تازيون خبرون

Daily Archives: May 15, 2015

دهشتگردن سان منهن ڏيڻ لاءِ سموري قوم کي متحد ٿيڻو پوندو

 

سينيٽ ڪراچي سانحي خلاف مذمتي ٺهراءُ منظور ڪري ڇڏيو. ميمبرن چيو آهي ته دهشت گرد رياست کان طاقتور ناهن. دهشت گردن جو خاتمو ضروري آهي. ڪالهه اربع ڏينهن سينيٽ ۾ ڪراچي ۾ دهشت گردي جي واقعي تي بحث ۾ حصو وٺندي سينيٽر طاهر حسين مشهدي چيو ته ڪراچي ۾ 45 پاڪستانين ۽ مسلمانن جو رت وهايو ويو آهي جنهن تي افسوس ٿيو آهي. هن چيو ته ڪوئيٽا سانحي کانپوءِ پاڪستان جي تاريخ ۾ اهو ڪارو داغ آهي جيڪو ڪڏهن به ميساري نه ٿو سگهجي. هن معاملي ۾ سياست کي دفن ڪري ڇڏڻ گهرجي. هن چيو ته جن تنظيمن تي پابندي آهي اهي ڪراچي ۾ جلسا ڪري رهيون آهن، اسان هر شيءِ کي سياست جو رنگ ڏيون ٿا، هڪ ايس ايڇ او ۽ هڪ ڊي ايس پي کي معطل ڪري چيو وڃي ٿو ته اسان سڀ ڪجهه ٺيڪ ڪري ڇڏيو آهي. سينيٽر ڪريم خواجه چيو ته ڪراچي ۾ دهشتگردي جو واقعو مذمت جوڳو آهي. هن چيو ته ان جو ٻج آمريت جي دور ۾ڇٽيو ويو، جنهن جي ڪري هي واقعا ٿي رهيا آهن. هن چيو ته اسماعيلي برادري جو ملڪي ترقي ۾ اهم ڪردار آهي. سينيٽر عتيق شيخ چيوته اسماعيلي برادري امن پسند برادري آهي ان کي نشانو بنائڻ مذمت جوڳو قدم آهي. هن چيو ته دهشت گرد عنصرن خلاف اسان کي اٿي بيهڻو پوندو. هن چيو ته دهشتگرد رياستي ادارن کان ڏاڍا نه آهن. سينيٽر خوش بخت شجاعت چيو ته دهشت گرد معصوم ماڻهن کي نشانو بڻائي رهيا آهن، ڪراچي ۾ 45 بيگناهه ماڻهن کي شهيد ڪيو ويو.. سينيٽر سليم ضياءَ چيو ته ڪراچي ۾ وحشياڻي دهشت گردي جي اسان مذمت ڪريون ٿا، ڪراچي ۾ دهشتگردي جا واقعا ته پهرين به ٿيندا رهيا آهن پر هينئر هڪ پرامن برادري ان جو نشانو بڻي آهي. هن چيو ته ان واقعي جو مقصد شهر جون حالتون خراب ڪرڻ آهي. سينيٽر شاهي سيد چيو ته ڪراچي ۾ دهشت گردي جي واقعي تي بحث سان گڏوگڏ اسان کي ان صورتحال جو حل به ڳولڻو پوندو. هن چيو ته اسان 7، 8 سالن کان چئي رهيا آهيون ته ڪراچي ۾ اسلحي جو ڍير آهي پر ان تي ڪو به ڌيان نه ڏنو ويو، هن چيو ته ڪراچي ۾ امن جي لاءِ ڪرائي جي قاتلن بدران ماسٽر مائينڊن کي جهلڻو پوندو، سينيٽر سسئي پليجو چيو ته ڪڏهن ڪراچي امن جو ڳڙهه هو پر اتي اڄ رت جي هولي کيڏي پئي وڃي. پاڪستان جي عوام دهشت گردي جي خاتمي لاءِ قرباني ڏئي رهي آهي ۽ ملڪ مان جلد ان جو خاتمو اچي ويندو. سينيٽر نهال هاشمي چيو ته ڪراچي ملڪ جو واپاري مرڪز آهي. هن چيو ته 1985ع کان ويندي هيستائين ڪراچي ۾ دهشت گردي جي واقعن جي ڇنڊڇاڻ جي لاءِ ڪميشن ٺاهي وڃي. سينيٽر راحيلا مگسي چيو ته دهشت گردي خلاف جنگ ۾ پاڪستان جي عوام ۽ هٿياربند فوج جا جوان عظيم قربانيون ڏئي رهيا آهن. سينيٽر خالده پروين چيو ته ڪراچي ۾ دهشت گردي جي واقعي ۾ ملوث ماڻهن کي سخت کان سخت سزا ملڻ گهرجي. سينيٽ ڪراچي ۾ دهشت گردي جي واقعي خلاف مذمتي قرارداد اتفاق راءِ سان منظور ڪري ورتي آهي. ڪالهه اربع ڏينهن سينيٽ جي اجلاس ۾ پاڪستان پيپلزپارٽي جي سينيٽر ڊاڪٽر ڪريم خواجه قرارداد پيش ڪئي جنهن ۾ چيو ويو ته هي ايوان ڪراچي ۾ بيگناهه ۽ معصوم شهرين کي دهشتگردي جي واقعي ۾ نشانو بڻائڻ جي شديد مذمت ڪري ٿو. هن واقعي ۾ ملوث سمورن جوابدارن کي گرفتار ڪري ڪيفر ڪردار تائين پهچايو وڃي.

