تازيون خبرون

Daily Archives: April 28, 2015

عام چونڊون شفاف هيون يا نه: جڊيشل ڪميشن جو سوالنامو جاري

اسلام آباد (بيورو) جڊيشل ڪميشن، 2013ع جي عام چونڊن ۾ مبينا ڌانڌلين بابت سياسي جماعتن کي لکت ۾ سوالنامو جاري ڪندي ٻن ڏينهن اندر جواب طلب ڪري ورتو آهي. چيف جسٽس آف پاڪستان جسٽس ناصر الملڪ جي صدارت هيٺ عام چونڊن۾ مبينا ڌانڌلين جي جاچ بابت جوڙيل عدالتي ڪميشن جو اجلاس ٿيو. اجلاس دوران جڊيشل ڪميشن پاران گذريل عام چونڊن ۾ حصو وٺندڙ سمورين سياسي جماعتن کي لکت ۾ سوالنامون جاري ڪيو ويو آهي. جوڊيشل ڪميشن پاران سياسي جماعتن کان پهرئين سوال ۾ پڇيو ويو آهي ته گذريل عام چونڊون اڻ ڌريون ۽ شفاف هيون يا نه، جيڪڏهن نه ته ان جو سبب ڪهڙو هو؟ ٻيو نمبر سوال اهو آهي ته ڇا 2013ع وارين چونڊن ۾ منظم طريقي سان ڌانڌليون ڪيون ويون، جيڪڏهن ها ته آخر اهو منصوبو ڪنهن جوڙيو ۽ ان تي عمل ڪنهن ڪرايو؟ سوالنامي ۾ اهو به پڇاڻو ڪيو ويو آهي ته ڌانڌلين  جي رٿابندي تي عملدرآمد لاءِ ڪهڙو طريقو استعمال ڪيو ويو؟ جڊيشل ڪميشن جي سوالنامي موجب،ڌانڌليون رڳو قومي اسيمبلي جي سيٽن تي ٿيون يا سمورين سيٽن ۽ اهي سمورن صوبن ۾ ٿيون آهن يا ڪنهن مخصوص صوبي ۾ ٿيون آهن؟ جڊيشل ڪيمشن سمورين سياسي جماعتن کي ٻن ڏينهن اندر ڄاڻايل سوالن جا جواب جمع ڪرائڻ ۽ الزامن جي حمايت ۾ مواد، دستاويز ۽ شاهدن جي نشاندهي ڪرڻ جي هدايت ڪئي آهي.

 

ڌانڌلين جا ثبوت ٿيلهن ۾ بند آهن ته ڪپتان 2013 کان ڇا گڏ ڪيو : پرويز رشيد

اسلام آباد (بيورو) سـُڌ سماءَ  واري وفاقي وزير پرويز رشيد چيو آهي ته جيڪڏهن ڌانڌلين جا ثبوت ٿيلهن ۾ موجود آهن ته پوءِ تحريڪ انصاف 2013 کان ڇا گڏ ڪيو آهي، خيبرپختونخواهه ۾ ٻوڏ سبب ماڻهو مرن پيا، وڏو وزير پرويز خٽڪ غائب آهي، عمران خان ٻڌائي ته اهو اسلام آباد ۾ ڇا پيو ڪري.؟ عمران خان جي جڊيشل ڪميشن ۾ پيشيءَ بعد رد عمل ظاهر ڪندي وفاقي وزير پرويز رشيد چيو ته ڪپتان مسلسل ڪوڙ ڳالهائين پنهنجو اعتبار وڃائي چڪو آهي، خان صاحب ٻڌائي ته آخر ڪيسائين ڪوڙ ڳالهائيندو رهندو.؟ هن چيو ته جيڪڏهن ڌانڌلين جا ثبوت ٿيلهن ۾ موجود آهن ته پوءِ تحريڪ انصاف واران 2013 کان ڇا گڏ ڪيو آهي، ڪپتان ڪڏهن چوي ٿو ته ڌانڌلين جا ثبوت وٽس موجود آهن، ڪڏهن وري ٿيلها ڀريل هئڻ جي ڳالهه ڪري پيو، سندس ڳالهيون سمجهه کان ٻاهر آهن. پرويز رشيد چيو ته لاهور جي قومي تڪ اين اي هڪ سئو 22 تي ٿيلهيا کوليا ويا ته عمران خان کي آئينو نظر اچي ويو. وفاقي وزير وڌيڪ چيو ته خيبرپختونخواهه ۾ ماڻهو مرن پيا، پرويز خٽڪ ڪٿي غائب آهي ۽ عمران خان اسلام آباد ۾ ڇا ڪري پيو.؟ پرويز رشيد چيو ته عمران خان هاڻي ڌانڌلين جي پـَچـَر ڇڏي خيبرپختونخواهه جي ٻوڏ متاثرن جي وڃي واهر ڪري.

