تازيون خبرون

Daily Archives: April 22, 2015

پاڪستان دهشتگردي خلاف پوري دنيا ۾ فرنٽ لائن تي بيٺل آهي: شي چن پنگ

اسلام آباد (بيورو) چين جي صدر شي چن پنگ چيو آهي ته پاڪستان دهشتگردي خلاف پوري دنيا ۾ فرنٽ لائن تي بيٺل ملڪ آهي،  هن خطرن باوجود پنهنجي سالميت کي برقرار رکيو، جڏهن چين دنيا ۾ اڪيلو هو تڏهن کيس سڀ کان پهرين پاڪستان ئي تسليم ڪيو. پارليامينٽ جي گڏيل اجلاس کي خطاب ڪندي چين جي صدر شي چن پنگ چيو ته  دهشتگردي خلاف جنگ ۾ پاڪستان جون قربانيون وسارڻ جوڳيون ناهن، دوست ملڪ جو هر ڏئي وقت ۾ ساٿ ڏيڻ لاءِ تيار آهيون. هن چيو ته  پاڪستان عالمي دهشتگردي خلاف جنگ ۾ پهرين صف ۾ بيٺل آهي،خطي ۽ دنيا ۾ استحڪام لاءِ سندس ڪردار ساراهه جوڳو آهي. شي چن پنگ جو چوڻ هو ته پاڪستان خودمختاري ۽ معاشي بهتري جاري رکندو پيو اچي ۽ هن لاءِ ايشين ٽائيگر ٿيڻ جو موقعو پڻ آهي. هن چيو ته خطرن باوجود پاڪستان علائقائي ۽ جاگرافيائي حدن جو بچاءُ ڪيو. چيني  صدر جو چوڻ هو ته نئين چين کي تسليم ڪندڙ پاڪستان پهريون ملڪ هو ۽ کائن اهو ڏينهن نه وسرندو جڏهن چين پوري دنيا ۾ اڪليو ملڪ هو. شي چن پنگ چيو ته ترقي لاءِ ٻئي ملڪ هڪٻئي جو ساٿ ڏيندا رهندا ٻنهي ملڪن ۾ دوستي، پهاڙ کان بلند، سمنڊ کان اونهي ۽ ماکي کان مٺي آهي. سندس چوڻ هو ته هو پاڪستان جي علائقائي سلامتي ۽ خودمختاري جي حمايت ڪن ٿا،ٻئي ملڪ مستقبل ۾ هر  ڏکئي وقت جو گڏجي مقابلو ڪندا. چيني صدر  آرمي پبلڪ اسڪول پشاور جي شاگردن کي چين اچڻ جي دعوت ڏيندي چيو ته اسڪول تي حملو هڪ وڏو سانحو هو جنهن جو ڏک کائن ڪڏهن به نه وسرندو. شي چن پنگ چيو ته هو چيني عوام پاران پاڪستانين لاءِ نيڪ خواهشن جو پيغام کڻي آيو آهي ۽ پاڪستان پاران شاندار ميزباني تي ٿورائتو آهي. هن چيو ته پاڪستان جي گڏيل پارليامنيٽ کي خطاب ڪرڻ هن لاءِ وڏو اعزاز آهي جنهن تي هو  وزير اعظم، اسپيڪر  ۽ سينيٽ چيئرمين جو پڻ ٿورائتو آهي. هن چيو ته پاڪ-چين دوستي گڏيل اعتماد جو ثبوت آهي ۽ پاڪستان هن لاءِ ٻيو گهر آهي. شي چن پنگ چيو ته پاڪستان سٺو دوست، سٺو پاڙيسري ۽ سٺو ڀاءُ آهي. هن چيو ته پاڪستان عظيم ملڪ آهي، جنهن قدرتي آفتن ۽ ڏکيائن  ۾ هميشه ساٿ ڏنو. چيني صدر چيو ته پاڪستان کي جڏهن به ضرورت پئي هو سندس مدد لاءِ اڳتي آيا. هن چيو ته ايشيا ۾ اقتصادي ترقي پاڪستان ۽ چين جي منزل آهي. چيني صدر چيو ته اقتصادي راهداري منصوبو پاڪستان جي سمورن صوبن مان گذرندو. شي چن پنگ چيو ته فاٽا ۾ ترقياتي ڪمن لاءِ سهڪار ڪيو ويندو ۽ چين دهشتگردي خلاف جنگ ۾ پاڪستان سان گڏ آهي. هن چيو ته پاڪستان ۽ چين ۾ ڪيترن ئي منصوبن تي صحيحون ٿيون آهن. چيني صدر شي چن پنگ جو چوڻ هو ته پاڪستان چيلينجز کي منهن ڏيڻ ۾ ڪامياب ٿي رهيو آهي.

