تازيون خبرون

Daily Archives: May 18, 2015

صفوران واقعو: داعش ملوث ٿي سگهي ٿي: جاچ عملدار

ڪراچي (اسٽاف رپورٽر) صفوران ڳوٺ ۾ اسماعيلي برادري جي بس تي ٿيل حملي جي جاچ ڪندڙ پوليس آفيسرن چيو ته واقعي ۾ امڪاني طور تي داعش ناهي تنظيم ملوث ٿي سگهي ٿي ميڊيا رپورٽ مطابق واقعي جي جاچ ٽيم جي سربراهه ۽ دهستگردي ٽوڙ ڊپارٽمينٽ جي عهديدار راجا عمرخطاب چيو ته صفورا سانحي جي پويان امڪاني طور تي داعش جو هٿ ٿي سگهي ٿو هن ڪراچي ۾ داعش جي ڪارڪنن کي تعليم يافته قرار ڏيندي چيو ته شهر ۾ ڪارروائين ۾ ملوث داعش جا ويڙهاڪ ٻاهران نه آيا آهن هو مقامي تنظيمن مان آهن ۽ داعش مان متاثر آهن سي ٽي ڊي جي عهديدار چيو ته شهر ۾ ٿيندڙ تازي دهشٽگردي جي ڪارروائين جي جاچ ۾ پوليس کي معلوم ٿيو آهي ته هنن واقعن پويان داعش جو هٿ آهي جڏهن ته پوليس ان حوالي سان ڪوئي اهم ثبوت حاصل ڪرڻ ۾ ناڪام آهي پرامن ڪميٽي کي نشانو بنائڻ جو ڇا سبب ٿي سگهي ٿو ان سوال تي ته راجا عمرخطاب چيو ته واقعو فرقيواريت جو سبب ٿي سگهي ٿو جڏهن ته شهر ۾ خوف ۽ هراس ڦهلائڻ ۽ هڪ خاص ڪمينٽي کي نشانو بنائڻ به هن حملي جي سببن جو حصو ٿي سگهي ٿو. صفورا سانحي جي جاچ ڪندڙ هڪ ٻئي پوليس آفيسر نالو ظاهر نه ڪرڻ جي شرط تي ٻڌايو ته اکين ڏٺل شاهدن جاچ آفيسرن کي ٻڌايو ته حملي آور چئن موٽرسائيڪلن تي هئا ۽ انهن مان هڪ پوليس جي وردي ۾ جڏهن ته ٻين کي شلوار قميص ۽ پينٽ شرٽ پهريل هئي بس تي حملي کان پوءِ اهي سمورا سپرهاءِ وي طرف فرار ٿي ويا هئا.

 

مزاحيا اداڪاري مون لاءِ ڪنهن ڀوائتي خواب کان گهٽ ناهي: ارشد وارثي

ممبئي(شوبز نيوز) بالي ووڊ اداڪار ارشد وارثي جو چوڻ آهي ته هڪ اداڪار جي حيثيت سان هو هر قسم جا ڪردا نڀائي سگهي ٿو پر هن سان گڏ مزاحيا اداڪار جو جيڪو ليبل لڳي ويو آهي، اهو هن لاءِ ڪنهن ڀوائتي خواب کان  گهٽ ناهي.هڪ انٽرويو ۾ هن چيو ته فلم انڊسٽري ۾ ڪنهن به اداڪار جي سڃاڻپ ان جو پهريون ادا ڪيل ڪردار بڻجي وڃي ٿي،هن جو چوڻ هو ته مون سان به اهو ئي ٿيو آهي  چو ته  هن پنهنجي پهرين فلم ۾ مزاحيا ڪردار ادا ڪيو هو، انڪري کيس به رڳو هڪ مزاحيا اداڪار سمجهيو وڃي ٿو. حقيقت ۾ ائين ناهي جتي هن مزاحيا ڪردار نڀايا آهن، اتي ئي تمام سنجيده ڪردار به ادا ڪيا آهن پر هاڻي فلم انڊسٽري ۾ نوان تجربا ٿي رهيا آهن، جنهن ڪري هن کي به مختلف ڪم ڪرڻ جو موقعو ملي رهيو آهي.

