تازيون خبرون

Daily Archives: May 12, 2015

ڪراچي ۾ پاڻي کوٽ جا ذميوار واٽر بورڊ ۽ ڪي اليڪٽرڪ عملدار آهن:آغا سراج دراني

ڪراچي (اسٽاف رپورٽر) سنڌ اسيمبلي جي اسپيڪر آغا سراج دراني چيو آهي ته ڪراچي ۾ پاڻي کوٽ جا ذميوار واٽر بورڊ ۽ ڪــَي اليڪٽرڪ عملدار آهن،واٽر بورڊ جي موجوده مشينري ناڪاره ٿي چڪي آهي. سنڌ اسيمبلي جي اجلاس کان اڳ ميڊيا سان ڳالهائيندي آغا سراج دراني چيو ته پاڻي جي غلط ورڇ ۽ غير قانوني ڪنيڪشن ۾ واٽر بورڊ جو عملو ملوث آهي، جنهن خلاف ڪارروائي ٿيڻ گهرجي. اسپيڪر چيو ته ٽينڪر مافيه ۽ پاڻي چور واٽر بورڊ عملي جي پيداوار آهن، واٽر بورڊ جي  مشينري ناڪاره ٿي چڪي آهي جديد مشنيري جي ضرورت آهي. هن چيو ته پاڻي کوٽ جي مسئلي کي مڪاني چونڊن دوران سياسي بڻايو ويو ته ان کي ڏٺو ويندو،ڪــَي فور منصوبي ۾ دير جي ذميوار وفاقي حڪومت آهي. آغا سراج دراني وڌيڪ چيو ته شهريار مهر ساڻس ذاتي اختلاف رکندو آهي انڪري هن ايوان ۾ ايجنڊا جي ڪاپي ڦاڙي. سندس چوڻ هو ته اسيمبلي جو تقدس پائمال ڪندڙن خلاف ريفرنس هن قانون واري کاتي ڏانهن اماڻي ڇڏيو آهي. اسپيڪر چيو ته شهريار مهر لوٽو آهي،هاڻي هـُو فنڪشنل ليگ کي به ڇڏڻ چاهي ٿو. آغا سراج دراني چيو ته شهريار مهر سندس خلاف عدالت ۾ وڃڻ چاهي ٿو ته ڀلي وڃي، جڏهن ته کيس ڪنهن به اسيمبلي ميمبر کي ايوان ۾ اچڻ کان روڪڻ جو اختيار آهي.

 

ڪراچي ۾ پاڻي جي بحران تي حڪومت کي خط لکيو آهي، وڏي وزير جي خاموشي افسوسناڪ آهي:خواجا اظهار الحسن

ڪراچي (اسٽاف رپورٽر) سنڌ اسيمبلي ۾ مخالف ڌر جَي اڳواڻ خواجا اظهار الحسن چيو آهي ته ڪراچي ۾ پاڻي جو بحران ڏينهون ڏينهن وڌي رهيو آهي، جنهن لاءِ حڪومت کي خط لکيو ويو آهي، جڏهن ته پاڻي واري معاملي تي وڏي وزير جي خاموشي افسوسناڪ آهي. ڪراچي ۾ ميڊيا سان ڳالهائيندي خواجا اظهارالحسن چيو ته سنڌ جَي راڄڌاني واري شهر ۾ پاڻي جو بحران شديد ٿيندو پيو وڃي. هـُن چيو ته اڄ کيس انتظار هو ته وڏو وزير پاڻي جي مسئلي تي ضرور ڳالهائيندو پر هو اسيمبلي ۾ آيو، ويٺو ۽هليو ويو. اپوزيشن ليڊر اميد ڏيکاري ته وڏو وزير سيد قائم علي شاهه سڀاڻي پاڻي معاملي تي اسيمبلي ۾ ضرور پاليسي بيان ڏيندو. خواجا اظهارالحسن چيو ته پاڻي معاملي تي هنن حڪومت کي لکت ۾ موقف ڏنو آهي، ان باوجود هن وقت تائين ڪي به قدم ناهن کنيا ويا. سندس چوڻ هو ته پاڻي معاملي تي هو جلد مڪاني ادارن جي وزير سان گڏجاڻي ڪندا. خواجا اظهار الحسن الزام هنيو ته ڊفينس واسين کي پنهنجو ئي پاڻي پئسن ۾ وڪروڪيو پيو وڃي. مخالف ڌر جي اڳواڻ چيو ته متحده سنڌ جي هر اداري کي ڪرپشن کان پاڪ ڪرڻ چاهي ٿي.