 

چين جي سلامتي کي پاڪستان جي سلامتي سمجهون ٿا:وزيراعظم

اسلام آباد (بيورو) وزيراعظم نواز شريف چيو آهي ته چين جي سڪيورٽي پاڪستان جي سڪيورٽي آهي، دهشتگردي جي خطرن کي ٻئي ملڪ گڏجي منهن ڏيندا، پاڪ-چين اقتصادي راهداري منصوبي سان نه پرف چئني صوبن پر گلگت ۽ آزاد ڪشمير کي به فائدو ٿيندو. پارليامينٽ جي گڏيل اجلاس کي خطاب ڪندي وزيراعظم نواز شريف چيو ته چيني صدر جو پارليامينٽ کي خطاب ايوان ۽ ملڪي عوام لاءِ تاريخي ڏينهن آهي. هن چيو ته چيني صدر شي چن پنگ نه صرف پنهنجي ملڪ پر پاڪستان ۾ به انتهائي مقبول آهي، سندس دوري سان ٻنهي ملڪن جا لاڳاپا وڌيڪ مضبوط ٿيندا. وزيراعظم نواز شريف چيو ته پاڪستان  ۽ چين حقيقي معنائن ۾ بردار ملڪ آهن، چيني عوام ۽ پاڪستان عوام جون دليون ڳنڍيل آهن. نواز شريف چيو ته پاڪ-چين دوستي آزمائش جي هر وقت ۾ پوري لٿي آهي، امن، ترقي ۽ خوشحالي لاءِ ٻئي ملڪ گڏجي ڪم ڪندا رهندا. وزيراعظم وڌيڪ چيو ته چين جي سڪيورٽي پاڪستان جي سڪيورٽي آهي، ٻئي ملڪ دهشتگردي جي هر خطرن کي گڏجي منهن ڏيندا. ان موقعي تي وزيراعظم نواز شريف چيني صدر کي علامه اقبال جو شعر پڻ پڙهي ٻڌايو.

 

چين جو صدر شي جن پنگ پاڪستان جو ٻن ڏينهن وارو تاريخي دورو مڪمل ڪري واپس روانو ٿي ويو

اسلام آباد (بيورو) چين جو صدر شي جن پنگ پاڪستان جو ٻن ڏينهن وارو تاريخي دورو مڪمل ڪري واپس روانو ٿي ويو، معزز مهمان کي صدر، وزيراعظم ۽ ٻين اهم شخصيتن الوداع ڪيو جڏهن ته چيني صدر جي جهاز کي جــَي ايف سيونٽين ٿنڊر جهازن سان يادگار رخصت ڪيو ويو. صدر ممنون حسين ايوان صدر مان چيني صدر شي جن پنگ کي خوشگوار ماحول ۾ الوادع ڪيو. نور خان ايئر بيس تان وزيراعظم نواز شريف، خاتون اول ڪلثوم نواز، وفاقي وزيرن سميت هٿياربند فوجن جي  سربراهن، جوائنٽ چيفس آف اسٽاف ڪميٽي جي چيئرمين ۽ پنجاب جي وڏي وزير شهباز شريف چيني صدر کي الوداع ڪيو. جــَي ايف سيونٽين ٿنڊر جهازن، شاندار آجيان وانگر معزز مهمان کي يادگار نموني رخصت به ڪيو. الوداع ٿيڻ کان اڳ صدر ممنون حسين سان چين جي صدر شي جن پنگ ون ٽو ون ملاقات ڪئي جنهن بعد وفدن جي سطح تي ڳالهيون ڪيون. صدر ممنون حسين جو چوڻ هو ته پاڪ چين اقتصادي راهداري منصوبو خطي جي تقدير بدلائي ڇڏيندو. هن چيو ته سندن خواهش آهي ته اقتصادي راهداري سان ڳنڍيل سمورن منصوبن تي تيزي سان عملدرآمد ٿئي. صدر ممنون حسين چيو ته پاڪستان ۾ ڪم ڪندڙ چيني شهرين جي سڪيورٽي پاڪستان لاءِ وڏي حيثيت رکي ٿي، چيني شهرين جي سڪيورٽي پاڪ فوج جي اسپيشل سڪيورٽي ڊويزن حوالي ڪرڻ جي منظوري ڏني آهي.

