تازيون خبرون

Daily Archives: May 25, 2015

پنهنجي ٻارن کي دهشتگردي کان پاڪ ۽ محفوظ پاڪستان ڏيڻ چاهيون ٿا: پرويز رشيد

راولپنڊي (م.ڊ) اطلاعات ۽ نشريات واري وفاقي وزير سينيٽر پرويز رشيد چيو آهي ته اسان کي پنهنجي مذهب، قرآن جي تعليم ۽ حضور صه جي ٻڌايل رستي تي هلڻو آهي، هي رستو ڪنهن جي زندگي وٺڻ نه پر زندگيون ڏيڻ وارو آهي، حڪومت، پاڪ فوج ۽ سيڪيورٽي ادارا ملڪ کي دهشتگرد کان پاڪ ڪرڻ جي ايجندا تي عمل پيرا آهن، صرف پنهنجي ئي نه پر دهشتگردن جي ٻارن کي به محفوظ پاڪستان ڏيڻ چاهين ٿا، چونڊون مقرر مدو پورو ٿيڻ کانپوءِ ٿينديون، پارٽِي اليڪشن ۾ بي ضابطگين کانپوءِ 2015ع ۾ پي ٽي آءِ ۾ پارٽي اليڪشن ٿي سگهي ٿي. هو ڪالهه آچر ڏينهن الخليل قرآن ڪمپليڪس ڪاليج روڊ راولپنڊي ۾ سندون ورهائڻ ۽ دستار بندي جي تقريب کي خطاب ڪري رهيو هو. اطلاعات واري وزير سينيٽر پرويز رشيد چيو ته ان مدرسي سان منهنجون تمام گهڻيون يادون لاڳاپيل آهن، هن چيو ته مدرسي جي باني حافظ خليل الرحمان مرحوم سندس تمام گهڻي رهنمائي ڪئي ۽ چيو ته اج به محسوس ٿئي ٿو ته منهنجو هٿ ان جي هٿ ۾ آهي، هن چيو ته سندس لهجي ۾ نرمي، ٻارن سان شفقت ۽ اسلام جي تدريس مون کي اج به ياد آهي، سندس طبيعت ۾ هميشه نرمي ئي هئي، ڪڏهن تلخي نه ڏٺي ۽ گهڻو ڪري ان سان گڏ نماز ادا ڪندو هئس، هن چيو ته ان مدرسي اسلام جي اها تعليم ماڻهن تائين پهچائي جنهن جي نتيجي ۾ مسلمان تقسيم نه پر متحد ٿيا آهن ڇو ته هتي مر مسلڪ جي طالبعلوم قرآن پاڪ جي تعليم حاصل ڪري رهيا آهن، هن چيو ته اسان جي نبي صه هميشه محبت، انسانيت جو درس ڏنيدو هو، نبي ڪريم صه هميشه ان ڳالهه جودرس ڏنو ته خدا تعلاليٰ رب العالمين آهي، ان جون رحمتون هر هڪ تي نازل ٿينديون آهن، الله تعليٰ جڏهن رحمتون نازل ڪرڻ ۾ تقسيم نٿو ڪري ته اسان ڇو تقسيم ۽ فرقن ۾ ورهايل آهيون، هن چيو ته نمازين کي شهيد ڪيو ويندو آهي جيڪي ماڻهو الله جي عبادت ۾ سر جهڪايل هوندا انهن انهن کي شهيد ڪيو ويندو آهي، جيڪي ماڻهو هي سڀ ڪجهه ڪن ٿا انهن کي سمجهائڻ اسان جو، عالم دين ۽ سڀني جو فرض آهي، اسلام جو پيغام پهچائڻ جي لاءِ اهو رستو اختيار ڪيو وڃي جيڪو قرآن ۽ سنت جي عين مطابق آهي، هن چيو ته دهشتگردي ڪندڙن کي هي سمجهڻ گهرجي ته اسان صرف پنهنجي ٻارن جي لاءِ دهشتگردي ختم نٿا ڪرڻ چاهيون پر دهشتگردن جي ٻارن کي به محفوظ پاڪستان ڏيڻ چاهيون ٿا، هن چيو ته سريلنڪن ٽيم تي دهشتگرد حملو ٿيو ۽ ٽيم کي واپس وڃڻو پيو، پوءِ ڪجهه عرصي کانپوءِ پاڪستان ۾ ڊينگي مڇر جي بيماري اچي وئي، پنجاب جي وزيراعليٰ ان بيماري خلاف هڪ محاذ قائم ڪيو، علي الصبح ميٽنگز ڪندو ۽ رات دير تائين ان بيماري کي ختم ڪرڻ ۾ مصروف عمل رهندو هو، ميڊيا جون به خبرون هيون ته ڪافي ماڻهو مئا آهن ۽ ايندڙ سال وڌيڪ حملا وڌندا ان صورتحال ۾ سريلنڪن ڊاڪٽرن جي ٽيم پاڪستان ايندي آهي، جنهن ملڪ جي رانديگرن تي دهشتگردي جو حملو ٿئي ٿو، جڏهن مڇر کان اسان جي زندگي کي خطرو ٿيو ته انهي ملڪ جا ڊاڪٽر پاڪستان آيا، سريلنڪن ڊاڪٽرن جيڪو اسان سان ڪيو هي اها ئي تعليم آهي حضور صه جنهن جي تلقين ڪئي هئي، دنيا ۾ ڪنهن کي ڏک ۽ پريشاني ۾ ڏسو ته ان جي مدد لاءِ پهچو، هي ته قرآن پاڪ جي تعليم آهي، اسان کي پنهنجي مذهب، قرآن جي تعليم ۽ حضور صه جي ٻڌايل رستي تي هلڻو آهي، هي رستو ڪنهن جي زندگي نه پر زندگيون ڏيندڙ وارو آهي، اسان سڀ هڪٻئي جا ڀيڻ ڀائر آهيون، هڪٻئي جي ڏک ۽ درد ۾ شريڪ ٿيندا آهيون، هن چيو ته جتي مسجدون دارالاايمان هجن، محبت، امن، ڀائيچاري، دوستي ۽ پيار جو پيغام ڏيندڙ هجن، اهي علماءُ حق جيڪي اڄ به پاڪستان جي مسلمانن ۽ عالم اسلام کي انهي پيغام سان روشناس ڪرائيندا آهن جيڪي نه رڳو اسان جي دلين کي منور ڪري ڪن ٿا پر اسان کي مثبت رهنمائي به ڏيندا آهن، آئون انهن جو پيروڪار آهيان، ان کان اڳ آجياڻي وارو خطبو پيش ڪندي الحاج حافظ نسيم احمد خليل چيو ته الخليل قرآن ڪمپليڪس ۾ 60 شاگردن جي دستاربندي، حفظ قرآن جون سندون ڏنيون پيون وڃن، اڄ اسان کي اهو عهد ڪرڻو پوندو ته اسان قرآن پاڪ سکنداسين، تلاوت کي معمول بڻائينداسين ۽ ان تي مڪمل عمل ڪنداسين، تقريب کي خطاب ڪندي مسلم ليگ (ن) جي اڳواڻ پيرزاده راحت مسعود قدوسي چيو ته مذهبي درسگاهن سان لاڳاپو منهنجي لاءِ باعث فخر آهي، قرآن اها ڏيکاري ٿو جيڪا سڌي آهي، ان مدرسي جي بنياد 1948 ۾ خليل احمد مرحوم رکي، هڪ وڻ جي هيٺيان ان مدرسي جو آغاز ٿيو، تعليمي ادارا عمارت جو نالو نه، استاد ۽ شاگرد جي تعلق جو نالو ٿيندا آهن، عمارت وڏي هجي استاد ۽ شاگرد جو رشتو ڪمزور هجي ته اهي تعليمي ادارا ڪمزور هوندا آهن، منهنجي جي ٻارن به هتان ئي قرآن حفظ ڪيو آهي، ان مدرسي ۾ استاد ۽ شاگرد جو رشتو تمام گهڻو مضبوط آهي، هيستائين لکين ٻارن قرآن حفظ ڪري چڪا آهن، ان موقعي تي ايم ايس ايف پنجاب جي صدر مقبول احمد خان، ڊائريڪٽر نيشنل ڪاليج آف آرٽ راولپنڊي ڊاڪٽر نديم عمر تارڙ، ڊي ايس پي حافظ حامد خليل سميت حفاظ ڪرام جا والدين، معززين جو وڏو انگ موجود هو.

