تازيون خبرون

Daily Archives: May 19, 2015

ڪراچي ۾ امن جي قيام لاءِ آپريشنل فيصلا ڪري ڇڏيا آهن: چوڌري نثار

ڪراچي (اسٽآف رپورٽر/اين اين آءِ)وفاقي گهرو وزير چوڌري نثار علي خان چيو آهي ته ڪراچي آپريشن جا مثبت نتيجا نڪري رهيا آهن، ڪراچي ۾ آپريشن ڪنهن سياسي دٻاءَ بغير جاري رهندو. هو سومر ڏينهن هتي سنڌ گورنر ڊاڪٽر عشرت العباد، وڏي وزير سيد قائم علي شاهه ۽ رينجرز سنڌ ڊي جي ميجر جنرل بلال اڪبر سان ملاقاتن دوران ڳالهائي رهيو هو. ملاقات ۾ صفورا چورنگي سانحي سميت ٻين واقعن تي ويچاريو ويو. وفاقي گهرو وزير سنڌ جي وڏي وزير کي وفاقي حڪومت کان فنڊز ۽ جديد آلات جي فراهمي متعلق مسئلن جي حل لاءِ پاڻ ڪوششون ڪرڻ جي خاطري ڏياري. وزيراعليٰ هائوس ۾ گهرو وزير چوڌري نثار علي خان سان وڏي وزير سيد قائم علي شاهه جي ملاقات ٿي، ملاقات ۾ صفورا چورنگي سانحي متعلق ڳالهايو ويو ۽ دهشتگردي خلاف جنگ کي منطقي انجام تائين پهچائڻ جي عزم کي ورجايو ويو. ذريعن موجب وڏي وزير چيو ته صوبائي حڪومت کي فنڊز ۽ جديد آلات اڃا تائين فراهم ناهن ڪيا ويا، جنهن تي گهرو وزير چوڌري نثار علي خان مسئلن جي حل لاءِ پاڻ ڪوششون ڪرڻ جي خاطري ڏياري. بعد ۾ گهرو وزير چوڌري نثار علي خان ۽ سنڌ گورنر ڊاڪٽر عشرت العباد جي ملاقات ٿي. ملاقات ۾ صوبي جي صورتحال ۽ صفورا سانحي تي ڳالهايو ويو، گهرو وزير چيو ته ڪراچي آپريشن جا مثبت نتيجا نڪري رهيا آهن، ڪراچي ۾ آپريشن بغير ڪنهن سياسي دٻاءَ جي جاري رهندو، سنڌ گورنر چيو ته ڪراچي آپريشن ۾ تمام سياسي پارٽيون تعاون ڪري رهيون آهن، ڪراچي آپريشن ڪنهن به صورت ۾ نه روڪيو ويندو. وفاقي گهرو وزير چوڌري نثار علي خان چيو آهي ته ڪراچي ۾ امن امان قائم ڪرڻ جي حوالي سان رينجرز جو ڪردار اهم آهي، رينجرز جي ڪارڪردگي سبب ٽارگيٽ ڪلنگ جي واقعن ۾ گهٽتائي ٿي، صفورا چورنگي سانحي سميت هاڻوڪي هاءِ پروفائل ٽارگيٽ ڪلنگ جي حملن ۾ ملوث دهشتگردن متعلق اهم شاهد مليا آهن، ڪارواين ۾ ملوث دهشتگرد جلد انصاف جي ڪٽهڙي ۾ هوندا. وفاقي گهرو وزير چوڌري نثار علي خان رينجرز هيڊڪوارٽرز ڪراچي جو دورو ڪيو. ان موقعي تي رينجرز سنڌ ڊي جي ميجر جنرل بلال اڪبر کيس صفورا چورنگي سانحي سميت هاڻوڪي هاءِ پروفائل ٽارگيٽ ڪلنگ جي واقعن تي بريفنگ ڏني. گهرو وزير چوڌري نثار علي خان ٽارگيٽ ڪلنگ سميت ٻين ڏوهن جي روڪٿام تي رينجرز جي ڪردار کي ساراهيو، رينجرز ڊي جي ٽارگيٽڊ آپريشن ۽ گرفتارين متعلق به گهرو وزير کي آگاهه ڪيو ۽ ٻڌايو ته مثبت پاسي ۾ جاري جاچ سان دهشتگردن تائين پهچڻ ۾ آساني ٿيندي، دهشتگردن کي انصاف جي ڪٽهڙي ۾ آندو ويندو. گهرو وزير چيو ته رينجرز جي ڪارڪردگي سبب ڪراچي ۾ امن امان قائم ڪرڻ جي حوالي سان رينجرز جو ڪردار اهم آهي، رينجرز جي ڪارڪردگي سبب ٽارگيٽ ڪلنگ جي واقعن ۾ گهٽتائي ٿي، صفورا چورنگي سانحي سميت هاڻوڪي هاءِ پروفائل ٽارگيٽ ڪلنگ جي حملن ۾ ملوث دهشتگردن متعلق اهم شاهد مليا آهن، ڪارواين ۾ ملوث دهشتگرد جلد انصاف جي ڪٽهڙي ۾ هوندا. وفاقي گهرو وزير چوڌري نثار علي خان چيو آهي ته صفوران سانحي جي 3 رخن کان جاچ ڪئي پئي وڃي، ڀارتي ڳجهي اينجنسي را يا پرڏيهي هٿ ملوث هجڻ جي باري ۾ حتمي بيان ڏيڻ وقت کان اڳ هوندو، صفوران سانحي جي جاچ دوران 3 کان 4 جوابدارن کي گرفتار ڪيو ويو آهي جن جي باري ۾ وضاحت نٿو ڪري سگهان، ڪراچي ۾ امن جي قيام لاءِ اهم آپريشنل فيصلا ڪيا ويا آهن، آپريشن ضرب عضب کانپوءِ سڄي ملڪ ۾ سيڪيورٽي ادارن 10 هزار انٽيليجنس بنيادن تي آپريشن ڪري 36 هزار ماڻهن کي گرفتار ڪيو آهي، جڏهن ته قومي ايڪشن پلان تي عملدرآمد کانپوءِ 3 هزار آپريشن ڪيا ويا آهن، پاڪسان ۽ برطانيا وچ ۾ جوابدارن جي تحويل لاءِ ڳالهه ٻولهه ٿي رهي آهي، ڊاڪٽر عمران فاروق قتل ڪيس ۾ گرفتار جوابدار معظم علي جي جي آءِ ٽي بابت تفصيل ايندڙ 2 کان 3 ڏينهن ۾ جاري ڪندس، سڄي ملڪ ۾ هٿيارن جا لائسنس جاري ڪرڻ لاءِ هڪجهڙي پاليسي جوڙي ويندي، سنڌ جي گورنر ڊاڪٽر عشرت العباد لاءِ حالتون معمول تي آهن، اهڙن خيالن جو اظهار هن گورنر هائوس ۾ پريس ڪانفرنس ڪندي ڪيو، هن چيو ته ڪراچي اچڻ جو مقصد صفوران ڳوٺ سانحي تي ٿيندڙ جاچ تي بريفنگ وٺڻي هئي، دهشتگردن اسماعيلي برادري کي نشانو بڻايو آهي جنهن جي جيتري مذمت ڪئي وڃي اها گهٽ آهي، پوليس رينجرز ۽ ڳجهن ادارن ٿيندڙ جاچ کان آگاهه ڪيو آهي، هن چيو ته واقعي جي اصل حقيقتن تائين پهچڻ جي ڪوشش ڪري رهيا آهيون، جاچ صحيح رخ ۾ وڃي رهي آهي، جاچ کان اڳ ڪو حتمي بيان ڏيڻ مناسب نه آهي، جاچ ڪندڙ ادارن کي وقت ڏنو وڃي، جيڪو به واقعي ۾ ملوث هوندو ان کي آڏو آندو ويندو ۽ ان جي پويان موجود هٿ بي نقاب ڪيا ويندا، هن چيو ته دهشتگردي خلاف اسان جا سيڪيورٽي ادارا ڪم ڪري رهيا آهن، هي ٽي ٽوئنٽي يا 50 اوورز جي ميچ نه آهي جيڪا سولائي سان فتح ڪئي وڃي، 14 سالن کان ملڪ دهشتگردي خلاف جنگ وڙهي رهيو آهي هن جنگ جي شروعات 2001 کانپوءِ ٿي، 2009 کان 2011 تائين ملڪ ۾ خراب حالتون هنيون، جڏهن کان حڪومت ۾ آيا آهيون اسان پرامن نموني حالتون ٺيڪ ڪرڻ جي ڪوشش ڪئي، ڳالهيون ڪيون پر ٻئي پاسي کان ڊبل گيم ۽ منافقت ڏسڻ ۾ آئي جنهن کانپوءِ فوجي آپريشن شروع ڪيو، هن چيو ته جون 2013 کان اڳ پاڪستان ۾ روزانو 5 کان 7 ڌماڪا ٿيندا هئا پر اسان اقتدار ۾ آياسين دهشتگردي خلاف منظم پاليسي جوڙي، سيڪيورٽي ادارا ان تي عمل پيرا آهن،هاڻ هفتا هفتا گذريل وڃي ٿا ملڪ ۾ ڌماڪا نٿا ٿين، مان اهو نٿو چوان ته ملڪ ۾ دهشتگردي ختم ٿي وئي آهي، جيڪڏهن هڪ ڌماڪو ٿي وڃي ٿو ته سيڪيورٽِي ادارن جي مهينن جي محنت تي پاڻي پئجي وڃي ٿو پر اسان پرعزم آهيون، مان وڏي وزير کان پڇا ڪئي ته اسماعيلي ڪميونٽي کي سيڪيورٽي ڇو نه ڏني وئي، وڏو وزير ان حوالي سان جاچ ڪري رهيو آهي، بس تي حملي ۾ غريب ۽ ٻن ويلي جي ماني ڪمائيندڙن کي نشانو بڻايو ويو آهي، دهشتگرد آخرت ۾ جهنم ۾ ويندا پر اسان کين عبرت جو نشانو بڻائينداسين، ملڪ ۾ پرائيويٽ سيڪيورٽي ايجنسيون هزارن جي انگ ۾ آهن، 3 سئو کان وڌيڪ ڪراچي ۾ آهن انهن ۾ ڀرتي ماڻهو تربيت يافتا نه آهن ۽ انهن جي نظام ۾ شفافيت نه آهي تنهنڪري پرائيويٽ سيڪيورٽي ۽ ايجنسين جي رجسٽريشن ۽ هٿيارن جا لائسنس جاري ڪرڻ لاءِ پاليسي جوڙي رهيا آهيون، هن چيو ته ڪراچي ۾ امن قائم ڪرڻ لاءِ آپريشنل فيصلا ڪري ورتا آهن جن بابت آگاهه نٿو ڪري سگهجي، ڇو ته ان سان دشمن کي فائدو ٿيندو، اسلام آباد ۾ اعليٰ سطحي اجلاس ۾ دهشتگردي خلاف پاليسي لاءِ وڌيڪ اهم فيصلا ڪيا ويندا، هڪ سوال جي جواب ۾ هن چيو ته سنڌ جي گورنر سان ملاقات ٿي آهي پريس ڪانفرنس مون کي ڪرڻي هئي تنهنڪري هو ناهي آيو، سنڌ جي گورنر کي هٽائڻ جي حوالي سان هن چيو ته پهريان وزيراعظم آيو هو هاڻ مان آيو آهيان، گورنر سنڌ سان ملاقات ٿي آهي، سندس لاءِ حالتون نارمل آهن.

