثال پاڪستان تحريڪ انصاف جي چيئرمين عمران خان ۽ اليڪشن بورڊ جي سربراهه جسٽس (ر) وجيهه الدين ۾ اختلافن کانپوءِ نيٺ پارٽي چيئرمين پاران اليڪشن بورڊ آڏو گوڏا کوڙڻ وارو عمل آهي. اها ئي صورتحال نواز ليگ ۾ به آهي جتي هڪ ئي وقت نواز شريف کان علاوه اسحاق ڊار، خواجه آصف، راڻا ثناءُ الله ۽ چوڌري نثار جون لابيون اهم حيثيت رکن ٿيون ۽ انهن لابين جا هڪ ٻئي سان اختلاف به ڪنهن کان ڳجها نه آهن پر جڏهن اسين پاڪستان پيپلزپارٽي تي نظر وجهون ٿا ته اتي اسان کي صورتحال ٻين جماعتن کان بلڪل مختلف نظر اچي ٿي. پيپلزپارٽي ۾ به ڪيتريون ئي لابيون موجود آهن، جيڪي ڀٽو شهيد ۽ شهيد راڻي جي وقت ۾ به نه صرف موجود هيون پر اهي پنهنجي ذاتي مقصدن لاءِ ڪم به ڪنديون رهنديون هيون. 2007ع جي المناڪ سانحي ۾ محترمه جي وڇوڙي بعد پاڪستان پيپلزپارٽي بلڪل مختلف شڪل اختيار ڪري ورتي. آصف علي زرداري جي قيادت ۾ پ پ جي سياسي مشن کي اڳتي کڻي وڃڻ ۽ 2008ع جي چونڊن ۾ ڪاميابي ماڻي حڪومت ۾ براجمان ٿيڻ، مفاهمتي پاليسي شروع ڪرڻ، سياسي دشمنن کي دوست بڻائڻ ۽ مفاهمت سان صدر مملڪت جو منصب حاصل ڪري پنج سال حڪمراني ڪرڻ جو شرف حاصل ڪرڻ بعد 2013ع جي چونڊن ۾ شڪست ۽ پارٽي جي سنڌ تائين محدود ٿي وڃڻ واري عمل ۽ پارٽيءَ جي سينئر ۽ قرباني ڏيندڙ اڳواڻن ۽ ڪارڪنن کي ڀت سان لڳائي دوستن، يارن ۽ ڪاروباري ساٿين ذريعي پارٽي ۽ سنڌ سرڪار کي هلائڻ واري طريقيڪار سڀ کان پهرين پيپلزپارٽي ۾ موجود سمورين لابين کي ختم ڪري ڇڏيو، ڇو ته لابين کي هلائيندڙ اڳواڻ پيپلزپارٽي جا هئا، انهن کي دوست، يار يا ڪاروباري ساٿي ٿيڻ جو شرف حاصل نه ٿي سگهيو ۽ نتيجي طور اهي لابيون جيڪي ڀٽو شهيد ۽ محترمه شهيد جي دور ۾ به موجود هيون اهي آصف علي زرداري جي قيادت ۾ سياست ڪندڙ پيپلزپارٽي ۾ پنهنجو وجود برقرار رکي نه سگهيون ۽ انهن جي جاءِ نين لابين والاري ڇڏي، جنهن ۾ ادي جي لابي، ڀائي جان جي لابي ۽ دوستن