 

ميڊيا جي آزادي تي يقين رکون ٿا، ذميوارن کي نه ڇڏيو ويندو: وڏو وزير

ڪراچي(اسٽاف رپورٽر) سنڌ جي وڏي وزير سيد قائم علي شاهه سنڌ هاءِ ڪورٽ جي ٻاهران ميڊيا جي نمائندن تي تشدد جي واقعي جو سختي سان نوٽيس وٺندي ڊي آءِ جي ٽڙيفڪ ڊاڪٽر امير شيخ کي واقعي جي جاچ لاءِ انڪوائري آفيسر مقرر ڪري ڇڏيو ۽ هڪ هفتي اندر رپورٽ پيش ڪرڻ جون هدايتون جاري ڪري ڇڏيون. پڌرائي مطابق هن اهي حڪم آچر ڏينهن وزيراعليٰ هائوس ۾ انهن ڪئيرا مين ۽ ڪرائيم رپورٽرز سان ملاقات دوران ڏنا جن کي ڇنڇر ڏينهن سنڌ هاءِ ڪورٽ جي ٻاهران تشدد جو نشانو بڻايو ويو هو. اجلاس ۾ اطلاعات ۽ بلديات واري صوبائي شرجيل انعام ميمڻ، ڪرائيم رپورٽر ڪامل عارف، شاهد ۽ ٻين شرڪت ڪئي. ڪرائيم رپورٽرن ۽ ڪئميرا مين ڇنڇر واري واقعي خلاف احتجاج ڪيو. انهن وڏي وزير کي اپيل ڪئي ته واقي جي جاچ ڪرائي ذميوارن کي انجام تائين پهچايو وڃي. وڏي وزير سيد قائم علي شاهه اجلاس کي خطاب ڪندي چيو ته هو ميڊيا جي آزادي تي يقين رکي ٿو. هن اجلاس ۾ شريڪ صحافين کي خاطري ڪرائي ته اڳتي اهڙو ڪو واقعو پيش نه ايندو ۽ چيو ته هن اڳ ۾ ئي آءِ جي سنڌ کي هدايتون ڏنيون آهن ته ڪنهن به واقعي جي ڪوريج ڪندڙ صحافين کي مڪمل تحفظ فراهم ڪيو وڃي. ان موقعي تي اطلاعات ۽ بلديات واري وزير شرجيل انعام ميمڻ چيو ته هن ڄاڻايل واقعي کان فوري پوءِ ميڊيا سان ڳالهه ٻولهه ڪندي ان افسوسنڪاڪ واقعي تي معذرت جو اظهار ڪيو هو ۽ چيو ته صحافي اسان جا ڀائر آهن. وڏي وزير سيد قائم علي شاهه اجلاس ۾ شريڪ صحافين جي تجويز تي ڊي آءِ جي ٽريفڪ ڊاڪٽر امير شيخ کي انڪوائري آفيسر مقرر ڪري هڪ هفتي اندر واقعي جي جاچ رپورٽ پيش ڪرڻ جا حڪم جاري ڪيا.

 

ڀارت جي بچاءَ واري وزير جي بيان مان ثابت ٿي ويو ته ڀارت پاڙيسري ملڪن ۾ دهشتگردي جي حمايت ڪري ٿو: خواجه آصف

اسلام اباد (بيورو) ڀارت جي بچاءَ واري وزير منوهر پارڪر جي بيان جي جواب ۾ بچاءَ واري وزير خواجه آصف چيو آهي ته دهشتگردي جي مقابلي لاءِ دهشتگردي جي حمايت ڪرڻ واري بيان مان اسان جي ان ڳالهه ته ڀارت پاڪستان ۾ دهشتگرد سرگرمين ۾ ملوث آهي، جي تصديق ٿئي ٿي، هن چيو ته ڀارت جي بچاءَ واري وزير جو بيان کليل ۽ ڇرڪائيندڙ اعتراف ۽ دهشتگردي کي هٿي وٺرائڻ جو اعلان آهي، پنهنجي هڪ بيان ۾ خواجه آصف چيو ته ڀارت جي بچاءَ واري وزير خاص طور چيو آهي ته دهشتگردي وارين سرگرمين کي ختم ڪرڻ لاءِ قائدن ۽ قانونن کي استعمال نه ڪيو ويندو ۽ ان بدران دهشتگردي کي هٿي ڏني ويندي، اهو ڀارت جي ڪابينا جي سطح جي هڪ اهم اڳواڻ طرفان خطرناڪ قسم جو بيان آهي، جنهن مان تصديق ٿئي ٿي ته ڀارت دهشتگردي وارين سرگرمين کي روڪڻ جي نالي تي پاڙيسري ملڪن ۾ دهشتگردي جي حمايت ڪري ٿو.

