تازيون خبرون

Daily Archives: May 15, 2015

ايپڪس ڪميٽي سنڌ جو اجلاس، ڪراچي ۾ فيصلائتي آپريشن جو فيصلو ٿي ويو

ڪراچي (اسٽاف رپورٽر) سنڌ جِي ايپڪس ڪميٽيءَ، دهشتگردي جَي خاتمي لاءِ ڪراچي جَي سمورن ايندڙ ويندڙ رستن تي پوليس ۽ رينجرز جو چوڪيون قائم ڪرڻ جو فيصلو ڪري ڇڏيو، آرمي چيف جنرل راحيل شريف هدايت ڪئي آهي ته ملڪ مان دهشتگردي ختم ڪرڻ لاءِ هنگامي بنيادن تي قدم کنيا وڃن. ڪور هيڊ ڪوارٽرز ڪراچي ۾ آرمي چيف جنرل راحيل شريف جي صدارت هيٺ صوبائي ايپڪس ڪميٽي جو خاص اجلاس ٿيو. اجلاس ۾ وڏو وزير سيد قائم علي شاهه، گورنر ڊاڪٽر عشرت العباد، چيف سيڪريٽري سنڌ ۽ ٻيا اعليٰ عملدار شريڪ ٿيا. امن امان جي صورتحال جو جائزو وٺڻ لاءِ ٿيل اجلاس ۾ ڊي جي آءِ ايس آءِ ليفٽيننٽ جنرل رضوان اختر، ڊي جِي ايم آءِ، ڊي جي ايم او ۽ ڊي جِي رينجرز سنڌ ميجر جنرل بلال اڪبر شرڪت ڪئي. اجلاس ۾ فيصلو ڪيو ويو ته دهشتگردي جَي خاتمي لاءِ ڪراچي جَي سمورن ايندڙ ويندڙ رستن تي پوليس۽ رينجرز جون چوڪيون قائم ڪيون وينديون. صوبائي ايپڪس ڪميٽي جي اجلاس ۾ مختلف تجويزن جي منظوري پڻ ڏني وئي. اجلاس دوران پاڪ فوج جي سربراهه جنرل راحيل شريف، صفوران سانحي تي ڏک جو اظهار ڪندي قانون لاڳو ڪندڙ ادارن کي هدايت ڪئي ته دهشتگرد واقعن کي روڪڻ لاءِ قدم کنيا وڃن.

