تازيون خبرون

Daily Archives: April 28, 2015

ننڍي چونڊ دوران متحده تاريخي ڪاميابي حاصل ڪئي: خواجا اظهار الحسن

ڪراچي (اسٽاف رپورٽر) سنڌ اسيمبلي جي اجلاس دوران متحده ايم پي اي خواجا اظهار الحسن اين اي 246 تي ننڍي چونڊ ۾ متحده جي سوڀ کي تاريخي ڪاميابي قرار ڏنو، اسپيڪر پاران خرم شيرزمان کي جوابي تقرير کان روڪڻ تي تحريڪ انصاف جي ميمبرن ايوان مان واڪ آئوٽ ڪيو. اسپيڪر سراج دراني جي صدارت هيٺ اجلاس ۾ ايم ڪيو ايم جي خواجا اظهار الحسن چيو ته لياري ۾ پ پ ڪامياب جلسو ڪيو، جنهن تي هو کين مبارڪ ڏين ٿا. هن چيو ته 23 اپريل تي ننڍي چونڊ دوران متحده تاريخي ڪاميابي حاصل ڪئي، جيڪي وڏيون وڏيون دعوائون ڪندا هئا انهن کي عوام رد ڪري ڇڏيو، ايتري تائين جو هڪ پارٽي جي ضمانت رد ٿي وئي. پوائنٽ آف آرڊر تي ڳالهائيندي خواجا اظهار الحسن شعر پڙهڻ شروع ڪيا ۽ هڪ شعر ۾ سرڪار کي به طعنو ڏيندي چيو ته “جو آج بيٺَي هين مَسنـَد په ڪَل نهين هونگي،،،،ڪِرائي ڪا هَي گَهر، اپنا مڪان ٿوڙِي هي. خواجا اظهار الحسن جي جواب ۾ تحريڪ انصاف جي خرم شير زمان ڳالهائڻ شروع ڪيو ۽ متحده کي ننڍي چونڊ ۾ ڪاميابي تي مبارڪ ڏني. هن چيو ته ايم ڪيو ايم وارا اهو ته چون ٿا ته هنن کي عوام چونڊيو، پر ميڊيا اهو به ڏٺو ته سندن ڪارڪنن مٿان حملا ڪيا ويا، کين مهم هلائڻ کان روڪيو ويو، ان جو ذڪر ڇو نه ٿا ڪن؟ ان موقعي تي متحده ميمبرن گوڙ شروع ڪري ڏنو، اسپيڪر، خرم شير زمان کي چيو ته پوائنٽ آف آرڊر تي تقرير نه ڪريو، ڪم جي ڳالهه ڪريو. خرم شير زمان چيو ته هڪ پاسي کان پوائنٽ آف آرڊر تي شاعري پڙهي وئي، اسان کي جواب ڏيڻ به نه ٿو ڏنو وڃي، ان موقعي تي اسپيڪر شرجيل ميمڻ کي ڳالهائڻ جي اجازت ڏني، جنهن تي تحريڪ انصاف جا ميمبر احتجاج ڪندي ايوان مان واڪ آئوٽ ڪري ويا. شرجيل ميمڻ چيو ته عمران خان کي به ڳالهائڻ وقت درست لفظن جو استعمال ڪرڻ گهرجي، ايوان ۾ ويٺل دوستن کي به گهرجي ته هو پي ٽي آءِ سميت سمورين سياسي ڌرين جو موقف حوصلي سان ٻڌن.

 

الطاف حسين جي سنڌ ورهائڻ واري مطالبي تي ڳڻتي آهي، سنڌ ٽوڙڻ جي ڳالهه تي خاموش نٿا ويهي سگهون: نثار کهڙو

