تازيون خبرون

Daily Archives: April 21, 2015

انضمام الحق ملڪ ۾ انٽرنيشنل ڪرڪيٽ نه هئڻ کي ٽيم جي خراب ڪاڪردگي جو سبب قرار ڏيئي ڇڏيو

ڪراچي (اسپورٽس نيوز) اڳوڻي ڪپتان انضمام الحق ملڪ ۾ انٽرنيشنل ڪرڪيٽ نه هٿئڻ ک ٽيم جي خراب ڪارڪردگي جو سبب قرار ڏيندي چيو ته پاڪستان ڪرڪيٽ جي موجوده صورتحال نهايت ڳڻتي جوڳي ۽ سڀني کي ان تي توجهه ڏيڻ جي ضرورت آهي اسان 16 سالن کان پوءِ بنگلاديش کان به هارائي ويٺاسين انهيءَ مان اندازو لڳائي سگهجي ٿو ته اسان جي ڪرڪيٽ ڪٿي پهتي آهي. انٽرويو ۾ هن چيو ته اسان کي لازمي طور تي هاڻي اڳيون ورلڊ ڪپ کٽڻ کي حدف قرار ڏيڻ گهرجي ڇو ته تيستائين اسان کي هي ميگا ايونٽ کٽندي 27 سال ٿي چڪا هوندا انضمام الحق چيو ته اسان جي ملڪ ۾ انٽرنيشنل ڪرڪيٽ نه پئي ٿئي تنهنڪري نون ايندڙ نوجوانن کي ٽاپ ليول تي سيٽ ٿيڻ ۾ ڏکيائي ٿي رهي آهي.

 

پي سي بي انٽر ريجن انڊر 19 ڪرڪيٽ ٽورنامينٽ سڀاڻي کان شروع ٿيندي

اسلام آباد (اسپورٽس نيوز) پاڪستان ڪرڪيٽ بورڊ (پي سي بي) جي انتظام هيٺ 5 ڏينهن واري انٽر ريجن انڊر 19 ڪرڪيٽ ٽورنامينٽ (سڀاڻي) 22 اپريل کان شروع ٿيندي، پي سي بي طرفان جاري ڪيل تفصيل موجب ايونٽ ۾ ڪراچي سٽي ڪرڪيٽ ايسوسيئيشن کان ست زونز جون ٽيمون ايڪشن ۾ نظر اينديون.

 

چيني صدر جو دورو، اثر ۽ نتيجا مدد علي سنڌ

عالمي تناظر ۾، هن وقت چين جي صدر جو پاڪستان جو متوقع دورو انتهائي اهم آهي، جيڪو ڪيتري وقت کان ملڪي حالتن سبب ملتوي ٿيندو پئي آيو. چين جو صدر مسٽر ”شي چن پنگ“ جي مجوزه دوري جو باضابطه اعلان ٿيڻ شرط، ملڪ جي گادي واري شهر اسلام آباد ۾ هلچل مچي ويئي آهي. ان حوالي سان گادي واري شهر اسلام آباد ۾ ڪٿي ڪانفرنس، ڪا هنگامي گڏجاڻي، ڪو سيمينار وغيره پيو ٿئي.  يقينن پاڪستان جو، چين ماضي ۾ انتهائي ويجھو دوست رهيو آهي عالمي ماحول ۾ هن وقت پاڪستان جون اميدون چين ۾ آهن. خاص ڪري پاڙيسري ملڪ ڀارت ۽ آمريڪا جي ويجھي ڳانڍاپي سبب وري به چين ئي اڪيلو دوست آهي، پاڪستان جو، چين جو صدر يقينن خير سان اڄ اسلام آباد پهچندو. ان حوالي سان رٿابندي واري وزارت، پاڪ-چين رٿابندي، جي تياري ۾ رٿا ٺاهڻ جي ڪم ۾ مشغول آهي. اميد آهي ته ان دوري دوران ٻنهي ملڪن جي وچ ۾45 ارب ڊالرن جي لاڳت سان پاڪستان ۽ چين جي راهداري جي رٿائن واري ٺاهه تي صحيحون پڻ ٿينديون. اصل ۾ جڏهن بيجنگ ۾ چين جي صدر جو اسلام آباد واري دوري جو اعلان ٿي رهيو هو، ان وقت کان ٻنهي ملڪن جا اعليٰ عملدار گڏجاڻي ڪرڻ ۾ به چين ويا هئا.