 

پاڪستاني فلم “ عبدالله” ڪانز فلم فيسٽيول ۾ نماءُ لاءِ پيش

ڪراچي(شوبز نيوز): پاڪستاني فلم “عبدالله” کي هلندڙ سال فرانس جي عالمي شهرت حاصل ڪندڙ  ڪانز فلمي ميلي ۾ نماءُ لاءِ پيش ڪيو ويو، جنهن کي ملڪ جي پهرين فيچر فلم جو به اعزاز حاصل آهي. فلم “عبدالله” جي ڪهاڻي 2011ع ۾ ڪوئٽه جي علائقي خروٽ آباد ۾ ٿيندڙ هڪ واقعي جي چوگرد گهمي ٿي، جنهن ۾ هڪ سيڪيورٽي چيڪ پوسٽ جي ويجهو5 پرڏيهين کي دهشتگرد قرار ڏئي ماريو ويو هو. فلم ۾ پاڪستاني اداڪار عمران عباس،ساجد حسن، سعديه خان ۽ حميد شيخ اهم ڪردار ادا ڪري رهيا آهن، فلم جي ڪهاڻي هاشم نديم لکي آهي ۽ ان جي هدايتڪاري ۽ پروڊيڪشن جون ذميواريون به انهن ئي نڀايون آهن.

 

رنوير سنگهه ۽ ديپڪا ”باجي رائو مستاني“ ۾ گڏ نظر ايندا

ممبئي:(شوبز نيوز) بالي ووڊ ليجنڊ امتياب ۽ ديپڪا پڊوڪون جي فلم پيڪو ڀرپور ڪاميابي حاصل ڪئي آهي، ان ڪاميابي جي خوشي ۾ فلم جي ٽيم خوشي جي تقريب ملهائي . ڀارتي خبر ايجنسي موجب رنوير سنگهه  ۽ ديپڪا گڏ ليلا بنسالي جي فلم رام ليلا ۾ گڏ ڪيو هو.  جڏهن ته هڪ ڀيرو وري ٻئي ڄڻا باجي رائو مستاني ۾ نظر ايندا. ٻئي طرف ديپڪا انٽرويو ۾ فلم جي زبردست تعريف ڪئي، هن چيو جڏهن کان شوجيت مون کي هن فلم جي آفر ڪئي ان وقت کان وٺي مان هن سان گڏ جذباتي طور تي گڏ آهيان. گذريل ڏينهن فلم جي ڪاميابي جي خوشي ۾ پروگرام ٿيو، جنهن ۾ هن فلم سان لاڳاپيل اداڪارائن کان علاوه  وڏي تعداد ۾ ماڻهو شامل هئا.

 

ڀارت ۾ هندو مذهبي تنظيم جو اداڪارا سني ليون کي ملڪ نيڪال ڪرڻ جو مطالبو

ممبئي(شوبز نيوز) ڀارتي ميڊيا جي مطابق هندو مذهبي تنظيم جي ترجمان جو چوڻ هو ته سني ليون جي فحائشي ويب سائيٽ ڀارتي عورتن جي ڪردار جي بي عزتي آهي ۽ ان سان نوجوانن ۾ به اخلاقي بگاڙ پيدا ٿيندا رهيا آهن، ان جي خلاف مهاراشترا ۽ گوا ۾ ڪيترائي ڪيس داخل ڪيا ويا آهن، جڏهن ته پوليس هينئر تائين ڪا به ڪارروائي ناهي ڪئي، هندو انتهاپسند تنظيم ڀارتي حڪومت کان سني ليون جي ويب سائيٽ تي پابندي لڳائڻ ۽ ان کي ملڪ نيڪالي جو به مطالبو ڪيو آهي، واضح رهي ته ڪينڊين  سني ليون ڀارتي فلم انڊسٽري ۾ قدم رکڻ کان پوءِ ڪيترائي ڀيرا تنقيد جو نشانو بڻجي چڪي آهي، جنهن جو هو ميڊيا تي به اظهار ڪري به چڪي آهي.