ڪراچي (اسٽاف رپورٽر ) سنڌ اسيمبلي جي اجلاس ۾ مسلم ليگ فنڪشنل جي عورت ميمبر مهتاب اڪبر راشدي ۽ پي پي جي سينيئر وزير نثار احمد کهڙو ايم ڪيو ايم جي سربراه الطاف حسين جي سنڌ ورهائڻ واري مطالبي تي سخت خدشن ۽ ڳڻتي جو اظهار ڪيو ۽ چيو ته سنڌ کي ٽوڙڻ جي ڳالهين تي اسان خاموش نٿا ويهي سگهون . مسلم ليگ فنڪشنل جي عورت ميمبر مهتاب اڪبر راشدي چيو ته مبارڪون ته ڏنيون ٿيون وڃن پر ڪجهه ماڻهن ڪاميابي جي خوشي ۾ سنڌ ورهائڻ جون ڳالهيون ڪري رهيا آهن اهي ماڻهو ڪٿي آهن جيڪي نعرا لڳائيندا هئا ته ( مروسيون مرويسون سنڌ نه ڏيسون) اها سڀني کان وڌيڪ ڳڻتي جوڳي ڳالهه آهي ، سنڌ واسي حيران آهن ، ڇا هو سمجهن ته خاموش رهڻ وارا سنڌ جي ورهاست ۾ شامل آهن . ان موقعي تي ايم ڪيو ايم جي پارلياماني ليڊر سيد سردار احمد چيو ته الطاف حسين مجموعي ڳالهه ڪئي هئي ته صوبي جي جاگرافيائي حدن ۾ رهندي انتظامي يونٽ ٺاهيا وڃن ۽ جيڪو به ٿئي اهو آئين جي موجب ٿئي ڪا به زور زبردستي ناهي اسان جي قائد / پارٽي جي اها خواهش ناهي ته سنڌ ٽڪرا ٽڪرا ٿئي . سينيئر وزير نثار احمد کهڙو چيو ته هي معاملو گهڻو حساس آهي ڪو به خاموش نٿو ويهي سگهي . سنڌ اسميبلي اها قرارداد منظور ڪئي هئي ته سنڌ جي ورهاست ڪنهن به صورت ۾ قبول ناهي هي اها ئي اسيمبلي آهي جنهن پاڪستان جي لاءِ به قرارداد منظور ڪئي هئي . هن چيو ته مرويسون مرويسون سنڌ نه ڏيسون جي نعري تي قائم آهيون اها صرف لفاظي ناهي سنڌ اسيمبلي فيصلو ڪري چڪي آهي انتظامي يونٽن جي ڳالهه ڇو ٿي ڪئي وڃي ڇا ڊويزنون ۽ ضلعا انتظامي يونٽ ناهن آئين ۾ وڌيڪ انتظامي يونٽ بابت ڪجهه به ناهي ايم ڪيو ايم کي گذارش ٿا ڪيون ته اڳتي اهڙي ڳالهه نه ڪن ڪراچي صوبي جي ڳالهه نه ٿيڻ گهرجي سنڌ هڪ آهي ۽ هڪ رهندي

 

ذوالفقار مرزا پاليل نانگ آهي، کيس دشمن چوڻ به توهين سمجهون ٿا، سندس جي ڪرپشن بابت سڀ ڄاڻن ٿا: پ پ وزير

