تازيون خبرون

Daily Archives: May 13, 2015

افغانستان جا دشمن پاڪستان جا دوست نٿا ٿي سگهن: نواز شريف/اشرف غني

ڪابل (مانيٽرنگ ڊيسڪ) وزير اعظم نواز شريف ۽ افغان صدر  اشرف غني چيو آهي ته دهشتگردن ٻنهي ملڪن کي وڏو نقصان پهچايو آهي، کين اميد آهي ته  گڏجي شدت پسندن جو خاتمو آندو ويندو. ڪابل ۾ افغان صدر اشرف غني سان گڏيل پريس ڪانفرنس ڪندي نواز شريف چيو ته افغانستان جا دشمن پاڪستان جا دوست نه ٿا ٿي سگهن. هن چيو ته هر ڏکئي وقت ۾ ٻنهي ملڪن هڪ ٻئي جو ساٿ ڏنو آهي. نواز شريف چيو ته هو جڏهن به افغانستان ايندو آهي ته کيس خوشي ٿيندي آهي. هن چيو ته دهشتگردي جي خاتمي تائين خطي ۾ امن ۽ استحڪام نه ٿيندو. نواز شريف جو چوڻ هو ته سٺي مهمان نوازي ڪرڻ تي هو افغان صدر ۽ اختيارين جا ٿورائتا آهن. ان موقعي تي افغان صدر اشرف غني چيو ته  دهشتگردي پاڪستان ۽ افغانستان کي نقصان پهچايو آهي. هن چيو ته هو خطي مان دهشتگردي جي خاتمي لاءِ پرعزم آهن. اشرف غني چيو ته دهشتگردي جي خاتمي لاءِ ٻنهي ملڪن کي گڏجي ڪم ڪرڻو پوندو. افغان صدر جو چوڻ هو ته پاڪستان ۽ افغانستان کي ساڳيائي خطرا درپيش آهن ۽کيس ٻنهي ملڪن جو مستقبل روشن نظر اچي رهيو آهي. ٻئي طرف وزيراعظم نوازشريف ۽ آرمي چيف جنرل راحيل شريف جو افغانستان پهچڻ تي افغان پرڏيهي وزير صلاح الدين استقبال ڪيو اکاري تي وزيراعظم محمد نوازشريف آرمي چيف جنرل راحيل شريف سان گڏ افغانستان ايئرپورٽ تي پهتو افعان پرڏيهي وزير ان جو استقبال ڪيو وزيراعظم جي وفد ۾ ناڻي وزير اسحاق ڊار وزيراعظم جو صلاحڪار سرتاج عزيز وزيراعظم جو معاون خاص طارق فاطمي ۽ پرڏيهي سيڪريٽري اعزاز احمد چوڌري سميت ٻيا سينيئر عملدار به شامل هئا ان موقعي تي وزيراعظم کي گارڊ آف آرنر به پيش ڪيو ويو.

 

پاڪ-برطانيه وچ ۾ جوابدارن جي حوالگي جو ٺاهه حتمي مرحلي ۾ داخل

اسلام آباد (بيورو) پاڪستان ۽ برطانيا جي وچ ۾ جوابدارن جي حوالي ڪرڻ جو ٺاهه حتمي مرحلي ۾ داخل ٿي ويو آهي. ذريعن مطابق جوابدار حوالي ڪرڻ جي ٺاهه جو دستاويز قانوني صلاح مشوري لاءِ لاڳاپيل برطانوي کاتي جي حوالي ڪيو ويو آهي. پاڪستان ۽ برطانيا جلد دستاويزن جي مٽاسٽا ڪندا. ذريعن مطابق ٺاهه تحت پهريون جوابدار عمران فاروق قتل ڪيس ۾ ملوث جوابدار معظم علي خان هوندو. معظم علي خان جي جوائنٽ انويسٽي گيشن ٽيم جي رپورٽ به برطانوي حڪومت کي ملي وئي آهي. وزير اعظم نوازشريف جي تازي برطانيا جي دوري دوران جوابدارن کي حوالي ڪرڻ جي اصولي ٺاهه تي اتفاق ٿي ويو. ان حوالي سان گهرو وزير چوڌري نثار علي خان سان برطانيا مان اهم شخصيت ملاقات ڪئي آهي، جيڪا ان سلسلي جي ڪڙي آهي. ذريعن مطابق ٻنهي اڳواڻن ان اهم ملاقات ۾ ڊاڪٽر عمران فاروق قتل ڪيس ۾ اڳڀرائي تي خيالن جي ڏي وٺ ڪئي آهي. برطانيا جي جاچ ٽيم ۾ اسڪاٽ لينڊ يارڊ، عمران فاروق قتل ڪيس جو انچارج پوليس ڪمانڊر، سيريس اينڊ آرگنائيزڊ ڪرائم انويسٽي گيشن ايجنسي ۽ نيشنل ڪرائم ايجنسي جا اهلڪار به شامل آهن