 

مون کي پاڪستان اچڻ جو بي صبري سان انتظار آهي: زمبابوي ڪوچ واٽمور

هراري(اسپورٽس نيوز): زمبابوي ڪرڪيٽ ٽيم جي ڪوچ ڊيوڊ واٽمور به دوره پاڪستان جي تصديق ڪندي چيو ته زمبابوي ٽيم فتح لاءِ ڀرپور محنت ڪري رهي آهي. پنهنجي ٽوئيٽر پيغام ۾ ڊيوڊ  واٽمور چيو ته مان پاڪستان وڃڻ لاءِ انتهائي بي قرار آهيان، هن چيو ته پاڪستان ۾ منهنجا گهڻا دوست آهن. پاڪستاني دوري ۾ انهن سان ملاقات جو موقعو ملندو، انهي لاءِ پاڪستان وڃڻ جو بي صبري سان انتظار ڪري رهيو آهيان. ياد رهي ته ڊيوڊ واٽمور زمبابوي ڪرڪيٽ ٽيم جي ڪوچنگ ڪري رهيو آهي. پاڪستاني ڪرڪيٽ ٽيم جي ڪوچ به رهي چڪو آهي.

 

آسٽريليا جي وڪيٽ ڪيپر بريڊ هيڊن ون ڊي مئچ تان رٽائرڊ مينٽ جو فيصلو ڪري ڇڏيو

سڊني(اسپورٽس نيوز) ورلڊ چئمپين آسٽريلين ٽيم جي وڪيٽ ڪيپر ۽ بئٽسمين بريڊ هيڊن  ون ڊي ڪرڪيٽ تان رٽائرمينٽ جو اعلان ڪري ڇڏيو. آسٽريلين ٽيم جي وڪيٽ ڪيپر بئٽسمين بريڊ هيڊن مارچ ۾ ورلڊ ڪپ کي پنهنجي ون ڊي ڪيريئر جو آخري مئچ قرار ڏيندي هن فارميٽ کي الوداع ڪري ڇڏيو. آسٽريليا  طرفان 3 ورلڊ ڪپ کيڏڻ وارو 37 سالا هيڊن ورلڊ ڪپ 2015ع  جي سڀني مئچن ۾ کيڏيو، 126 ون ڊي مئچن ۾ آسٽريلين ٽيم جي نمائندگي ڪئي. هن 3 هزار 122 رنز ٺاهيا. ورلڊ ڪپ ۾ هيڊن ڪابه متاثر ڪندڙ ڪارڪردگي جو مظاهرو ته نه ڪيو پر هن عالمي چئمپين ٽيم ڪارڪن ٺهڻ جو اعزاز پنهنجي نالي ڪيو.

 

يووراج سنگهه انوشڪا شرما کي ڀاڄائي جو لقب ڏئي ڇڏيو

ممبئي(اسپورٽس نيوز) ويرات ڪولهي ۽ انوشڪا شرما جي محبت جا چرچا عام آهن، ٻنهي تعلقاتن جو انڪشاف به  ڪري ڇڏيو آهي. جنهن کانپوءِ ڀارتي ڪرڪيٽ ٽيم جي رانديگرن يووراج سنگهه به انوشڪا شرما کي ڀاڄائي  جو لقب ڏئي ڇڏيو. تفصيل موجب ويرات ڪولهي اهو خطاب انويشا شرما جي نئين فلم ممبئي ويلوٽ جي تصوير شيئر ڪرڻ دوران ڏنو.انسٽا گرام ۾ شيئر ڪيل تصوير کي ڪمنٽس ۾ يوورام سنگهه لکيو ته اوئي اوئي ڀاڄائي ڏاڍي خوبصورت نظر اچي رهي آهي. هن فلم ۾ انوشڪا  جي اداڪاري جي تعريف ڪئي ۽ ڪاميابي لاءِ دعائون گهريون.

 

پاڪستان ۽ زمبابوي مئچ جون ٽڪيٽون وڪامجڻ شروع، 22 مئي تي پهريون مئچ

لاهور(اسپورٽس نيوز) ڪرڪيٽ شوقينن لاءِ گهڻن سالن کانپوءِ خوشي جي خبر اچي وئي. پاڪ زمبابوي وچ ۾ ٿيڻ واري ٽي ٽوئنٽي ۽ ون ڊي سيريز جون ٽڪيٽون ملڻ شروع ٿي ويون آهن. تفصيل موجب ٽي ٽوئنٽي ميچ جي ٽڪيٽ 250 رپين کان وٺي 1500 رپين تائين، جڏهن ته ون ڊي ميچ جي ٽڪيٽ 150 کان وٺي 1000 رپين تائين آهي. پاڪستان ۽ زمبابوي وچ ۾ پهريون ٽي ٽوئنٽي مچ 22 مئي تي قذافي اسٽيڊيم ۾ کيڏيو ويندو. پاڪستان بورڊ موجب ٻه ڏينهن پهرين ٽڪيٽن جي وڪري جو ڪم شروع ڪيو ويو هو. ميچ جون ٽڪيٽون آن لائين به حاصل ڪري سگهجن ٿيون.