ضرورت ان ڳالهه جي آهي ته دهشتگردن خلاف سموري قوم کي متحد ٿيڻو پوندو ۽ اڻوڻندڙ واقعي سان منهن ڏيڻ لاءِ هر وقت چوڪس رهڻو پوندو ان سان گڏوگڏ هر ان شخص تي جيڪو شڪي لڳندو هجي نظر رکڻ گهرجي ته جيئن حڪومت ۽ پاڪ آرمي سان گڏ عام ماڻهو به دهشتگردن جي هر سازش کي ناڪام بڻائي سگهي.

 

 ذوالفقار مرزا ۽ زرداري دوست مان دشمن، آخر ڇو؟؛مسرورسيال

چاليھه کان پنجيتاليھه سالن جي دوستي اوچتو دشمني ۾ مٽجي  وڃڻ کان پوءِ ڇا اِها چوڻي هتي ٺهڪي ٿي ته سياست ۾ دوستي ۽ دشمني نه هوندي آهي … ڪالھه جا جگري دوست اڄ جا ويري دشمن نظر اچن ته پوءِ اهو به نه چئجي ته هي سياست ناهي ……. جي سياست ناهي ته پوءِ هن کي ڪهڙو نالو ڏجي ……. جي چئجي ته سياست آهي ته پوءِ ڇا هي دشمني وري اڳتي هلي دوستي ۾ مٽجي سگھي ٿي، جيڪڏهن ائين نه ٿي سگھي ته ان جو مطلب اِهو ٿيندو ته پوءِ هي سياست ناهي ، هاڻ هي ذاتي دشمني آهي ۽ سياست ۾ جي ذاتي دشمنين جنم وٺڻ شروع ڪيو ته اهو انتهائي خطرناڪ عمل هوندو ۽ اهو هر سياستدان کي پنهنجي گھيري ۾ آڻي سگھي ٿو ، هتي سوال اهو آهي آخرڪار ڊاڪٽر ذوالفقار مرزا اهڙي انتهائي قدم کڻڻ تي ڇو مجبور ٿيو آهي يا ڪنهن جي چوڻ تي اِهو سڀ ڪجھه ڪري رهيو آهي؟ جئين پ پ قيادت هاڻ چئي رهي آهي ته مرزا مخالفن جي هٿن ۾ کيڏي رهيو آهي ، اڳ جڏهن مرزا الزام پي هنيا ته جيالا خاموش هئا ۽ کانئن جڏهن مرزا بابت پڇيو ويندو هو ته جواب ۾ چيو ويندو هو ته مرزا جي ايتري حيثيت ناهي جو کيس جواب ڏجي.