 

حڪومت آئيني ۽ قانوني مطالبا مڃيندي آهي: پرويز رشيد

اسلام آباد (بيورو) وفاقي وزير پرويز رشيد چيو آهي ته  حڪومت آئيني ۽ قانوني مطالبا مڃيندي آهي، ڪي پي ڪي سرڪار بجلي پيدا ڪرڻ ۾ ناڪام وئي آهي. خيبر پختونخوهه اسيمبلي جي ميمبرن جي پارليامينٽ هائوس ٻاهران ڌرڻي جي رد عمل ۾ پرويز رشيد چيو ته جنهن پارليامنيٽ کي ڪيرائڻ جي ڪوشش ڪئي وئي اڄ ان کان ئي مطالبا ڪيا پيا وڃن. هن چيو ته ڪي پي ڪي جي حڪومت ترقياتي بجيٽ مان 40 سيڪڙو رقم به خرچ نه ڪري سگهي آهي. وفاقي وزير چيو ته عمران خان کي ڪنهن چيو ته بجلي جو هڪ يونٽ به پيدا نه ڪري. پرويز رشيد جو چوڻ هو ته هو قانون جي دائري ۾ ايندڙ مطالبا تسليم ڪندا.

 

وفاق ۽ خيبرپختونخواهه حڪومت ۾ ڳالهيون ڪامياب، پارليامينٽ هائوس آڏو لڳل ڌرڻو ختم

اسلام آباد (بيورو) وفاق ۽ خيبرپختونخواهه حڪومت ۾ ڳالهين جي ڪاميابي کان پوءِ پارليامينٽ هائوس آڏو لڳل ڌرڻو ختم ڪيو ويو، بجلي لوڊشيڊنگ، رائلٽي ۽ گوادر ڪاشغر روٽ سميت ٻيا بنيادي مسئلا حل ڪرڻ لاءِ هڪ هفتي جي مهلت ڏيڻ تي اتفاق ڪيو ويو، خواجه آصف چيو  آهي ته هو خدشا ختم ڪرڻ لاءِ تيار آهن. وفاق پاران ميگا پراجيڪٽس ۾ نظرانداز ڪرڻ خلاف خيبرپختونخواهه جي وڏي وزير جي اڳواڻي ۾ پارليامينٽ هائوس آڏو ڌرڻو هنيو ويو  جتي پوليس ۽ ايم پي اي ايز هڪ ٻئي جي هٿين پئجي ويا. وفاق پاران ميگا پراجيڪٽس ۾ ڪي پي ڪي کي نظر انداز ڪرڻ خلاف خيبر پختونخواهه جي وڏي وزير پرويز خٽڪ جي اڳواڻي ۾ ڪي پي ڪي جي ايم پي ايز جي نڪتل ريلي پارليامينٽ هائوس آڏو پتي جتي ڌرڻو هنيو ويو . ڪي پي ڪي جي وڏي وزير ۽ ايم پي ايز پارليامنٽ هائوس وڃڻ جي ڪوشش ڪئي ته کين گيٽ وٽ روڪيو ويو. احتجاج ڪندڙن کي روڪڻ لاءِ پوليس ۽ ايف سي جي وڏي نفري پارليامنٽ هائوس اڳيان مقرر ڪئي وئي. پارليامنيٽ هائوس ۾ داخل ٿيڻ جي ڪوشش دوران پي ٽي آءِ ايم پيز ۽ پوليس اهلڪار هٿين پئجي ويا ۽ سخت جملن جي ڏي وٺ پڻ ٿي. پي ٽي آءِ ميمبر ۽ پوليس اهلڪارن ۾ منهن ماري کان پوءِ وفاقي وزير خواجه آصف ڳالهين لاءِ پي ٽي آءِ جي احتجاج  ۾ پهچي ويو. وفاقي وزير خواجه آصف ۽ ڪي پي ڪي جي وڏي وزير پرويز خٽڪ وچ ۾ ڪامياب ڳالهين کان پوءِ پارليامينٽ هائوس اڳيان لڳل ڌرڻو ختم ڪيو ويو. وفاق ۽ ڪي پي ڪي سرڪار وچ ۾ مسئلا حل ڪرڻ لاءِ هڪ هفتي جي مهلت ڏيڻ تي اتفاق ڪيو ويو. ان موقعي تي ميڊيا سان ڳالهائيندي خواجه آصف چيو ته صوبن جا خدشا ختم ڪرڻ وفاق جو فرض آهي. هن چيو ته ڪي پي ڪي حڪومت جا بنيادي مسئلا هڪ هفتي اندر حل ڪيا ويندا. وفاقي وزير چيو ته هن سيپڪو اختيارين کي طلب ڪيو آهي ۽ مسئلي جو حل گڏجي ڪڍيو ويندو. ان موقعي تي ڪي پي ڪي جي وڏي وزير پرويز خٽڪ جو چوڻ هو ته لڳ ڀڳ سندن سمورا مسئلا حل ٿي چڪا آهن رڳو کين نوٽيفڪيشن جاري ٿيڻ جو انتظار آهي. هن چيو ته وفاقي سرڪار کي مسئلا حل ڪرڻ لاءِ هڪ هفتي جي مهلت ڏيڻ تي اتفاق ڪيو ويو آهي. وڏي وزير جو چوڻ هو ته سندن وڏي ۾ وڏو مسئلو بجلي لوڊشيڊنگ رائلٽي ۽ گوادر ڪاشغر روٽ آهي. پرويز خٽڪ چيو ته کين سستي بجلي مهانگي ڪري ڏني پئي وڃي، واپڊا ۾ چور داخل ٿي ويا آهن. ڪي پي ڪي جي وڏي وزير جو چوڻ هو ته هو پنهنجي حقن لاءِ روڊن تي نڪتا. پرويز خٽڪ جو چوڻ هو ته جيڪڏهن سندن مطالبا نه مڃيا ويا ته سڄو صوبو  احتجاج ڪندو.

 

سنڌ اسيمبلي ۾ متحده ايم پي ايز ڪراچي کي ترقي ڏيارڻ لاءِ وڌيڪ رٿائون شروع ڪرڻ جو مطالبو ڪري ڇڏيو