در اصل ڪيترن ماڻهن کي، خبر نه آهي ته اهو راهداري وارو منصوبو ڇا آهي. جنهن تي 45 ارب ڊالر خرچ ٿيندا ۽ اهو  منصوبو ٻنهي ملڪن جي وچ ۾ هڪ اهم ٺاهه هوندو. بنيادي طور تي اها رٿا هڪ سال جي دوران تقريبن ڪاغذي طور تي تيار هئي. ان رٿا هيٺ چين ۽ پاڪستان جي سرحد خنجراب کان وٺي گوادر بلوچستان تائين، رستن ۽ ريل جي تعمبر کانسواءِ بجلي پيدا ڪرڻ جون رٿائون ۽ ٻيا به ڪيترا ترقياتي منصوبا شامل آهن. هن رٿا جي تفصيلات هن ريت آهي ته 10400 ميگاواٽ بجلي پيدا ڪرڻ جا منصوبا، 832 ڪلو ميٽر رستن جي تعميرات، 1763 ڪلو ميٽر ريلوي لائين کي ٺاهڻ ۽ گوادر بندر گاهه جا ڪيترا ترقياتي ۽ تعميراتي منصوبا شامل آهن، ان کانسواءِ چون ٿا ته هڪڙو ٽيلي ويزن چئنل پڻ انهي ٺاهه جو حصو هوندو. رٿابندي واري وفاقي وزير احسن اقبال موجب هن رٿا ۾ اهم ڀاڱو ٻارن جا منصوبا اهم آهن. جڏهن ته هن ئي رٿا تحت سڀ کان اول ڪوئلي جي وسيلي ڇهه هزار ميگا واٽ بجلي، سنڌ جي علائقي ٿر ۾ پيدا ڪئي ويندي. اها بجلي نه فقط ٿرپارڪر ضلعي مان غربت ختم ڪرڻ ۾ سهڪار ڪندي، بلڪه مستقبل ۾ ملڪ لاءِ به اهم ذريعو ۽ وسيلو ثابت ٿيندي.