…… پر ڪجھه ڏينهن کان وري نه رڳو جيالا ايم پي ايز پر جيالڻيون ايم پي ايز به ٽولن جي صورت ۾ پريس ڪانفرنس ڪري جواب ڏيندي نظر اچي رهيون آهن، جنهن مان اِهو لڳي رهيو آهي ته مرزا جي هاڻ ڪا حيثيت جڙي وئي آهي ، مرزا جي حيثيت جڙي يا نه جڙي پر اِها ڳالھه واضع ٿي چڪي آهي ته مرزا ۽ ذرداري ۾ اختلاف  ڪي معمولي ناهن ….. جيڪي به آهن اهي وڏا وزنائتا آهن ، اهو ئي سبب آهي جو پ پ هاڻ انتقام تي لهي آئي آهي. بدين ۾ سندس حامين کي گرفتار ڪرڻ جو سلسلو شروع ڪيو آهي ، جنهن تي مرزا پنهنجين حامين جي گرفتارين خلاف احتجاج ڪندي ٿاڻي تي پهتو جتي ڊي ايس پي سان منهن ماري ٿيڻ واري ماحول مان پڻ اهو لڳي رهيو آهي ته بدين ۾ مرزا جي عوامي سگھه آهي، ان کان پوءِ مٿس دهشتگردي ڪورٽ ۾ ٽي ڪيس داخل ڪيا ويا ۽ کيس گرفتار ڪرڻ جي لاءِ رٿابندي تي غور ٿي رهيو هو ته مرزا جو بيان سامهون آيو جيڪڏهن کيس ايس پي بدين خالد ڪورائي يا امڪاني ايس پي راءِ انوار گرفتار ڪرڻ آيا ته هو بندوق کڻي ساڻن مقابلو ڪندو،  هن چيو ته هو ايماندار پوليس آفيسرن ڊي آئي جي حيدرآباد ثناالله عباسي ، ايس پي حيدرآباد عرفان بلوچ کي گرفتاري ڏيڻ جو حق ڏئي سگھي ٿو، ان لاءِ هن ثناالله عباسي سان رابطو پڻ ڪيو  هوڏانهن وري مرزا فارم هائوس جو گھيراءُ پڻ ڪيو ويو آهي،  جتي سڄو ڏينهن ڳڻتي واري صورتحال رهي ..

هن قت جيڪا به صورتحال بيٺي آهي، ان مان اِهو چٽو ٿي ويو آهي ته مرزا ۽ زرداري ويڙھه سياست نه پر ذاتي اختلافن جو منظر نظر اچي رهيو آهي  ، هتي اِها ڳڻتي ضرور آهي ته جيڪڏهن سياست هاڻ ذاتي دشمنين جي ور چڙهڻ لڳيون ته پوءِ سياست جيڪا اڳ ئي پنهنجي معنيٰ مطلب وڃائيندي نظر اچي ٿي، اها بگاڙ جي صورت اختيار ڪري وٺندي، جنهن سان سياست به دشمني جو ٻيو نانءُ بڻجي ويندي ،  سنڌ جو ماڻهو جيڪو اڳ ئي غير ذميوار سياستدانن جي سياست  جي حملن جو شڪار رهيو آهي ۽ سياسي زخمي رهيو آهي، اهو ويتر بنا مسيحا جي زندگي ۽ موت جي ٻه واٽي تي اچي بيهندو  … سياسي اختلاف اتي ٿيندا آهن جتي سياست هجي اسان وٽ ته سياست ذاتي مفادن ، رنجشن ۽ انتقامن جي لاءِ استعمال ٿئي ٿي جنهن سان مٿي کان هيٺ تائين نفرتن جو ڄار وڇايل آهن. اسين جتي اڳ ڪيترن ئي مسئلن جي ورچڙهيل آهيون برادرين جا جھيڙا ، ڪرپشن جا پهاڙ، بک بد حالي ، بدامني ، بد انتظامي ، بيروزگاري ، سماج دشمنن جون سرگرميون جيڪي نواجوان نسل کي تيزي سان تباھه ڪري رهيا هجن اتي معاشري کي بهتر ڪرڻ بدران اهڙا عمل ڪيا وڃن،