ڪراچي (اسٽاف رپورٽر) سنڌ اسيمبلي ۾ متحده ايم پي ايز  ڪراچي کي ترقي ڏيارڻ لاءِ وڌيڪ رٿائون شروع ڪرڻ جو مطالبو ڪيو آهي، پ پ ايم پي اي سڪندر شوري چيو آهي ته سنڌ کي شهري ۽ ٻهراڙي ۾ ورهائي سياست نه چمڪائي وڃي،  ايم پي ايز  فنڊز جاري نه ڪرڻ تي وفاقي سرڪار تي به سخت  تنقيد ڪئي آهي. سنڌ اسيمبلي جو اجلاس اسپيڪر آغا سراج دراني جي صدارت هيٺ ٿيو، اڄ ٻئي ڏينهن به   بجيٽ خرچن ۽ نئين مالي سال جي بجيٽ تجويزن تي بحث دوران متحده جي ايم پي ايز پاران فنڊز جاري نه ٿيڻ ۽ ترقياتي اسڪيمن ۾ نظر انداز ڪرڻ جون شڪايتون ڪيون ويون.  متحده جي محمد حسين چيو ته سالياني ترقياتي پروگرام ۾ ڪراچي لاءِ 25 ارب رپين جون اسڪيمون ظاهر ڪيون ويون، روڊن جي تعمير لاءِ 5 سئو 88 ملين رپيا رکيا ويا، پر رقم رڳو 42 سيڪڙو جاري ڪئي وئي. هن چيو ته ڪراچي ۾ پاڻي بحران اوچتو ڪر ناهي کنيو ۽پاڻي جي 70 اسڪيمن تي هلندڙ سال ڪم شروع نه ڪيو ويو آهي. محمد حسين چيو ته پنجاب حڪومت لاهور جي ترقي تي اربين رپيا خرچ ڪري ٿي،سنڌ سرڪار کي به ڪراچي کي اون ڪرڻ گهرجي، پ پ ايم پي اي غزالا سيال وفاق پاران رهتون جاري نه ڪرڻ تي سخت تنقيد ڪندي فوري طور رهتون ڏيڻ جو مطالبو ڪيو. فنڪشنل ليگ جي وريام فقير خاصخيلي چيو ته سنڌ جي ترقي ڪاغذن تائين محدود آهي ۽ زراعت جي تباهي تي حڪومت جي خاموشي ظلم آهي. هن چيو ته سنڌ ۾ ڪرپشن 10 ۽ 20 سيڪڙو نه پر  100 سيڪڙو ٿي وئي آهي. اجلاس دوران متحده  ايم پي ايز  ڪراچي کي ترقي ڏيارڻ لاءِ وڌيڪ رٿائون شروع ڪرڻ جو مطالبو ڪيو . متحده جي ظفر ڪمالي چيو ته ميرپورخاص کي تعليم ۽ صحت جي معاملي ۾ پوئتي  رکيو ويو آهي، اسپتالن ۾ نه ماهر ڊاڪٽر آهن نه دوائون ۽ نه ئي وري مشينري