تازيون خبرون

Daily Archives: April 30, 2015

جيڪڏهن پاڻي بحران تي ڪنٽرول نه ڪيو ويو ته ڪراچيءَ ۾ فساد ٿيندا: فاروق ستار

ڪراچي (اسٽاف رپورٽر) ايم ڪيو ايم جي اڳواڻ ڊاڪٽر فاروق ستار چيو آهي ته ڪراچي ۾ پاڻي جي مسئلي تي روڊن تي اچڻ کانسواءِ ٻيو ڪوبه رستو ناهي چيو ۽ انهيءَ بحران جي ذميوار سنڌ حڪومت آهي. ڪراچي ۾ پريس ڪانفرنس ڪندي ڊاڪٽر فاروق ستار جو چوڻ هو ته سنڌ ۾ بلدياتي ادارن جو ڪوبه وجود ناهي. متحده وٽ ڪراچي جو 85 سيڪڙو مينڊي آهي پر هن شهر جا مسئلا حل ڪرڻ جو ڪوبه اختيار ناهي، شهر هن وقت پاڻي جي بحران سبب ڪربلا جو منظر پيش ڪري رهيو آهي ۽ اُن جي ذميوار سنڌ حڪومت آهي. هن چيو ته صوبائي حڪومت پاران اڄ تائين ڪراچي ۾ پاڻي بحران تي ڳالهائيو ئي ناهي، شهر کي هڪ هزار ملين گيلن پاڻي جي ضرورت آهي پر هن وقت رڳو 560 ملين گيلن فراهم ڪيو پيو وڃي. فاروق ستار چيو ته جيڪڏهن شهر ۾ پاڻي جي منصفاڻي ورڇ ڪئي وڃي ته شهرين جي ڏکيائين ۾ گهٽتائي ٿي سگهي ٿي ۽ پاڻي جي مسئلي تي روڊن تي اچڻ کانسواءِ ڪوبه رستو ناهي بچيو. جيڪڏهن انهيءَ مسئلي تي ڪوبه احتجاج ٿيو ته مظاهرين سان گ هونداسين. فاروق ستار چيو ته شادي هالن پويان پوندڙ پاڻي بحران تي ڪنٽرول ڪن. جيڪڏهن حق نه ڏنا ويا ته آئنده سنڌ اسيمبلي جي اڱڻ ۾ پنهنجي الوڳ اسيمبلي لڳائينداسين. جيڪڏهن پاڻي بحران تي ڪنٽرول نه ڪيو ويو ته ڪراچيءَ ۾ فساد ٿيندا.

 

ولين جا ڪردار ڪندڙ عرفان خان هاڻي عشق ڪندو

ممبئي (شوبز نيوز) بالي ووڊ جي مشهور اداڪار عرفان خان عام طور فلمن ۾ ولن جا ڪردار ادا ڪندو رهيو آهي، پر هاڻي هو پنهنجي شوقينن کي هڪ فلم ۾ عشق لڙائيندي نظر ايندو. هدايتڪار شوجيت سرڪار جي فلم ”پيڪو“ ۾ عرفان خان هڪ رومانوي ڪردار ادا ڪندو، جنهن ۾ سندس مقابلي ۾ دپيڪا پڊوڪون آهي، جڏهن ته بالي ووڊ شهنشاهه اميتاڀ بچن به اهم ڪردار ۾ نظر ايندو. فلم ”پيڪو“ ۾ عرفان خان، رانا چوڌري نالي شخص جو ڪردار ادا ڪري رهيو آهي جيڪو دهليءَ ۾ ٽيڪسي سروس هلائيندو آهي ۽ ان دوران سندس رابطو دپيڪا ۽ اميتاڀ سان ٿي ويندو آهي، جيڪي فلم ۾ پيءُ ۽ ڌيءُ جو ڪردار ادا ڪري رهيا آهن. انڊين ميڊيا موجب عرفان خان جو هڪ انٽرويوءَ ۾ چوڻ هو ته هو تمام خوش آهي ته شوجيت کيس ان فلم ۾ هڪ رومانوي ڪردار جي آڇ ڪئي. عرفان پهريون ڀيرو اميتاڀ سان گڏ ڪنهن فلم ۾ ڪم ڪري رهيو آهي. عرفان خان جو چوڻ هو ته گھڻي وقت کان ڪنهن فلم ۾ مزاحيه ۽ رومانوي ڪردار ادا ڪرڻ چاهي پيو ۽ فلم ”پيڪو“ ۾ انهن ٻنهي شعبن ۾ پنهنجيون صلاحيتون ڏيکارڻ جو موقعو مليو آهي. فلم ”پيڪو“ 8 مئي تي سئنيما گھرن جي زينت بڻجندي.