 

شڪارپور:هڪ ئي خاندان جا 50 ماڻهو پراسرار بيماري ۾ مبتلا، وس وارن ڌيان نه ڏنو

 

شڪارپور شهر کان 20 ڪلو ميٽر جي فاصلي تي ڳوٺ محمود پنهور ۾ هڪ ئي خاندان جي 50 کان وڌيڪ مرد توڙي عورتن کي پيدائشي طور تي هٿن ۽ پيرن ۾ صرف هڪ آڱر آهي جنهن ڪري اهي ڪيترن ئي مسئلن کي منهن ڏئي رهيا آهن. پراسرار ڳوٺاڻن کي هٿن ۽ پيرن ۾ وڌيڪ آڱريون نٿيون ٿين، انهي مسئلي جي ڪري نارين جون شاديون به نٿيون ٿين، ڪيتريون ئي عورتون وڏي عمر ٿيڻ باوجود ڪنواريون رهجي ويون آهن ۽ مرد توڙي عورتون بوٽ به نٿا پائي سگهن، عورتون آڱريون نه هجڻ کي علائقي واسي عيب سمجهن ٿا جنهن ڪري اهي متاثر عورتون ڪنهن ڪاڄ ۾ نه ٿيون وڃن ۽ صرف گهرن تائين محدود رهن ٿيون. چونڊيل نمائندن توڙي انتظاميا پاران علاج جا آسرا ڏنا ويا پر عمل ڪنهن نه ڪيو جنهن ڪري اهي مرد توڙي عورتون ڪراچي ۾ پني ڪري پنهنجو پيٽ پالڻ تي مجبور آهن. ڳوٺ جي وڏيري عبدالشڪور پنهور، نياز پنهور، ربنواز پنهور، غلام قادرپنهور، عبدالغفار پنهور ٻڌايو ته ان مسئلي جا صرف ٻه حل آهن پهريون ته خاندان ۾ پنهنجي نارين جون شاديون ڪرايون وڃن ۽ ڇوڪرن لاءِ ٻئي هنڌان رشتا ورتا وڃن، برادري جا ماڻهو رشتو ڪرڻ تي راضي ئي نٿا ٿين، ٻيو حل هي آهي ته انهن سڀني جا جزا ٽيسٽ ڪرايا وڃن ته جيئن ايندڙ نسل کي ڇوٽڪارو ملي سگهي، ڳوٺاڻن چيو ته ايندڙ چونڊن ۾ ڪنهن کي ووٽ نه ڏينداسين، هر ڀيري رڳو ڏٽا ڏنا وڃن ٿا پر علاج ڪير نٿو ڪرائي. ڊي ايڇ او هيلٿ منير جوکيي ٻڌايو ته اسان وٽ اهڙي ڪائي به شڪايت ناهي، باقي ڪير آيو ته انهي جو حل به بجيٽ تي هوندو. هوڏانهن سماجي اڳواڻ فدا حسين بروهي، عمران منگي، دانش حيدري، عبدالغفارابڙو، جسقم اڳواڻ عبدالسميع بلالي، امداد ويسر، مهراڻ هڪڙو، ذيشان گلشن جمالي ۽ٻين چيو ته سنڌ حڪومت جي اها ذميواري آهي ته انهن جا جزا ٽيسٽ ڪري ليبارٽري اماڻيا وڃن ۽ هڪ آڱر وارن ماڻهن جي مالي مدد ڪئي وڃي ته جيئن اهي پني پيٽ گذارو ڪرڻ کان بچي سگهن.