جي لابي قابل ذڪر هيون. آهستي آهستي انهن لابين کي سوڙهو ڪري هڪ مضبوط لابي اڇي ڪاري جي مالڪ بڻجي پارٽي ۽ سنڌ سرڪار کي پنهنجي منشا موجب هلائي رهي آهي، جنهن جي قيادت شهيد راڻي جي تڪ مان چونڊيل ايم اين اي ۽ شريڪ چيئرمين جي ڀيڻ فريال ٽالپر ڪري رهي آهي پارٽي جا سينئر اڳواڻ ۽ ڪارڪن ڪنهن به قسم جي اهميت نه ملڻ ۽ مسلسل نظرانداز ٿيڻ بعد خاموش ٿي چپ سبي ويهي رهيا آهن. پارٽي ۽ سنڌ سرڪار ۾ اهڙن چهرن کي اڳتي آندو ويو آهي جيڪي نه پ پ جي منشور کان واقف آهن ۽ نه جيالن جي فطرت کان واقف آهن ۽ نه ئي جيالا انهن کان واقف آهن، نتيجي طور شهيد ڀٽي ۽ شهيد راڻي جا ساٿي مايوسي جو شڪار بڻجي پارٽي جي تيزيءَ سان گهٽجندڙ مقبوليت تي اندر ئي اندر ۾ جلي ۽ سڙي رهيا آهن ۽ ان صورتحال جو ذميوار ادي جي لابي کي قرار ڏيئي رهيا آهن، جيڪا لابي، پرس ۽ منرل واٽر جي بوتل کڻي اڳيان هلڻ وارن ماڻهن کي گهرو ۽ جيل کاتن جي اهم وزارتن جي منصب تي فائز ڪرڻ ۾ به دير نه ٿي ڪري پر اتي ئي پارٽي ۾ اهم حيثيت رکندڙ ۽ جيالن جي حقن جو آواز بلند ڪندڙ اڳواڻن کي ڀت سان لڳائڻ جو سلسلو پڻ تيزيءَ سان جاري ڪيو ويٺي آهي. ڊاڪٽر ذوالفقار مرزا ۽ موجوده پ پ قيادت ۾ شديد اختلافن واري معاملي کي ٻن دوستن ۾ اختلاف چئي پاسيرو ڪري سگهجي ٿو پر گڏوگڏ بدين ۾ پوليس چڙهاين، گرفتارين، تشدد، هڪ ئي رات ۾ 7، 7 ڪيس داخل ڪرڻ واري عمل به جيالن ۾ سخت مايوسي کي جنم ڏنو آهي. شهيد راڻي جي انتهائي ويجهو رهندڙ ۽ اسلامي دنيا جي پهرئين مسلمان عورت اسپيڪر جو اعزاز حاصل ڪندڙ سينئر پ پ اڳواڻ ڊاڪٽر فهميده مرزا پاران بار بار اهو چوڻ ته پ پ اسان جو گهر آهي ۽ اسين ان جا ڀاتي آهيون، سنڌ سرڪار ۽ پ پ قيادت انتقام وٺڻ بدران اسان سان ڳالهائي مسئلي جو حل ڪڍي، ان باوجود پ پ قيادت توڙي ڪنهن به ذميوار پاران ڊاڪٽر فهميده مرزا سان رابطو نه ڪرڻ واضح اشارو آهي ته پ پ جي موجوده قيادت ڪيتري سنجيده آهي.