آهي. ظفرڪمالي چيو ته گهرو کاتي جي 65 سيڪڙو بجيٽ خرچ ٿيڻ باوجود پوليس موبائلن کي ڌڪا ڏنا وڃن ٿا. هن چيو ته ميرپورخاص کي هڪ ارب روپين جي پيڪيج مان ڪجهه نه مليو، پ پ نمائندا ان زيادتي تي خاموش آهن، جنهن تي خيرالنساءُ مغل احتجاج ڪندي ڳالهائڻ جي ڪوشش ڪئي، پر اسپيڪر کيس ڳالهائڻ جي اجازت نه ڏني. متحده جي ديوان چند چيو ته سکر جي حالت خراب آهي ۽ رکيل رقم مان رڳو 16 سيڪڙو رقم خرچ ڪئي وئي آهي. پ پ جي سڪندر شوري چيو ته سنڌ کي شهري ۽ ٻهراڙي ۾ ورهائي سياست نه چمڪائي وڃي، صوبي جي بجيٽ جو 51 سيڪڙو شهرن تي خرچ ٿئي ٿو.

 

نيپال ۾ ٻيهر زلزلو، 42 ڄڻا فوت، 150 کان وڌيڪ ماڻهو زخمي

کٽمنڊو (مانيٽرنگ ڊيسڪ) نيپال ۾ هڪ ڀيرو ٻيهر آيل زلزلي سبب 42 ڄڻا فوت ۽ ڏيڍ سئو کان وڌيڪ زخمي ٿي پيا، جڏهن ته ڀارت ۾ به زلزلي سبب 10 ڄڻن جي فوت ٿيڻ جا اطلاع مليا آهن. آمريڪي جيالاجيڪل سروي موجب نيپال جي گادي واري شهر کٽمنڊو ۾ زلزلي جا لوڏا محسوس ڪيا ويا جنهن جي شدت ريڪٽر اسڪيل تي 7 ڏهائي 4 رڪارڊ ڪئي وئي. زلزلي جو مرڪز مائونٽ ايوريسٽ ويجهو نامچي باراز وارو علائقو ۽ زمين ۾ ان جي گهرائي 60 ڪلو ميٽر رڪارڊ ڪئي وئي. پرڏيهي خابرو اداري موجب زلزلي سبب عمارتون ڪِرڻ جي نتيجي ۾ 29 ڄڻا فوت ۽ ڏيڍ سئو کان وڌيڪ زخمي ٿي پيا آهن جڏهن ته عمارتن جي ڍير مان ماڻهن کي ڪڍڻ لاءِ امدادي ڪارروائين جو سلسلو شروع ڪيو ويو آهي. ٻئي طرف زلزلي جا جهٽڪا ڀارت جي گادي واري شهر نئين دهلي، پٽنا ۽ آسام ۾ به محسوس ڪيا ويا جتي 10 کان وڌيڪ ماڻهن جي فوت ٿيڻ جا اطلاع آهن. ياد رهي ته گذريل مهيني به نيپال ۾ 7 ڏهائي 9 جي شدت سان آيل زلزلي سبب 8 هزار کان وڌيڪ ماڻهو فوت ۽ هزارين زخمي ٿي پيا هئا.