ڪراچي (اسٽاف رپورٽر ) پاڪستان پيپلز پارٽي سان تعلق رکندڙ صوبائي وزير ۽ سنڌ اسيمبلي ميمبرن چيو آهي ته ڊاڪٽر ذوالفقار مرزا پاليل نانگ آهي، ان کي دشمن چوڻ به توهين آهي. ذوالفقار مرزا جي ڪرپشن بابت سڀني کي خبر آهي. پيپلز پارٽي جي شريڪ چيئرمين آصف علي زرداري ۽ ٻين اڳواڻن تي الزام لڳائڻ کان اڳ ذوالفقار مرزا پنهنجي جيءُ ۾ جهاتي پائي ڏسي. اڳتي جيڪڏهن هن آصف علي زرداري خلاف غير پارلياماني زبان جو استعمال ڪيو ته پيپلز پارٽي جا ڪارڪن سندس گهر جو گهيراءُ ڪندا. الزامن لڳائڻ کان اڳ ذوالفقار مرزا پهرين پنهنجي گهرواري فهميده مرزا ۽ پٽ حسنين مرزا کي اسيمبلين مان استعيفيٰ ڏيارائي. سومر تي پيپلز ميڊيا سيل ۾ صوبائي وزير ٽرانسپورٽ ممتاز جکراڻي، مڪيش چاولا، ايم پي اي امداد پتافي، طارق آرائين، پيپلز پارٽي جو اڳواڻ حبيب الدين جنيدي، ذوالفقار قائمخاني ۽ منظور عباس گڏيل پريس ڪانفرنس ڪندي اڳوڻي گهرو وزير سنڌ ذوالفقار مرزا پاران پارٽي جي اعليٰ قيادت ۽ ٻين پارٽي اڳواڻن تي مختلف ميڊيا ۾ اچي غيراخلاقي ۽ غيرپارلياماني زبان جي استعمال تي سخت تحفظات جو اظهار ڪيو. امداد پتافي چيو ته ذوالفقار مرزا جي ڪرپشن تي پارٽي نه صرف ان کان وزارت واپس ورتي بلڪ هن کان استعيفيٰ ورتو ۽ اڄ هو جنهن پارٽي اڳواڻن ۽ خاص ڪري اسان جي شريڪ چيئرمين آصف علي زرداري جي ڪري بدين ۾ ڪيترين فيڪٽرين ۽ زمينن جو مالڪ بڻيل آهي خود ئي پنهنجي اوقات کان ٻاهر نڪري ويو آهي. هن چيو ته ذوالفقار مرزا پاليل نانگ آهي. اڳواڻن چيو ته جهڙي طرح جي زبان جو استعمال ذوالفقار مرزا هن وقت ڪري رهيو آهي اهڙي طرح جي زبان جو استعمال هو به ڪري سگهن ٿا، پر هو سياست ۾ غليظ، غير پارلياماني ۽ گندي زبان جو استعمال ڪرڻ نٿا چاهين. اڳواڻن چيو ته ذوالفقار مرزا جي زمينن جي ڪرپشن سميت ڪافي ڪرپشن ڪئي آهي ۽ جنهن وقت کيس وزارت ۽ اسيمبلي رڪنيت کان استعيفيٰ ڏيڻ لاءِ چيو ويو ته هن چيو هو ته هو ڪنهن صورت ۾ پنهنجي پٽ کي اليڪشن ۾ وڙهڻ نه ڏيندو ۽ پارٽي جو ٽڪيٽ نه وٺندو. پر سڀ کان پهرين هو اسيمبلي جو ٽڪيٽ وٺڻ لاءِ آصف علي زرداري وٽ پهچي ويو. هن چيو ته اسان اڄ ذوالفقار مرزا کي چئلينج ڪريون ٿا ته جيڪڏهن هو ايڏو وڏو غيرتمند آهي ته پنهنجي گهرواري ۽ پٽ کي اسيمبلي جي ميمبرشپ کان استعيفيٰ ڏيارائي ۽ پيپلز پارٽي جي ڪنهن ننڍي ڪارڪن سامهون اليڪشن کٽي ڏيکاري. هن چيو ته آصف علي زرداري ذوالفقار علي مرزا کي 40 سال کير پياريو، پر ان آستين جو نانگ جو ڪردار ادا ڪيو. هڪ سوال جي جواب ۾ اڳواڻن چيو ته ذوالفقار مرزا هن وقت بئنڪ جو قرضئي آهي ۽ اهو ئي سبب آهي ته ان جي شگرملز کي سپريم ڪورٽ نيلام ڪرڻ جا حڪم ڏنا آهن. ان سان ڪنهن جو ڪوبه واسطو نه آهي. هڪ ٻي سوال جي جواب ۾ هن چيو ته اڄ فهميده مرزا ۽ حسنين مرزا جيڪڏهن اسيمبلين جا ميمبر آهن ته اهو به پارٽي ۽ ان جي شريڪ چيئرمين آصف علي زرداري جي ڪري آهن.

 

جمهوري وطن پارٽي جو سربراهه طلال اڪبر بگٽي لاڏاڻو ڪري ويو

اسلام آباد (اي پي پي) جمهوري وطن پارٽي جو سربراهه طلال اڪبر بگٽي ڊگهو عرصو بيمار رهڻ کان پوءِ لاڏاڻو ڪري ويو، هڪ نجي ٽي وي چينل جي رپورٽ موجب طلال اڪبر بگٽي جي ڄمار 63 سال هئي ۽ هو بلوچستان جي سرگرم سياستدان نواب محمد اڪبر بگٽي (مرحوم) جو پٽ هو، مرحوم سي ايم ايڇ ڪوئيٽا ۾ علاج هيٺ هو، جتي گذريل رات هن دم ڏنو.

