تازيون خبرون

Daily Archives: May 14, 2015

ڪراچي: اسماعيلي ڪميونٽي جي بس تي دهشتگردن جي فائرنگ، 45 ڄڻا مارجي ويا

ڪراچي (اسٽاف رپورٽر) ڪراچي جي علائقي صفوران چورنگي ويجهو اسماعيلي ڪميونٽي جِي بس تي دهشتگردن جـِي فائرنگ جَي نتيجي ۾ 16 عورتن سميت 45 ڄڻا مارجي ويا ۽ 20 زخمي ٿي پيا آهن. پوليس موجب اسماعيلي ڪميونٽي سان تعلق رکندڙ 60 کان وڌيڪ ماڻهن سان ڀريل بس کي پوليس جي وردي پهريل 6 دهشتگردن صفوران چورنگي ويجهو روڪي ڊرائيور کي نشانو بڻائڻ بعد مسافرن تي انڌا ڌنڌ فائرنگ ڪري ڏني. فائرنگ جَي نتيجي ۾ 16 عورتن سميت 44 ڄڻا مارجي ويا ۽ ٻارڙن سميت 18 زخمي ٿي پيا. واقعي ۾ مارجي ويلن جا لاش ۽ زخمين کي ميمڻ ۽ ڊائو سميت مختلف اسپتالن ڏانهن منتقل ڪيو ويو، جتي ايمرجنسي لاڳو ڪري زخمين کي طبي امداد ڏني پئي وڃي. ڊاڪٽرن جو چوڻ آهي ته زخمين مان ڪيترن جي حالت ڳڻتي جوڳي آهي، جنهن ڪري مارجي ويلن جو انگ وڌڻ جو خدشو آهي. ميمڻ اسپتال ۾ داخل هڪ زخميءَ جو چوڻ آهي ته بس کي گلشن معمار وٽان يرغمال بڻايو ويو هو، جڏهن ته صفوران وٽ پهچي کين گوليون هيون ويون. اکين ڏٺن شاهدن جو چوڻ آهي ته صفوران چورنگي تي فائرنگ ۾ 55 ماڻهو مارجي چـُڪا آهن. اکين ڏٺن شاهدن موجب، اَٺن موٽرسائيڪل سوار هٿياربندن بس اندر گهڙي فائرنگ ڪئي. اکين ڏٺن شاهدن جو اهو به چوڻ آهي ته سمورن هٿياربندن کي پوليس جون ورديون پهريل هيون. ٻئي طرف ڪراچي جي صفوران ڳوٺ ويجهو دهشتگردن هٿان قتل ڪيل اسماعيلي برادري جي 45 ماڻهن جا لاش آغا خان اسپتال منتقل ڪيا ويا، 8 زخمين جو مختلف اسپتالن ۾ علاج جاري آهي.مختلف اسپتالن ۾ 45  مقتولن مان 42 جي سڃاڻپ ٿي وئي آهي، جن جا لاش آغا خان اسپتال منتقل ڪيا ويا آهن.صفورا چورنگي سانحي ۾ مارجي ويلن جي سڃاڻپ رجب، پير محمد، شميم شوڪت، ياسمين، انيلا ذوالفقار، عارفه مير علي، ذوالفقار محمد، شاني، شيراز نور علي، نظر علي، سيد نظر، جاويد، اسميتا سليم، لياقت نور جي، عروسه ذوالفقار، رضوان رحيم، رجب علي، رضوان رحيم، عليشا اڪبر، رحيم ميان جي، نور علي، عبدالوالا، سونيا سلطان، رمضان ولي، نيلم رضوان، امينه نظر، شميم امير، ڪاڪو ڀينجي، زبيده اڪبر، زبيده نظر علي،سلطان قاسم، محسن منصور، سهيل سلطان، شوڪت نظر، امتياز ڪريم، ميزار اڪبر، ناظم شمس الدين، شيرين عبدالميٿان، حنيف اڪبر، صدر الدين ۽ زاهده طور ڪئي وئي.