پاڪستان جو پئسو قوم جي امانت آهي، ڪنهن کي هضم ڪرڻ نه ڏينداسين: نواز شريف

اسلام آباد (بيورو) وزيراعظم محمد نواز شريف ڪالهه خميس ڏينهن ٽپهر هتي وزيراعظم هائوس ۾ سرڪاري شعبي جي ترقياتي پروگرام جي جائزي لاءِ اجلاس جي صدارت ڪئي. اجلاس کي خطاب ڪندي وزيراعظم چيو ته سمورا منصوبا مقرر وقت ۾ مڪمل ٿيڻ گهرجن ڇو ته دير سان خرچن ۾ اضافو ٿئي ٿو. هن چيو ته موثر ترقي جي لاءِ ڪوششون ڪرڻ گهرجن. وزيراعظم چيو ته رڳو انهن منصوبن تي ڪم شروع ڪرڻ گهرجي جن جي باقاعده منظوري ڏني وئي هجي ۽ جن سان عوام کي سڌوسنئون فائدو ٿئي. ان موقعي تي منصوبابندي ۽ ترقي واري وفاقي وزير احسن اقبال چيو ته حڪومت پي ايس ڊي پي سميت ايندڙ سال جي بجيٽ کي حتمي شڪل ڏيڻ جي آخري مرحلن ۾ آهي. هن وزيراعظم کي موجوده مالي سال جي پي ايس ڊي پي جي خرچن ۽ ايندڙ مالي سال جي لاءِ تجويز ڪيل خرچن بابت آگاهه ڪيو. وزيراعظم موجوده مالي سال 15 – 2014ع جي لاءِ پي ايس ڊي پي جي غيراستعمال ٿيل رقم ۽ مختلف وزارتن پاران نشاندهي ڪيل بچتن کي ترجيحي منصوبن جي لاءِ مخصوص ڪرڻ جي منظوري ڏني ته جيئن انهن منصوبن کي جلد مڪمل ڪرڻ کي يقيني بڻايو وڃي. وزيراعظم چيو ته پي ايس ڊي پي جي مخصوص فنڊن جي وڌ کان وڌ استعمال کي يقيني بڻايو وڃي ته جيئن ملڪ جي سمورن علائقن ۾ ترقياتي منصوبا شروع ڪري سگهجن جن جو فائدو عوام کي ٿيندو. هن هدايت ڪئي ته فنڊ اهڙي طور تي مخصوص ڪيا وڃن جو جتي انهن جي وڌيڪ ضرورت هجي فنڊ اتي استعمال ٿيڻ گهرجن. هن ايوي ايشن جي سيڪريٽري کي هدايت ڪئي ته پي  آءِ اي جي سروس ۾ بهتري لاءِ قدم کنيا وڃن جنهن ۾ جهازن جي بهتر ٽرانسپورٽيشن، مسافرن جي لاءِ سيٽن تي بهتر تفريحي پروگرام، سامان جي آمدرفت ۾ دير جو خاتمو، معياري خوراڪ ۽ جهازن ۾ وائي فائي جي سهولت جي فراهمي شامل آهي. اجلاس ۾ ناڻي واري وفاقي وزير اسحاق ڊار، منصوبابندي جي وفاقي وزير احسن اقبال، پيٽروليم ۽ قدرتي وسيلن جي وفاقي وزير شاهد خاقان عباسي پيٽروليم جي مملڪتي وزير ڄام ڪمال خان، قومي اسيمبلي ميمبر ڪيپٽن (ر) محمد صفدر، حمزه شهباز، افضل کوکر، اڳوڻي قومي اسيمبلي ميمبر سعود مجيد، ايڇ اي سي جي چيئرمين پروفيسر ڊاڪٽر مختار احمد سميت ناڻي واري وزارت، ايوي ايشن، پلاننگ، ريلويز، هائوسنگ، مواصلات ۽ پاڻي ۽ بجلي وارن سيڪريٽرين  شرڪت ڪئي.

پاڪستان دهشتگردي ۽ فرقيواريت جهڙن چيلينجز کي منهن ڏئي رهيو آهي: صدر ممنون حسين

اسلام آباد (بيورو) صدر ممنون حسين چيو آهي ته پاڪستان دهشتگردي ۽ فرقيواريت جهڙن چيلينجز کي منهن ڏئي رهيو آهي، اهڙي صورتحال مان دشمن فائدو وٺي رهيو آهي. اسلام آباد ۾ ميڊيا سان ڳالهائيندي صدر ممنون حسين چيو ته دهشتگردي خلاف عسڪري ۽ سياسي قيادت متحد آهي، ڪنهن کي امن خراب ڪرڻ جي اجازت نه ڏني ويندي. هن چيو ته قوم کي بدعنواني خلاف جهاد ڪرڻو پوندو، ڪراچي سانحي جهڙن واقعن جي روڪٿام لاءِ اڳواٽ قدم کنيا پيا وڃن. سندس چوڻ هو ته پاڪ فوج دشمنن خلاف آپريشن ضرب عضب ۾ رڌل آهي، امن خراب ڪندڙن جو گهيرو تنگ ڪيو ويندو. صدر ممون حسين چيو ته پاڪستان دهشتگردي ۽ فرقيواريت جي چيلينجز کي منهن ڏئي رهيو آهي،جڏهن اهڙي صورتحال ۾ دشمن وڏو فائدو حاصل ڪري رهيو آهي.