 

سنڌ ۾ گورنر راڄ جو ڪو به امڪان ناهي نه ئي وڏو وزير تبديل ٿيندو: آصف زرداري

اسلام آباد (بيورو) اڳوڻي صدر آصف علي زرداري چيو آهي ته جڏهن نيوٽل ايمپائر ايندو ته پ پ اتي بيٺي هوندي جتي پهريان هئي، سنڌ جو وڏو وزير نه مٽجي رهيو آهي ۽ نه ئي گورنر راڄ جو خوف آهي، جمهوريت جو گل وڌي وڻ بڻائڻ لاءِ ڪوششون ڪندا رهنداسين، صفوران سانحو سوچيل سمجهيل سانحو آهي، جملي طور سنڌ ۾ امن امان جي صورتحال بهتر آهي، اقتصادي منصوبو اسان هڪ هزار ميل منظور ڪرايو هاڻ جيڪڏهن اهي 15 سئو ميل بڻائڻ چاهين ٿا ته اسان ڪو اعتراز نه آهي سمورين سياسي پارٽين کي هن نئين اڳڀرائي تي راضي ڪرڻ لا3ءِ تيار آهيون، بلاول ڀٽو پاڪستان اچڻ لاءِ دبئي پهچي چڪو آهي، ذالفقار مرزا جي پويان ڪنهن جو هٿ آهي اهو جيڪو ڪجهه چئي رهيو آهي ان جي پارٽي مزاحمت ڪئي، سومر تي يوسف رضا گيلاني، راجا پرويز اشرف شيري رحمان، فرحت الله بابر، پلوشا بحرام سميت ٻين اڳواڻن سان گڏ صحافين سان غير رسمي ڳالهه ڪندي هن چيو ته اسان چاهيون ٿا ته موجوده حڪومت 5 سال پورا ڪري ۽ ڪنهن اشو تي جمهوريت کي ڍڪ نه رسي، جمهوريت کي جڏهن به ضرور پئي ته اسان مدد ڪئي، ملڪ ۾ 5 سال جمهوريت اچي پوءِ ڪو ڊرامو ڪيو وڃي ٿو، عوام کي جمهوريت جا ثمر پهچن ئي نٿا، هاڻ ملڪ ۾ 7 سالن کان جمهوريت هلي رهي آهي، هن چيو ته اسان شام اندر مداخلت ناهي ڪئي، ڪجهه دوست چيو ته اوهان تاريخ جي غلط رخ ۾ وڃي رهيا آهيو، اڄ انهن کي خبر پئجي وئي ته مان تاريخ جي غلط رخ ۾ نه هيس، هن چيو ته پ پ سنجينده سياست ڪندي آهي ڪو به دٻاءُ اسان کي ڪمزور نٿو ڪري سگهجي، سيد قائم علي شاهه تبديل نه ٿي رهيو ۽ نه ئي گورنر راڄ جو خوف آهي، پوئين حڪومت ۾ به چيو ويو ته سنڌ حڪومت ڪمزور آهي پر عام چونڊن ۾ پ پ ڪامياب ٿي ۽ اهي ئي نتيجا آيا جيڪي بي بي جي شهادت کانپوءِ آيا هئا، ڪجهه هنڌن تي غلطيون ٿيون اسان غلط ٽڪيٽون ڏنيون. هن چيو ته 18 هين ترميم کانپوءِ گورنر راڄ لڳائڻ آسان نه آهي، جن جي اها سوچ آهي اها اخبارن جي سرخن لاءِ ٿي سگهي ٿي، اسان کي ان کان خوف نه آهي، مون کي اهڙي ڪا صورتحال نظر نٿي اچي، عمران خان سياست ۾ گهڻو ڪجهه حاصل ڪري ورتو آهي، پاڪستان ۾ هميشه 2 پارٽيون ناهن رهيون، ايتريون سياسي پارٽيون آهن جيترا نيوز چينل آهن، جڏهن ڪو نيوٽل ايمپائر ايندو اسان اتي بيهنداسين جتي اڳ بيٺا هئاسين. هن چيو ته ڪور ڪمانڊر جي پنهنجي سوچ آهي ان جو اندازو ائين هوندو آهي هن چيو ته ڪراچي ۾ پاڻي جو مسئلو آهي عوام کي اڄ هڪ هزار گيلن فري پاڻي سپلاءِ ڪري رهيا آهيون، هن چيو ته ڪارگل کي ڪا فتح نٿو سمجهان اسان کي ان سوچ کي تبديل ڪرڻو پوندو، ملڪ ۾ 25 کان 30 سال جمهوريت قائم رهندي ته ان تي ڳالهيون نه ٿينديون، ذوالفقار مرزا جي حوالي سان هن چيو ته حضرت علي ڪرم الله جو قول آهي ته جنهن تي احسان ڪريو ان جي شر کان بچو، ذوالفقار مرزا جو پنهنجو ايمان آهي هو خود چوندو آهي ته مان بدبوءِ دار شيعو آهيان، هن چيو ته پ پ جي حڪومت ڏکڻ پنجاب تي ان جي ڪوٽا کان وڌيڪ رقم خرچ ڪئي، يوسف رضا گيلاني گهڻو ڪم ڪيو، سرائيڪي صوبي لاءِ قرارداد کي سينيٽ مان منظور ڪرايو، هن چيو ته مان بلاول ڀٽو، عاصفه ۽ بختاور گڏجي پراڻن ورڪرن کي گڏ ڪنداسين، هن چيو ته اسان ويزاعظم سان ويهي فوج کي ڪراچي اچڻ جي دعوت ڏني، سنڌ جي ڪوٽا مان خرچ ڪيو پيو وڃي، پشاور ۾ حالتون ڳنڀير آهن، اتان جا سيڙپڪار اسلام آباد منتقل ٿي چڪا آهن، هن چيو ته مان سنڌ جي گورنر ڊاڪٽر عشرت العباد کي پسند ڪريان ٿو، ايم ڪيو ايم ئي ٻڌائي سگهي ٿي ته هو ڪيسيتائين گورنر جي عهدي تي آهي، هن ذوالفقار مرزا جي حوالي سان چيو ته هميشه ڪو ڪنهنجي اشاري تي نچندو رهندو آهي، ذوالفقار مرزا پاڻ چوي ٿو ته مان ان کي ڪپڙا ڏنا ان جو مطلب آهي ته ان جا ٻارڙا جيڪو پڙهي رهيا آهن اهي به منهنجا پيسا هوندا، جيڪو ڪجهه چئي رهيو آهي ان تي مان ڇا چئي سگهان ٿو، هن چيو ته بلاول دبئي پهچي چڪو آهي، جلد پاڪستان ايندو پر حتمي تاريخ نٿو ٻڌائي سگهان.