 

اڳوڻين حڪومتن صوبن کي مفت بجلي ڏئي انهن جي عادت خراب ڪري ڇڏي، هاڻي ائين نه ٿيندو: عابد شير علي

حيدرآباد (بيورو) پاڻي ۽ بجلي واري مملڪتي وزير عابد شير علي چيو آهي ته اڳوڻين حڪومتن صوبن کي مفت بجلي ڏئي انهن جي عادت خراب ڪري ڇڏي آهي.پر هاڻي ائين نه ٿيندو. صوبن کي بجلي جون بقايائون ڏيڻيون پونديون نه ته اسان بجلي ڪٽڻ تي مجبور ٿي وينداسون. حيسڪو هيڊ ڪوارٽر حيدرآباد ۾ حيسڪو جي هڪ اعليٰ سطحي اجلاس بعد پريس ڪانفرنس کي خطاب ڪندي هن چيو ته اڳوڻين حڪومتن صوبن کي مفت بجلي فراهم ڪئي ۽ عوام کي مهانگي بجلي فراهم ڪئي جڏهن ته موجوده حڪومت عوام لاءِ پوڻا 6 رپيا في يونت بجلي سستي ڪري عوام کي رليف فراهم ڪيو آهي. هن چيو ته صوبا بجلي جون بقايائون جمع نه پيا ڪرائين ۽ نه ئي بجلي چورن خلاف ڪارروائي ۾ اسان سان سهڪار ڪري رهيا آهن. سنڌ ۾ بجلي چوري جي ايف آءِ آر داخل نٿي ڪئي وڃي ۽ نه ئي پوليس سهڪار ڪري ٿي. هن چيو ته هن وقت سنڌ تي 90 ارب رپين کان وڌيڪ جون بقايائون آهن اهڙي ريت بلوچستان تي 140 ارب، ڪي پي ڪي تي 110 ارب، آزاد ڪشمير تي 48 ارب رپيا ۽ پنجاب جي مختلف ڪمپنين تي 38 ارب رپين کان وڌيڪ جون بقايائون آهن. هن چيو ته سنڌ جي وڏي وزير ۽ سنڌ جي ناڻي واري وزير سان ڳالهين بعد مفاهمتي طور تي انهن کي هلندڙ سال 12 ارب رپيا حيسڪو ۽ سيپڪو کي ادا ڪرڻا هئا. پر انهن اها رقم جمع نه ڪرائي اسين بجلي بند ڪرڻ جو چئون ٿا ته مختلف قسمن جون ڌمڪيون ملن ٿيون. هن چيو ته هاڻي قد کان وڌندو پيو وڃي. هن چيو ته ڊيرا غازي خان ۾ هڪ ارب رپين جون بقايائون نه پئي ڏنيون ويون اسان انهن کي چيو ته بدمعاشي نه هلندي ۽ اسان پوري ڊويزن جي بجلي بند ڪري ڇڏي جيڪڏهن سنڌ ۾ ڪارروائي هلي پئي ته پنجاب ۾ به ڪنهن بخش نه پيو ڪيو وڃي. هن چيو ته صوبا سهڪار نه ڪندا ته بجلي بحران تي تڪڙو ضابطو اچڻ تمام گهڻو ڏکيو آهي. سنڌ حڪومت کي هاءِ ڪورٽ به حڪم ڏئي چڪي آهي پر 12 ارب رپيا ادا نه پيا ڪيا وڃن ۽ موجوده بل جمع نه پيا ڪرايا وڃن مجبورن اسان کي ڪجهه ڪرڻُو پوندو. هن چيو ته جن علائقن ۾ 30 سيڪڙو کان وڌيڪ خسارو هوندو اتي بجلي جي لوڊ شيڊنگ ۾ به اضافو ڪيو ويندو. هن چيو ته واپڊا ڪو خيراتي ادارو ناهي بجلي ڏينداسين ته بل به وٺنداسين هن ٻڌايو ته سيوهڻ جي اي سي (واپڊا) عبدالستار ميمڻ کي هڪ مهيني اندر 20 ڪروڙ رپين جو نقصان پهچائڻ تي هن اڄ ئي هن کي معطل ڪيو آهي ۽ ان سلسلي ۾ وڌيڪ جاچ ڪئي پئي وڃي جتي جتي بجلي