جنهن سان ويترغير يقيني وارو ماحول جنم وٺندو هجي، اها سنڌ جي ڪهڙي خدمت چئبي …..!  اسان جي حڪمرانن جي ڪرپشن ڪنهن کان ڳجھي نه آهي، خاص ڪري گذريل 5 سالن واري حڪومت ۽ هاڻ هلندڙ حڪومت ته رڪارڊ ٽوڙي ڇڏيا آهن، اسان جي ڪرپشن جي تعريف جا قصا ته هاڻ ٻين ملڪن جون  انٽرنيشنل تنظيمون پڻ ڪري رهيون آهن ، امڪان آهي ته سنڌ حڪومت جا ڪجھه وزير پڻ ڪرپشن جي الزام ۾ قانون جي پڪڙ ۾ اچي وڃن ، هن وقت پ پ لاءِ انا جو مسئلو بڻيل آهي ته سندن  جي دعويٰ آهي ته  هنن سنڌ جي عوام جي خدمت ڪئي آهي، جڏهن ته عوام کي سندن اهڙي دعويٰ تي اچرچ آهي روڊ، رستا اهي ئي  اکڙيل آهن ، ٿاڻا ،  تعلقه ميونسپل، اسپتالن سميت هر اداري جون سڻڀيون پوسٽن جون ٻوليون لڳي رهيون آهن، هر طرح سان عوام پيڙهجي رهيو آهي اتي اِها دعويٰ عوام کي اچرچ نه ڏيندي ته ڇا خوشي ڏيندي …….. بدين هن وقت حڪومت جي ائين نشاني تي آهي ، جئين اڳ مشرف دور ۾ ڊيرا بگٽي نشاني تي هو عجب آهي مرزا فارم جو ائين گھيرو ڪيو ويو آهي، جو ٽينڪر بيهاري رستا بند ڪيا ويا آهن، جئين ڪو وڏو آپريش ٿيڻ وارو هجي، سنڌ حڪومت جي اهڙي حڪمت عملي ڪا چڱي نه چئبي ، ان جا اثر سياسي طور پ پ کي ڪمزور ڪندا ، هنن لاءِ ضرري آهي ته مسئلي کي سياسي انداز۾ حل ڪن، تنقيد هر ڪنهن جو جهموري  حق آهي ، جي تنقيد جو جواب اهڙي انداز ڏنا ويا ته پوءِ جمهوري سوچ ۽ آمراڻي سوچ ۾ ڪهڙو فرق رهجي وڃي ٿو ….. جتي ذالفقار مرزا جي اندازِ اختلاف سان سهمت نٿي ڪري سگھجي اتي وري حڪمرانن ۽ پ پ پ جيالن جي جوابي انداز کي چڱو نٿو چئي سگھجي ، سنڌ جي عوام جيڪو اڳ ئي اعصابي تشدد سان منهن ڏئي رهيو آهي اتي ذميوار سياسي فردن جي ذاتي ويڙھه کي برداشت نٿي ڪري سگھي

 