 

وزيراعظم بينظير انٽرنيشنل ايئرپورٽ جي بحالي ۽ اپ گريڊيشن جو افتتاح ڪري ڇڏيو

اسلام آباد (بيورو) وزيراعظم نواز شريف بينظير انٽرنيشنل ايئرپورٽ جي بحالي ۽ اپ گريڊيشن جو افتتاح ڪري ڇڏيو،45 ڪروڙ رپين جي منصوبي سان ڊيلٽا ٽيڪسي وي تعمير ڪيو ويو، جنهن سان 12 ڪروڙ رپيا ماهوار تيل جي بچت ٿيندي. وزيراعظم نواز شريف، اسلام آباد جي بينظير انٽرنيشنل ايئرپورٽ جي بحالي ۽ اپ گريڊ واري منصوبي جي افتتاحلاءِ پهتو ته ايئر چيف مارشل سهيل امان ۽ سول ايوي ايشن جي صلاحڪار شجاعت عظيم سندس آجيان ڪئي. ان موقعي تي وزيراعظم 45 ڪروڙ رپين جي لاڳت سان تيار ڪيل ايئرپورٽ جي بحالي ۽ اپ گريڊيشن واري منصوبي جو افتتاح ڪيو. وزيراعظم کي بريفنگ ڏيندي سول ايوي ايشن جي صلاحڪار شجاعت عظيم چيو ته هن منصوبي تحت ٽيڪسي ڊيلٽا وي تعمير ڪيو ويو آهي، جنهن سان هر مهيني 12 ڪروڙ رپين جي تيل جي بچت ٿيندي.وزيراعظم کي بريفنگ ۾ ٻڌايو ويو ته منصوبي سان مسافرن لاءِ ڪائونٽرز ۾ واڌ ڪئي وئي آهي، جڏهن ته عالمي روانگي لاءِ فاسٽ ٽريڪ ڪائونٽر به وڌايو ويو آهي. منصوبي جي افتتاح بعد وزيراعظم نواز شريف ايئرپورٽ جي مختلف شعبن جو دورو پڻ ڪيو.

