تازيون خبرون

Daily Archives: May 6, 2015

ڪراچي ۾ بس ٽي عورتن کي چيڀاٽجي ماري ڇڏيو، مڇريل ماڻهن بس کي باهه ڏئي ڇڏي، ڊرائيور گرفتار

ڪراچي (اسٽاف رپورٽر) ڪراچي جي لياقت آباد واري علائقي ۾ تيز رفتار بس جو ٽڪر لڳڻ سبب ٽي عورتون چيڀاٽجي فوت ٿي ويون ۽ 5 ڄڻا زخمي ٿي پيا. لياقت آباد ۾ تيز رفتار بس ڊرائيور جي ڪنٽرول مان نڪرڻ بعد بس اسٽينڊ تي بيٺل مسافرن مٿان ڇڙهي وئي، جنهن جي نتيجي ۾ ٽي عورتون چيڀاٽجي فوت ٿي ويون.  حادثي جي نتيجي ۾ 5 ڄڻا زخميٿي پيا، جن کي ڳڻتي جوڳي حالت ۾ اسپتال منتقل ڪيو ويو آهي. حادثي کانپوءِ مڇرين ماڻهن بس کي باهه ڏئي ساڙي ڇڏيو ۽  ڊرائيور کي سوگهو ڪري مارڪٽ ڪرڻ کانپوءِ پوليس حوالي ڪري ڇڏيو.

 

اداڪار رام ڪپور ٻيهر سني ليون سان فلم ۾ ڪم ڪندو

ممبئي(شوبز نيوز) بالي ووڊ اداڪار رام ڪپور هڪ ڀيرو ٻيهر اداڪاره سني ليون سان فلم ۾ ڪم ڪندو. ڀارتي سڌ سماءَ وارن ذريعن موجب بالي ووڊ اداڪار رام ڪپور جيڪو اداڪاره سني ليون سان فلم ”ڪچهه ڪچهه لو چاهي“ ۾ اداڪار ڪري چڪو آهي. نئين فلم جنهن جو نالو اڃا ناهي رکيو ويو ۾ پڻ اداڪاره سني ليون سان گڏ نظر ايندو. رام ڪپور جو ان حوالي سان چوڻ هو ته سني ليون هڪ محنتي ۽ پيشور اداڪاره آهي. هن سان ڪم ڪرڻ جو تجربو خوشگوار رهيو آهي ۽ هو خوش آهي ته کيس هڪ ڀيرو ٻيهر اداڪاره سني ليون سان گڏ فلم ۾ ڪم ڪرڻ جو موقعو ملندو. اها فلم گذريل فلم وانگر ڪاميڊي نه پر ايڪشن فلم هوندي. فلم جي شوٽنگ هلندڙ سال جي آخر ۾ شروع ٿيندي.

 

150 گيت لائبرري ۾ موجود آهن پر،البم رليز نه ڪندس: عاطف اسلم

لاهور(شوبز نيوز) پاڪستان جي ناليواري ڳائڻي عاطف اسلم جو چوڻ آهي ته هن جي لائبرري ۾ 150 کان وڌيڪ گيت موجود آهن پر هو انهن کي البم جي صورت ۾ رليز ڪرن جو ڪو به ارادو ناهي.هڪ انٽرويو ۾ عاطف اسلم  جو چوڻ هو ته هاڻي ڪاروباري ماڊل بلڪل مٽجي چڪو آهي اهو ئي سبب آهي جو هو البم رليز نٿو ڪرڻ چاهي.عاطف اسلم جو آخري البم“ ميري ڪهاني”2008ع ۾ رليز ٿي هئي.عاطف جو چوڻ هو ته هاڻي اهو وقت ناهي رهيو جڏهن ماڻهو دڪانن تي وڃي  موسيقي جا البم وٺندا هئا. هاڻي ماڻهو پنهنجي پسند جا گيت گهڻو ڪري نيٽ تي ئي آن لائين ڊائون لوڊ ڪري وٺن ٿا.عاطف اسلم  جو نئون گانو “ زندگي آ رها هون مين” بولي وود جي اداڪار ٽائيگگر شرو جي نئين فلم ۾ شامل ڪيو پيو وڃي ۽ ان کي تمام جلد رليز ڪيو ويندو.