 

عمران هاشمي ۽ شرڌا ڪپور وڏي پردي تي پنهنجي اداڪاريءَ جا جوهر ڏيکاريندا

ممبئي (شوبز نيوز) بالي ووڊ اداڪار عمران هاشمي ۽ اداڪارا شرڌا ڪپور جلد ئي گڏ وڏي پردي تي پنهنجي اداڪاريءَ جا جوهر ڏيکاريندا. ڀارتي ميڊيا موجب بالي ووڊ جي مشهور هدايتڪار مهيش ڀٽ 23 سال اڳ ٺهندڙ بالي ووڊ جي بلاڪ بسٽر فلم ”سڙڪ“ جو سيڪوئل ٺاهي رهيو آهي، جنهن ۾ مرڪزي ڪردار اداڪار عمران هاشمي ادا ڪندو، جڏهن ته سندس مقابلي ۾ هيروئن جو ڪردار اداڪارا شرڌا ڪپور نڀائيندي. فلم جي عسڪبندي چند مهينن ۾ شروع ڪئي ويندي، جڏهن ته فلم ايندڙ سال رليز ڪئي ويندي. واضح رهي ته 1991ع ۾ رليز ٿيندڙ فلم ”سڙڪ“ ۾ سنجي دت ۽ پوجا ڀٽ مرڪزي ڪردار ادا ڪيا هئا ۽ ان فلم سينيما گھرن تي ڪاميابين جا جھنڊا کوڙيا هئا.

 

ريڊيو پاڪستان پورهيتن جي عالمي ڏينهن تي خاص پروگرام نشر ڪندو

اسلام آباد(شوبز نيوز) ريڊيو پاڪستان پورهتن جي عالمي ڏينهن جي موقعي تي مختلف پروگرام نشر ڪرڻ جو فيصلو ڪيو آهي ۽ انمقصد لاءِ سموريون تياريون مڪمل ڪيون ويون آهن. هتي جاري ٿيل پڌرائي مطابق پروگرام ”صبح پاڪستان” ۾ صدر ۽ وزيراعظم جا پيغام صبح جو ست لڳي 10 منٽن تي پيش ٿيندا. پورهيتن، پورهيت اڳواڻن، صنعتي ڪارڪنن جي خاص تاثرن تي ٻڌل پروگرام ”يه هاٿ سلامت هي جب تڪ” به ان پروگرام جو حصو هوندو. 10 لڳي 5 منٽن تي خاص پروگرام ”رابطه” ۾ پورهيتن جي حقن جي تحفظ لاءِ موجوده حڪومت جي قدمن کي اجاگر ڪيو ويندو. پورهيتن کي خراج تحسين پيش ڪرڻ لاءِ خاص دستاويزي پروگرام ”رنگ بهري هاٿ” قومي نشرياتي رابطي تي شام جو 4 لڳي 5 منٽن تي پيش ڪيو ويندو. پورهيتن جي عالمي ڏينهن جي موقعي تي خاص ڊرامو ”اجرت” ميڊيم ويو نيٽ ورڪ تي رات جو 9 لڳي 10 منٽن تي نشر ٿيندو جڏهن ته ان دوران هڪ خاص مشاعرو ايف ايم 93 نيٽ ورڪ تي پيش ٿيندو.