ڊاڪٽرن موجب زخمين ۾ حبيب، شوڪت، ذيشان، روشن، بدالدين، پنڪي، زهره ۽ حميد ۽ ٻيا زخمي شامل آهن.ڊاڪٽرن موجب، هڪ خانگي اسپتال ۾ 17 مقتولن جو پوسٽ مارٽم ڪيو ويو آهي جن ۾ 6 عورتون ۽ 11 مرد آهن.هڪ اکين ڏٺي شاهد ياسين اڄڻ ميڊيا سان ڳالهائيندي چيو ته هٿياربندن بس جي ڊرائيور کي به قتل ڪري ڇڏيو، جنهن بعد ڪنڊيڪٽر بس کي ميمڻ اسپتال آندو.اسپتال ۾ داخل هڪ زخمي عورت ٻڌايو ته دهشتگرد بس جي پوئين گيٽ مان داخل ٿيا ۽ کين ائين لڳو هٿياربند ڦر لاءِ گاڏيءَ ۾ چڙهيا آهن.عورت جو چوڻ هو ته هڪ ڪليون شيو هٿياربندن جي هوءَ سڃاڻپ پڻ ڪري سگهي ٿي.هن چيو ته دهشتگردن پهرين ڊرائيور کي تشدد جو نشانو بڻايو بعد ۾ کيس گوليون هڻي ماري ڇڏيو.هن چيو ته بس ۾ ويٺل سمورن ماڻهن کي ڪنڌ هيٺ ڪرڻ جو چيو ويو جنهن بعد هڪ دهشتگرد ٻين ساٿين کي مسافرن تي فائرنگ ڪرڻ جي هدايت ڏني.زخمي عورت ٻڌايو ته بس ۾ سوار ٻن ٻارن کي ڌار ڪري باقي ماڻهن کي گوليون هنيون ويون.پوليس، رينجرز ۽ ميڊيا واقعي واري هنڌ تان داعش جون پرچيون پڻ هٿ ڪري ورتيون آهن.سچل ٿاڻي جي ايس آءِ او جو چوڻ هو ته هٿياربندن هر سيٽ تي فائرنگ ڪئي آهي.وڏي وزير جي حڪم تي شهر جي سمورين اسپتالن ۾ ايمرجنسي لاڳو ڪئي وئي، شهر جي مختلف اسپتالن  ۾ داخل زخمين جي علاج لاءِ رت جو عطيو  ڏيڻ لاءِ سوين ماڻهو پهچي ويا. هوڏانهن پابندي مڙهيل تنظيم جند الله ڪراچي ۾ بس تي فائرنگ جي ذميواري قبول ڪري ورتي آهي پرڏيهي خابرو اداري رائيٽر مطابق پاڪستاني طالبان کان علحيدگي اختيار ڪندڙ شدت پسند گروپ جندالله واقعي جي ذميواري قبول ڪئي آهي جندالله جو ترجمان احمد مروت رائيٽرز سان ڳالهائيندي ڪراچي ۾ بس تي فائرنگ جي ذميواري قبول ڪئي آهي هن کان اڳ دهشتگرد صفوران چورنگي تي بس تي فائرنگ کان پوءِ داعش جا پمفليٽ اڇلائي فرار ٿي ويا هئا.