 

گبر از بيڪ ۾ اڪشي ڪمار سان ڪم جو تجربو سٺو رهيو: شروتي هاسن

ممبئي (شوبز نيوز) اداڪاره شروتي هاسن چيو آهي ته هوءَ جڏهن پنهنجو پاڻ کي آئيني ۾ ڏسندي آهي ته ان کي پاڻ ۾ والدين جو عڪس نظر ايندو آهي، شروتي پنهنجي ايندڙ فلم گبر از بيڪ جي حوالي سان ڳالهيون ڪندي چيو ته فلم ۾ اڪشي ڪمار سان گڏ ڪم ڪرڻ جو تجربو سٺو رهيو ۽ هو ڄاڻي ٿو ته ٻين جي صلاحيتن کي ڪيئن ٻاهر آڻبو آهي، هن چيو ته هن کي اداڪاري وانگر ڳائڻ به پسند آهي، هن چيو ته هو هن کي لڳي ٿو ته هن ۾ پنهنجي والده ساريڪا ۽ والد ڪمل هاسن جهڙي اداڪاري واريون صلاحيتون موجود آهن، هن چيو ته سندس خواهش آهي ته جڏهن ان جي شادي ٿئي ته جلد ئي ٻار به ٿي وڃن ۽ هو مصروف ٿي وڃي، شروتي چيو ته جيڪڏهن سندس شادي فلمي شخصيت سان ٿي ته ان ۾ ڪو به حرج ناهي.

 

سوناڪشي مالديپ ۾، چئن ڏينهن ۾ 400 تصويرون ڪڍرايون

ممبئي (شوبز نيوز) سوناڪشي سنها مالديپ ۾ چئن ڏينهن جي موڪل گذاري واپس اچي وئي، ذريعن مطابق سوناڪشي مالديپ ۾ چئن ڏينهن ۾ پنهنجون 400 تصويرون ڪڍرايون، جنهن جي باري ۾ سوناڪشي جو چوڻ آهي ته هن کي  فوٽو گرافي پسند آهي ۽ مالديپ جي حسن ۾ پنهنجو شوق پورو ڪيو، هڪ سوال جي جواب ۾ هن چيو ته هن کي گوا، ڪيراله ۽ چلن جي موسم پسند آهي ۽ سمنڊ ڪناري به سندس پسنديده جاءِ آهي، هن چيو ته سير تفريح لاءِ ايندڙ ايجنڊا ۾ بالي، مراڪش، هاملس، ٽوڪيو، وينس ۽ يٽيڪن سٽي شامل آهن.

 

منور ظريف جي 39هين ورسي سڀاڻي ملهائي ويندي

فيصل آباد (شوبز نيوز) 36 سالن جي عمر ۾ لاڏاڻو ڪري ويل فلم انڊسٽري جي نالي واري اداڪار منور ظريف جي 39هين ورسي (سڀاڻي) ربع تي ملهائي ويندي، منور ظريف 29 اپريل 1976ع ۾ لاڏاڻو ڪري ويو هو، سندس مداح قرآن خواني ۽ اجتماعي دعائن جون تقريبون منعقد ڪندا، جڏهن ته مرحوم جي قبر تي قلن جي چادر چاڙهي ويندي، منور ظريف 2 فيبروري 1940ع تي گوجرانوالا ۾ پيدا ٿيو هو، نالي واري ڪاميڊين ظريف جو ڀاءُ هو، هن 16 سالا فلمي ڪيريئر ۾ 300 کان وڌيڪ اردو ۽ پنجابي فلمن ۾ اداڪاري جا جوهر ڏيکاريا.

 

پريانڪا چوپڙا 10 ڪروڙ رپين جو معاوضو نه ملڻ تي ريالٽي شو جي جج بڻجڻ کان انڪار ڪري ڇڏيو

ممبئي (شوبز نيوز) پريانڪا چوپڙا هڪ ريالٽي شو جا 10 ڪروڙ رپيا معاوضو نه ملڻ تي ريالٽي شو جي جج بڻجن کان انڪار ڪري ڇڏيو، ذريعن مطابق پريانڪا چوپڙا کي گانن جي ريالٽي شو ”دي وائس“ جي جج بڻجڻ جي آڇ ڪئي وئي، جنهن تي اداڪاره چيو ته جيڪڏهن هن کي 10 ڪروڙ رپين جو معاوضو ڏنو وڃي ته پوءِ هو جج بڻجڻ لاءِ تيار آهي، جڏهن ته پروگرام جي پروڊيوسر چيو ته ايترو وڌيڪ معاوضو چينل جي برداشت کان ٻاهر آهي، پريانڪا جو موقف آهي ته ان فيس جي تڪرار تي نه پر سندس شيڊول مصروف آهي ۽ هوءَ پروگرام لاءِ وقت نه پئي ڪڍي سگهي، پريانڪا پنهنجو نئون گانو پڻ رليز ڪرڻ واري آهي.