چوري ڪرائي پئي وڃي ان ۾ بنا شڪ جي حيسڪو ۽ سيپڪو جو عملو ملوث آهي انهن خلاف ڪارروائيون جاري آهن. هڪ سوال جي جواب ۾ هن چيو ته سنڌ کي مفاهمتي ڳالهين تحت حيسڪو کي 8 ارب رپيا ۽ سيپڪو کي 4 ارب رپيا ادا ڪرڻا آهن پر اهي نه پيا ڏنا وڃن. هن چيو ته حڪومت چين جي سهڪار سان بجلي جا نوان منصوبا شروع ڪري رهي آهي. بهاولپور ۾ پنجاب حڪومت شمسي توانائي سان بجلي پيدا ڪرڻ وارو منصوبو شروع ڪيو آهي. اهڙي ريت سنڌ ۽ ٻين صوبن ۾ به شمسي توانائي ۽ ونڊ پاور وارا منصوبا شروع ڪيا پيا وڃن. هن چيو ته سنڌ حڪومت ۽ هنن هڪ معاهدي تي صحيح ڪئي آهي جنهن تحت ٿر جي ڪوئلي مان 660 ميگاواٽ بجلي پيدا ڪئي ويندي. عابد شير علي چيو آهي ته 2015ع ملڪ ۾ چونڊن نه پر پي ٽي انٽرا اليڪشن جو سال آهي، مسلم ليگ (ن) جي مينڊيٽ جي توهين برداشت نه ڪئي ويندي. اسان تي ڌانڌلين جو الزام هڻندڙ ٻڌائين ته ڪنٽونمينٽ چونڊن ۾ عوام هنن کي ڇو رد ڪري ڇڏيو. عمران خان سان هٿ ملائڻ گناهه سمجهان ٿو هو لڳاتار ڪوڙ ڳالهائي رهيو آهي ۽ توهين عدالت جو مرتڪب پڻ آهي چيف جسٽس آف پاڪستان کي ان جو نوٽيس وٺڻ گهرجي سنڌ جي نئين گورنر بابت اختيار وزيراعظم کي آهي. ذوالفقار مرزا جو معاملو سنڌ حڪومت سان آهي ان تي تبصرو نه ڪندس. هن چيو ته ڪي پي ڪي جي اسيمبلي ميمبرن اڄ پنهنجي حق لاءِ پارليامينٽ آڏو احتجاج ڪيو آهي جڏهن ته پاڻي ۽ بجلي واري وفاقي وزير خواجه آصف اهو معاملو حل ڪري ڇڏيو آهي پر جيڪڏهن صوبن بجلي جون بقايائون جمع نه ڪرايون ته اسين به احتجاج جو حق رکون ٿا. هن چيو ته سعد رفيق ڪا ڌانڌلي ناهي ڪئي ۽ نه اهڙو ڪو فيصلو ان خلاف آيو آهي. اعليٰ عدالت هن جي ميمبر شپ بحال ڪري ڇڏي آهي جيڪي ماڻهون ڌانڌلين جو گوڙ ڪري رهيا آهن انهن جو پنهنجو ڪو مينڊيٽ ناهي اسان تي ڌانڌلين جو الزام هڻندڙ ٻڌائين ته ڪنٽونمينٽ چونڊن ۾ عوام هنن کي ڇو رد ڪري ڇڏيو. هن چيو ته عمران خان سان گڏ عوام هجي هان ته پشاور ۾ هن جي کٽيل سيٽ تي غلام احمد بلور ڪاميابي نه ماڻي هان. هن چيو ته 2015 ملڪ ۾ چونڊن نه پر تحريڪ انصاف جي تنظيمي چونڊن جو سال ٿي سگهي ٿو. هن چيو ته هو عمران خان سان هٿ ملائڻ گناهه سمجهان ٿو هو لڳاتار ڪوڙ ڳالهائي رهيو آهي هن چيو ته روز نوان ڊراما ٺاهيا ٿا وڃن چيف جسٽس آف پاڪستان کي ان جو نوٽيس وٺڻ گهرجي. هن چيو ته سنڌ جي نئين گورنر بابت اختيار وزيراعظم کي آهي جڏهن ته ذوالفقار مرزا جو معاملو سنڌ حڪومت سان آهي ان تي تبصرو نه ڪندو.