 

مزاحيه اداڪار منور ظريف جي 39 هين ورسي ملهائي وئي

لاهور (شوبز نيوز) فلم انڊسٽري جي نامياري مزاحيه اداڪار منور ظريف مرحوم جي 39 هين ورسي اربع تي ملهائي وئي. ان موقعي تي مرحوم جيمداحن قرآن خواني ۽ اجتماعي دعائن جي تقريبن جو اهتمام ڪيو جڏهن ته سندس قبر تي گل به چاڙهيا ويا. منور ظريف 2 فيبروري 1940ع تي گوجرانواله ۾ پيدا ٿيو. هو مشهور ڪاميڊين ظريف جو ڀاءُ هو. هن پنهنجي 16 سالن جي فلمي ڪيريئر ۾ 300 کان وڌيڪ اردو ۽ پنجابي فلمن ۾ پنهنجي اداڪاري جا جوهر ڏيکاريا.منور ظريف زندگي جون 36 بهارون ڏٺيون ۽ 29 اپريل 1976ع تي لاهور ۾ گذاري ويو هو. هو اڄ به پنهنجن چاهيندڙن جي دلين ۾ زنده آهي.

 

ويسٽ انڊيز کي ٽين ۽ آخري ٽيسٽ ميچ ۾ شڪست ڏئي سيريز پنهنجي نالي ڪنداسين: ايلسٽرڪڪ

بارباڊوس(اسپورٽس نيوز) انگلينڊ جي ٽيسٽ ٽيم جي ڪپتان ۽ مشهور اوپننگ بيٽسمين ايلسٽرڪڪ چيو آهي ته سندس ٽيم ويسٽ انڊيز خلاف ٽين ۽ آخري ٽيسٽ ۾ پڻ ڪاميابي حاصل ڪري سيريز 0-2 تان پنهنجي نالي ڪنداسين. هن چيو ته سندس ٽيم ميزبان ٽيم خلاف ٽين ميچ لاءِ ميدان ۾ لهندي. هن چيو ته ٻي ميچ ۾ ڪاميابيءَ کان پوءِ ٽيم جو مورال بلند ٿيو آهي ۽ اها ميزبان ٽيم خلاف ايندڙ ميچ ۾ اسان لاءِ فائديمند ثابت ٿيندي. هن چيو ته هو ميزبان ٽيم کي ايندڙ ميچن ۾ آسان نه سمجهندا ۽ پنهنجي ڪارڪردگيءَ جي تسلسل کي برقرار رکڻ جي ڪوشش ڪندا.

 

انڊين پريميئر ليگ (آءِ پي ايل) جي اٺين ايڊيشن (اڄ) وڌيڪ هڪ ميچ جو فيصلو ٿيندو

ڪولڪته(اسپورٽس نيوز) انڊين پريميئر ليگ (آءِ پي ايل) جي اٺين ايڊيشن (اڄ) خميس تي وڌيڪ هڪ ميچ جو فيصلو ٿيندو. ان سلسلي ۾ کيڏيل ميچ ۾ دفاعي چيمپئن ۽ بالي ووڊ ڪنگ شاهه رُخ خان ڪولڪته نائيٽ رائيڊرز جو مقابلو چنائي سپر ڪنگز سان ڪولڪته ۾ ٿيندو. ميچ ڊي اينڊ نائيٽ هوندي، جيڪا پاڪستاني وقت مطابق ساڍي 7 وڳي شروع ٿيندي. ا

 

قومي 8 ميمبرن واري ٽيم پنجين ايشين بيچ هينڊ بال چيمپئن شپ ۾ شرڪت لاءِ اڄ مسقط رواني ٿيندي