 

هر اهم مسئلي ۾ پارليامينٽ کي اعتماد ۾ ورتو، سخت فيصلا ڪرڻا پوندا: وزير اعظم

اسلام آباد (اين اين آءِ) وزيراعظم محمد نوازشريف ڪراچي ۾ بس تي فائرنگ جي واقعي جي سخت مذمت ڪندي چيو آهي ته هي واقعو پاڪستان ۾ ڏڦيڙ ڦهلائڻ جي ناڪام ڪوشش آهي ۽ دهشتگردن اهڙن ماڻهن کي ن NNI13-45
شانو بڻايو آهي جيڪي ڪڏهن به تڪراري ناهن رهيا دهشتگردن جو نشانو بڻيل محبت وطن ۽ پرامن ماڻهو آهن جن هميشه پاڪستان جي ترقي لاءِ ڪم ڪيو آهي هو اربع تي وزيراعظم هائوس ۾ پاڪ چين اقتصادي راهداري رٿا جي حوالي سان آل پارٽيز ڪانفرنس جي موقعي تي موجود ماڻهن سان ڳالهه ٻولهه ڪري رهيو هو ان کان اڳ قرآن پاڪ جي تلاوت کان پوءِ ايم ڪيو ايم جي خالد مقبولصديقي تجويز پيش ڪئي ته ڪراچي ۾ وڏو واقعو ٿيو آهي اڄ جي هن اجلاس کي ملتوي ڪري وزيراعظم نوازشريف اسان سان ڪراچي هلي جنهن تي وزيراعظم چيو ته هي نهايت ڳڻتي جوڳو واقعو آهي جو دهشتگرد پنهنجا ناپاڪ مقصد حاصل ڪرڻ لاءِ اهڙن ماڻهن جي چونڊ ڪئي جيڪي نهايت محب وطن ۽ پرامن ماڻهو آهن جن هميشه پاڪستان جي ترقي لاءِ اهم ڪردار ادا ڪيو آهي وزيراعظم چيو ته مان سمجهان ٿو ته هي يقينن پاڪستان ۾ ڏڦيڙ ڦهلائڻ ۽ هڪ ٻئي کي ويڙهائڻ جي ناپاڪ ڪوشش آهي اهڙن ماڻهن کي ملوث ڪيو پيو وڃي جيڪي ڪڏهن به تڪراري نه هئا وزيراعظم موجود ماڻهن کي چيو ته هو پنهنجي راءِ ڏين ته ڇا ميٽنگ کي مختصر ڪري ڪراچي وڃن چاهين ٿا ان تي پيپلزپارٽي جيڪو چيئرمين آصف علي زرداري وزيراعظم کي ٻڌايو ته سنڌ جي وڏي وزير کي ڪراچي اماڻيو ويو آهي وزيراعظم چيو ته زرداري صاحب کيس ٻڌايو ته سيد قائم علي شاهه کي فوري طور تي ڪراچي اماڻيو ويو آهي ان لاءِ هو هن ميٽنگ ۾ نظر نه پيو اچي وزيراعظم موجود ماڻهن کي چيو ته اسان جنهن مقصد لاءِ هتي گڏ ٿيا آهيون ان کي مختصر ڪيون ۽ پوءِڪراچي ۾ اوهان سان گڏ هلڻ لاءِ تيار آهيان سڀ هن واقعي تي ڏکايل آهن اسفنديارولي چيو ته اجلاس کي پاڪ چين اقتصادي راهداري منصوبي تي تفصيلي بريفنگ ڏني وڃي ڪراچي جو واقعو افسوسناڪ آهي سڀ هن واقعي تي ڏکايل آهن جهن تي وزيراعظم چيو ته جيڪو اڪثريت جو فيصلو آهي اهو منهنجو فيصلو آهي مولانا فضل الرحمان چيو ته منهنجي خيال ۾ اجلاس سڏائيجي چڪو آهي ڪنهن کي معلوم نه آهي ته ايندڙ ٻن ڏينهن ۾ هن جون ڇا مصروفيات آهن ڪراچي جو واقعو افسواناڪ آهي هي اجلاس بريفنگ لاءِ سڏايو ويو آهي ۽ بريفنگ هئڻ گهرجي. ان تي وزيراعظم اجلاس ۾ شريڪ سمورن اڳواڻن جو شڪريو ادا ڪندي چيو ته هن مشاورت سان مون کي خوشي ٿي آهي جو اسان سڀ گڏجي ويٺا آهيون هن کان اڳ به اهم قومي موضوعن تي پنهنجي راءِ ڏيون ٿا جيڪڏهن هي روايت بڻجي وڃي ته سٺو آهي ۽ ايندڙ دورن ۾ به ايئن ئي ٿيڻ گهرجي اسان جا خيال بلڪل مختلف هجن سڀني کي پنهنجي راءِ جو اظهار ڪرڻ گهرجي ۽ سمورا فيصلا گڏيل مشاورت سان ٿيڻ گهرجن. وزيراعظم چيو ته اهڻي جنهن مقصد لاءِ هي اجلاس سڏايو ويو آهي ان تي رٿابندي ۽ ترقيات جو وزير احسن اقبال تفصيلي بريفنگ ڏي ٿو ان سان گڏ ئي احسن اقبال اجلاس کي پاڪ چين اقتصادي راهداري منصوبي تي بريفنگ ڏني.