 

چين جي صدر شي جن پنگ کي اعليٰ ترين سول اعزاز ”نشان پاڪستان“ سان نوازيو ويو

اسلام آباد (بيورو) چين جي صدر شي جن پنگ کي پاڪستان جي اعليٰ ترين سول اعزاز ”نشان پاڪستان“ سان نوازيو ويو. پارليامينٽ ۾ خطاب کانپوءِ چيني صدر کي شاهي سواري بگهي ذريعي ايوان صدر آندو ويو جتي وفدن جي سطح تي ملاقات پڻ ٿي. بعد ۾ چيني صدر شي جن پنگ کي پاڪستان جي اعليٰ ترين سول اعزاز ”نشان پاڪستان“ ڏيڻ جي تقريب  منعقد ڪئي وئي. تقريب جي شروعات تلاوت قرآن پاڪ سان ٿي ۽ ٻنهي ملڪن جي قومي ترانن جون ڌنيون وڄايون ويون. صدر ممنون حسين، چيني صدر شي جن پنگ کي پاڪستان جي اعليٰ ترين سول اعزاز نشان پاڪستان نوازيو. تقريب ۾ وزيراعظم نواز شريف، وفاقي وزير، جوائنٽس چيفس آف اسٽاف ڪميٽي جو چيئرمين، ٽنهي هٿياربند فوجن جا سربراهه، چئني صوبن جا وڏا وزير ۽ ٻيون شخصيتون موجود هيون. ان کان اڳ چيني صدر شي جن پنگ جي مان ۾ صدر ممنون حسين ايوان صدر ۾ مانجهاندو ڏنو.

 

چين سان مضبوط لاڳاپن تي سڀني پارٽين جو هڪ ئي موقف آهي: خورشيد شاهه

اسلام آباد (بيورو) قومي اسيمبلي ۾ مخالف ڌر جي اڳواڻ خورشيد شاهه چيو آهي ته چين سان مضبوط لاڳاپن تي سڀني پارٽين جو هڪ ئي موقف آهي، پارليامينٽ جي گڏيل اجلاس کي چيني صدر جو خطاب اعزاز جي ڳالهه آهي. پارليامينٽ جي گڏيل اجلاس کي مختصر خطاب ڪندي اپوزيشن ليڊر خورشيد شاهه چيو ته هو چيني صدر ۽ سندس وفد کي پارليامينٽ ۾ آمد تي ڀليڪار چون ٿا. هن چيو ته چين سان مضبوط لاڳاپن جو بنيادي پيپلزپارٽي جي باني ۽ قائد عوام شهيد ذوالفقار علي ڀـُٽو وڌو، اهڙي  اليسي کي شهيد محترمه بينظير ڀٽو به جاري رکيو. خورشيد شاهه چيو ته پيپلزپارٽي پنهنجي گذريل حڪومتي دور ۾ به پنهنجي شهيد قاعدن جي پاليسين تي عمل ڪندي چين سان مضبوط لاڳاپن کي اڳتي وڌايو. اپوزيشن ليڊر وڌيڪ چيو ته پاڪستان ۽ چيني ۾ تاريخي لاڳاپا آهن، چيني سان لاڳاپن تي سڀني پارٽين جو هڪ ئي موقف آهي.

 

فوجي عدالتن طرفان 6 دهشتگردن جي موت واري سزا تي عملدرآمد روڪڻ خلاف درخواست داخل

اسلام آباد (بيورو) وفاق سپريم ڪورٽ ۾ فوجي عدالتن طرفان 6 دهشتگردن جي موت واري سزا تي عملدرآمد روڪڻ خلاف درخواست داخل ڪري ڇڏي. وفاق فوجي عدالتن طرفان 6 دهشتگردن جي سزائن تي عملدرآمد روڪڻ خلاف داخل درخواست ۾ موقف اختيار ڪي ويو ته حالتون ۽ واقعا 21 هين آئيني ترميم ۽ فوجي عدالتن جي قيام جي حق ۾ آهن جڏهن ته ترميم خلاف داخل درخواستن ۾ عدالتي اختيار جو تعين ٿيڻ اڃا باقي آهي. درخواست ۾ چيو ويو ته سپريم ڪورٽ بار متاثر ڌر ناهي ان ڪري  درخواست ۽ عدالتي اختيارن جي تعين کان اڳ سزائن تي عملدرآمد روڪڻ جو ڪو قانوني جواز ناهي. درخواست ۾ گذارش ڪئي وئي ته اسٽي آرڊر واپس وٺي داخل درخواست کي خارج ڪري. سپريم ڪورٽ ۾ فوجي عدالتن بابت ڪيس جي ٻڌڻي سڀاڻي ٿيندي. ياد رهي ته سـُپريم ڪورٽ جي 17 رڪني فل ڪورٽ 16 اپريل تي فوجي عدالتن مان موت جي سزا ٻـُڌايل ڇهن دهشتگردن جي ڦاهي روڪڻ جا حڪم جاري ڪيا هئا.