گورنر پنجاب جي وزير اعظم سان ملاقات، دهشتگرد بزدلاڻين ڪاررواين سان قوم جا حوصلا ڪمزور نٿا ڪري سگهن: نواز شريف

اسلام آباد (بيورو) وزير اعظم نواز شريف چيو آهي ته دهشتگرد بزدلاڻين ڪاررواين سان پاڪستاني قوم جا حوصلا ڪمزور نٿا ڪري سگهن، امن جي بحالي لاءِ سمورا وسيلا ڪتب آڻيا پيا وڃن. وزير اعظم نواز شريف سان اسلام آباد ۾ پنجاب جي نئين مقرر گورنر  رفيق رجوانه ملاقات ڪئي، جنهن دوران امن امان جي صورتحال سميت مختلف معاملن تي ويچاريو ويو. ملاقات دوران پنجاب جي گورنر رفيق رجوانه وزير اعظم کي آگاهي ڏيندي چيو ته پنجاب ۾ قومي ايڪشن پلان تحت پوليس ۽ قانون لاڳو ڪندڙ  ادارن جي ڪارڪردگي ساراهه جوڳي آهي. وزير اعظم نواز شريف چيو ته قومي ايڪشن پلان تحت ملڪ مان دهشتگردي جو ناسور ختم ڪيو ويندو، ڪنهن کي بيگناهه شهري کي مارڻ جي اجازت نه ڏني ويندي.

 

دهشتگردي جا واقعا معيشت تي اثر انداز ٿي رهيا آهن:اسحاق ڊار

اسلام آباد (بيورو) ناڻي واري وفاقي وزير اسحاق ڊار چيو آهي ته دهشتگردي جا واقعا معيشت تي اثر انداز ٿي رهيا آهن، حڪومت ملڪ ۾ امن قائم ڪرائڻ ۽ معيشت جي بهتري لاءِ ڏينهن رات جاکوڙي رهي آهي، ايندڙ 3 ورهين اندر توانائي بحران تي ضابطو آندو ويندو. اسلام آباد ۾ تقريب کي خطاب ڪندي اسحاق ڊار چيو ته دهشتگرد واقعن سبب ملڪي معيشت تي خراب اثر پئجي رهيا آهن. هـُن چيو ته حڪمران ليگ ملڪ ۾ امن قائم ڪرائڻ ۽ معيشت جي بهتري لاءِ ڏينهن رات جاکوڙي رهي آهي. وفاقي وزير چيو ته ملڪ اندر امن امان جو مسئلو هجڻ باوجود معيشت ۾ بهتري آئي آهي، جنهن جو سڄي دنيا اعتراف ڪيو آهي. اسحاق ڊار چيو ته گذريل ڪيترن ئي سالن کان توانائي واري شعبي کي نظرانداز ڪيو ويو، جنهن سبب بحران شديد ٿي ويو. اسحاق ڊار چيو ته توانائي بچائڻ لاءِ جديد ٽيڪنالاجي جو استعمال ڪيو پيو وڃي. ناڻي واري وفاقي وزير هڪ ڀيرو ٻيهر اميد ڏيکاري ته ايندڙ 3 ورهين دوران توانائي بحران تي ضابطو اچي ويندو.

 

ملڪ اندر دهشتگردي جي واقعن ۾ ”را“ جي ملوث هجڻ جا ثبوت ڀارت حوالي ڪري ڇڏيا آهن: پاڪستان

اسلام آباد (بيورو) پاڪستان، ملڪ اندر دهشتگردي جي واقعن ۾ ڀارتي ڳجهي اداري ”را“ کي ملوث قرار ڏئي ڇڏيو، پرڏيهي سيڪريٽري اعزاز چوڌري چيو آهي ته ”را“ جي ملوث هجڻ جا ثبوت ڀارت حوالي ڪري ڇڏيا آهن. اسلام آباد مان جاري ڪيل بيان ۾ پرڏيهي سيڪريٽري اعزاز چوڌري تصديق ڪئي ته پاڪستان اندر دهشتگردي جي واقعن ۾ ڀارتي ڳجهو ادارو ”را“ ملوث آهي. هـُن چيو ته ڪراچي مان گرفتار ڪيل ٻن ڏوهارين تسليم ڪيو آهي ته هنن را کان تربيت حاصل ڪئي. پرڏيهي سيڪريٽري چيو ته دهشتگرد جَي اهڙَي اعتراف بعد هنن پاڪستان اندر دهشتگرد ڪاررواين ۾ “را” جَي ملوث هجڻ جا ثبوت تيار ڪري ڀارت حوالي ڪري ڇڏيا. اعزاز چوڌري چيو ته صفوران سانحي جي جاچ جاري آهي، جيڪا مڪمل ٿيڻ کانپوءِ ئي خبر پوندي ته اصل ڏوهاري ڪير آهن؟ پرڏيهي سيڪريٽري عزم جو اظهار ڪيو ته صفوران سانحي ۾ ملوث دهشتگردن کي انجام تائين پهچايو ويندو. سندس چوڻ هو ته ملڪ مان دهشتگردن جو تقريبن خاتمو اچي چڪو آهي پر انهن جي باقيات اڃا به موجود آهي، جيڪا اهڙيون قهري ڪارروايون ڪري رهي آهي. اعزاز چوڌري چيو ته داعش به پاڪستان سميت سڄي دنيا لاءِ وڏو خطرو بڻيل آهي، جنهن جو خاتمو آڻڻ به اشد ضروري آهي