 

سپريم ڪورٽ 18هين آئيني ترميم بابت درخواست اڪلائي ڇڏي

اسلام آباد (بيورو) سپريم ڪورٽ، 18هين آئيني ترميم بابت درخواست اڪلائي ڇڏي،جڏهن ته 21هين آئيني ترميم ۽ فوجي عدالت خلاف داخل درخواستن تي ٻڌڻيون جاري آهن. چيف جسٽس، جسٽس ناصر الملڪ جي سربراهي ۾ سپريم ڪورٽ جي 17 رڪني بينچ 18هين ۽ 21هين آئين ترميمن توڙي فوجي عدالتن خلاف داخل درخواستن تي ٻڌڻي ڪري رهي آهي. ٻڌڻي شروع ٿي ته سپريم ڪورٽ بار جي وڪيل نديم احمد ايڊووڪيٽ 18هين آئيني ترميم خلاف داخل ڪرايل درخواست واپس ورتي، جنهن بعد عدالت ڪيس اڪلائي ڇڏيو. ان موقعي تي عاصمه جهانگير دليل ڏيندي چيو ته سپريم ڪورٽ بار کي 18هين ترميم تي خدشا آهن پر ڪجهه سببن جي ڪري هو درخواست واپس وٺي رهيا آهن. عاصمه جهانگير چيو ته ججن جي مقرري تي به خدشا هئا، جنهن بعد فارمولو تيار ڪري حڪومت کي موڪليو ويو آهي. سپريم ڪورٽ ۾ 18هين آئيني ترميم واري درخواست اڪلائجڻ بعد فوجي عدالتن ۽ 21هين آئيني ترميم بابت داخل درخواستن تي ٻڌڻي جاري آهي.

 

خيبر پختون خواهه جي برسات متاثرن لاءِ اڄ 2 ڪروڙ رپين جو امدادي سامان اماڻيو ويندو:سنڌ سرڪار

ڪراچي (اسٽاف رپورٽر) سنڌ سرڪار پاران ڪي پي ڪي جَي برسات متاثرن لاءِ اڄ 2 ڪروڙ رپين جو امدادي سامان اماڻيو پيو وڃي، وڏي وزير سيد قائم علي شاهه چيو آهي ته خيبر پختونخواهه جَي برسات متاثرن جِي هر ممڪن مدد ڪئي ويندي. ڪراچي مان جاري ڪيل بيان ۾ سنڌ جي وڏي وزير سيد قائم علي شاهه ڪي پي ڪي ۾ برسات سبب ٿيل جاني ۽ مالي  نقصان تي ڏک جو اظهار ڪيو. سندس چوڻ هو ته برسات متاثرن لاءِ شروعاتي طور 2 ڪروڙ رپين جو امدادي سامان اڄ ڪي پي ڪي اماڻيو پيو وڃي. قائم علي شاهه چيو ته ڏکئي وقت ۾ هو ڪي پي ڪي جي ڀائرن سان گڏ آهن، سندن هر ممڪن مدد ڪئي ويندي. وڏي وزير طوفاني برساتن ۾ زخمي ٿيلن جي جلد صحتيابي لاءِ دعا پڻ گهري.