 

ڀارت جي بچاءُ واري وزير جي بيان تي پاڪستان پاران حيرت جو اظهار

اسلام آباد(مانيٽرنگ ڊيسڪ) پرڏيهي معاملن ۽ قومي سلامتي بابت وزيراعظم جي صلاحڪار سرتاج عزيز چيو آهي ته  ڀارتي  بچاءُ واري وزير منوهر پريڪر جي چيل هن جملي ته “ ڀارت دهشتگردي جي خلاف دهشتگردي استعمال ڪندو” گهڻي بيچيني جو اظهار ڪيو. سرتاج عزيز چيو ته  ڀارت جي بچاءُ واري وزير جي بيان پاڪستان اندر دهشتگردي جي واقعن ۾ ڀارت جي ملوث هجڻ بابت پاڪستان جي شڪن جي تصديق ڪري ڇڏي. سرتاج عزيز وڌيڪ چيو ته اهو پهريون ڀيروآهي ته ڪنهن  ملڪ جي  چونڊيل حڪومت جي وزير کليل ۽ واضع لفظن ۾ دهشتگردي روڪڻ جي بهاني سان  دهشتگردي جي استعمال جي ڳالهه ڪئي هجي. هن چيو ته پاڪستان مخلصاڻا طريقي سان پنهنجي پاڙيواري ملڪ سان بهتر لاڳاپن جي پاليسي  تي قائم آهي. پاڪستان جي وزيراعظم جي صلاحڪارجو اهو به چوڻ هو ته دهشتگردي ٻنهي ملڪن جو گڏيل مسئلو آهي ۽ ٻئي ملڪ گڏجي ئي ان مسئلي جو حل ڪڍي سگهن  ٿا.

 

اڳوڻي وزيراعظم سان سندس مغوي پٽ جو 8 منٽ فون تائين رابطو، پٽ خيريت سان آهي: يوسف رضا گيلاني

ملتان (اي پي پي)اڳوڻي وزيراعظم يوسف رضا گيلاني سان سندس مغوي پٽ علي حيدر گيلاني فون تي رابطو ڪيو آهي، ڳالهه ٻولهه دوران يوسف رضا گيلاني لڙڪ لاڙي ويٺو، يوسف رضا گيلاني چيو آهي ته سندس پٽ خيريت سان آهي ۽ سندس حوصلا بلند آهن. علي حيدر گيلاني افغانستان مان پنهنجي والد يوسف رضا گيلاني سان اغوا کانپوءِ پهريون ڀيرو فون تي رابطو ڪري 8 منٽن تائين ڳالهه ٻولهه ڪئي آهي. علي حيدر گيلاني کي اغوا ڪندڙن فون تي يوسف رضا گيلاني سان رابطو ڪرايو، علي حيدر پنهنجي خيريت بابت والد کي آگاهه ڪيو، جڏهن ته يوسف رضا گيلاني تصديق ڪندي چيو آهي ته علي حيدر گيلاني جي ڪال افغانستان مان آئي آهي.. ڳالهه ٻولهه دوران پي ٽي آءِ اڳواڻ شاهه محمود قريشي به موجود هو، جيڪو يوسف رضا گيلاني کي دلاسا ڏيندو رهيو. يوسف رضا گيلاني جو چوڻ آهي ته سندس پٽ خيريت سان آهي ۽ سندس حوصلا بلند آهن، اميد ته سندس پٽ جلد بازياب ٿي گهر پهچي ويندو. شاهه محمود قريشي جو چوڻ آهي ته ڳالهه ٻولهه دوران هو به موجود هو، علي حيدر گيلاني خيريت سان آهي. اڳوڻي ايم پي اي جاويد صديقي جو چوڻ آهي ته افغانستان مان آيل فون تي فقط علي حيدر گيلاني ڳالهايو، يوسف رضا گيلاني هڪ تقريب ۾ موجود هو، جتي فون آئي ۽ ڳالهه ٻولهه ڪرائي وئي. واضع رهي ته اڳوڻي وزيراعظم يوسف رضا گيلاني جي پٽ علي حيدر گيلاني کي 2013 ۾ عام چونڊن دوران ملتان مان اغوا ڪيو ويو هو.