 

شاهد نظامي فلم ڊائريڪٽر بڻجي ويو

لاهور(شوبز نيوز) ماضيءَ جو مشهور ٽي وي اداڪار خالد نظامي جو پٽ شاهد نظامي پڻ فلم ڊائريڪٽر بڻجي ويو. هن آمريڪا کان تعليم حاصل ڪئي آهي. هو خواب هڪ حقيقت جي نالي سان اردو فلم ٺاهيندو. شاهد نظامي ڊائريڪٽر ۽ ايڪٽر شمعون عباسي سان گڏ هڪ فلم ۾ سهاري طور پڻ ڊائريڪٽر ڪئي. شاهد نظامي چيو آهي ته هو پاڪستان فلم انڊسٽريءَ لاءِ اهم ڪردار ادا ڪرڻ چاهي ٿو ۽ پنهنجي ڏاڏي جو نالو روشن ڪرڻ چاهي ٿو

 

ڀارتي فلم انڊسٽريءَ سان لاڳاپيل شخصيتن پاڪستاني فلمن کي ڀارت ۽ ٻين ملڪن ۾ رليز ڪرڻ جون تياريون شروع

لاهور(شوبز نيوز) ڀارتي فلم انڊسٽريءَ سان لاڳاپيلشخصيتن پاڪستان ۾ ٺهيل فلمن کي ڀارت سميت ٻين ملڪن ۾ رليز ڪرڻ جون تياريون شروع ڪري ڇڏيون آهن. ان سلسلي ۾ ڀارت جي مشهور فلمساز ۽ نعيم ڪار شيام شيروف ماضي ۾ ڀارت جي فلم ڏسندڙن لاءِ ”خدا ڪي ليي“، ”بول“ ۽ ”سلاخون“ رليز ڪري چڪو آهي. ان فلمن ڀارت ۾ ڪامياب بزنس ڪيو هو. هاڻي شيام شيروف سان گڏ ڪيترائي تقسيم ڪار پڻ نئين جديد ٽيڪنالاجي تي ٻڌل فلمن جي ڀارت ۾ نمائش ڪرڻ ۾ دلچسپي رکي ٿو. شيروف جو چوڻ آهي ته پاڪستان ۾ سرڪاري طور تي دبئي طرز جي فلمن لاءِ انٽرنيشنل پاليسي ٺاهڻي پوندي. ان کان علاوه نئين مني سئنيماز کي پڻ هٿي ڏيڻي پوندي. اهڙيءَ طرح پاڪستان سڄي دنيا ۾ جديد فلمسازي ۽ سئنيمائن سان گنڍجي ويندو.

 

راجر فيڊر استنبول اوپن جو ٽائيٽل کٽي ورتو

استنبول(اسپورٽس نيوز) 17 ڀيرا گرينڊ سليم چيمپئن راجر فيڊر ڪاميابيءَ جو سلسلو برقرار رکندي استنبول اوپن جو ٽائيٽل پنهنجي نالي ڪري ورتو. راند ۾ هن يورو گوئي جي پيبلو شاويز کي شڪست ڏئي ڪيريئر جو 85هون ٽائيٽل کٽيو. ترڪي جي شهر استنبول ۾ کيڏيل مينز سنگلز ايونٽ جي فائنل ۾ ٽاپ سيڊڊ سوئٽزرلينڊ جي راجر فيڊر يورو گوئي جي پيبلو شاويز کي اسٽريٽ سيشن ۾ شڪست ڏني ۽ ٽائيٽل پنهنجي نالي ڪيو، سندس اسڪور 3-6 ۽ 6-7 رهيو.

