تازيون خبرون

Daily Archives: April 22, 2015

گلگت بلستان ۾ عام چونڊن جي شيدول جو اعلان، پولنگ 8 جون تي ٿيندي

اسلام آباد(اي پي پي) گلگت بلتستان جي عام چونڊن جون شيڊول جاري ڪيو ويو آهي، جنهن مطابق 8 جون تي پولنگ ٿيندي. اليڪشن ڪميشن گلگت بلتستان طرفان جاري ڪيل نوٽيفڪيشن مطابق رٽرننگ آفيسر طرفان اميدوارن کان نامزدگي ڪاغذ 26 ۽ 27 اپريل تي وصول ڪيا ويندا، جن جي ڇنڊڇاڻ 28 اپريل کان 4 مئي تائين ڪئي ويندي. رٽرننگ آفيسرن طرفان نامزدگي ڪاغذن جي رد يا منظور ٿيل خلاف اپيلون 8 مئي تي داخل ڪيون وينديون، جڏهن ته ٽرنبيونل طرفان اپيلون 15 مئي تائين اُڪلايون وينديون. نامزدگي ڪاغذ 16 مئي تي واپس وٺي سگهبا جڏهن ته اميدوارن جي حتمي فهرست 17 مئي تي جاري ڪئي ويندي، جڏهن ته پولنگ 8 جون سومر ڏينهن ٿيندي.

 

پريانڪا چوپڙا جي فلم“ ميري ڪوم” عالمي ايوارڊ پنهنجي نالي ڪري ڇڏيو

ممبئي(شوبز نيوز)  ڀارتي ميڊيا مطابق بالي ووڊ حسينا پريانڪا چوپڙا جي فلم “ميري ڪوم” عالمي ايوارڊ پنهنجي نالي ڪري ڇڏيو. ڀارتي ميڊيا مطابق “ميري ڪوم” کي اسٽاڪ هوم انٽرنيشنل فلم فيسٽيول جونئير“ايس آئي ايف ايف جي” ۾ بهترين فلم قرار ڏيندي “برونز هارس ايوارڊ” ڏنو ويو جڏهن ته ان موقعي تي فلم جي هدايتڪار جو چوڻ هو ته  اهوايوارڊ ماڻڻ مون لاءِ ۽ منهنجي سٿ لاءِ وڏو اعزاز آهي.

 

عامر خان کي آخرڪار پنهنجي نئين فلم لاءِ ڌيءَ ملي وئي

ممبئي(شوبز نيوز) نئين فلم دنگل ۾ ڌيءُ جي ڪردار لاءِ ڍيڍ هزار ڇوڪرين جا آڊيشن ورتا ويا ۽ آخر ڪار عامر خان کي پنهنجي نئين فلم دنگل ۾ ساڻس ڌيءُ وارو ڪردار نڀائيندڙ ڇوڪري ملي وئي. مسٽر پرفيڪٽ ٺاهي رهيو آهي هڪ  ريسلر جي زندگي تي گهمندڙ فلم دنگل، جنهن ۾ پاڻ هوندو هڪ صحتمند پهلوان، جنهن جي ڪري عامر خان پنهنجو وزن به وڌايو آهي. ڳولا هئي ان ڇوڪري جي جيڪا نڀائي فلم ۾ عامر خان جي ڌيءُ جو ڪردار. ان مقصد جي ڪري ڍيڍ هزار ڇوڪرين جا آديشن به ورتا ويا.ڀارتي ميڊيا مطابق ايترو پئسو وڃائڻ کانپوءِ مسٽر چوزي کي آخر ڪار ملي وئي اها ڇوڪري جنهن جو تعلق هريانا سان ٻڌايو پيو وڃي ۽ هاڻي عامرخان فلم جي عڪس بندي شروع ڪندو.

 

عالمي ٽي 20 ڪرڪيٽ لاءِ مضبوط ٽيم تيار ڪنداسين: عبدالرزاق

اسلام آباد(اسپورٽس نيوز) قومي بلائينڊ ڪرڪيٽ ٽيم جي نئين ڪوچ عبدالرزاق چيو آهي ته هو پاڪستان بلائينڊ ڪرڪيٽ ڪائونسلجي اعتماد تي پورو لهڻ جي ڀرپور ڪوشش ڪندو. هن جو سمورو ڌيان ايندڙ سال عالمي ٽي 20 ڪرڪيٽ ڪپ تي آهي، جنهن لاءِ مضبوط ٽيم کي تيار ڪنداسين. ”اي پي پي“ سان ڳالهيون ڪندي هن چيو ته ڪپتان طور هن پاڪستان ڪرڪيٽ ٽيم لاءِ پنهنجي 17 سالن جي ڪيريئر ۾ نمايان ڪاميابيون حاصل ڪيون. هن چيو ته پاڪستان بلائينڊ ڪرڪيٽ ڪائونسل تي اعتماد ڪندي کيس ڪوچ بڻايو آهي، جنهن تي پورو لهڻ جي ڪوشش ڪندس.