 

صفوران سانحو، سخت سيڪيورٽي ۾ شهيدن جا مڙهه مٽيءَ ماءُ حوالي، وڌيڪ 2 زخمي فوت، انگ 47 ٿي ويو

ڪراچي (اسٽاف رپورٽر) صفوران ڳوٺ سانحي ۾ حياتيون وڃائيندڙ 42 ڄڻن جا مڙهه سخت سڪيورٽي هيٺ مٽيءَ ماءُ حوالي ڪيا ويا، جڏهن ته وڌيڪ ٻن زخمين جَي فوت ٿيڻ بعد شهيدن جو انگ وڌي 47 ٿي ويو آهي. گذريل ڏينهن ڪراچي جي علائقي صفوران ڳوٺ ويجهو بس تي فائرنگ جَي نتيجي ۾ اسماعيلي ڪميونٽي سان تعلق رکندڙ 16 عورتن سميت 45 ڄڻا شهيد ۽ 12 ڄڻا زخمي ٿيا هئا. سانحي ۾ شهيد ٿيل 45 مان 42 ڄڻن جي الاظهر گارڊن ۾ جنازي نماز ادا ڪئي وئي، جنهن ۾ ايم ڪيو ايم، پي ٽي آءِ، نون ليگ، جماعت اسلامي ۽ ٻين سياسي، سماجي، مذهبي اڳواڻن توڙي عام ماڻهن وڏي انگ ۾ شرڪت ڪئي. جنازي نماز وقت سڪيورٽي جا انتظام انتهائي سخت ڪندي رينجرز ۽ پوليس جا 2 سئو اهلڪار مقرر ڪيا ويا هئا. شهيدن جِي جنازي نماز ادا ڪندڙن جي سڪيورٽي لاءِ ريپڊ ريسپانس فورس جي سئو اهلڪارن کي به الرٽ رکيو ويو هو. جنازي نماز بعد 42 ئي ڄڻن جا مڙهه نارٿ ناظم آباد جي سخي حسن قبرستان ۾ سخت سڪيورٽي هيٺ مٽيءَ ماءُ حوالي ڪيا ويا. ٻئي طرف آغا خان ۽ ميمڻ اسپتال ۾ داخل صفوران سانحي جا 2 زخمي فوت ٿي ويا، جنهن بعد شهيد ٿيلن جو انگ وڌي 47 ٿي ويو آهي، جڏهن ته 10 زخمين جو مختلف اسپتالن ۾ علاج هلندڙ آهي. هوڏانهن سانحي ۾ شهيد ٿيل 47 مان ٻن ڄڻن جِي سڃاڻپ اڃا تائين ناهي ٿي سگهي،جنهنڪري سندن لاش اسپتالن ۾ پيل آهن. ٻئي طرف ڪراچي سانحي تي سڄي ملڪ ۾ سوڳ ملهايو پيو وڃي، سنڌ ۾ عام زندگي جيان عدالتي ڪارروائيون پڻ معطل آهن، جڏهن ته قومي جهنڊو به جهـُڪيل آهي. ڪراچي جي صفوران چورنگي ويجهو اسماعيلي برادري جي 46 ڄڻن جي قتل خلاف سنڌ، پنجاب، بلوچستان، خيبر پختونخواهه، گلگت بلتستان ۽ آزاد ڪشمير ۾ سوڳ ملهايو پيو وڃي. سوڳ سبب اهم سرڪاري ۽ خانگي عمارتن تي قومي جهنڊو جهـُڪيل آهي جڏهن ته سڄي سنڌ ۾ عام زندگي مڪمل طور مفلوج بڻيل آهي. ڪراچي ۾ شهر جا اڪثر پيٽرول پمپس ۽ سي اين جـِي اسٽيشنز بند آهن، جنهن سبب روڊن تي پبلڪ ٽرانسپورٽ انتهائي گهٽ آهي. شهر جا سمورا ڪاروباري مرڪز، دڪان، آفيسون ۽ تعليمي ادارا بند آهن، جڏهن ته ڪراچي ۽ وفاقي اردو يونيورسٽيز سميت سمورين سرڪاري توڙي خانگي يونيورسٽيز ۾ اڄ رٿيل پرچا ملتوي ڪيا ويا آهن. صفوران چورنگي سانحي سبب سپريم ڪورٽ، سنڌ هاءِ ڪورٽ، ڪراچي بار ۽ ملير بار ايسوسيئشنز جي سڏ تي عدالتي ڪارروائين جو بائيڪاٽ ڪيو ويو آهي جڏهن ته وڪيلن ڪاريون پٽيون ٻـَڌي احتجاج پڻ ڪيو. ٻئي طرف حيدرآباد، ميرپورخاص، نوابشاهه، دوڙ، بدين، سانگهڙ، شهدادپور، دادو، ميهڙ، سکر، روهڙي، خيرپور،نوشهري فيروز، جيڪب آباد ۽ ٻين شهرن ۾ به ڪاروبار، اسڪول ۽ پبلڪ ٽرانسپورٽ بند آهي.