حيرت جهڙي ڳالهه آهي ته مفاهمتي سياست تحت قاتل ليگ کي قابل ليگ بڻائي شهيد راڻي جي ناپسنديده سياسي اڳواڻ چوڌري پرويز الاهي کي آئين ۾ خاص گنجائش ڪڍي ڊپٽي وزيراعظم جو منصب عطا ڪندڙ موجوده پ پ قيادت کي مرزا معاملي تي ڇو مفاهمتي سياست وسري وئي؟

جيئي ڀٽو جا نعرا هڻندڙ عام ڪارڪن نوڪري لاءِ پريشان آهي، ترقياتي ڪمن لاءِ پريشان آهي، اهميت نه ملڻ ۽ نظرانداز ڪرڻ جون دانهون ڪري رهيو آهي انهن جي ڪير به ٻڌڻ وارو نه آهي، ڪارڪن ته پري جي ڳالهه آهي پر ڪيترائي ڀيرا پارليامينٽ ۾ براجمان ٿيندڙ ۽ پارٽي ۾ اهم عهدن تي مقرر اڳواڻ به آف دي رڪارڊ ڳالهيون ڪندي مايوسيءَ جي اٿاهه بلندين تائين پهچي وڃن ٿا، سڀ سٺو پيو ٿئي واري ڳالهه صرف اهي چهرا ڪندي نظر اچن ٿا، جيڪي چهرا 2008ع کان اڳ پارٽي ۾ موجود ئي نه هئا ۽ هاڻ اهي چهرا پارٽي ۽ سنڌ سرڪار ۾ اڇي ڪاري جا مالڪ بڻيل آهن. سڄي زندگي پارٽي کي ارپيندڙ اڳواڻن جي مستقبل جو فيصلو به انهن نون چهرن جي هٿن ۾ آهي، هن وقت جڏهن سڀ ماڻهو چئي رهيا آهن ته سياسي ميدان ۾ پيپلزپارٽي تيزيءَ سان پوئتي وڃي رهي آهي ته ڇا موجوده پ پ قيادت جي اکين کان اها صورتحال اوجهل آهي؟
شهيد راڻي جو پٽ ۽ پ پ چيئرمين بلاول ڀٽو زرداري جنهن کي پارٽي جا جيالا آخري اُميد سمجهن ٿا، ان به گذريل ڏينهن جاري ڪيل بيان ۾ اهم عهدن تي ضياءَ باقيات جي مقرريءَ تي سخت ڳڻتي جو اظهار ڪندي واپسي تي وڏي پئماني تي تبديلي آڻڻ جو اشارو ڏنو آهي. بلاول ڀٽو ڪافي وقت کان ملڪ کان ٻاهر آهي سندس جي غير موجودگي، پڇاڻو نه ڪرڻ يا مصلحت پسندي تحت خاموشي جو نقصان پارٽي کي ٿي رهيو آهي.

سنڌي ۾ چوڻي آهي ته ٻڏيءَ ٻيڙيءَ جون هريڙون به چڱيون، پر جي هريڙون به ٻڏي وڃن ته پوءِ ڇا چڱو بچندو. بلاول ڀٽو کي اهو سوچڻ جي سخت ضرورت آهي.

 

سنڌ حڪومت! سياسي ۽ عوامي مسئلا حل ڪرڻ ۾ ناڪام ؛وينگس

حڪومت، رياست ۾ دل جهڙو ڪردار رکندڙ هوندي آهي، ڇاڪاڻ جو حڪومت جو سڌو تعلق عوام سان رهي ٿو ۽ جڏهن عوام ئي سورن ۽ تڪليفن ۾ هجي ته ان جو مطلب رياست به تڪليف ۽ درد ۾ ورتل آهي. ان ڪري حڪومت جي ڪارڪردگي وڌيڪ اهميت رکندڙ آهي. ڪنهن سچ ئي چيو، ”ڪنهن به رياست کي ڏسڻ لاءِ اتان جي حڪومت جي ڪم کي ڏسو، توهان کي خبر پئجي ويندي ته رياست ڪهڙي حال ۾ آهي؟“

پاڪستان ۾ حڪومتن جي ڪارڪردگي کي ڀيٽيو وڃي ته اهي خراب کان بدترين تائين وڃي بيهنديون، ان کان الڳ ٿي ڪري بهتر ڪارڪردگي تي ڪا به حڪومت نه ٿي اچي. عالمي ادارن جي فهرست ۾ پاڪستان حڪومتن جي ڪارڪردگي هر سال هميشه خراب نمبر تي بيٺل آهي. ان جو ذميوار ڪير آهي؟ ڇا ان جي ذميواري ٻاهرين قوتن تي هنئي ويندي؟ جڏهن اقتدار سنڀاليندڙ حڪمران پنهنجا ئي هجن پوءِ اهي عوام جا مسئلا حل ڇو نه پيا ڪن؟