جيتوڻيڪ ڪجهه ذريعا، يا وري سياسي اڳواڻ چون ٿا ته چين سان طئه ٿيندڙ ترقياتي رٿائون، مهانگيون آهن. پر وفاقي وزير احسن اقبال جو موقف آهي ته چين انهن رٿائن جي تعمير لاءِ سو لن شرطن تي قرض فراهم ڪري رهيو آهي. هن جو چوڻ آهي ته چين اسانجي نه فقط مدد ڪري رهيو آهي، بلڪه اهو اسانجي ملڪ ۾ ناڻي جي سيڙپڪاري به ڪري رهيو آهي. ۽ ان ڳالهه کان قطعي طور تي انڪار ڪونهي ته ڪنهن به ملڪ جي اقتصادي ترقي لاءِ پرڏيهي ناڻي جي سيڙپڪاري تمام ضروري هوندي آهي.  ۽ اها به هڪ کليل حقيقت آهي ته پاڪستان ڪيترن ئي سالن کان دهشت گردي واري صورتحال سبب غير ملڪي سيرپڪاري کان محروم رهندو آيو آهي. ان لاءِ پاڪستان لاءِ چين  جي اربين ڊالرن جي سيڙپڪاريءَ سان تمام گهڻو فائدو پهچندو. چون ٿا ته گوادر رپورٽ، ٻنهي ملڪن لاءِ نه فقط ڪاروباري مسئلو آهي بلڪه اهو هڪ اسٽريجڪ معاملو پڻ آهي. ماضيءَ ۾ هن پروجيڪٽ کي بلڪل غلط طريقي سان هينڊل ڪيو ويو. اهو پروجيڪٽ پهرئين سنگاپور جي حوالي هو، پر بعد ۾ گوادر بندرگاهه جو ڪم چين جي حوالي ڪيو ويو. هاڻ اهو به چيو پيو وڃي ته چين، ايران مان ايندڙ قدرتي گئس جي پائيپ لائين پاڪستان ۾ تعمير ڪندو. ياد رهي ته ان کان اڳ آمريڪا پاڪستان کي خبردار ڪيو هو ته جيڪڏهن هن ايران سان گئس پائيپ لائين رٿا ۾ اڳڀرائي ڪئي ته پوءِ پاڪستان تي پابندي لاڳو ڪري سگهجي ٿي. پر هاڻ 31 مارچ 2015 ايران سان آمريڪا سميت ڇهن عالمي طاقتن جي ٺاهه کانپوءِ صورتحال گهڻي حد تائين بدلجي ويئي آهي. پر اها ڳالهه به بلڪل وسارڻ جهڙي ڪونهي ته اڃا تائين ايران تي لاڳو آمريڪي پابندي ختم نه ٿي آهي. عبوري ٺاهه کانپوءِ آخري ٺاهه جو انتظار آهي، جيڪو  جون 2015 ۾ عمل ۾ ايندو. هو اطلاع موجب پاڪستان ۾ ايران سان ڪيل گئس پائيپ لائين رٿا تي ڪم ڪرڻ لاءِ چين سان ڳالهيون ڪري چڪو آهي. پاڪستان کي ان پروجيڪٽ کي مڪمل ڪرڻ لاءِ گهٽ ۾ گهٽ ڏيڍ ارب آمريڪي ڊالرز گهرجن، هوڏانهن ايران جو چوڻ آهي ته هنن پنهنجي ملڪ ۾ انهيءَ پائيپ لائين کي مڪمل طور تي وڇائي ڇڏيو آهي. پر پاڪستان ۾ اهو ڪم اڃا شروع نه ٿي سگهيو آهي، ياد رهي ته اها پائيپ لائين ايران ۾ 900 ڪلو ميٽر ۽ پاڪستان ۾ وري 700 ڪلو ميٽر ڊگهي آهي. انهيءَ ذريعي ايران مان گئس پاڪستان ۾1600 ڪلو ميٽر پائيپ لائين ذريعي اچي سگهندي. اهو پروجيڪٽ شروع ۾ ڀارت تائين وڃڻ وارو هو، پر ايران جي چوڻ موجب ڀارت انهيءَ ٺاهه تان، آمريڪي جي ڪري هٿ کڻي ويو.  2007 ۾ رٿا تيار ٿي هئي گذريل مارچ 2013ع ۾ پاڪستان ۽ ايران جي صدرن انهيءَ رٿا جو افتتاح پڻ ڪيو هو. انهيءَ سال مئي ۾ مسلم ليگ جي اقتدار ۾ اچڻ کانپوءِ وزير پيٽروليم شاهد خاقان عباسي چيو هو ته ان رٿا تي ڪو به پرڏيهي ملڪ پئسو هئڻ لاءِ تيار ڪونهي.

هڪ اطلاع اهو به آهي ته پاڙيسري ملڪ ڀارت کي، پاڪستان سان چين جي انهن راهداري واري ٺاهه تي گهڻي ڳٺتي آهي. ڇاڪاڻ ته پاڪستان ۽ چين جي وچ ۾ اعتماد جي فضا 1960ع کان قائم آهي ۽ ٻنهي ملڪن جي وچ اقتصادي ۽ سڪيورٽي تعاون، ڏکڻ ايشيا جي موجوده حالتن ۾ تمام ضروري ٿي پيو آهي. هڪ مهينو اڳ مارچ 2015 ۾ چين جي پرڏيهي وزير وانگ پي چيو هو ته جيڪڏهن افغانستان ۾ ڪا به ڌر چين جي مدد چاهيندا ته اهو پنهنجي خدمتون فراهم ڪندو رهيو. بهرحال گهڻي رنڊڪ کانپوءِ چين جو صدر پاڪستان پهچي رهيو آهي ۽ سندس اهو دورو، ٻنهي ملڪن جي وچ ۾ تعلقات کي وڌيڪ مضبوط ڪندو، جنهن ڳالهه کان ڪو به ماڻهو انڪار نه ڪري سگهندو.