 هاڻي ڪير اعتبار ڪندو؟؛سهڻي پارس

“چوڻي آهي ته جهڙي ڪرڻي تهڙي ڀرڻي“  ۽ اها چوڻي صولت مرزا جهڙن خطرناڪ دهشتگردن لاءِ ئي شايد ٺهي آهي، جن وٽ انساني زندگي جي نه ئي ڪا اهميت آهي ۽ نه ئي ڪا حيثيت، ان ڳالهه سان هر ڪو سهمت هوندو ته اهڙن وحشي درندن جي پڄاڻي اهڙي ئي ٿيڻ گهرجي، جيڪا صولت مرزا جي ٿيي آهي پر منهنجو ان حوالي سان موقف ٿورو مختلف آهي، خاص طور تي صولت مرزا جي ڪيس ۾ اوچتو ٿيل اڳڀراين، اعترافن، الزام ۽ رازن تان پردا کڄڻ کانپوءِ گهڻن تجزيا نگارن وانگر منهنجو به اهو ئي خيال هو ته شايد هن ڀيري ڪجهه مختلف ٿئي پر ائين نه ٿيو ۽ صولت مرزا کي ان انجام تائين پهچايو ويو، جنهن  جو هو حقدار هو، مونکي صولت مرزا سان نه ڪا همدردي آهي ۽ نه ئي ان قسم جي ماڻهن کي مان انسانيت جي دائري ۾ آڻينديس، ڇاڪاڻ ته جيڪو ماڻهو ڪنهن بيڏوهي ۽ مظلوم کان جيئڻ جو حق کسي ٿو، ان تي نه رحم اچي سگهي ٿو ۽ نه ئي دل ۾ ان لاءِ ڪا همدردي پيدا ٿي سگهي ٿي، پر هتي ڳالهه انهن رازن، اعترافن ۽ الزامن جي آهي، جيڪي صولت سان گڏ ئي شايد هزارين مڻ مٽيءَ هيٺان دفنائجي ويا آهن. صولت مرزا جي زندگي تي جيڪڏهن هڪ نظر وجهجي ته خبر پوندي ته هو عادي ڏوهاري يا دهشتگرد نه هو ، هو اسان وانگر هڪ عام انسان هو، پر سندس زندگي ۾ اوچتو آيل تبديلين سندس اندر ۾ پلجندڙ هڪ عام انسان کي وحشي بڻائي ڇڏيو ۽ اهڙي ريت سياست جي چالبازين گهٽين ۾ ڪرڪيٽ کيڏندڙ هڪ نوجوان کي اهڙو خطرناڪ وحشي بڻائي ڇڏيو، جيڪو هاڻ ان ئي گندي سياست هٿان استعمال ٿيندڙ اهڙن ڪيترن ئي گمنام نوجوانن لاءِ عبرت جو نشان بڻجي ويو آهي، صولت مرزا کي هونئن ته 16 سال اڳ گرفتار ڪيو ويو ۽ قتل ڪيس ۾ کيس ڦاهي جي سزا به ملي هئي پر ان تي وڏي عرصي کان عمل نه ٿيو، نيٺ جڏهن  کيس ڦاهي ڏيڻ لاءِ ڊيٿ وارنٽ جاري ٿيا ته هن هلندڙ سال 18 مارچ تي ڇرڪائيندڙ رزا عيان ڪري، نه رڳو ملڪي سياست ۾ ٿرٿلو مچائي ڇڏيو پر ان کانپوءِ سندس ڦاهي جي سزا تي عمل ٻه ڀيرا به روڪيو ويو ۽ پوءِ هڪ گڏيل جاچ ٽيم جوڙي سندس بيان رڪارڊ ڪيو ويو ، جنهن کانپوءِ کيس 12 مئي تي بلوچستان جي مڇ جيل ۾ ڦاهي تي ٽنگي سندس باب سدائين لاءِ بند ڪيو ويو، صولت مرزا کي جڏهن ڦاهي اچڻ واري هئي ۽ کيس يقين ٿي ويو ته هاڻي سندس زندگي جا آخري پل آهن ته هن اهي راز اوڳاڇي ٻاهر ڪڍيا، جيڪي سالن کان سندس سيني ۾ سانڍيل هئا، اهي راز ۽ اعتراف جيتوڻيڪ خطرناڪ حد تائين ڇرڪائيندڙ هئا ۽ گهڻن ماڻهن جو خيال آهي ته هن اهو سڀ ڪجهه پاڻ کي بچائڻ لاءِ ڪيو هو پر چيو ويندو آهي ته جيڪو ماڻهو زندگي جي آخري گهڙين ۾ هوندو آهي، اهو ڪوڙ ناهي ڳالهائيندي، صولت مرزا جو سڀ کان وڏو انڪساف اهو هو ته کيس ماڻهو مارڻ جا حڪم ايم ڪيو ايم جو سربراهه الطاف حسين ڏيندو هو، جيڪي کيس بابر غوري ذريعي ملندا هئا، هن اهو به راز کوليو ته جنهن ڪيس ۾ کيس ڦاهي ڏني پئي وڃي، مطلب شاهد حامد قتل ڪيس، اهو قتل به هن الطاف حسين جي حڪم تي ڪيو، جيڪو کيس بابر غوري پنهنجي گهر گهرائي ڏنو هو. اهڙي ريت هن ٻي وڏيپڌرائي اها ڪئي ته ايم ڪيو ايم جي ڏوهاري ماڻهن کي 12 سالن کان سنڌ ۾ گورنر جي ڪرسي تي ويٺل