 

ٻين ملڪن جي آئين نه پر پنهنجي آئين کي ڏسڻو آهي: جسٽس جواد ايس خواجه

اسلام آباد (بيورو) سپريم ڪورٽ ۾ 18 هين ۽ 21 هين ترميم خلاف درخواستن تي ٻڌڻي اڄ تائين ملتوي ڪئي وئي آهي، وفاق جو وڪيل خالد انور اڄ به دليل جاري رکندو، جسٽس جواد ايس خواجه ريمارڪس ۾ چيو آهي ته کين ٻين ملڪن نه پر پنهنجي آئين تي هلڻو آهي، سٺو يا خراب پر ججز هن آئين تحت ئي حلف کنيو آهي.چيف جسٽس، جسٽس ناصر الملڪ جي سربراهي ۾ سپريم ڪورٽ جي 17 رڪني فل ڪورٽ بينچ 18 هين ۽ 21 هين ترميم خلاف گڏيل درخواستن تي ٻڌڻي ڪئي. ٻڌڻيءَ دوران دليل ڏيندي وفاقي حڪومت جي وڪيل خالد انور چيو ته هو رڳو 18 هين ۽ 21 هين ترميم جي حق ۾ دليل ڏيندو. خالد انور چيو ته ملڪ جو موجوده آئين 1973 جي آئين کان بهتر آهي، آئين سڀني لاءِ ٺهندو آهي، ان کي هڪ نسل تائين محدود نٿو ڪري سگهي. حڪومتي وڪيل خالد انور چيو ته آئين جون ڪيتريون ئي شقون آهن، جيڪي ترميم کانپوءِ بهتر ٿيون آهن، عدليه جي آزادي مان مراد انتظامي آزادي آهي. جسٽس آصف سعيد کوسا پچاڻو ڪيو ته سپريم ڪورٽ ۾ ججز جو انگ 17 آهي، ڇا صدر اهو انگ گهٽائي 15 ڪري سگهي ٿو.؟ جسٽس ثاقب نثا ريمارڪس ڏنا ته ججز جي مقرري جو انگ پارليامينٽ مان قانونسازي جي تحت طئي ٿيو ۽ ججز کي هٽائڻ جو طريقيڪار به واضح آهي. جسٽس جواد ايس خواجه ريمارڪس ڏنا ته کين ٻين ملڪن جي آئين نه پر پنهنجي آئين کي ڏسڻو آهي، ٻين ملڪن جا پنهنجا حدف هوندا پر پاڪستان جا پنهنجا حدف آهن. جسٽس جواد ايس خواجه ريمارڪس ۾ چيو ته سٺو يا خراب پر هن آئين تحت حلف کنيو آهي، ٻڌايو وڃي ته ڇا آئين جو بنيادي ڍانچو آهي، جنهن تي حڪومتي وڪيل خالد انور چيو ته بنيادي ڍانچو آهي پر ان تي عمل نه ٿي رهيو آهي.

 

انصاف ۾ دير انصاف نه ڏيڻ جي برابر آهي: سينيٽ ميمبر

اسلام آباد (اين اين آءِ) سينيٽ ميمبرن چيو آهي ته انصاف ۾ دير انصاف نه ڏيڻ جي برابر آهي، انصافي جي فراهمي يقيني بڻائڻ تائين مسئلا حل نه ٿيندا، عدالتن ۾ هزارين ڪيس التوا هيٺ آهن، پارليامينٽ اهڙو ڪم ڪري جنهن سان ماڻهن کي انصاف حاصل ڪرڻ ۾ انتظار نه ڪرڻو پوي، عدالتي نظام ۾ فيصلن ۾ دير ڳڻتي جوڳي ڳالهه آهي، جڏهن ته وفاقي وزير سينيٽر پرويز رشيد چيو آهي ته وزيراعظم کي ليگل ريفارمز ڪميٽي پنهنجي رپورٽ پيش ڪئي آهي، تجويز ڪيل سڌارن تي وڌيڪ ڪم ٿيندو، سينيٽ جي قائمه ڪميٽي جي تجويزن کي به ان ۾ شامل ڪيو ويندو، سومر تي سينيٽ جي اجلاس چيئرمين ميان رضا رباني جي صدارت هيٺ ٿيو، اجلاس ۾ ايم ڪيو ايم جي سينيٽر طاهر حسين مشهدي جي تحريڪ التوا تي خيالن جو اظهار ڪندي ايم ڪيو ايم جي خوش بخت شجاعت چيو ته سينيٽ ۾ ٿيندڙ ڳالهه جو اثر ٿيڻ گهرجي ۽ عوام کي تڪڙو ۽ سستو انصاف فراهم ڪرڻ لاءِ حڪومت موثر قدم کڻي، عورتن کي انهن جي بنيادي حقن جو تحفظ ضروري آهي ان لاءِ سمورن لاڳاپيلن ادارن کي پنهنجي ذميواري پوري ڪرڻ گهرجي، مسلم ليگ ن جي سينيٽر نهال هاشم چيو ته جن معاشرن ۾ سماجي انصاف آهي اتي معاملا عدالتن ۾ وڃڻ کان اڳ ئي حل ڪيا وڃن ٿا، هن چيو ته سستو انصاف فراهم ڪرڻ وقت جي ضرورت آهي هي اهم معاملو آهي ان کي وڌيڪ غور لاءِ لاڳاپيل ڪميٽي حوالي ڪيو وڃي، ايم ڪيو ايم جي سينيٽر بئريسٽر محمد علي سيف چيو ته پاڪستان ۾ عام ماڻهو اڄ به انصاف کان وانجهيل آهي، هتي قانوني امداد جو نظام نه آهي ۽ ڪجهه اين جي اوز اهو ئي ڪم ڪري رهيون آهن، ايوان ان ڳالهه کي يقين بڻائي ته قانون ۾ اهڙيون ترميمون هجن جو عوام کي تڪڙو ۽ سستو انصاف فراهم ڪري سگهجي، سينيٽر شاهي سيد چيو ته عدالتن ۾ ڪيس دير سان اڪلائڻ ۾ مايوسي پکڙجي ٿي،مزدورن کي انصاف ڪڏهن به بروقت نٿو ملي، سنييٽر لطيف انصاري چيو ته انصاف ۾ دير انصاف نه ڏيڻ جي برابر آهي، انصاف جي فراهمي معاشري کان وڌيڪ حڪومت جي ذميواري آهي، سينيٽر سعيد غني چيو ته عوام کي انصاف فراهم ڪرڻ حڪومت جي ذميواري آهي، جرڳن ذريعي ٿيندڙ ڪجهه فيصلا اعتراز جوڳا هوندا آهن هن نظام کي قانوني شڪل ڏئي بهتر نتيجا حاصل ڪري سگهجن ٿا، سنيٽر مير ڪبير چيو ته ڳوٺن ۾ ننڍا ننڍا جهيڙا مقامي سطح تي حل ڪيا وڃن ٿا، جرڳن ذريعي فيصلن ۾ مسئلا ضرور آهن انهن کي بهتر بڻائي سگهجي، ضروري آهي ته ماڻهن جي مزاج مطابق قانون جوڙيا وڃن، ان کانپوءِ تحريڪ التوا تي بحث ختم ڪندي وفاقي وزير پرويز رشيد چيو ته تڪڙو ۽ سستو انصاف فراهم ڪرڻ قومي ۽ عوامي زندگي جي حوالي سان وڏي اهميت جو معاملو آهي ان سان عوام کي ان ڳالهه جو علم ٿيندو ته ان جا نمائندا هن اهم معاملي تي ڪيترو ڌيان ڏئي رهيا آهن، هن چيو ته تڪڙو ۽ سستو انصاف فراهم ڪرڻ لاءِ سڌارا ڪيا ويا آهن، عدالتن کي 6 مهينن ۾ فيصلا ڪرڻ جو پابند بڻايو ويو آهي، ٿاڻي ۾ اجايو ڪنهن شخص کي رکڻ تي هاءِ ڪورٽ ۾ درخواست ڏيڻي پوي ٿي، هاڻ هي ڊسٽرڪٽ اينڊ سيشن جج کي اختيار ڏنو ويو آهي، هن چيو ته عدالتي سڌارن مطابق ججن جو انگ وڌايو ويو آهي ته جيئن ڪيس جلد اڪلائي سگهجن.