 

افغانستان جي ڪلهي تي وري جنازه…!وينگس

افغانستان ڪڏهن دهشتگردي ۽ انتهاپسندي جي دلدل مان ٻاهر نڪرندو؟ ان سوال تي صرف افغانستان ئي نه پر پوري دنيا سوچي ٿي. اهو افغانستان جتي پهرين سيڪولر سوچ وارو راڄ هو.

مون کي افغاني دوست صاحبه پئڪار جا لفظ ياد آهن، جيڪا مون سان ڪم ڪري چڪي هئي. هن سان گڏ رهندي منهنجو جڏهن افغانستان جي ڪلچر تي بحث ٿيو ته هن پهرين جملو چيو، ”ڏس افغانستان جيڪو طالبان پيش ڪري رهيا آهن، افغانستان ائين ناهي، اسان جو افغانستان سيڪولر افغان آهي“. ٻئي ڏينهن تي هوءَ پنهنجي هڪ ڪاليج جي تصوير کڻي آئي، جنهن ۾ هن کي مني اسڪرٽ پاتل هئي، مون ان تصوير کي ڏسندي چيو ته يقينن تصوير خوبصورت آهي، ائين جيئن افغانستان. مون کلندي صاحبه پئڪار کي وڌيڪ چيو ته ”اسان کي خبر آ، اصل افغانستان جو چهرو ۽ سوچ ڪهڙي آهي، توکي ان حوالي سان وضاحت ڪرڻ جي ڪا ضرورت ناهي.“

هن ڪجهه وقت خاموش رهندي پوءِ ڳالهايو ته، ”اسان افغانين کي ڪراچي ۾ ائين نه ٿو ڏٺو وڃي، جيئن تون سوچين ٿي“. انهيءَ دوران مون صاحبه پئڪار کي ايترو ئي چيو ته سچائي کي ضرورت ناهي ته اها ثبوت ڏئي. تاريخ ۽ وقت ان جو پاڻ ئي فيصلو ڪندو. يقين ڪر، افغانستان وري ٻيهر پنهنجي سيڪولر سوچ جي راهه تي قدم رکندو. ان ڳالهه تي صاحبه پئڪار خوشي جو اظهار ڪيو.“

مون کي خبر ناهي ته صاحبه پئڪار هينئر ٻاهرين ملڪ جي ڪهڙي ملڪ ۾ رهي ٿي ڇا هوءَ واپس افغانستان وري آهي؟ جيستائين صاحبه پئڪار ۽ ڪجهه ٻين افغان ساٿين سان وقت گذريو ان دوران مان ان افغانستان سان مليس جنهن ۾ دقيانوسي جي رتي برابر به جڳهه نه هئي.

افغانستان پنهنجي بقا جي جنگ وڙهي رهيو آهي، ان جي جنگ صرف هڪ طالبان گروپ سان ناهي پر هڪ انتهاپسند سوچ جي خلاف آهي، جيڪي افغانستان کي ڄور وانگر اندر ئي اندر کان ختم ڪري رهيا آهن.

افغانستان کي طالبانن مان جند آجي ڪرڻي پوندي، ان ۾ ڪو شڪ ناهي ته هاڻي ملا عمر ۽ سندس ساٿين جو زور ٽٽي چڪو آهي پر طالبانن جي موجودگي کان ڪير انڪار نه ٿو ڪري سگهي. اهي ننڍڙن گروپن ۾ موجود آهن ان کان وڌيڪ اهي دقيانوسي ۽ انتهاپسندي جي سوچ ۾ پنهنجو عڪس ڏين پيا.