ايم ڪيو ايم جي عشرت العباد  ذريعي تحفظ ڏنو وڃي ٿو، هي اهو ئي عشرت العباد آهي، جنهن لاءِ ڊاڪٽر ذوالفقار مرزا چيو ته هو ماضي جي مشهور ميجر ڪليم ڪيس ۾ ملوث آهي، صولت مرزا ان سان گڏ اهو به چيو هو ته پ پ حڪومت ۾ کيس ايم ڪيو ايم جي چوڻ تي جيل ۾ سهولتون ڏنيون وينديون هيون، هن ايم ڪيو ايم ۾ شامل ڪارڪنن کي اپيل ڪئي هئي ته هو مون مان عبرت حاصل ڪن، ڇاڪاڻ ته ايم ڪيو ايم اهڙي پارٽي آهي، جيڪا ڪارڪنن کي ٽشو پيپر وانگر بلڪل ائين استعمال ڪري اڇلائي ڇڏيندي آهي، جيئن کيس استعمال ڪري اڇلايو ويو آهي. صولت مرزا جا اهي فاش ڪيل راز ۽ اعتراف ڀلي اعتبار ڪرڻ جهڙا هجن يا نه ۽ انهن کي ڀلي الزام قرار ڏنو وڃي پر هڪ اهڙو ماڻهو جيڪو جنهن پارٽي جو اهم حصو رهيو آهي، جڏهن اهو اهڙيون ڳالهيون ڪري ته پوءِ چئي سگهجي ٿو ته دال ڀلي سچي ڪاري ناهي پر ان ۾ ڪجهه ڪارو ضرور آهي،پارٽي هٿان استعمال ٿيل صولت مرزا جي اهڙن انڪشافن کانپوءِ حڪومت به وارو هٿان وڃڻ نه ڏنو ۽ سندس ڦاهي جي سزا تي عمل روڪي، هڪ گڏيل جاچ ٽيم ٺاهي، جنهن جيل ۾ آخري گهڙين ۾ صولت مرزا جو اعترافي وڊيو بيان رڪارڊ ڪيو، ان بيان ۾ هن ڇا چيو، وڌيڪ ڪهڙن  رازن تان پردو کنيو ۽ ڪهڙيون ڳالهيون ٻڌايون، اها ته خبر ناهي ۽ پاڪستان جي سياسي تاريخ تي نظر ڊوڙائي ائين چئي سگهجي ٿو ته شايد اها خبر ڪڏهن پئجي به نه سگهي ته ان وڊيو بيان ۾ ڇا آهي پر هڪ ڳالهه جو کٽڪو وري به رهندو ته هن آخر اهڙا ٻيا ڪهڙا راز فاش ڪيا جو کيس ايتري به مهلت نه ڏني وئي جو سندس آخري خواهش موجب کيس شاهد حامد جي وارثن کان معافين وٺڻ ڏني وڃي ها؟  صولت مرزا کي شايد اها خبر نه هئي ته هو جن ماڻهن کي پنهنجو اعترافي بيان ڏئي رهيو آهي اهي به کيس ائين ئي استعمال ڪري ويندا جيئن کيس پنهنجي پارٽي استعمال ڪيو.ٿيڻ ته ائين کپندو هو ته صولت مرزا جيڪي ڳالهيون ڪيون هيون، يا جيڪي راز اوڳاڇيا يا ائين کڻي چئون ته هن جيڪي الازم هنيا، انهن جي باقاعدگي سان جاچ ڪئي وڃي ها ۽ انهن ماڻهن کي في الحال حفاظتي حراست ۾ ورتو وڃي ها، جن جا نالا صولت کنيا ۽ اهي نالا هن ڳجهي نموني نه ٻڌايا پر ميڊيا تي کلي عام سندس بيان هليا، جيڪي اڄ به رڪارڊ جو حصو آهن. پوءِ اهڙي ڪهڙي مجبوري هئي جو رياست سندس ايڏن خطرناڪ رازن يا الزامن کي دٻائي ڇڏيو ۽ ڪنهن به قسم جي ڪا چرپر نه ٿي؟ اهڙي ڪهڙي ڳالهه آهي جو جنهن ماڻهو پنهنجي سڄي ڪٽنب جي جان کي خطري ۾ وجهي ايڏيون وڏيون اعترافي ڳالهيون ڪيون، ان جي هڪ به ڳالهه تي اعتبار نه ڪيو ويو؟ رياست جي نيٺ  اها ڪهڙي مجبوري آهي، جيڪا سياست  وٽ يرغمال بڻيل آهي ۽ هڪ اهڙي قيدي جي ڳالهين تي اعتبار ته پري جي ڳالهه جاچ ڪرائڻ جي به زحمت نه ڪئي وئي؟ صولت مرزا جڏهن پنهنجي ڏوهن جو اعتراف ڪندي ڇرڪائيندڙ راز پڌرا ڪيا هئا ته مون وانگر گهڻن ماڻهن جو اهو خيال هو ته هاڻ سندس موت واري سزا کي عمر قيد ۾ تبديل ڪيو ويندو پر ائين نه ٿيو ۽ سياست کانپوءِ رياست به کيس استعمال ڪري هڪ ٽشو پيپر وانگر چيري ڦاڙي اڇلائي ڇڏيو، سياست ته صولت مان پنهنجو ڪم ڪڍي وئي، پر رياست ايڏين وڏين ڳالهين کانپوءِ به اتي جو اتي رهجي وئي.

********