 

ٻين ۽ آخري ٽيسٽ ۾ شاندار ڪاڪردگيءَ جومظاهرو ڪري پنهنجي ٽيم جي ڪاميابيءَ ۾ اهم ڪردار ادا ڪندس: تميم اقبال

ڍاڪا(اسپورٽس نيوز) بنگلاديشي ڪرڪيٽ ٽيم جي مشهور اوپنر تميم اقبال چيو آهي ته هو پاڪستان خلاف ٻين ۽ آخري ڪرڪيٽ ٽيسٽ ميچ ۾ پڻ پنهنجي شاندار بيٽنگ جي تسلسل کي برقرار رکندي پنهنجي ٽيم جي ڪاميابيءَ ۾ اهم ڪردار ادا ڪن. هن چيو ته پهرين ٽيسٽ نه کٽڻ تي مايوسي ٿي آهي پر هو پُراميد آهي ته ٻي ٽيسٽ ۾ شاندار راند پيش ڪندي گرين شرٽس کي شڪست ڏئي سيريز پنهنجي نالي ڪنداسين. هن پنهنجي هڪ بيان ۾ وڌيڪ چيو ته اسان جي ٽيم مهمان ٽيم خلاف پهرين ٽيسٽ ميچ ۾ راند جي هر شعبي ۾ شاندار ڪارڪردگيءَ جو مظاهرو ڪيو پر ڪاميابي نه ملي سگهي، ان جو ڏُک آهي. تميم اقبال چيو ته پاڪستان خلاف ٻين ٽيسٽ کٽي سيريز پنهنجي نالي ڪرڻ جي ڀرپور ڪوشش ڪنداسين.

 

پاڪستان ۽ بنگلاديش وچ ۾ ٻين ٽيسٽ اڄ شروع ٿيندي

ڍاڪا(اسپورٽس نيوز) پاڪستان ۽ بنگلاديش ڪرڪيٽ ٽيمن وچ ۾ سيريز جي ٻين ۽ آخري ٽيسٽ (سڀاڻي) اربع کان شير بنگله نيشنل اسٽيڊيمميرپور ۾ شروع ٿيندي. بنگلاديش جي دؤري ۾ پاڪستان هيستائني ڪا ڪاميابي حاصل ناهي ڪئي. وارم اپ ميچ سميت ٽن ون ڊي ميچن جي سيريز ۽ واحد ٽي 20 ميچ ۾ شڪست جو مُنهن ڏسڻو پيو جڏهن ته سيريز جي پهرين ٽيسٽ ۾ پڻ پاڪستان فتح جو بهترين موقعو وڄايو ۽ بنگلاديش ٽيسٽ ڊرا ڪرڻ ۾ ڪامياب ٿي ويو. قومي ٽيم وٽ ون ڊي سيريز ۽ واحد ٽي 20 ۾ شسڪت جو ازالو ڪرڻ لاءِ هي آخري موقعو آهي. ٻنهي ٽيمن وچ ۾ ميچ سخت هوندي ۽ ميچ ۾ ڪاميابي لاءِ ٻنهن ٽيمن جي ڪپتان بيان ڏنا آهن.

 

پاڪستان ۽ زمبابوي جي ڪرڪيٽ ٽيمن جون ميچون ڪراچيءَ ۾ ٿيڻ گهرجن: خواجه اظهار الحسن

ڪراچي(اسپورٽس نيوز) سنڌ اسيمبلي ۾ مخالف ڌر جي اڳواڻ خواجه اظهار الحسن چيو آهي تهپاڪستان ۽ زمبابوي جي ڪرڪيٽ ٽيمن جون ميچون ڪراچي ۾ ٿيڻ گهرجن . ڪالهه اڱاري ڏينهن سنڌ اسيمبلي ۾ اعتراض واري نڪتي تي ڳالهائيندي خواجه اظهار الحسن چيو ته زمبابوي جي ڪرڪيٽ ٽيم پاڪستان اچي رهي آهي، پاڪستان ڪرڪيٽ بورڊ سڀئي ميچون لاهور ۾ رکيون آهن، ڪراچي ۾ به ميچون ٿيڻ گهرجن هن چيو ته ڪراچي ۾ امن امان جي صورتحال بهتر ٿي آهي ۽ ان کي وڌيڪ بهتر ڪرڻ جي ڪوشش ڪئي پئي وڃي هن چيو ته نيپرا ۾ سنڌ جو نمائندو شامل ناهي ان تي ناڻي واري وزير سيد مراد علي شاهه چيو ته نيپرا ۾ سنڌ جي نمائندي جي لاءِ اسان وفاق کي نالو ڏئي ڇڏيو آهي پر وفاق اڃا تائين نامزدگي جو اعلان ناهي ڪيو.