جيڪا انتهائي خطرناڪ ڳالهه ثابت ٿيندي. توهان هڪ گروپ سان وڙهي سگهو ٿا پر ان سان ويڙهه ڏکي هوندي جيڪي مذهب جو نالو استعمال ڪن ٿا. افغانستان ئي نه پر پورو ڏکڻ ايشيا، ان دهشتگردي جي طوفان کي منهن ڏئي سگهي ٿو.

ڇاڪاڻ جو هتي طالبان گروپ سان گڏ داعش گروپ به پيدا ٿي چڪو آهي. عراق ۽ شام جو حال ڇا ٿي چڪو آهي، سڀ ڪجهه سامهون آهي. پنهنجي بقا جي جنگ جي نالي تي يمن ۾ پير ڄمائڻ لاءِ سعودي سني اتحاد جوڙي جنگ جي شروعات ڪرڻ جي موڊ ۾ آهي پر ان جي سامهون داعش ۽ القاعده جهڙا گروپ، خطرو ناهن، انهن جي خلاف جنگ ڇو نه ٿي جوڙي وڃي؟

داعش جو ايشيا ۾ پير رکڻ جو ڪهڙو سبب آهي؟ اسان کي نه وسارڻ گهرجي ته داعش جي اچڻ سان افغانستان ۽ پاڪستان ۾ مذهبي فرقيواريت جي ويڙهه شروع ٿي ويندي.

افغانستان داعش جي موجودگي ۽ پاڪستان ۾ ان جا همدرد گروپ، خطري جو گهنڊ آهي. اڃان طالبانن سان پوري طرح جند آجي نه ڪرائي سگهيا آهيون ته مٿان وري داعش جهڙو گروپ اچي بيٺو آهي.

افغانستان جي شهر جلال آباد  ۾ ٻه خطرناڪ ڌماڪ ڪيا ويا، جن جي ذميواري داعش قبول ڪئي آهي ۽ ان جي مخالفت وري طالبان گروپ ڪئي. تعجب جو ٻئي گروپ هڪ ئي شاخ جا آهن داعش جاپيرا القاعده گروپ ڏانهن وڃن ٿا.

طالبان گروپ ڪيستائين داعش جي مخالفت تي قائم رهن ٿا اهو به ڏسڻو آهي. ڇاڪاڻ جو دهشتگرد گروپن ۾ به پنهنجي حڪمراني قائم رکڻ تي اختلاف آهن. اهي ٻئي هڪ ئي سڪي جا ساڳيا پاسا آهن.

داعش کي ڪهڙي ضرورت پئي جو انهن افغانستان جي شهر جلال آباد تي ٻه ڌماڪا ڪيا جنهن ۾ 41 ماڻهو ماريا ويا ۽ 100 کان مٿي ماڻهو زخمي ٿي پيا آهن.

هڪ پاسي افغانستان پنهنجو پير جمهوري حڪومت جي حوالي سان رکي رهيو آهي ۽ پاڙيسري ملڪن سان به بهتر لاڳا قائم ڪري پيو، جنهن ۾ پاڪستان سان به بهتر دوستاڻا ناتا وڌي رهيا آهن.

ان سان گڏوگڏ ايران سان به افغانستان دوستي جو هٿ وڌائي پيو، ڇا ڪٿي ڪو اسلامي ملڪ افغانستان جي ايران سان دوستي جي قدم تي چڙيل ته ناهي!

داعش جي افغانستان ۾ موجودگي واضح پيغام ڏئي پئي ته هاڻي وري دهشتگردي جي لهر اُڀرندي. جيڪڏهن افغانستان ۽ پاڪستان ان لهر جي خلاف پنهنجا پير مضبوط ڪري نه بيهاريا ته پوءِ اها لهر ٻنهي ملڪن سان گڏ پوري ڏکڻ ايشيا کي وڪوڙي ويندي ۽ خاص طور تي پاڪستان ۽ افغانستان مذهبي فرقيواريت جي جنگ کي برداشت نه ٿا ڪري سگهن.