اسلام آباد(اسپورٽس نيوز) 8 ميمبرن واري قومي ٽيم پنجين ايشين بيچ هينڊ بال چيمپئن شپ ۾ شرڪت لاءِ (اڄ) خميس تي مسقط رواني ٿيندي. پاڪستان هينڊ بال فيڊريشن جي سيڪريٽري حاجي محمد شفيق ٻڌايو ته چيمپئن شپ پهرين کان 7 مئي تائين مسقط جي گاديءَ واري شهر اومان ۾ کيڏي ويندي. جنهن ۾ 6 ملڪن جون ٽيمون حصو وٺنديون، جن ۾ ايران، قطر، اومان، بحرين، ويٽنام ۽ پاڪستان شامل آهن. قومي ٽيم 8 رانديگرن تي ٻڌل هوندي، جن ۾ ڪپتان طاهر علي، آصف علي، اوعزز عاطف، محمد شاهد پرويز، حضرت حسين، خاور ياسين، عاصم سعيد ۽ زوهيب جبار شامل آهن. جڏهن ته ڪوچ نصير احمد ۽ مئنيجر ڪرنل جنيد عالم پڻ ٽيم سان گڏ هوندا.

 

بين الصوبائي انڊر 16 گرلز جوڊو چيمپئن شپ 11 مئي کان شروع ٿيندي

اسلام آباد(اسپورٽس نيوز) بين الصوبائي انڊر 16 گرلز جوڊو چيمپئن شپ 11 مئي کان اسپورٽس ڪامپليڪس اسلام آباد ۾ شروع ٿيندي. اسلام اباد اسپورٽس بورڊ جي سيڪريٽري اصغر نيازي ٻڌايو ته چيمپئن سپ ۾ 8 ٽيمون شرڪت ڪنديون، جن ۾ پنجاب، خيبر پختونخواه، سنڌ، بلوچستان، اسلام آباد، آزاد ۽ ڄمون ۽ ڪشمير، گلگت بلتستان ۽ فاٽا شامل آهن. هن چيو ته چيمپئن شپ ۾ شرڪت لاءِ ٽيمن جا رانديگر 10 مئي تي اسلام آباد پهچندا ۽ مئنيجرز ميٽنگ 10 مئي جي شام جو ٿيندي جنهن ۾ ڊراز ۽ چيمپئن سپ جي قانونن بابت آگاهه ڪيو ويندو ۽ اها چيمپئن سپ 13 مئي تائين جاري رهندي ۽ ميزباني جو فرض اسلام آباد اسپورٽس بورڊ انجام ڏيندي.

 