 

پاڪ – چين دوستي جو سال 2015ع چيني صدر جي دوري سان جُڙيل پاڪستان جي ترقي: جاويد ابڙو

ويهين ۽ ايڪهين اپريل 2015ع پاڪستان لاءِ اهي تاريخي ڏينهن آهن، جن کي وڏي اهميت ۽ خاص حيثيت ڏني پئي وڃي، ڇو ته 20هين اپريل تي چيني صدر زي جن پنگ جي اسلام آباد آمد ۽ اڄ پارليامينٽ جي گڏيل اجلاس کي سندس خطاب تاريخي موقعا ۽ خصوصي اهميت رکن ٿا، چيني صدر جي دوري دوران سڀ کان وڌيڪ ڌيان مختلف شعبن ۾ سيڙپڪاري ۽ سيڪيورٽي جي منصوبن تي ڏنو پيو وڃي. ڪالهه چيني صدر جيئن ئي پاڪستان جي سرزمين تي قدم رکيو ته ان وقت پاڪستان ۽ چين وچ ۾ واقعي تمام گهڻي ويجهڙائپ ۽ ڀائپي محسوس ڪئي وئي، جڏهن ملڪ جي اعليٰ قيادت صدر پاڪستان ممنون حسين، وزيراعظم نوازشريف، وفاقي وزيرن ۽ آرمي چيف جنرل راحيل شريف سميت هٿياربند فوج جي ٽنهي سربراهن چيني صدر زي جن پنگ جو گرمجوشي ۽ شاندار نموني استقبال ڪيو پئي ته ائين لڳو ڄڻ پاڪستان کي ترقي جي راهه تي آڻيندڙ حقيقي دوست تائين پهچڻ جي منزل ملي وئي آهي. اها نهايت سرهائي جي ڳالهه آهي ته پاڪستان ۽ چين وچ ۾ اقتصادي لنگهه تعمير ڪرڻ لاءِ اهم منصوبي تي اتفاق ڪيو پيو وڃي، جنهن جي تعمير تي لڳ ڀڳ 50 بلين آمريڪي ڊالرز جي برابر خرچ ايندو. ان منصوبي تحت پاڪستان جي ايراضي جي لحاظ کان سڀ کان وڏي صوبي بلوچستان ۾ گهري سمنڊ سان تعلق رکندڙ گوادر جي بندرگاهه کي چين جي خودمختيار اولهه واري علائقي سنڪيانگ سان جوڙيو ويندو. 3 هزار ڪلوميٽر ڊگهي منصوبي تحت مستقبل ۾ گوادر ۽ سنڪيانگ وچ ۾ نين شاهراهن ۽ ريل رستن سميت گئس ۽ تيل جون پائيپ لائينون پڻ وڇايون وينديون.