ان جي لاءِ جلال آباد جي ڌماڪن کي صرف ڌماڪن تائين نه ڏسڻ گهرجي ان کي سنجيده وٺڻو پوندو ڇو جو داعش جي موجودگي جو مطلب ته اهي ڪٿي افغانستان ۽ پاڪستان ۾ نه ٿا اچن ڇو جو عراق ۾ ڪرد گروپ داعش کي ٽف ٽائيم ڏنو آهي ۽ شام جي حالت اڳ ئي خراب آهي.

داعش پاڻ کي وڌائڻ لاءِ اڳتي اچي سگهي ٿي ۽ افغانستان جي ڪلهن تي ٻيهر جنازه کڻڻ هڪ پيغام آهي ته اسان سڀئي دهشتگردي جي دلدل ۾ اڃان ڦاٿل آهيون. ان جي لاءِ گڏ اتحاد ڪري نڪرڻو پوندو.

افغانستان جي سرزمين تي ڌماڪا پوري خطي جي سرزمين تي ڌماڪا ڪرڻ برابر آهي. داعش کي وڌيڪ اڳتي اچڻ کان روڪڻ لاءِ ضروري آهي ته ان کي پهرين ئي ڌڪ ۾ ڪمزور ڪرڻ گهرجي جو اهي ٻيهر وري ڌماڪا نه ڪري سگهن ۽ نه ئي هن خطي ۾ پير رکڻ جو سوچين.

افغانستان جنهن انداز سان طالبانن جي خلاف جنگ وڙهي آهي انهن کي محسوس ٿيندو هوندو ته جنگ اڃا ختم ناهي ٿي پر ان ناسور کي ختم ڪرڻ لاءِ پاڙ پٽڻ ضروري آهي ته جيئن اسان جي ايندڙ نسلن جي ڪلهن تي ٻيهر انتهاپسند ۽ دهشتگرد جنازه نه ڏين.

اهي دهشتگرد سمجهن ٿا ته ڪلهن تي جنازه ڏئي، افغانستان کي ڪمزور ڪندا پر انهن کي اها خبر ناهي ته هي اهو افغان آهي، جنهن جي ڪلهن تي ڪيترائي جنازه آيا پر هو اڄ به پهاڙ جيان بيٺل آهي.

 

دهشتگردي ڪٿي دنگ ڪندي ….