سنڌيءَ کي اوپري ٻولي نه بڻايو : ذوالفقار واهوچو

سنڌ اسيمبلي  جنهن سنڌي ٻولي جو ايڪٽ  7 جولاءِ 1972ع ۾ پاس ڪيو  ته سنڌ ۾ رهندڙ هر ماڻهو سنڌي ٻولي لازمي پڙهندو ، ڳالهائيندو ۽ لکندو ، انگريز سرڪار جي دور ۾ به سنڌي ٻولي سنڌ جي قومي ٻولي هئي ، هر غير سنڌي آفيسر تي اهو لازم هيو ته سنڌ ۾ نوڪري ملڻ کانپوءِ هو ٽن مهينن اندر سنڌي سکي وٺندو ته جيئن هو صوبي جي عوام جي مسئلن کي سمجھي ۽ حل ڪري سگھي ان تي انگريزن  ان جي روح مطابق عمل ڪيو. سڄي لک پڙھ سنڌي ۾ ٿيندي هئي سرڪاري دفتري زبان به سنڌي هئي. پاڪستان ٺهڻ کانپوءِ سنڌي ۽ سنڌي ٻولي پنهنجي وطن ۾ ڌاريا بڻجي ويا . انهن سان اڇوتن واري هلت شروع ڪئي وئي ، ڪراچي ، حيدر آباد ، سکر سميت ٻين شهرن منجھان ڌرتي ڌڻين کي جبري تڙي وطن مان بي وطن ڪيو ويو، ڪراچي سنڌ جي گادي واري شهر سان گڏ وفاق جي گادي وارو شهر بڻايو ويو ته سنڌي جيڪي ڪراچي ۾ اڪثريت ۾ هيا اهي راتو رات ٿورائي ۾ تبديل ٿي ويا، سنڌين کان ڪراچي ۾ ووٽ جو حق کيسو ويو ، سنڌي پنهنجي شهر ۾ مضافاتي بڻايا ويا . جڏهن پاڪستان ٺهڻ کانپوءِ بنگال ۽ پنجاب ۾ رهندڙ هندن ، سکن ، مسلمانن کي پنهنجا وطن ڏنا ويا . پر سنڌ مان لڏي ويل سنڌين کي هندستان ۾ ڪجھه به نه مليو اهي ڪيمپن حوالي ٿي ويا . سنڌ ۾ سنڌي  مسلمان پنهنجي وطن ۾ بي وطن ٿي ويا سڀ اختيار کسجي ويا ، لکين ايڪڙ زمين ، شهرن جي ملڪيت ، دڪان ۽ گھر جيڪي سنڌي هندو ڇڏي ويا اهي سنڌي مسلمانن کي ملڻ بدران  هندستان مان آيل پناهگيرن کي ڪليمن ۾ ڏنا ويا ، سنڌ مان هندستان لڏي ويل سنڌي هندن کي  اتي  ڪک به نه مليو . جڏهن ته پنجاب مان هندستان ويل هندن ۽ سکن کي الڳ صوبا ڏنا ويا.پاڪستان ۾ مسلمان پنجابين کي به صوبو مليو. بنگال ۾ مسلمانن ۽ هندن کي الڳ صوبا مليا . رلي رڳو سنڌي ويا، پاڪستان ۾ به سنڌين جا وسيلا ، حق حڪمراني ،شهر ، ٻولي ، ‎ثقافت کسجي وئي ان تي ڌارين جو غلبو اچي ويو ، هندستان ويل سنڌي هندو  نان ريذيڊينشنل آف انڊن ” اين آر آءِ“ بڻايا ويا .  جڏهن ته 1848 ع ۾ جڏهن انگريزن ڪڇ،پڄ تي قبضو ڪيو ته اهو علائقو سنڌ کان ڪٽي هندستان سان ملايو ويو . جڏهن باقي سنڌ بمبي کان آزادي حاصل ڪئي ته اهو اسان جو علائقو اسان کي واپس نه ڪيو ويو ، اهڙي طرح قانوني ۽ اخلاقي طور تي سنڌ مان ويل سنڌين کي اهو علائقو سنڌ صوبي جا نالي سان ملڻ گهربو هو اها زمين سنڌ جي هئي ،آهي ۽ رهندي جيڪا انهن حوالي نه ڪئي وئي اهي سڄي هندستان ۾ پکڙجي ويا ۽ اڄ تائين انهن  اتي ڪو به جلوس ، جلسو ، ڌرڻو نه هنيو آهي نه ڌار صوبي جو مطالبو ڪيو آهي ۽ اتي انهن ڪا دهشت گردي ، قتل عام به نه ڪيو آهي نه  ئي انهن اتي اصلوڪن رهواسين کي  ٿورائي ۾ تبديل ڪرڻ جي ڪوشش ڪئي آهي انهن ته هندستان جي معاشي طاقت ۾ اضافو ڪيو آهي.