پاڪ چين اقتصادي لنگهه جو منصوبو ڪيترن ئي مرحلن بعد 2030ع تائين مڪمل ڪيو ويندو، ان منصوبي لاءِ وڌ کان وڌ رقم چيني سيڙپڪاري جي صورت ۾ پاڪستان کي فراهم ڪئي ويندي. ٻڌايو پيو وڃي ته منصوبن کي مڪمل ڪرڻ لاءِ مالي وسيلن ۾ قرض به شامل آهن، جن تي نرم شرط رکيل هوندا ۽ اها رقم بيجنگ حڪومت اسلام آباد انتظاميا کي فراهم ڪندي، پر اڃا اها ڳالهه واضح نه ڪئي وئي آهي ته اها رقم ڪيتري هوندي، جيڪا قرض جي مد ۾ ڏني ويندي. بهرحال، ان عظيم ترين اقتصادي ترقياتي منصوبي لاءِ پاڪستان رستن جي تعمير، بجلي جي پيداوار جي منصوبن ۽ سيڙپڪاري خطن لاءِ چين کي زمين فراهم ڪندو. اقتصادي لنگهه جي مختلف منصوبن تي عملدرآمد دوران پاڪستان پاڻ وٽ ڪم ڪندڙ چيني ڪارڪنن ۽ ماهرن جي حفاظت لاءِ خصوصي جٿن جو تعداد به وڌائي ڇڏيندو. چين گوادر جي بندرگاهه کي جديد ترين بڻائيندو، جنهن بعد پاڪستان ۽ چين وچ ۾فاصلو گهٽ ٿي ويندو، پر ان سان گڏوگڏ يورپ سان ٿيندڙ واپار تي ايندڙ لاڳت ۾ پڻ واضح ڪمي ڏسڻ ۾ ايندي. ان کانسواءِ پاڪستاني حڪومت جو اهو ارادو آهي ته اقتصادي لنگهه سان گڏوگڏ صنعتي پارڪ ۽ ڪاروباري ترقياتي خطن کي پڻ تعمير ڪيو وڃي، جنهن سان نه رڳو روزگار جا موقعا پيدا ٿيندا، پر اتي ملڪي ۽ غيرملڪي سيڙپڪاري کي به وڌيڪ پرڪشش بڻايو ويندو. چيني صدر زي جن پنگ جي دوري دوران پاڪستان ۽ چين ۾ 46 ارب ڊالرز جا معاهدا طئي ٿيڻ جو امڪان ظاهر ڪيو ويو، جن ۾ بنيادي ڍانچي، دفاع ۽ توانائي جا منصوبا شامل آهن. دوري دوران پاڪستان کي 8 چيني آبدوز به وڪرو ڪرڻ جو معاهدو طئي ڪيو ويندو. رڳو ان دفاعي معاهدي جي لاڳت 5 ارب ڊالرز آهي، پاڪستان ۽ چين وچ ۾ گهڻي عرصي کان آبدوز جي حوالي سان ڳالهيون هلنديون پئي آيون، اهڙي معاهدي بعد پاڪستان کي چيني آبدوز فراهم ڪيون وينديون، جيڪي پاڪ بحريه جي قوت ۾ ڀرپور اضافي جون ضامن هونديون. چين جيڪڏهن پاڪستان کي آبدوز ڏيڻ جو معاهدو طئي ڪري ڇڏي ٿو ته پوءِ هو شايد گوادر بندرگاهه تي مڪينڪل اسٽيشن جي تعمير لاءِ به ڪي سهولتون ڏئي سگهي ٿو. چين گوادر بندرگاهه کي پنهنجي آبدوز لاءِ اسٽيشن طور استعمال به ڪري سگهي ٿو ۽ اهڙي طرح چين هندي سمنڊ ۾ پنهنجي موجودگي ظاهر ڪري سگهي ٿو. جيڪڏهن ائين ٿئي ٿو ته بحر هند اهو واحد هنڌ هوندو، جتي چين ۽ ڀارت جون بحري فوجون هڪٻئي جي آمهون سامهون اچي سگهن ٿيون. گوادر بندرگاهه رستي چين تيل ۽ گئس برآمد ڪرڻ جو ارادو رکي ٿو، اهو لنگهه چين لاءِ ڊگهو، مهانگو به آهي ۽ جنگي حالتن ۾ ان کي تباهه ڪرڻ جا خطرا به موجود هوندا. اهو پڻ چيو پيو وڃي ته چين هن وقت بحري شاهراهه ريشم تعمير ڪرڻ تي غور ڪري رهيو آهي ۽ هو بحر هند کي بحرالڪاهل سان جوڙڻ چاهي ٿو. ٻئي طرف اقتصادي لنگهه پاڪستان جي صوبي بلوچستان کي ترقي ڏيڻ جو سستو طريقو ثابت ٿي سگهي ٿو. چين پاڪستان سان توانائي جي شعبي ۾ 34 ارب ڊالرز ۽ بنيادي ڍانچي جي تعمير ۾ 12 ارب ڊالرز خرچ ڪرڻ جو واعدو ڪري چڪو آهي. اها ڳالهه واضح آهي ته چين پاڪستان جو بهترين دوست، ساٿي ۽ اتحادي ملڪ آهي، ٻنهي ملڪن کي فولادي ڀائر پڻ سڏيو ويندو آهي، گذريل سال پاڪستان ۽ چين وچ ۾ واپار جو ڪاٿو 10 ارب ڊالر تائين پهچي ويو هو، جيڪو 2007ع ۾ 4 ارب ڊالرز جو هو.