 

 

ڪراچي (اسٽاف رپورٽر) وزير اعظم نوازشريف چيو آهي ته دشمن پاڪستان کي معاشي طور تي ڪمزور ڪرڻ گهرن ٿا،ڪراچي جي معاشي ترقي کي روڪڻ دشمن جي ايجنڊا آهي. صفوران چورنگي سانحي جي حوالي سان اعليٰ سطحي اجلاس جي صدارت ڪندي وزير اعظم نوازشريف چيو ته دشمنن تي نظر رکڻ جي ضرورت آهي. هن چيو ته ڪراچي ،پاڪستان جو واپاري مرڪز آهي، هتي ٿيندڙ هر واقعو گهڻي اهميت رکي ٿو. هن چيو ته دهشتگردي جو مقابلو ڪندڙ سمورا سيڪيورٽي جا ادارا مقابلي لاءِ تيار آهن. هن چيو ته سموريون ڌريون ڪراچي شهر ۾ امن کي يقيني بنائڻ گهرن ٿيون. نوازشريف هدايت ڪئي ته ڪراچي ۾ پرامن ماڻهن ۽ عورتن کي نشانو بڻايو ويو. هن چيو ته جوابدارن جي گرفتاري لاءِ هر ممڪن ڪوشش ڪئي وڃي. وزير اعظم سوال پڇيو ته پابندي مڙهيل تنظيم خلاف ڪارروائي ڇو نه ڪئي وئي. هن چيو ته انٽيليجنس شيئرنگ کي وڌيڪ موثربڻايو وڃي. اجلاس ۾ اڳوڻي صدر آصف علي زرداري، بچاءَ جي وزير خواجا آصف، آرمي چيف جنرل راحيل شريف سنڌ جي وڏي وزير سيد قائم علي شاهه، گورنر سنڌ ڊاڪٽر عشرت العباد، ايم ڪيو ايم جي ڊاڪٽر فاروق ستار،خالد مقبول صديقي ۽ آءِ جي سنڌ غلام حيدر جمالي شرڪت ڪئي. ان کانسواءِ ڊي جي آءِ ايس آءِ رضوان اختر ،ڪور ڪمانڊر ڪراچي ليفٽيننٽ نويد مختار ۽ ڊي جي رينجرز ميجر جنرل بلال اڪبر شريڪ ٿيا. اجلاس ۾ وزير اعظم نواز شريف کي صفوران سانحي تي بريفنگ ڏني وئي.

 

ڪراچي سانحي ۾ ملوث دهشتگردن کي هر صورت ۾ پڪڙيو ويندو: آرمي چيف

ڪراچي (اسٽاف رپورٽر) آرمي چيف کي ڪورڪمانڊر ڪراچي ۽ ڊي جي رينجرز صفوران چورنگي سانحي جي حوالي سان بريفنگ ڏني. اموقعي تي اجلاس ۾ ڊي جي آئي ايس آئي به موجود هو. ڪور هيڊ ڪواٽرز ڪراچي ۾ آرمي چيف جي صدارت هيٺ اهم اجلاس ٿيو، اجلاس ۾ صفورا ڳوٺ واقعي سوڌو شهر ۾ امن امان جي صورتحال تي غور ڪيو ويو.صفورا ڳوٺ واقعي کانپوءِ آرمي چيف جنرل راحيل شريف پنهنجون سموريون مصروفيتون ۽ سري لنڪا جو دورو پڻ منسوخ ڪري ڇڏيو ۽ ڪراچي پهچي ويو. آرمي چيف سان گڏ ڪور ڪمانڊر ڪراچي، ڊي جي آءِ ايس آئي ليفٽيننٽ جنرل رضوان اختر به آهن. آرمي چيف جي صدارت هيٺ هلندڙ اجلاس ۾ ڪراچي جي امن امان ۽ بس تي فائرنگ  جي واقعي جو جائزو ورتو ويو.ذريعن مطابق اجلاس ۾ دهشتگردن جو خاتمو ڪرڻ لا3 سخت قدم کڻڻ جو فيصلو ڪيو ويو آهي، هاڻي دهشتگردن ۽ ٻين ڏوهارين کي ڪا به ڇوٽ نه ملندي .