سنڌ اسيمبلي ۾ سنڌي ٻولي سان ماءُ ٽيلي ماءُ وارو سلوڪ آهي اهو سلوڪ ڌارين ته ڪيو ئي ڪيو آهي پر پنهنجن جي طرفان به گھٽ نه ڪئي وئي آهي سنڌ جي وڏي وزير ،سينيئر وزير سميت سرڪاري ڌر توڙي مخالف ڌر سان تعلق رکندڙ سنڌي ميمبر به سنڌي ٻولي ۾ ڳالھائڻ پسند نٿا ڪن ،  جڏهن ڌرتي جا مالڪ پاڻ پنهنجي ٻولي کان پر ي ٿيندا . اها نه ڳالهائيندا ته پوءِ اتي ويٺل ٻيا جيڪي 68 سال گذري وڃڻ باوجود سنڌي نه ٿي سگھيا آهن سنڌي نٿا ڳالهائڻ پسند ڪن، اهي ڪيئن ڳالهائيندا، انهن سان انهن جي ٻولي ۾ ڳالهائڻ جي ڪهڙي ضرورت آهي . سنڌي ميمبرن کي چين جي صدر شي جن پنگ کان سبق سکڻ گھرجي ڪجھه ڏينهن اڳ جڏهن هو پاڪستان جي دوري تي آيو هو ته ان چيني ٻولي ۾ پاڪستان جي وزير اعظم سميت سمورن اڳواڻن سان  ڳالهايو ، ان ته اهو ڪون سمجھو ته پاڪستاني منهنجي ٻولي نه سمجھندا ان ڪري انگريزي ۾ ڳالهايان ته جيئن هو سندس موقف سمجھي سگھن ته پوءِ سنڌي مرد توڙي عورت ميمبر  انگريزي ۽ اردو ۾ اسيمبلي اندر ڇوٿا ڳالهائين . اهي پنهنجي مادري ٻولي ڳالهائڻ کان ڇوٿا گھٻرائين ڪنهن کي ٿا ٻڌائين. سنڌ ۾ ته سندن ووٽر به سنڌي آهي ، هو پاڻ به سنڌي آهن ته پوءِ اردو ۽ انگريزي ڇوٿا ڳالهائين اها ڳالھه سمجھه ۾ نٿي اچي ، جڏهن ماڻهو پنهنجي وطن ، ٻولي ۽ ثقافت جي مالڪي نه ڪندو ته اهي ان کان کسجي ويندا . تاريخ ۾ ڪٿي ايئن نه” لکڻو ۽ پڙهڻو پوي ته هئي سنڌ ۽ سنڌ وارن جي ٻولي “. سنڌي ميمبرن طرفان سنڌ اسيمبلي ۾ سنڌي نه ڳالهائي اهو تاثر ڏنو پيو وڃي ته هي سنڌ اسيمبلي نه پر  يو پي ۽ سي پي جي اسيمبلي آهي ، اسان جي ميمبرن جي ان رويئي تي شاھ لطيف جو روح به روئندو هوندو ، جنهن چيو هو ” جي توءِ فارسي سکيو،گولو توءِ غلام“ اڄ اسان  پنهنجي ٻولي ڇڏي ٻين اڳيان پاڻ وڻائڻ لاءِ انهن جي ٻولي ڳالهائي رهيا آهيون ، اها نا انصافي  جيڪا ڪري رهيا آهيون ان جا نتيجا اسان ڀوڳي چڪا آهيون ، پاڪستان ٺهڻ کانپوءِ ڪراچي مان سنڌي ٻولي جا اسڪول ختم ڪيا ويا . اڄ تائين سنڌ اسيمبلي مان پاس ٿيل سنڌي ٻولي ايڪٽ تي عمل نه ٿي سگھيو آهي .