چين جي سيڙپڪاري ۽ توانائي سميت مختلف منصوبن ۾ ڀرپور سهڪار سان پاڪستان لاءِ ترقيءَ جي راهه هموار ٿي سگهي ٿي ۽ خطي ۾ وڏي تبديلي اچي سگهي ٿي. جيڪا ڀارت ۽ آمريڪا کي به متاثر ۽ پريشان ڪري سگهي ٿي. پاڪ چين منصوبن سان خطي ۾ ترقي ۽ خوشحالي يقيني بڻجي ويندي، جيڪا خاص طور پاڪستاني عوام لاءِ لاڀائتي ثابت ٿيندي. اقتصادي ترقي، روزگار ملڻ ۽ غربت جي خاتمي سان بدامني تي ضابطو پڻ اچي سگهندو. ڇو ته چين جي ڪجهه علائقن ۾ به بدامني ٿيندي رهندي آهي، ان ڪري اهو پاڪستان جي بدامني وارن علائقن بابت به ڪافي ڄاڻ رکي ٿو ۽ کيس اهو احساس آهي ته غربت جي خاتمي سان ئي انهيءَ بدامني واري صورتحال کي منهن ڏئي سگهجي ٿو، مطلب ته پاڪستان ۽ چين وچ ۾ اقتصادي لاڳاپا وڌيڪ مضبوط ٿيڻ سان امن جو رستو کُلي ويندو. اها حقيقت آهي ته چين دنيا جي هڪ وڏي اقتصادي طاقت آهي ۽ پاڪستان سان اقتصادي ۽ معاشي منصوبن ۾ حصيداري ۽ مڪمل سهڪار سان آمريڪا ۽ ڀارت جي ڪجهه حلقن ۾ اهو تاثر ملي ٿو ته چين جا پاڪستان سان اقتصادي ۽ واپاري لاڳاپا خطي ۾ بيجنگ جي بالادستي جو سبب بڻجي سگهن ٿا، ان ڪري نه رڳو پاڙيسري ملڪ ڀارت پر ست سمنڊ پار آمريڪا به پاڪ چين دوستي ۽ اقتصادي لاڳاپن کي تعصب جي نگاهه سان ڏٺو آهي. چيني صدر کي گذريل سال پاڪستان جي دوري تي اچڻو هو، پر اسلام آباد ۾ ڌانڌلين خلاف تحريڪ انصاف جي ڌرڻي ۽ سياسي بدامني سبب سندس شيڊيول تبديل ڪيو ويو. ڪجهه عرصو اڳ ملڪ جي سياسي حلقن ان ڳالهه تي اعتراض به واريو هو ته نواز حڪومت چين سان اقتصادي لنگهه وارو منصوبو تبديل ڪري ڇڏيو آهي ۽ ان حوالي سان احتجاج پڻ ڪيو ويو. خيبرپختونخوا جي سياسي سماجي تنظيمن اهو مطالبو ڪيو هو ته سندن صوبو دهشتگردي ۽ جنگ سبب متاثر آهي، افغانستان ۾ 40 سالن جي جنگ جي ڪري صوبي جي معيشت ۽ بنيادي ڍانچي کي شديد نقصان رسيو آهي، ان ڪري چين سان اقتصادي لنگهه وارو منصوبو کين ڏنو وڃي ته جيئن ڪي پي ڪي ترقي ڪري. پر ان وقت وفاقي حڪومت اهو واضح ڪري ڇڏيو ته چين سان ٿيندڙ منصوبا قومي سطح تي ڪيا پيا وڃن، جن ۾ چئني صوبن جي حقداري آهي. ڪشمير، گلگت بلتستان سميت سڀني علائقن کي برابر موقعا ملندا.

هڪ طرف چين سان پاڪستان جا واپاري ۽ اقتصادي لاڳاپا آهن ته ٻئي طرف وري ايران سان گئس پائيپ لائين منصوبي تي دوري ڳڻتي جي ڳالهه آهي، موجوده حڪومت ئي اهو بيان جاري ڪيو هو ته چين ايران مان ايندڙ گئس منصوبي جي پائيپ لائين پاڪستان اندر تعمير ڪندو. پاڪستان جڏهن به توانائي جون ضرورتون پوريون ڪرڻ لاءِ ايران سان هٿ وڌايو ته آمريڪا ان تي اعتراض واريندو رهيو آهي، ڪجهه عرصو اڳ به آمريڪا پاڪستان کي خبردار ڪيو هو ته جيڪڏهن اسلام آباد تهران سان گئس پائيپ لائين منصوبي ۾ اڳڀرائي ڪئي ته کيس پابندين کي منهن ڏيڻو پئجي سگهي ٿو. پر هاڻي گذريل 31 مارچ تي ايران سان آمريڪا سميت دنيا جي 6 وڏين طاقتن جي معاهدي تي اتفاق ٿيڻ بعد صورتحال تبديل ڏسڻ ۾ اچي پئي. ايران تان عالمي قوتن جون پابنديون ختم ٿيڻ بعد پاڪستان کي ايران گئس پائيپ لائين تي اڳڀرائي ڪرڻ جو جواز ملي ويندو، ان ڪري اها ڳالهه به اڳيان رکڻ گهرجي ته پاڪستان کي نه رڳو چين پر ايران سان به گئس منصوبي تي عملي طور اڳڀرائي ڪرڻ گهرجي، چين به اهو اشارو ڏئي چڪو آهي ته هو پاڪ ايران گئس منصوبي جي تڪميل ۾ مدد ڪرڻ لاءِ تيار آهي. ايران ته پنهنجي ملڪي حدن ۾ گئس منصوبي لاءِ 900 ڪلوميٽرن جي لائين وڇائي ڇڏي آهي، پر پاڪستان اڃا تائين پائيپ لائين وڇائڻ جو ڪم شروع نه ڪيو آهي، پاڪستان گوادر کان نوابشاهه تائين چين جي سهڪار سان پائيپ لائين وڇائڻ جي ڳالهه ڪري چڪو آهي. ڀارت ته آمريڪي دٻاءُ سبب ايران سان منصوبي تي عمل ڪرڻ کان ڦري ويو، پر پاڪستان کي ايران سان معاهدي تي قائم رهڻ گهرجي ۽ ان معاملي ۾ چين کان مدد حاصل ڪرڻ گهرجي. پاڪستان ڪيترن ئي سالن کان بجلي جي پيداوار ۾ گهٽتائي ۽ طلب ۾ اضافي کي منهن ڏئي رهيو آهي، چين ۽ آمريڪا وچ ۾ واپار وڏي اهميت رکي ٿو ۽ گلوبل استحڪام لاءِ ٻئي ملڪ اسٽيڪ هولڊرز آهن ۽ ٻئي ملڪ وڏي احتياط سان هڪٻئي سان هلي رهيا آهن. پاڪستان کي قائم ٿيندي 67 سال گذري چڪا آهن، هاڻي وقت اچي ويو آهي ته ملڪ کي ترقيءَ جي راهه تي آڻجي، چاهي اقتصادي لنگهه هجي، روڊ رستن جي تعمير هجي، بجلي ۽ گئس جا منصوبا هجن يا ٻين مختلف شعبن ۾ سيڙپڪاري جا معاملا هجن، پاڪستان کي چين ۽ ايران جي لاڳاپن مان ڀرپور فائدو حاصل گهرجي، اميد آهي ته اسلام آباد انتظاميا چيني صدر زي جن پنگ جي دوري مان اربين ڊالرن جي منصوبن کي رڳو دستاويزن تائين محدود نه رکندي، پر انهن منصوبن کي عملي طور تي جلد کان جلد مڪمل ڪري عوام کي رليف فراهم ڪيو ويندو، اهڙن قدمن سان چين پاڪستان کي ترقي جي راهه تي آڻڻ ۾ ڀرپور مددگار ۽ 2015ع عملي طور تي پاڪ چين دوستي جو سال ثابت ٿيندو.