 

منظم ڌانڌليون ٿيون يا نه فيصلو عدالتي ڪميشن ڪندي: عمران خان

اسلام آباد (بيورو) تحريڪ انصاف جي چيئرمين عمران خان چيو آهي ته، منظم ڌانڌليون ٿيون يا نه، فيصلو عدالتي ڪميشن ڪندي، انور محبوب جو ڪوڙ سامهون اچي ويو آهي،اڄ منظم ڌانڌلي اڳيان اچي وئي آهي. اسلام آباد ۾ ميڊيا سان ڳالهائيندي عمران خان وڌيڪ چيو ته، پنجاب جي اڳوڻي اليڪشن ڪمشنر انور محبوب جو ڪوڙ سامهون اچي ويو آهي،انور محبوب 30 هزار بيلٽ پيپرز اماڻيا هئا.عمران خان وڌيڪ چيو ته، نواز ليگ اڳواڻ حمزه شريف جي تڪ ۾ 62  هزار اضافي بيلٽ پيپرز اماڻيا ويا ۽ حامد خان جي تڪ ۾ 56 هزار واڌو بيلٽ پيپرز موڪليا ويا. سندس وڌيڪ چوڻ هو ته، عدالتي ڪميشن جيڪو به فيصلو ڪندي، اکيون بند ڪري تسليم ڪنداسين. پي ٽي آءِ جي چيئرمين چيو ته، انور محبوب اڄ چوندو رهيو ته کيس ڪا خبر ناهي،اسان 25 کان 30 اهم تڪن تي ڌانڌلين جي نشاندهي ڪئي آهي. هن چيو ته، ڌانڌلين بابت فيصلو عدالتي ڪميشن کي ئي ڪرڻو آهي، پر اڄ منظم ڌانڌلي جو طريقيڪار سامهون اچي ويو آهي. عمران چيو ته، پارٽي تو اڀي شروع هوئي هي، اڃا وڌيڪ انڪشاف ڪنداسين، سعد رفيق جي تڪ جي چونڊ تڪرار ٿي وئي وئي آهي، هو ڪنهن منهن سان اسيمبلي ويندو. عمران خان  جو چوڻ هو ته، اين اي 122 ۾ ڪهڙي راند کيڏي پئي وڃي، اڃا ااهو انڪشاف ٿيڻو آهي.

 

شاهد حامد جي قتل ڪيس ۾ صولت مرزا کي ڦاهي ڏني وئي، لاش ڪوئيٽا کان ڪراچي منتقل، وارثن حوالي