                 ڪو وقت هو، جڏهن هن ملڪ ۾ هر طرف خوشحالي، امن ۽ سڪون جو راڄ هو، پر خبر ناهي ته پاڪستان خاص ڪري سنڌ جي راڄڌاني واري شهر کي ڪنهن جي نظر لڳي وئي، حالتون ايتريون ته خراب ٿي ويون جو روزانو شهر جي مختلف رستن تي رت جي هولي کيڏندي نظر آئي آهي، وحشي صفت درندن ڪيترن ئي مائرن جون هَنجون خالي ڪري ڇڏيون ۽ عورتن کان سندن سهاڳ ڇِني ڇڏيا. ملير جي علائقي ۾ پوليس مقابلي ۾ پابندي مڙهيل تنظيم جي ڪمانڊر سميت 6 دهشتگردن کي ماريو ويو آهي، جن جي قبضي مان 6 ڪلاشنڪوف، 6 پسٽل، هينڊ گرنيڊ ۽ ڌماڪيدار مادو پڻ هٿ ڪيو ويو، مارجي ويل طالبان ڪمانڊر جي سڃاڻپ تحريڪ طالبان جي سربراهه حڪيم الله محسود جي ويجهي ساٿي طور ڪئي وئي،  جيڪو وزيرستان ۾ سيڪيورٽي فورسز تي حملن ۾ پڻ ملوث رهيو، اهو پڻ ٻڌايو ويو آهي ته مارجي ويل طالبان ڪمانڊر احمد خان آمريڪي ڊرون حملي ۾ زخمي ٿي پيو هو، ان ڪري علاج لاءِ کيس وزيرستان مان ڪراچي آندو ويو. اها خبر پڙهڻ سان ڪيترو ته افسوس ٿئي ٿو ته ڪراچي ۾ دهشتگرد نه رڳو لڏپلاڻ ڪري اچي پناهه وٺن ٿا، پر اتي انهن جي تيمارداري پڻ ڪئي وڃي ٿي. وزيرستان ڪراچي سان لڳو لڳ ته ناهي، پوءِ سوچڻ جي ڳالهه اها آهي ته انهن دهشتگردن کي ڪراچي ايندي رستي ۾ ڪا رنڊ روڪ به ناهي. ان ۾ ڪو شڪ ناهي ته ضرب عضب آپريشن شروع ٿيڻ کانپوءِ دهشتگردن نه رڳو افغانستان جو رُخ ڪيو، پر انهن يقينن بلوچستان جي پهاڙي علائقن ۽ ڪراچي جي مختلف علائقن ۾ روپوشي اختيار ڪري پناهه ورتي، جيڪي وقت بوقت ڪارروايون ڪندا رهن ٿا. اسان وٽ رڳو قلم ئي اهڙو هٿيار آهي، جنهن سان دهشتگردن خلاف جنگ ۾ حصو وٺي سگهون ٿا، ملڪ ۾ آئين ۽ قانون موجود آهي، ان ڪري اها سيڪيورٽي فورسز جي ئي ذميواري آهي ته دهشتگردن جو نه رڳو خاتمو آڻي، پر انهن جي ٺڪاڻن، پناهگاهن ۽ انهن کي مالي مدد فراهم ڪندڙن خلاف به ڪارروائي ڪري. ملڪ ۾ آخري دهشتگرد جي خاتمي تائين انهن خلاف مضبوط ۽ منظم طريقي سان آپريشن جاري رکڻ گهرجي. دهشتگردن جا مقصد رياست خلاف آهن، ان ڪري انهن جو خاتمو ضروري آهي، اسان کي اهو عزم ڪرڻ گهرجي ته هلندڙ سال سڄي ملڪ ۾ سمورن دهشتگردن جي خاتمي جو سال ثابت ٿئي. دهشتگردي جي خاتمي سان ئي خوشحالي، امن ۽ استحڪام جي راهه شروع ٿئي ٿي، دهشتگردن ملڪ ۾ هر مذهب سان تعلق رکندڙ عبادتگاهن، تعليمي ادارن ۽ سرڪاري ملڪيتن کي نقصان پهچايو آهي. اسان سمجهون ٿا ته پاڪ فوج، پوليس، رينجرز ۽ ٻيا قانون لاڳو ڪندڙ ادارا دهشتگردي خلاف ڀرپور عزم سان جنگ وڙهي رهيا آهن، دهشتگردن جي خاتمي لاءِ شروع ڪيل آپريشن ساراهه جوڳو آهي، پر ساڳئي وقت اها ڳڻتي جي ڳالهه آهي ته دهشتگرد ملڪ جي مختلف حصن ۾پکڙيل آهن، جيڪي ختم ٿيڻ جو نالو ئي نٿا وٺن ۽ عوام کي هر وقت دهشتگردي جو خطرو رهي ٿو. بهرحال، دهشتگردن خلاف جنگ ته جاري رهندي، پر ان جي باوجود اها اُميد باقي آهي ته ڪراچي ۾ هڪ ڏينهن ضررو امن قائم ٿيندو، دهشتگردن جو تعلق ڪنهن به مذهب سان ناهي هوندو، بيگناهه ماڻهن جو خون وهائيندڙ درندن جو تعلق رڳو دهشتگردي سان ئي هوندو آهي، جنهن جي سزا به عبرتناڪ هجڻ گهرجي.