 

جذبن جو جلسو: سجاد مهر

سنڌوءَ مان وهنجي ڪنهن جل پريءَ جيان ڪراچي ڪالهه کان وري نوان نظارا ڏسڻ لڳي آهي. هوند نه ته ڪافي عرصي کان هِن رڳو بم ڌماڪا، گولين جي گونج ۽ ٽارگيٽ ڪلنگ جهڙا ڪيس ٿي ڏٺا. ڪجهه ڏينهن جي ماٺار تي ڪراچي سوچڻ لڳي آهي ته ڇا اهو سڀ ڪجهه ممڪن آهي. ڦر ۽ ڀتي خوريءَ کي آيل ڀِتِ، خاموش ٿي ويل ڪلاشنڪوفون ۽ ڳليءَ ڳليءَ مان ملندڙ بي گناهه ماڻهن جا لاش هاڻي ملڻ بند ٿي ويا آهن. ڪراچي سوچي رهي آهي ته هيءَ تبديلي مون ۾ آئي ڪٿان. سمنڊ سوچڻ لڳو آهي ته هيءَ موٽندڙ رونق ڪهڙي معجزي جو نمونو آهي. پکين جا ولر وڏي قطار ٺاهي سمنڊ مٿان سِپن کي سلام ڪري ايندڙ وقت جي اُجري اُميد جهڙيون نويدون ڏئي رهيا آهن. ڄمندڙ برف جيان جذبا هينئر وري پگهرجڻ لڳا آهن. منحوس رات پنهنجو منهن ڍڪڻ لڳي آهي. شهر جي اُجهامي ويل ڏيئن جي مدهم ٿي ويل روشنيءَ، فطرت جي فانوس سان وري ٽڪر کاڌو آهي. اها تبديلي ڪنهن هڪ تڪ جي ڳالهه ڪونهي، پر اهو احساس صدين کان ڪبوتر جهڙي ڪراچيءَ کي ڪنهن خونخوار شڪاريءَ جي اک واري تعاقب جيان حراس هيٺ رکيون ٿي آيو، جنهن کي هينئر جَمود واري حالت مان ٽوڙي پي ٽي آءِ عائشه منزل جهڙي اوائلي مقام تي جذبن جو هڪ جلسو ڪري ڏيکاريو آهي. شهر جا سائبان اهڙي سرگرميءَ تي مسلسل سوچ ۾ آهن. محبتن جا مڪين اغوا ٿي ويل احساسن تي هڪ ڀيرو وري نهارڻ لڳا آهن. نئين ڪراچي نئين انداز سان اُڀرڻ لڳي آهي. توڙي جو اين اي 246 وارو اهو هڪڙو تڪ آهي، جيڪو تقريباً يرغمال حالت ۾ هڪڙن جي هٿ هيٺ ئي رهندو آيو آهي، پر هينئر جڏهن خوف ۽ حراس واري هوا پنهنجو رويو ڪراچيءَ ۾ ڪجهه ڪامياب آپريشنز ڪرڻ کانپوءِ سک واري ساهه کڻڻ جهڙو بڻايو آهي، تڏهن کان چنڊ پيلو ٿيڻ ڇڏي ڏنو آهي. گونجندڙ گوڙ ۾ پراڻي پُل جيان ٿڙڪندڙ هتان جي يرغمال بڻيل ماڻهن جي حواسن تي اطمينان جا آثار نمايان نظر اچڻ لڳا آهن. هوند نه ته هتي ڪنهن پرڏيهي پکيءَ کي پَر هڻڻ جي اين او سي به ڪونه هوندي هُئي، پر هاڻي ڪراچيءَ مان ”هٿيارن ۽ همراهن“ جو هٿيڪو ٿيڻ کانپوءِ اهو ممڪن ٿيو آهي ته ڪنهن به بڻايل ”نوگو ايريا“ ۾ هتان جو عوام نه رڳو وڃي سگهي ٿو، پر پنهنجي خيالن جو اظهار به ڪري سگهي ٿو. سبب اهو ئي آهي جو هڪ پاسي کان اها للڪار ٿي آهي ته اسان سيٽ کٽڻ لاءِ نه پر ڪراچيءَ مٿان لامارا ڏيندڙ خوف کٽڻ آيا آهيون. انهن مافيائن کي موٽ ڏيڻ آيا آهيون، جن هڪ طرف حالتن تي قبضو ڪيو ته ٻئي پاسي ملڪيتن ۽ ماڻهن جي ساههَ کڻڻ تي به. هو جيڪي ملڪ ٽوڙڻ جون ڌمڪيون ڏيندڙ آهن، 250 پنهنجن ئي معصوم ماڻهن کي پنهنجي مفاد خاطر فيڪٽريءَ ۾ رک ڪندڙ آهن، انهن کي ڀسم ڪرڻ لاءِ نڪتا آهيون، جن هِن جُوءِ کي پنهنجن وڏن جي جاگير بڻائي ڇڏيو آهي. اها دهشتگردي ۽ دوکيبازي هاڻي وڌيڪ هلڻ نه ڏينداسين، ان ڪري اڳتي آيا آهيون ته جيئن پوئتي پيل ماڻهن کي جرئت واري واٽ تي هلائي سگهون.