 

وزيراعظم سان آرمي چيف جي ملاقات، دهشت گرد ڪاررواين ۾”را“ جي ملوث هجڻ واري معاملي تي ويچار

اسلام آباد (بيورو) وزيراعظم نواز شريف سان آرمي چيف جنرل راحيل شريف ملاقات ڪري دهشت گرد ڪاررواين ۾ ڀارتي ڳجهي ايجنسي ”را“ جي ملوث هجڻ واري معاملي تي خيالن جي ڏي وٺ ڪئي. اسلام آباد ۾ ڪيل ملاقات ۾ ملڪي سلامتي ۽ امن امان جي صورتحال تي خيالن جي ڏي وٺ ڪئي وئي. ان موقعي تي قومي سلامتي جي ادارن جي ”را“ ۾ ملوث هجڻ وارين رپورٽن تي غور ويچار ڪيو ويو. ملاقات ۾ملڪي سلامتي ۽ امن امان جي صورتحال تي ڳالهيون ڪيون ويون.

 

سنڌ اسيمبلي جو اجلاس، بجيٽ خرچن تي بحث دوران حڪومتي ۽ مخالف ڌر ميمبرن ۾ سخت ڇڪتاڻ، ف ليگ جو احتجاج جو سخت احتجاج، ايوان مڇي مارڪيٽ بڻجي ويو