سنڌ اسيمبلي ۾ زراعت جي وزير علي نواز خان مهر  اعتراف ڪيو ته سنڌ سرڪار وٽ فنڊ نه هجڻ سبب ڪولڊ اسٽور قائم نه ڪري سگھيا آهيون ، پنجاب ڏاڍ ڪري چشما جھلم ڪئنال وهائي رهيو آهي ، جڏهن ته سنڌ جي وڏي وزير سيد قائم علي شاھ  اسيمبلي جي ايوان کي آگاهي ڏني ته  سنڌ  حڪومت آبادگارن کان 2 لک ميٽرڪ ٽن ڪڻڪ  وڌيڪ خريد ڪندي ۽ ڪمند جي اگھه ۾ ٻه ارب رپيا آبادگارن کي سبسڊي ڏني ويندي ، ان دوران  مخالف ڌر جي ميمبرن وڏي آواز ۾ چيو ته بارداڻو ڏيو، وڏي وزير ڪيترائي ڀيرا تقرير ڇڏي بيهي رهيو. جنهن دوران مخالف ڌر ۽ حڪومتي ڌر جي ميمبرن ۾ سخت جملن جي ڏي وٽ ٿي. هڪ موقعي تي اسپيڪر آغا سراج دراني چيو ته سعيد نظاماڻي  سکڻ چاهي ٿو اوهان ان کي سيکاريو،مسين سوال ڪيو اٿس، زراعت واري وزير کان جڏهن تحريڪ انصاف جي عورت ميمبر ڊاڪٽر سيما ضياءُ سوال ڪيو ته  ان تي اسپيڪر آغا سراج دراني کيس چيو ته اوهان وزير جي چيمبر۾ وڃو اتي  اوهان کي بسڪٽ پيٽيز کارائيندو۽اتي صوبائي وزير به اها ساڳئي ڳالھه ڪئي ته ڊاڪٽر سيما ضياءُ سخت اعتراض ڪيو ۽ مطالبو ڪيو ته اهي لفظ واپس ورتا وڃن .  جڏهن ته اسپيڪر سوالن واري وقفي دوران  چيو ته ٽي شيون ٽارگيٽ تي آهن  ڪمند ، ڦٽيون ۽ ڪڻڪ ،ڪڏهن ڪڏهن انسان به ٽارگيٽ ٿئي ٿو . سعيد نظاماڻي طرفان ڊاڪٽر اديب رضوي کي خراج تحسين پيش ڪرڻ لاءِ پيش ڪيل ٺهراءُ تي ڳالهائيندي پ پ پ جي ميمبر سيد ناصر شاھ چيو ته سعيد نطاماڻي سٺو ماڻهو آهي پر ڪڏهن ڪڏهن ترڪي ويندو آهي . سنڌ اسيمبلي ۾ ڊاڪٽر اديب رضوي کي صحت جي شعبي ۾ خدمت ڪرڻ تي خراج تحسين پيش ڪرڻ وارو ٺهراءُ پيش ڪيو ويو جيڪو ايوان اتفاق راءِ سان منظور ڪيو ، جڏهن ته ايم ڪيو ايم جي اڳواڻي ميمبر عبدالقدوس جي وفات تي سنڌ اسميبلي ۾ کيس خراج عقيدت پيش ڪرڻ وارو ٺهراءُ به منظور ڪيو .

سنڌ اسيمبلي ۾ سنڌي ميمبرن طرفان سنڌي  ٻولي کي اهميت نه ڏيڻ تي اتي ويٺل مهمان ۽ سنڌي صحافي سخت مايوس ٿين ٿا ۽ هڪ ٻئي کان اهو پڇڻ تي مجبور ٿين ٿا ته هي سنڌي اسيمبلي آهي يا يو پي ۽ سي پي جي اسيمبلي آهي جو ان ۾ سنڌي نٿي ڳالهائي وڃي ، اڪثري صحافين جو اهو خيال آهي ته اسيمبلي اندر وڏيرا، سردار ،سيد  ويـٺل آهن  جن کي ٻولي ، قوم ، ثقافت سان ڪو به لڳاءُ ناهي انهن کي اقتدار گھرجي ان لاءِ جي سڀ ڪجھه قربان ڪري سگھن ٿا. جيئن انهن سنڌ اسيمبلي ۾ سنڌي ٻولي کي قربان ڪري ڇڏيو آهي.