 

معصوم شهرين کي بيدردي سان قتل ڪندڙ جو اسلام سان ڪو واسطو نه آهي: پرويز رشيد

اسلام آباد (اين اين آءِ) سڌسماءَجي وفاقي وزير سينيٽر پرويز رشيد ڪراچي ۾ بس تي فائرنگ کي شرمناڪ ڪوٺيندي چيو ته آهي ته بزدلاڻا واقعا دهشتگردي جي خلاف عزم کان پوئتي نٿا هٽائي سگهجن وفاقي وزير اسلام آباد ۾ ميڊيا سان ڳالهائيندي ڪراچي ۾ بس تي فائرنگ جي واقعي جي مذمت ڪئي آهي هن چيو ته واقعو شرمناڪ ۽ بزدلاڻي ڪارروائي آهي اهڙا واقعا دهستگردي خلاف عزم کان پوئتي نٿا هٽائي سگهجي پرويز رشيد چيو ته دهشتگردن پرامن اسماعيلي برادري کي نشانو بڻايوهي ڪميونٽي پاڪستان جي خدمت ڪري ٿي قاتلن جو ڪنهن مذهب سان ڪو تعلق نه آهي پرامن مڻهن کي نسانو بڻائڻ خطرناڪ ڪارروائي آهي پرويز رشيد چيو ته آپريشن ضرب عضب ۽ ڪراچي آپريشن دهشتگردن جي چيلهه چٻي ڪري ڇڏي آهي ۽ پاڪستان جي سرزمين تائين آخري دهستگرد جي خاتمي تائين آپريشن جاري رهندو.

 

فوتين لاءِ 5 لک ۽ زخمين کي 2 لک ڏيڻ جو اعلان، دهشتگردي جو واقعو امن خراب ڪرڻ جي سازش آهي:وڏو وزير

ڪراچي (اسٽاف رپورٽر) سنڌ حڪومت، ڪراچي واقعي ۾ مارجي ويلن جي وارثن لاءِ 5 – 5 لک ۽ زخمين کي 2 – 2 لک رپيا امداد ڏيڻ جو اعلان ڪري ڇڏيو، وڏي وزير سيد قائم علي شاهه چوڻ آهي ته دهشتگردي جو واقعو امن خراب ڪرڻ جي سازش آهي، ملوث جوابدارن کي قانون جي ڪٽهڙي ۾ آندو ويندو. سنڌ جَي وڏي وزير سيد قائم علي شاهه صفوران چورنگي واقعي جو سختيءَ سان نوٽيس وٺي ڇڏيو. وڏي وزير آءِ جي سنڌ پوليس غلام حيدر جمالي کي حڪم ڏنو ته واقعي جي جاچ ڪري رپورٽ پيش ڪئي وڃي. سيد قائم علي شاهه، آءِ جي سنڌ کي اهو به حڪم جاري ڪيو ته لاڳاپيل ڊي ايس پي ۽ ايس ايڇ او کي بنا دير معطل ڪيو وڃي. اسلام آباد ۾ ميڊيا سان ڳالهائيندي وڏي وزير سيد قائم علي شاهه مارجي ويلن جي وارثن کي 5 – 5 لک رپيا ۽ زخمين کي 2- 2 لک رپيا امداد ڏيڻ جو اعلان ڪيو. قائم علي شاهه چيو ته صفوران چورنگي واقعي ۾ ملوث دهشتگردن کي جلد گرفتار ڪري قانون جي ڪٽهڙَي ۾ آندو ويندو. وڏي وزير چيو ته دهشتگردي جو واقعو سوچيل سمجهيل سازش آهي ۽ اهو امن خراب ڪرڻ جي ڪوشش آهي.

 