جيڪڏهن ڪا حڪومت عوام جا مسئلا حل ڪرڻ ۾ ناڪام وڃي ٿي يا حل ڪرڻ جي موڊ ۾ ناهي ته پوءِ ان جي سڌي ذميواري حڪومت جي مٿان عائد ٿئي ٿي. اسان هن وقت سنڌ حڪومت جي ڳالهه ڪنداسين، وفاقي حڪومت ڇا ۽ ڪيئن ڪم ڪري پئي ان تي ٻئي دفعي بحث ڪبو، پر هن ڀيري سنڌ حڪومت ۾ ساڳيو وزيراعليٰ ۽ وزير، گذريل حڪومت کان وٺي هيل تائين اقتداري ڪرسي تي ويٺل آهن.

انهن کان پڇيو وڃي ته انهن سنڌ جا ڪيترا سيڪڙو مسئلا حل ڪيا آهن ۽ عوام کي ڪيترو رليف ڏنو ويو؟

سنڌ حڪومت جي ڪارڪردگي کي جاچڻ لاءِ ٻن پاسن تي نظر رکڻ انتهائي ضروري آهي هڪ سياسي ۽ ٻيو عوامي پاسو، جتي سنڌ حڪومت پاڻ کي ڪٿي وڃي بيهاريو آهي؟

سڀ کان پهرين عوامي مسئلن جي پاسي تي نظر ٿا وجهون:

سنڌ جي حالت ڪٿي وڃي پهتي آهي؟ شهرن ۽ ڳوٺن جي حالت ڏسو ته انهن کي ڏسي ائين بلڪل نه لڳندو ته اهي ڪي 21 صدي جا شهر آهن. عوام جا مسئلا حل ڪرڻ بجاءِ عوام مسئلن جي ڄار ۾ ڦاسندو پيو وڃي، جيڪڏهن سنڌ حڪومت تي تنقيد ٿئي ٿي ته چيو وڃي ٿو، اِهو ميڊيا جو پيدا ڪيل مسئلو آهي. آخر صوبائي حڪومت ٻڌائي، ڇا ميڊيا هر شهر ۽ ڳوٺ ۾ هٿ ٺوڪيا مسئلا پيدا ڪري پئي؟

جنهن صوبي جي گادي واري شهر  (Capital city) ڪراچي ۾ مسئلا هجن ۽ اتي حڪومت اگر مگر جا لفظ استعمال ڪندي رهي ته پوءِ حڪومت جي ڪارڪردگي جو چڱي ريت انداز لڳائي سگهجي ٿو. ڪراچي ۾ پاڻي جي مسئلي کي آخر سنڌ حڪومت حل ڪري ڇو نه پئي؟ جيڪڏهن سنڌ حڪومت هڪ پاڻي جو مسئلو حل نه ٿي ڪري سگهي ته پوءِ پوري صوبي جي مسئلن کي ڪيئن حل ڪري سگهندي؟

حڪومت کي ڪرڻ ائين گهربو هو ته ٻن ڏينهن اندر ڪراچي شهر ۾ پاڻي جي مسئلي کي حل ڪرڻ گهربو هو پر سنڌ حڪومت ان کي حل ڪندي نظر نه ٿي اچي. عوام جي بنيادي مسئلن کي حل ڪرڻ حڪومت جي پهرين ذميواري آهي، ڪراچي شهر جو حال ڏسو، ڇا ڪير اندازو لڳائي سگهي ٿو ته اهو سنڌ جو ڪپيٽل سٽي آهي!