رقاصه جهڙا پير ته سڀ وٽ هُجن ٿا، رهبر جو ڪم قوم کي سنجيدگيون ڏيڻ آهي. هي ڊرامي بازي ڪڏهن روئڻ، ڪڏهن کلڻ ۽ ڪڏهن وري بي سري آواز ۾ ڳائي ماڻهن کي ٻڌڻ تي مجبور ڪرڻ جو وقت ناهي. هاڻوڪو ماحول ڪنهن نئين احساس جو سَڏ ڏئي رهيو آهي، رات جا منحوس چٻرا جڏهن کان چرٻاٽ بند ڪري سناٽي واري ڪيفيت ۾ آيا آهن، تڏهن کان هن اُداس شهر مٿان سنجيدگيون لامارا ڏيڻ لڳيون آهن. اغوا ٿيل چنڊ چمڪي، سَمنڊ جي ڇُڙواڳ ڇولين سان ڄڻ ته شامون ملهائڻ لڳو آهي. برف جيان ڄَمي ويل ڪنهن مصور جي آڱرين جيان هاڻي دهشت ۽ خوف جا پورٽريٽ ٺهڻ گهٽجي ويا آهن. ويتر جو پي ٽي آءِ متحده جي گهر ۾ وڃي انصاف جو آواز اُٿاريو آهي ته لڳي ٿو نوسر بازي هاڻي مُنهن لڪائڻ لڳي آهي، طاقت جو اهو توازن بگڙجڻ جو الارم وڄڻ لڳو آهي. مير تقي مير جون سِٽون ان حوالي سان موجوده حالتن جي ڪهڙي نه سهڻي نموني سان نمائندگي ڪري رهيون آهن.

”وصل مين رنگ اُڙ گيا ميرا

هجر ڪو ڪيا مُنه دکائون گا.“

اهو معاملو به ناهي ته ڪو اها سيٽ کٽي ڪا ڌر سربراهيءَ جا خواب ڏسڻ لڳندي، ها پر ائين ضرور آهي ته اها رڃ مان رڙ آهي. اهو پڙاڏو اهڙي هنڌ تان ٿيڻ ۽ وڏي جرئت سان هڪ جذبي جو اُڀري اچڻ انهن آقائن جي منهن تي چماٽ جيان ضرور آهي، جيڪي جُوءِ کي پنهنجي جاگير سمجهي حڪمرانيءَ جون دعوائون ڪندا رهيا آهن. بقول اياز گل ته،