 

رياست جو فرد سان مقابلو: عاجز جمالي

رياست هڪ اهڙي منظم اداري جو نالو آهي، جيڪا عوام جي سگهه تي بيٺل هوندي آهي. ڇو ته رياست کي عوام ئي منظم سگهه فراهم ڪندو آهي. جڏهن عوام رياست جي خلاف ٿي وڃي ته اها بظاهر ڪيتري به منظم هجي پر عوام جي سامهون گهڻو وقت بيهي نه سگهندي آهي. رياست ۾ سرڪار، اقتدار، فوج، عدليه، پوليس، قانون، سرڪاري کاتا، انتظاميا، وزير، مشير اصل ۾ عوام جي خدمت لاءِ هوندا آهن. ڇو ته رياست ماڻهن جي ڏنل ٽيڪس تي ئي هلندي آهي. اهو ئي سبب آهي جو عوام جا بنيادي مسئلا حل ڪرڻ رياست جي ذميواري ۾ شامل آهي، جنهن ۾ تعليم، صحت، روزگار، اٽو، لٽو، اجهو ۽ جان مال جو تحفظ شامل آهي.

رياست ڪنهن به فرد جي مقابلي ۾ مضبوط ۽ منظم هوندي آهي. ان ڪري ڪو فرد رياست سان ٽڪر کائيندو آهي ته رياست پنهنجي مشينري ذريعي انهي کي پاش پاش ڪري ڇڏيندي آهي، پر تاريخ ۾ هميشه ائين ٿيندو آهي ته رياست جڏهن ظلم، ناانصافي ۽ فردن خلاف تشدد ۽ جبر جو رستو اختيار ڪندي آهي ته بظاهر ڪمزور فرد به رياست جي خلاف ميدان تي نڪري ايندا آهن ۽ رياست خلاف بغاوت جو علم کڻندا آهن.

ويجهي ماضي ۾ مير مرتضيٰ ڀٽو، اڪبر بگٽي جا مثال سامهون آهن، جن رياستي حڪمن خلاف بغاوت ڪئي. مون کي لال مسجد جي عبدالرشيد غازي جو نالو به ان تسلسل ۾ ياد اچي پيو. هي رياست خلاف ويجهي ماضي جون اهي بغاوتون آهن، جيڪي فردن رياست جي خلاف ڪيون ۽ رياست پنهنجي طاقت ذريعي انهن کي ڪچلي بظاهر ته فتح حاصل ڪئي پر دائمي طور ڏٺو وڃي ته انهن فردن جي موت سان ٿلهي ليکي رياست ڪمزور ٿي آهي.

مير مرتضيٰ ڀٽو، وزيراعظم بينظير ڀٽو جو ڀاءُ ۽ شهيد وزيراعظم ذوالفقار علي ڀٽو جو وڏو فرزند هو، جنهن پنهنجي والد جي ڦاهيءَ کانپوءِ رياست خلاف بغاوت شروع ڪئي هئي، هو جڏهن بينظير ڀٽو جي سرڪار ۾ وطن آيو ته کيس پنهنجي ئي گهر جي اڳيان بيدرديءَ سان قتل ڪيو ويو. گذريل ڏينهن بدين جي ماڊل ٿاڻي تي پيپلز پارٽي جو اڳواڻ ذوالفقار مرزا پنهنجي ساٿين کي ڇڏائڻ پهتو ته اهي ئي منظر نظر آيا جيڪي مرتضيٰ ڀٽو جي دور ۾ ڏٺا. مان هنن ڪالمن ۾ مسلسل ان طرف اشارو ڪندو پيو اچان ته پيپلز پارٽي وارن کي عقل کان ڪم وٺڻ گهرجي، هي سندن خلاف ئي ڪا گهري سازش ٿي رهي آهي، هن وقت حالتن مان اِهو محسوس ٿئي پيو ته سندن ئي صفن منجهان پيدا ٿيل هڪ ذوالفقار مرزا کي سندن ئي سرڪار ۾ شهيد ڪرائي سندن ڪم تمام ڪيو ويندو.