 

پاڪستاني اداڪار فواد خان سين ڪرڻ کان انڪار، ڪرن جوهر کي اسڪرپٽ تبديل ڪرڻو پئجي ويو

ممبئي(شوبز نيوز)ڀارتي فلم انڊسٽري ۾ ڪاميابي جا جهنڊا هڻڻ واري پاڪستاني اداڪار فواد خان بالي ووڊ جي ڪامياب هدايتڪار ڪرن جوهر جي فلم ڪپور اينڊ سنز ۾ ڀرپور ايڪشن ۾ نظر  ايندو.،  هن عاليه بٽ سان گڏ هڪ سين ڪرڻ کان انڪار ڪري ڇڏيو. جنهن جي وجه سان فلم جو اسڪرپٽ تبديل ڪرڻو پيو. ڀارتي ميڊيا مطابق ڪرن جوهر جي نئين فلم ڪپور اينڊ سنز جي شوٽنگ جو آغاز ٿي ويو آهي. فلم جي ڪهاڻي پيار ۽ محبت جي چوڌاري گهمي ٿي.  فواد خان جو چوڻ آهي ته فلم ۾ خراب سين فلمائڻ هن جي چاهڻ وارن ۽ تهذيب جي خلاف آهن. هن کان علاوه هو هڪ شادي شده آهي. اهڙا سين  ڪرڻ ان جي اصولن جي خلاف آهن. واضح رهي ته فواد خان بالي ووڊ مان پنهنجي ڪيريئر جي شروعات گذريل سال فلم خوبصورت سان ڪئي، جنهن ۾ ان سان گڏ انيل ڪپور جي ڌيءُ سونم ڪپور به مرڪزي ڪردار ادا ڪيو،  فواد خان پهريون پاڪستاني اداڪار آهي جنهن بيسٽ ميل ڊيبو جو فلم فيئر ايوارڊ پنهنجي نالي ڪيو.

 

عامر خان هرڻ مارڻ جي الزام ۾ سزا کان بچي ويو

ممبئي(شوبز نيوز): بالي ووڊ جي دبنگ هيرو کي ته عدالت ڏوهاري قرار ڏئي ڏئي ڇڏيو، جڏهن ته عامر خان قانون جي پڪڙ ۾ اچڻ کان بچي ويو، هرڻ مارڻ تي ان جي خلاف داخل درخواست عدالت خارج ڪري ڇڏي، فلم “ لگان ” جي شوٽنگ جي دوران عامر خان تي هرڻ مارڻ جو الزام هو ، ان سان گڏ ان جي پهرين گهر واري رينا دتا، فلم ڊائريڪٽر اسوتوش گواريڪر، ايگزيڪيوٽو ڊائريڪٽر سرينواس رائو به  درخواست ۾ شامل هو، جڏهن 2008ع ۾ داخل درخواست عدالت مان خارج ٿيڻ کان پوءِ عامر خان جي جند ڇٽي وئي، عامر خان تي ڪيترائي الزام صرف هڪ فلمي سين جي ڪري لڳايا ويا هئا، جن ۾ هرڻ کي گولي هڻڻ ڏيکاريو ويو هو، سزا هئڻ جي صورت ۾ عامر به 5 سالن جي لاءِ جيل وڃي سگهيو ٿي.