 

سنڌ سروس ٽربيونلز جي چيئرمين ۽ ميمبرن جي ملازمت جي مدت 3 سالن بدران 2 سال ڪئي وئي ، بل منظور

ڪراچي (اسٽاف رپورٽر ) سنڌ اسيمبلي جو اجلاس ڪالهه سومر ڏينهن صبح جو 10 وڳي اسپيڪر آغا سراج دراني جي صدارت هيٺ شروع ٿيو، اجلاس ۾ هڪ بل اتفاق راءِ سان منظور ڪيو ويو جنهن تحت سنڌ سروس ٽربيونلز جي چيئرمين ۽ ميمبرن جي ملازمت جي مدت 3 سالن بدران 2 سال ڪئي وئي . هي بل ( سنڌ سروسز ٽربيونلز ٻيو ترميمي ايڪٽ 2015 )ع سڏائيندو. جنهن تحت سنڌ حڪومت ٽربيونلز جي چيئرمين ۽ ٻن ميمبرن جي مقرري چيف جسٽس سنڌ هاءِ ڪورٽ جي مشاورت سان ڪندي . ان مقرري جي مدت 2 سال هوندي ۽ اها مقرري صرف هڪ ڀيرو جي لاءِ هوندي . ان کان اڳ سنڌ اسيمبلي ۾ انڊس يونيورسٽي آف هيلٿ سائنسز جي قيام جو بل متعارف ڪرايو ويو جڏهن ته ٿر ڊولپمينٽ اٿارٽي ۽ ڪوهستان ڊولپمينٽ اٿارٽي جا بل لاڳاپيل اسٽينڊنگ ڪميٽن حوالي ڪيا ويا. اهي ڪميٽيون 15 ڏينهن اندر پنهنجي رپورٽ پيش ڪنديون . سنڌ اسيمبلي کي ٻڌايو ويو ته گورنر سنڌ پوسٽ گريجوئيٽ ڪاليج آف ميڊيڪل سائنسز سنڌ بل 2014 پنهنجي پيغام سان گڏ ٻيهر غور ڪرڻ جي لاءِ واپس ڪري ڇڏيو آهي. اسيمبلي گورنر جي پيغام جي منظوري ڏيندي بل جي به ٻيهر منظوري ڏئي ڇڏي

 

سنڌ حڪومت ، پوليس ، رينجرز ۽ اليڪشن ڪميشن مبارڪباد جا مستحق آهن: شرجيل ميمڻ

ڪراچي (اسٽاف رپورٽر ) شرجيل انعام ميمڻ چيو ته سنڌ حڪومت ، پوليس ، رينجرز ۽ اليڪشن ڪميشن مبارڪباد جا مستحق آهن پر ضمني اليڪشن جي دوران جيڪو ماحول خراب ٿيو ان کي ڪير به پسند نه ڪندو جڏهن ڪنٽينرز جو ماحو هلي رهيو هو ۽ اتي جيڪا ٻولي استعمال ٿي رهي هئي ان تي مون عمران خان کي چيو هو ته پنهنجي ٻولي ۾ شائستگي آڻي ، بد تميزي ۽ گار گند نه ٿيڻ گهرجي، تنقيد اخلاق جي دائري ۾ ٿيڻ گهرجي . هن چيو ته آچر تي لياري م تاريخي جلسو ٿيو . هن چيو ته مشرف/ دور ۾ لياري ۾ منشيات ۽ گينگ وار شروع ڪرائي وئي ته جيئن لياري کي بدنام ڪيو وڃي ، هن چيو ته لياري جا ماڻهو امن پسند آهن مان پوليس ۽ رينجرز کي سلام ٿو پيش ڪيان جن لياري ۾ 90 سيڪڙو گند ختم ڪرايو آهي، ڪالهه وارو جلسو انهن ماڻهن جي لاءِ جواب آهي جيڪي پي پي جي خلاف پروپيگندا ڪندا هئا .