ڪراچي ۾ دهشتگردي: تحريڪ انصاف سنڌ جي وڏي وزير کان استعيفيٰ جو مطالبو ڪري ڇڏيو

اسلام آباد (اين اين آءِ) پاڪستان تحريڪ انصاف سنڌ جي وڏي وزير کان استعيفا جو مطالبو ڪندي چيو ته ڪراچي ۾ بس تي دهشتگردي جي خطرناڪ واقعي کان پوءِ پيپلزپارٽي قائم علي شاهه جي جڳهه ڪنهن فعال شخص کي عهدو ڏي هڪ بيان ۾ ڪراچي ۾ اسماعيلي ڪميونٽي جي بس تي بدترين دهشتگرد حملي تي مذمت جو اظهار ڪندي شاهه محمود قريشي چيو ته فائرنگ جو واقعوسنڌ حڪومت جي مڪمل ناڪامي آهي سنڌ جو وڏو وزير جلد استعفيٰ ڏي ڪراچي ۾ ڪائي قيادت نظر نٿي اچي پيپلزپارٽي ڪنهن فعال شخص کي عهدو ڏي هن چيو ته ٽارگيٽيڊ آپريشن ۾ رينجرز سٺو ڪردار ادا ڪيو ڌوهاري ماڻهو ۽ ٽارگيٽ ڪلرز سميت ڪيترائي دهشتگرد گرفتار ڪيا پر ان جي رستي ۾ ڪراچي جي سياست وڏي رنڊڪ آهي.

 

پاڪ چين اقتصادي راهداري جي حوالي سان پارليامينٽ جي گڏيل ڪميٽِي جوڙي ويندي: پ پ

اسلام آباد (اين اين آءِ) پيپلز پارٽي چيو آهي ته پاڪ چين اقتصادي راهداري جي حوالي سان پارليامينٽ جي گڏيل ڪميٽي جوڙي ويندي، منصوبي جي نگراني ڪندي، ڪنهن جي فنڊ وٺڻ ۽ ڏيڻ سان پاڪ چين اقتصادي لنگهه جي منصوبي تي ڪو به فرق نه پوندو، اها ڳالهه سينيٽ ۾ چوڌري اعتزاز احسن ۽ سيد خورشيد شاهه پاڪ چين اقتصادي راهداري رٿا بابت بريفنگ کانپوءِ ميڊيا سان ڳالهائيندي ڪئي، اعتزاز احسن چيوته پاڪ چين اقتصادي رٿا بابت اڄ وزيراعظم اي پي سي ۾ وزيراعظم پاڪستانجي مودگي ۾ وفاقي وزير احسن اقبال تفصيلي بريفنگ ڏني ۽ ان جي نقطن تي تفصيلي بريفنگ ڏني، ان حوالي سان پارليامينٽ جي گڏيل ڪميٽي جوڙي ويندي جيڪا رٿا جي نگراني ڪندي، هن چيو ته اقتصادي راهداري رٿا جي روٽ تي ڪجهه جماعتن جا خدشا هئا، ان تي بريفنگ رهيل هئي ته ڪراچي سانحو ٿيو جنهن سان پوري قوم ڏکائجي وئي، هن چيو ته واقعي کانپوءِ آصف علي زرداري ڪراچي روانو ٿي ويو، وزيراعظم به ڪراچي وڃي رهيو آهي، اعتزاز احسن چيو ته روٽ جي تبديلي بابت بريفنگ بعد ۾ ڏني ويندي، سيد خورشيد شاهه چيو ته ڪنهن جي فنڊ وٺڻ يا ڏيڻ سان رٿا تي ڪو به فرق نه پوندو، اڄ سڀ متفق هئا سي هن منصوبي بابت پارلياماني ڪميٽي جوڙي وڃي جيڪا مسئلي تي غور ڪندي، هن چيو ته اڄ ڪراچي ۾ بي گناهه ڪميونٽي کي نشانو بڻايو ويو، شاهه محمود قريشي ميڊيا سان ڳالهائيندي چيو ته 3 سوال رکيا آهن، اسان جا سوال جيئن جو تئين موجود آهي، اسفند يار ولي چيو ته رٿا بابت اسان جا خدشا دور ناهن ٿيا، وزيراعظم ٻيهر اجلاس ڪوٺرائڻ لاءِ چيو آهي.

 

 

 

 

صفورا ڳوٺ سانحو: چوڌري نثار جو ڊي جي رينجرز سنڌ سان ٽيليفون تي رابطو، واقعي جا تفصيل ورتا

ڪراچي (اسٽاف رپورٽر) ڊي جي رينجرز بس حملي  جي دهشتگردن کي جلد گرفتار ڪرڻ جو يقين ڏياريو. تفصيل موجب وفاقي  گهرو وزير چوڌري نثار  علي خان ڊي جي رينجرز سنڌ سان ٽيليفون تي رابطو ڪيو. جنهن دوران  رينجرز عملدار بس حملي جي بريفنگ پڻ  گهرو وزير کي ڏني. ڊي جي رينجرز سنڌ هلال اڪبر  گهرو وزير کي ٻڌايو ته اڃا تائين حاصل ٿيندڙ شاهدن  جي مدد سان دهشتگردن کي جلد گرفتار ڪيو ويندو. قانو نافذ ڪرڻ وارا ادارا پنهنجي ڪم ۾  مصروف آهن.