 

اداڪارا وديا بالن کي ”وومين اڪانامڪ فورم 2015ع“ ۾ خطاب لاءِ دعوت

ممبئي (شوبز نيوز) بالي ووڊ جي ڪلاسيڪل اداڪارا وديا بالن بابت جيڪڏهن چيو ته وڃي سوچ ۽ سمجھه جي اهڃاڻ آهي ته وڌيڪ نه هوندو، جيڪڏهن اوهان کي ڪو چئي ته ڪردارن جي ذخيري ڏانهن رجوع ڪيو ته اداڪارا وديا سلور اسڪرين تي ڪئين بهترين ڪردار ادا ڪيا آهن ۽ انهن جي ڪري هوءَ ڏيهه توڙي پرڏيهه ۾ مشهور به آهي، وديا بالن عورتن جي طاقت ۽ اهميت بابت پڻ ڪيترائي اهم ڪردار ادا پي ڪيا آهن، اطلاع آهن ته اداڪارا وديا بالن کي ”وومين اڪانامڪ فورم 2015ع“ ۾ خطاب لاءِ دعوت ڏني وئي آهي، جنهن جي تقريب گووا ۾ رٿي وئي آهي، وديا بالن عورتن جي تقريب دوران انڊين سينيما ۾ عورتن جي ڪردار تي ليڪچر ڏيندي. تقريب ۾ ڪيترا ئي ليکڪ، دانشور، سياستدان ۽ ٻيون وڏيون وڏيون شخصيتون شرڪت ڪنديون، جيڪي پڻ عورتن جي ڪردار تي ڳالهائيندا. وديا بالن چيو ته مون کي ان تقريب ۾ شرڪت ڪرڻ تي تمام گھڻي خوشي ٿيندي، هن چيو ته مان ڄاڻان ٿي ته اهو فورم عورتن جي اڳواڻيءَ واري صلاحيتن کي اڀارڻ ۽ انهن کي ظاهر ڪرڻ جي لاءِ بهتر جڳهه آهي

 

شڪتي ڪپور جي ڌيءُ هجڻ تي فخر آهي، منهنجي والد شڪتي ڪپور جون فلمون دنيا جي لاءِ خدمت آهن:شرڌا ڪپور

ممبئي (شوبز نيوز) بالي ووڊ اداڪارا شرڌا ڪپور چيو آهي ته شڪتي ڪپور جي ڌيءُ هجڻ تي فخر آهي، اداڪارا شرڌا ڪپور خاص ڳالهه ٻولهه ۾ چيو ته منهنجي والد شڪتي ڪپور جون فلمون دنيا جي لاءِ خدمت آهن، هن چيو ته منهنجو والد ئي منهنجو آئيڊيل آهي، پنهنجي والد جون فلمون ڏسي ڏسي وڏي ٿي آهيان، هن چيو ته مون کي پنهنجي پيءُ جي اداڪاريءَ واريون صلاحيتون ڏسي سندن ڌيءُ هجڻ تي فخر آهي. واضح رهي ته شڪتي ڪپور پنهنجي ڪيريئر جي ٽِن ڏهاڪن ۾ 500 کان وڌيڪ فملن ۾ ڪم ڪيو آهي.

 

لاهور پوليس زمبابوي ٽيم جي سيڪيورٽي لاءِ پلان جوڙي ڇڏيو

لاهور (اسپورٽس نيوز) لاهور پوليس زمبابوي ٽيم کي سيڪيورٽي ڏيڻ لاءِ انتهائي سخت انتظام ڪيا آهن. جتي جتي زمبابوي ٽيم موجود هوندي، اتي ڪرفيو نافذ ڪيو ويندو. جڏهن ته فضائي  نگراني به ڪئي ويندي. نجي ٽي وي موجب زمبابوي ٽيم جي هوٽل ۽ اسٽيڊيم جي ويجهو عارضي هيلي پيڊ ٺاهيا ويندا. انهن جي چئوطرف ڪنهن به شخص کي اچڻ جي اجازت نه هوندي. پوليس هيليڪاپٽر جي فراهمي لاءِ گهرو وزير سان رابطو ڪيو آهي. زمبابوي ٽيم جي آمد جي موقعي تي 3000 هزار پوليس اهلڪار  ۽ ايليٽ فورس جون 100 گاڏيون مقرر هونديون.