ڪراچي (اسٽاف رپورٽر) سنڌ اسيمبليءَ ۾ حڪومت جي بجيٽ خرچن تي بحث دوران فنڪشنل ليگ ميمبرن حڪومتي رويي خلاف احتجاج ڪيو، جڏهن ته فنڪشنل ليگ ۽ پ پ ميمبرن وچ ۾ سخت جملن جي ڏي وٺ ٿي جنهن سبب ايوان مڇي مارڪيٽ بڻجي ويو. سنڌ اسيمبلي جو اجلاس پينل آف چيئرمين سيد مراد علي شاهه جي صدارت هيٺ ٿيو جنهن ۾ حڪومت جي 9 مهينن جي بجيٽ خرچن تي بحث اڄ به جاري رهيو. بحث دوران نصرت سحر عباسي سميت ٻين فنڪشنل ليگ  ميمبرن، حڪومتي رويي خلاف احتجاج ڪندي پنهنجن سيٽن تان اٿي اسپيڪر ڊائس ڏانهن وڃڻ جي ڪوشش ڪئي. ان موقعي تي پ پ جي عورتن ميمبرن پڻ نصرت سحر عباسي جي حڪومت تي تنقيد خلاف احتجاج ڪيو جنهن بعد ايوان ۾ گوڙ پيدا ٿي ويو. نصرت سحر عباسي چيو ته رولز 145 موجب بجيٽ تقريرن لاءِ پنج منٽ مقرر ڪرڻ افسوسناڪ عمل آهي، اربين رپين جي ڪرپشن تي ڳالهه کان روڪڻ لاءِ پنج منٽ وقت مقرر ڪيو ويو. فنڪشنل ليگ ميمبر چيو ته ايوان ۾ وڏي وزير سميت ڪو به ذميوار موجود ناهي، اسيمبلي جي ڪارروائي ڪير نوٽ ڪري رهيو آهي، الله جي واسطي سنجيدگي جو مظاهرو ڪيو وڃي. نصرت سحر عباسي چيو ته آڊيٽر جنرل جي رپورٽ ۾ سنڌ اندر 22 ارب رپين جي ڪرپشن جي نشاندهي ڪئي وئي. هن چيو ته سنڌ حڪومت کي موجوده دور جي ڪرپٽ ترين حڪومت قرار ڏنو ويو. سندس چوڻ هو ته مڪاني ادارن وارو وزير ٽن فٽن جي ٻــُهاري ڦيرائي صفائي جو ڊرامو رچايو، شرجيل ميمڻ خيرپور، لاڙڪاڻي ۽ سکر ۾ ٻهارو ڇو نه ٿو لڳائي، اتي صفائي جو خيال ئي ناهي. نصرت سحر عباسي چيو ته مڪاني ادارن وارو وزير واٽر بورڊ ۾ گوسڙو ملازمن ۽ دهشتگردن جو اعتراف ڪيو، تنهن ڪري لسٽون ايوان ۾ پيش ڪيون وڇن. هن چيو ته مڪاني ادارن واري ملازمن کي ڪيترن ئي مهينن کان پگهارون ناهن مليون، کين پگهارون ملنديون ته هـُو ٻهارو ڏيندا، مڪاني ادارن واري وزير پاڻ ٻهارو سنڀاليو. فنڪشنل ليگ ميمبر چيو ته اندورني سنڌ جو لفظ استعمال ڪرڻ تي نثار کهڙو قوم کان معافي وٺي. صوبائي وزير منظور وساڻ تقرير شروع ڪئي ته فنڪشنل ليگ ميمبرن ٻيهر احتجاج ڪيو. منظور وساڻ چيو ته حڪومت تي تنقيد ڪرڻ کانپوءِ جواب ٻـُڌڻ جو به حوصلو رکڻ گهرجي. هن چيو ته جنرل ضياءَ جي دور ۾ ڪير ڪنهن سان گڏ هو، سڀني کي خبر آهي، ڪرپشن جي ڪهاڻي ڪو ٻـُڌڻ لاءِ تيار ناهي. ان موقعي تي پ پ ۽ فنڪشنل ليگ ميمبرن هڪٻئي خلاف احتجاج ڪيو جڏهن ته صوبائي وزير منظور وساڻ تي پاٿاريداري جو الزام لڳايو ويو. منظور وساڻ چيو ته اينٽي ڪرپشن جي وزير طور کيس ڳالهائڻ کان روڪيو پيو وڃي. هن چيو ته ناري تعلقي جي 36 هزار ايڪڙ زمين جعلي کاتا ٺاهي پنهنجي نالي ڪئي وئي، ساوڻ گئس فيلڊ مان 2 ڪروڙ ماهوار ڀتو وصول ڪيو ويندو آهي جيڪو ڪراچي جي دهشتگردن کي ڏنو ويندو آهي. منظور وساڻ چيو ته فنڪشنل ليگ جي ڀتي خوري جي جاچ ٿيڻ گهرجي، ايريگيشن جي 60 ڪروڙ رپين جو بنگلو غير قانوني طور تي 60 لک رپين ۾ خريد ڪيو ويو. سندس چوڻ هو ته 2002ع کان 2007ع تائين فنڪشنل ليگ حڪومت ۾ 7 ارب رپيا ڪرپشن ٿي، ان جي انڪوائري ٿيڻ گهـُرجي. بجيٽ خرچن تي بحث دوران متحده ميمبر صابر قائمخاني چيو ته 73 سيڪڙو بجيٽ خرچ ڪرڻ باوجود عوام جي حالت خراب آهي. هن چيو ته سنڌ حڪومت پنج کرب رپين کان وڌيڪ خرچ ڪرڻ باوجود به عوام جي حالت بدلائي نه سگهي آهي، بجيٽ ۾ حيدرآباد ترقياتي پيڪيج جي ڳالهه ڪئي وئي پر فنڊن جي فراهمي ۾ نظر انداز ڪيو ويو. پ پ ميمبر خورشيد جوڻيجي چيو ته سنڌ حڪومت بجيٽ ۾ 6 ترجيحن جو اعلان ڪيو ۽ ان تي قائم آهي. هن چيو ته فنڊن جي مانيٽرنگ سسٽم متعارف ڪرايو وڃي ۽ ضلعي سطح تي چونڊيل نمائندن جون ڪميٽيون خرچن جي مانيٽرنگ ڪن. نواز ليگ ميمبر سورٺ ٿيٻي چيو ته گذريل بجيٽ وانگر نئين بجيٽ ۾ به وڏيون دعوائون ڪيون وينديون، ترقياتي منصوبن تي فنڊ خرچ ڪرڻ بدران غير ترقياتي منصوبن تي اڏايا ويندا آهن. متحده ميمبر ناهيد بيگم چيو ته 70 سيڪڙو گئس جي پيداوار باوجود سنڌ جون صنعتون گئس کان محروم آهن. ناهيد بيگم چيو ته گئس تي اختيارن لاءِ وفاق جي قانون سازي صوبي جي حقن تي ڌاڙو آهي، ٽيڪس وصولين ۾ ناڪامي جو حساب ڏنو وڃي. پ پ ميمبر ناصر شاهه چيو ته نئين بجيٽ ۾ سکر لاءِ خاص پيڪيج رکيو وڃي، سکر ترقياتي پيڪيج تي عملدرآمد لاءِ اسيمبلي ميمبرن جي ڪميٽي قائم ڪئي وڃي. ايوان ۾ حڪومت جي بجيٽ خرچن تي بحث جاري هو ته اجلاس جي ڪارروائي سڀاڻي تائين ملتوي ڪئي وئي.