”سچ ڪاڻ ويڙهه ۾،

هڪ ڀي هزار جيان.“

اها ويڙهه جيڪا ڪوڙ ۽ سچ جي وچ ۾ وڙهي پئي وڃي، ان جي اهميت ان ڪري به آهي ته اهو ڪراچيءَ جي عوام جو ديرينه مطالبو به هو ته ويرين مان واندڪائي وٺائي وڃي. دهشت جيڪا جيئڻ جا سمورا گس جهليو بيٺي آهي، ان جي رستا روڪ ڪئي وڃي. ڀتاخوري جيڪا حرام خورن جي رڳن ۾ رت جيان ڊوڙي پئي، ان کي ٻنجو ڏنو وڃي ۽ ٽارگيٽ ڪلنگ جيڪو ڪراچيءَ جو نئون تعارف جوڙي رهي هئي، ان تعارف تي تقاضا جو ڪو تيرُ هلائي ماڻهن ۾ جيئڻ جو احساس نئين سِر اُڀاريو وڃي. ڪراچي قرب جي ڪليسا رهي آهي. دل جو ڪعبو، مَن جو مندر ۽ مسجد رهي آهي. اهڙي هنڌ تي خوف جي هيءَ فضا جيئڻ کان ڏيڻ جواب آهي. معصوم ماڻهن کي جڏهن هِن شهر جا ئي رولو ڏينهن ڏٺي جو ڏاڙهيندا رهن ته پوءِ ان جو علاج ڪرائڻ لاءِ ڪا ته اسپتال هُجي. ماڻهو مرندا موت کان مٿانهان پيدا ٿيندا وڃن. مُرڪو مهانگيون ۽ اُجرا روح عذاب هيٺ اچي لمحو لمحو ڄڻ ته ڏک جو ڏيک ڏئي رهيو آهي.

23 اپريل جو ڏينهن توڙي هڪ سيٽ جي مسافت آهي، پر اهو آغاز ٿي سگهي ٿو، اُن انتقام جو جيڪو ڪافي سالن کان هتان جي عوام مٿان نافذ ڪيو ويو آهي. عمران خان هڪ اميد کڻي نڪتو آهي، اها اميد جيڪا آهستگيءَ سان وڌي رهي آهي. اهڙي موقعي تي جڏهن سڀ جماعتون سمجهن به ٿيون ته ڪراچيءَ جي عوام تي هڪڙيءَ ڌر جو قهر نازل ڪيل آهي ته پوءِ سنجيده ڌريون اهو به سوچين پيون ته ڪنهن مفاهمت سان متحده جي اها دعويٰ ٽوڙي سگهجي ٿي. سراج الحق جو اهو چوڻ ان حوالي سان ته عمران اسان وٽ آيو ڪونهي، جي اچي ڪا ڳالهه ڪري ها ته سوچي سگهجي پيو. هوڏانهن (ن) ليگ جي حمايت توڙي جو جماعت اسلاميءَ لاءِ ڪنهن وڏي انگ جي اضافي جهڙي ڳالهه به ڪونهي، پر مخالفت کي مات ڏيڻ لاءِ پي ٽي آءِ جي پَلڙي کي ڀاري ڪري ڪراچيءَ جي عوام سان انصاف ممڪن ته آهي. وقت توڙي جو تمام ٿورو آهي، ان ڪري اها ڳالهه پنهنجي جاءِ تي هڪ سوال بڻيو بيٺي آهي ته ”جماعت“ عمران سان ملي متحده جي ان ٺاهيل مجسمي کي مروڙي سگهي ٿي، پر هي جيڪو خوف جي ٽوڙڻ وارو اشو آهي، ان ۾ ته پي ٽي آءِ ڪافي حد تائين ڪامياب به وَئي آهي. هار جيت کان وڌيڪ سوچڻ جي ڳالهه اها آهي ته هاڻي متحده کي پنهنجي گهر ۾ به لڳي آهي ۽ هوءَ توڙي جو پاڻ کي فاتح سمجهيو به ويٺي آهي، پر هيڏانهن عمران خان جي هلچل خوف جي بُت کي ڀورا ڀورا ڪري ڇڏيو آهي، جنهن جو ڪريڊٽ ڪراچيءَ جي عوام کي ئي ملڻو آهي.

 