 

ڏکين رستن سان ڀرپور اسٽرونگ مين رن ايوينٽ جرمنيءَ جي روبن ڊيچانڊ کٽي ورتو

جرمني (اسپورٽس نيوز) ڏکين رستن سان ڀرپور اسٽرونگ مين رن ايوينٽ جرمنيءَ جي روبن ڊيچانڊ کٽي ورتو، ويمنز ۾ سوزاني ڪرائوس فاتح قرار ڏني وئي، جرمنيءَ جي شهر نيوربرگرنگ ۾ نرالي ريس ڪرائي وئي، مزاحمتن سان ڀرپور ريس جي ايوينٽ ۾ 11 هزار ماڻهن ريس ۾ حصو وٺي سڀني کي حيران ڪري ڇڏيو.23 ڪلوميٽر مفاصلي واري ان ريس ۾ حصو وٺندڙن کي ڊوڙن، ٽپ ڏيڻ، ترڻ ۽ ريڙهيون پائڻ جو چئلينج هو. ان دلچسپ ريس ۾ ڏکيا رستا پار ڪرڻ دوران شريڪ هڪ ٻئي جي مدد به ڪندا  رهيا، مردن ۾ ميزبان جرمنيءَ جو روبن ڊيچانڊ 23 ڪلوميٽر جو مقرر مفاصلو هڪ ڪلاڪ 36 منٽن ۽ 57 سيڪنڊن ۾ طئي ڪري فاتح بڻيو، عورتن ۾ جرمنيءَ جي سوزاني ڪراس مقرر مفاصلو هڪ ڪلاڪ هڪ منٽ 45 سڪنڊن ۾ پورو ڪري ڪاميابي پنهنجي نالي ڪئي

 

سلو ريٽ اوور تي پاڪستاني ڪپتان مصباح سميت ٽيم تي ڏنڊ

ڍاڪا (اسپورٽس نيوز) انٽرنيسنل ڪرڪيٽ ڪائونسل (آءِ سي سيءَ) بنگلاديش خلاف ٻين ٽيسٽ ميچ ۾ سلو ريٽ اوور تي پاڪستاني ڪپتان مصباح سميت ٽيم تي ڏنڊ هنيو آهي. بنگلاديش خلاف ميرپور ۾ کيڏيل ٻين ٽيسٽ ميچ ۾ پاڪستان 328 رنسن سان ڪاميابي ماڻي هئي، پاڪستان بنگلاديش ۾ پهرين ڪاميابي حاصل ڪرڻ سان گڏوگڏ ٽيسٽ سيريز به پنهنجي نالي ڪئي، پر آءِ سي سيءَ سلو ريٽ اوور جي ڏوهه ۾ پاڪستاني ٽيم تي ڏنڊ هنيو آهي. سلو ريٽ اوور جي ڪري ڪپتان مصباح الحق تي ميچ فيءَ جو 40 سيڪڙو جڏهن ته ٻين رانديگرن تي 20 سيڪڙو ڏنڊ هنيو ويو. آءِ سي سيءَ جي پڌرائيءَ موجب پاڪستاني ٽيم جو اوور ريٽ مقرر وقت کان ٻه اوور پوئتي رهيو، جنهن کان پوءِ ميچ ريفريءَ جيف ڪرو ڏنڊ هڻڻ جو فيصلو ڪيو. ان کان سواءِ آءِ سي سيءَ ڪوڊ آف ڪنڊڪٽ جي ڀڃڪري ڪرڻ تي آءِ سي سيءَ پاڪستان جي فاسٽ بالر عمران خان کي به وارننگ ڏني آهي. عمران خان بنگلاديش خلاف ٻين ٽيسٽ جي ٻين اننگ ۾ ديشي اوپنر تميم اقبال کي آئوٽ ڪرڻ کان پوءِ ساڻس سخت رويو اختيار ڪيو هو.