مون کي پيپلز پارٽي جي وزيرن جون ان زماني جون پريس ڪانفرنسون ياد پيون اچن، جيئن اڄ ڪلهه ٿي رهيون آهن، اڄ ڪلهه جا کوڙ وزير ان زماني ۾ پيپلز پارٽي ۾ ڪو نه هئا ۽ پيپلز پارٽي جي ان زماني جا کوڙ وزير اڄ پيپلز پارٽي ۾ ناهن. پيپلز پارٽي جي ان زماني جا وزير نه رڳو مرتضيٰ ڀٽو بلڪه بيگم نصرت ڀٽو خلاف به تقريرون ڪندا هئا، مرتضيٰ ڀٽو به چوندو هو ته سندس حياتي کي بينظير جي سرڪار ۽ آصف زرداريءَ کان خطرو آهي. مير جي شهادت کانپوءِ مون انهن وزيرن کي بينظير ڀٽو اڳيان روئيندي ڏٺو، جيڪي مير مرتضيٰ خلاف پريس ڪانفرنسون ڪندا هئا. هڪ وزير کي ته بعد ۾ مون ستر ڪلفٽن جا چڪر ڪاٽيندي به ڏٺو هو. ڪيترائي وزير سرڪار ختم ٿيڻ کانپوءِ چوندا هئا ته اسان مرتضيٰ ڀٽو کي غلط طريقي سان ڊيل ڪيو، اسان کي اندازو ڪونه هو ته اسان جي سرڪار ختم ڪرڻ جي سازش ٿي چڪي هئي. مان پيپلز پارٽي جي انهن همراهن کي چوان پيو ته هو هڪ دفعو وري ذوالفقار مرزا کي غلط ڊيل ڪري رهيا آهن، هو پنهنجي ئي هڪ ساٿي کي ۽ سنڌ جي هڪ اهڙي اڳواڻ کي مارائي رهيا آهن، جنهن سنڌ جي حقن خاطر ان وقت کي للڪاريو، جنهن کي للڪارڻ جو پيپلز پارٽيءَ ۾ دم ئي ناهي.

دنيا ۾ ڪجهه اهڙا چريا ماڻهو هوندا آهن، جيڪي رياست ۽ اسٽيبلشمينٽ جي پيداوار هوندي به بغاوت ڪندا آهن، رستو بدلائيندا آهن، اڪبر بگٽي به انهن منجهان هو، اڪبر بگٽي کي قتل ڪرائي رياست عارضي طور تي سوڀاري ٿي پر بلوچستان جي اڄوڪي حالت رياست خلاف نفرت جي علامت بڻيل آهي. ساڳي ڳالهه لال مسجد جي عبدالرشيد غازي جي آهي، جيڪو رياستي ادارن جو ئي پيدا ڪيل ماڻهو هو، پر هڪ وقت اهڙو آيو جو هن جهڪڻ کان انڪار ڪيو، هي ٻئي هاڻي تاريخي ڪردار بڻجي ويا، چاهي ڪنهن کي وڻن يا نه وڻن.

اڄ ڪلهه ڪجهه ماڻهو ذوالفقار مرزا لاءِ اهو چون ٿا ته هو سڄي حياتي آصف زرداري سان گڏ رهيو، مٿس آصف زرداري جا احسان آهن، هو خود ڪرپٽ آهي، هو اڳي ڪرپشن جي خلاف ڇو ڪو نه هو، هن جي حمايت ڪندڙ ماڻهو هرو ڀرو پيپلز پارٽي جي خلاف آهن، وغيره وغيره. ڳالهه اها آهي ته، حُر، امام حُسين جي مخالف فوج جو سپهه سالار هو، هڪ وقت اهڙو آيو جو هن امام حسين عه جو ساٿ ڏيڻ جو فيصلو ڪيو ۽ وقت جي حڪمران جو حڪم مڃڻ کان انڪار ڪيائين. بظاهر ته حُر سرڪاري حڪم جي خلاف ورزي ڪئي ۽ ڪربلا ۾ شهيد ٿي ويو پر سندس زندگي جو هڪڙو عمل سڄي زندگي تي حاوي رهيو ۽ حُر تاريخ ۾ هميشه زنده آهي. بلڪل سچ آهي ته ذوالفقار مرزا سڄي حياتي آصف زرداري جو يار رهيو، اهو به سچ آهي ته ذوالفقار مرزا ڪو فرشتو ڪونهي پر هُن ان وقت بغاوت جو علم کنيو، جنهن وقت وٽس ڪيترائي عهدا هئا، اهي ڇڏي هن دهشتگردن کي وائکو ڪيو، پر پيپلز پارٽي ان وقت مفاهمت جي نشي ۾ ٻڏل هئي.