ڪوئيٽا/ڪراچي(اسٽاف رپورٽر/بيورو) ڪي اي ايس سي جي ايم ڊي شاهد حامد جي قتل ڪيس ۾ صولت مرزا کي مچ جيل ۾ ڦاهيءَ تي لٽڪايو ويو، سندس لاش ڪوئيٽا جي ايڌي هوم منتقل ڪيو ويو جتان ايئرايمبولنس ذريعي ڪراچي پهچايو ويو. ايم ڪيو ايم ۽ الطاف حسين ڇرڪائيندڙ انڪشاف ڪندڙ صولت مرزا کي مچ جيل ۾ صبح جو چار لڳي 30 منٽن تي ڦاهي ڏني وئي. صولت مرزا جي ڦاهيءَ جي موقعي تي مچ جيل ۾ سڪيورٽي جا انتهائي سخت انتظام ڪيا ويا هئا ۽ جيل جي چوڌاري پوليس جي وڏي نفري مقرر ڪئي وئي هئي. ڦاهي ڏيڻ بعد صولت مرزا جو لاش سندس ڀاڻيجن حوالي ڪيو ويو. صولت مرزا جو لاش مچ جيل کان ايمبولنس ذريعي ڪوئيٽا پهچايو ويو جتان ايڌي هوم منتقل ڪيو ويو. صولت مرزا جي وارثن موجب ايئر ايمبولينس ذريعي مڙهه ڪراچي پهچايو ويو. صولت مرزا جي ڀاءُ جو چوڻ آهي ته صولت کي اوڀر ڪراچي جي محمد شاهه قبرستان ۾ دفنايو ويندو. ياد رهي ته 1997ع ۾ صولت مرزا ڪي اِي ايس سي جي ايم ڊي شاهد حامد کي ڊرائيور سميت قتل ڪيو هو. 1998 ۾ سي آءِ ڊي پوليس پرڏيهه کان واپسي تي صولت مرزا کي گرفتار ڪيو هو جڏهن ته کيس 16 سال اڳ ڦاهي جي سزا ٻـُڌائي هئي. صولت مرزا ڪَي اِي ايس سِي جي ايم ڊي شاهد حامد جي قتل ڪيس ۾ 17 سال جيل ۾ رهيو. صولت مرزا جو ايم ڪيو ايم ۽ الطاف حسين خلاف ڇڙڪائيندڙ وڊيو بيان سامهون اچڻ بعد سندس ڦاهي 19 مارچ ۽ پهرين اپريل تي ملتوي ڪئي وئي هئي جڏهن ته ڪراچي جي دهشتگردي ٽوڙ عدالت گذريل هفتي ٽيون ڀيرو جوابدار جا ڊيٿ وارنٽ جاري ڪيا هئا  صولت مرزا جي لاش کي  مچ جيل کان ڪوئيٽا منتقل ڪيو ويو، جتان اڏام ذريعي ڪراچي ايئرپورٽ آندو ويو آهي. ڪراچي ايئرپورٽ تي صولت مرزا جي مائٽن جو وڏو انگ موجود هو. صولت مرزا جي جنازي نماز گلشن معمار ۾ ادا ڪرڻ بعد  سندس تدفين نارٿ ڪراچي جي قبرستان ۾ ڪئي ويئي. دهشتگردي ٽوڙ عدالت، 1997ع ۾ ڪي اي ايس سي جي اڳوڻي ايم ڊي شاهد حامد، سندس گارڊ ۽ ڊرائيور کي قتل ڪرڻ جو ڏوهه ثابت ٿيڻ تي 16سال اڳ صولت مرزا کي موت جي سزا ٻڌائي هئي.

 

شڪارپور لڳ ٽن ڌرين ۾ پراڻي تڪرار تان جهيڙو، فائرنگ، 6 ڄڻا مارجي ويا

شڪارپور (ڊ.ر) لکي غلام شاهه ويجهو مڱڻيجا، جوڻيجا ۽ ڪلهوڙا برادري جي ٽن ڌرين ۾ پراڻي تڪرار تان جهيڙي دوران فائرنگ ۾ 6 ڄڻا مارجي ويا، پوليس   واقعي واري هنڌ نه پهچڻ سبب ڌرين ۾ ڇڪتاڻ جاري آهي. جوڻيجن  جي وانڍ واري علائقي ۾ هٿيار بندن فائرنگ ڪري مڱڻيجا برادري جي چڱي مڙس غلام قادر ۽ ظهير مڱڻيجو کي قتل ڪري ڇڏيو. ٻن ڄڻن جي قتل کانپوءِ ڌرين  هڪ ٻئي تي فائرنگ ڪئي، جنهن جي نتيجي ۾ وڌيڪ چار ڄڻا نظام الدين جوڻيجو ۽ هدايت الله مڱڻيجو  سميت مارجي ويا. جهيڙي دوران ڌرين ۾ فائرنگ جو  سلسلو جاري آهي، جڏهن ته پوليس نه پهچڻ سبب مارجي ويلن جا لاش واقعي واري هنڌ پيل آهن.  2 سال اڳ ٽنهي ڌرين ۾ زمين جي مالڪي تان شروع ٿيل جهيڙو هيل تائين 15 انساني حياتيون ڳڙڪائي چڪو آهي، پر پوليس تحرڪ وٺڻ لاءِ تيار ناهي.