 

جڊيشل ڪميشن کي منجهائڻ جي سازش ڪئي پئي وڃي: عمران خان

اسلام آباد (بيورو) تحريڪ انصاف جي سربراهه عمران خان چيو آهي ته ڌانڌلين جي جاچ لاءِ جڙيل ڪميشن کي ڪم کان روڪڻ جي سازش ٿي رهي آهي، ڌانڌلين جا ثبوت ٿيلهن ۾ موجود آهن، ڪميشن جو فيصلو اچڻ سان تاريخ بدلجي ويندي. اسلام آباد ۾ جڊيشل ڪميشن جي ڪارروائي بعد ميڊيا سان ڳالهائيندي عمران خان چيو ته  ايڪويهه پارٽين تسليم ڪيو ته ڌانڌلي ٿي آهي، ن ليگ ٻڌائي ته کين 15 ملين ووٽ ڪيئن مليا؟ هن چيو ته ڌانڌلين جا سمورا ثبوت ٿيلهن ۾ موجود آهن، ٿيلهن جي جاچ هڪ هفتي اندر مڪمل ڪئي ويندي. عمران خان چيو ته نواز شريف هري پور ۾ هڪ جلسي کي خطاب دوران پاڻ به تسليم ڪيو ته ڌانڌلي ٿي آهي. عمران خان جو چوڻ هو ته جڊيشل ڪميشن کي منجهائڻ جي سازش ڪئي پئي وڃي. عمران خان جو چوڻ هو ته اڄ اعتزاز احسن جو تڪ کولڻ جي ڳالهه ڪئي هئي.

 

پشاور، نوشهره ۽ چارسده ۾ برسات جا راڱا، فوتين جو انگ 45 ٿي ويو

پشاور (م.ڊ) نوشهره ۽ چارسده ۾ سڄي رات ڳڙَي سان تيز برسات جو سلسلو جاري رهيو، مختلف حادثن ۾ فوت ٿيلن جو انگ 45 ٿي ويو، متاثر علائقن ۾ امدادي ٽيمون ڪاررواين ۾ مصروف آهن. وزيراعظم پاران زخمين کي بهتر طبي سهولتون فراهم ڪرڻ ۽ امدادي ادارن کي بحالي جون سرگرميون تيز ڪرڻ جي هدايت ڪئي وئي آهي….. پشاور ۽ ڀرپاسي وارن علائقن ۾ طوفاني برسات تباهي مچائي ڇڏي آهي، ڪيترن ئي ڪچن گهرن جون ڇتيون اڏامي ويون جڏهن ته ڪيترائي گهر پڻ ڊهي پٽ ٿي ويا. تيز هوائن سبب ڪيترن ئي علائقن ۾ بجلي جا ٿنڀا ڪري پيا آهن، جنهن سبب سمورو مواصلاتي نظام درهم برهم ٿي ويو آهي.. مختلف علائقن ۾ گهرن جون ڇتيون ۽ ديوارون  ڪرڻ توڙي مختلف واقعن ۽ حادثن ۾ چئن ٻارڙن سميت 45 ڄڻا فوت ۽ 3 سو کان وڌيڪ ماڻهو زخمي ٿي پيا، جڏهن ته ليڊي ريڊنگ اسپتال سميت شهر جي سمورين اسپتالن ۾ ايمرجنسي لاڳو ڪئي وئي آهي موسميات کاتي جو چوڻ آهي ته ايندڙ 24 ڪلاڪن تائين شهر ۽ ڀرپاسي جي علائقن ۾ وقفي وقفي سان برسات جو سلسلو جاري رهندو. هوڏانهن وزيراعظم نواز شريف، وقتي صدر ميان رضا رباني، تحريڪ انصاف جي سربراهه عمران خان، اڳوڻي صدر آصف علي زرداري، پيپلز پارٽي جي چيئرمين بلاول ڀٽو زرداري، ايم ڪيو ايم سربراهه الطاف حسين، پنجاب جي وڏي وزير شهباز شريف ۽ ٻين اڳواڻن انساني جانين جي ضايح ٿيڻ تي ڏک جو اظهار ڪيو آهي. وزيراعظم نواز شريف زخمين کي بهتر طبي سهولتون فراهم ڪرڻ ۽ امدادي ادارن کي بحالي جون سرگرميون تيز ڪرڻ جي هدايت ڪئي آهي…..