 

وي آءِ پي جي تڪن ڏانهن اضافي بيلٽ پيپرز موڪلڻ ڌانڌلي آهي: عمران خان

اسلام آباد (بيورو) تحريڪ انصاف جي سربراهه عمران خان چيو آهي ته انڪوائري ڪميشن آڏو آيل بيانن بعد ثابت ٿي ويو آهي ته 2013 واري عام چونڊن دوران واڌو بيلٽ پيپر ڇاپيا ويا، وي آءِ پي جي  تڪن ڏانهن اضافي بيلٽ پيپرز  موڪلڻ منظم  ڌانڌلي آهي، جڊيشل ڪميشن جي فيصلي کي قبول ڪيو ويندو. اسلام آباد ۾ انڪوائري ڪميشن جي ڪارروائي بعد ميڊيا سان ڳالهائيندي عمران خان چيو ته جڊيشل ڪميشن جي ڪارروائي سان تاريخ رقم ٿي رهي آهي. هن چيو ته اليڪشن ڪميشن ڪٿي 3 بيلٽ پيپر ۽ ڪٿي 20 لک بيلٽ پيپرز موڪليا. عمران خان چيو ته خيبرپختونخواهه جي رڳو ٻن تڪن لاءِ بيلٽ پيپرز جي ڇپائي ڪئي وئي پر ڪيپٽن صفدر ۽ حمزه شهباز جي تڪن ڏانهن 10-10 سيڪڙو واڌو بيلٽ پيپر ڇاپيا ويا. تحريڪ انصاف جي سربراهه چيو ته وي آءِ پي جي تڪن لاءِ واڌو بيلٽ پيپرز جي ڇپائي مان ظاهر آهي ته منظم ڌانڌلي ڪئي وئي آهي. هڪ سوال جي جواب ۾ عمران خان چيو ته جڊيشل ڪميشن جو فيصلو کين قبول هوندو.

 

امان الله نيازي قتل ڪيس ۾ 12 ماڻهو ملوث آهن: عبيد ڪي ٽو جو انڪشاف، عدالت وارنٽ جاري ڪري ڇڏيا

ڪراچي (اسٽاف رپورٽر) نائين زيرو تان گرفتار ٽارگيٽ ڪلر عبيد ڪي ٽو امان الله نيازي قتل ڪيس ۾ 12 ماڻهن جي ملوث هجڻ جو انڪشاف ڪيو آهي ڪراچي جي مقامي عدالت جوابدار عبيد ڪي ٽو جي وڌيڪ انڪشافن تي ٻين 12 ڏوهارين جا ضمانت نه ٿيڻ جوڳا وارنٽ جاري ڪري ڇڏيا آهن جڏهن ته ٻين ٽن ڪيسن ۾ عبيد ڪي ٽو سميت ٽن ڏوهارين جو چالان پيش ڪيو ويو دهشتگردي ٽوڙ عدالت ۾ جوابدار عبيد ڪي ٽو وڌيڪ انڪشاف ڪيا آهن جوابدار عبيد ڪي ٽو انڪشاف ڪيو ته امان الله نيازي قتل ڪيس ۾ 12 وڌيڪ جوابدار ملوث آهن عبيد ڪي ٽو پنهنجي اعترافي بيان ۾ چيو ته نعمان ساجد، سعيد، برهم، مزمل ۽ ٻيا ڏوهاري امان الله نيازي جي قتل ۾ شامل آهن جڏهن ته ٻين ٽن ڪيسن ۾ پوليس عبيد ڪي ٽو عابد ۽ محمود الحسن جي خلاف چالان اي پي سي ۾ پيش ڪيا.

 

جهلم ندي ۾ ڪار ڪرڻ سبب 5 ڄڻا ٻڏي فوت

گجرات (م.ڊ)  عالمگير  ويجهو ڪار جهلم ندي  ۾ ڪرڻ سبب 4 عورتن سميت هڪ ئي خاندان جا 5  ماڻهو فوت ٿي ويا. عالمگير ويجهو ڪار تيز رفتاري سبب جهلم ندي ۾ وڃي ڪري. جنهن جي نتيجي ۾ ڪار ۾ سوار 4 عورتن سميت هڪ مرد ٻڏي فوت ٿي ويا. مقامي ماڻهن موجب پوليس پنهنجي مدد پاڻ تحت 5  ئي لاش ڪڍيا. پوليس جو چوڻ هو ته حادثوڊرائيور کي ننڊ اچي وڃڻ سبب ٿيو، ڪار ۾ سوار 5 ئي  جو تعلق هڪ ئي خاندان آهي. مڙهه ضروري ڪارروائي کانپوءِ وارثن حوالي ڪيا ويا.