رهي ڳالهه ته ذوالفقار مرزا هڪ فرد آهي، پيپلز پارٽي رياست ۽ اسٽيبلشمينٽ جي نمائندگي ڪندڙ سرڪار آهي، جڏهن سرڪاري مشينري، سڄي سرڪار، سڄي رياستي طاقت هڪ فرد خلاف استعمال ڪندي ته عوام ان فرد جو ساٿ ڏيندي، نه ڪي رياست جو ساٿ ڏيندي. رياست به اهڙي جيڪا جبر، ظلم ۽ ڪرپشن تي ٻڌل هجي، عوام جي اڪثريت بيزار هجي ته اهڙي ماحول ۾ رياست کان بغاوت ڪندڙ ڪوبه فرد عوام جي اڳيان هيرو بڻجي وڃي ٿو، چاهي اهو مير مرتضيٰ هجي، اڪبر بگٽي هجي يا ذوالفقار مرزا هجي. بنيادي ذميواري رياست جي هوندي آهي ته هو ماڻهن سان ورتاءُ اهڙو ڪري جو ماڻهو سندس خلاف نه هجن، ڪو فرد جڏهن بغاوت ڪري ٿو، مرڻ مارائڻ تي اچي ٿو ان جو مطلب آهي ته هو ”پوائنٽ آف نو رٽن“ تي پهچي چڪو آهي. يعني هو اهڙي سرحد تي پهچي چڪو آهي، جتان هن جي واپسي مشڪل آهي. اهڙي ماحول ۾ رياست ۽ سرڪار جي ذميواري وڌي وڃي ٿي ته اها فرد جي خلاف سڄي رياستي مشينري استعمال ڪرڻ بدران ان جو مسئلو ٻڌي. هتي ته فرد به اهو آهي جيڪو گهر جو ماڻهو آهي، پر معاملو سڄو انائن جي ور چڙهيل آهي، رئيس وڏو صفا ضد تي چڙهيل آهي.

رئيس وڏو ضد جي چوٽي تي چڙهي هيٺ ڏسي ٿو ته سندس اهو ضديرو دوست هزارن ماڻهن سان گڏ بيٺو آهي، انهن ماڻهن ۾ گهڻائي ته بينظير جي جيالن جي آهي. رئيس وڏي پاڻ ئي ته پنهنجي دوست کي بينظير جي سيڪيورٽي جي ذميواري ڏني هئي، کيس خبر آهي ته هي اهو ضدي همراهه آهي، جيڪو پيٽارو ڪاليج کان وٺي هوم منسٽريءَ تائين سندس هر ڳالهه مڃڻ سان گڏ جڏهن به ضد تي چڙهندو هو ته خاموشي ۾ غائب ٿي ويندو هو، پر اڄ آخر هو ٿاڻن تي ڏند چڪ ٿو ڪري ته انهي کي هن ’پوائنٽ آف نو رٽن‘ تي ڪنهن پهچايو؟ ان سرڪار ئي کيس اهڙي نتيجي تي پهچايو جو هو رياست کان بغاوت ٿو ڪري. منهنجي ذاتي راءِ ۾، عقل جي تقاضا اها آهي ته ڪنهن به سانحي کان بچڻ جو سولو طريقو اهو آهي ته رياست کي طاقت استعمال ڪرڻ بدران صبر ۽ عقل جو رستو اختيار ڪرڻ گهرجي.