 

ڪراچي وارا هٿيارن جا لائسنس وٺي پنهنجي حفاظت جو بندوبست پاڻ ڪن:الطاف حسين

لنڊن (م.ڊ) ايم ڪيو ايم جي سربراهه الطاف حسين صفورا چورنگي جي ويجهو بس تي فائرنگ جي مذمت ڪئي آهي.برطانيا ۾ رهندڙ ايم ڪيو ايم جي سربراهه پنهنجي بيان ۾ چيو ته بس تي فائرنگ جو واقعو بدترين دهشتگردي آهي.هن جو چوڻ هو ته ڪراچي ۾ طالبان ۽ داعش موجود آهي آهن،ان حوالي سان مان پهرين به چوندو آيو آهيان پر ڪنهن کي به يقين نه آيو.هن جو وڌيڪ چوڻ هو ته داعش ۽ طالبان جي ماڻهن صفورا ڳوٺ ۾ بس تي حملو ڪيو، حملو ڪندڙن داعش جا پمفليٽ اڇليا. ايم ڪيو ايم جي سربراهه وڌيڪ چيو ته ڪراچي وارا هٿيارن جا لائسنس ٺهرائي ڇڏين ۽ پنهنجي حفاظت جو بندو بست پاڻ ڪن.الطاف حسين سيڪيورٽي ادارن  کي تنقيد جو نشانو بڻائيندي چيو ته ڪراچي ۾ دهشتگردن تمام گهڻي ظالماڻا انداز سان شهرين کي نشانو بڻائي رهيا آهن، دهشتگرن بدران ايم ڪيو ايم جي ڪارڪنن کي گرفتار ڪيو پيو وڃي.هن نوازشريف ۽ سيد قائم علي شاهه کي صلاح ڏني ته وزيراعظم ۽ وزيراعليٰ سنڌ، وچ ۾ ايندڙ رڪاوٽن جو قوم کي ٻڌائين نه ته استعيفيٰ ڏئي ڇڏين.هن ميڊيا تي به سخت تنقيد ڪئي ۽ چيو ته ڪجهه تجزيا نگار ۽ پروگرام اينڪرز پاڻ طالبان آهن پر ڪلين شيو ٿي ٽي وي تي ويٺا آهن. هن اپيل ڪئي ته ٽرانسپورٽرز، تاجر، صنعتڪار سوڳ ۾ ڪاروبار بند رکن ۽ ڏکويل خاندانن سان ٻڌي جو اظهار ڪن.

 

عمران خان ۽ ٻين پي ٽي آءِ اڳواڻن طرفان ڪراچيءَ ۾ بس مٿان ٿيل دهشتگرد حملي جي مذمت

لاهور(اي پي پي) پاڪستان تحريڪ انصاف جي چيئرمين عمران خان پي ٽي آءِ اڳواڻ اعجاز چوڌريءَ سميت ٻين اڳواڻن ڪراچي سفوران چورنگيءَ تي اربع ڏينهن بس مٿان ٿيل دهشتگرديءَ جي مذمت ڪئي آهي ۽ ملوث دهشتگردن جي گرفتاريءَ جو مطالبو ڪيو آهي. دل ڏکوئيندڙ واقعي تي عمران خان چيو ته حڪومت ان افسوسناڪ واقعي تي فوري ڪارروائي ڪري ۽ جاچ کانپوءِ ذميوارن خلاف سخت قدم کنيو وڃي. پي ٽي آءِ پنجاب جي صدر اعجاز چوڌري واقعي تي افسوس جو اظهار ڪندي دهشتگردن کي ڪيفر ڪردار تائين پهچائڻ جو مطالبو ڪيو آهي. هنن واقعي ۾ شهيد ٿيلن لاءِ فاتحه خواني ۽ پونئيرن سان تعزيت جو اظهار ڪيو