سنڌ حڪومت ڪيترن ئي سالن کان حڪومت ۾ ويٺل آهي ان جو اندازو حڪومت کي ٿي وڃڻ گهرجي ته عوام جا مسئلا ڪهڙا آهن؟ روڊ رستن جو حال ڏسو اهي بدترين شڪل ۾ آهن، تعليم جي تباهي ۾ ٻارن جو مستقبل تباهه پيو ٿئي، تحفظ عوام کي مليل ناهي، صحت جي حوالي سان ڏٺو وڃي ته اتي به سنڌ حڪومت جي ڪارڪردگي زيرو آهي ۽ هاڻي وري پاڻي جو بحران پيدا ڪري، عوام کي تڪليف ۾ رکي اڻسڌي طرح ٽينڪر مافيا گروپ کي سپورٽ ڪيو پيو وڃي.

پاڻي جو مسئلو ان وقت پيدا ٿئي ٿو جڏهن پاڻي جي ضرورت هوندي آهي، خاص طورتي ڪراچي شهر ۾ ڪا اڄ جي ڳالهه ناهي، هر وقت گرمي جي موسم دوران پاڻي جو بحران پيدا ڪري ٽينڪر مافيا جي لاءِ ڪمائي جا رستا کوليا ويندا آهن.

ائين ناهي ته سنڌ حڪومت ڪم نه ٿي ڪري، يقينن اهي ڪم ڪن پيا پر انهن جو بهترين ڪم بيان کان شروع ٿيندو آهي ۽ اتي ئي اچي ختم ٿئي ٿو. حڪومتون عملي ڪم ڪڏهن ڪنديون؟ سنڌ حڪومت جيڪڏهن چونڊن دوران عوام آڏو ڪو عذر پيش ڪري پنهنجي لاءِ صاف رستو ڪڍڻ جي ڪوشش ڪئي، ايتري سنڌ حڪومت کي ڄاڻ هجڻ گهرجي ته عوام هن ڀيري انهن جا عذر نه ٻڌندي ڇاڪاڻ جو پيپلز پارٽي گذريل حڪومت کان وٺي هن وقت تائين اقتداري ڪرسي تي موجود آهي ۽ نه ئي ڪنهن جي ڪا رڪاوٽ حڪومت آڏو آهي ته پوءِ سنڌ حڪومت ڪهڙا عذر پيش ڪندي؟عوام جا مسئلا حل نه ڪري سگهڻ جو مطلب پيپلز پارٽي کي ايندڙ چونڊن جي فهرست ۾ ڪمزور ڪرڻ ۽ ان جي ذميواري حڪومت جي ڪارڪردگي تي ويندي. سنڌ حڪومت ميگا پراجيڪٽ جي فهرست نه ڏئي پر سنڌ حڪومت عوام جا ننڍا مسئلا حل ڪري ته اهو بهتر آهي جڏهن عوام وٽ پاڻي ۽ شهر صاف نه هوندا ته انهن جي لاءِ ميگا پراجيڪٽ ڪا به اهميت نه ٿا رکن.جنهن شهري وٽ روڊ رستن تي سفر ڪرڻ جي سهولت نه هجي ۽ اتي حادثا ٿيندا رهن، ڇا ان کي بهتر حڪومت چئي سگهجي ٿو؟ اسان جي لاءِ تعجب جي ڳالهه ان وقت آ جو وڏي شهر ڪراچي ۾ پاڻي جي کوٽ هجڻ باوجود حڪومت ميٽنگ مٿان ميٽنگ تي وقت ضائع ڪري پئي، اڃان حڪومت کي ڪيترو وقت گهرجي جو اهي ميٽنگ ۾ ويهي ڪري پاڻي بحران حل ڪرڻ لاءِ ڪو وڏو فارمولو تلاش ڪن ۽ پوءِ ان تي عمل ڪرڻ شروع ڪن.