 

هلندڙ سال ڊسمبر ۾ پاڪستان گڏيل عرب امارتن (يو اي اِي) ۾ ڀارت جي ميزباني ڪندو : پي سي بي چيئرمين

ڪلڪتو (اسپورٽس نيوز) پي سي بي چيئرمين شهريار خان چيو آهي ته هلندڙ سال ڊسمبر ۾ پاڪستان گڏيل عرب امارتن (يو اي اِي) ۾ ڀارت جي ميزباني ڪندو، پاڪستان ۽ هندستاني ڪرڪيٽ بورڊ وچ ۾ 2014ع ۾ هڪ مفاهمتي يادداشت تي صحيح ٿي، جنهن تحت ٻنهي ملڪن وچ ۾ 8 سالن دوران پنج سيريزون کيڏيون وينديون. ٻنهي ملڪن جي ڪرڪيٽ بورڊز وچ ۾ معاملا طئي ٿي ويا. ان سلسلي ۾ پاڪستان ڪرڪيٽ بورڊ جي چيئرمين شهريار خان ڪالهه ڀارت ۾ بي سي سي جي چيئرمين جڳ موهن ڊالميا سان ملاقات ڪئي، ملاقات دوران ٻنهي ملڪن وچ ۾ ڪرڪيٽ سيريز جي بابت ڳالهيون ڪيون ويون، ملاقات کان پوءِ پي سي بي چيئرمين شهريار خان چيو ته ڀارتي ڪرڪيٽ بورڊ جي چيئرمين جڳ موهن ڊالميا پاڪ_ ڀارت ڪرڪيٽ سيريز جي خاطري ڪرائي آهي. هن چيو ته پاڪستان ۽ ڀارت وچ ۾ ڪرڪيٽ سيريز ڊسمبر ۾ کيڏي ويندي، ٻنهي ملڪن وچ ۾ سيريز دبئي ۾ کيڏي ويندي. شهريار خان موجب يو اي اي ۾ پاڪستان ۽ ڀارت جون ڪرڪيٽ ٽيمون 3 ٽيسٽ ۽ 5 ون ڊي ميچ کيڏنديون. هن چيو ته ٻنهي ملڪن وچ ۾ 2 ٽي ٽوئنٽي ميچ به کيڏيا ويندا. ٻئي طرف پي سي بي چيئرمين شهريار خان کي ڪالهه ڪلڪتا اميگريشن جي عملدارن ڪاغذ نه هجڻ جي ڪري روڪي ورتو هو،  پي سي بي چيئرمين جڳ موهن ڊالميا سان ملاقات لاءِ جيئن ئي ڍاڪا کان ڪلڪتي پهتو ته اتي کيس ان وقت سخت پريشانيءَ سان منهن ڏيڻو پيو جڏهن اميگريشن عملدارن ان وٽ ڪلڪتي شهر ۾ داخل ٿيڻ جا دستاويز نه هجڻ تي روڪي ورتو، ذريعن موجب شهريار خان کي اڳوڻي سفير جي حيثيت سان ڀارت ۾ داخلا جي اجازت هئي، جنهن بابت عملدارن کي ڄاڻ نه هئي، پر ڪجھه دير کان پوءِ ڀارتي گھرو وزارت جي مداخلت تي شهريار خان کي وڃڻ جي اجازت ڏني وئي هئي