 

چين پاران ڏنل پيڪيج ۾ سنڌ جو حصو اٽي ۾ لوڻ برابر آهي: وڏو وزير

ڪراچي (مانيٽرنگ ڊيسڪ) سنڌ جي وڏي وزير سيد قائم علي شاهه چيو آهي ته چين پاران ڏنل پيڪيج ۾ سنڌ جو حصو اٽي ۾ لوڻ برابر آهي، چيني صدر جي آجياڻي ۾ شرڪت جي دعوت ئي نه ڏني وئي نجي ٽي وي سان ڳالهائيندي وڏي وزير سيد قائم علي شاهه چيو ته پنجاب پاران سي جي ڪئنال وهائڻ غيرقانوني آهي، ارسا سي جي ڪئنال وهائي سنڌ اسيمبلي جي قرارداد جي توهين ڪري رهيو آهي وڏي وزير چيو ته گڏيل مفادن واري ڪائونسل جو اجلاس ڪيتري ئي وقت کان نه ٿي سگهيو آهي، ان ڪري اسان سي جي ڪئنال کولڻ جي معاملي تي بين الصوبائي رابطن واري وزارت کي خط لکيو آهي وڏي وزير سيد قائم علي شاهه وفاقي حڪومت کي شڪايت ڪئي ته چيني صدر جي آجياڻي  ۾ وڏي وزير جي حيثيت ۾ کيس گهرائڻ گهرجي ها، پر وفاقي حڪومت کيس دعوت نه ڏني

 

وزيراعظم ٻڌائي ته چيني صدر پاڪستان جو دورو ڪيو يا پنجاب جو؟: الطاف حسين

ڪراچي (اسٽاف رپورٽر) ايم ڪيو ايم جي سربراهه الطاف حسين چيني صدر جي دوري جي آجيان ڪندي وزيرعاظم نوازشريف کان سوال ڪيو آهي ته چيني صدر پاڪستان جو دورو ڪيو آهي يا پنجاب جو جڏهن ته مناسب هجي ها ته تقريب ۾ پنجاب جي وڏي وزير سان گڏ ٻيا وڏا وزير به شريڪ ٿين ها. جناح گرائونڊ عزيز آباد ۾ ڪارڪنن کي ٽيليفونڪ خطاب ڪندي الطاف حسين چيو ته ايم ڪيو ايم چيني صدر جي پاڪستاني دوري کي قدر جي نگاهه سان ڏسي ٿي پر سندس استقبال ۾ وزيراعظم جي نياڻي مريم نواز ڪهڙي حيثيت ۾ شريڪ ٿي، مناسب هجي ته تاريخي موقعي تي سڄي ملڪ جي نمائندگي اُتي موجود هجي ها ۽ پنجاب جي وڏي وزير سميت، سنڌ، خيبرپختونخواهه ۽ بلوچستان جا وڏي وزير به ايئرپورٽ تي هجن ها. هن چيو ته متحده پاڪستان سڀني جي مفاد ۾ آهي انهيءَ لاءِ صوبن کي نظرانداز نه ڪيو وڃي ۽ ملڪ جي مستقبل سان نه کيڏيو وڃي ۽ اهڙو ڪو عمل نه ڪيو وڃي جنهن سان ننڍن صوبن ۾ احساسي محرومي پيدا ٿئي. هن چيو ته لاهور وانگر ٻين شهرن کي به ترقياتي منصوبن ۾ شامل ڪرڻ گهرجي، ڪراچي پاڪستان جو سڀ کان گهڻو ٽيڪس ادا ڪري ٿو، سڀ کان وڏي شهر کي ڇا ماس ٽرانزٽ جي ضرورت ناهي ۽ ڇا دهشتگردي جي متاثر پشاور جي عوام جي زخمن تي مرهم رکڻ جي ضرورت ناهي، هن چيو ته ايم ڪيو ايم سڄي ملڪ جي پوئتي پيل علائقن جي نمائندگي چاهي ٿي انهيءَ لاءِ خدارا پنجاب سان گڏ ٻين صوبن جي عوام جو به خيال رکيو وڃي.