 

صنعا ۾ تازن حملن ۽ چڪرين ۾ 29 حوثي باغين سميت 40 ڄڻا مارجي ويا

صنعا (م.ڊ) يمن ۾ سعودي اتحادي جهازن جي حملن  جي چڪرين  ۾ 29 حوثي باغين سميت 40 ماڻهو مارجي ويا. هڪ غير ملڪي خابرو ايجنسي مطابق سعودي اتحادي جهازن گادي واري شهر صنعا سميت يمن جي مختلف شهرن ۾ باغين جي فوجي اڏن ۽ ڪيترن ئي ٺڪاڻن تي بمباري ڪئي، حديدا ۾ فوجي ائيرپورٽ کي ٻه دفعا نشانو بڻايو. جڏهن ته حجا ۾ به باغين هڪ اجتماع تي هوائي حملو ڪيو، حملي ۾12 باغي مارجي ويا. اتر يمن ۾ قبائلين ۽ حوثي باغين وچ ۾ چڪرين ۾ 17 باغين سميت 28 ڄڻا مارجي ويا. اقوام متحده موجب يمن ۾ جاري جهيڙي ۾ هينئر تائين 1000 کان مٿي ماڻهو مارجي ويا آهن.

 

صفورا واقعي ۾ ملوث 4 ٻيا ڏوهاري گرفتار ڪيا ويا آهن: ايڊيشنل آئي جي ڪراچي

ڪراچي (اسٽاف رپورٽر) ايڊيشنل آئي جي غلام قادر ٿيٻو چيو آهي ته صورا واقعي جا ٻيا4 ڏوهاري گرفتار ڪيا ويا آهن.ڪراچي ۾ پريس ڪانفرنس ڪندي غلام قادر ٿيٻو جو چوڻ هو ته صفورا واقعي جي جاچ ٺيڪ راهه ڏانهن وڌي رهي آهي،دهشتگردي جي ان ڪارروائي۾ 12 ڏوهاري ملوث هئا ۽ انهن جو گروهه 35 ميمبرن تي ٻڌل آهي، جن جي گرفتاري لاءِ پوليس جون خاص ٽيمون سنڌ  ۽ پنجاب ۾ موڪليون ويون آهن. هن چيو ته ٿيندڙ گرفتاريون سنڌ جي انرين علائقن ۽ پنجاب مان ٿيون آهن. انهن ئي ڏوهارين بس ۾ گهڙي فائرنگ ڪئي هئي ۽ انهن مان هڪ ڏوهاري جو تعلق برما سان آهي.پريس ڪانفرنس جي شروعات ۾ ميڊيا جي نمائندن گذريل ڏينهن هاءِ ڪورٽ ۾ پوليس پاران صحافين تي تشدد جي  واري اقعي خلاف احتجاج ڪندي تقريب جو بائيڪاٽ ڪيو، انڪري ايڊيشنل آئي جي پاران پوليس جي رويي تي معافي  ۽ ذميوارن خلاف ڪارروائي ڪرڻ جو يقين  ڏيارڻ تي ميڊيا جي نمائندن  احتجاج ختم ڪري ڇڏيو.