گهوٽڪي:دستي بم ڦاٽڻ واري واقعي ۾ اڳڀرائي نه ٿي سگهي

گهوٽڪي ڀرسان ڳوٺ صيفل ڪولاچي ۾دستي بم ڦاٽڻ جي واقعي واري جاچ ۾ پوليس ڪابه اڳڀرائي ناهي ڪري سگهي، جڏهن ته صرف ايف آءِ آر داخل ڪئي وئي آهي، جڏهن ته ڪنهن به جوابدار جي گرفتاري عمل ۾ ناهي آئي، ان جي ابتڙ شهيد ٿيل نوجوانن جي وارثن کان آڏي پڇا ڳاڇا ڪئي وئي آهي، اهڙي ريت نوجوانن جي وارثن پوليس جي جاچ تي بي اعتمادي جو اظهار ڪندي گهوٽڪي جي صحت کاتي ۽ زخمي نينگر جو علاج نه ڪندڙ ڊاڪٽرن توڙي پوليس خلاف عدالت ۾ وڃڻ جو اعلان ڪيو آهي. ان حوالي سان رپورٽن موجب ڳوٺ صيفل ۾ بم ڌماڪي ۾ ٻن نوجوانن جي شهيد ٿيڻ واري واقعي جي ڊي ايس پي ارباب علي سومرو ۽ اي سيڪشن ٿاڻي جو ايس ايڇ او سعيد احمد ڀيو جاچ ڪري رهيا آهن، ان هوندي به پوليس اڃا تائين ڪنهن نتيجي تي ناهي پهچي سگهي، ان سلسلي ۾ واقعي بابت جاچ ڪندڙ ڊي ايس پي ارباب سومرو سان رابطي ڪرڻ جي ڪوشش ڪئي وئي پر هن سان رابطو نه ٿي سگهيو، جڏهن ته بم ڦاٽڻ جي واقعي بعد حساس ادارن پاران به واقعي واري هنڌ جو معائنو ڪرڻ بعد جاچ جو سلسلو شروع ڪيو ويو آهي، حساس ادارا سنڌ جي مختلف شهرن کانپوءِ ٻهراڙي جي علائقي ۾ ٿيندڙ دهشت گرديءَ جي واقعن ۽ انهن جي نيٽ ورڪ بابت پتو لڳائڻ واري ڪم ۾ مصروف ٿي ويا آهن، هوڏانهن اي سيڪشن ٿاڻي تي شهيد ٿيل فداحسين ۽ وڪيل احمد  جي والد غلام نبي ڪولاچي جي فرياد تي قلم 302، 7 اي ٽي اي ۽ ڌماڪو ڪرڻ واري قلم تحت ڪيس داخل ڪيو ويو آهي، پوليس ڪيس داخل ڪرڻ باوجود واقعي ۾ ملوث ڪنهن به جوابدار کي گرفتار ناهي ڪري سگهي، هوڏانهن شهيد ٿيل ٻنهي ڀائرن جي پونئيرن غلام نبي ڪولاچي،حبيب الرحمان، مولوي قمر الدين، حاجي حبيب الله ڪولاچي، ڪرم الدين ڪولاچي پريس ڪانفرنس ڪندي الزام هنيو ته ايس پي اسپيشل برانچ جو ايس پي منصور مغل واقعي کي فرقيواراڻو قرار ڏئي رهيو آهي ۽ بم ڦاٽڻ جو ٽائيم غلط ٻڌائي رهيو آهي، شهيدن جي وارثن پوليس، صحت کاتي تي عدم اطمينان جو اظهار ڪندي چيو ته واقعي کي مذهبي رنگ ڏيڻ جي ڪوشش کي بند ڪرڻ جو مطالبو ڪيو آهي، پريس ڪانفرنس ڪندي اڳواڻن وڌيڪ چيو ته اسان واضح ٿا ڪريون ته اسان وٽ فرقي واريت ناهي، هنن چيو ته ٻچا اسان جا شهيد ٿي ويا آهن، اسان جو درد سمجڻ بجاءِ پوليس وارا فرقا پڇڻ سميت اونڌا سڌا سوال ڪري رهيا آهن، صحت کاتي گهوٽڪي جي ڊاڪٽرن جي نااهلي جي ڪري اسان جو ٻيو ٻار شهيد ٿي ويو، جيڪڏهن واقعي وقت موجود هجن ها ۽ انهن کي فرسٽ ايڊ ملي ها ته ٻيو ٻار شهيد نه ٿئي ها، هنن چيو ته اسان منصور مغل ۽ صحت کاتي گهوٽڪي جي ڊاڪٽرن طرفان فرضن ۾ غفلت ڪرڻ خلاف عدالت جو دروازو پڻ کڙڪائيندا سون، هوڏانهن بم ڦاٽڻ سبب شهيد ٿيل ٻنهي ڀائرن فداحسين ۽ وڪيل احمد جي پوئنرن سان تعزيت جو سلسلو هلندڙ آهي