 

سنڌ اسيمبلي ۾ دهشتگردي جو خطرو، اسپيڪر ڊي جي رينجرز ۽ آءِ جي سنڌ کي خط لکي ڇڏيو

ڪراچي (اسٽاف رپورٽر ) اسپيڪر سنڌ اسيمبلي آغا سراج دراني چيو آهي ته سنڌ اسيمبلي کي سيڪيورٽي جا سخت خطرا درپيش آهن . اهڙو اظهار هن ڪالهه اسيمبلي اجلاس دوران ڪيو ، هن چيو ته ڊي جي رينجرز ۽ آءِ جي سنڌ پوليس کي پڻ ان حوالي سان خط لکيو آهي ۽ انهن کي چيو آهي ته سنڌ اسيمبلي کي فول پروف سيڪيورٽي فراهم ڪئي وڃي . اسپيڪر چيو ته ڊي جي رينجرز ۽ سنڌ  پوليس کي ٻڌايو آهي ته ڪهڙن هنڌن تان اسيمبلي کي خطرا ٿي سگهن ٿا. اسيمبلي جي چوڌاري وارا رستا غير محفوظ آهن. هن چيو ته اسيمبلي جي وڏي اهميت آهي ان ڪري مان ايوان کي اعتماد ۾ وٺي رهيو آهيان . مخالف ڌر جي اڳواڻ شهر يار خان مهر چيو ته مون کي به خطرو آهي پر حڪومت مون کي سيڪيورٽي فراهم نٿي ڪري جيڪو منهنجو استحقاق آهي. هن چيو ته اسيمبلي کي ته محفوظ بنايو ٿو وڃي پر اسان جي تحفظ جو ڪنهن کي به خيال ناهي . اسپيڪر آغا سراج دراني چيو ته اسان حڪومت کي لکنداسين ته هو توهان کي سيڪيورٽي فراهم ڪري . اطلاعات واري وزير شرجيل انعام ميمڻ حڪومت پاران مخالف ڌر جي اڳواڻ کي سيڪيورٽي فراهم ڪرڻ جي يقين دهاني ڪرائي.

 

غازي رشيد قتل ڪيس؛ پرويز مشرف جي نئين ميڊيڪل رپورٽ عدالت ۾ پيش

اسلام آباد (بيورو) غازي عبدالرشيد قتل ڪيس ۾ اڳوڻي صدر پرويز مشرف جي نئين ميڊيڪل رپورٽ اسلام آباد هاءِ ڪورٽ ۾ پيش ڪئي وئي،جڏهن ته ڪيس جي ٻڌڻي 5 مئي تائين ملتوي ڪئي وئي. اسلام آباد جي مقامي  عدالت ۾ غازي عبدالرشيد قتل ڪيس جي ٻڌڻي ٿي. ٻڌڻي دوران پرويز مشرف جي وڪيل اڳوڻي صدر جي نئين ميڊيڪل رپورٽ پيش ڪندي چيو ته ميڊيڪل بورڊ پرويز مشرف کي سفر ڪرڻ کان روڪيو آهي،جنهن سبب هـُو عدالت ۾ پيش نه ٿو ٿي سگهي. هن عدالت کي گذارش ڪئي ته پرويز مشرف کي حاضري کان ڇوٽ ڏني وڃي جنهن تي فريادي جي وڪيل اعتراض ڪندي چيو ته جڏهن اڳوڻو صدر ٽي وي انٽرويوز ڏئي سگهي ٿو ته عدالت ۾ پيش ڇو نه ٿو ٿي سگهي؟ ان کانپوءِ عدالت غازي عبدالرشيد قتل ڪيس جي ٻـُڌڻي پنج مئي تائين ملتوي ڪري ڇڏي.