هڪ سادو فارمولو استعمال ٿيندو آهي ته ”عملي ڪم“ ڪري ڏيکارڻ، جڏهن سنڌ حڪومت عملي ڪم ڪري ها ته شايد ڪراچي شهر ۾ پاڻي جو بحران نه هجي ها ۽ عوام خوش ٿئي ها ته سنڌ حڪومت ٻن ڏينهن ۾ پاڻي جو مسئلو حل ڪري ڏيکاريو آهي، کڻي ان تي مخالف ڌر ڪيتري به تنقيد ڪري ها پر مخالف ڌر جي تنقيد عوام تي اثر نه ڪري سگهي ها، ڇو جو عوام پاڻ مسئلي جو حل ٿيندي ڏسي چڪي ها پر حڪمران غير سنجيده رويو رکندي ۽ عوام جي مسئلن کي حل ڪرڻ بجاءِ مسئلن کي اينگهائي رهيا آهن.سنڌ حڪومت جتي عوامي مسئلن کي حل ڪرڻ ۾ ناڪام وئي آهي اتي سياسي مسئلن ۾ به پاڻ کي پٺتي ناهي رکيو اتي به ناڪام رکڻ ۾ اڳيان اڳيان آهي.سياسي مسئلن تي نظر وجهو:اڄڪلهه سنڌ حڪومت وٽ ذوالفقار مرزا وڏو سياسي مسئلو آهي، جنهن جي لاءِ سياسي مفاهمت جو فارمولو استعمال ڪرڻ جي جاءِ تي پيپلز پارٽي ڏي جواب وٺ جواب جي پاليسي اختيار ڪئي آهي. سياسي منظرنامي تي پ پ پارٽي پاڻ کي ظاهر ڪندي رهي ٿي ته انهن وٽ سياسي مفاهمت جو فارمولو ان وقت تائين بهترين آهي جيستائين انهن کي اقتدار ۾ رهڻ جو ڪو سهارو ملي، باقي ٻئي جڳهه تي سياسي مفاهمت فارمولو استعمال نه پيو ٿئي، ذوالفقار مرزا جي سياست سمجهه کان ٻاهر ناهي سڀ ظاهر ٿئي پيو ته ڪجهه نه ڪجهه ضرور آهي جو ان انداز سان مرزا سياسي ٻولي استعمال ڪئي آهي.ان جڳهه تي پيپلز پارٽي پاڻ کي ناڪام ڇو ڪري پئي ڇا اهي ٻه پير مفاهمت جا اڳتي ڪري معاملي کي حل نه ٿا ڪري سگهن؟ ذوالفقار مرزا جي لاءِ بلاڪ ڇو هنيو پيو وڃي؟ جيڪڏهن پيپلزپارٽي وٽ مرزا سان ڏي جواب ۽ وٺ جواب جي پاليسي کي اختيار ڪري ميڊيا ۾ رهڻ وڌيڪ اهميت رکي ٿو ته ان سان خود پيپلز پارٽي جي پنهنجي مفاهمت واري پاليسي وائکي پئي ٿئي.ان ڪري سنڌ حڪومت سياسي مسئلن کي حل ڪرڻ ۾ به ناڪام نظر اچي ٿي. سنڌ حڪومت کي سوچڻ گهرجي ته اهي حڪومت ڪيئن ڪري رهيا آهن؟ عوام جا مسئلا حل نه ٿا ڪري سگهن، اقتدار عوام جي مسئلن کي حل ڪرڻ لاءِ ڏنو ويندو آهي جو رياست ۾ عوام خوش هجي پر جڏهن هڪ وڏي شهر ۾ عوام پاڻي جي مسئلي لاءِ پريشان هجي ۽ جنهن شهر ۾ هڪ مخالف سياسي اڳواڻ مرزا کي گرفتار ڪرڻ جي ڪوشش ڪئي وڃي، ان کان پوءِ صوبي اندر حڪومت جي حڪمراني ڪيئن ڪم ڪري پئي؟ حڪومت پاڻ ئي تصوير ڏيکاري رهي آهي ڇا ان کان وڌيڪ ڪجهه لکڻ لاءِ بچي ٿو جڏهن حڪومت پنهنجي ڪارڪردگي جي خراب تصوير گادي جي شهر ۾ ڏيکاريندي هجي.