 

ڪاميابي لاءِ هر رانديگر کي ڪردار ادا ڪرڻو پوندو: مصباح الحق

کلنا (اسپورٽس نيوز) پاڪستان ٽيسٽ ٽيم جي اڳواڻ ۽ اسٽار بيٽسمين مصباح الحق چيو آهي ته سندس ٽيم بنگال ٽائيگرز کي ٽيسٽ سيريز ۾ شڪست ڏيڻ لاءِ تيار آهي، هن چيو ته سندس ٽيم تجربي ڪار رانديگرن تي ٻڌل هڪ  مضبوط ٽيم آهي، جيڪا ڪنهن به وقت ميچ جو رخ تبديل ڪرڻ جي ڀرپور صلاحيت رکي ٿي، هن چيو ته بنگلاديشکي ٻن ٽيسٽ ميچن جي سيريز جي پهرين ميچ ۾ شڪست ڏيڻ لاءِ هاڪاري سوچ ۽ جارحاني حڪمت عملي تحت ميدان ۾ لهندي، هن چيو ته ڪپتان طور منهنجي ڪارڪردگي تمام اهم هوندي، ٻئي پاسي بنگلاديشي ٽيسٽ ٽيم جي ڪپتان مشفيق الرحيم چيو آهي ته ون ڊي سيريز ۽ واحد ٽي ٽوئنٽي ميچ ۾ تاريخي ڪاميابي کان پوءِ ٽيم جو مورال بلند آهي ۽ هاڻي رانديگر گرين شرٽس خلاف ٽيسٽ سيريز جي چيلينج کي منهن ڏيڻ لاءِ تيار آهي، ميڊيا سان ڳالهائيندي پاڪستاني ٽيم جي ڪپتان چيو ته بنا ڪنهن شڪ جي بنگلاديش جي ٽيم سٺي راند کيڏي رهي آهي ۽ ان کي تجربي ڪار رانديگرن جون خدمتون حاصل آهن، هن چيو ته اسان جي ٽيم جو ڪمبي نيشن تمام سٺو ٿي ويو آهي ۽ اسان ڀرپور مقابلي لاءِ تيار آهيون ۽ ڪاميابي لاءِ هر رانديگر کي ڪردار ادا ڪرڻو پوندو، واضح رهي ته پاڪستان ۽ بنگلاديش جي ٽيمن وچ ۾ ٻن ميچن تي ٻڌل سيريز جي پهرين ميچ ۾ (اڄ) اڱاري تي مقابلو ٿيندو.

 

پاڪستان ۽ بنگلاديش جي ڪرڪيٽ ٽيمن وچ ۾ پهرين ٽيسٽ اڄ کان شروع ٿيندي

کلنا (اسپورٽس نيوز) پاڪستان ۽ بنگلاديش جي ڪرڪيٽ ٽيمن وچ ۾ ٻن ٽيسٽ ميچن تي مشتمل سيريز جي پهرين ٽيسٽ (اڄ) اڱاري کان شيخ ابو ناصر اسٽيڊيم کلنا ۾ شروع ٿيندي،ميچ پاڪستاني وقت مطابق صبح  جو 9 وڳي شروع ٿيندي، پاڪستاني ٽيم مصباح الحق جي اڳواڻي ۾ ميدان ۾ لهندي، بنگلاديش ڪرڪيٽ ٽيم جي ڪپتان چيو آهي ته سندس ٽيم مڪمل طور تي فٽ ۽ ڀرپور فارم ۾ آهي ۽ پاڪستاني ٽيم کي پهرين ٽيسٽ ميچ ۾ شڪست ڏيندي، واضح رهي ته ٻنهي ٽيمن وچ ۾ سيريز جي ٻي ۽ آخري ٽيسٽ 6 مئي کان 10 مئي تائين شير بنگلا اسٽيڊيم ميرپور ۾ کيڏي ويندي