 

ارسا سي جي لنڪ ڪئنال ۽ گريٽر ٿل ڪئنال بند ڪرڻ کان انڪار ڪري ڇڏيو

اسلام آباد (بيورو) ارسا سنڌ جي سخت احتجاج باوجود چشما جهلم لنڪ ڪئنال ۽ گريٽر ٿل ڪئنال بند ڪرڻ کان انڪار ڪري ڇڏيو آهي، ارسا پاران سنڌ جي اعتراضن واري خط جو اڄ جواب ڏيڻ جو فيصلو ڪيو ويو آهي. ارسا جو اجلاس چيئرمين رقيب خان جي صدارت هيٺ ٿيو، جنهن ۾ سنڌ جي نمائندي مظهر علي شاهه تڪراري چشما جهلم لنڪ ڪئنال ۽ گريٽر ٿل ڪئنال کولڻ جو معاملو اٿاريو. اجلاس ۾ چيئرمين رقيب خان ۽ سنڌ جي نمائندي مظفر علي شاهه وچ ۾ سخت جملن جي ڏي وٺ ٿي، سنڌ جي نمائندي مظهر علي شاهه سي جي ڪئنال کولڻ تي سخت احتجاج ڪيو. ارسا چيئرمين رقيب خان جو چوڻ آهي ته چشما جهلم لنڪ ڪئنال ۽ گريٽر ٿل ڪئنال کولڻ تي سنڌ جا اعتراض اجايا آهن، ٻنهي ڪئنالن کي بند نه ڪيو ويندو. اجلاس ۾ خيبرپختونخواهه ۽ پنجاب جي نمائندي پاران سي جي ڪئنال کولڻ جي حمايت ڪئي وئي، جڏهن ته بلوچستان جو نمائندو غيرجانبدار رهيو. ارسا پاران سي جي ڪئنال کولڻ تي اعتراضن بابت سنڌ حڪومت جي لکيل خط جو اڄ جواب ڏيڻ جو فيصلو ڪيو ويو آهي

 

الطاف حسين بلديه فيڪٽري جي متاثرن کان ڪڏهن معافي وٺندو: سراج الحق

ڪراچي (اسٽاف رپورٽر) جماعت اسلامي جي امير سراج الحق چيو آهي ته الطاف حسين اسٽيبلشمينٽ کان معافي ورتي آهي پر بلديه ٽائون فيڪٽري، 12 مئي ۽ طاهر پلازه سميت ٻين هزارن مقتولن جي وارثن کان ڪڏهن معافي وٺندو. دنيا جي ڪابه طاقت ۽ ڪنهن به قسم جي معافي متحده کي نٿي بچائي سگهي، 23 اپريل تي حلوو کائڻ نه ڏينداسين. نصيرآباد ۾ ريلي کي خطاب ڪندي سراج الحق جو چوڻ هو ته ڀتو نه ڏيڻ تي 259 مزدورن کي جيئرو ساڙيو ويو، پنهنجي طاقت جو مظاهرو  ڪرڻ لاءِ 12 مئي تي ڪراچي جي روڊن تي لاش وڇايا ويا، طاهر پلازه ۾ وڪيلن کي جيئرو ساڙيو ويو، ريلين تي حملا ڪري ڪيترن ئي ماڻهن کي ماريو ويو، الطاف حسين جي ڳچيءَ ۾ هزارين بي گناهن جو خون آهي، اسٽيبلشمينٽ جي معافيون سان الطاف حسين جا گناهه نٿا دوپجي سگهن. سراج الحق عوام کي اپيل ڪئي ته 23 اپريل تي لاشن تي پلجندڙ لساني گروهه کي رد ڪري ايماندار قيادت کي چونڊيو وڃي. سراج الحق چيو ته پاڪستان کي تقسيم ڪندڙ نفرت جي ديوار ختم ڪرڻ چاهيون ٿا، پاڪستان ۾ ظالم ۽ مظلوم جي ويڙهه آهي، قوميتن جي نه، اهڙو ڪراچي بڻائينداسين ته الطاف حسين موٽرسائيڪل تي هتي گهمندو، فيصل موٽا ۽ اجمل پهاڙي کي واپس صديقي بڻائينداسين.