 

شرجيل ميمڻ جي هدايت تي واٽر بورڊ جي 262 گوسڙو ملازمن کي نوٽيس جاري، پگهارو روڪڻ جو حڪم

ڪراچي ( اسٽاف رپورٽر): سنڌ جي اطلاعات ۽ بلديات واري وزير شرجيل انعام ميمڻ بلديات کاتي ۾ گوسڙو ملازمن خلاف جاري مهم جي سلسلي ۾ ڪراچي واٽر اينڊ سيوريج بورڊ جي 262 گوسڙو ملازمن کي شوڪاز نوٽيس جاري ڪري ڇڏيا آهن. انهن سمورن ملازمن جون نه صرف پگهارون فوري طور تي روڪڻ جا حڪم جاري ڪري ڇڏيا آهن بلڪ انهن سمورن ملازمن کان فوري طور تي شوڪاز نوٽيس جو جواب به  طلب ڪري ورتو آهي ۽ ايئن نه ڪرڻ تي انهن سمورن ملازمن کي نوڪرين مان ڪڍيو ويندو. اربعا تي اطلاعات ۽ بلديات جي وزير ۽ ڪراچي واٽر اينڊ سيوريج بورڊ جي چيئرمين شرجيل انعام ميمڻ واٽر بورڊ جي 262 اهڙن ملازمن جيڪي ڊيوٽين تان مسلسل غيرحاضر هئا انهن کي گوسڙو ملازم قرار ڏيندي انهن سمورن کي شوڪاز نوٽيس جاري ڪري ڇڏيا آهن. ان حوالي سان صوبائي وزير، سيڪريٽري بلديات ۽ ايم ڊي واٽر بورڊ کي خصوصي طور تي هدايتون ڏنيون آهن ته انهن سمورن ملازمن جون پگهارون فوري طور تي روڪيون وڃن ۽ انهن کان شوڪاز نوٽيس جو فوري جواب طلب ڪيو وڃي. شرجيل انعام ميمڻ چيو آهي ته انهن سمورن ملازمن کي ڊيوٽين تي حاضر نه هجڻ ۽ پگهارون وٺڻ تي نوٽيس جاري ڪيا آهن ۽ جيڪڏهن انهن ملازمن پاران تسلي بخش جواب نه مليو ته نوڪرين مان فارغ ڪيو ويندو. واضح رهي ته صوبائي وزير پاران 23 فيبروري 2015 کان پوري صوبي ۾ جاري ”صاف سرسبز سنڌ ۽ پرامن سنڌ“ مهم دوران صوبائي وزير بلديات کاتي جي ماتحت سمورن کاتن مان گوسڙو ملازمن جي خاتمي جا حڪم ڏنا هئا ۽ ان سلسلي ۾ واٽر بورڊ، ڪي ايم سي ۽ سمورن ڊي ايم سيز ۽ ٽي ايم ايز جي اعليٰ آفيسرن کي هدايتون ڏنيون هيون ته هو پنهنجن پنهنجن ضلعن ۽ کاتن مان اهڙن ملازمن جون فهرستون تيار ڪن جيڪي ڊيوٽين تي نه ٿا اچن ۽ انهن جون پگهارون به ادا ڪيون پيون وڃن، جنهن کان پوءِ ايستائين بلديات کاتي مان اهڙن ملازمن خلاف ڪاررواين جي شروعات ٿي آهي ۽ واٽر بورڊ جي انهن 262 ملازمن کي اربع ڏينهن جاري ڪيل شوڪاز نوٽِس ان سلسلي جي ڪڙي آهي.