 

ڪراچي جي چنيسر ڳوٺ مان 3 لاش هٿ،ٽنهي کي اغوا بعد قتل ڪيو ويو، ٽئي ڏوهاري هئا: پوليس

ڪراچي (اسٽاف رپورٽر) ڪراچي جي علائقي محمود آبادجي چنيسر ڳوٺ مان 3 ڄڻن جا لاش هٿ آيا آهن، پوليس مطابق ٽنهي کي اغوا کانپوءِ قتل ڪيو ويو آهي، پوليس ٻڌايو آهي ته مارجي ويلن جو تعلق نشو وڪڻندڙ ٽولي سان آهي، پوليس لاش تحويل ۾ وٺي، جناح اسپتال منتقل ڪري ڇڏيا ، مقتولن جي سڃاڻپ سليم الله، فشو ۽ طلحا جي نالن سان ٿي آهي، ٽنهي جو شهر جي مختلف ٿاڻن ۾ڏوهن جو رڪارڊ موجود آهي، پوليس جو چوڻ آهي ته ٽنهي ڄڻن کي سندن مخالف ٽولي اغوا ڪري قتل ڪيو آهي، پوليس مطابق ٽنهي جو تعلق ملير جي عادل گروپ سان هو.

 

بنون ۾ مسافر وين اونهي کاهي ۾ ڪري پئي، 6 مسافر فوت ، 3 زخمي

بنون (م.ڊ) بنون ۾ مسافر وين کاهي ۾ ڪري پئي، جنهن جي نتيجي ۾ 6 ماڻهو فوت ۽ 3 ڄڻا زخمي ٿيا. ريسڪيو ٽيم موجب حادثو لتمبر روڊ ۾ تيز رفتاري سبب پيش آيو، حادثي ۾ زخمي ٿيل ماڻهن کي فوري طور امداد لاءِ اسپتال منتقل ڪيو ويو آهي. حادثي جو شڪار ٿيڻ واري مسافر وين ڪوهاٽ کان ڪرڪ وڃي رهي هئي.

 

اسان کي پنهنجا حق وٺڻ لاءِ جدوجهد ڪرڻي پوندي: جلال محمود شاهه

ٽنڊو آدم (ڊ.ر) پ پ وارن سنڌ کي تباھ ڪري ڇڏيو آهي، هر ادارو ڪرپشن جي ور چڙهيل آهي اهڙن خيالن جو اظهار  ايس يو پي جي سربراهه سيد جلال محمود شاھ  ٽنڊي آدم ۾ باغي مجاهد ٿهيم جي گهر تي  عوامي ميڙ کي خطاب ڪندي ڪيو ۽ هن چيو ته مهانگائي بيروزگاري ۽ بد امني سبب عوام سخت پريشاني جو شڪار آهي.جلال محمود شاهه وڌيڪ چيو ته سانگهڙ سميت سموري سنڌ معدني وسيلن سان مالامال آهي، پر سنڌ جا روڊ رستا تباھ لڳا پيا آهن، اٽو، لٽو ۽ اجهو جا نعرا هڻي  عوام کي بيوقوف بڻايو پيو وڃي،  هن چيو ته ڀوتار ووٽ وٺڻ کانپوءِ عوام کي سڃاڻن ئي ڪونه ٿا. سنڌ جو عوام تمام گهڻي تڪليف مان گذري رهيو آهي.  ميڙاڪي کي خطاب ڪندي هن چيو ته اسان کي پنهنجا حق وٺڻ لاءِ جدوجهد ڪرڻي پوندي، پ پ عدالتن جا رستا بند ڪري عوام سان ناانصافيون ڪري رهي آهي،  قانون جا محافظ  غير قانوني ڪم ڪري رهيا آهن، اسان کي عدالتن جو احترام ڪرڻ گهرجي، اهي ئي اسان کي انصاف ڏئي سگهن ٿيون.  هن ايس يو پي جي ڪارڪنن کي هدايت ڪئي ته اهي ايندڙ مڪاني چونڊن ۾ ڀرپور حصو وٺن ۽ ڪامياب ٿي عوام جي خدمت ڪن. ان کان اڳ ڊاڪٽر دودو مهيري ، روشن ٻرڙو ،امير علي ٿيٻو باغي مجاهد ٿهيم سردار شفيع محمد ساند ،مير احسن ٽالپر ۽ ٻين پڻ خطاب ڪيو جڏهن ته جسقم تعلقي ٽنڊي آدم جي صدر سرور ابڙو پنهنجي ساٿين سميت ايس يو پي ۾ شموليت جو اعلان ڪيو، ان کانسواءِ شهرجي مختلف معززين ڊاڪٽر عزيز ٽالپر ،ذاڪر بلوچ ۽ ٻين پڻ ايس يو پي ۾ شموليت جو اعلان ڪيو