چيني صدر جو دورو ۽ پاڪ-چين لاڳاپا

چين جي صدر زي جن پنگ جو پاڪستاني دؤرو انتهائي اهميت جوڳو آهي. انهيءَ دؤري دوران تاريخي معاهدا ٿيڻا آهن. جنهن وقت چيني صدر نور خان ايئربيس اسلام آباد پهتو ته کيس ايڪيهه توپن جي سلامي ڏني وئي ۽ سندس استقبال مُلڪ جي اعليٰ قيادت شاندار نموني ڪيو، جنهن ۾ صدر ممنون حسين، وزيراعظم نواز شريف، وفاقي وزير ۽ فوج جي سربراهن کان علاوه ٻيا اعليٰ عملدار شامل هُئا. ڪالهه صدر ممنون حسين جي دعوت ۾ شريڪ ٿيڻ کان پوءِ چيني صدر زي جن پنگ، وزيراعظم نواز شريف سان تفصيلي ملاقات ڪئي. چيني سربراهه جي دؤري جي حوالي سان وزيراعظم نواز شريف جو چوڻ هو ته چيني صدر جو دورو پاڪستان لاءِ ترقيءَ جي نئين دؤر جي شروعات آهي. وزيراعظم هائوس ۾ چين جي ٽن وڏين ڪمپنين چائنا وانينگ گروپ، انڊسٽريل اينڊ ڪمرشل بينڪ آف چائنا ۽ زونرجي ڪارپوريشن جي ٽاپ ايگزيڪيوٽو کي خطاب ڪندي وزيراعظم جو چوڻ هو ته حڪومت چيني ڪمپنين کي سندن منصوبن جي تڪميل جي لاءِ هر ممڪن مدد ڪندي. وزيراعظم اُن موقعي تي پاڪ چين اقتصادي راهداري معاهدي سميت ٻين منصوبن ۾ ڪردار ادا ڪرڻ تي چيني ڪمپنين جي ڪردار کي ساراهيو. سندس چوڻ هو ته پاڪستان توانائيءَ جي شديد بحران کي مُنهن ڏئي رهيو آهي ۽ حڪومت پاڪستاني عوام کي پنهنجي دورِ ۾ توانائي کوٽ کان نجات ڏيارڻ جو عزم ڪيو آهي، جڏهن ته توانائي جي سيڪٽر ۾ شروع ٿيندڙ منصوبن جي بروقت تڪميل تي به زور ڏنو پيو وڃي. وزيراعظم نواز شريف انڊسٽريل اينڊ ڪمرشل بينڪ آف چائنا جي طرفان پاڪستان ۾ اڪنامڪ زونز جي ممڪنه قيام تي به خوشيءَ جو اظهار ڪيو. چيني وفد جي ليڊر جو چوڻ هو ته پاڪ چين دوستي ٻنهي مُلڪن جي وچ ۾ بهتر واپاري لاڳاپا قائم ڪرڻ جي لاءِ هڪ شاندار پليٽ فارم آهي. هُن جو وڌيڪ چوڻ هو ته پاڪ چين اقتصادي راهداري جو حصو بڻجڻ تي نهايت خوش آهيون. ٻُڌايو پيو وڃي ته چيني سربراهه جي دوري دوران پاڪ چين اقتصادي راهداري متعلق اربين ڊالر ماليت جي سرمائيڪاري جي معاهدن جو اعلان ٿيندو. پاڪ چين اقتصادي راهداري جي منصوبي ۾ پاڪستان ۽ چين جي سرحد کان وٺي بلوچستان ۾ گوادر جي بندرگاهه تائين رستو ۽ ريل جي رابطن جي تعمير کان علاوه بجلي پيدا ڪرڻ جي منصوبن سميت ڪيترائي ترقياتي منصوبا شامل آهن. واضح رهي ته چين جو صدر اڄ پارليامينٽ جي گڏيل اجلاس کي پڻ خطاب ڪندو. چين، پاڪستان جو اُهو واحد دوست مُلڪ آهي، جنهن هر ڏُکي سُکيءَ ۾ ساٿ نڀايو آهي ۽ هن ڀيري جڏهن هيءُ مُلڪ دهشتگردي توڙي توانائيءَ جي بدترين بحران مان گُذري رهيو آهي، اهڙي وقت ۾ چين پاران سهڪار ڪرڻ نهايت ئي ساراهه جوڳو عمل آهي، جنهن سان نه رُڳو ترقيءَ جون راهون کُلنديون، پر دهشتگرديءَ جي جنگ ۾ اڪيلي هُجڻ واري احساس ۾ پڻ گهڻي گهٽتائي ايندي؛ جو چين نه رُڳو هن خطي جي هڪ سگهاري قوت بڻجي اُڀريو آهي، پر عالمي منڊي پڻ سندس محتاج بڻجي وئي آهي. ٻيو ته چين اُنهن ملڪن مان ناهي، جيڪي فقط پنهنجي فائدي کي ئي ترجيح ڏيندا آهن، جيئن آمريڪا آهي، جيڪو سدائين اهڙي وقت ۾ دوستيءَ جو هٿ وڌائيندو آهي، جڏهن اُن کي ضرورت پوندي آهي ۽ ڪم نڪرڻ کان پوءِ اکيون ڦيريندي دير ناهي ڪندو. اِهوئي ڪجهه اسان سوويت يونين خلاف ڪيل جنگ ۾ ڏٺو ۽ هينئر پڻ افغانستان ۾ انتهاپسندن خلاف ڪيل جنگ ۾ اُن ساڳي روايت کي ورجايو آهي. تنهن ڪري پاڪستان کي پنهنجي توجه اهڙن دوستن طرف ڏيڻ گهرجي، جيڪي سندس ڏُکي سُکيءَ جا ساٿي هُجن.