 

ايم ڪيو ايم صفوران سانحي خلاف ٺهراءُ سنڌ اسيمبلي ۾ جمع ڪرائي ڇڏيو

ڪراچي (اسٽاف رپورٽر) ايم ڪيو ايم صفوران سانحي جي جاچ ۾ اڳڀرائي سان اسيمبلي جي ميمبرن کي ڄاڻ ڏيڻ جو مطالبو ڪري ڇڏيو آهي. ٺهراءُ سنڌ اسيمبلي ۾ جمع ڪرايو ويو آهي.ايم ڪيو ايم جي ميمبرن اسماعيلي برادري تي دهشتگردي واري حملي خلاف سنڌ اسيمبلي ۾ ٺهراءُ جمع ڪرايو آهي. مخالف ڌر جي اڳواڻ خواجا اظهار الحسن ميڊيا سان ڳالهائيندي چيو ته جاچ جي اڳڀرائي جي ڄاڻ هجڻ مخالف ڌر جو حق آهي.هن وزير اعليٰ سنڌ کان مطالبو ڪيو ته صفوران سانحي جي جاچ جي باري ۾ ايوان کي ڄاڻ ڏني وڃي.

 

صفوران بس واقعي ملڪ کي لوڏي ڇڏيو، پوليس کي غير سياسي ڪرڻ تائين ڪراچي جا مسئلا حل نه ٿيندا: عمران خان

اسلام آباد (بيورو) تحريڪ انصاف جو سربراهه عمران خان اڄ ڪراچي ۾ صفوران چوڪ سانحي ۾ شهيد ٿيلن جي وارثن سان تعزيت ڪندو، عمران خان چيو آهي ته بس سانحي سڄي ملڪ کي لوڏي ڇڏيو آهي، رينجرز ڪراچي مسئلي جو حل ناهي، پوليس کي غير سياسي ڪرڻ تائين ڪراچي جا مسئلا حل نه ٿيندا. سپريم ڪورٽ ٻاهران ميڊيا سان ڳالهائيندي عمران خان چيو ته عام چونڊن ۾ ڪيل ڌانڌلي جو طريقه ڪار پڪڙيو آهي ته وڏي ڦوڪڻي مان هوا نڪري وئي آهي، جلد ن ليگ جوناهم وڪيٽون ڪرڻ واريون آهن. هن چيو ته ڪراچي بس سانحي سڄي ملڪ کي لوڏي ڇڏيو آهي، پشاور آرمي پبلڪ اسڪول سانحي کانپوءِ ڪراچي واقعو وڏو سانحو آهي جنهن تي افسوس آهي. هن چيو ته ڪراچي ۾ رينجرز مسئلي جو حل ناهي، رينجرز ايئن آهي جيئن ڊسپرين جي گوري سان ڪينسر جو علاج ڪيو وڃي، ڪراچي ۾ پوليس کي غير سياسي ڪرڻ تائين مسئلا حل نه ٿيندا.